کوردستان
بافڵ جەلال تاڵەبانی، سەرۆکی یەکێتیی نیشتمانیی کوردستان لە ئەڵمانیا لەگەڵ جەنەڕاڵ دەیڤد پەترایۆس، لێپرسراوی پێشووی دەزگای هەواڵگری ئەمریکا (CIA) و فەرماندەی ناوەندی هێزەکانی ئەمریکا کۆبووەوە.
لەکۆبوونەوەکەدا گفتوگۆی هەمەلایەنە لەسەر دۆخی ئەمنی هەرێمی کوردستان، عیراق، ناوچەکە و گرنگی سەقامگیریی ئەمنی و پەرەپێدانی ئاشتی لە رۆژهەڵاتی ناوەڕاست کرا و پێویستی بەردەوامی دیالۆگی بونیادنەرانە لەنێوان هەموو لایەنەکان جەختی لەسەرکرایەوە لەپێناو زاڵبوون بەسەر ئاڵنگارییە ئەمنییەکاندا.
هەر لە کۆبوونەوەکەدا فراوانکردنی پەیوەندییە ئابووری و بازرگانییەکانی نێوان هەرێم و ئەمریکا تاوتوێکرا و سەرۆک بافڵ هەموو ئامادەییەکی لەورووەوە دەربڕی لەچوارچێوەی پاراستنی بەرژەوەندییەباڵاکان و زیاتر خزمەتکردن بەخەڵک و بەهێزترکردنی ژێرخانی ئابووری لە وڵاتدا.
هەسەدە رایگەیاند، هەر كۆنفرانسێكی نیشتمانی لە سوریا بەبێ بەشداری كورد بكرێت، پابەندی ئەنجام و بڕیارەكانی نابن.
دوای ئەوەی پێكهێنانی لێژنەی ئامادەكاری بۆ كۆنفرانسی دیالۆگی نیشتمانی سوریا راگەیەنرا كە هیچ كوردێكی تیدا بەشدار نییە، ساڵح موسلیم ئەندامی سەرۆكایەتیی پارتی یەكێتی دیموكرات رایگەیاند، ئەو لیژنەیەی كە پێكهێنراوە نوێنەرایەتی یەك رەنگ دەكات و تەنها بۆ دڵخۆشكردنی هەندێك لایەنی دەرەكی پێكهێنراوە.
وتیشی، ئەگەر بێت و بە شێوەیەكی دادپەروەرانە مامەڵە لەگەڵ كوردەكان نەكرێت ئەوە ئەوان پابەندی ئەنجام و بڕیاری هیچ كۆنفرانسێك نابن.
هاوكات، فەرهاد شامی، بەڕێوەبەری راگەیاندنی هێزەكانی سوریای دیموكرات هەسەدە ئاماژەی بەوەکرد، هەر كۆنفرانسێك لە سوریا كە هێزەكانی هەسەدە یان ئیدارەی خۆسەر بەدەر بكات، نیشتیمانی و یەكگرتوو نابێت و مەبەست لێی دووبارەكردنەوەی سیاسەتەكانی پێشوو و دوورخستنەوەی بەشێك پێكهاتەكانە لە سوریا.
ئەمە لەكاتێكدایە، سەرەڕای پێكهێنانی لیژنەیەكی حەوت كەسی بۆ ئامادەكاری بەستنی كۆنفرانسی نیشتمانی لەلایەن سەرۆكایەتی سوریا، تاوەكو ئێستا هیچ وادەیەك بۆ ئەنجامدانی كۆنفرانسەكە دیارینەكراوە.
سەرۆکی یەکێتیی نیشتمانیی کوردستان رایگەیاند، بەشداربوونی کورد لە بڕیاردان و بونیادنانەوەی سوریا زامنی سەقامگیری دەبێت.
ئەمڕۆ هەینی، بافڵ تاڵەبانی سەرۆکی یەکێتیی نیشتمانیی کوردستان لە میانی بەشداریکردن لە کۆنفرانسی ئاسایشی میونشن لە ئەڵمانیا لەگەڵ تۆبیاس لیندنەر، وەزیری دەوڵەتی ئەڵمانیا بۆ کاروباری دەرەوە کۆبووەوە.
لە کۆبوونەوەکەدا جەختیان لە کاری هاوبەشی نێوان هەردوولا و پەرەپێدانی پەیوەندییەکان کردەوە و لەپێناو کاراکردنی هەوڵەکان بۆ پاراستنی ئاسایش و ئارامی ناوچەکە.
هەر لە کۆبوونەوەکەدا دۆخی سوریا و رۆژئاوای کوردستان بەوردی هەڵسەنگاندنی بۆ کرا و بافڵ تاڵەبانی پەرۆشی یەکێتی بۆ چارەسەری ئاشتییانەی پرسی کورد لە سوریا دووپاتکردەوە.
راشیگەیاند، پاراستنی مافی هەموو نەتەوە و پێکهاتەکان بە تایبەت کورد و بەشداربوونیان لە بڕیار و بنیادنانەوەی سوریای نوێ زامنی سەقامگیری دەبێت، هەر هەوڵێکیش لە دەرەوەی ئەو ئامانجە دۆخەکە ئاڵۆزتر دەکات، بۆیە ئەرکی هەموولایەکە پشتگیری پاراستنی ناوچەکە و سەرخستنی هەوڵەکان بێت بۆ گەیشتن بە چارەسەری نیشتمانیی لەوبارەیەوە.
شارەوانیی سلێمانی پلانێكی نوێ بۆ تەواوكردنی پڕۆژەی شەقامی 100 مەتری دادەنێت و دەڵێت، تاوەكو كۆتایی ئەمساڵ بەشی تاسڵوجە تاكو رێگای قەرەداغ تەواو دەكەن.
شارەوانیی سلێمانی راگەیەنراوێكی بڵاوكردەوە و تیایدا هاتووە، بۆردی ئەندازیاری و تیمی سەرپەرشتیاری شارەوانی و تیمی كۆمپانیای قەیوان لەبارەی پلانێكی نوێ بۆ پڕۆژەی شەقامی 100 مەتری كۆبوونەوە و بڕیاریاندا بە تەواوكردنی شەقامەكە لە پردی تاسڵوجەوە تا شەقامی قەرەداغ بە تەواوی بڕگەكانییەوە و كردنەوەی ئەو بەشەی شەقامەكە بە رووی هاووڵاتیاندا تاوەكو كۆتایی ئەمساڵ.
دەشڵێت، بڕیاردراوە بە چڕكردنەوەی كاركردن لە یەكتربڕەكانی تاسڵوجەوە تا سەرچەمی تانجەرۆ و دابینكردنی تەواوی پێداویستیەكانی رووناكییەكانی شەقامەكە.
شارەوانی سلێمانی دەشڵێت، كۆمپانیای قەیوان بەڵێنیدا بە پێشكەشكردنی پلانێكی چڕ و پڕی كاركردن و تەواوكردنی كارەكان لە ماوەی یاسایی پڕۆژەكەدا.
دەستەی گشتیی کەشناسیی عیراق بڵاویکردووەتەوە، بەیانی ئەمڕۆ بومەلەرزەیەک سنووری سلێمانی هەژاندووە، کە چەقەکەی قەزای پێنجوێن بووە.
دەستەی گشتیی کەشناسیی و بومەلەرزەزانی عیراق رایگەیاندووەسەعات 4 و 9 خولەکی سەرلەبەیانی ئەمڕۆ هەینی، بومەلەرزەیەک بە گوڕی 3.9 پلە بە پێوەری رێختەر قەزای پێنجوێنی سنووری سلێمانی هەژاندووە.
ئاماژەی بەوەشکردووە، چەقی بومەلەرزەکە باکوری خۆرهەڵاتی پێنجوێن بووە و لە قوڵت چوار کیلۆمەترەوە رویداوە.
کەشناسیی عیراق راشیگەیاندووە، لە بەشێک لە ناوچەکانی دەوروبەری پێنجوێن هاوڵاتیان هەستیان بە بومەلەرزەکە کردووە.
ئامادەكارییەكان بۆ دەستپێكردنی دووەمین دیداری یەكێتیی نیشتمانیی كوردستان بەردەوامە و بڕیارە رۆژی شەممە لە نەینەواوە كۆنفرانسەكانی دیدارەكە دەستپێبكات.
یەكێتیی نیشتمانیی كوردستان لە ئامادەكارییەكانی بۆ دەستپێكردنی دووهەمین دیداری خۆی بەسەرپەرشتی قوباد تاڵەبانی بەردەوامە و لیژنەی باڵای دیدار بەسەرپەرشتی د. یوسف گۆران، ئەندامی مەكتەبی سیاسی یەكێتی كۆبووەوە و گفتوگۆی لەبارەی چەند پرسێكی تایبەت بە دەستپێكردنی كارەكانی دووهەمین دیدار كرد.
لە كۆبوونەوەكەدا ئامادەكارییەكانی یەكەم كۆنفڕاسی دووهەمین دیداری یەكێتی خرایەڕوو كە بڕیارە رۆژی شەممە 15ی شوبات لە پارێزگای نەینەواوە دەستپێبكات.
پاش هەڵسەنگاندن و گفتوگۆكردن لەبارەی كۆی بابەتەكانی یەكەمین كۆنفڕانس، رۆڵ و ئەركی ئەندامانی لیژنەی باڵا دیاری كرا. بەمەبەستی سەرپێخستنی تەواوی كارەكانی دیدارەكە، لیژنەكە بڕیاریدا پاش نەینەوا، دووهەمین كۆنفراس لە دەڤەری بادینان ئەنجامبدرێت.
یەكەم دیداری یەكێتی بەسەرپەرشتی قوباد تاڵەبانی لە مانگی ئاداری 2022 دەستپێكرد و لە مانگی ئایار كۆتایی هات و سیاسەتەكانی یەكێتی لە بوارە جیاجیاكاندا دارێژرا و بووە بنەمایەك بۆ سیاسەتی گشتی یەكێتی.
بەڕێوەبەرایەتی ئاسایش بڵاویکردەوە بە هاوکاری کۆماندۆی کوردستان، 5 تۆمەتباریان بە تۆمەتی دزینی 1444 شوێنەوار، لە شارەزوور دەستگیر کردووە.
لە راگەیەندراوەکەدا هاتووە؛ لەماوەی دوومانگی ڕابردوودا، بەڕێوەبەرایەتی ئاسایشی شارەزوور، دوای چاودێریکردن و ئەنجامدانی لێکۆڵینەوە، لە دووچالاکی جیاوازدا لەپارێزگای هەڵەبجە و قەزای سەیدسادق، توانیان 5 تۆمەتباری شوێنەوار دەستگیربکەن.
ئاماژە بەوەش کراوە، لەچالاکی یەکەمدا، هێزەکانی ئاسایش بەهاوکاری کۆماندۆی کوردستان توانیان دەست بەسەر 1444 سکەی جۆراوجۆری شوێنەواردابگرن.
لەچالاکی دووەمدا، هێزەکانی ئاسایش توانیان دەستبگرن بەسەر سێ ئامێری پشکنینی ناوچە شوێنەوارییەکان و تۆمەتباران بەماددەی 24ـی شوێنەوار دەستگیرکراون و لێکۆڵینەوە لە دۆسیەکانیان بەردەوامە.
بافڵ جەلال تاڵەبانی، سەرۆکی یەکێتیی نیشتمانیی کوردستان بانگهێشتی کۆنفرانسی ئاسایشی میونشن لە ئەڵمانیا دەکرێت و بڕیارە لە سەردانەکەیدا چەندین کۆبوونەوە و دیدارى سیاسی و دیپلۆماسی لەسەر ئاستی بەرپرسانی باڵای وڵاتان و سەرکردەی سیاسی، سەربازی، ئەمنی و ئابووری ئەنجامبدات.
کۆنفرانسی ئاسایشى میونشن لە رۆژى 14ـی شوباتی 2025، لە شاری میونشنى ئەڵمانیا دەستپێدەکات و تیایدا ژمارەیەک لە کەسایەتیی سیاسی و سەرۆک و سەرکردەکانی جیهان بەشداریی تێدادەکەن.
سەرۆكایەتی سوریا رەتیدەكاتەوە دانوستانەكانیان لەگەڵ هەسەدە كۆتایی هاتبێت .
دوای ئەو هەواڵانەی سەبارەت بە كۆتاییهاتنی دانوستانەكانی نێوان هەسەدە و دەسەڵاتی راگوزەری سوریا بڵاوكراوەیەوە، سەرۆكایەتی سوریا راگەیەندراوێكی لەوبارەیەوە بڵاوكردەوە و تێیدا رەتیكردەوە دانوستانەكانیان لەگەڵ هەسەدە كۆتایی هاتبێت و دوپاتیشكراوەتەوە كە ئەو هەواڵانەی لەوبارەیەوە بڵاوكراونەتەوە ، هیچ بنەمایەكیان نیە .
هەفتەی رابردوو ئەحمەد شەرع سەرۆكی سوریا دوپاتیكردەوە كە دانوستانەكانیان لەگەڵ هەسەدە بەردەوام دەبێت، چونكە ئامانجیانە هەموو گروپە چەكدارەكان لە چوارچێوەی سوپای سوریادا یەكبخەنەوە .
تا ئێستاش چەند جارێك فەرماندەكانی هەسەدە رایانگەیاندووە، ئامادەن بچنە ناو سوپای سوریاوە بەڵام بۆ ئەو هەنگاوە چەند مەرجێكیان هەیە و تا بە تەواوی دەستوری نوێ دانەرێژرێت و شێوە و پێكهاتەی سوپا روون نەبێتەوە ، ئامادە نین چەك دابنێن .
لە گۆڕێکی بەکۆمەڵی حەویجەدا روفاتی 17 پێشمەرگە دۆزیەوە، پەیامنێری کوردسات نیوزیش ئەوەی خستە روو، روفاتی ئەو پێشمەرگانەیە کە ساڵی 2015 وەک دیل کەوتنە دەستی داعش.
یاسەمین مونزر بەڕێوەبەری بەشی گۆڕە بە کۆمەڵەکان لە پزیشکی دادی عێراق رایگەیاند، گۆڕە بەکۆمەڵەکە لە قەزای حەویجە 'بنکەی بەگارە' هەڵدراوەتەوە.
وتیشی، لە ئێستادا لە هەولێر نموونەی خوێن لە کەسوکاریان وەردەگیرێت.
بەپێی زانیارییەکانی کوردسات نیوز، گۆڕە بەکۆمەڵەکان دوو مانگ بەر لە ئێستا هەڵدراونەتەوە و چەندین روفاتی تێدایە، کە بەشێکیان خەڵکی شنگال و دەوروبەرین.
ساڵی 2015 لە مەکتەب خالید، کە کۆتا خاڵی سنووری نێوان پێشمەرگە و چەکدارانی داعش بوو لە سنووری کەرکوک، 17 پێشمەرگە وەک دیل کەوتنە دەستی تیرۆرستانی داعش و دڕندانە لەناو قەفەسدا بە شەقامەکاندا دەیانگێڕان و ڤیدیۆیان بڵاودەکردنەوە.
کەسوکاریان چەندین جار خۆپیشاندانیان کرد و داوایانکرد ئەو 17 پێشمەرگەیە لەگەڵ چەند دیلێکی داعشدا کە لە زیندانەکانی هەرێم بوون ئاڵوگۆڕ بکرێن.
ئەمڕۆش دوای 10 ساڵ لەو رووداوە نامرۆڤانەیە، روفاتی ئەو 17 پێشمەرگەیە لە حەویجە دۆزرایەوە.
بەپێی زانیارییەکانی کوردسات نیوز، لە شەڕی دژ بە داعشدا 78 پێشمەرگە کەوتنە دەست تیرۆرستانی داعش، کە بەشێکیان داعش خۆی لە ڤیدیۆدا ساتی شەهیدکردنی بڵاوکردنەوە و بەشێکیشیان هێشتا چارەنووسیان نادیارە.
کەشناسیی هەرێم وردەکاریی ئەو شەپۆلە بەفر و بارانبارینەی بڵاوکردەوە کە ئەمڕۆ و سبەینێ ناوچە جیاوازەکانی هەرێم دەگرێتەوە. دەشڵێت، بەفر ناوەندی شاری سلێمانی و دهۆک و ئیدارە سەربەخۆکان دەگرێتەوە.
کەشناسیی هەرێم رایگەیاندووە، ئەمڕۆ پێنجشەممە، بەهۆی هاتنی شەپۆلێکی بەفر و باران بۆ ناوچە جیاوازەکانی هەرێم، ئاسمان نیمچەهەور دەبێت پاشان دەگۆڕێت بۆ هەورى تەواو، سەرەتا بارانبارین لە كاتەكانی دوای نیوەڕۆ لە پارێزگای دهۆك و ئیدارەی زاخۆ بە شێوەی نمەباران و بارانی مامناوەند دەستپێدەكات، پاشان كاریگەریەكەی درێژ دەبێتەوە بۆ ئیدارەی سۆران و راپەرین و پارێزگای هەولێر، هەروەها لە ناوچە شاخاوییەكانی باكورو باكوری رۆژهەلاتی هەرێم بەفر و و كڕێوە دەبێت .
ئاماژەی بەوەشکردووە، بۆ درەنگانی شەو و بەرەبەیانی رۆژی هەینی بارانبارین تەواوی هەرێمی كوردستان دەگرێتەوە و بەفر لە زۆربەی ناوچە شاخاوییەكان دەبارێت، هەروەها پێشبینی دەكرێت بەفر لە سنتەری پارێزگای دهۆك و پارێزگای سلێمانی و قەزا و ناحیەكانی ئەو دوو پارێزگایە و ئیدارە سەربەخۆكان ببارێت .
کەشنسی راشیگەیاندووە، سبەی لە ناوچە شاخاوییەكان بەفربارین زیاتر دەبێت و تاوەکو كاتەكانی شەو كاریگەری ئەو شەپۆلە لەسەر ناوچەكە كۆتایی دێت .
کەشناسی ئەوەشی خستووەتە روو، ئەمڕۆ پلەکانی گەرما کەمێک نزمتر دەبنەوە و سبەینێش 4 بۆ 6 پلەی سیلیزی دادەبەزن.
بەرزترین پلەکانی گەرمای پێشبینیکراو بە پلەی سیلیزی :
هەولێر: 11 پلەى سیلیزى
سلێمانی: 9 پلەى سیلیزى
دهۆک: 9 پلەى سیلیزى
کەرکوک: 13 پلەى سیلیزى
زاخۆ: 9 پلەى سیلیزى
هەڵەبجە : 10 پلەى سیلیزى
حاجی ئۆمەران: 3- پلەى سیلیزى
سۆران: 8 پلەى سیلیزى
گەرمیان: 17 پلەى سیلیزى
بەهۆی گۆڕینی سیستمی کارەباوە، ئەنجامدانی نەشتەرگەریی لە نەخۆشخانەی رزگاری هەولێر رادەگیرێت.
نەخۆشخانەی رزگاریی هەولێر رایگەیاندووە، بەهۆی گۆڕینی سیستمی کارەبای نەخۆشخانەکە، لەمڕۆ پێنجشەممەوە تاوەکو رۆژی شەممە ئەنجامدانی نەشتەرگەریی رادەگیرێت.
ئاماژەی بەوەشکردووە، بەهۆی ئەوەی وەزارەتی کارەبا لەو گەڕەکەی نەخۆشخانەکەی لێیە کاردەکەن بۆ گۆڕینی سیستمی کارەبای 24 کاتژمێری لەماوەی ئەو دوو رۆژەدا، بۆیە کارەبای نیشتیمانی نابێت و لەو دوو رۆژەشدا تەنها نەشتەرگەریی رادەگیرێت.
لە هەرێم لە ئێستادا کاردەکرێت بۆ گۆڕینی سیستمی کارەبا بۆ 24 کاتژمێری، کە دواتر کارەباکە بەشێوەی پریپەیدە و لەرێگای کارتەوە پڕدەکرێتەوە.
دەرهێنەری ناسراوی کورد مانۆ خەلیل کە چەند رۆژێکە بۆ نیشاندانی فیلمەکەی لە ئەمریکایە، بە شەش زمان نامەیەک ئاڕاستەی دۆناڵد ترەمپ سەرۆکی ئەمریکا دەکات و پێشنیازی بۆ دەکات، بێت و کوردستان بکڕێت و بیکات بە بەشێک لە ویلایەتە یەکگرتووەکانی ئەمریکا.
مانۆ خەلیل دەرهێنەرێکی بەناوبانگی کوردە و لە سوید نیشتەجێیە. لە ئێستادا بۆ بەشداری کردن و نیشاندانی فیلمەکەی "جیران" لە ئەمریکایە و بە هەر شەش زمانی: ئینگلیزی / ئەڵمانی / سلۆڤاکی / یۆنانی / کوردی / عەرەبی نامەیەکی بۆ ترەمپ نووسیوە و تیایدا داوادەکات، بێت کوردستان بکڕێت و بیخاتە سەر ئەمریکا:
لەنامەکەی ئەو دەرهێنەرە کوردە دا هاتووە: "بۆ نایەیت کوردستان بکڕیت؟ خاکەکەمان دەوڵەمەندە بە سەرچاوە: نەوت، مەڕمەڕ، کانزا بەنرخەکان، بەرهەمی کشتوکاڵی کە بەشی نیوەی جیهانە، شتگەلی نایاب.
تۆ ئەمریکات گەورەتر و بەهێزتر کرد، وڵاتەکەت لەبری 50 کرد بە 51 ویلایەت، ئێمەی کورد لە داعش و مەلاکان و پاشماوەکانی سەدام و خومەینی و ئیخوانەکانی ئیسلامی ڕزگارمان دەبوو.
من باوەڕم وایە و دڵنیام کە ٤٥ ملیۆن کورد بە پێشنیازەکەم ڕازی دەبن. ڕای ئێوە چییە؟"
مانۆ خەلیل، لە زانکۆی دیمەشق مێژوو و یاسای خوێندووە و لە ساڵی 1987 بۆ خوێندن و دەرهێنانی فیلم ڕووی لە چیکۆسلۆڤاکیا کردووە. لە نێوان ساڵانی 1990 بۆ 1995 وەک دەرهێنەر لە کۆمپانیای چیکۆسلۆڤاکیا و دواتر لە تەلەفزیۆنی سلۆڤاکیا کاری کردووە و خاوەنی چەندین خەڵات و فیلمە کە لە فێستیڤاڵە جیهانییەکاندا نمایشکراوە.
دەقی نامەکەی ئەو دەرهێنەرە وەک خۆی:
وەزارەتی دارایی حکومەتی هەرێم رایگەیاند، بۆ یەکخستنی رێکارە داراییەکانی نێوان حکومەتی هەرێم و عیراق و بۆ زامنکردنی موچەی موچەخۆرانی هەرێم بۆ ساڵی 2025، چەند بڕیارێکیان دەرکردووە.
لە بڕیارەکاندا هاتووە، کە خشتەی موچەی مانگی یەک بنەمایەک دەبێت بۆ موچەی مانگەکانی دیکە، تاوەکو ئەو کاتەی خشتە نوێیەکانی بودجەی گشتیی لەلایەن حکومەتی عیراقەوە پەسەند دەکرێت.
ئاماژە بەوەشکراوە، دامەزراندن بە هەموو شێوەکانییەوە رادەگیرێت کە پێکدێت لە "هەمیشەیی، کاتی، لەجیاتی دانان، خۆبەخش، وانەبێژ، گرێبەست یان لەسەر داهاتی ناوخۆ". هەروەها بەخشین و بەستنی دەرماڵەی نوێ رادەگیرێت، هەروەها راگرتنی دامەزراندن پلە باڵاکانیش دەگرێتەوە.
بەپێی بڕیارەکەی حکومەتی هەرێم، گواستنەوەی راژەش رادەگیرێت، هەژمارکردنی خزمەتیش رادەگیرێت، جگە لە خانەنشینان، هەروەها بڕوانامەی نوێش لەسەر موچە هەژمار ناکرێت.
وەزارەتی دارایی راشیگەیاندووە، ئەم بڕیارانە لە سەرتاسەری عیراقدا جێبەجێدەکرێن و کاتین، تاوەکو ئەو کاتەیە کە خشتە نوێیەکانی بودجەی گشتی عیراق لەلایەن ئەنجومەنی نوێنەرانەوە پەسەند دەکرێن.
توركیا هێرشەكانی بۆسەر كۆبانێ چڕتر كردوەتەوە و هەسەدەش رایگەیاند، تەنها لە 24 سەعاتی رابردوودا دەوروبەری بەنداوی تشرین 140 جار تۆپباران كراوە.
هێزەكانی سوریای دیموكراتی-هەسەدە بڵاویكردەوە، فڕۆكە جەنگییەكان و فڕۆكە بێفڕۆكەوانەكانی توركیا هێرشەكانیان دژی كۆبانێ لە رۆژئاوای كوردستان زیاتر كردووە، هاوكات چەكدارانی سوری هاوپەیمانی توركیاش 10 گوندی نزیك پردی قەرەقۆزاق و بەنداوی تشرین تۆپباران كردووە.
هەسەدە ئاماژەی بەوەشكردووە، تەنیا لە 24 سەعاتدا گوندەكانی ئەلتینا، جەدە، بیر حەسەن، خەسەق و دیكان و ئەلسانا و گرێ سێڤێ لە لایەن توركیا و چەكدارانی هاوپەیمانییەوە 140 جار بە تۆپ و هاوەن و كراونەتە ئامانج.
هاوكات فڕۆكە جەنگییەكانی توركیا شارۆچكەی شێخلەر-یان لە رۆژئاوای كۆبانێیان بۆردومان كرد.
ئەمڕۆ دادگای فیدڕاڵی عیراق لەبارەی سکاڵاکەی سەرۆک کۆمار تایبەت بە موچەی موچەخۆرانی هەرێم کۆدەبێتەوە، کە دوو رۆژ بەر لە ئێستا تۆماری کردبوو.
بڕیارە ئەمڕۆ چوارشەممە، دادگای فیدڕاڵی عیراق لەبارەی سکاڵایەکی د. لەتیف رەشید سەرۆک کۆماری عیراق کۆببێتەوە، کە دوو رۆژ بەر لە ئێستا لەبارەی موچەی فەرمانبەرانی هەرێمەوە، لەسەر سەرۆک وەزیران و سەرۆکی ئەنجومەنی نوێنەران و وەزیری دارایی عیراق تۆماری کردبوو.
سكاڵاكەی سەرۆك كۆمار لەبارەی موچەی فەرمانبەرانی هەرێم و پابەندكردنی وەزارەتی دارایی عیراقە بە خەرجكردنی موچە کە لە چوار خاڵ پێكهاتووە، کە داوایکردووە، فەرمانێكی وەلائی خێرا دەربکرێت بۆ پابەندكردنی وەزارەتی دارایی عیراق بە خەرجكردنی موچەی فەرمانبەرانی هەرێم.
هاوکات، پابەندكردنی وەزارەتی دارایی عیراق بە خەرجكردنی موچەی فەرمانبەرانی هەرێم بە شێوەیەكی بەردەوام و بەبێ وەستان، هەروەها جێبەجێكردنی بەبانكیكردنی موچە بەپێی رێنماییەكانی بەبانكیكردن، بە جۆرێک هاوشێوەی ئەو رێكارانە بێت كە حكومەتی عیراق دەیگرێتە بەر.