کوردستان
ئەمڕۆ دادگای فیدڕاڵی عیراق لەبارەی سکاڵاکەی سەرۆک کۆمار تایبەت بە موچەی موچەخۆرانی هەرێم کۆدەبێتەوە، کە دوو رۆژ بەر لە ئێستا تۆماری کردبوو.
بڕیارە ئەمڕۆ چوارشەممە، دادگای فیدڕاڵی عیراق لەبارەی سکاڵایەکی د. لەتیف رەشید سەرۆک کۆماری عیراق کۆببێتەوە، کە دوو رۆژ بەر لە ئێستا لەبارەی موچەی فەرمانبەرانی هەرێمەوە، لەسەر سەرۆک وەزیران و سەرۆکی ئەنجومەنی نوێنەران و وەزیری دارایی عیراق تۆماری کردبوو.
سكاڵاكەی سەرۆك كۆمار لەبارەی موچەی فەرمانبەرانی هەرێم و پابەندكردنی وەزارەتی دارایی عیراقە بە خەرجكردنی موچە کە لە چوار خاڵ پێكهاتووە، کە داوایکردووە، فەرمانێكی وەلائی خێرا دەربکرێت بۆ پابەندكردنی وەزارەتی دارایی عیراق بە خەرجكردنی موچەی فەرمانبەرانی هەرێم.
هاوکات، پابەندكردنی وەزارەتی دارایی عیراق بە خەرجكردنی موچەی فەرمانبەرانی هەرێم بە شێوەیەكی بەردەوام و بەبێ وەستان، هەروەها جێبەجێكردنی بەبانكیكردنی موچە بەپێی رێنماییەكانی بەبانكیكردن، بە جۆرێک هاوشێوەی ئەو رێكارانە بێت كە حكومەتی عیراق دەیگرێتە بەر.
وەزارەتی ناوخۆی هەرێم تۆمارکردنی یەکەمجار و خەرجی ژینگەی لەسەر ئۆتۆمبێلی کارەبایی هەڵگرت و بەپێی بڕیارەکە، هیچ بەرامبەرێکی دارایی وەناگیرێت. راشیگەیاند، دەیانەوێت لەو رێگایەوە هانی هاوڵاتیان بدەن ئۆتۆمبێلی کارەبایی بەکاربهێنن.
وەزارەتی ناوخۆی هەرێم رایگەیاند، بەمەبەستی هاندانی هاووڵاتیان بۆ بەکارهێنانی ئۆتۆمبێلی تەواو کارەبایی، تۆمارکردنی یەکەمجاری ئۆتۆمبێلی کارەبایی و خەرجی ژینگە لەسەر ئۆتۆمبێلی کارەبایی هەڵگیراوە.
ئاماژەی بەوەشکردووە، ئۆتۆمبێلی تهواو كارهبایی بهشداره له كهمكردنهوهی مهترسیهكانی ژینگه.
بەپێی بڕیارەکەی وەزارەتی ناوخۆ، بڕیارەکە لە رۆژی 16ی ئەم مانگە واتە یەکشەممەی هەفتەی داهاتووەوە دەچێتە بجواری جێبەجێکردنەوە.
ئۆتۆمبێلی کارەبای لە ئێستادا بە گشتی لە وڵاتانی جیهاندا بەکاردەهێنرێت و هاوکارە لە کەمکردنەوەی دەردانی گازی زیانبەخش بۆناو ژینگە و هەوا و لەو رێگایەشەوە هاوکارە لە کەمتر پیسبوونی ژینگەدا.
پارتی كرێكارانی كوردستان-پەكەكە رایگەیاند، لێدوانەكانی ئۆجەلان بۆ چارەسەری ئاشتییانەی پرسی كورد یەكلاكەرەوەن و پابەندی دەبن، داواش لە توركیا دەكات، پابەندنی پرۆسەكە بێت.
پارتی كرێكارانی كوردستان - پەكەكە لە راگەیەنراوێكدا بۆ تێپەڕێنی 26 ساڵ بەسەر دەستگیركردنی عەبدوڵا ئۆجەڵان رێبەری زیندایكرداوی ئەو پارتە بڵاویكردەوە، هەنگاو و لێدوانەكانی ئۆجەلان رۆڵی گەورەی لەسەر پرسی كورد لە باكوری كوردستان و توركیا دەبێت و بە تەواوی پابەندی هەموو لێدوانەكانی دەبن.
پەكەكە راشیگەیاند، ئۆجەلان بە تەنیا ناتوانێت هەمو كێشەكان چارەسەر بكات، بۆیە هەر لایەنێك پێویستە تێگەیشتنی بۆ رەوشی توركیا و پرسی كورد هەبێت و پابەندی ئەو بەرپرسیارێتییە بێت كە رووبەڕووی دەبێتەوە لە پرۆسەی چارەسەریدا.
کەشناسیی هەرێم رایگەیاند، شەپۆلێکی دیکەی بەفر و باران هەرێم دەگرێتەوە و لە ناوەندی هەردوو پارێزگای سلێمانی و دهۆک بەفر دەبارێت.
کەشناسیی هەرێم رایگەیاندووە، ئەمڕۆ چوارشەممە، ئاسمان ساماڵ و پەڵەهەور دەبێت و لە کاتەکانى ئێوارەدا دەگۆڕێت بۆ نیمچەهەور، پلەکانی گەرماش کەمێک بەرز دەبنەوە بەراورد بە تۆمارکراوەکانی دوێنێ .
ئاماژە بەوەشکراوە، سبەی پێنجشەممە، ئاسمان بەگشتى نیمچەهەور دەبێت و لە کاتەکانى دواى نیوەڕۆوە دەگۆڕێت بۆ هەورى تەواو.
ئەوەش هاتووە، لە ئەنجامى هاتنی شەپۆلێکى بەفر و باران بۆ ناوچەکە، بارانبارین بەشێوەى نمەبارانی پچڕپچڕ دەست پێ دەکات و لە کاتەکانى ئێوارەدا کاریگەرى ئەم شەپۆلە زیاد دەکات و بارانى مامناوەند دەبارێت، بەفر لە ناوچە شاخاوییە بەرزەکان و سنوورییەکان دەبارێت و ئەو ناوچانەى بەرزاییان لە هەزار مەتر زیاتر بێت ئەگەرى بەفربارینی هەیە.
کەشناسی دەشڵێت، لە سەنتەرى پارێزگاى سلێمانى و سەنتەرى پارێزگاى دهۆک ئەگەرى بەفربارین هەیە بە تێکەڵی لەگەڵ باراندا و بە گشتی لە سبەینێوە پلەکانی گەرما نزم دەبنەوە.
بەپێی پێشبینییەکانی کەشناسی، ئەمڕۆ و سبەی خێرایی با زیاد دەکات.
بەرزترین پلەکانی گەرمای پێشبینیکراو بە پلەی سیلیزی :
هەولێر: 15 پلەى سیلیزى
سلێمانی: 12پلەى سیلیزى
دهۆک: 12 پلەى سیلیزى
کەرکوک: 16 پلەى سیلیزى
زاخۆ: 12 پلەى سیلیزى
هەڵەبجە: 13 پلەى سیلیزى
حاجی ئۆمەران: 0 پلەى سیلیزى
سۆران: 11 پلەى سیلیزى
گەرمیان: 20 پلەى سیلیز
بەهۆی جیاوازی لۆگۆکەی لە دەرەوە و ناوەوە، هاتوچۆی هەولێر پێدانی تابلۆ بە جۆرە ئۆتۆمبێلێکی چینی راگرت و دەڵێت: پێویستە کێشەکە بەڕێوەبەرایەتی گومرگ یەکلایی بکاتەوە.
بەڕێوەبەرایەتی هاتوچۆی هەولێر لە راگەیەنراوێکدا ئاگاداری هاووڵاتیانی شاری هەولێر دەکاتەوە، لەئێستا جۆرە ئۆتۆمبێلێک لە بازاڕەکان کرین و فرۆشتنی پێوە دەکرێت، "کە لە رووکاری دەرەوەیدا لۆگۆی ئۆتۆمبێلی (MG) پێوەیە، بەڵام لەناوەوەی ئۆتۆمبێلەکە لۆگۆی (ROE WE) لەسەر سوکانەکەی هەیە".
ئاماژەی بەوەشکرد، ئەو جۆرە ئۆتۆمبێلە لە ئێستادا تۆمار ناکرێت و ژمارە و تابلۆی پێنادرێت، تا ئەو کاتەی کێشەکەی لە بەڕێوەبەرایەتی گومرگ یەکلایی دەکرێتەوە.
هاوکات هاتوچۆی هەولێر داوا لە هاووڵاتیانیش دەکات مامەڵەی تۆمارکردنی ئەم جۆرە ئۆتۆمبێلە نەهێنن بۆ بەڕێوەبەرایەتییەکەیان.
فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق لە راگەیەنراوێکدا رایگەیاند، سوپاسی دادگای فیدراڵی دەكەن بۆ رەتكردنەوەی سكاڵای هەڵوەشاندنەوەی وەزارەتی شەهیدانی هەرێم و دەشڵێت، خزمەتكردنی وارس و كەسوكاری شەهیدان و ئەنفالكراوان ئەركێكی پیرۆزو گەورەیە.
دەقی راگەیەنراوەکە...
سوپاسی دادگای باڵای فیدرالی عیراق دەکەین، کە سکاڵای هەڵوەشاندنەوەی وەزارەتی شەهیدان و کاروباری ئەنفالکراوانی هەرێمی کوردستانی رەتکردووە.
خزمەتکردنی وارس و کەسوکاری سەربەرزی شەهیدان و ئەنفالکراوانی کوردستان، ئەرکێکی پیرۆزو گەورەیە و پێویستی بە وەزارەت و دامەزراوەی تر هەیە کە بتوانێ لە ئاستی گەورەیی و پیرۆزیی ئەرکەکەدا بێت.
هیوادارین لە کابینەی نوێی حکومەتی هەرێمی کوردستان زیاتر بایەخ و گرنگی و رۆڵ بدرێت بە وەزارەتی شەهیدان و ئەنفالکراوان، چونکە هێشتا داواکاری رەوا و خزموتگوزاری پێوسیت ماون جێبەجی بکرێن بۆ خزمەتکردنی کەسوکاری سەربەرزی شەهیدان و ئەنفالکراوان و کەیسی ئەنفال و کیماباران و جینۆسایدکردنی گەلی کوردستان.
فراکسیۆنی یەکێتیی نیشتمانیی کوردستان لەئەنجومەنی نوێنەرانی عێراق
رۆژی سێشەممە هەفتەی داهاتوو لیژنەی دارایی ئەنجومەنی نوێنەران، بانگێشتی وەزارەتی دارایی عیراق دەکات و گفتوگۆ لەبارەی موچەی مانگی 12ی فەرمانبەرانی هەرێم دەکەن.
پەیامنێری کوردسات نیوز لەسەرچاوەیەکی تایبەتەوە زانیاری دەستکەوتوە، رۆژی سێشەممەی هەفتەی داهاتوو، لیژنەی دارایی ئەنجومەنی نوێنەرانی عیراق، بانگهێشتی لێپرسراوانی وەزارەتی دارایی عیراق دەکات و لە نزیکەوە گفتوگۆی دیاریکردنی چارەنوسی موچەی مانگی 12ـی فەرمانبەرانی هەرێمی کوردستان دەکەن.
پەیامنێری کوردسات نیوز لە سەرچاوە تایبەتییەکەیەوە ئاشکرای دەکات، لە کاتی پێویستدا لیژنە حەوت ئەندامییەکەی لیژنەی دارایی ئەنجومەنی نوێنەران، لەگەڵ وەزارەتی دارایی هەرێمیش کۆدەبنەوە و چارەنووسی موچەی ئەو مانگە تاوتوێ دەکەن، کە لە نێوان هەرێم و بەغداد بە نادیاری ماوەتەوە.
پەیامنێری کوردسات نیوز ئەو زانیاریەشی دەستکەوتوە، لە کۆبونەوەکەی رۆژی سێشەممەدا پرسیار ئاڕاستەی وەزارەتی دارایی عیراق دەکرێت، لە بارەی رادەستکردنی داتای فەرمانبەرانی هەرێم، لەلایەن وەزارەتی دارایی هەرێمی کوردستانەوە بە وەزارەتی دارایی حکومەتی فیدڕاڵ و دەستپێکردنەوەی هەوڵەکان بۆ بەبانکیکردنی موچەی موچەخۆرانی حکومەتی هەرێم.
قوباد تاڵەبانی جێگری سەرۆک وەزیرانی هەرێم لە ئیمارات، لە میانەی لوتکەی جیهانیی حکومەتەکان، لەگەڵ سەعید محەمەد ئەلتایەر، سەرۆکی کۆمپانیای نەوتی نیشتمانی ئیمارات(ENOC)و وەفدێکی یاوەری، لەبارەی ئەزموونی سەرکەوتووی ئەو وڵاتە لە کەرتەکانی نەوت و گازدا کۆبووەوە و دەرفەتەكانی گواستنەوەیان بۆ كوردستان تاوتوێكرد.
هەر لەو لوتكەیەدا قوباد تاڵەبانی لەگەڵ مەتەر ئەلتایەر، سەرۆکی ئەنجوومەنی بەڕێوەبردنی دەستەی رێگاوبان و گواستنەوەی دوبەی (RTA)، لە بارەی پرۆژەكانی رێگاوبان و چۆنێتیی سوودوەرگرتن لە ئەزموونی ئیمارات، لە بواری گواستنەوەی گشتی (پاس و ترام) و سوودوەرگرتن لە شارەزایانی وڵاتەكەیان گفتوگۆیان كرد.
بەڕێوەبەری جێبەجێكاری دەستپێشخەری ئاسایشی وزەی ئەوروپا دەڵێت، چارەسەركردنی كێشەی تێچووی بەرهەمهێنانی نەوت لە هەرێمی كوردستان هەنگاوێكی گرنگە، بۆ دەستپێكردنەوەی هەناردەی نەوتی هەرێم لە رێگەی توركیاوە.
ئەلبێریك مۆنگرینیەر، بەڕێوەبەری جێبەجێكاری دەستپێشخەری ئاسایشی وزەی ئەوروپا رایگەیاند، ئەو رێككەوتنانەی لەنێوان حكومەتی هەرێم و حكومەتی عیراق كراوە لەبارەی تێچووی بەرهەمهێنانی نەوت لە هەرێمی كوردستان هەنگاوێكی گرنگە، بەڵام پێویستە هەردوو حكومەت لەسەر دامەزراندنی لیژنەیەكی راوێژكارێكی سەربەخۆ رێكبكەون بۆ هەڵسەنگاندنی ئەو تێچووەی بۆ بەرهەمهێنان و گواستنەوەی نەوتی هەرێم تەرخانكراوە.
ئەوەشی خستەڕوو، رەنگە دەستپێكردنەوەی هەناردەی نەوتی هەرێم هاوكاربێت بۆ بەرەوپێشبردن و باشتركردنی پەیوەندییەكانی نێوان عیراق و توركیا، كە پێشتر بەهۆی رووداوەكانی سوریاوە سست ببوو.
مۆنگرینیەر ئاماژەی بەوەشدا، پێدەچێت دەستپێكردنەوەی هەناردەی نەوتی هەرێم، كاریگەری نەرێنی لەسەر رێكخراوی ئۆپیك دروستبكات، هاوكات، چاوەڕوان دەكرێت پابەندبوونی عیراق بە كەمكردنەوەی بەرهەمهێنانی نەوت سەختتر بكات.
کەشناسی هەرێم پێشبینیەکانی بۆ چەند رۆژی ئایندە بڵاوکردەوە و رایگەیاند؛ لە دوا نیوەڕۆی رۆژی پێنج شەممەوە کەشی ناوچەکە دەگۆڕێت و شەپۆلێکی بەفر و باران ناوەندی شارەکان دەگرێتەوە.
لە راگەیەندراوەکەی ئەمڕۆی کەشناسیدا هاتووە؛ لە ناوەندی پارێزگاى سلێمانى و ناوەندی پارێزگاى دهۆک بە تێکەڵى لەگەڵ باران بەفریش دەبارێت و زۆرترین کاتى بەفر بارین لە شەوى پێنجشەمە لەسەر جومعە و کاتەکانى بەرەبەیانى ڕۆژى جومعە دەبێت.
ئەوەش هاتووە؛ بارستە هەوایەکى سارد لە ناوەڕاستى ئەوروپاوە روو لە ناوچەکەمان دەکات و پلەکانى گەرما زیاتر نزم دەکاتەوە.
دادگای توركیا سزای سێ ساڵ و 9 مانگ زیندانیكردنی بەسەر هاوسەرۆكی گەورە شارەوانی واندا سەپاند.
ئەمڕۆ لە دادگای باڵای تاوانەکانی پێنجەمی دیاربەکر دادگاییکردنی عەبدوڵڵا زەێدان هاوسەرۆکی گەورە شارەوانیی وان بەڕێوەچوو تیایدا بەتۆمەتی "هاندانی تیرۆر لە کاتی خۆپیشاندانەکاندا" سزای سێ ساڵ و 9مانگ زیندانی بەسەر زەیداندا سەپاند.
عەبدوڵڵا زەیدان سەبارەت بەو سزایە وتی: بۆ ئێمە ئەم بڕیارە بڕیارێکی سیاسییە و هیچی تر.
زەیدان وتیشی: ئەوانەی لە 31ـی ئازاردا نەیانتوانی لە رێگەی دیموکراسییەوە خەڵکی وان بشکێنن، هەوڵەدەن جارێکی تر لە رێگەی دادوەرییەوە ئیهانەی ئیرادەی خەڵکی وان بکەن، ئێمەش لە بەرامبەردا تا کۆتایی بەرگری لە دیموکراسی و دادپەروەری و ئیرادەی گەل دەکەین.
هەشتەمین دانیشتی دادگایكردنی عەبدوڵا زەیدان لە دادگای سزا قورسەكانی ئامەد، بەبێ ئامادەبوونی خۆی بەڕێوەچوو .
محەمەد ئەمین ئەكتەر پارێزەری دۆسیەكەی عەبدوڵا زەیدان هاوسەرۆكی گەورە شارەوانی وان رایگەیاند، دادگایكردنەكە دادپەروەرانە نەبووە و پێشَلكارییەكی روونە. وتیشی، دژی ئەو بڕیارە تانە لە بڕیارەكەی دادگا دەدەن.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە یان برێم، کونسوڵی گشتیی فەڕەنسا لە هەرێم کرد.
لەدیدارێکدا دواین گۆڕانکارییە سیاسییەکان لەسەر ئاستی ناوچەکە، پێکهێنانی حکومەتی هەرێم و کێشەکانی نێوان هەولێر و بەغدا گفتوگۆیان لەبارەوەکرا.
سەرۆک بافڵ جەلال تاڵەبانی لەبارەی رێکخستنەوە و یەکڕیزی ماڵی کورد و یەکگووتاری سیاسی راشکاوانە دوا و ووتی؛ هەر بڕیارێک لەبەرژەوەندی چارەسەری کێشەکانی ژیانی خەڵک و هەرێمەکەمان بێت لەگەڵیداین بەڵام دەبێت نیەتی جدی هەبێت بۆ کارکردنی پێکەوەیی و هاوبەشێتی راستەقینە چونکە هەر هەوڵێک لە دەرەوەی ئەم ویستە نیشتمانییە بە زیان بۆ گەلەکەمان دەشکێتەوە و لەو رووەوە سەرۆک بافڵ روونیشیکردەوە، ئەرکی هەمووانیشە بەرپرسیارانە لەگەڵ ئەم دۆخەدا مامەڵە بکەن و پێکەوە هەنگاوبنێن بۆ دروستکردنەوەی متمانە و پێکهێنانی حکومەتێکی خزمەتگوزار کە بە یەکسانی خزمەتی هەمووان بکات و لەئاست داواکاری خەڵکیشدابێت.
سەبارەت بە سووریا و رۆژئاوای کوردستان سەرۆک بافڵ جەلال تاڵەبانی رایگەیاند؛ جەختدەکەینەوە کە لەگەڵ ئەوەداین رێز لە ئیرادەو مافی هەموولایەک بگیرێت و کوردیش بەشێکی گرنگ بێت لە سووریای نوێدا چونکە هەر پەراوێزخستنێک زیان بە ئارامی و ئاسایشی وڵاتەکە و ناوچەکەش دەگەیەنێت.
لە سبەینێوە هەناردەكردنی مریشك لە هەرێمی كوردستانەوە بۆ پارێزگاكانی دیكەی عیراق دەستپێدەكاتەوە و بەهۆیەوە نرخی مریشك لە هەرێم بەرز دەبێتەوە.
نازم عەبدوڵا، سەرۆكی كێڵگە پەلەوەرییەكانی سلێمانی بە كوردسات نیوزی راگەیاند، دوای سێ مانگ لە راگرتنی، بە هەوڵی فراكسیۆنی یەكێتی لە ئەنجومەنی نوێنەرانی عیراق لە سبەینێوە هەناردەكردنی مریشك و بەرهەمەكانی پەلەوەری هەرێمی كوردستان لە رێگەی كەركوكەوە بۆ شارەكانی عیراق دەستپێدەكاتەوە.
بڕیاری ڕاگرتنی هەناردە كردنی مریشك و پەلەوەر دوای ئەوە دێت كە عیراق بەبیانووی بڵاوبوونەوەی نەخۆشی لەنێو پەلەوەرخانەكان، هاوردەكردنی مریشكی لە هەرێم قەدەغە كرد.
رۆژی چواری ئەم مانگە وەفدێكی كشتوكاڵی عێراق سەردانی هەولێریان كرد و سامپڵیان لە مریشكەكان وەرگرت، ئەمڕۆش پشكنینەكانیان لە بەغداد گەڕانەوە و بێ كێشەبوون، هەربۆیە بڕیاردرا سبەی هەناردەكردنی مریشك دەستپێبكاتەوە.
دووبارە هەناردەكردنەوەی مریشك بۆ كەركوك و ناوچەكانی عیراق، وادەكات نرخی مریشك بەشێوەیەكی بەرچاو لە هەرێمی كوردستان بەرز ببێتەوە.
دەستەی پشتیوانانی مانگرتووانی سلێمانی داوای لە دوکاندارەکانی ناوبازاڕ کردووە، بەمەبەستی پشتیوانی لە مانگرتووان، سبەینێ سێشەممە، بۆماوەی یەک کاتژمێر دوکانەکانیان دابخەن.
دەستەی پشتیوانیکردن لە داواکارییەکانی مانگرتووان، ئەمڕۆ لەناو بازاڕی سلێمانی کارتیان بەسەر دوکاندارەکانی ناوبازاڕی سلێمانیدا دابەشکرد و داوایان لێکردن، سبەینێ سێشەممە، بەمەبەستی پشتیوانیکردن لە مانگرتووان لە کاتژمێر 11ی پێشنیوەڕۆ تاوەکو 12ی نیوەڕۆ، دوکانەکانیان دابخەن.
لەوبارەیەوە بەهار مونزیر چالاکوان و ئەنندامی دەستەکە رایگەیاندووە، "داوای داخستنی دوکانەکانمان لە کاسبکاران کرد، نەخشەکەمان بە ئاراستەی جیاواز دەستنیشانکرد و ئەوانیش بە شۆڕ و شەوقێکی زۆرە پێشوازیان لێکردین".
ماوەی دوو هەفتەیە 13 مامۆستا و فەرمانبەر لە سلێمانی مانیان لە خواردن گرتووە و داوای ئەوە دەکەن، چیتر دەست بۆ موچەکانیان نەبرێت و لەکاتی خۆیدا موچەیان پێبدرێت، هەروەها موچەی موچەخۆران بە بانکی بکرێت.
وەفدی ئیمراڵی سەردانی هەرێمی كوردستان دەكات و بڕیارە لەگەڵ سەرۆكی یەكێتی و قوباد تاڵەبانی و لێپرسراوانی یەكێتی كۆببنەوە.
بڕیارە وەفدی ئیمڕاڵی كە پێكهاتوون لە پەروین بوڵدان و سری سورەیا ئۆندەر ئەندامانی دەم پارتی و كەسیكن بایندەر هاوسەرۆكی گشتی دەبەپە، لە كۆتایی ئەم هەفتەیە سەردانی هەولێر و سلێمانی بكەن و لەگەڵ لێپرسراوانی باڵای هەرێمی كوردستان كۆببنەوە.
بەپێ راگەیەنراوێكی دەم پارتی، وەفدەكە رۆژی دووشەممە 17ی ئەم مانگە، لەگەڵ بافڵ جەلال تاڵەبانی سەرۆكی یەكێتی و قوباد تاڵەبانی و لێپرسراوانی یەكێتی كۆببێتەوە، بۆ راگۆڕینەوە لەسەر پرۆسەی ئاشتی لە باكوری كوردستان و چاوپێكەوتنەكانی رابردوو لەگەڵ عەبدوڵا ئۆجەلان.
شاندی دەم پارتی رۆژی 28ـی کانوونی یەکەمی 2024 سەردانی ئیمراڵی کرد و بۆ جاری دووەمیش لە 22-01-2025 سەردانی کردەوە و پەیامی ئۆجەلانی بۆ لایەنەکان برد.
محەمەد عەبدولرەحمان پەیامنێری کوردسات نیوز لە بەغداد باسی لەوەکرد، ئەمڕۆ وەزیری دارایی عیراق هۆشداری داوەتە حکومەتی هەرێم لە پابەند نەبوونی بە رێککەوتنەکان و ئەگەری نەناردنی موچەی موچەخۆرانی هەرێم.
پەیامنێری کوردسات نیوز لە بەغداد ئەوەی خستە روو، ئەمڕۆ تەیف سامی وەزیری دارایی عیراق، نووسراوێکی رەسمی ئاڕاستەی حکومەتی هەرێم کردووە، بە دوو خاڵ هۆشداری پێداون.
ئاماژەی بەوەشکردووە، تەیف سامی لە نووسراوەکەدا ئەوەی خستووەتە روو، ئەگەر موچەی موچەخۆرانی هەرێم بەبانکی 'تەوتین' نەکرێت و 50٪ـی داهاتی نانەوتی رادەستی بەغداد نەکرێت، ئەوا پابەندی رێککەوتنەکان نابن و موچە نانێرن.
ئەوەش لە کاتێکدایە، بەپێی یاسای بودجە کە پێشتر حکومەتی هەرێم و عیراق لەسەری رێککەوتن، دەبێت حکومەتی هەرێم ٪٥٠ـی داهاتی خاڵەسنوورییەکان و ٪١٠٠ـی داهاتی ناوخۆ بدات بە بەغدا و دواتر بەغدا ٥٠٪ـی ئەو داهاتە دەگەڕێنێتەوە بۆ هەرێم، دواتریش دادگای فیدڕاڵی بڕیاریدا لەسەر بەبانکیکردنی موچەی موچەخۆرانی هەرێم و ئەوەشێ خستە روو، نابێت موچە تێکەڵ بە ململانێی سیاسی بکرێت.