کوردستان
بە پێی نوسراوێکی ئارام محەمەد قادر، وەزیری خوێندنی باڵا و توێژینەوەی زانستیی ھەرێمی کوردستان، وەزیری دارایی و ئابووری ڕاسپێردرا بۆ دابینکردن و خەرجکردنی ٧ ملیار و ٢٥٠ ملیۆن دینار وەک پاڵپشتی دارایی بۆ وەزارەتی خوێندنی باڵا، وەک پێشینەیەکی مانگانە بۆ پاڵپشتی قوتابیان و خوێندکاران و چارەسەرکردنی گرفتی بەشە ناوخۆییەکان و دابینکردنی خزمەتگوزاری، وەزارەتی دارایی بڕیارەکە لە ١ی مانگی داھاتووەوە جێبەجێ دەکات بۆ ساڵی خوێندنی ٢٠٢١-٢٠٢٢.
بەڕێوەبەرایەتی گشتی نەھێشتنی ماددە ھۆشبەرەکان ڕایگەیاند، ئەمڕۆ لەناو شاری ھەولێر لەلایەن کارمەند و ئەفسەرەکانیانەوە ٤ تۆمەتبار دەستگیرکران و ڕەوانەی بەردەم دادوەری لێکۆڵینەوە کران، ھاوکات لە کاتی دەستگیرکردنیاندا تونرا دەستبگیرێت بەسەر ٨ ھەزار و ٥٠٠ دۆلاری ساختە لەگەڵ دەستبەسەرداگرتنی ٢٧ گرام ماددەی ھۆشبەر لە جۆری کریستاڵ و ھێرۆین و حەبی ترامادۆڵ.
بە داخ و کەسەرێکی زۆرەوە ھەواڵی کۆچی دوایی کەسایەتی شاری ڕواندز و مامۆستا و ھونەرمەندی گەورەی کورد (زرار محەمەد مستەفا)مان پێگەیشت .
مامۆستا زرار جگە لەوەی کەسایەتیەکی ناوداری شاری ڕواندز بوو لە ھەمان کاتیشدا گەورە ھونەمەندێکی دیار بوو بە ھونەرەکەیەوە خزمەتێکی گەورەی بە ھونەری کوردی کردووە، دامەزرێنەری تیپی میوزیکی پاشای گەورەیە لە شاری ڕواندز، کە ئەو تیپە خوێندنگایەک بوو بۆ پێگەیاندنی ھونەرمەندان.
مامۆستا زرار لە ساڵی شەستەکانەوە گرنگی زۆری بە توانا ھونەریەکانی داوە لە بواری خوشنوسی، شێوەکاری، موزیک.
بەم بۆنە خەمناکەوە پرسە و سەرەخۆشی قوڵی خۆمان ئاڕاستەی بنەماڵەکەیان و گشت ھونەرمەندان دەکەین و لە خوای گەورە داواکارین جێگای مامۆستا زرار بەھەشت بێت و سەبوری ھەموو لایەکمان بدات.
انا للە وانا الیە راجعون
مەکتەبی ڕاگەیاندنی یەکێتی نیشتمانی کوردستان
بەڕێوەبەرایەتی گشتی ھاتووچۆ لە عێراق ڕایگەیاند، لەگەڵ بەڕێوەبەرایەتی ھاتووچۆی ھەرێم گەیشتوونەتە ڕێککەوتنی سەرەتایی سەبارەت بە تابلۆی ئۆتۆمبێل بە پێی ڕێککەوتنی ڤییەنا بۆ ھاتووچۆ، لە ئێستاشدا گفتوگۆکان بەردەوامن لە بارەی شێوە و ڕەنگ و نوسین و ژمارەی سەر تابلۆکان.
لەلایەکی ترەوە، "عەمید ئەسعەد مەلا کەریم" وتەبێژی بەڕێوەبەرایەتی گشتی پۆلیسی ھاتووچۆی ھەرێم بە کوردسات نیوزی ڕاگەیاند، لەگەڵ بەڕێوەبەرایەتی گشتی پۆلیسی ھاتووچۆی عێراق ڕێککەوتوون لەسەر گۆڕینی ژمارە و نوسینی سەر تابلۆی ئۆتۆمبێلی ھەموو پارێزگاکانی عێراق لە زمانی عەرەبییەوە بۆ ئینگلیزی، لە چەند مانگی داھاتووشدا دەست بە جێبەجێکردنی ئەو بڕیارە دەکرێت.
وتەبێژی پۆلیسی ھاتووچۆی ھەرێم وتیشی، لە ھەرێمی کوردستان یەک ملیۆن و ٩٥٠ ھەزار ئۆتۆمبێل ھەیە و سەرجەمیان نوسینی سەر تابلۆکانیان بۆ زمانی ئینگلیزی دەگۆڕن.
ڕاگەیاندنی سەرۆکایەتی ھەرێم بڵاویکردەوە، ئەمڕۆ لە پەیوەندییەکی تەلەفۆنیدا مستەفا کازمی سەرۆک وەزیرانی عیراق لەگەڵ نێچیرڤان بارزانی سەرۆکی ھەرێمی کوردستان، گفتوگۆیان لە بارەی ھەڕەشە ئەمنی و دەستدرێژییەکانی ئەم دواییەی ڕێکخراوی تیرۆریستیی داعشەوە کرد کە بنکەکانی ھێزە ئەمنییەکانی عێراق و ھاوڵاتییانیان کردە ئامانج و بووە ھۆی شەھیدبوون و برینداربوونی چەندین پێشمەرگە و ھاوڵاتی.
کازمی جەختی لەسەر پشتیوانیکردنی تەواوی ھەوڵەکانی پێشمەرگە بۆ بەرەنگاربوونەوەی تیرۆر کردەوە، لەگەڵ ھەماھەنگیی تەواو لە نێوان ھێزە چەکدارەکانی عێراقدا بە پێشمەرگە و سوپا و ھێزە ئەمنییەکانی ترەوە، بە تایبەتیش لە ناوچەکانی بۆشاییی ئەمنیی نێوان ھەردوولادا.
لای خۆیەوە سەرۆکی ھەرێم تەواوی ئامادەییی ھەرێمی کوردستانی بۆ ھاوکاری و ھەماھەنگی لەگەڵ ھێزە عیراقیەکاندا دووپات کردەوە بۆ پاراستنی ئاسایش و سەقامگیری لە سەرانسەری عیراق بە ھەرێمی کوردستانیشەوە.
پۆلیسی ھەولێر ڕایگەیاندووە، شەوی ڕابردوو لە گوندی (لاجان)ی سەر بە ناحیەی شەمامک لە سنووری بنکەی پۆلیسی (تووڕەق) تەرمی دوو کەس دۆزرایەوە، دواتر ھێزەکانیان لە بەڕێوەبەرایەتی پۆلیسی پارێزگای ھەولێر چوونە شوێنی مەبەست و دەرکەوت کەوا دوو کەس کوژراون بە ناوەکانی (ع. ف. ش) تەمەن (٢٤ ساڵ) لەگەڵ ئافرەتێکی تەمەن (١٨ ساڵ) بە ناوی (ح. ق. ا).
لە لێکۆڵینەوە سەرەتاییەکاندا دەرکەوت کە لەسەر کێشەیەکی خێزانی، لەلایەن برایانی ژنەکەوە تەقە لە ھەردووکیان کراوە و کوژراون.
بە گوێرەی قسەی کەسوکاری ژنەکەش ھۆکاری ئەو ڕووداوە بۆ کێشەی کۆمەڵایەتی دەگەڕێتەوە، بەڵام بنەماڵەی پیاوە کوژراوەکە ڕەتی دەکەنەوە کە ڕووداوەکە پەیوەندی بە کێشەی کۆمەڵایەتیەوە ھەبێت، بە گوێرەی زانیاریەکان سەرەتا براکانی ژنە کوژراوەکە پیاوەکە دەکوژن و دواتر خوشکەکەی خۆشیان دەکوژن، تەرمی کوژراوەکانیش گواستراوەتەوە بۆ پزیشکی دادی ھەولێر.
"د. پشدەر عەبدوڵا" بەڕێوبەری نەخۆشخانەی د. جەمال ئەحمەد ڕەشیدی منداڵانی فێرکاری ڕایگەیاند، بە مەبەستی پێدان و وەرگرتنی چارەسەر نەخۆشێکی زۆری منداڵ داخڵی نەخۆشخانەکەیان کراوە، لە ئێستادا ھەریەک لە بەشەکانی منداڵی تازە لە دایکبووی یەک و چاودێری وورد و بەشێک لە یەکەکانی تری ناو نەخۆشخانەکە پڕ بوون لە نەخۆش و زۆربەیان منداڵانی خوار تەمەن یەک ساڵن کە بەھۆی ھەوکردنی سنگیان داخڵی نەخۆشخانەکراون و زۆربەیان پێویستیان بە مانەوە ھەیە.
ڕاشیگەیاند، بەھۆی لۆدێکی زۆر لەسەر نەخۆشخانەکە بە پێویستی دەزانن ژمارەی بێدەکان زیاد بکەن، کەس و کاری نەخۆشیش دڵنیا دەکەنەوە بە تەواوبوونی بەشی فریاکەوتنی نەخۆشخانەکەیان لە داھاتوویەکی نزیکدا ئەو لۆدە زۆرەی سەر نەخۆشخانەکەیان چارەسەر دەکەن.
بەرێزان: بنەماڵە و خانەوادەی مامۆستا و ھونەرمەند زرار محەمەد ڕواندزی
بە داخ و پەژارەیەکی زۆرەوە ھەواڵی کۆچی دوایی کەسایەتی شاری ڕواندز و مامۆستا و ھونەرمەندی دیاری کورد (زرار محەمەد مستەفا)م پێگەیشت، بەم بۆنە غەمناکەوە پرسە و سەرەخۆشی ئاڕاستەی خانەوادە و بنەماڵە تێکۆشەرەکەتان و گشت ھونەرمەندان دەکەم، خۆم بە ھاوبەشی خەمتان دەزانم.
لە کاتێکدا خەمباریمان بە لە دەستدانی مامۆستا زرار دەردەبڕین بە شانازییشەوە دەڕوانینە کاروانە پڕ بەخششەکەی لە بواری ئەدەب و ھونەر دا.
لە پەروەردگارم داوایە سەبوریی و ئۆقرەیی بە ھەموو لایەک ببەخشێت و دوا کۆستی خانەوادەکەتان بێت، گیانی کۆچکردووش بە بەھەشتی بەرین شاد بکات.
ٳنــا للە وٳنــا ٳلــیــە راجــعــون
شاناز ئیبراھیم ئەحمەد
کارگێڕی مەکتەبی سیاسی و سەرپەرشتیاری مەڵبەندی ١ی ڕێکخستنی سلێمانی
ئازاد تۆفیق پارێزگاری هەڵەبجە لەووتەیەكیدا پشتگیری خۆی بۆ داخوازی خوێندكاران دەربڕی نوێنەری خوێندكارانیش بەكوردسات نیوزی راگەیاند ،كە پارێزگاری هەڵەبجە بەمەبەستی چارەسەركردنی گرفت و كیشەكان چاوپێكەوتنی لەگەڵ جێگری سەرۆكی حكومەت بۆ ڕێكدەخات .
لەسەر پێشنیاری وەزیری كشتوكاڵی هەرێم و لە بەرژەوەندی دەرچووانی كۆلێژەكانی كشتوكاڵ و ڤێرتەرنەری ، پڕۆژەیاسای سەرپەرشتیكردنی پڕۆژەكانی كشتوكاڵی لە هەرێمی كوردستان هەمواركرایەوە و ئەمڕۆ لە پەرلەمان خوێندنەوەی دووەمی بۆ دەكرێت و دواتر پەسەند دەكرێت.
لە شاری هەولێر قوباد تاڵەبانی پێشوازی لە محەمەد حەلبوسی، سەرۆكی هاوپەیمانی تەقەدووم كرد، لە كۆبوونەوەی نێوانیاندا باسیان لە دواین پێشهاتەكانی رەوشی سیاسی عێراق و پێكهێنانی كابینەی نوێی حكومەت كرد.
لە كۆبوونەوەكەدا هەردوولا جەختیان لە گرنگی دەستپێكردنی گفتوگۆكانی پێكهێنانی حكومەتی نوێی عێراق كردەوە و باسیان لەوەكرد پێویستە گفتوگۆكان لەسەر بنەمای بونیاتنانی سیاسەتێكی حوكمڕانی گونجاو و هاوبەشی هەموو پێكهاتەكان بێت لە بڕیاردان و چاكسازی راستەقینە و قوباد تاڵەبانیش ئاماژەی بەوە كرد، هەموو هەوڵێك دەدەن كورد بە یەكڕیزی بەشدار بێت لە گفتوگۆ و دانوستانەكان لەگەڵ لایەنە سیاسییەكانی تردا.
لە كۆبوونەوەكەدا باس لە هێرشەكانی رابردووی داعش بۆ سەر سەنگەرەكانی پێشمەرگەش كرا و هەردوولا جەختیان لە پێویستی داڕشتنەوەی پلانی ئەمنی بۆ ئەو ناوچانە كردەوە تاكو ئەو بۆشاییە ئەمنییە پڕبكرێتەوە لەنێوان هێزە عێراقییەكان و پێشمەرگەدا هەیە
وتیشی، هەرچییەك لە بەرژەوەندی دانیشتوانی ناوچە دابڕێنراوەكان بێت، لەگەڵ سوپای عێراق پێكەوە بڕیاری لێدەدەن و هەنگاو بەهەنگاو ئەو دەرفەتانەی بۆ داعش ڕەخساوە لەناوی دەبەین.
بە پێی میدیاکانی نزیک لە "یەبەشە" سوپای تورکیا بە فڕۆکەی بێفڕۆکەوان ناحیەی خانەسوری سەربە قەزای شەنگالی بۆردومان کردووە، لە بۆردومانەکەدا ئۆتۆمبێلێکی کردۆتە ئامانج کە سێ سەرنشینی تێدابووە.
بە پێی ھەواڵی میدیاکانی یەپەشە "مەروان بەدەل"ھاوسەرۆکی دەستەی بەڕێوەبەریی شەنگال لە بۆردومانەکەدا کوژراوە دوو منداڵیش کە لە ئۆتۆمبێلکەدا لەگەڵیدا بوون بریندار بوون.
سەرچاوەیەکی ئەمنی بە کوردسات نیوزی راگەیاند، بەپێی زانیارییە سەرەتاییەکان پێدەچێت موشەکەکان لە ناوچەیەکی نزیک گوندی کارێزی سەربە ناحیەی شوانەوە ئاراستەی ناوچەکە کرابن. سەرچاوەکە وتیشی، موشەکەکان لە بەرزایەکانی شێراوە و نزیک گوندی شەمزیناوە و نزیک کارگەی غازەکە و نزیک بارەگای فەرماندەیی کەرکوکی پارتی کەوتونەتەوە و ھیچ زیانێکیان نەبووە، دوای ڕوداوەکەش ھێزە عێراقیەکان چوونەتە ئەو شوێنەی پێدەچێت موشەکەکانی لێوە تەقێندرابێت.
هاوكار جەلال بەڕێوەبەری دارستان و پاوانی سلێمانی رایگەیاند، ئەمساڵ زیاتر لە ٥٠٠هەزار نەمامیان لە نەمامگەكانی سەرچنار، دوكان، دەربەندیخان، بانی مەقان، شازاد سائب لە ڕانیە بەرهەم هێناوە، كە بەشێك لەو نەمامانە تەرخان دەكرێت بۆ سەوزكردنی پرۆژەكانی دارستانی سەر بە سلێمانی و ئەوی تری بە نرخێكی كەم دەگەیەنرێتە دەست هاوڵاتیان.
بەڕێوەبەری دارستان و پاوانی سلێمانی ئاماژەی بەوەش كرد، هەوڵیان داوە ئەو جۆرە نەمامانە بەرهەم بهێنن كە لەگەڵ ژینگەی ناوچەكەدا دەگونجێت و داخوازی هاوڵاتیانی زیاتر لە سەرە .