کوردستان
سەرۆکی ئاژانسی پاراستن و زانیاری/زانیاری رایدەگەیەنێت، هەموو هەوڵەکانیان لە چوارچێوەی یاسا بەرکارەکاندا دەبێت بۆ رێگریکردن لە هەر یاسا شکێنییەک کە زیان بە ئاسایشی نەتەوەیی و هاووڵاتیان بگەیەنێت.
ئەمڕۆ جەلال شێخ ناجی سەرۆکی ئاژانسی پاراستن و زانیاری/زانیاری لە بەغداد لەگەڵ قاسم ئەعرەجی راوێژکاری ئاسایشی نیشتمانیی عیراق کۆبووەوە و لە دیدارێکدا جەخت لە پێویستی بەردەوامی هەماهەنگییە هەواڵگری و ئەمنییەکان لەنێوان هەرێم و عیراق کرایەوە لەپێناو پاراستنی ئاسایش و ئارامی و سەقامگیری زیاتر لە وڵاتدا.
هەر لە کۆبوونەوەکەدا دواین پێشهاتە ئەمنییەکان، پرسی رووبەڕووبوونەوەی پاشماوەکانی تیرۆریستان و یاسا شکێنان و هەموو ئەوانەی دادگا داوایان دەکات تاوتوێکراو بڕیاری هاریکاری زیاتر لەنێوان هەردوولا درا بە ئاڕاستەی سەروەربوونی یاسا و پاراستنی ئارامی و ژیانی خەڵک.
هاواکات جەلال شێخ ناجی سەرۆکی ئاژانسی پاراستن و زانیاری/زانیاری جەختی لە بەردەوامی هەوڵەکانیان کردەوە بۆ پاراستنی ئاسایشی هەرێمی کوردستان و رایگەیاند، بوونی پەیوەندی و بەرزکردنەوەی ئاستی هاریکارییە ئەمنییەکان فاکتەرێکی باشتر دەبێت بۆ رووبەڕووبوونەوەی پێشلکارییەکان.
ئەوەشی خستەڕوو، هەموو هەوڵەکانیان لە چوارچێوەی یاسابەرکارەکاندا دەبێت بۆ رێگریکردن لە هەر یاسا شکێنییەک کە زیان بە ئاسایشی نەتەوەیی و هاووڵاتیان بگەیەنێت، بە توندترین شێوەش رووبەڕووی ئەو کەسانە دەبنەوە کە سنوورەکانی یاسا دەبەزێنن.
وەزیری پلاندانانی هەرێم ئەنجامی بەرایی سەرژمێریی دانیشتووانی هەرێمی كوردستانی بڵاوكردەوە و رایگەیاند، ژمارەی دانیشتووانی هەرێم ٦ ملیۆن و ٣٧٠ هەزار و ٦٦٨ كەسە .
د.دارا رەشید وەزیری پلاندانانی هەرێم لە كۆنفرانسێكی رۆژنامەوانیدا ئاشكرایكرد، بەراورد بە ساڵی ٢٠٠٩، رێژەی گەشەی دانیشتووان لە هەرێمی كوردستان گەیشتووەتە لە ٢.٤٨٪ ، ژمارەی خێزانیش یەك ملیۆن و ٣٧٩ هەزار و ١٦٣ خێزانە، تێكڕای قەبارەی خێزانیش ٤.٦ كەسە، لەو رێژەیەش سەرۆك خێزانی ژن ١١.٨٦٪ پێكدەهێنێت.
بەوتەی وەزیری پلاندانان لەكۆی ژمارەی دانیشتووان، نێر ٣ ملیۆن و ٢٠٠ هەزار و ٥٠٦ كەس پێكدەهێنن، مێ ٣ ملیۆن ١٧٠ هەزار و ١٦٢ كەس پێكدەهێنن، بەم پێیەش پیاوان ٥٠.٢٤٪ پێكدەهێنن، ژنانیش ٤٩.٧٦٪ پێكدەهێنن.
ئاماژەی بەوەشكرد، رێژەی شارنشین لە هەرێمی كوردستان ٨٤٪ و رێژەی گوندنشین ١٦٪یە، دانیشتووانی سەرو تەمەنی كاركردن واتە ٦٥ ساڵ و سەرووتر، رێژەی لە ٤.٤٪ پێكدەهێنن، بەو پێیەش دانیشتووانی هەرێم بە دانیشتوانێكی گەنج لە قەڵەم دەدرێن.
بافڵ جەلال تاڵەبانی سەرۆکی یەکێتیی نیشتمانیی کوردستان لە رۆژی جیهانیی بەرەنگاربوونەوەی توندوتیژی دژی ژناندا پەیامێکی بڵاوکردەوە و دەڵێت، " ئەوەی لەم رۆژەدا پێویستە جەختی لێبکەینەوە، باوەڕی نەگۆڕمانە سەبارەت بە بەگژداچوونەوە و لێپێچینەوە لەو کەسانەی بەهەرشێوەیەک دەبنە مایەی هەراسانکردنی ژنان و ئەنجامدانی توندوتیژی بەرامبەریان".
دەقی پەیامەکەی سەرۆک بافڵ جەلال تاڵەبانی...
لە رۆژی جیهانیی بەرەنگاربوونەوەی توندوتیژی دژی ژناندا، پابەندیی خۆمان بە پشتگیریکردن، پاراستنی مافەکان و بەدیهێنانی خواستەکانی ژنان دووپات دەکەینەوە. جەخت لە رەخساندنی زەمینەی لەبار و تەندروستتر دەکەینەوە تاوەکو ژنانی کوردستان بەشداریی زیاتر و چالاکانەتریان هەبێت لە ناوەندەکانی بەڕێوەبردن و رۆڵی خۆیان لە بەرەوپێشبردنی وڵات و بونیادنانی داهاتوویەکی گەشتردا بگێڕن.
یەکێتیی نیشتمانیی کوردستان بە شانازییەوە هەمیشە پاڵپشتی ژنان و هەوڵە بێوچانەکانیان بووە لەپێناو بەگژداچوونەوەی توندوتیژی، هێنانەکایەی دادپەروەری و کۆمەڵگەیەکی سەقامگیر. باوەڕی تەواوی بە رۆڵ و تواناکانی ژنان هەبووە و بەشێکی کاریگەربوون لە ئۆرگانەکانی حزبدا. بێگومان لە داهاتووشدا بە هەمان بڕوا و رۆحییەتەوە کاردەکەین و ژنان هاوکار و هاوشانمان دەبن بۆ هەنگاونان بەرەو کوردستانێکی ئاوەدانتر و خۆشگوزەرانتر.
ئەوەی لەم رۆژەدا پێویستە جەختی لێبکەینەوە، باوەڕی نەگۆڕمانە سەبارەت بە بەگژداچوونەوە و لێپێچینەوە لەو کەسانەی بەهەرشێوەیەک دەبنە مایەی هەراسانکردنی ژنان و ئەنجامدانی توندوتیژی بەرامبەریان. لە هەر شوێنێک پێشێلکاری هەبێت، رووبەڕووی دەبینەوە و هەر کەسێک لە هەر پلە و پۆستێکدا بێت رێکاری یاسایی بەرامبەر دەگرینەبەر. چونکە پێمانوایە هیچ دادپەروەری و یەکسانییەک لە کۆمەڵگەدا نایەتەدی، ئەگەر ژنان لە ئاشتی و سەقامگیریدا نەبن و هەڕەشە لەسەر ماف و خواستەکانیان بێت.
شاد و سەرفرازبن
بافڵ جەلال تاڵەبانی
سەرۆکی یەکێتیی نیشتمانیی کوردستان
نێچیرڤان بارزانی سەرۆکی هەرێمی کوردستان، له رۆژی جیهانیی بەرەنگاربوونەوەی توندوتیژی دژی ژناندا پەیامێکی بڵاوکردەوە و دەڵێت، لهم بۆنهیهدا بەڵێن بە ژنانی کوردستان دهدهن کە بێ وچان بەردەوام دەبن لە کارکردن بۆ بەدیهێنانی دادپەروەری و یەکسانی و بههێزكردنی تواناكانیان بۆ جێبەجێکردنی رۆڵی گرنگیان لە خزمهتكردن و بنیاتنانی وڵاتدا.
دەقی پەیامەکەی نێچیرڤان بارزانی...
لە ڕۆژی جیهانیی بنبڕکردنی توندوتیژی دژی ئافرەتاندا، پابەندیمان به پاراستنی مافەکانی ژنان لە کوردستان نوێ دەکەینەوە، ههروهها دڵنیایان دهكهینهوه كه بەردەوام دەبین لە کارکردن بۆ نەهێشتنی هەموو جۆرەکانی توندوتیژی و جیاکاری بهرانبهر ئافرەتان. تواناسازی و بەهێزکردنی پێگەی ژن، بەردی بناغەی بنیاتنانی کۆمەڵگەیەکی دادپەروەرتر و پێشکەوتووترە.
هەرێمی کوردستان پێشەنگ بووە لە پشتگیریکردنی مافەکانی ئافرەت و دابینکردنی دەرفەت بۆ بەشداریکردنیان لە ژیانی سیاسی و کارگێڕی بە یەکسانی لەگەڵ پیاودا. ئێمە باوەڕمان وایە کە ژن نەک تەنها هاوبەشێکی سەرەکییه لە بڕیاردان، بەڵکو بنەمایەکە بۆ گۆڕانکاری و گەشەپێدانی بەردەوام.
لەم ڕۆژەدا، داوای هاوکاریی زیاتر دەکەین لەنێوان دامەزراوە حکوومییەکان، ڕێکخراوەکانی کۆمەڵگەی مەدەنی و میدیاکاندا، بۆ بڵاوکردنەوەی زیاتری هۆشیاری و بەهێزکردنی بەهاکانی لێبوردەیی و یەکسانی. هەروەها جەخت دەکەینەوە کە بنبڕکردنی توندوتیژی دژی ئافرەتان، پێویستی بە هەوڵی هاوبەشی هەمووانە بۆ دڵنیابوون لە بنیاتنانی داهاتوویەکی گەش و ئارام بۆ هەموو تاکەکانی کۆمەڵگە.
ههر لهم بۆنهیهدا بەڵێن بە ئافرەتانی کوردستان دهدهین کە بێ وچان بەردەوام دەبین لە کارکردن بۆ بەدیهێنانی دادپەروەری و یەکسانی و بههێزكردنی تواناكانیان بۆ جێبەجێکردنی ڕۆڵی گرنگیان لە خزمهتكردن و بنیاتنانی وڵاتدا.
نێچیرڤان بارزانی
سەرۆکی هەرێمی کوردستان
25ی نۆڤبهری 2024
ئەمڕۆ خولی راهێنان بۆ بژمێرەكان دەكرێتەوە و پێنج رۆژ دەخایەنێت، كۆتایی ئەم مانگەش قۆناغی سێیەمی سەرژمێری لە هەرێمی كوردستان دەستپێدەكات.
وەزارەتی پلاندانانی هەرێم لە راگەیەنراوێكدا ئاماژەی بەوەكرد، رۆژی دووشەممە خولی راهێنان بۆ سەرجەم بژمێرەكان دەكرێتەوە، لە پارێزگاكان و ئیدارە سەربەخۆكان و پێنج رۆژ دەخایەنێت، لەو ماوەیەدا بژمێرەكان راهێنانیان پێدەكرێت لەبارەی چۆنییەتی پڕكردنەوەی فۆرمی سەرژمێری و پێدانی زانیاری بە هاووڵاتییان.
لە بەشێكی تری راگەیەنراوەدا هاتووە، ٣٠ی ئەم مانگە، قۆناغی كۆتایی پڕۆسەی سەرژمێری دەستپێدەكات، ئەو هاووڵاتییانەشی تاوەكو ئێستا بە هەر هۆكارێك بێت نەیانتوانیوە لە ڕۆژانی ١٧ تا ٢٢ی مانگ، ناوی خۆیان تۆمار بكەن، لە قۆناغی كۆتاییدا دەتوانن خۆیان تۆمار بكەن.
لە سنووری نەوسودی رۆژهەڵاتی كوردستان ژنە كۆڵبەرێك كوژرا و لە سنەش ماوەی پێنج رۆژە ژنە چالاكوانێكی مەدەنی دەستگیراوە و چارەنووسی نادیارە.
رێكخراوی هەنگاو بۆ مافی مرۆڤ بڵاویكردەوە، رۆژی 19ـی ئەم مانگە، لە سنووری نەوسود ژنە كۆڵبەرێكی تەمەن ٢٦ ساڵ كە دایكی منداڵێكە، بە دەسترێژی هێزە چەكدارەكانی ئێران برینداركراوە و دواتریش بە هۆی سەختی برینەكەیەوە رۆژی هەینی رابردوو لە یەكێك لە نەخۆشخانەكانی شاری كرماشان گیانی لەدەستداوە.
ئەوەشی خستووەتەڕو، باوك و برای ئەو ژنە كۆڵبەرە كوژراوە، لەلایەن هێزە ئەمنییەكانەوە دەستگیركراون.
هاوكات، رێكخراوی هەنگاو ئاماژەی بەوەداوە، سەیران خەسرەوی كە ژنە چالاكوانێكی خەڵكی سنەیە ماوەی پێنج رۆژە لەلایەن هێزەكانی ئیتڵاعاتی ئێرانەوە دەستگیركراوە و چارەنووسی نادیارە، دامودەزگا ئەمنی و دادوەرییەكانیش ئامادەنین روونكردنەوە لەسەر چارەنووسی بدەن.
دوو جوتیارە كوردەكەی ناوچەی سەرگەڕان دوای ٦ سەعات لە دەستیگركردنیان، بە فەرمانی رێبوار تەها پارێزگاری كەركوك ئازادكران.
رۆژی شەممە لەلایەن فرقەی ٨ی سوپای عیراقەوە، بەبیانوی نەبونی مۆڵەت بۆ كێڵانی زەوییەكەی كارتی نیشتمانی لە فەرمان خورشیدئاغا جوتیاری گوندی شەناغە وەرگیرابوو، ئەمڕۆش لەلایەن هێزێكی سوپای عیراقەوە دەستگیركران، هەروەها دەشتی خدر جوتیاری گوندی پەڵكانە، لەلایەن ئەو هێزەوە بەبیانوی نەوبوونی مۆڵەتی كێڵانی زەزییەكەی دەستگیركرا، دواتر بە فەرمانی رێبوار تەها پارێزگاری كەركوك ئازاد كران.
بە وتەی جوتیارانی كوردی سنورەكە، سەرەرای ئەوەی بەپێی ماددەی ١٤٠ی دەستور جوتیارانی كورد دەتوانن ئەو زەویانەی لە ناوچەی سەرگەران و دەوروبەری سكاڵایان لەسەر نییە بكێڵن، بەڵام سوپای عیراق ئەو ماددە دەستوریە پێشێلدەكات و بەردەوامە لە دەستگیركردنی جوتیارانی كورد.
بەڕێوەبەرایەتی هاتوچۆی هەولێر هاتوچۆی ئۆتۆمبێلی بێسەرەتا و ماتۆڕسكیلی قەدەغەكرد بۆ رێكخستنەوەی شەقامەكانی شار.
بەپێی راگەیەنراوێكی هاتوچۆی هەولێر، بەكارهێنانی ئۆتۆمبێلی بێسەرەتا لەسەرجەم شەقامەكانی شاری هەولێر قەدەغەیە، هەروەها هاتووچۆی پایسكیل و مۆتۆرسیكل بەهەردووجۆری دووتایە و سێ تایە لەسەر شەقامی خێرایی 120 مەتری و 150 مەتری قەدەغەیە، هەروەها هاتووچۆكردنی ئۆتۆمبێلی قورس كەلەبواری بیناسازی و كشتوكاڵی بەكاردەهێنرێن كەخێرایەكانیان لە 80كیلۆمەتر لە سەعاتێكدا كەمترە لە هەردوو شەقامی 120 و 150 مەتری قەدەغەیە، بەڵكو دەبێت لەسەر فلات بگوازرێنەوە.
دەشڵێت هەرشوفێرێك سەرپێچی ئەو بڕیارە بكات ڕێكاری یاسایی بەرامبەر دەگیرێتەبەر و ئۆتۆمبێل یاخود ماتۆڕسكیلەكەی دەستی بەسەر دادەگیرێت.
وەزارەتی دارایی هەرێم گشتاندنی بۆ بەهەمیشەیكردنی فەرمانبەرانی گرێبەست دەركرد.
وەزارەتی دارایی و ئابوری هەرێم گشتاندنێكی بۆ بەهەمیشەییكردنی فەرمانبەرانی گرێبەست دەكرد و تیایدا ئاماژەی بەوەكردووە، ئەو كەسانەی كراونەتە هەمیشەیی ئەو بڕوانامەیان بۆ هەژماردەكرێت كە پێی دامەزراون و پێویستە سێ ساڵ خزمەتی كردبێت و فەرمانگەكە پێویستی بە راژەكەی هەبێت.
دەشڵێت، فەرمانبەرەكە كاتێك دەتوانێت خانەنشین بێت كە ٢٠ ساڵ خزمەتی هەبێت و بكات، دوای سێ ساڵ لە بڕیاری دامەزراندنی بەشێوەی هەمیشەیی دەتوانێت داوای گواستنەوەی راژەكەی بكات.
وتیشی، پێویستە ئەو كەسە تۆماری بایۆمەتری هەبێت و دوای دامەزراندنی بەشێوەیە هەمیشەیی ناتوانێت كەسێكی تر بخاتە شوێنی خۆی.
ئەوەش لەكاتێكدایە، لە مانگی رابردودا حكومەتی هەرێم بڕیاریدا فەرمانبەرانی گرێبەست بەشێوەی هەمیشەیی دابمەزرێن كە ژمارەیان ٣١ هەزار كەس دەبێت.
بەڕێوەبەرایەتی هاتووچۆی سلێمانی رایگەیاند، ڕۆژی چوارشەممە كامێراكانى تیژڕەوی ڕێگای نێوان تاسڵوجە_ چەمچەماڵ دەخرێنەكار.
بە پێی راگەیەندراوێكی بەڕێوەبەرایەتی هاتووچۆی سلێمانی، لەئێستادا كامێراكانی سیستمی چاودێری خێرایی جێگیر بە سیستەمی خاڵ بۆخاڵ (پۆینت تو پۆینت)ی نێوان تاسڵوجە – چەمچەماڵ، لە سەرەتای پردی تاسڵوجە تا كۆتایی بازگەی (بانی مەقان) لە قۆناغی تێستدایە و كارەكانی تەواو بووە و ڕۆژی چوارشەممە كە دەكاتە ٢٧ ی ئەم مانگە لە سەعات ١٢ی نیوەڕۆ سەرجەم كامێراكان كە ژمارەیان ٢٨ كامێرایە دەكەونە كار و سەرپێچی تیژڕەوی تۆمار دەكەن.
نوێنەری گشتی مامۆستایانی گرێبەست رایدەگەیەنێت، نزیكەی دوو هەزار و ٥٠٠ وانەبێژی لەسەر كار لادراو دەكرێنە گرێبەست.
عەلی رەئوف، نوێنەری گشتی مامۆستایانی گرێبەست بە كوردسات نیوزی راگەیاند، لە كۆی ٣٧ هەزار و ٩٣٣ مامۆستای گرێبەست، دوو هەزار ٤٥٣ مامۆستایان گرێبەستەكانیان هەڵوەشاوەتەوە بەهۆی ئەوەی لە فەرمانگەی دیكەی حكومی بە هەمیشەیی دامەزراون، لە شوێنی ئەو مامۆستایانەش، وانەبێژی لەسەر كارلادراو بە گرێبەست دادەمەزرێنرێن.
ئەوەشی خستەڕوو، دامەزراندنی وانەبێژەكان لە سنووری یەك پەروەردەی دیاریكراودا نابێت، بەڵكو لە هەر پەروەردەیەك مامۆستایەكی گرێبەست كە گرێبەستەكەی هەڵوەشابێتەوە ئەوا وانەبێژێك لە جێگەكەی دادەمەزێنرێت.
راشیگەیاند، تائێستا لە ٨٥٪ـی مامۆستایانی گرێبەست بایۆمەتریان كردووە و لە كۆی ئەو رێژەیە گرێبەستی ئەو مامۆستایانە هەڵوەشاوەتەوە، بۆیە پێدەچێت لەو ٪١٥ـەی كە ماوە، ژمارەیەك مامۆستای دیكە گرێبەستەكانیان هەڵوەشێتەوە و وانەبێژ لە شوێنیان دابنرێت.
بافڵ جەلال تاڵەبانی سەرۆکی یەکێتیی نیشتمانیی کوردستان، پرسەنامەیەک ئاڕاستەی حاکم سابیر، ئەندامی ئەنجومەنی سەرکردایەتیی یەکێتی دەکات بەهۆی کۆچیدوایی (مستەفا سمایل مەلا)ـی برایەوە و دەڵێت، " بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوە، كەسوكار و بنەماڵە تێكۆشەرەكەتان دەكەم كە هەمیشە نموونەی خەبات و نیشتمانپەروەری بوون".
دەقی پرسەنامەکەی بافڵ جەلال تاڵەبانی...
هەڤاڵی بەڕێزمان کاک حاکم سابیر، ئەندامی ئەنجومەنی سەرکردایەتیی یەکێتیی نیشتمانیی کوردستان
کۆچی دوایی (مستەفا سمایل مەلا)ی براتان لەدڵەوە نیگەرانیکردین. بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوە، كەسوكار و بنەماڵە تێكۆشەرەكەتان دەكەم كە هەمیشە نموونەی خەبات و نیشتمانپەروەری بوون.
لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
دەرباز کۆسرەت رەسوڵ، ئەندامی مەکتەبی سیاسی یەکێتیی نیشتمانیی کوردستان بەهۆی کۆچیدوایی هونەرمەند زاهیر عەبدوڵا پەیامێکی هاوخەمی بڵاودەکاتەوە و دەڵێت، "کۆچکردوو یەکێک بوو لەو هونەرمەندانەی توانیبووی جێی خۆی لە دڵی هەموواندا بکاتەوە و بە هونەرەکەی خزمەتێکی گەورەی پێشکەش بە شانۆو درامای کوردی کرد".
دەقی پەیامەکەی دەرباز کۆسرەت رەسوڵ...
کۆچی دوایی هونەرمەندی ئازیزی شاری هەولێر کاکە زاهیر عەبدوڵڵا لە دڵەوە خەمباری کردین، کاک زاهیر جێ پەنجەی دیارە لەناو هونەری شانۆو درامای کوردیدا، یەکێک بوو لەو هونەرمەندانەی توانی بووی جێی خۆی لە دڵی هەموواندا بکاتەوەو بە هونەرەکەی خزمەتێکی گەورەی پێشکەش بە شانۆو درامای کوردی کرد.
پرسە و سەرەخۆشی خۆم ئاراستەی خانەوادە بەڕێزەکەی دەکەم، هەروەها سەرەخۆشی لە هونەرمەندانی شاری هەولێرو کوردستان دەکەم کە ئەمڕۆ هاوڕێیەکی ئازیزیان لەدەستدا.
دەرباز کۆسرەت رەسوڵ
ئەندامی مەکتەبی سیاسی
یەکێتیی نیشتمانیی کوردستان
وەزارەتی پلاندانانی هەرێم رایدەگەیەنێت، قۆناغی دووەمی پرۆسەی سەرژمێری گشتی سەرەڕای چەندین كێشە و گرفتی تەكنیكی و مەیدانی بە سەركەوتوویی جێبەجێكراوە.
وەزارەتی پلاندانانی هەرێم لە راگەیەندراوێكدا بڵاویكردەوە، سەرەرای بوونی دەیان ئاستەنگی تەكنیكی و كێشەی مەیدانی توانراوە لەماوەی ١٤ رۆژدا قۆناغی دووەمی پرۆسەی سەرژمێری گشتی بە سەركەوتووانە جێبەجێبكرێت.
ئەوەشی خستووەتەڕوو، لەماوەی سێ رۆژی قۆناغی دووەمی پرۆسەكەدا، زیاتر لە ١٠٠ هەزار پەیوەندی تەلەفۆنی كراوە بۆ سەنتەری پەیوەندییەكان لە ژووری ئۆپراسیۆنی سەرژمێری لە دەستەی ئاماری هەرێم و توانراوە وەڵامی زۆرینەی پەیوەندییەكان بدرێتەوە و كاریان لەسەربكرێت.
هاوكات، وەزارەتی پلاندانانی هەرێم داوا لە دانیشتوانی ناوچەكانی ماددەی ١٤٠ دەكات، بەشداری قۆناغی سێیەمی پرۆسەی سەرژمێری گشتی بكەن، كە پڕكردنەوەی فۆڕمی سەرژمێرییە و دواتر سودی لێ وەردەگیرێت بۆ دیاریكردنی بارودۆخی ئابووری، كۆمەڵایەتی، پەروەردەیی و تەندروستی و دیموگرافی و بوارەكانی تر.
قوباد تاڵەبانی لێپرسراوی مەکتەبی سکرتارییەتی سەرۆک مام جەلال، بۆ کۆچیدوایی هونەرمەند زاهیر عەبدوڵا پرسەنامەیەک ئاڕاستەی هونەرمەندانی کوردستان و خێزان و خانەوادەی کۆچکردوو دەکات و دەڵێت، "زاهیر عەبدوڵا هونەرمەندێکی بەئەزموون و ئەکتەرێکی دیاری کوردستان بوو کەجێ دەستی بە بوارەکانی شانۆگەریی و دراما و فیلمی سینەمایی و چیرۆکی تەمسیلیەوە بە ڕوونی دیارە".
دەقی پرسەنامەکە...
بەڕێزان خێزان و خانەوادەی هونەرمەند زاهیر عەبدوڵا
بەڕێزان هونەرمەندانی کوردستان
زۆر بەداخەوە هەواڵی کۆچی دوایی هونەرمەند (زاهیر عەبدوڵا)م بیست. هاوبەشی خەمتانم و پرسەو سەرەخۆشی لەبنەماڵە دڵسۆزەکەتان و هەموو هونەرمەندانی کوردستان ئەکەم.
کۆچکردوو زاهیر عەبدوڵا هونەرمەندێکی بەئەزموون و ئەکتەرێکی دیاری کوردستان بوو کەجێ دەستی بە بوارەکانی شانۆگەریی و دراما و فیلمی سینەمایی و چیرۆکی تەمسیلیەوە بەڕوونی دیارە.
خوای گەورە لێی خۆش بێت و جێگەی بەهەشت بێت، سەبوری و دڵنەواییش بەهەموو لایەک ببەخشێت.
انا لله وانا الیه راجعون
قوباد تاڵەبانی
لێپرسراوی مەکتەبی سکرتارییەتی سەرۆک مام جەلال
تەنها لەماوەی یەك رۆژدا یەك ئۆنسە زێڕ لە بازاڕەكانی جیهاندا نزیكەی ٤٣ دۆلار نرخەكەی بەرزبووەوە و بەوەش لەماوەی یەك مانگی رابردوودا ٦١ دۆلار چووەتەسەر نرخەكەی.
چەند رۆژێكە نرخی زێڕ لە بازاڕەكانی جیهاندا رووی لە بەرزبوونەوە كردووە، لە ماوەی دوو رۆژیشدا لە هەرێمی كوردستان هەر مسقاڵێك نزیكەی ١٨ هەزار دیناری عیراقی بەرزبووەتەوە.
ئەمڕۆش نرخی ئۆنسەیەك زێڕ لە بازاڕە داراییەكانی جیهاندا ٢ هەزار و ٧١٥ دۆلاری تێپەڕاند، بەوەش لە بازاڕەكانی هەرێمی كوردستان نرخی زێڕ زیاتر بەرزبووەوە، بە شێوەیەك نرخی یەك مسقاڵ زێڕی عەیارە ٢٤ بە ٦٦٨ هەزار و عەیارە ٢١ بە ٨٥٨ هەزار دینار مامەڵەی پێوەكرا.