عیراق
ئەنجومەنی وەزیرانی عیراق نرخی رەسمی ئاڵوگۆڕی دۆلاری بەرانبەر دینار دەستکاری کرد، نرخی فرۆشتنی یەک دۆلاری بە دامەزراوە و هاووڵاتیان بە 1520 دینار دیاری کرد.
بە گوێرەی ئەو نوسراوەی بڵاوکراوەتە، ئەنجومەنی وەزیرانی عیراق بەپێی بڕیاری ژمارە 544ی ساڵی 2026کە لەسەر پێشنیازی وەزیری دارایی و پارێزگاری بانکی ناوەندیی عیراق دەرچووە، بەڕەسمی دەستکاریکردنی نرخەکانی ئاڵوگۆڕی دۆلاری بەرانبەر بە دیناری عیراقی راگەیاند.
بەپێی بڕیارەکە، نرخی کڕینی یەک دۆلار لەلایەن وەزارەتی داراییەوە بە 1500دینار و نرخی فروشتنی بە بانکەکان بە 1510 دینار دیاری کراوە، هەروەها نرخی فروشتی یەک دۆلار لەلایەن بانک و دامەزراوە داراییە ناپانکییەکانەوە بۆ بەکارهێنەری کۆتایی کراوەتە 1520 دینار.
بە گوێرەی بڕیارەکە لە ئەمڕۆوە ئەم بڕیارە کاری پێدەکرێت و حکومەتی عیراق 100 دۆلار بە 152 هەزار دینار دەدرێتە هاووڵاتیان و بازرگانان لە بانکەکاندا، ئەمە لە کاتێکدایە لە ئێستادا 100 دۆلار لە بازاڕدا بەهاکەی لە سەرو 165 هەزار دینارەوە مامەڵەی پێوەدەکرێت.
دوای هێرشێکی چەکدارانی داعش لە شەوی رابردوودا بۆ سەر خاڵێکی چاودێریی فەوجی سێی لیوای نۆ لە نزیک گوندی "ئەلبوغالیە" کە بووە هۆی شەهیدبوونی کارمەندێکی پۆلیسی فیدراڵی، هێزە ئەمنییەکان و فەرماندەیی پۆلیسی فیدراڵیی عیراق زنجیرەیەک رێکاری ئەمنیی نوێیان لە قەزای حەویجە و گوندەکانی سەربە پارێزگای کەرکوک راگەیاند.
بڕیار دراوە لە کاتژمێر شەشی ئێوارەوە تا شەشی بەیانی قەدەغەی تەواوەتیی هاتووچۆ بەتایبەت بۆ ماتۆڕسکیلەکان (بە ماتۆڕسکیلی باریەشەوە) بگرێتەوە، بە جۆرێک هەر ماتۆڕسکیلێک سەرپێچی بڕیارەکە بکات دەستبەجێ دەستبەسەر دەکرێت و رێگەدان بە هاتووچۆشیان تەنها لە حاڵەتی زۆر پێویست و بە رەزامەندیی رەسمی دەبێت.
هەروەها جەخت کراوەتەوە کە هاتووچۆی ئۆتۆمبێلەکانیش لە ماوەی دیاریکراودا رووبەڕووی پشکنینی ورد دەبێتەوە لە رێگەی بازگە رەسمی و کاتییەکانەوە.
هێزە ئەمنییەکان داوایان لە سەرجەم دانیشتووانی حەویجە و ناوچەکانی دەوروبەری کردووە پابەندی تەواوی رێنماییەکان بن بۆ پاراستنی سەقامگیریی ناوچەکە.
سەرۆک کۆمار بۆ ئێزدییەکان: عیراق نیشتمانی هەمووانە و مافەکانتان تێیدا پارێزراو دەبێت
نزار ئامێدی، سەرۆک کۆماری عیراق بە بۆنەی هاتنی جەژنی جەماوە، پیرۆزباییەکی گەرم ئاراستەی خوشک و برایانی ئێزدییەکان لە عیراق و جیهان دەکات و جەخت لەسەر بەهای ئارامگرتن و پێداگریکردن لەسەر خاک و ناسنامەیان دەکاتەوە.
لە پەیامەکەیدا، سەرۆک کۆمارهیوا خواست کە ئەم جەژنە ببێتە دەستپێکی شادییەکی چاوەڕوانکراو، کە تێیدا سەرجەم ئاوارەکان بۆ ناوچەکانی خۆیان بگەڕێنەوە، چارەنووسی بێسەروشوێن و ڕفێنراوان ئاشکرا بێت و ئارامی بۆ هەموو بنەماڵە ئێزدییەکان بگەڕێتەوە.
هەروەها، سەرۆک کۆمار دووپاتیکردەوە کە عیراق نیشتمانی هەموو پێکهاتەکانە و ماف و کەرامەتی ئێزدییەکان تێیدا پارێزراو دەبێت، و مافی ژیانێکی ئارام و سەقامگیر بۆ هەمووان دەپارێزرا.
دەستەی دەسپاکی عیراق رایگەیاند، کە بڕیاری دەستبەسەرکردن، راگرتن و دەستگیرکردن بۆ 31 تۆمەتبار لە کۆمپانیای کشتوکاڵی لە پارێزگای کەرکووک دەرچووە، کە تێوەگلاون لە گەندەڵی و دەستکاریکردنی پرۆسەی وەرگرتنی گەنم.
بەپێی زانیارییەکانی دەستەکە، تیمێکی لێکۆڵینەوەی نووسینگەی کەرکوک لە ئەنجامی بەدواداچوونەکانیاندا ئاشکرایان کردووە کە هەزاران تۆن گەنم تەنها لە ماوەی چەند سەعاتێکدا و بە رێگەی نایاسایی رادەست کراون، کە بەناوی سێ هاوڵاتییەوە تۆمار کراون و هیچ پلانێکی کشتوکاڵیشیان نەبووە.
دەستەکە ئاماژەی بەوەش کردووە، کە لێکۆڵینەوەکان کەمتەرخەمیی 31 کارمەندی کۆمپانیاکە و کارمەندانی بانکی کشتوکاڵیی هەولێر و کەرکوکی دەرخستووە.
ئەوەشخراوەتەڕوو، ئەو کەسانە دەستیان هەبووە لە خەرجکردنی پارەی ئەو گەنمە، تا ئێستاش فەرمانی دەستگیرکردن بۆ 10 لە تۆمەتبارەکان جێبەجێ کراوە و هەوڵەکان بۆ دەستگیرکردنی تۆمەتبارانی دیکەش بەردەوامن.
ئەمڕۆ، 5ی تشرینی یەکەمی 2026، چوارچێوەی هەماهەنگی کۆبوونەوەی ئاسایی خۆی ژمارە (298) لە نووسینگەی موحسین مەندەلاوی، سەرۆکی هاوپەیمانێتی ئەساسی نیشتمانی، بە ئامادەبوونی سەرۆک وەزیرانی عیراق ئەنجامدا. کۆبوونەوەکە تەرخانکرابوو بۆ تاوتوێکردنی چەندین پرس و دۆسیەی گرنگی نیشتمانی کە پەیوەندیی راستەوخۆیان بە بژێویی ژیان و خزمەتگوزارییەکانی هاووڵاتیانی عیراقەوە هەیە.
بەپێی راگەیەندراوێکی فەرمانگەی راگەیاندنی چوارچێوەی هەماهەنگی، لە کۆبوونەوەکەدا میوانداریی فالح ساری، وەزیری دارایی کراوە و تێیدا پێداچوونەوە و گفتوگۆ لەسەر کاروباری دارایی و ئابوریی وڵات و پلانی خزمەتگوزارییەکانی حکومەت کراوە.
وەک لە راگەیەنراوەکەدا هاتووە، ئامادەبووانی کۆبوونەوەکە تیشکیان خستووەتە سەر دۆسیە ئابوری و داراییە لەپێشینەکان، هەروەها جەختیان لەسەر گرتنەبەری سیاسەتی نەختینەیی و گەشەپێدان کردەوە کە پشتیوانی لە سەقامگیریی ئابوری بکات و بە شێوەیەکی بەرچاو بەشداری بکات لە بەرزکردنەوەی ئاستی بژێویی تاکی عیراقی و باشترکردنی خزمەتگوزارییە سەرەکییەکان.
لە بەشێکی دیکەی دیدارەکەدا، باس لە پێشهاتەکانی گۆڕەپانی هەرێمی و نێودەوڵەتی و پرسەکانی ئێستای ناوچەکە و جیهان کرا، هاوکات گرنگیی پاراستنی سەقامگیریی عیراق و بەرژەوەندییە باڵاکانی لە نێو ئەو ئاڵەنگارییانەی دەوروبەریدا دووپات کرایەوە.
عەلی زەیدی، سەرۆک وەزیرانی عیراق رایگەیاند، رێگە بە هیچ هەوڵێک نادرێت بۆ لاوازکردنی قەوارەی دەوڵەت و ئەرکی ئەوانە رێگری بکەن لە رشتنی خوێنی عیراقییەکان.
سەرۆک وەزیرانی عیراق لە میانی کۆبونەوەی لەگەڵ سەرۆک هۆزەکان رایگەیاند، حکومەتەکەی رێگری لە گۆشەگیربوونی نێودەوڵەتیی عیراق کردووە و بەرەو دروستکردنی هاوبەشیکردنی ئابووری، ڕاکێشانی وەبەرهێنانی بیانی، بونیادنانی ژێرخانی کارەبا هەنگاوی ناوە.
عەلی زەیدی جەختیشیکردەوە، مانگان بە 500 ملیار دیناریان بۆ شایستە داراییەکانی جوتیاران تەرخان کردوە بەردەوامیشن لە دابەشکردنی پرۆسەی یەک ملیۆن پارچە زەوی بەسەر هاووڵاتیاندا.
لە رووی ئاسایش و پەیوەندییە دەرەکییەکانەوە، سەرۆک وەزیران باسی لەوە کردوە، ئەرکی ئەوانە رێگری بکەن لە رفشتنی عیراقییەکان و گفتوگۆکان لەگەڵ لایەنی تورکی بووەتە هۆی پاشەکشەی سوپای تورکیا لە بەشێک لە خاکی عیراق، هەروەها گفوگۆکردن لەگەڵ کوێت بەردەوامە بۆ چارەسەری کێشەکان.
لەبارەی پرۆسەی رادەستکردنی چەکیشەوە، عەلی زەیدی رایگەیاندوە، تا ئێستا پێنج گروپ رەزامەندیان داوە و پێشتریش سێ گروپ چەکیان داناوە، گفتوگۆکردنیش لەگەڵ گروپەکانی تر بەردەوامە.
ئەندامێکی ئەنجومەنی نوێنەرانی عیراق باس لە پڕۆژەیاسای بودجەی ساڵی 2027ـی عیراق دەکات و دەشڵێت: مژدە بۆ موچەخۆرانی هەرێم، موچەکانیان زامن کراوە.
دیلان غەفور، ئەندامی لیژنەی دارایی ئەنجومەنی نوێنەرانی عیراق بە کوردسات نیوزی راگەیاند: دوێنێ لەگەڵ فالح ساری، وەزیری دارایی عیراق کۆبوومەوە، باسمان لە چەند تەوەرێکی یاسای بودجەی 2027ـی عیراق کرد وەک نرخی دۆلار و نرخی بەرمیلی نەوت، هەروەها باسمان لە بەشەبودجەی هەرێمی کوردستان کرد.
بەهای دۆلار و نرخی نەوت
سەبارەت بە بەهای دۆلار و نرخی نەوت، دیلان غەفور ئەوەی خستەڕوو: بەهای 100 دۆلار بە 150 هەزار دینار لە پڕۆژەیاسای بودجەی ساڵی 2027 جێگیرکراوە، هەروەها بۆ بەرمیلێک نەوت 58 دۆلار پێشنیاز کراوە.
موچەی موچەخۆرانی هەرێم
دیلان غەفور ئاماژەی بەوەشدا: مژدە دەدەم بە موچەخۆرانی هەرێم کە موچەکانیان جێگیرکراوە، پێویستمان بەوەیە کە وەفدی هەرێم لە بەغداد بن و ئەو بڕگانەی کە نەگەیشتوونەتە رێککەوتن، تێبپەڕێندرێت.
بەهەمیشەییکردنی گرێبەستەکان
سەبارەت بە بەهەمیشەییکردنی گرێبەستەکان، ئەندامەکەی ئەنجومەنی نوێنەران رایگەیاند: لە عیراق 100 هەزار گرێبەست دەکرێنە هەمیشەیی، 50 هەزاریان سەربازین و 50 هەزاریان مەدەنین، ئەم بابەتە لەگەڵ هەرێمی کوردستان جیایە.
"هەرێمی کوردستان داوایکردووە لە پڕۆژەیاسای بودجەی 2027 گرێبەستەکانی هەرێمیش بکرێنە هەمیشەیی، بەڵام ئەم بڕگەیان تا ئێستا گفتوگۆی لەبارەوە دەکرێت و جێگیر نەکراوە"، دیلان غەفور وادەلێت.
وتەبێژی فەرماندەی گشتیی هێزە چەکدارەکانی عیراق دەستگیرکردنی ئەو کەسانەی راگەیاند کە بێڕێزییان بەرانبەر ئاڵای ئەمریکا کردبوو لە بەغداد.
سەباح نوعمان، وتەبێژی فەرماندەی گشتیی هێزە چەکدارەکان، لە راگەیەنراوێکدا ئاماژەی بەوەکرد کە لەسەر راسپاردەی عەلی زەیدی، فەرماندەی گشتیی هێزە چەکدارەکان، لایەنە پەیوەندیدارەکان ئەو تۆمەتبارانەیان دەستگیرکردووە کە لە بەڕێوەچوونی چالاکییەکانی "رۆژی سەروەری"دا بێڕێزییان بەرانبەر ئاڵای ئەمریکا کردبوو.
سەباح نوعمان جەختیشی کردەوە، سەرجەم رێکارە یاساییەکان بەرانبەر تۆمەتباران دەگیرێنەبەر و رووبەڕووی لێپرسینەوە دەکرێنەوە، بەپێی یاساکانی عیراق و نەریتە دیپلۆماسییەکان.
وتەبێژی فەرماندەی گشتی هێزە چەکدارەکان راشیگەیاند، حکومەتی عیراق پابەندبوونی خۆی بە رێزگرتن لە هێما و نێردە دیپلۆماسییەکانی وڵاتانی دۆست دووپات دەکاتەوە، و هەر هەوڵێک بۆ بێڕێزیکردن بەرانبەریان بەپێی یاسا رووبەڕووی لێپرسینەوە دەبێتەوە.
عەلی زەیدی، فەرماندەی گشتیی هێزە چەکدارەکان فەرمانی کرد بە پێکهێنانی لێژنەیەکی لێکۆڵینەوە بۆ بەدواداچوون لە هۆکارەکانی ئەو بێڕێزیکردنەی لە کاتی یەکێک لە نمایشەکانی چالاکییەکانی "رۆژی سەروەری"دا بەرانبەر ئاڵای ویلایەتە یەکگرتووەکانی ئەمریکا ئەنجام درا.
فەرماندەی گشتیی هێزە چەکدارەکان، ئەمڕۆ یەکشەممە، سەرکۆنەی ئەو کارەی کرد و جەختی لەسەر پێویستیی پابەندبوون بە یاسا و نەریتە دیپلۆماسییەکان کردەوە.
هاوکات رێنمایی دا بە گرتنەبەری رێکارە یاساییە پێویستەکان بەرانبەر سەرپێچیکاران، هەروەها تەواوکردنی لێکۆڵینەوەکە و بەرزکردنەوەی ئەنجامەکانی لە زووترین کاتدا.
وەزارەتی بەرگریی عیراق کوژران و برینداربوونی چوار لە ئەندامانی هێزەکانی بەهۆی تەقینەوەی بۆمبێکی چێنراوی پاشماوەکانی رێکخراوی تیرۆریستی داعش لە پارێزگای نێنەوا راگەیاند.
لیوا یەحیا رەسوڵ، وتەبێژی وەزارەتی بەرگری لە بەیاننامەیەکدا رایگەیاند: دوو لە ئەفسەرانی فەرماندەیی ئۆپەراسیۆنەکانی جەزیرە - فیرقەی حەوتی پیادە، لە کاتی ئەنجامدانی ئەرکی گەڕان و پشکنین لە باکوری بیابانی راوە لە باشوری نێنەوا، بەهۆی تەقینەوەی بۆمبێکی چێنراوی پاشماوەکانی داعش کەژران، هاوکات دوو سەربازی تریش بریندار بوون و بۆ وەرگرتنی چارەسەر رەوانەی نەخۆشخانە کراون.
وتەبێژی وەزارەتەکە سەرەخۆشیی ئاڕاستەی کەسوکاری کوژراوان کرد و جەختیشی کردەوە کە هێزەکانی سوپا بە ئیرادەیەکی بەهێزەوە بەردەوام دەبن لە جێبەجێکردنی ئەرکەکانیان بۆ راوەدوونانی پاشماوەکانی تیرۆریستان و سەقامگیرکردنی ئاسایشی وڵات.
کۆمپانیای "یۆرۆوینگز"ی ئەڵمانی گەڕانەوەی گەشتە ئاسمانییە راستەوخۆکانی بۆ بەغدادی پایپەخت راگەیاند؛ بەجۆرێک لە 10ی کانونی یەکەمی 2026ەوە هەفتانە چوار گەشت لە بەرلین و دۆسڵدۆرفەوە بۆ بەغداد ئەنجام دەدرێن، ئەوەش دوای زیاتر لە 40 ساڵ لە راوەستانی گەشتی کۆمپانیا ئەڵمانییەکان بۆ عیراق.
بەپێی بەرنامەی کۆمپانیاکە، هەفتانە دوو گەشت لە بەرلین و دوو گەشت لە دۆسڵدۆرفەوە بۆ بەغداد ئەنجام دەدرێن، ئەمەش هەنگاوێکە بۆ بەهێزکردنی تۆڕی گەشتە ئاسمانییەکان لەنێوان هەردوو وڵات و رێگەخۆشکردن بۆ فراوانبوونی ئامادەییی کۆمپانیا ئەورووپییەکان لە بازاڕی عیراقدا.
دەستپێکردنەوەی ئەم گەشتانە لە چوارچێوەی هەوڵەکانی وەزارەتی گواستنەوەی عیراقدایە بۆ راکێشانی کۆمپانیا ئاسمانییە نێودەوڵەتییەکان و تەواوکردنی پێوەرە نێودەوڵەتییەکانی ئاسایش و سەلامەتیی فڕۆکەخانەکان.
شایەنی باسە، کۆمپانیا ئەڵمانییەکان لە سەرەتای هەشتاکانی سەدەی رابردووەوە گەشتەکانیان بۆ عیراق راگرتبوو، لە ئێستاشدا زیاتر لە 10 کۆمپانیای ئەڵمانی داواکارییان پێشکەش کردووە بۆ ئەنجامدانی گەشت بۆ عیراق لە قۆناغی داهاتوودا.
دەستەی كەشناسیی عیراق رایگەیاند، لە سبەینێوە باران بارین دەستپێدەكات و پلەكانی گەرماش روو لە نزمبوونەوە دەكات.
دەستەی كەشناسیی عیراق لە راگەیەنراوێكدا پێشبنیەكانی خۆی بۆ رۆژانی داهاتوو ئاشكرایكردو رایگەیاند: لە سبەینێوە ئاسمان نیمچەهەور دەبێت و لە هەندێك ناوچەی ناوەڕاست و باكور و هەرێمی كوردستان دەبێتە هەوری تەواو باران بارین بەشێوەی پچڕ پچڕ دەبارێت،هەروەها هەرەبروسكەشی لەگەڵدا دەبێت.
كەشناسیی عیراق ئاماژەی بەوەش كرد، شەپۆلی بارانبارین بە شێوەی پچڕپچڕ تا كۆتایی هەفتە بەردەوام دەبێت، هاوكات ئەگەری هاتنی شەپۆلێكی خۆڵبارینیش لە سەرانسەری عیراقدا هەیە و لەگەڵ بارانەكەدا پلەكانی گەرما ڕوو لە نزمبوونەوە دەكەن.
لە کاتێکدا عیراق وڵاتێکی دەوڵەمەندە بە سەروەت و سامانەکەی، داتاکانی نەتەوە یەکگرتووەکان ئاشکرای دەکەن کە سالانە دەیان ملیۆن دۆلار لە گەنجینەی دەوڵەت تەنها بۆ دابینکردنی چا رەوانەی دەرەوە دەکرێت.
عەلی کەریم زەهیب، توێژەری ئابووری و دارایی لە رێکخراوی (أضواء دجلة) بۆ برنامەڕێژیی ستراتیجی، ئەمڕۆ یەکشەممە، رایگەیاند: داتا رەسمییەکانی بنکەی زانیاریی (COMTRADE)ی سەر بە نەتەوە یەکگرتووەکان، ئاماری شۆکهێنەریان دەربارەی بەردەوامیی چوونەدەرەوەی دراوی قورس لە عیراق ئاشکرا کردووە، ئەوەش تەنها لەپێناو دابینکردنی سادەترین پێداویستییەکانی ژیانی رۆژانەی هاووڵاتییان.
زەهیب لە بەیاننامەیەکی رێکخراوەکەدا ئاماژەی بەوە کرد: تەنها هەناردەی چای هیندستان بۆ عیراق لە ساڵی 2025دا بەرزبووەتەوە بۆ 125.24 ملیۆن دۆلاری ئەمریکی، روونیشی کردەوە کە ئەمە بڕە پارەیەکی زۆر گەورەیە تەنها بۆ دابینکردنی "چا" دەدرێت کە لە هیچ ماڵ و چایخانەیەکی عیراقدا دەستبەرداری نابن.
ئەو توێژەرە باسی لەوەش کرد: ئەم هاودژییە سیستمی ئابووری و دارایی وڵات دەخاتە ژێر پرسیارەوە، چونکە لۆجیکی نییە وڵاتێکی دەوڵەمەند بە سەروەت و سامان نەتوانێت بیر لە جێگرەوەیەک بکاتەوە بۆ کاڵایەکی بەکاربەری سەرەکی کە دەیان ملیۆن دۆلار لە گەنجینەی دەوڵەت بۆ جووتیار و وەبەرهێنەرانی هیندستان و وڵاتانی دەرەوە دەبات، لە کاتێکدا توانای ناوخۆیی پەکخراوە و لە هەموو پلانێکی ستراتیجی بۆ بەخۆماڵیکردنی پیشەسازیی خۆراک پەراوێز خراوە.
میدیای ئیسرائیلی ئاشكرای دەكات، سوپای وڵاتەكەیان سەرقاڵی ئامادەكارییە بۆ ئەنجامدانی هێرشی سەربازی بۆ سەر گروپە چەكدارەكانی عیراق.
بەپێی زانیارییەكانی راپۆرتەكە، واشنتۆن گڵۆپی سەوزی بۆ تەلئەبیب هەڵكردووە بۆ جێبەجێكردنی ئەم ئۆپراسیۆنە سەربازییانە، بەتایبەت دوای كشانەوەی هێزەكانی ئەمریكا لە عیراق.
ئاماژە بەوەش كراوە، كشانەوەی ئەمریكا بووەتە هۆی كردنەوەی رێڕەوێكی راستەوخۆ لە تارانەوە بۆ لوبنان، كە لەلایەن گروپە چەكدارەكانەوە بۆ گواستنەوەی هاوكاریی سەربازی و دارایی بەكاردەهێنرێت.
بەیانی ئەمڕۆ یەکشەممە، دەرگای خوێندنگەەکانی عیراق بەڕووی 12 ملیۆن خوێندکاردا کرانەوە، بەمەش زەنگی دەستپێکردنی ساڵی نوێی خوێندن لێدرا.
لەو باریەیەوە، وەزارەتی پەروەردەی عیراق رایگەیاند: ژمارەی قوتابیانی پۆلی یەکەمی سەرەتایی بۆ ساڵی نوێی خوێندن زیاتر لە ملیۆنێک و 200هەزار قوتابییە، ئاماژەی بەوەش کرد کە ژمارەی قوتابخانەکان زیاتر لە 124هەزار قوتابخانەیە.
سەرچاوەیەک لە فەرمانگەی تەندروستیی کەرکوک بە کوردسات نیوزی راگەیاند، لە سنووری ناحیەی ریازی سەر بە قەزای حەویجە، زیاتر لە 150 کەس بەهۆی پیسبوونی ئاوی خواردنەوەوە دۆخی تەندروستییان تێکچووە و گەیەندراونەتە نەخۆشخانەی قەزاکە.
بەپێی بەدواداچوونە سەرەتاییەکانی فەرمانگەی تەندروستیی کەرکوک، هۆکاری روداوەکە بۆ کەمتەرخەمی لە پڕۆژەی ئاوی ناحیەی ریاز دەگەڕێتەوە لە کاتی دابەشکردنی ئاودا؛ بەوهۆیەی مادەی کلۆر بەپێی پێویست بەکارنەهێنراوە یان بەتەواوی فەرامۆش کراوە، ئەمەش زیانی تەندروستیی بە دانیشتووانی ناوچەکە گەیاندووە.
سەرچاوەکە ئاماژەی بەوەش کرد، زۆربەی نەخۆشەکان تووشی سکچوون و رشانەوە بوون.
روداوەکە لە کۆتایی هەفتەی رابردوودا بە درێژایی دوو رۆژ رویداوە؛ بە جۆرێک لە رۆژی یەکەمدا 70 کەس و لە رۆژی دووەمدا 80 کەس رەوانەی نەخۆشخانە کراون.
لە ئێستادا لیژنەیەکی تایبەت بە شێوەیەکی مەیدانی سەردانی پڕۆژەکەیان کردووە و لێکۆڵینەوەکان بۆ گەیشتن بە دەرئەنجامی کۆتایی بەردەوامن.