کوردستان
پۆلیسی دارستان و ژینگەی سلێمانی رایگەیاند، بەهۆی بڵاوکردنەوەی بۆنی ناخۆش و پیسکردنی ژینگەوە، کارگەیەک و دوو کۆمپانیای سنووری عەربەتمان دا بە دادگا.
پۆلیسی دارستان و ژینگەی سلێمانی رایگەیاندووە، ماوەیەکە بەهۆى ئەو بۆنەی کە لە هەوادا بڵاوبووەتەوە، بووە بەهۆی بێزارکردنی دانیشتووانى سنوورەکانی قەزای هەڵەبجەی تازە، ناحیەکانی عەربەت، زەڕایەن و دەوروبەریان، کە بەهۆیەوە بەگشتى هاوڵاتیان سکاڵایان هەبوو و نیگەران بوون.
ئاماژەی بەوەشکردووە، لەلایەن مەفرەزەکانى بنکەى پۆلیسى دارستانى عەربەت بەدواداچوون بۆ ئەو دۆسیەیە کرا و لە ئەنجامدا توانرا کارگەیەک و دوو کۆمپانیاى سووتەمەنى ڕووبەڕووى دادگا بکەنەوە .
ئاماژەی بەوەشکردووە، لە ئێستادا پەڕاوی لێکۆڵینەوە بۆ ئەو کارگە و کۆمپانیایانە کراوەتەوە لە بنکەی پۆلیسی دارستان و ژینگەی عەربەت بۆ وەرگرتنی رێکاری یاسایی و کێشەکە لەژێر لێکۆڵینەوەدایە .
وەزارەتی دارایی و ئابووری حکومەتی هەرێم رایگەیاند، لەبارەی هاوتاکردنی موچەی خانەنشینانی هەرێم لەگەڵ بەغدا گەیشتوونەتە رێککەوتن.
وەزارەتی دارایی و ئابووری هەرێم رایگەیاند، دوای کۆبوونەوەی لیژنەی سەرەکی هاوبەشی نێوان حکومەتی فیدراڵ و حکومەتی هەرێمی کوردستان تایبەت بەهاوتاکردنی موچەی خانەنشیان، ئەمڕۆ دووشەممە، لە شاری بەغداد، لیژنەکە لەسەر چۆنییەتی جێبەجێکردنی یاسای ژمارە 9ی ساڵی 2014ی خانەنشینی یەکگرتووی عێراق گەیشتنە رێکكەوتن.
ئاماژەی بەوەشکردووە، رێککەوتنەکە بەجۆرێکە ئەو هاوتاکردنەی هەرێمی کوردستان لە مانگی تەمووزی ساڵی 2024 تایبەت بە خانەنشینانی مەدەنی جێبەجێی کردووە، هاوشێوەی خانەنشینانی حکومەتی فیدراڵە و وەک خۆی جێبەجێ کراوە.
دوای ئەوەی بەیانی ئەمڕۆ سۆران عومەر ئەندامی ئەنجومەنی نوێنەرانی عیراق رایگەیاند، موچەی خانەنشینان لە مانگی شوباتدا گۆڕاکاریی بەسەردا دێت. وەفدی هەرێم لە بەغدا بە کوردسات نیوزی راگەیاند، ئەو گۆڕانکارییانەی هەرێم لە موچەی خانەنشیناندا ئەنجامیدا قبوڵ کراوە و خانەنشینان موچەی مانگی شوبات بە هاوتاکراوی وەردەگرن.
وەفدی هەورێم لە بەغدا بە کوردسات نیوزی راگەیاند، رێککەوتنی هاوتاکردنی موچەی خانەنشینانی هەرێم ئیمزا کراوە و مووچەی خانەنشینانی هەرێم هاوتای بەغدا دەکرێت. ئەمەش واتە ئەوەی هەرێم لەماوەی رابردوودا لەبارەی هاوتاکردنی موچەی خانەنشینانەوە کردی، لە ئێستادا قبوڵ کراوە و کاری پێدەکرێت.
ئەمەش لەکاتێکدایە، بەیانی ئەمڕۆ ئەو ئەندامەی ئەنجومەنی نوێنەران بۆ کوردسات نیوز ئاماژەی بەوەکرد، موچەی خانەنشینان لە مانگی شوباتدا گۆڕانكاری بەسەردا دێت، لەبەرئەوەی وەزارەتی دارایی عیراق ئاشكرایكردووە، هاوتاكردنی موچەی خانەنشینی لەدوای دەرچوونی بڕیاری دادگای باڵای فیدراڵیەوە جێبەجێ دەكرێت، واتا لە 23/11/2022 بەدواوە، ئەمەش بەو واتایە دێت، ئەگەر کەسێک پێش ئەو وادەیە خانەنشین بووبێت، هاوتاکردن نایگرێتەوە و دەبێت جیاوازی موچەی ئەو چەند مانگەی رابردووشێ لێوەربگیرێتەوە.
کەشناسیی هەرێم رایگەیاند، پلەکانی گەرما نزمتر دەبنەوە و بەفربارین و بارانبارین دەستپێدەکاتەوە.
کەشناسیی هەرێم رایگەیاند، ئەمڕۆ دووشەممە، ئاسمان لەنێوان ساماڵ و نیمچەهەوردا دەبێت و پلەکانی گەرما بە گشتی نزیک دەبنەوە لە تۆمارکراوەکانی دوێنێ، لە ناوچە شاخاوییەکانیشدا 2 بۆ 3 پلەی سیلیزی دادەبەزن.
ئەوەش هاتووە، سبەی سێشەممە، ئاسمان لەنێوان هەور و نیمچەهەوردا دەبێت و لە کاتەکانی بەیانی زوودا ئەگەری کەمێک دابارینی نمەباران و بەفر هەیە لە ناوچە کانی رۆژئاوای هەرێم، پاشان کاریگەرییەکەی درێژ دەبێتەوە تاوەکو کاتەکانی شەو بۆ ناوچە شاخاوییە سنووریەکان و بادینان بەشێوەی نمەباران و بڕێکی کەم لە بەفر.
ئاماژەی بەوەشکردووە، خێرایی با زیاد دەکات و پلەکانی گەرما نزیک دەبنەوە لە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی :
هەولێر: 12 پلەى سیلیزى
سلێمانی: 9 پلەى سیلیزى
دهۆک: 10 پلەى سیلیزى
کەرکوک: 14 پلەى سیلیزى
زاخۆ: 10 پلەى سیلیزى
هەڵەبجە: 10 پلەى سیلیزى
حاجی ئۆمەران: -7 پلەى سیلیزى
سۆران: 8 پلەى سیلیزى
گەرمیان: 15 پلەى سیلیزى
لێپرسراوی پەیوەندییەكانی دەرەوەی ئیدارەی خۆسەر هۆشداری دەدات و دەڵێت، قۆناغێكی سەخت چاوەڕوانی سوریا دەكات، ئەویش بنیادنانەوەی سوریایە. دەشڵێت، ئاسایش و ئارامی سوریا پەیوەستە بە ئاسایشی رۆژئاوای كوردستانەوە.
ئیلهام ئەحمەد لێپرسراوی پەیوەندییەكانی دەرەوەی ئیدارەی خۆسەر لە باكوور و رۆژهەڵاتی سوریا، لە دیدارێكیدا لەگەڵ 50 نوێنەری دامەزراوە و رێكخراوی مەدەنی لە حەسەكە، رایگەیاند، باشترین رێگەچارە بۆ رەوشی ئێستای سوریا، گرتنەبەری سیستمێكی لامەركەزییە، كە تیایدا دەسەڵاتی فراوان بە ناوچەكان بدرێت و هاوسەنگی بەدەستبهێنێرێت.
وتیشی، سوریا پێویستییەكی زۆری بە دامەزراوەی سیاسی و كۆمەڵایەتی و كولتووری كاریگەر هەیە، كە توانای نوێنەرایەتیكردنی سەرجەم پێكهاتەكانی هەبێت.
ئیلهام ئەحمەد لەبارەی یەكخستنی ریزەكانی كوردی سوریاش وتی، هەوڵێكی فراوان هەیە بۆ یەكخستنەوەی ریزەكانی كورد لە رۆژئاوا و لە داهاتوویەكی نزیكیشدا بەرهەمی ئەو هەوڵە دەردەكەوێت، وتیشی، چەند لایەنێك هەوڵ دەدەن رەوشی ئێستای سوریا بقۆزنەوە بۆ هەڵگیرساندنی ململانێ و ناكۆكی لەنێوان كورد و عەرەب.
وەزارەتی خوێندنی باڵا بڕیاریدا بە بەخشینی كەسوكاری پێشمەرگە كەمئەندامبووەكانی سەنگەر لە كرێی خوێندنی پارالێڵ و ئێواران.
بەپێی نوسراوێكی د.ئارام محەمەد قادر وەزیری خوێندنی باڵا و توێژینەوەی زانستی هەرێم كە ئاڕاستەی زانكۆ حكومییەكانی هەرێم كراوە، بڕیاردراوە بە لێخۆشبون لە كرێی خوێندنی پارالێڵ و ئێواران بۆ ئەو خوێندكارانەی كەسوكاری پێشمەرگەی كەمئەندامی سەنگەرن.
لە نوسراوەكەدا هاتووە، كاری پێویست ئەنجام بدرێت بۆ لێخۆشبون لە كرێی خوێندنی پارالێڵ و ئێواران بۆ ئەو خوێندكارانەی كەسوكاری پێشمەرگەی كەمئەندامی سەنگەرن، بە مەرجێك بەڵگەنامەی پێویست بۆ ئەو مەبەستە پێشكەش بكەن.
مەڵبەندی دیراساتی گشتی و ناوەندی کاروباری یاسایی یەکێتیی نیشتمانیی کوردستان، خولێکی تایبەتمەندیان بۆ ئەندامانی پەرلەمانی کوردستان لە فراکسیۆنی سەوز لە ژێرناوی (پەرەپێدانی بنەماکانی کاری پەرلەمانی) کردەوە.
بە ئامادەبوونی قوباد تاڵەبانی لێپرسراوی مەکتەبی سکرتاریەتی سەرۆک مام جەلال و تەلار لەتیف لێپرسراوی ناوەندی کاروباری یاسایی و د.یوسف گۆران لێپرسراوی مەڵبەندی دیراساتی گشتی، رۆژی یەکەمی خولەکە دەستیپێکرد.
لە سەرەتای خولەکەدا د.یوسف گۆران ئامانجی کردنەوەی خولەکەی خستەڕوو و رایگەیاند: ئەم خولە بۆ ئێوەی ئەندامانی فراکسیۆنی سەوزە لە پەرلەمانی کوردستان، تیایدا ئاشناتان دەکەین بە بنەما و ئەرکەکانی پەرلەمان و پەرلەمانتاران و هەوڵدەدەین لە داهاتووشدا بە هەمانشێوە خولی تایبەتمەند بکەینەوە.
دواتر، قوباد تاڵەبانی لە وانەی یەکەمی خولەکەدا، باسی لە گرنگی خولەکە و رۆڵی پەرلەمانتاران لە دەرکردنی یاسا و چاودێری یاساکان و هەماهەنگی نێوان پەرلەمان و حکومەت کرد و رایگەیاند: رۆڵی ئێوەی پەرلەمانتاران لە شەشەمین خولی پەرلەماندا زۆر گرنگ دەبێت، بەتایبەت لە دەرکردنی یاسا و چاودێری کردنەوە، بۆیە دەبێت رۆڵتان هەبێت لە دەرکردنی یاسای گرنگ کە بۆ باشترکردنی سیستمەی سیاسی و ژیان و گوزەرانی کۆمەڵانی خەڵکی کوردستان پێویستن، جگە لەوە گرنگە چاودێرێکی وردی سەر حکومەت بن و کار بکەن بۆ دەرکردنی یاساکان.
قوباد تاڵەبانی ئاماژەی بەوەشکرد: رۆڵی گرنگی پەرلەمانتارانمان بەتایبەت لەدوای پێکهێنانی لیژنەکانی پەرلەمان دەست پێدەکات، چونکە کارە وردەکە لەناو لیژنەکاندایە.
ئەوەشی خستەڕوو: گرنگە جۆرێک لە هاوسەنگی هەبێت لە کارکردن و یاسادانان و چاودێریدا، کە چۆن چاودێر بین بێ ئەوەی رێگر بین.
سەبارەت بە یەک تیمی نێوان پەرلەمانتارانی فراکسیۆنی سەوزیش، قوباد تاڵەبانی وتی: جگە لەناو خۆتان، گرنگە بۆ لەمەودوا پەیوەندییەکانتان لەگەڵ پەرلەمانتارانی فراکسیۆنی سەوز لە بەغدا زیاتر بێت، چونکە وەک پێویست لە کوردستاندا هێزی پەرلەمانیی خۆمان بەرانبەر بە بەغداد بەکار نەهێناوە.
لەبارەی پەیوەندی نێوان فراکسیۆنی سەوز و فراکسیۆنەکانی دیکەی پەرلەمانیش، قوباد تاڵەبانی ئەوەی خستەڕوو: فراکسیۆنی سەوز هەمیشە پەیوەندییەکی باشی لەگەڵ فراکسیۆنەکانی ناو پەرلەمان هەبووە و گرنگە ئێوەش بەهەمانشێوە پەیوەندیتان باش بێت و هاوکاریان بن لەو یاسایانەی کە بۆ بەرژەوەندیی گشتی پێشکەش دەکرێن.
باسی لەوەشکرد: ئەمرۆ یەکێتیی نیشتمانیی کوردستان سیاسەت و ستراتیجێکی روون و دیاری هەیە، وا دەکەین سیاسەتەکانی یەکێتی ببنە بەشێک لە کارنامەی داهاتووی حکومەتی هەرێمی کوردستان.
دوای وانەکەی قوباد تاڵەبانی، پەرلەمانتارانی بەشداربوونی فراکسیۆنی سەوز بە پرسیار و گفتوگۆ وانەکەیان دەوڵەمەندتر کرد و وەڵام و روونکردنەوەی پێویستیان لەلایەن قوباد تاڵەبانییەوە پێدرا.
خولی (پەرەپێدانی بنەماکانی کاری پەرلەمانی) ماوەی چوار رۆژ بەردەوام دەبێت و تیادا چەندین بابەتی پەیوەست بە کاری پەرلەمانی بەشێوەیەکی ئەکادیمی دەوترێنەوە.
دەست بەسەر کەلوپەلە رۆژنامەوانییەکانی تیمی کوردسات نیوزدا گیرا و پەیامنێری کوردسات نیوز بەهۆی بەرکەوتنی بە گازی فرمێسک رێژەوە تەندروستی تێکچوو.
دوای ئەوەی بە گازی فرمێسکرێژ بەرووی مامۆستایان و فەرمانبەرانی ناڕازیدا رژێنرا، پەیامنێری کوردسات نیوزیش بەهۆی بەرکەوتنی بە گازەکە دۆخی تەندروستی تێکچوو.
لەلایەکی دیکەوە، ئەو کەلوپەلە رۆژنامەوانییەی تیمی کوردسات نیوز لە دیوی هەولێری بازگەی دێگەڵەوە رووماڵی خۆپیشاندانی مامۆستایان و فەرمانبەرانیناڕازی پێدەکرد، لەلایەن هێزە ئەمنییەکانەوە دەستی بەسەردا گیرا.
دوای ئەوەی دەست بەسەر کەولەپەلەکانیاندا گیرا هەریەک لە "گەیلان سابیر و ئەمیر محەمەد پەیامنێرانی کوردسات نیوز، سیروان سدیق و هێمن محەمەد هەردوو کامێرامانی کوردسات نیوز" بۆماوەیەک پەیوەندییان لەگەڵ کوردسات نیوزدا پچڕا.
مامۆستایان و فەرمانبەران بازگەی دێگەڵەیان تێپەڕاند و گرژی دروست بوو، بەهۆیەوە یەکێک لە مامۆستایان بریندار بووە.
لە ئێستادا مامۆستایان و فەرمانبەران دەیانەوێت لە پێشڕەوی بەردەوام بن و هێزە ئەمنییەکانیش گازی فرمێسکرێژ بەروویاندا دەڕێژن.
بەهۆی دروستبوونی گرژی لەنێوان مامۆستایان و فەرمانبەرانی ناڕازی و هێزە ئەمنییەکاندا، چەند مامۆستا و فەرمانبەرێک بریندار بوون.
مامۆستایان باس لەوەدەکەن، "راگەیاندنەکان شایەتن کە چەند بەربەستێکیان دانابوو و وەک نوێنەری مامۆستایان قسەمان لەگەڵ کردن، بەڵام هەر دەیانوت بوەستن و دەیانویست بمانخافڵێنن".
مامۆستایەکیش باس لەوەدەکات، "ئەوان گازی فرمێسکرێژ و ئاویان هێناوە بۆ ئێمە، ئێمە ئەوەمان ناوێت، مانگرتووان ١٣ رۆژە هیچیان نەخواردووە".
ئاماژە بەوەشدەکات، "ئەوە چ ئوسلوبێکە پارێزگاری هەولێر بەرامبەر جیلی پەروەردەکار دەینوێنێت، لەجیاتی پێشوازیمان لێبکات و گوێ لە داواکارییەکانمان بگرێت، ئەی بۆچی دەرگا بۆ کچە مۆدێلەکان دەکاتەوە".
بەهۆی بڕینی رێژەیەكی زۆر لە موچەكانیان، خانەنشینانی پێشمەرگە لە سلێمانی گردبوونەوە، بەڕێوەبەری خانەنشینی پێشمەرگەش دەڵێت: مانگی داهاتوو قەرەبوو دەكرێنەوە .
خانەنشینانی پێشمەرگە دەڵێن، سەرباری ئەوەی لە ماوەی رابردوودا موچەكەیان زیاد نەكرا، هاوكات ئەم مانگە بە رێژەیەكی زۆر موچەیان لێبڕاوە.
لای خۆیەوە عەزیز عەلی بەرێوەبەری خانەنشینی پێشمەرگەی سلێمانی بە كوردسات نیوزی راگەیاند، لە مانگی داهاتوو كێشەكەیان چارەسەر دەكرێت و قەرەبوی ئەو موچەیەیان بۆ دەكرێتەوە كە ئەم مانگە لێیان بڕاوە .
ئەوەش لە کاتێکدایە، ئەم مانگە بەشێکی خانەنشینان موچەکانیان کەمکرابووەوە و تاوەکو ئێستا ش بە رەسمی هۆکاری کەمکردنەوەکەی رانەگەیەنراوە.
مامۆستایان و فەرمانبەرانی ناڕازی بڕیاریان دا بەربەستی هێزە ئەمنییەکان تێبپەڕێنن و بەرەو بازگەی دێگەڵە بڕۆن.
لە ئێستادا ئەو مامۆستا و فەرمانبەرانە نزیکن لە بازگەی دێگەڵە و هێزە ئەمنییەکان بارهەڵگری گەورەیان بۆ رێگریکردن لە چوونە ناو بازگەکە داناوە.
پەیامنێری کوردسات نیوز ئەوەی خستە روو، لە دیوی هەولێر بازگەی دێگەڵەشەوە هێزێکی زۆری ئەمنی بڵاوەی پێکراوە.
باسی لەوەشکرد، بڕیارە هێزی دیکەی ئەمنی بەرەو بازگەی دێگەڵە بنێردرێن بۆ رێگریکردن لە گەیشتنی ئەو مامۆستا و موچەخۆرانە بە بازگەکە.
مامۆستایان و فەرمانبەرانی ناڕازی نزیکن لە بازگەی دێگەڵە و ئۆتۆمبێلەکانیان جێهێشتووە و بەپێ بەرەو بازگەکە دەڕۆن، بەڵام لە ئێستادا هێزێکی ئەمنیی بەر لە بازگەکە بڵاوەی پێکراوە و رێگە نادەن مامۆستایان و فەرمانبەران نزیکی دێگەڵە بکەونەوە.
ئەو موچەخۆرانە باس لەوەدەکەن، هێزە ئەمنییەکان رێگرییان لێدەکەن و رێگەیان نادەن نزیکی بازگەکە ببنەوە.
ئەوەشیان خستە روو، "ئێمە بەشێوەیەکی ئارام هاتووین و دەمانەوێت بچینە بەردەم بارەگای نەتەوە یەکگرتووەکان و ناڕەزایەتییەکانمان بگەیەنین و بگەڕێینەوە، بەڵام رێگەمان نادەن".
دەشڵێن، ئەوان نەوەک تەنها داواکاری خۆیان، بەڵکو داواکاری ئەو هێزە ئەمنییانەش دەگەیەنن کە رێگریان لێدەکەن.
لە ئێستادا مامۆستایان و فەرمانبەران چەند سەد مەترێک لە بازگەی دێگەڵەوە دوورن و هێزە ئەمنییەکانیش رێگەیان نادەن نزیکی بازگەی دێگەڵي بکەونەوە.
دوای ئەوەی ئەمڕۆ مامۆستایان و فەرمانبەرانی ناڕازی و بەشێکی کاسبکاران لە شارە جیاوازەکانی هەرێمەوە بە مەبەستی گەیاندنی ناڕەزایەتییەکان بەرەو هەولێر بەڕێکەوتن، لەئێستادا گەیشتنە نزیکی دێگەڵە.
ئەو موچەخۆرانە باس لەوەدەکەن، دەیانەوێت لە پایتەختەوە و لەبەردەم بارەگای نەتەوە یەکگرتووەکان و ئەنجومەنی وەزیرانەوە ناڕەزایەتییەکانیان بگەیەنن.
باس لەوەشدەکەن، نیگەرانن لەو لێدوانەی ئومێد خۆشناو پارێزگاری هەولێر و دەشڵێن، "ئێمە میوانی رەزا قورس نین، ئێمە هەموو مامۆستا و فەرمانبەر و خوێندەوارین، کە نەوەی داهاتووی ئەم وڵاتە پەروەردە دەکەین".
ئەوەشیان خستە روو، "ئێمە میوان نین و خۆمان بە خاوەن ماڵ دەزانین".
ئەمەش دوای ئەوە دێت، ماوەی 13 رۆژە لە سلێمانی 13 مامۆستا و فەرمانبەر مانیان گرتووە و مامۆستایان و فەرمانبەرانی ناڕازیش بەمەبەستی گەیاندنی داواکاریی ئەو مانگرتووانە و ناڕەزایەتییەکانیان بەرەو هەولێر بەڕێکەوتن.
لە وەڵامی بەڕێکەوتنی مامۆستایانیشدا، ئومێد خۆشناو پارێزگاری هەولێر باسی لەوەکرد، هەولێر پێشوازی لەو جۆرە میوانانە ناکات و ئەوانە میوانی رەزا قورسن.
دوای ئەوەی ئەمڕۆ مامۆستایانی ناڕازی لە شارە جیاوازەکانی هەرێمەوە بەرەو هەولێر بەڕێکەوتن، پارێزگاری هەولێر رایەگیاند، ئەمڕۆ تاقەتیان نییە ئەو جۆرە میوانانە وەربگرن و ئەو هەموو موزایەدەیەی بۆ ئەو مامۆستا و فەرمانبەرە ناڕازیانە دەکرێت با بەرەو رووی بەغدا بکرێت.
ئومێد خۆشناو پارێزگاری هەولێر باسی لەوەکرد، "هیچ کەس داوای مۆڵەتی گردبوونەوە و خۆپیشاندانی نەکردووە و ئەمڕۆ تاقەتمان نییە ئەو جۆرە میوانانە وەربگرین".
دەشڵێت، "لە هەولێر خەڵک سەرقاڵی ئیشوکار و دەوامی فەرمییە، بە راستی بە چەند کەسێک کە ئەو هەموو موزایەدە دەکەن و ئەو هەموو خەڵکە پشتیان دەگرن ئەو هەموو فراکسیۆنانە پشتگیریان لێدەکەن، با بەرەو رووی بەغدا پشتیان بگرن و خیتابی خۆیان ئاڕاستەی بەغدا بکەن نەک لە هەرێم".
ئومێد خۆشناو ئەوەشی خستووەتە روو، "هەموو مامۆستایان و فەرمانبەرانی هەرێم ناڕازین، بەڵام لەکوێ لەو شوێنەی زوڵممان لێدەکرێت کە لە بەغدایە و حکومەتی ئیتحادیە".
ئەوەش لەکاتێکدایە، ئەمڕۆ مامۆستایان و فەرمانبەرانی ناڕازی و بەشێکی کاسبکاران، لە شارە جیاوازەکانی هەرێمەوە بەرەو هەولێری پایتەختی هەرێمی کوردستان بەڕێکەوتن، بە مەبەستی ئەوەی دەنگی ناڕەزایەتییان بگەیەننە بەرپرسان لەوێ، بەڵام هێشتا بەر لە گەیشتنیان پارێزگاری هەولێر رایگەیاندووە، پێشوازییان لێناکەن و لەرێگای میدیا جیاوازەکانیشەوە، بە میوانی 'رەزا قورس' ناویان دەبات.
سەرۆکی لقی هەولێری یەکێتی مامۆستایان رایدەگەیەنێت: ئەمرۆ مامۆستا نەوزاد عومەر جێگری سەرۆکی لقی هەولێری یەکێتی مامۆستایان، سەعات 9:30 خولەکی بەیانی لەسەر رێگای کۆیە دەستگیرکراوە.
عیسا حسێن سەرۆکی لقی هەولێری یەکێتی مامۆستایان بە کوردسات نیوزی راگەیاند: هەر ئەمرۆ جگە لە مامۆستا نەوزاد، مامۆستایەکی دیکەی ناڕازی لە هەولێر بەبێ هیچ هۆکارێک دەستگیرکراوە.
وتیشی: مامۆستایان بە شێوەیەکی مەدەنی داوای مافە رەواکانی خۆیان دەکەن، ناکرێت مامۆستا ببرێنە زیندان و دەستگیربکرێن.
عیسا حسێن ئاماژەی بەوەشکرد، وەکو یەکێتی مامۆستایان پشتیگیری لە تەواوی هەموو خەباتێکی مەدەنی مامۆستایان دەکەین، چونکە مافی مامۆستایانە کە موچە لەکاتی خۆیدا دابەشبکرێت و شایستەکانیان بۆ خەرجبکرێت.
راشیگەیاند، ماوەی چەند ساڵێکە لە سلێمانی فەرمانبەران و مامۆستایان، دێنە سەر شەقام و داوای مافی خۆیان دەکەن بەبێ ئەوەی هیچ توندوتیژیەک درووست بێت، بەڵام نازانم حکومەت لە هەولێر بۆ لە خەباتی مەدەنی و خۆپیشاندان دەترسن.
کەشناسیی هەرێم پێشبینیی نوێی بۆ کەشوهەوای ئەمڕۆ و سبەینێ بڵاوکردەوە و ئاماژەی بەوەکردووە، شەختە دروست دەبێت.
کەشناسیی هەرێم رایگەیاندووە، ئەمڕۆ یەکشەممە، ئاسمان ساماڵ و پەڵەهەور دەبێت و لە ناوچە شاخاوییەکان نیمچەهەور دەبێت، پلەکانی گەرماش 2 بۆ 3 پلەی سیلیزی بەرزدەبنەوە.
ئەوەش هاتووە، سبەی دووشەممە، ئاسمان ساماڵ و پەڵەهەور دەبێت، لەگەڵ دروستبوونى شەختە لە کاتەکانى بەیانى زوودا، هەروەها نزمترین پلەکانى گەرما زیاتر نزم دەبنەوە و بەرزترین پلەکانى گەرماش 1 بۆ 2 پلەی سیلیزی بەرز دەبنەوە.
بەپێی پێشبینییەکانی کەشناسیی، سبەی بەشێوەیەکی گشتیی بەرزترین پلەکانی گەرما لە هەرێم لە خوار 10 پلەی سیلیزییەوە دەبن و لە حاجی ئۆمەرانیش بەرزترین پلەی گەرما -1 پلەی سیلیزی دەبێت.
بەرزترین پلەکانی گەرمای پێشبینیکراو بە پلەی سیلیزی :
هەولێر: 12 پلەى سیلیزى
سلێمانی: 7 پلەى سیلیزى
دهۆک: 9 پلەى سیلیزى
کەرکوک: 13 پلەى سیلیزى
زاخۆ: 11 پلەى سیلیزى
هەڵەبجە: 9 پلەى سیلیزى
حاجی ئۆمەران: -1 پلەى سیلیزى
سۆران: 8 پلەى سیلیزى
گەرمیان: 15 پلەى سیلیزى