کوردستان
هاوسەرۆكی دەم پارتی دەڵێت، پێویستە توركیا لەوە تێبگات كە كورد بۆ ناوچەكە دڵنیاییە نەك هەڕەشە.
میدیاكانی باكوری كوردستان بڵاویانكردوەتەوە لە چوارچێوەی گفتوگۆ و دانوستانی پارتە ئۆپۆزسیۆنەكاندا هاوسەرۆكانی پارتی یەكسانی و دیموكراسی گەلان هەدەپە لەگەڵ محەمەد ئاریكان، سەرۆكی پارتی سەعادەت كۆبونەتەوە و لە كۆبونەوەكەشدا جەخت لە چارەسەری ئاشتیانەی پرسی كورد لە توركیا كراوەتەوە.
دوای كۆبونەوەكەش، تولای حاتمئۆغلاری، هاوسەرۆكی دەمپارتی لە كۆنفرانسێكی رۆژنامەوانیدا رایگەیاند، ئەو دۆخەی ئێستا لە سوریا رودەدات دەرخەری ئەو راستیەیە كە توركیا زیاتر لە هەموو كاتێكی تر پێویستی بە پڕۆسەی چارەسەری دیموكراتیانە هەیە، بەڵام لایەنی دەسەڵات بە سەپاندنی قەیوم زیانی بە پڕۆسەی ئاشتیانە دەگەیەنێت.
دەشڵێت، پێویستە هەموان لەوە تێبگەن كە كورد بۆ ناوچەكە گەرەنتی و دڵنیاییەوە و نەوەك هەڕەشە.
بەرنامەی هاوڕێی تەمەن لە ئاسیاسێڵەوە نازناوی باشترین بەرنامەی خەڵاتەکانی لە ڕۆژهەڵاتی ناوەڕاستدا بەدەستهێنا و لەم بارەیەوە، بەڕێوەبەری جێبەجێکاری یەکەی بازرگانی ئاسیاسێڵ دەڵێت، بەدەستهێنانی ئەو خەڵاتە بەڵگەی پابەندبوونی ئاسیاسێڵە بە داهێنان و تەرکیزکردنی بەردەوام لەسەر باشترکردنی ئەزموونی بەشداربووان.
ئاسیاسێڵ رایگەیاندووە، پرۆگرامی هاوڕێی تەمەن خەڵاتیTelecom Review Excellence (خەڵاتی نایابیی تێلێکۆم ڕیڤیو)ی بەدەستهێناوە لە بەشی "باشترین پڕۆگرامی وەفاداری و خەڵاتەکان لە ڕۆژهەڵاتی ناوەڕاستدا".
ئەوەش هاتووە، لە ناوەڕاستی کانوونی یەکەمی ئەمساڵ، لە ئاهەنگێکدا لە دوبەی، بە ئامادەبوونی دەستەبژێرێک لە سەرکردە و پێشڕەوانی بواری پەیوەندییەکان لەسەر ئاستی ڕۆژهەڵاتی ناوەڕاست و باکوری ئەفریقا خەڵاتەکە بەخشرا. هاوکات، ئەم رێزلێنانە بەشێک بوو لە بۆنەی ساڵانەی چالاکییەکانی لوتکەی باڵای تێلێکۆم ریڤیو کە بە یەکێک لە دیارترین چالاکییەکانی کەرتی پەیوەندییەکان دادەنرێت و تیایدا خەڵات دەبەخشرێتە ئەو داهێنان و دەستکەوتانەی دەبنە پێوەر بۆ ناوازەیی لەسەر ئاستی رۆژهەڵاتی ناوەڕاست و باکووری ئەفریقا.
ئاسیاسێڵ راشیگەیاندووە، "ئەم خەڵاتە پایەدارە دەرخەری دیدگای پێشەنگی ئاسیاسێڵە لە بەهێزکردنی ئەزموونی دیجیتاڵیی و بەدیهێنانی گۆڕانکارییەکی گشتگیر لە کەرتی پڕۆگرامی وەفاداری و خەڵاتەکان. پڕۆگرامی هاوڕێی تەمەن توانیویەتی ببێتە نموونەیەک چاوی لێبکرێت لە رێگەی تێکەڵکردنی تەکنیکە دیجیتاڵییە نوێیەکان لە پێشکەشکردنی بەرنامەی خەڵاتی داهێنەرانە کە سەرنجی لەسەر رەزامەندی بەشداربووان بێت، لەگەڵ بنیاتنانی پەیوەندی درێژخایەن لە رێی پشتبەستن بە چەندین ئامڕازی دیجیتاڵی پێشکەوتوو و دابینکردنی ئەزموونی کەسیی ناوازە کە بەهایەکی ڕاستەقینەیان هەبێت".
ئاماژەی بەوەشکردووە،
بەرنامەی خەڵاتەکانی ئاسیاسێڵ لە عێراق ئامانجیان بەهێزکردنی پەیوەندییە لەگەڵ بەشداربووان لەڕێگەی پێشکەشکردنی تایبەتمەندی "مزایا" و خەڵاتی تایبەت کە هانیان دەدات بەردەوام کارلێک بکەن و وەفادارییان بەرز دەنرخێنێت. ئەم بەرنامەیە پشت بە ستراتیژە داهێنەرەکان دەبەستێت کە هاندانی دیجیتاڵی و خزمەتگوزاریی بەها زیادکراوەکان پێکەوە دەبەستێتەوە.
چرا حسێن بەڕێوەبەری جێبەجێکاری یەکەی بازرگانی ئاسیاسێڵ رایگەیاند، "بەدەستهێنانی ئەم خەڵاتە پایەدارە لەلایەن بەرنامەی هاوڕێی تەمەنەوە بەڵگەی پابەندبوونی ئاسیاسێڵە بە داهێنان و تەرکیزکردنی بەردەوام لەسەر باشترکردنی ئەزمونی بەشداربووان. سوپاسگوزاری هاوبەش و بەشداربووانمانین کە بەشێکی دانەبڕاو بوون لەم سەرکەوتنە و ئامانجمانە لە داهاتوودا دەستکەوتی زیاتر بەدەستبهێنین."
لەلایەکی دیکەوە، رەبیع فەرەحات بەڕێوەبەری جێبەجێکاری کۆمپانیای Related سەبارەت بە خەڵاتەکە وتی: "ئێمە زۆر شانازی دەکەین بە هاوبەشیکردنمان لەگەڵ ئاسیاسێڵ و پێشکەشکردنی چارەسەرێکی نایاب لە بواری وەفاداری و خەڵاتەکان. پرۆگرامی هاوڕێی تەمەن سەلماندوویەتی کە خاڵی وەرچەرخانە لە بازاڕدا لەڕێگەی ئەزموونە دیجیتاڵییە تەواو نوێکراوەکەیەوە".
ئاسیاسێڵ "کۆماندەکاتەوە"، دابینکاری سەرەکی خزمەتگوزاریى پەیوەندییەکانی مۆبایل و خزمەتگوزارییە دیجیتاڵییەکانە لە عێراق و ژمارهى بهشدرابووانی ١٨.٦ مليۆنە. ئاسياسێڵ وەکو یەکەم کۆمپانیاى خزمەتگوزاریى مۆبایل ناسێنراوە لە عێراق، یەکەم کۆمپانیاشە کە تۆڕەکەی هەموو بەشەکانی عێراق دەگرێتەوە.
پەیامنێری کوردسات نیوز رایگەیاند، لە رووداوێکی هاتوچۆدا لەسەر رێگای تەکیە- ئاغجەلەر، کەسێک گیانی لەدەستدا و هەشت کەسی دیکەش بریندار بوون.
ئاماژەی بەوەشکرد، رووداوەکە لە نزیک گوندی کانی سپیلکە روویداوە و لەنێوان چوار ئۆتۆمبێلدا بووە.
ئەوەشی خستە روو، ئەو کەسەی گیانی لەدەستداوە پیاوێکە تەمەنی لەنێوان ٥٥ بۆ ٦٠ ساڵ دایە و خەڵکی گوندی داڵاوا بووە.
پەیامنێری کوردسات نیوز ئەوەشی خستە روو، لە ئێستادا بریندارەکان گواستراونەتەوە بۆ نەخۆشخانەی شەهید پێشڕەو لە چەمچەماڵ و لە ژێر چاودێری پزیشکدان.
ئەوەش لە کاتێکدایە، دوێنێ چوارشەممە، هاتوچۆی گەرمیان رایگەیاند، لە رووداوێکی هاتوچۆدا لەسەر رێگای باوەنوور بەرەو کەلار، چوار منداڵ گیانیان لەدەستدا و ژنێکیش بریندار بوو.
پۆلیسی سلێمانی رایگەیاند، ماوەی پێنج رۆژە تەرمی هاوڵاتییەک لە پزیشکی دادوەرییە و داواش دەکات، هەر کەسێک زانیاریی لەسەری هەیە پەیوەندییان پێوە بکات.
پۆلیسی سلێمانی رایگەیاند، هاوڵاتییەک بەناوی (ئیسماعیل عەبدوڵا دەروێش)، کە تەمەنی ٧٣ ساڵە، لە ٧ی ١٢ی ٢٠٢٤ـەوە لە نەخۆشخانەی شار بە نەخۆشی گیانی لەدەستداوە، لەئێستادا تەرمەکەی لە پزیشکی دادوەری شاری سلێمانییە.
ئەوەش هاتووە، "داوا لە کەسوکاری یان هەر کەسێک دەکەین کە زانیاری لەبارەیەوە هەیە سەردانی پزیشکی دادوەری بکات یان پەیوەندی بکەن بە بنکەی پۆلیسی کوردساتەوە بەم ژمارەیە، ٠٥٣٣٣٦٠٦٥٧".
قوباد تاڵەبانی لە ساڵیادی شەهیدبوونی فەرماندە ئاکام دا پەیامێکی بڵاوکردووەتەوە و دەڵێت: " ئەمڕۆ یادی شەهیدبوونی کەڵەپیاو و جوامێرێکی بەوەفا و نیشتمان پەروەر دەکەینەوە"
دەقی پەیامەکە
ئەمڕۆ یادی شەهیدبوونی کەڵەپیاو و جوامێرێکی بەوەفا و نیشتمان پەروەر دەکەینەوە.
پێشمەرگەیەک پڕ بەمانای وشە فێری کەم ژیان و کەڵ ژیانی کردین.
نەمریی بۆ روحی فەرماندە ئاکام عومەر و سەرجەم شەهیدانی کوردستان.
بافڵ جەلال تاڵەبانی سەرۆکی یەکێتیی نیشتمانیی کوردستان لە ساڵیادی شەهیدبوونی فەرماندە ئاکام دا، پەیامێکی بڵاوکردووەتەوە و رایگەیاندووە، "ئەوەی شەهید ئاكام بە خاكی كوردستانی بەخشی كەم نەبوو، ئەو بوو بە تەمەنێكی كەم و ئازایەتییەكی بێوێنەوە لە سەنگەرەكانی پێشمەرگە دژی یەكێك لە دڕندەترین هێزەكانی مێژوو وەستایەوە و پارێزگاری لە خاكی كوردستان و خەڵكەكەی دەكرد".
دەقی پەیامەکە
ئەمڕۆ بە دڵتەنگییەكی قووڵ و وەفاداریی هەمیشەییمانەوە یادی شەهیدبوونی برام فەرماندە ئاكام عومەر دەكەینەوە، یادی سیمبوولێكی ئازایەتی و جوامێرێكی رێگەی ئازادی و دادپەروەری دەكەینەوە.
ئەوەی شەهید ئاكام بە خاكی كوردستانی بەخشی كەم نەبوو، ئەو بوو بە تەمەنێكی كەم و ئازایەتییەكی بێوێنەوە لە سەنگەرەكانی پێشمەرگە دژی یەكێك لە دڕندەترین هێزەكانی مێژوو وەستایەوە و پارێزگاری لە خاكی كوردستان و خەڵكەكەی دەكرد، ئەو كوردستانی لە دڵیدا هەڵگرتبوو و هەموو ئەوەی دەیویست سەرفرازی و سەقامگیریی بوو بۆ خاكەكەی، دواجار هەر لەو پێناوەشدا چووە ریزی شەهیدان و كاروانی نەمرانەوە.
دوای شەهیدبوونی فەرماندە ئاکام عومەر بەڵێنماندا هێزەکانی کۆماندۆی کوردستان کە بەرهەمی هەوڵ و تێکۆشانی ئەو بوو، بەهێزتر و گەورەتر بکەین. بەڵێنەکەمان بەجێگەیاند و ئێستا ئەو هێزە لەهەمووكاتێك بەهێزتر و پتەوترە. لەهەمووكات زیاتر ئامادەی بەگژداچوونەوەی دوژمنانی كوردستان و یاساشكێنانە، هەموو پێشمەرگەكانی بە رۆحێكی یەكێتییانە و ئازایەتییەك كە لە شەهید ئاكامەوە فێریبوون، زیاتر ئامادەی بەخشینی خوێنی خۆیانن لەپێناو خاكی كوردستاندا.
دروود بۆ رۆحی شەهید ئاكام و سەرجەم شەهیدانی كوردستان.. سەربەرزی بۆ كەسوكارە خۆڕاگرەكانیان
بافڵ جەلال تاڵەبانی
سەرۆکی یەکێتیی نیشتمانیی کوردستان
وەزارەتی دارایی هەرێمی كوردستان دڵنیایی دەداتە موچە خۆران و دەڵێت هەموو هەوڵێك دەدەن بۆ ئەوەی هیچ موچەیەكی ساڵی 2024 موچە خۆرانی هەرێم نەفەوتێت .
هونەر جەمال، وتەبێژی وەزارەتی دارایی و ئابوری حكومەتی هەرێم لە كۆنفرانسێكی رۆژنامەوانیدا ڕایگەیاند، هیچ بیانویەك لەبەردەم بەغداد نەماوە بۆ بڕینی بەشێك لە پشكی هەرێمی كوردستان و هەموو كێشە تەكنییەكان چارەسەر كراون. وتیشی لە ئێستادا وەزارەتی دارایی هەرێم پەیوەندییەكی زۆر باشی لەگەڵ وەزیری دارایی عێراق و ستافەكەی هەیە، بە بەردەوامی تیمەكانیان لەسەر هێڵن، هەفتانە یان مانگانە تیمەكانمان چەند جارێك دەچنە بەغداد".
هاوكات رێباز عەباس راوێژكاری وەزارەتی دارایی هەرێم و ئەندامی وەفدی تەكنیكی وەزارەتەكە رایگەیاند، تا ئێستا لەگەڵ وەزارەتی دارایی عیراق لەسەر خەتن بۆ ئەوەی تەمویلێك وەربگرن بۆ تەواوكاری موچەی مانگی 10 تا دابەشی بكەن ، وتیشی لیست مانگی 11 ئامادەیە بۆ ئەوەی تەمویل بكرێت و لیستی موچەی مانگی 12 ش رەوانەی بەغداد كراوە و چاوەروانن لە داهاتویەكی نزیكدا تەمویلی وەربگرن، هەروەها دڵنیایی دایە موچە خۆرانی هەرێم و وتی هەموو هەوڵێك دەدەن بۆ ئەوەی هیچ موچەیەكی ساڵی 2024 ی موچەخۆرانی هەرێم نەفەوتێت .
وەزارەتی دارایی لەبارەی بڵاوکردنەوەی هەواڵێکی ناڕاست لەسەر موچە ڕوونکردنەوەکیشی داو رایگەیاند؛ لەبارەی موچەوە هەر هەواڵێک خۆمان بڵاوینەکەینەوە ناڕاستە.
کەشناسی هەرێم پێشبینی دەکات سبەی پلەکانی گەرما نزم ببنەوە و بارانبارین دەستپێبکات و لەناوچە شاخاویەکان بەفر دەبارێت
بەڕێوبەرایەتی کەشناسی و بومەلەرزەزانی هەرێم رایگەیاند، ئەمڕۆ پێنجشەممە، ئاسمان بەگشتی لەنێوان نیمچەهەور بۆ هەوری تەواو دەبێت لە کاتەکانی ئێوارە شەپۆلێکی باران و بەفربارین ناوچە شاخاوییەکانی باکور بە تایبەت سۆران دەگرێتەوە و پلەکانی گەرما دادەبەزن
کەشناسی هەرێم دەشڵێت، سبەی هەینی ئەو شەپۆلی باران و بەفربارینەی ناوچەشاخاوییەکانی گرتوەتەوە بەردەوام دەبێت بە تایبەت لەناوچەکانی ئیدارەی سەربەخۆی سۆران و راپەرین.،شەپۆلەکە کاریگەری دەبێت بۆ ناوچەکانی رۆژهەڵاتی هەرێم پارێزگای هەڵەبجە پاشان لەکاتەکانی ئێوارە کۆتایی بە دابارین دێت کەش جێگیر دەبێتەوە.
لە یادی دوو ساڵەی شەهیدبوونی فەرماندەی هێزەکانی کۆماندۆ فەرماندە"ئاکام عومەر" لە شارۆچکەی سەیدسادق چەند پرۆژەیەکی خێرخوازی دەکرێتەوە، کە پێکدێن لە بنکەیەکی تەندروستی و مزگەوتێک
مەراسیمەکە سەعات یەک، بە بەشداری چەندین کەسایەتی حکومی و حزبی دەستپێدەکات.
رۆژی ١٩-١٠-٢٠٢٢ ھێزێكی سەر بە فەرماندەیی ھێزەكانی كۆماندۆ بۆ ئەنجامدانی ئۆپەراسیۆنێك لەدژی تیرۆریستانی داعش گەیشتنە سنووری ناحیەی زینانە و لەئاكامدا بۆمبێکی چێندراو بەئۆتۆمبێلەكانی ھێزەكەدا تەقییەوە، لەئەنجامی ئەو تەقینەوەیەدا ئەفسەرێك بە ناوی نەقیب (زوھێر فایەق) شەھید بوو، ھەروەھا فەرماندەی ھێزەكانی كۆماندۆ (ئاكام عومەر) و چەند پێشمەرگەیەكی دیكە بریندار بوون.
دواتر، دوای ١٠ رۆژ مانەوەی لە نەخۆشخانەی فاروق لەسلێمانی، فەرماندە ئاكام بە فڕۆكەیەكی تایبەت و لەرێگەی تیمێكی پزیشكی تایبەتەوە بەمەبەستی چارەسەر گەیەندرایە وڵاتی ئەڵمانی و دوای ٥٤ رۆژ لەبرینداربوونی بەهۆی سەختی برینەكەیەوە شەهیدبوو.
ئەمڕۆش لە مەراسیمەکەی سەیدسادقدا، چەندین کەسایەتی حکومی و حیزبی بەشداردەبن
وەزیری بەرگری ئەڵمانیا لە هەرێمی كوردستانە و لەگەڵ سەرۆكی هەرێمی كوردستان و جێگری سەرۆكی هەرێم و وەزیری پێشمەرگە لە كۆبوونەوەدایە.
بۆریس پیستۆریۆس وەزیری بەرگری ئەڵمانیا و وەفدێكی یاوەری بەسەردانێكی دوو رۆژە لە رۆژهەڵاتی ناوەڕاستن لەدوای سەردانەی بۆ عەمان و بەغداد، لەئێستادا لە هەرێمی كوردستانەوە لەگەڵ نێچیرڤان بارزانی سەرۆكی هەرێمی كوردستان و جەعفەر شێخ مستەفا جێگری سەرۆكی هەرێم و شۆڕش ئیسماعیل وەزیری پێشمەرگە لە كۆبوونەوەدایە.
بڕیارە لەدوای كۆبوونەوەكەی وەزیری بەرگری ئەڵمانیا، هێزەكانی وڵاتەكەی لە هەرێمی كوردستان بەسەربكاتەوە.
هاوكات، رۆژی چوارشەممە، وەزیری بەرگری ئەڵمانیا لەگەڵ محەمەد شیاع سودانی سەرۆك وەزیرانی عیراق كۆبووەوە و باسیان لە دواپێشهاتەكانی سوریا و ناوچەكە كرد، جەختیانكردەوە لەسەر پاراستنی یەكپارچەی خاكی سوریا.
هێزەكانی ئەڵمانیا لە ساڵی ٢٠١٥ەوە كە ژمارەیان زیاتر لە ٦٠٠ سەربازە لە هەرێم و عێراقن و بڕیاریشە وەكو ئەندام لە هاوپەیمانیی نێودەوڵەتی لەدژی داعش تا ساڵی ٢٠٢٦ بمێنەوە، هێزەكانی ئەڵمانیا مەشق و راهێنان بە هێزی پێشمەرگە و سوپای عێراق دەكەن و رۆڵی گەورەیان هەیە لە یەكخستنەوەی هێزەكانی پێشمەرگە.
مەكتەبی سیاسی یەكێتیی نیشتمانیی كوردستان، بەبۆنەی یادی ٣٩ ساڵەی دامەزراندنی حزبی زەحمەتكێشانی كوردستان، پەیامیکی پیرۆزبایی ئاڕاستەی حزبەکە دەکات و دەڵێت، "یەكێتی رژدە لەپەیوەندی دۆستانە لەگەڵ حزبی زەحمەتكێشانی كوردستان و سەرجەم لایەنە سیاسیەكانی هەرێمی كوردستان لە پێناو گەشەپێدانی خەبات".
دەقی پەیامەکە...
بەرێزان سكرتێر و ئەندامانی مەكتەبی سیاسی و ئەنجوومەنی گشتی حزبی زەحمەتكێشانی كوردستان
لە یادی ٣٩ ساڵەی دامەزراندنی حزبە تێكۆشەرەكەتان، حزبی زەحمەتكێشانی كوردستان، گەرمترین پیرۆزبایتان ئاراستە دەكەین، هیوای بەردەوامی و سەركەوتنتان بۆ دەخوازین لەكاروانی خەباتی نیشتیمانی و نەتەوەییدا.
یەكێتیی نیشتمانیی كوردستان رژدە لەپەیوەندی دۆستانە لەگەڵ حزبی زەحمەتكێشانی كوردستان و سەرجەم لایەنە سیاسیەكانی هەرێمی كوردستان لە پێناوگەشەپێدانی خەبات و بەدەستهێنانی مافەكانی گەلەكەمان و سەرخستنی دۆزە ڕەواكەی.
جارێكی تر پیرۆزبێت
مەكتەبی سیاسی
یەكێتیی نیشتمانیی كوردستان
12-12-2024
لەسەر ئەركی جێگری سەرۆك وەزیرانی هەرێم، تەرمی ئەو دایك و منداڵەی كە لە یۆنان خنكانبوون، دەگەڕێنرێنەوە بۆ هەرێمی كوردستان.
ئاری جەلال سەرۆكی دەزگای لوتكە بۆ كاروباری ئاوارە و پەنابەران بە كوردسات نیوزی راگەیاند، لەسەر ئەركی قوباد تاڵەبانی جێگری سەرۆك وەزیرانی هەرێم، بەرەبەیانی رۆژی شەممەی داهاتوو، تەرمی نایلە مستەفا و نور كاوێزی كچی، كە لە باكووری دورگەی سامۆسی یۆنان گیانیانلەدەستدابوو، دەگەڕێنرێنەوە بۆ هەرێمی كوردستان.
وتیشی، لە باڵیۆزخانەی عیراق لە یۆنان سەرجەم رێكارە یاساییەكان تەواو كراون و تەرمەكان لە رێگەی فڕۆكەخانەی نێودەوڵەتی سلێمانییەوە دەگەڕێنرێنەوە هەرێم و لە شارۆچكەی سەروچاوەی سەر بە ئیدارەی راپەڕین بە خاكدەسپێردرێن.
رۆژی ٢٨ـی مانگی رابردوو، نایلە مستەفا و نور كاوێز، دایك و منداڵێكی تەمەن ١٠ مانگ، بەمەبەستی گەیشتن بە وڵاتانی ئەوروپا بە خێزانی كۆچیان كردبوو، بەڵام بەهۆی نقومبوونی بەلەمەكەیان لە دەریای ئیجە لە باكووری دورگەی سامۆسی یۆنان گیانیانلەدەستدا.
شارەوانی سلێمانی بەدواداچوون بۆ كاری لیژنەی دابەشكردنی زەویی فەرمانبەران دەكات
شارەوانی سلێمانی، بەدواداچوون بۆ كاری لیژنەی دابەشكردنی زەویی بەسەر فەرمانبەراندا دەكات و دوای تەواوكردنی رێكارە یاساییەكان زەویی بەسەر فەرمانبەراندا دابەشدەكرێت.
بەسەرپەرشتی لەیلا عومەر سەرۆكی شارەوانی سلێمانی، لیژنەی دابەشكردنی زەویی بۆ تاوتوێكردنی كارەكانی لیژنەكە كۆبونەوە، بەمەبەستی دۆزینەوەی رێگە چارە بۆ ئەو كێشە و گرفتانەی لە ئێستادا بوونیان هەیە لە پرۆسەكەدا، ئەوەش بەهۆی زۆری داواكاریی فەرمانبەرانی وەزارەتە جیاوازەكانی دەرەوەی وەزارەتی شارەوانیی و گەشتوگوزار.
لە بەشێكی تری كۆنونەوەكەدا گفتوگۆ لەسەر سەرجەمی ئەو وەزارەتانەی ناوی فەرمانبەرانیان نەگەڕاوەتەوە لە ئەنجومەنی وەزیران كرا.
ئاماژە بەوەشکرا، هەر كاتێك نوسراوی هەرسێ بەڕێوەبەرایەتی تۆماركردنی خانووبەرەی یەك، دوو و بەڕێوەبەرایەتی گشتی شارەوانییەكان تەواوكران، دواتر ئاڕاستەی سەرۆكایەتی شارەوانی سلێمانی دەكرێت و كاری یاساییان بۆ ئەنجام دەدرێت و بەزوترین كات زەوییان بەسەردا دابەشدەكرێت.
هاتوچۆی گەرمیان رایگەیاند، لە رووداوێکی هاتوچۆدا لەسەر رێگای باوەنوور بەرەو کەلار، دوو منداڵ گیانیان لەدەستدا و دوو منداڵ و ژنێکی دیکە بریندار بوون.
هاتوچۆی گەرمیان رایگەیاند، رووداوەکە لەسەر رێگای باوەنوور بووە و ئۆتۆمبێلێکی جۆری تۆیۆتا کۆرۆلا بەرەو کەلار رۆیشتووە، لە نزیک گوندی بەردەسوری کۆن کۆنتڕۆڵی لەدەستداوە و خۆی کێشاوە بە ستوونێکی کارەبادا.
ئاماژەی بەوەشکردووە، سەرەتا لە رووداوەکەدا پێنج منداڵ و ژنێک بریندار بوون و دەستبەجێ گەیەنراونەتە نەخۆشخانە، بەڵام بەهۆی سەختی برینەکانیانەوە دوو لە منداڵەکان رەوانەی نەخۆشخانەکانی سلێمانی کران، بەڵام دواتر گیانیان لەدەستداوە.
ئەوەش هاتووە، ئەو دوو منداڵەی گیانیان لەدەستداوە تەمەنیان شەش ساڵ و هەشت ساڵ بووە.
پەیامنێری کوردسات نیوز ئاماژەی بەوەکرد، لە سلێمانی تەرمی کەسێک بو کوژراویی لە سندوقی ئۆتۆمبێلەکەیدا دۆزراوەتەوە.
ئاماژەی بەوەشکرد، بە وتەی کەسوکارەکەی لە دوێنێ سەعات ٤ی پاشنیوەڕۆوە وەڵامی تەلەفۆنی نەداوەتەوە و لە سەعات ١٠ی شەوەوە مۆبایلەکەی کوژاوەتەوە.
وتیشی، ئەمڕۆ لە نزیک سەعات ٤ی پاشنیوەڕۆ لە سەر رێگای سلێمانی- عەربەت، لە نزیک کارگەکانی ناوچەی ژاڵە دۆزراوەتەوە.
باسی لەوەشکرد، ئەو کەسە تەمەنی ٤٥ ساڵ بووە و پێشتر کارمەندی ئاسایش بووە و خۆی خانەنشین کردووە، خێزاندار بووە و خاوەنی سێ منداڵ بووە.
لەوبارەیەوە یەکێک لە کەسوکاری ئەو کەسە بە کوردسات نیوزی راگەیاند، ماوەی چوار پێنج ساڵێک دەبوو کاری تاکسی دەکرد و گرفتی لەگەڵ کەسدا نەبووە، بۆیە گومانمان لە کەس نییە.
ئەوەشی خستە روو، شوێنەواری چوار گوللـە بەسەر جەستەیەوە بووە و دوای کوژرانی لە سندوقی ئۆتۆمبێلەکەیدا لاشەکەیان جێهێشتووە.
ئەنجومەنی وەیزرانی هەرێم کۆبووە و دوای کۆبوونەوەکەیش راگەیەندراوێکی بڵاوکردەوە.
دەقی راگەیەندراوەکە
لە بڕگەی یەکەمی کۆبوونەوەدا، بەڕێزان ئاوات شێخ جەناب وەزیری دارایی و ئابووری و ئومێد سەباح سەرۆکی دیوانی ئەنجومەنی وەزیران، ڕاپۆرتێکیان دەربارەی دوایین پێشهاتەکانی پەیوەندیدار بە بابەتی مووچە و هەموارکردنەوەی یاسای بودجەی گشتیی فیدرال و خشتەکانی هاوپێچی یاساکە بۆ ساڵی دارایی 2025 پێشکەش کرد.
ئەنجومەنی وەزیران جەختی کردەوە کە حکومەتی هەرێمی کوردستان، ئەرک و پابەندییەکانی خۆی بە تەواوی و بە باشترین شێوە، جێبەجێ کردووە و لە هەوڵەکانیشی لە گەڵ حکومەتی فیدراڵ بەردەوامە بۆ دابینکردنی مووچە و شایستە داراییەکانی هەرێمی کوردستان و لەم ڕووەوە، چاوەڕوانین حکومەتی فیدراڵ ، لە چەند ڕۆژی داهاتوودا، تەواوی شایستەی دارایی مانگەکانی 10 و 11 و12 بنێرێت، تا لە نزیکترین دەرفەتدا، مووچە دابەش بکرێت، کە بەداخەوە، بەهۆی ڕێکارەکانی وەزارەتی دارایی فیدڕاڵ، سەرەڕای ئەوەی ئێستا لە مانگی 12ین و مووچەخۆرانی ناوچەکانی دیکەی عێراق، مووچەی مانگی 12 وەردەگرن، بەڵام مووچەخۆرانی هەرێم، تا ئێستاش مووچەی مانگەکانی 10 و 11 ئەمساڵیان وەرنەگرتووە، لە کاتێکدا وەزارەتی دارایی هەرێم، سەرجەم کەموکوڕیی لیستەکانی مووچەی چارەسەرکردووە ولیستی مووچەی هەر سێ مانگەکەی بە تەواوی و بە بێ کەموکوڕیی بۆ وەزارەتی دارایی فیدڕاڵ ناردووە.
بۆ ئەم مەبەستە ئەنجومەنی وەزیران، داوا لە ئەنجومەنی وەزیرانی فیدڕاڵ دەکات، لە کۆبوونەوەی داهاتوویان کە بڕیارە سبەی ئەنجام بدرێت، پشت بەو دەسەڵاتەی پێیان دراوە، بە گوێرەی ماددەی 60 لە یاسای بودجەی عێراق ، چارەسەری بنەڕەتی کورتهێنانی تەرخانکراویی مووچەی هەرێم بکەن، تاکوو مووچەخۆرانی هەرێم، هاوتای هاوەڵەکانیان لە ناوچەکانی دیکەی عێراق ، مووچەکانیان بەتەواویی و لە وادەی یاسایی خۆیان وەربگرن و چی دی پاساو و بیانووی تەکنیکی، نەکرێتە بەربەست لەبەردەم شایستە داراییەکانی مووچەخۆران کە پێویستە دوور بێت لە هەموو ناکۆکییەک.
هەروەها حکومەتی هەرێم دەستخۆشی لە هەموو هەوڵێک دەکات لە سەر ئاستی فیدراڵی و هەرێمی بۆ چارەسەرکردنی بابەتی مووچەی خەڵکی هەرێمی کوردستان.
ئەنجومەنی وەزیران، وەزارەتی دارایی و ئابووری ڕاسپارد کە لە کاتی گەیشتنی هەر بڕە پاریەکی تر، لە بەغداوە بۆ تەواوکاری مووچە، ڕاستەوخۆ دەست بەدابەشکردنی مووچەكان بکات.
هەروەها بڕیاردرا، شاندی حکومەتی هەرێمی کوردستان، لە حەفتەی داهاتوودا، بۆ بەدواداچوونی پرسی هەموارکردنەوەی بودجەی گشتیی فیدراڵ و خشتە داراییەکانی هاوپێچی یاساکە بۆ ساڵی دارایی 2025 ، سەردانی بەغدا بکات.
دواتر هەر لە چوارچێوەی یەکخستنەوەی ڕێکار و ڕێسا داراییەکان لە نێوان هەردوو حکومەتی هەرێم و حکومەتی فیدڕاڵ، لە بڕگەی دووەمی کۆبونەوەکە ، وەزیری دارایی و ئابووری ، پێشنیاری هاوبەشی وەزارەتی دارایی و ئابووری و ئەنجومەنی گشتیی ڕاژەی بۆ هاوتاکردنی ناونیشانە وەزیفییەکان لە هەرێمی کوردستان لەگەڵ حکومەتی فیدراڵ خستەڕوو، ئەمەش بۆ جێبەجێکردنی خشتەی نوێی ناونیشانە وەزیفیەکان کە لە یاسای ساڵی 2024 ی هەموارکراوی میلاک هاتوون، لە دوای گفتوگۆ، ئەنجومەنی وەزیران وەزارەتەکانی ڕاسپارد بەداداچوون بۆ ئەم هەموارە بکەن کە لە خشتەی ناونیشانە وەزیفیەکانی یاسای میلاک هاتووە، بە ڕەچاوکردنی تایبەتمەندیی دامەزراوەکانی هەرێم و بەرژەوەندی فەرمانبەران تا لە کۆبوونەوەکانی داهاتوو بڕیاری پێویستی لەبارەوە بدرێت.
بڕگەی کۆتایی کۆبوونەوە تایبەت بوو بە خستنەڕووی ڕاپۆرتێکی بەڕێز ئایدن مەعروف وەزیری هەرێم بۆ کاروباری پێکهاتەکان لەبارەی دۆخی پێکهاتەکان و بەیەکەوەژیان لە هەرێمی کوردستان .
ئەنجومەنی وەزیران پابەندبوونی هەرێمی کوردستانی بە پاراستن و داکۆکیکردن و پەرەپێدانی مافەکانی پێکهاتە ئایینی و نەتەوەییەکان و دۆخی بەیەکەوەژیانی ئاشتییانەی هەرێمی کوردستان، دووپات کردەوە.