کوردستان
"لیوا قارەمان کەمال" جێگری سەرۆکایەتی ئەرکان بۆ ئۆپراسیۆنەکان لە وەزارەتی پێشمەرگە بە کوردسات نیوزی ڕاگەیاند، پڕۆسەی یەکخستنی ھێزەکانی پێشمەرگە لە چوارچێوەی وەزارەتی پێشمەرگە بەردەوامە و ساڵی ڕابردوو ٤ لیوای ھێزەکانی ٧٠ و ٨٠ و دوو لیوای پشتیوانی یەکخراونەتەوە، بە درێژایی پڕۆسەکەش ١٨ لیوای ھێزی پێشمەرگە خراونەتە سەر وەزارەت و کراون بە لیوای ھاوبەش و چەک و پێداویستییە سەربازییەکانیشیان بۆ دابین کراوە.
ڕاشیگەیاند، لە سەرەتای ئەمساڵەوە کار دەکرێت بۆ یەکخستنی دوو لیوای تر و ئێستا ھێزەکانی ٨٠ ناوی لیوایەکی ئامادە کردووە و دراوە بە وەزارەتی پێشمەرگە بۆ ئەوەی لەگەڵ لیوایەکی ھێزەکانی ٧٠ یەکبخرێن.
لیوا قارەمان کەمال جەختیشیکردەوە، پڕۆسەی یەکخستنەوەی ھێزەکانی دەرەوەی وەزارەتی پێشمەرگە بەردەوام دەبێت تاوەکو سەرجەمیان لە چوارچێوەی وەزارەتی پێشمەرگە یەکدەخرێنەوە و دەبنە لیوای سەر بە وەزارەت.
وتیشی، دزەکردنی تیرۆریستان لە ڕۆژئاڤای کوردستانەوە بۆ ناو عێراق مەترسی بۆ سەر چەند ناوچەیەکی ھەرێمی کوردستانیش دروست دەکەن.
لیوا قارەمان ئاماژەی بەوەشدا، لە ناوخۆی عێراق شانە نووستووەکانی داعش بەدوای دەرفەتێکدا دەگەڕێن پەلاماری پێشمەرگە و سوپای عێراق بدەن، بۆ ھەردوو مەبەستەکە ھێزەکانی پێشمەرگە بە ھەماھەنگی لەگەڵ سوپای عێراق لە ئامادەباشیدان بۆ ھەر پەلامارێکی داعش کە لە ناوخۆ و دەرەوە بکرێتە سەر ناوچەکانی ھەرێمی کوردستان.
"ئالان حەمە سعید" وەزیری پەروەردەی ھەرێم ڕایگەیاند، بە مەبەستی پاراستنی سەلامەتی گیانی مامۆستایان و خوێندکاران بەھۆی دابەزینی پلەکانی گەرمی بڕیاریاندا لە سەرجەم ناوەندەکانی خوێندنی حکومی و ناحکومی تاکو ڕۆژی یەکشەممەی داھاتوو ٣٠ی کانوونی دووەمی ٢٠٢٢ پشوو دەبێت.
ئاماژەی بۆ ئەوەشکرد، ئەو ھەڵسەنگاندن و تاقیکردنەوانەی وەرزی یەکەم کە ئەنجام نەدراون لە ڕۆژی دووشەممە ٣١ی کانوونی دووەمی ٢٠٢٢ دەستپێدەکرێتەوە، بە مەرجێک بەیانیان لە سەعات ٩ و ٣٠ خولەکی بەیانی دەستپێبکات.
ئاماژەی بۆ ئەوەشکردووە، خوێندنگەکانی سابیس و نێودەوڵەتی و بیانی کە پڕۆگرامی تایبەت بە خۆیان ھەیە دەتوانن تا وادەی ئاماژە پێکراو بە شێوازی خوێندنی ئۆنلاین بەردەوام بن.
ڕوونیشیکردووەتەوە، دوای ئەنجامدانی ئەو تاقیکردنەوانەی کە ماون خوێندنی وەرزی دووەم دەستپێدەکات و ئەنجومەنی وەزارەتی پەروەردەش بۆ قەرەبووکردنەوەی ماوەی لەدەستچوو، ساڵنامەی خوێندن ھەموار دەکاتەوە.
ھێزەکانی سوریای دیموکرات لە راگەیەندراوێکدا بڵاویکردەوە، لە کاتێکدا شانە نووستووەکانی داعش لە نزیک گروتوخانەی گوێران لە حەسەکە ئۆتۆمبێلێکیان تەقاندووەتەوە، دەستگیرکراوەکانی داعش لە گرتوخانەکەدا یاخیبوون و ھەوڵی ھەڵھاتنیان داوە، بەڵام ھێزەکانیان توانیان کۆنترۆڵی رەوشەکە بکەن و ھەوڵی ھەڵھاتنەکە ھەڵبوەشێننەوە.
لە راگەیەندراوەکەدا باس لەوەش کراوە، لە گەڕەکەکانی نزیک گرتوخانەکە پێکدادان لەنێوان شانە نوستووەکانی داعش و ھێزەکانی ئاسایشدا روویداوە و لە ئۆپراسیۆنێکی ھاوبەشی نێوان ھەسەدە و ئاسایش و ھێزەکانی ھاوپەیمانی نێودەوڵەتی لە گەڕەکی زوھور، دوو لە چەکدارەکان کوژراون. بەپێی دواین زانیاریش حەوت کەس بریندارن کە سیانیان لە ئەندامانی ئاسایشی رۆژئاڤان.
گرتوخانەی گوێران پێنج ھەزار دەستگیرکراوی داعشی لێیە و لەژێر چاودێری توندی ھێزەکانی ئاسایشی رۆژئاڤادایە.
حەمید حوسێن تەھا ناسراو بە حەمید ڕەشاش لە ساڵی ١٩٣١ لە دایکبووە و لە سەرەتای لاویدا لەگەڵ ھەڵگیرسانی شۆڕش دەبێت بە پێشمەرگە و یەکەم ڕەشاش بەدەستی ناو شۆڕش دەبێت، لە چالاکییەکی پێشمەرگەشدا پێنج پێشمەرگە ناویان حەمید بووە بۆ ئەوەی لەیەک جیابکرێنەوە سەرۆک مام جەلال نازناوی حەمید ڕەشاش بە "حەمید حوسێن تەھا" دەبەخشێت.
حەمید ڕەشاش ھەر ئەو کاتە تێدەگات شۆڕش پێویستی بە خەباتی سیاسیش ھەیە، سەرەڕای ئەوەی نەخوێندەوار بووە، بەڵام کۆڵی نەدا و دەستی بە خوێندەواری و زانست و نوسین کردووە و لە پاڵ پێشمەرگایەتیدا درێژەی بە ئەو بوارانەشدا و خاوەنی چەند کتێبێکە.
حەمید ڕەشاش دوای چەندین ساڵ لە خەبات و تێکۆشان ئەمڕۆ لە تەمەنی ٩١ ساڵیدا کۆچی دوایی کرد.
لیژنەی فریاگوزاری سلێمانی لە راگەیەنراوێکدا ئاگاداری ھاووڵاتیان و شۆفێران دەکات کە ھێشتا شەقامەکانی ناو شار و دەرەوەی شار بەستەڵەکە و مەترسی ڕووداوی ھاتوچۆی ھەیە، بۆ ئەوەی تووشی ڕووداو و کارەساتی ھاتووچۆ نەبن، بە ھیچ جۆرێک لە ماڵەکانیان نەیەنە دەرەوە و شۆفێری نەکەن چونکە تا چەند سەعاتی داھاتوو ھیچ ڕێگایەک سەلامەت نییە.
وتەبێژی ھاتووچۆی ھەولێریش رایگەیاند، رێگای ھەولێر - کەسنەزان لە نزیک مۆنۆمێنتەکە بەھۆی شەختە و بەستەڵەک بەستوویەتی و لەکاتی لێخوڕینی ئۆتۆمبێلدا ئاگادار بن.
تاھیر عەبدوڵا، بەڕێوەبەری گشتیی فڕۆکەخانەی نێودەوڵەتیی سلێمانی، بە کوردسات نیوزی راگەیاند، ھێشتا ھیچ گەشتێک لە فڕۆکەخانەکەوە ئەنجام نادرێت و گەشتەکان دەستیان پێنەکردووەتەوە.
رۆژی پێنجشەممە، تاھیر عەبدوڵا بەڕێوەبەری فڕۆکەخانەی نێودەوڵەتیی سلێمانی، بە کوردسات نیوزی راگەیاند، شەپۆلی بەفربارین کاریگەری لەسەر گەشتە ئاسمانییەکان ھەبووە و فڕۆکەکان ناتوانن بنیشنەوە و مەودای بینین کەمبووتەوە، بۆیە ژمارەیەک گەشت راگیراون و چاوەڕوان دەکەن بە زووترین کات گەشتەکان دەستپێبکاتەوە.
ھێزەکانی سوریای دیموکرات لە راگەیەندراوێکدا بڵاویکردەوە، لە کاتێکدا شانە نووستووەکانی داعش لە نزیک گروتوخانەی گوێران لە حەسەکە ئۆتۆمبێلێکیان تەقاندووەتەوە، دەستگیرکراوەکانی داعش لە گرتوخانەکەدا یاخیبوون و ھەوڵی ھەڵھاتنیان داوە، بەڵام ھێزەکانیان توانیان کۆنترۆڵی رەوشەکە بکەن و ھەوڵی ھەڵھاتنەکە ھەڵبوەشێننەوە.
لە راگەیەندراوەکەدا باس لەوەش کراوە، لە گەڕەکەکانی نزیک گرتوخانەکە پێکدادان لەنێوان شانە نوستووەکانی داعش و ھێزەکانی ئاسایشدا روویداوە و لە ئۆپراسیۆنێکی ھاوبەشی نێوان ھەسەدە و ئاسایش و ھێزەکانی ھاوپەیمانی نێودەوڵەتی لە گەڕەکی زوھور، دوو لە چەکدارەکان کوژراون. بەپێی دواین زانیاریش حەوت کەس بریندارن کە سیانیان لە ئەندامانی ئاسایشی رۆژئاڤان. ھەسەدە لە دووەم راگەیە ندراویدا لەبارەی رووداوەکەوە رایگەیاندووە، ھێزەکانی ئاسایش توانیویانە دوو لەو دەستگیرکراوانەی داعش دەستگیربکەنەوە کە لەزیندانەکە ھەڵھاتبوون و پڕۆسەی گەڕان و پشکنین لە دەورووبەری زیندانەکە بەردەوامی ھەیە.
گرتوخانەی گوێران پێنج ھەزار دەستگیرکراوی داعشی لێیە و لەژێر چاودێری توندی ھێزەکانی ئاسایشی رۆژئاڤادایە.
پەیامنێری کوردسات نیوز رایگەیاند، شۆفێرەکە لە کاتی چوونی بۆ پاککردنەوەی رێگای سەرەکی ناحیەی بەمۆ لە بەفر، لە ناوچەی گردەجاڵی سەر بە ناحیەی بەمۆ بلدۆزەرەکەی وەرگەڕا و کەوتووەتە ژێرییەوە، بەو ھۆیەوە گیانی لەدەستداوە.
وتیشی، شۆفێرەکە بۆ پاککردنەوەی رێگاکە بە خۆبەخشی رۆشتووەتە ئەو ناوچەیە.
بەھۆی بارینی بەفرێکی زۆر رێگاکانی سنوری ناحیەی بەمۆ بەستوویەتی و سەخت بووە و تیمەکان سەرقاڵی پاککردنەوەی رێگاکانن.
دەقی پرسەنامەکە...
خانەوادە و کەسوکاری تێکۆشەر و پێشمەرگەی دێرین و کەسایەتی شاری ھەولێر مام حەمید ڕەشاش
بە داخ و پەژارەیەکی زۆرەوە ھەواڵی کۆچی دوایی مام حەمیدی جوامێری گشت قۆناغەکانی خەباتی گەلەکەمانمان پێگەیشت، ئەم زاتە کۆڵنەدەر و ماندونەناسە لەھەمومان ڕۆیشت، چونکە مام حەمید لەسەرەتای شۆڕشی ئەیلولەوە ھەمیشە لە ڕیزی ھزری پێشکەوتنخوازیدا بوە و ھاوڕێ و ھاوسەنگەری مام جەلال بوە و ھەمووساتەکانی ژیانی بۆ خزمەتی گەلەکەی تەرخانکردوەو لە زۆربەی ناوچەکانی کوردستاندا وەک پێشمەرگە و کادیرێکی لێھاتوو و کۆمەڵایەتی جێگە دەستی دیار بوە.
مام حەمید نمونەی کەسایەتی و جوامێریی و مەردایەتیەکی وەھا بوو لەگەڵ ھەڵکشانی تەمەنیشیدا ئەو بەردەوام بو لە تێکۆشان. ئیمڕۆش لە کۆچی دوایی مام حەمید ڕەشاشی ھەگبە پڕ لە خەباتدا جارێکی تر پرسە و ھاوخەمی خۆمان بە خانەوادەی کۆچکردو ڕادەگەیەنین و لەیەزدانی مەزن داواکارین ڕۆحی پاکی بە بەھەشتی بەرین شاد بکات و سەبوری بە کەسو کاری ببەخشێت.
انا للە وانا الیە راجعون
مەکتەبی سیاسی
یەکێتیی نیشتمانیی کوردستان
دەقی پرسەنامەکە...
بەرێزان خانەوادە و بنەماڵەی کۆچکردوو
بەداخ و پەژارەیەکی زۆرەوە ھەواڵی کۆچی دوایی مام(حەمید رەشاش)م پێگەیشت، بۆ ئەم ماتەمە، پرسە و سەرەخۆشیتان ئاڕاستە دەکەم و بەشداری خەمی قووڵتانم.
مام(حەمید رەشاش) کەسایەتی کوردپەروەر و پێشمەرگەی قارەمان و خەباتکاری بە ئەزموون و پشوودرێژ لە خەباتی نیشتمانیی گەلی کورد، ھاوڕێی ئازیز و دڵسۆزی سەرۆک مام جەلال و تێکۆشەرێکی بەئەمەکی یەکێتی بوو، کێوێک بو لەوورە و خۆڕاگری، بۆ ھەتایە ناوی لە مێژووی پڕ سەروەری ئەم گەلەو یەکێتیدا بە پرشنگداری دەمێنێتەوە.
خوای گەورە سەبوریی و دڵنەوایی بەھەموو لایەکمان ببەخشێت و ئەمەش دوا کۆستی خانەوادەکەتان بێت و مام حەمید بەبەھەشتی بەرین شاد بکات.
شاناز ئیبراھیم ئەحمەد
کارگێری مەکتەبی سیاسی (ی.ن.ک) و سەرپەرشتیاری مەڵبەندی ١ی رێکخستنی سلێمانی
دەقی پرسەنامەکە...
پرسەنامەی کۆسرەت رەسول بۆ کۆچی دوایی مام حەمید رەشاش
بەداخێکی زۆرەوە ھەواڵی کۆچی دوایی تێکۆشەری گەورەی گەلەکەمان، پێشمەرگەی دێرین و قارەمان مام حەمید رەشاش-م بیست.
مام حەمید رەشاش یەکێک بوو لە تێکۆشەرە گەورەکانی گەلەکەمان، ژیان و خەباتی خۆی تەرخان کرد بۆ خزمەتی گەلەکەمان و تا دوایین ساتەکانی تەمەنی کۆڵی نەداو بەردەوام بوو لە خەبات و درێژەدان بەو کاروانەی تێکۆشەرانی کوردو یەکێتیی دەستیان پێکردوو و بەردەوامە.
بەداخەوە ئەمڕۆ مام حەمید رەشاش دواماڵئاوایی لێکردین و ھەموومانی دڵتەنگ و خەمبار کرد، بۆ ئەم کۆستەو لەدەستدانی ئەم تێکۆشەرە گەورەی گەلەکەمان پرسەو سەرەخۆشی و ھاوخەمی خۆم ئاراستەی خانەوادەی کۆچکردوو و ھاوڕێ و ھەڤاڵانی مام حەمید رەشاش دەکەم و ھیواخوازم ئەمە دواکۆست و ناخۆشی ھەموو لایەک بێت، خوای گەورە سەبووری ھەموو لایەک بدات و کۆچکردوو جێگای بەھەشتی بەرین بێت.
کۆسرەت رەسول عەلی
سەرۆکی ئەنجومەنی باڵای سیاسی و بەرژەوەندی
یەکێتیی نیشتمانیی کوردستان
دەستەی ژینگەی ھەرێم لە راگەیەندراوێکدا بڵاویکردەوە، بەھۆی بارینی بەفرێکی زۆر و دەستنەکەوتنی خۆراک، باڵندە و ئاژەڵە کێوییەکان لە ماڵان و ئاوەدانی نزیک دەبنەوە، داوا لە ھاوڵاتیانیش دەکەن نەیان کوژن، چونکە سروشت بەوانەوە جوانە.
راشیگەیاندووە، مەفرەزەکانی پۆلیسی دارستان و ژینگەی ھەرێم بەردەوام دەگەڕێن بە دوای ئەو کەسانەی ئاژەڵ و باڵندەکان ڕاو دەکەن و ھەر کەسێک دەستگیر بکەن کە ڕاو دەکات دەدرێتە دادگا و میلۆنێک تا شەش ملیۆن دینار سزا دەدرێت.
ئەنجومەنی زانکۆی سلێمانی لە راگەیەندراوێکدا بڵاویکردەوە، بەڕەچاوکردنی سەختی کەشوھەوای پارێزگای سلێمانی و دەوربەری و بەستنی ڕێگاکان، ئەنجومەنی زانکۆ بڕیاریدا بە دواخستنی تاقیکردنەوەکانی ڕۆژانی شەممە و یەکشەممە لە سەرجەم کۆلێژەکان و تاقیکردنەوەکان ڕۆژی دووشەممە و سێشەممە دەکرێن.
راشیگەیاند، لە ڕۆژی شەممەوە بەشەناوخۆییەکانی زانکۆ بە ڕووی خوێندکارانی دەرەوەی شار دەکرێنەوە و ڕۆژی یەکشەممەش دەوامی زانکۆی سلێمانی ئاسایی دەبێت.
جەختیشیکردەوە، ئەو وانانەی بەھۆی سەختی کەشوھەواوە نەخوێندراون، بە شێوەی ئەلکترۆنی لەناو کڵاس روومەکان بخوێنرێن.
وەزارەتی کارەبای ھەرێمی کوردستان، لە راگەیاندراوێکدا ئاماژەی بەوەکرد، بۆ پاراستنی ژیان و تەندروستیی ھاووڵاتیان و بە پشتبەستن بە بڕیار و راسپاردەکانی لیژنەی باڵای بەرەنگاربوونەوەی کۆرۆنا، ھەر فەرمانبەرێکی وەزارەتی کارەبا ڤاکسین وەرنەگرێت، رێگەی پێنادرێت دەوام بکات، ئەو ھاووڵاتیانەشی ڤاکسینیان وەرنەگرتبێت، ناتوانن سەردانی بەڕێوەبەرایەتی و فەرمانگەکانی کارەبا بکەن.
وەزارەتی کارەبا راشیگەیاند، بڕیارەکە لە رۆژی ٢٣ی ئەم مانگەوە دەچێتە بواری جێبەجێکردنەوە و لەلایەن بەڕێوەبەرایەتیی گشتیی دیوانی وەزارەتی کارەباوە جێبەجێ دەکرێت.