هەواڵەکان
دوای ئەوەی ئەنجومەنی نوێنەرانی عیراق دەنگیدا لەسەر درێژکردنەوەی کارەکانی کۆمیسیۆنی باڵای سەربەخۆی هەڵبژاردنەکان، سەرۆک وەزیرانی عیراق پشتیوانی خۆی بۆ کۆمیسیۆنەکە دووپاتدەکاتەوە.
نووسینگەی راگەیاندنی سەرۆک وەزیرانی عێراق لە راگەیەندراوێکدا بڵاویکردۆتەوە : ئەمڕۆ محەمەد شیاع سودانی، سەرپەرشتی کۆبوونەوەیەکی کرد کە سەرۆکی دەستەی کۆمیسیارانی کۆمسیۆنی باڵای سەربەخۆی هەڵبژاردنەکان و ئەندامانی ئامادەیبوون، سودانی لە سەرەتای کۆبوونەوەکەدا دەستخۆشی لە کۆمسیۆنی هەڵبژاردنەکان کرد بۆ درێژکردنەوەی کارەکانی دوای ئەوەی ئەنجومەنی نوێنەران دەنگی پێدا.
ئاماژەی بەوەشکرد، سودانی کۆمیسیۆنی راسپاردووە، ئامادەکاری و ڕێکخستن و پێویستییەکان ئامادە بکەن بۆ ئەنجامدانی هەڵبژاردنی گشتی ئەنجومەنی نوێنەرانی عیراق کە بڕیارە ئەنجامبدرێت.
سەرۆک وەزیرانی عیراق، وەزارەتی دارایی ئاگادارکردۆتەوە پێداویستیەکانی کۆمسیۆن دابین بکات، بۆ ئامادەکردنی بودجە و ڕێکخستنی پرۆسەی هەڵبژاردن، جەختیشی کردەوە تەواوی حکومەت پاڵپشتی لە کارەکانی کۆمسیۆن دەکات بە هەموو توانایەکی، بۆ دڵنیابوون لە ئەنجامدانی هەڵبژاردنێکی پاک و بێگەرد.
لە سلێمانی نرخی هەر سێ جۆرەكەی بەنزین 25 دینار دابەزی و وتەبێژی بەنزینخانەكانی سلێمانیش هۆكارەكەی بۆ كەمبوونەوەی خواست لەسەر بەنزین دەگەڕێنێتەوە.
بەهمەن قادر، وتەبێژی بەنزینخانەكانی سلێمانی بە كوردسات نیوزی راگەیاند، لە سەعات 4ی ئەمڕۆوە نرخی هەر سێ جۆرەكەی بەنزین لە سلێمانی 25 دینار دابەزیووە.
ئەوەشی خستەڕوو، نرخی یەك لیتر بەنزینی نۆرماڵ بووە بە 900 دینار و بەنزینی موحەسەن بووە 1100 دینار و نرخی یەك لیتر بەنزینی سۆپەریش بووە بە 1250 دینار.
سەبارەت بە هۆكاری دابەزینی نرخی بەنزینیش، وتەبێژی بەنزینخانەكانی سلێمانی وتی، بەهۆی هەبوونی بڕە بەنزینێكی زۆر لە سنووری پارێزگاكە و كەمبوونەوەی خواست لەسەری، نرخی بەنزین دابەزیووە.
ئەوەش لەكاتێكدایە رۆژانە لە ژمارەیەك بەنزینخانە لە شارەكانی هەرێم، بەنزینی حكومی بە نرخی پاڵپشتیكراو و بە 750 دینار دابەش دەكرێت.
وەفدی باڵای هەرێمی كوردستان بەبێ دەستكەوت لە بەغداد گەڕانەوە و وەزیری دارایی عیراقیش رەتیكردووەتەوە پارە بۆ مووچەی مانگی 12ـی ساڵی رابردووی مووچەخۆرانی هەرێم بنێرێت.
پەیامنێری كوردسات نیوز رایگەیاند، وەفدە باڵاكەی هەرێم كە شەوی رابردوو گەیشتنە بەغداد، ئەمڕۆ لەگەڵ تەیف سامی وەزیری دارایی عیراق كۆبوونەوە و تاوتوێی مووچەی مانگەكانی 12 و 1ـی مووچەخۆرانی هەرێمیان كردووە.
وتیشی، وەزیری دارایی عیراق بە وەفدەكەی هەرێمی راگەیاندووە بەهۆی كۆتاییهاتنی ساڵی دارایی 2024، بەهیچ جۆرێك ناتوانێت پارە بۆ مووچەی مانگی 12ـی ساڵی رابردووی مووچەخۆرانی هەرێم بنێرێت.
پەیامنێری كوردسات نیوز راشیگەیاند، هەر ئەمڕۆ وەفدەكەی هەرێم لە بەغداد گەڕاونەتەوە و بڕیاریشە سبەینێ تایبەت بە سەردانەكەی بۆ بەغداد لە وەزارەتی دارایی هەرێم كۆبوونەوەیەك ئەنجامبدات. ئاماژەی بەوەشدا، بەهۆی كەموكورتی و ئامادەنەبوونی لیستی مووچەی مانگی 1ەوە، تائێستا هەرێم لیستی مووچەی مانگی 1ـی رادەستی وەزارەتی دارایی عیراق نەكردووە.
راوێژكارێكی ترەمپ وادەی بڕیارە قورسەكان دژ بە ئێران ئاشكرا دەكات و دەڵێت، تاران هەژموونی ناوچەیی لەدەستداوە.
مایك واڵتز راوێژكاری ئاسایشی نیشتیمانی ئەمریكا رایگەیاندووە، ئێران لە قۆناغی بەرگریدایەو كاریگەری ناوچەیی و بەرگری ئاسمانی لەدەستداوە.
وتیشی، ئیدارەی ترەمپ بەنیازە لە مانگی داهاتوودا كۆمەڵێك بڕیاری یەكلاكەرەوە دژ بە ئێران دەربكات و ئەوەش كاتێكی گونجاوە.
ترەمپ لە مانگی تشرینی دووەمی ساڵی رابردوو رایگەیاند، ئەمریكا هەوڵی زیانگەیاندن بە ئێران نادات، بەڵام رێگەش نادات ببێتە خاوەنی چەكی ئەتۆمی.
د.لەتیف رەشید سەرۆك كۆماری عیراق بۆ بەشداریكردن لە كۆڕبەندی ئابووری جیهانی لە داڤۆس گەیشتە سویسرا.
لە میانی کۆنفرانسەکەدا سەرۆک کۆمار، لەگەڵ ژمارەیەک لە سەرکردەکانی جیهان و سەرۆکی دامەزراوە ئابوورییە جیهانییەکان کۆدەبێتەوە، بۆ تاوتوێکردنی بابەتەکانی جێی بایەخی هاوبەش و پەرەپێدانی میکانیزمی پەیوەندییەکانی نێوان عێراق و وڵاتانی جیهان و چەسپاندنی بناغەکانی پەیوەندیی ئابووریی دووقۆڵی، تا ببێتە مایەی پەرەپێدانی ژێرخانی وڵات و ئاستی ئابووری نیشتمانی بەرز بکاتەوە.
كۆڕبەندی ئابووری جیهانی لە داڤۆس بە ناونیشانی "هاوكاری بۆ سەردەمی زیرەك"، 20ی ئەم مانگە دەستپێدەكات و چوار رۆژ بەردەوام دەبێت و نزیكەی سێ هەزار سەركردە لە 130 وڵاتی جیاواز و 350 سەرۆكی حكومەت بەڕێوەدەچێت، گفتوگۆكانی كۆڕبەندەكەش لە چوارچێوەی پێنج تەوەردا دەبن، كە بریتین لە پاراستنی سەرچاوەكانی گەشەكردن و پیشەسازیی لەسەردەمی زیرەك و وەبەرهێنان و گۆڕانكارییە جیۆئابوورییەكان، لەگەڵ پاراستنی هەسارە و بنیادنانەوەی متمانە لە جیهانێكی ئاڵۆز و خێرادا.
کۆڕبەندی داڤۆس، ئەمساڵ دەوری 55ی کۆڕبەندەکەیە، و لە ساڵی 1971وە لەسەر دەستی ئابووری ناسێکی ئەڵمانی بە ناوی کڵاوس شواپ دەستی پێکردووە.
ئاگرێک لە گەڕەکی تاڤگەی شاری سلێمانی کەوتەوە و لەلایەن تیمەکانی بەرگری شارستانی سلێمانیەوە کۆنتڕۆڵکرا.
پەیامنێری کوردسات نیوز لە شوێنی ئاگرکەوتنەوەکە رایگەیاند، بەهۆی ئاگرەکەوە ئۆتۆمبێلێک و دوکانێک بە تەواوی سووتان، ئاماژەی بەوەشکرد، خۆشبەختانە بەهۆی روداوەکەوە هیچ کەسێک گیانی لەدەستنەداوە و تەنها زیانی ماددی هەبووە.
پەیامنێری کوردسات نیوز راشیگەیاند: دوای ماوەیەکی کەم تیمەکانی بەرگری و فریاکەوتن گەیشتوونەتە شوێنی رووداوەکە و ئاگرەکەیان کۆنتڕۆڵکرد و نەیان هێشتووە تەشەنە بکات.
بە وتەی یەکێک لە شایەتحاڵەکان زیانی ماددی ئاگرەکە بە نزیکەی 30 هەزار دۆلار دەخەمڵێنرێت.
لەگەڵ ئەوەی بەشێکی زۆری خەڵک بە بەرزکردنەوەی پلەی کارەکانیان دڵخۆش دەبن، بۆ هەندێک کەس دەبێتە هۆکاری لەدەستدانی کارەکەیان.
راپۆرتەکان ئەوە دەردەخەن نزیکەی ٤٠٪ی ئەو کەسانەی لە کارەکانیاندا پلەیان بەرز دەکرێتەوە، نامەی دەست لەکار کێشانەوە پێشکەش دەکەن، ٣٥٪ی کەسەکانیش هەست بە خراپبوونی تەدروستیی جەستەیی و دەروونیان دەکەن. توێژینەوەکانیش هۆکارەکەی بۆ چەند لایەنێک دەگەڕێننەوە، لەوانەش زیادبوونی ئەرکی نوێ زۆر جار کار دەکاتە سەر ژیانی کەسیی کارمەندەکان.
مەروە کەرورە توێژەر و شارەزا لە بواری گەشەپێدانی مرۆییدا بۆ ماڵپەڕی سکای نیوز ئەوەی خستووەتە روو، بەشێکی ئەو کەسانەی کە پلەیان بەرزدەکرێتەوە، بەهۆی ئەوەی ئەرک و بەرپرسیارێتی نوێیان پێدەدرێت و زیاتر ماندوو دەبن، زۆرجار توشی هێدمە 'شۆک' دەبن.
ئاماژەی بەوەشکردووە، زۆرجار ئەو ئەرکە نوێیە وایانلێدەکات وا هەستبکەن کە ناتوانن بەجێی بگەیەنن و دەبێتە هۆی ئەوەی نامەی دەست لەکار کێشانەوە پێشكەش بکەن.
ئەو توێژەرە باسی لەوەشکردووە، هەندێک کەس لەدوای پلە بەرزکردنەوەیان بە ئاسانی ناتوانن هاوسەنگی لەنێوان کار و ژیانی کەسیدا رابگرن، ئەوەش دەبێتە هۆی ئەوەی فشاری جەستەیی و دەروونی لەسەریان دروست ببێت، چونکە بەرپرسیارێتی نوێ پێویستی بەوەیە کاتی زیاتری بۆ تەرخان بکرێت، بۆیە رەنگە ئەوەش ببێتە هۆی ئەوەی کاریگەریی لەسەر ژیانی کۆمەڵایەتی و خێزانی ئەو کەسانە دروست بکات.
مەروە کەرورە ئەو بەرپرسیارێتییەی خستە ئەستۆی دامەزراوەکان، کە بتوانن کەشێکی وا بۆ کارمەندەکانیان بڕەخسێنن لەکاتی بەرزکردنەوەی پلەکانیاندا هاوکاریان بکەن بە ئاسانی رێچکەی بەرپرسیارێتییە نوێیەکە وەربگرن و سەرکەوتوو بن تیایدا، رێگە نەدەن فشاری دەروونی جەستەیی بە جۆرێک لەسەریان زیاد بکات بیانگەیەنێتە ئەو بڕیارە.
وتیشی، پلەبەرزکردنەوەی زنجیرەیەکی بەرێوەبردنە و هەمیشە بوونی هەیە، بەڵام ئەگەر ئەو ژینگەیەی کاری تێدا دەکرێت گونجاو نەبێت و هاوکاری کارمەندەکانی نەبێت، ئەوا رەنگە بگۆڕێت بۆ بارێکی قورس بەسەر شانی کەسەکانەوە.
پزیشكانی بێسنوور دەڵێت، 70%ی دانیشتووانی سوریا پێویستیان بە هاوكاری بەپەلەی مرۆیی هەیەو رەوشی تەندروستی خەڵکەکە زۆر مەترسیدارە.
كارلۆس ئاریاس رێكخەری پزیشكیی لە رێكخراوی پزیشكانی بێسنوور لە سوریا رایگەیاند، كاری مرۆیی لە سوریا رووبەڕووی ئاستەنگی گەورە دەبێتەوە، لە كاتێكدا پێداویستییەكانی دانیشتووانەكەشی روو لە زیادبوون دەكات.
وتیشی، زیاتر لە 70%ی دانیشتووانی سوریا هێشتا پێویستیان بە هاوكاری مرۆیی بەپەلە هەیە، لەكاتێكدا تەنها یەك لەسەر سێی بودجەی پێویست دابین دەكرێت بۆ دابینكردنی پێویستییەكان.
ئەو لێپرسراوەی رێكخراوەكە داواشیكرد، بەپەلە قەبارەی ئەو یارمەتییە مرۆییانەی رەوانەی سوریا دەكرێن لەلایەن كۆمەڵگەی نێودەوڵەتییەوە زیاتر بكرێت، چونكە رەوشی تەندروستی خەڵک لە سوریا زۆر مەترسیدارە، بەتایبەتیش لە حەلەب و دیمەشق.
رۆژی ٨ی ١٢ی ساڵی رابردوو بە رەسمی رووخانی رژێمی بەشار ئەسەد راگەیەنرا و لەو کاتەشەوە سوریا چووەتە قۆناغێکی نوێوە، بەدەر لەوانەش لە چەند ناوچەیەکی سنووری سوریا هێشتا شەڕ و پێکدادان لەنێوان گروپە چەکدارەکان و هێزەکانی سوریادا بەردەوامە، لە رۆژئاوای کوردستانیش بە هەمان شێوە گروپە هاوپەیمانەکانی تورکیا لە هێرشکردنە سەر هاوڵاتیانی مەدەنی ناوچەکە بەردەوامن.
دوای ئەوەی دوێنێ بە رەسمی تۆڕی کۆمەڵایەتی تیک تۆک لە ویلایەتە یەکگرتووەکانی ئەمریکا راگیرا، ئەمڕۆ کەوتەوە کار و لەئێستادا بەکارهێنەران دەتوانن کاری پێبکەن.
دوێنێ دۆناڵد تڕەمپ سەرۆکی هەڵبژێردراوی ئەمریکا کە ئەمڕۆ مەراسیمی سوێندخواردنو دەستبەکاربوونەکەی بەڕێوەدەچێت رایگەیاند، تیک تۆک دەگەڕێنێتەوە بۆ ئەمریکا.
دوێنێ یەکشەممە، بە رەسمی تیک تۆک لە ویلایەتە یەکگرتووەکانی ئەمریکا راگیرا، شەوی پێش ئەوەش، لە پەڕەی سەرەکی ئەپڵیکەیشنەکە لای ئەو بەکارهێنەرانەی لە ویلایەتە یەکگرتووەکانەوە ئەپەکە بەکاردەهێنن نووسرا، یاساکانی ئەمریکا لە رۆژی ١٩ی مانگەوە تیک تۆک رادەگرن و ئەوان کاردەکەن بۆئەویە چی زووە بتوانن زووتر ئەپڵیکەیشنەکە بخەنەوە کار.
داوای لێبوردنیشیان لە بەکارهێنەرانیان کرد و داوایان لێکردن، لەسەر ئەپەکە بمێننەوە.
بەپێی هەواڵێکی ماڵپەڕی بی بی سی، تیک تۆک 170 ملیۆن بەکارهێنەری هەیە لە ویلایەتە یەکگرتووەکانی ئەمریکادا.
رۆژی 17ی ئەم مانگە دادگای باڵای ئەمریكا بڕیاری قەدەغەكردنی تیك تۆكیدا، ئەوەش دوای ئەوەی ئیدارەی بایدن بە دادگای باڵای راگەیاند، تیكتۆك زانیاری لەسەر ئاسایشی نیشتمانیی لە بەکارهێنەران كۆدەكاتەوە بۆیە پێویستە قەدەغە بكرێت، چونكە چین دەتوانێت بە نهێنی دەستكاری پلاتفۆڕمەكە بكات بۆ پێشخستنی بەرژەوەندییە سیاسییەكانی و زیان بە ئەمریكا بگەیەنێت.
لەبەرامبەر ئەوەشدا میدیاكانی ئەمریكا باسیان لەوە دەکرد، ترەمپ نایەوێت تیك تۆك لە ئەمریكا قەدەغە بكرێت بەڵكو دەیەوێت ئەپەكە لە چین بكڕێتەوە و ئەمریكا خاوەندارێتی بكات، لەسەر ئەم پرسەش قسەی لەگەڵ سەرۆكی چین كردووە و بڕیار وایە لەماوەی سەرۆكایەتییەكەیدا ئاڵوگۆڕی خاوەندارێتی ئەپەكە ئەنجامبدات.
ترەمپ: دوای دەستبەكاربوونم بە خێرایی و هێزێكی بێ وێنەوە كارەكانم دەست پێدەكەم
ئەمڕۆ رێوڕەسمی دەستبەکاربوونی دۆناڵد تڕەمپ سەرۆکی هەڵبژێردراوی ئەمریکا بەڕێوەدەچێت، لەو بارەیەوە تڕەمپ رایگەیاند، دوای دەستبەكاربوونی بە خێرایی و هێزێكی بێوێنەوە كارەكانی دەست پێ دەكات.
ترەمپ لە میانی بەشداریكردنی لە ئاهەنگی سەركەوتن كە بە بەشداری هەزاران لە لایەنگرانی لە واشنتن بەڕێوەچوو، وتارێكی پێشكەشكرد و رایگەیاند، دوای دەستبەكاربوونی بە خێرایی و هێزێكی بێوێنەوە كارەكانی دەست پێ دەكات بۆ چارەسەركردنی هەر قەیرانێك كە رووبەڕووی ئەمریكا دەبێتەوە.
بەڵێنیشی دا بە كۆتاییهێنان بە دۆسیەی كۆچبەرە نایاساییەكان و جارێكی تریش دوپاتیكردووەتەوە كە لە یەكەم رۆژی دەستبەكاربوونیدا 100 مەرسومی سەرۆكایەتی دەردەكات.
سەبارەت بە تیكتۆكیش ترەمپ رایگەیاند، دەبێت تیك تۆك رزگار بكەن و هیچ بژاردەیەكی تریان لەبەردەستدا نییە جگە لە رزگاركردنی.
كەناڵی سی ئێن ئێنیش ئاشكرای كردووە، ترەمپ یاریدەدەرەكانی راسپاردووە بۆئەوەی دوای چەند رۆژێكی كەم لە دەستبەكاربوونی، پەیوەندییەکی تەلەفۆنیی لەگەڵ ڤلادیمیر پوتن سەرۆكی روسیا بۆ رێكبخەن.
ئەدهەم بارزانی لەدوای کۆچی دوایی دایکی راگەیەنراوێکی بڵاوکردووەتەوە و دەڵێت، "سێ ساڵە سەرۆکی پارتی دیموکراتی کوردستان منی دەربەدەر کردووە و نەمتوانی بەر لە کۆچی دوایی دایکم جارێکی دیکە بیبینمەوە".
ئەدهەم بارزانی رایگەیاندووە، "ھەر وەک ئاگادارن شەش کاتژمێر پێش ئێستا دایکم چووە بەر رەحمەتی خوای گەورە، کە ئەمە بوو بە سێ ساڵ سەرۆکی پارتی دیموکراتی کوردستانی عیراق منی ئاوارە و دەربەدەر کرد لەسەر سێ بەیاننامەی سیاسی کە رەئی جیاواز قبوڵ نەکرا، پێم نەکرا لەم ماوەیەدا ئەم دایکە ئازیزە بۆ یەکجاریش بێت ببینم و چەند رۆژێک پێش ئێستا کە قسەم لەگەڵ کرد وتی دڵنیام کە جارێکیتر ناتبینمەوە".
ئەدهەم بارزانی لە درێژەی راگەیەنراوەکەیدا باس لەوەدەکات، لە رێگای بافڵ تاڵەبانییەوە هەوڵدراوە جارێکی دیکە دایکی ببینێتەوە بەڵام بە مەرجی ئەوەی پاسەوانی لەگەڵدا نەبێت.
دەقی قسەکانی ئەدهەم بارزانی:
کوردستانیانی بەرێز
ھەر وەک ئاگادارن ٦ کاتژمێر پێش ئێستا دایکم چو بەر رحمەتی خوای گەورە ،کە ئەمە بوو بە سێ ساڵ سەرۆکی پارتی دێموکراتی کوردستانی عێراق منی ئاوارە و دەر بەرکرد لە سەر سێ بەیانییە سیاسی کە رەئی جیاواز قەبول نەکرا ، پێم نە کرا لەم ماوەیە دا ئەم دایکە ئازیزە بۆ یەکجاریش بێت ببینم و چەند رۆژێک پێش ئێستا کە قسەم لە گەل کرد گوتی دڵنیام کە جارێکیتر ناتبینمەوە .
بەرێزان :
خوا خێری بەرێز کاک بافڵ مام جەلال تاڵەبانی بنۆسێت لە رێگای ئەوەوە پەیوەندی کرا بە ھوشیار زێباری خالی مەسعود بارزانی و سیدادی برای کە رێگا بدەن ئێمە ئەم شەو تەرتیبات ئەکەین ئەدھەم بارزانی بێتە ماڵی خوی لە مەسیفی و بۆ دواین جار لە ناو کفن دا رۆمەتی دایکی ببینێت و ھەر بەیانی یان پاش یەک رۆژ پرسە دەگەرێتەوە ئێرە، دایکێک کە ھاوسەر و دوو لە کورەکانی بە دەستی بەعسیەکان شەھید بوون، کە ئەمرۆ ئەوان لە پایتەختی کۆردستان بە ئازادی دەگەرێن .
لە ولامی دەستپێشخەریەکەی بەرێزیان دا دەلێن مانع نیە بێتن بەلام نابێت پاسەوانەکانی کە کاک بافڵ بۆ من دایناون لە گەلی دا بن و بە ھەڕەشەکانی سەروکی پارتی تەواوی پاسەوانەکانی پێش ئێستای من دەرکران و لەگەل ئەوەش نابێت کەس لە گەلی بێت و پێویستە بە تەنیا بێت ، لە حالەتێک دا کە ھیچ باوەرییەک نەماوە و حوکمی گرتنی منیان دەرکردووە بە مادەی ٢١ یاسای تێک دانی ئاسایشی ھەرێمی کوردستان،
ئەو کوردستانەی کە بەشێکی زۆری ئێستا بە ھاوکاری ئەوان لە پارێزگای دھوک و ھەولێر لە دەستی داگیر کران دایە، ئایە بەم شێوەیە ولامی ھەموو چاکەکان و رزگارکردنیان لە شکەستی سەدا سەد ئەگەر بە ھانیان نە چوبام ئەدەنەوە.
بە بیری سەرۆکی پارتی دێنمەوە کە چم کرد بۆ دایکی ئەو .
دەستیان داوە بە تەلەفون کردن بۆ خەلک و ھەتا کورەکانیشم کە ئێمە گوتمانە مانع نیە بگەرێتەوە بەم مەرجە کە بە تەنیا بێت ئایە خوتان ئەمەرجەتان قەبول دەکرد؟
ئەدھەم بارزانی
ماوەی هەفتەیەکە نرخی نەوت بەشێوەیەکی بەرچاو بەرزبووەتەوە و گەیشتووەتە بەرزترین ئاستی چوار مانگی رابردووی، ئەمڕۆش لە یەکەم رۆژی کرانەوەی بازاڕە داراییەکاندا نرخەکەی لە بەرزیدا ماوەتەوە.
ئەمڕۆ دووشەممە، لە یەکەم رۆژی کرانەوەی بازاڕە داراییەکاندا نرخی یەک بەرمیل نەوتی خاوی برێنت بە 80 دۆلار و 61 سەنت مامەڵەی پێوەدەکرێت، بەمەش بەراورد بە هەفتەی رابردوو نرخەکەی لە بەرزیدا ماوەتەوە.
هاوکات، نرخی یەک بەرمیل نەوتی خاوی رۆژئاوای تەکساس بەرانبەرە بە 77 دۆلار و ٩١ سەنت، بەمەش بەراورد بە دوێنێ نرخەکەی بەهەمان شێوەی برێنت نرخەکەی لە بەرزیدا ماوەتەوە.
هەفتەی رابردوو نرخی نەوت بەشێوەیەکی بەرچاو بەرزبووەوە و شارەزایانی ئابووریش هۆکارەکەی بۆ چەند بابەتێک دەگەڕێننەوە، لەوانەش ئەو شەپۆلە سەرمایەی ئەمریکای گرتووەتەوە و ئەوەش خواستی دەستڕاگەیشتن بە نەوتی زیاتر کردووە.
لەلایەکی دیکە ئەو سزایانەی کە دوو هەفتە بەر لە ئێستا وەزارەتی گەنجینەی ئەمریکا بەسەر چەند کۆمپانیایەکی نەوتیی روسیادا سەپاندی هۆکارێکی دیکەن، کە بەهۆیەوە چین و هیندستان بەدوای جێگرەوەیەکی دیکەدا دەگەڕێن.
وەفدێكی وەزارەتی دارایی هەرێمی كوردستان لە بەغدادە بۆ چارەسەركردنی ئاستەنگەكانی بەردەم موچە و هەمواری یاسای بودجە.
وەزارەتی دارایی هەرێم لە راگەیەنراوێكدا ئاماژەی بۆ ئەوەكردووە، وەفدێكی حكومەتی هەرێم بەسەرۆكایەتی ئاوات جەناب وەزیری دارایی لە بەغدادە بە مەبەستی گفتوگۆكردن لەسەر هەمواری خشتەكانی یاسای بودجەی گشتی عیراق بۆ ساڵی 2025، و چارەسەركردنی ئاستەنگەكانی بەردەم موچەی فەرمانبەران و موچەخۆرانی هەرێمی كوردستان.
پەیامنێری كوردسات نیوزیش رایگەیاند، وەفدەكەی هەرێم لەگەڵ لێپرسراوانی عیراق كۆدەبێتەوە و تەوەرێكی گفتوگۆكانیش، بە بانكیكردنی موچەی فەرمانبەرانی هەرێم دەبێت، چونكە لە دوایین سەردانی وەفدی وەزارەتی دارایی عیراق بۆ هەولێر، هەردوولا رێككەوتوون لەسەر ئەوەی تاكۆتایی ئەمساڵ تەواوی مووچەی فەرمانبەرانی هەرێم بە بانكی بكرێت.
ئەمشەو لە شەقامی بازنەیی مەلیک مەحمود بە دیاریکراوی لە یەکتربڕی ئارام ئۆتۆمبێلێک بە ھۆی تیژڕەویەوە خۆی کێشا بەستونێکی کارەبادا و لە ئەنجامدا شۆفێرەکە گیانی لەدەستدا.
بەڕێوەبەرایەتی ھاتووچۆی سلێمانی بڵاویکردەوە، ئەمشەو لە شەقامی بازنەیی مەلیک مەحمود بەھۆی رووداوێکی ھاتووچۆوە کەسێک گیانی لەدەستدا.
ئاماژەی بەوەشکردووە، رووداوەکە بەھۆی تیژڕەوییەوە بووە و ئۆتۆمبێلەکە کۆنتڕۆڵی لەدەستدا و خۆی کێشاوە بە ستوونێکی کارەبادا.
جێگەی ئاماژەیە ئەمڕۆ لە هەرێمی کوردستان، بەھۆی روداوی ھاتوچۆوە چوار کەس گیانیان لەدەستداوە، لە روداوێکدا لە گەرمیان کوڕ و باوکێک لەسەر رێگای کەلار - کفری بە روداوی هاتوچۆ ئۆتۆمبێلەکەیان گڕی گڕت و گیانیان لەدەستدا، هاوکات لە روداوێکی دیکەدا لەسەر رێگای سەرەکی قەزای بەردەڕەش – ناحیەی دارەتوو، بەهۆی پێکدادانی دوو ئۆتۆمبێل هاوڵاتیەک گیانی لەدەستدا، هەروەها ئەمشەو کەسێک لە شەقامی بازنەیی مەلیک مەحمود .گیانی لەدەستدا
هێزەکانی دژەتیرۆر CTGبە هەماهەنگی هێزەکانی هاوپەیمانان ئۆپراسیۆنێکی کێوماڵکردنی پاشماوەی تیرۆرستیان ئەنجامدا، لە ئۆپراسیۆنەکەدا چەندی حەشارگە و مۆڵگە دۆزرانەوە و لەناوبران.
هێزەکانی دژەتیرۆر CTG بڵاویکردەوە لە چوارچێوەی بەردەوامیی هەوڵەکان بۆ پاککردنەوەی ناوچەکە لە پاشماوەی تیرۆریستان، بە سەرپەرشتی ڕاستەوخۆی وەهاب هەڵەبجەیی، بەڕێوەبەری گشتیی دژەتیرۆر (CTG)، هێزە هاوبەشەکان ئۆپەراسیۆنێکی سەرکەوتوویان ئەنجامدا.
راشیگەیاندووە، لە ئۆپەراسیۆنەکەدا کە بە هەماهەنگییەکی بەرزی نێوان هێزەکانی دژەتیرۆر CTG، هێزەکانی دژەتیرۆری عێراق (ICTS) و هێزەکانی هاوپەیمانان (CJTF OIR) بەڕێوەچوو، چەندین مۆڵگە و حەشارگەی تیرۆریستان دۆزرانەوە و لەناوبران.
هێزەکانی دژەتیرۆر CTG ئەوەشی خستۆتەڕوو، ئەم ئۆپەراسیۆنە هاوبەشە گورزێکی کاریگەری لە تواناکانی تیرۆریستان وەشاند و بووە هۆی لاوازکردنی زیاتری ژێرخانی لۆجستیی پاشماوەی گرووپە تیرۆریستییەکان لە ناوچەکەدا.
ئاماژەی بەوەشکردووە، ئەم ئۆپەراسیۆنە بەشێکە لە زنجیرە هەوڵێکی بەردەوام بۆ پاراستنی ئاسایش و سەقامگیریی ناوچەکە و پاراستنی گیان و ماڵی هاوڵاتیان. دژەتیرۆر و هاوبەشە ناوخۆیی و نێودەوڵەتییەکانی بەردەوام دەبن لە هەوڵەکانیان بۆ ڕیشەکێشکردنی تیرۆر و بەرەنگاربوونەوەی هەر هەڕەشەیەک بۆ سەر ئاسایشی ناوچەکە.
دانیشتنی ئەنجومەنی نوێنەرانی عیراق هەڵگیرا و بڕگەی دەنگدان بە هەمواری یاسای بودجەش بۆ كاتێكی نادیار دواخرا.
كۆبوونەوەی ئەنجومەنی نوێنەرانی عیراق بۆ دەنگدان بە هەمواری یاسای بودجەی عیراق بەڕێوەچوو، بەڵام بەهۆی تەواونەبوونی رێژەی یاسایی لەكاتی دەنگدان لەسەر ئەو بڕگەیە، سەرۆكی ئەنجومەنی نوێنەران بڕگەی هەمواری بودجەی بۆ كاتێكی نادیار دواخست.
هەر لە دانیشتنەكەی ئەنجومەنی نوێنەراندا دەنگ درا بە پڕۆژەیاسای دەزگای هەواڵگری نیشتیمانی و خوێندنەوەی یەكەمیش كرا بۆ پرۆژەیاساكانی رێكخستنی كرێی خزمەتگوزارییەكان لە فەرمانگەكانی دەوڵەت و پێشنیازە یاسای هەمواری یەكەمی یاسای دەستەی گشتیی چاودێریی داهاتە فیدراڵییەكان.
هەر بەپێی كارنامەی كۆبوونەوەكان، رۆژی سێشەممەی داهاتوو ئەنجومەنی نوێنەران كۆدەبێتەوە، بەڵام هەمواری یاسای گشتی بودجەی عیراق لە كارنامەكەدا نییە.