عیراق
وەزارەتی گواستنەوەی عیراق، لە رێگەی کۆمپانیای گشتیی بەڕێوەبردنی گواستنەوەی تایبەتەوە، مەرج و تێچووی پێدان و نوێکردنەوەی مۆڵەتی بۆ نووسینگەکانی تاکسی دیاریکرد.
بەپێی رێنماییە نوێیەکان، پێویستە هەر نووسینگەیەک خاوەنی 50 تا 100 ئۆتۆمبێلی مۆدێل پێنج ساڵی کۆتایی بێت، هەروەها شۆفێران بەستنی نیشانەی رەسمیی تاکسی، پۆشینی جلی یەکپۆش و بەکارهێنانی پێوەری ئەلیکترۆنی یان ئەپڵیکەیشنی زیرەکیان بەسەردا دەسەپێندرێت.
هاوکات نووسینگەکان پابەندکراون بە بەستنی ئامێری دیاریکردنی شوێن (جی پی ئیس) لەسەر ئەرکی خۆیان و پێشکەشکردنی خزمەتگوزاریی 24 سەعاتی.
رێنماییەکان کارکردنی ئۆتۆمبێلی تایبەت و فەرمانبەرانی دەوڵەتیان لەم نووسینگانەدا قەدەغەکردووە و دیاریکردووە کە کارکردنیان تەنها لە سنووری ئەو پارێزگایە دەبێت کە لێی تۆمارکراون.
تێچووی وەرگرتنی مۆڵەتی نوێ یەک ملیۆن دینار و نوێکردنەوەی ساڵانەش 500 هەزار دینارە بە مەرجی پێشکەشکردنی پاکتاوی باج، ئەمەش وەک هەنگاوێک بۆ رێکخستنەوەی کەرتەکە و دابینکردنی خزمەتگوزارییەکی ئارامتر بۆ هاووڵاتییان.
راوێژكاری دارایی سەرۆك وەزیرانی عیراق رایگەیاند، مانگانە عیراق پێویستی بە نزیكەی هەشت ملیۆن دینار هەیە و نزیكەی 40 ملیۆن كەس سودمەندن لە موچەی دەوڵەت.
مەزهەر محەمەد ساڵح، راوێژكاری دارایی عەلی زەیدی سەرۆك وەزیرانی عیراق رایگەیاند، تێچوی موچەی مانگانەی عیراق حەوت ترلیۆن و 700 ملیار دینارە و 10 ملیۆن فەرمانبەران و خانەنشین و چاودێری كۆمەڵایەتی وەردەگرن و هەر موچەیەك لەلایەن دەوڵەتەوە خەرج دەكرێت بە شێوەیەك سەیر دەكرێت كە بژێویی چوار ئەندامی خێزان یان سوودمەند دابین دەكات، بەمەش نزیكەی 40 ملیۆن هاووڵاتیی عیراقی لە موچەی دەوڵەت سوودمەند دەبن.
وتیشی، نرخی نەوت لە بودجە لە نێوان 50 بۆ 60 دۆلار جێگری دەكرێت و بەرهەمهێنانی نەوتی عیراق دەگاتە سێ ملیۆن بەرمیل لە رۆژێدا و لە ئێستادا عیراق خاوەنی 78 ملیار دۆلار یەدەگی دراوی بیانی هەیە.
دەشڵێت، قەرزی ناوخۆی عیراق لە نێوان 12 بۆ 14 ترلیۆن دینار دەبێت.
سەرۆكی ئەنجومەنی وەزیرانی عیراق رایگەیاند، گەندەڵی مەترسیدارترین ئاستەنگە لە بەردم دەوڵەتدا و حكومەت لە جەنگێكی سەختدایە بۆ بنبڕكردنی.
عەلی زەیدی سەرۆك وەزیرانی عیراق لەگەڵ سەرۆك و ئەندامانی لیژنەی دەستپاكی ئەنجومەنی نوێنەرانی عیراق كۆبووەوە و رایگەیاند، گەندەڵی مەترسیدارتین ئاستەنگە لەبەردەم دەوڵەتدا لەمڕۆدا و حكومەت لە جەنگدایە بۆ نەهێشتنی لەگەڵ لەناوبردنی سەرچاوەكانیشی.
سەرۆك وەزیرانی عیراق جەختی لە گرنگی یەكخستنی هەوڵەكان كردەوە لە نێوان هەردوو دەسەڵاتی یاسادانان و جێبەجێكردندا بۆپاڵپشتیكردنی رێكارەكانی روبەڕوبوونەوەی گەندەڵی لە دۆزینەوەی ئەو كەسانەی تێوەگلاون.
وتیشی، گەندەڵی لە زیادڕەویكردن لە خەمڵانی تێچووی پرۆژەكانەوە دەستپێدەكات.
سەرۆك وەزیرانی عیراق باسی لەوەشكرد، حكومەت كاردەكات لەسەر پەیڕەوكردنی وردبینی پێشوەختە و دوای تەواوبوونی پرۆژەكان بە مەبەستی كەمكردنەوەی بەفیڕۆدان و پاراستنی سامانی گشتی.
لە هەڵمەتێکی لادانی زێدەڕۆیی لە بەغداد گرژی دروستبوو، لەئەنجامدا ئەفسەرێکی پۆلیس کوژرا و چوار کارمەندی تریش برینداربوون.
شانەی راگەیاندنی ئەمنیی عیراق ئاشکرایکرد، لە کاتی جێبەجێکردنی ئەرکێکی رەسمیدا بۆ لادانی زێدەڕۆیی نیشتەجێبوون لە ناوچەی 'دۆرە' لە باشوری بەغداد، هێزە ئەمنییەکان و مەفرەزەکانی خزمەتگوزاری رووبەڕووی تەقەکردن بوونەوە.
ئاماژەی بەوەشکرد، لە ئەنجامی دەستڕێژی گلولەکەدا، بەڕێوەبەری بەشی پۆلیسی ئەمیندارییەتی بەغداد، کە پلەی عەمیدە کوژرا، هەروەها چوار کەسی دیکە برینداربوون کە پێکهاتوون لە کارمەندێکی پۆلیسی فیدراڵی، دوو کارمەندی پۆلیسی ئەمیندارییەتی و موچەخۆرێکی ئەمندارییەتی بەغداد.
لەلایەکی ترەوە، بە فەرمانی فەرماندەی ئۆپراسیۆنەکانی بەغداد، هێزە ئەمنییەکان گەمارۆیەکی توندیان بەسەر ناوچەکەدا سەپاندووە و دەروازەکانیان داخستووە، لە ئۆپراسیۆنێکی کێوماڵکردنی فراواندا تا ئێستا کەسێکی تۆمەتبار دەستگیرکراوە و گەڕان بەدوای تاوانبارانی تردا بەردەوامە.
دادگای رەسافە فەرمانە سالارییەکەی کۆمپانیای کۆڕەک تیلیکۆمی هەڵوەشاندەوە و پشتگیری لە بڕیارەکەی دەستەی راگەیاندن و پەیوەندییەکانی عیراق دەکات بۆ راگرتنی کارکردنی کۆمپانیاکە.
دەستەی راگەیاندن و پەیوەندییەکانی عیراق لە راگەیەنراوێکدا ئاشکرایکرد، دادگای رەسافە لە بەغداد بڕیارێکی دادوەریی دەرکردووە بۆ هەڵوەشاندنەوەی فەرمانی سالاریی کۆمپانیای کۆڕەک و هێشتنەوەی بڕیاری راگرتنی کارکردن لەگەڵ ئەو کۆمپانیایەدا.
دەستەی راگەیاندن و پەیوەندییەکان رایگەیاند، دادگای رەسافە لە 24ی ئابی 2026 بڕیاریدا بە هەڵوەشاندنەوەی ئەو فەرمانە سالارییەی لەلایەن بەڕێوەبەری رێگەپێدراوی کۆمپانیای کۆڕەک تیلیکۆم پێشکەش کرابوو.
بەپێی بڕیارەکەی دادگا، بڕیارەکەی دەستەی راگەیاندن و پەیوەندییەکان تایبەت بە راگرتنی کارکردن لەگەڵ کۆمپانیای کۆڕەک بە بەهێزی و چالاکی دەمێنێتەوە.
دەستەی راگەیاندن و پەیوەندییەکان ئەوەشی خستەڕوو، بڕیارەکە دوای ئەوە هات، سەرۆکی دەزگای جێبەجێکار لە دەستەی راگەیاندن و پەیوەندییەکان بە فەرمی تانەی لە داواکارییەکەی بەڕێوەبەری کۆڕەک دابوو.
ئاماژەی بەوەشکرد، دەستەی ڕاگەیاندن و پەیوەندییەکان رێزی خۆی بۆ دەسەڵاتی دادوەری دوپاتکردەوە و جەختی کردەوە لە بەردەوامبوونی رێکارە یاساییەکان لە دۆسیەی کۆڕەک تیلیکۆمدا، بە ئامانجی پاراستنی مافی دەوڵەت، بەرژەوەندیی گشتی و مافی بەکارهێنەران.
بانکی ناوەندیی عیراق بە رەسمی ئەو دەنگۆیانەی رەتکردەوە کە باس لە چاپکردنی بڕێک دراوی نوێی عیراقی بە سڕینەوەی سفرەکانەوە دەکەن و ئاشکرایکرد، هەموو ئەو هەواڵانەی لەو بارەیەوە بڵاوکراونەتەوە دوورن لە راستییەوە.
بانکی ناوەندیی عیراق لە رایەگەیەنراوێکدا بڵاویکردەوە، ئەو هەواڵانەی لە هەندێک لە دەزگاکانی راگەیاندن لەبارەی چاپکردنی دراوی نوێ و لادانی سفرەکان بڵاوبوونەتەوە، پشتیان بە هیچ سەرچاوەیەکی رەسمی نەبەستووە و رەتیدەکەنەوە.
جەختی کردووەتەوە، هەر پڕۆژەیەکی داهاتوو بۆ دووبارە رێکخستنەوەی دراو یان سڕینەوەی سفرەکان، لە کاتی دەرکردنی بڕیاری رەسمیدا، پێویستی بە تێپەڕبوون بە چەندین قۆناغی یاسایی، رێکخستن و هونەریدا هەیە.
هەر لە راگەیەنراوەکەی بانکی ناوەندیدا ئاماژە بەوەکراوە، پڕۆژەیەکی لەو شێوەیە پەسەند بکرێت، لە رێگەی کەناڵە رەسمییەکانەوە رادەگەیەنرێت و ماوەیەکی گونجاو بۆ گواستنەوە دیاری دەکرێت تا هاووڵاتییان، بانکەکان و دامەزراوەکان بە شێوازێکی ئارام و رێکخراو دراوەکان بگۆڕنەوە، بە شێوەیەک کە مافی دارایی هەمووان پارێزراو بێت.
بانکی ناوەندیی عیراق داوا لە هاووڵاتییان و دەزگاکانی راگەیاندن دەکات بۆ وەرگرتنی هەر زانیارییەکی تایبەت بە سیاسەتی دراو تەنها پشت بە کەناڵ و راگەیەنراوە رەسمییەکان بانکەکە ببەستن، چونکە رەنگە بڵاوبوونەوەیان ببێتە هۆی سەرلێشێواوی یان زیان بە بەرژەوەندییە داراییەکانی هاووڵاتیان.
فایەق زێدان، سەرۆکی ئەنجومەنی باڵای دادوەریی عیراق، ئەمڕۆ سێشەممە بە سەردانێکی رەسمی گەیشتە شاری تارانی پایتەختی ئێران.
بەپێی زانیارییەکان، سەردانەکەی فایەق زێدان بۆ تاران یەک رۆژ دەخایەنێت و لەسەر بانگهێشتنامەیەکی رەسمیی غولامحوسێن موحسنی ئاژەیی، سەرۆکی دەسەڵاتی دادوەریی ئێران هاتوو.
هەروەها ئاماژە بەوەش کراوە کە ئامانج لەم سەردانە بەهێزکردنی پەیوەندییە هاوبەشەکانی نێوان بەغداد و تارانە، هاوکات تاوتوێکردنی چەندین دۆسیە و بابەتی دادوەری و یاسایی جێی بایەخی هەردوو وڵات دەبێت.
لیژنەی ئاسایش و بەرگریی ئەنجومەنی نوێنەرانی عیراق داوا لە سەرۆك وەزیران دەكات بودجەی تایبەت بۆ كڕینی سیستمی بەرگریی ئاسمانیی وڵاتەكە تەرخان بكات.
لیژنەی ئاسایش و بەرگری لە ئەنجومەنی نوێنەرانی عیراق ئاشكرای كردووە، داوایەكی رەسمییان ئاڕاستەی عەلی زەیدی، سەرۆك وەزیران كردووە تا لە پڕۆژە یاسای بودجەی گشتیدا بڕە پارەی پێویست بۆ كڕینی سیستمی بەرگریی ئاسمانیی پێشكەوتوو لە وڵاتانی روسیا، چین و كۆریای باشوور تەرخان بكرێت.
دەشڵێت، ئامانج لەو هەنگاوە، پاراستنی ئاسمان و سەروەریی عیراقە و ئەو داوایەش لە كاتێكدایە كە سیستمی بەرگریی ئێستای عیراق سنوردارە و نەیتوانیوە رێگری لە پێشێلكردنی ئاسمانی عیراق بگیرێت لەلایەن وڵاتانی ناوچەكەوە.
هاوكات سەرۆك وەزیرانی عیراق لەگەڵ فەرماندەی هێزەكانی ئەڵمانیا لە دەرەوەی وڵات و سەرۆكی دەستەی فیدراڵیی هاریكاریی سەربازی و تەكنیكیی روسیا كۆبوویەوە و دۆسیەی ئامادەكارییەكان بۆ كشانەوەی تەواوەتیی هێزەكانی هاوپەیمانی نێودەوڵەتی، بەهێزكردنی توانای سەربازی و هەواڵگریی هێزە ئەمنییەكان، و پەرەپێدانی هەماهەنگیی هاوبەش بۆ بەرەنگاربوونەوەی تیرۆر تاوتوێ كران.
هێزێكی ئەمنی لە بەغداد ئەندامێكی دەستەی ئەركانی حەشدی شەعبی و سێ ئەندامی تریان دەستگیركرد.
سەرچاوەیەكی ئەمنی بڵاویكردەوە، بەیانی ئەمڕۆ هێزێكی ئەمنی یەكێك لە ئەندامانی دەستەی ئەركانی حەشدی شەعبی بە ناوی ئەكرەم ئەبو جەعفەر دەستگیركردووە، بەبێ ئەوەی هۆكاری دەستگیركردنەكەی روون بكرێتەوە.
هاوكات لە هەمان پرۆسەدا، هێزە ئەمنییەكان سێ ئەندامی تری سەر بەحەشدی شەعبییان لە ناوچەی بەلەدیات لە رۆژهەڵاتی بەغداد دەستگیركردووە، هۆكاری دەستگیركردنی ئەوانیش نەخراوەتەڕوو.
راوێژكاری ئەمنیی سەرۆك وەزیرانی عیراق ئاشكرایدەكات، پێشنیازیان بۆ ئێران و سعودیە كردووە ئەنجومەنێكی هەماهەنگیی هاوبەش دابمەزرێنن و جەختیش لەوە دەكاتەوە رووبەڕووبوونەوەی سەربازیی لەگەڵ گروپە چەكدارەكان هێڵی سورە.
قاسم ئەعرەجی، راوێژكاری ئەمنیی عەلی زەیدی سەرۆك وەزیرانی عیراق لە چاوپێكەوتنێكی تەلەفزیۆنیدا رایگەیاند، پێشنیازێكیان ئاڕاستەی ئێران و سعودیە كردووە بۆ ئەوەی ئەنجومەنێكی هەماهەنگیی هاوبەش دابمەزرێنن، وتیشی، ئەو دوو وڵاتە هیچ گرفتێكیان نییە جگە قەیرانی بێمتمانەیی بەرامبەر یەكتر.
ئاماژەی بەوەشكرد، حكومەتی عیراق بڕیارێكی ستراتیژیی داوە كە دەبێت چەك تەنیا لەژێر دەسەڵاتی دەوڵەتدا بێت، وتیشی رێكەوتی 30ی ئەیلول بۆ دەرچوونی هێزە بیانییەكان لە عیراق دیاریكراوە، نەك كۆتاییهاتنی مۆڵەتی دانانی چەكی گرووپە چەكدارەكان.
ئەعرەجی دڵنیاییشیدا، هیچ ئاژاوەیەكی سیاسیی لە ئاكامی ئەو بڕیارە دروست نابێت و رووبەڕووبوونەوەی چەكداریش لەگەڵ ئەو گرووپانە هێڵی سوورە، وتیشی، لە رێگەی گفتوگۆوە بەردەوامن و ئەنجامەكان تا ئێستا ئەرێنین.
راوێژكاری ئەمنیی سەرۆك وەزیرانی عیراق ئەوەشی خستەڕوو، پەیوەندییەكانیان لەگەڵ وڵاتانی هاوپەیمانی نێودەوڵەتی دوای 30ی ئەیلوول بەهێزتر دەبن.
لە ئەنجومەنی نوێنەرانی عیراق زیاتر لە 30 ئیمزا كراوەتەوە بۆ كەمكردنەوەی تێچووی دەرهێنانی پاسپۆڕتی عیراقی بۆ 25 هەزار دینار، كە لە ئێستادا تێچووەكەی دەگاتە بڕی 91 هەزار دینار.
ئیبتیسام هیلالی، ئەندامی ئەنجومەنی نوێنەرانی عیراق رایگەیاند، لە ئەنجومەنی نوێنەران زیاتر لە 30 ئیمزایان كۆ كردووەتەوە بۆ كەمكردنەوەی تێچووی دەرهێنانی پاسپۆرتی عیراقی بۆ 25 هەزار، كە لەئێستادا تێچووەكەی بە سەرجەم رسومات و رێوشوێنەكانە دەگاتە بڕی 91 هەزار دینار و ئەوەش پێچەوانەی یاسای پاسپوڕتە.
ئەوەشی خستەڕو، ئیمزاكان بە رەسمی پێشكەشی سەرۆكایەتی ئەنجومەنی نوێنەران دەكرێت بە ئامانجی زیادكردنی بۆ كارنامەی دانیشتنێكی ئەنجومەنەكە و تاوتوێكردنی، لە ئەگەری پەسەندكردنی ئەو پێشنیازەش ئەنجومەنی نوێنەران پێشنیازەكە پێشكەشی سەرۆك وەزیران و وەزارەتی ناوخۆ دەكات بۆ تەواوكردنی رێوشوێنە كارگێڕی و یاساییەكانی.
ئەوەش لەكاتێكدایە، پاسپۆڕتی عیراقی ریزبەندی سێیەمی گرتووە لەنێو لاوازترین پاسپۆڕتەكانی جیهان و هەڵگری پاسپۆڕتەكە تەنها دەتوانێت سەردانی 28 وڵات بكات بەبێ وەرگرتنی ڤیزە.
دەستەی راگەیاندن و پەیوەندییەکانی عیراق ئاگادارییەکی هۆشیاریی بڵاوکردەوە و تێیدا هاوڵاتیانی لە مەترسییەکانی مامەڵەکردن بە دراوی دیجیتاڵی و سەرمایەی گریمانەیی ئاگادارکردەوە، بەهۆی ئەوەی لێکەوتەی دارایی و یاسایی قورسی لێدەکەوێتەوە، بەتایبەت لە کاتی مامەڵەکردن لەگەڵ سەکۆ و لایەنە نەناسراو یان بێ مۆڵەتەکاندا.
دەستەکە لە راگەیەندراوێکدا روونی کردەوە: مامەڵەکردن بە دراوە دیجیتاڵییەکان لە عیراقدا بەپێی رێنمایی و بڕیارەکانی لایەنە پەیوەندیدارەکان رێکدەخرێت، و جەختی کردەوە کە نابێت وابیربکرێتەوە مامەڵەکردن، ریکلامکردن یان ئاسانکاریکردن بۆ ئەم دراوانە بە شێوەیەکی رەها رێگەپێدراوە.
هاوكات داوای لە هاووڵاتیان کرد: لە هەر مامەڵەیەک کە پێچەوانەی یاسا بەرکارەکان بێت دووربکەونەوە و پێش ئەنجامدانی هەر مامەڵەیەک لە رێگەی لایەنە رەسمییەکانەوە لە رەوشی یاساییەکەی بکۆڵنەوە.
لە کۆتاییدا، دەستەی راگەیاندن و پەیوەندییەکان هۆشداریی دایە هاووڵاتیان کە نەکەونە داوی ریکلامەکان و بەڵێنی قازانجی خێرا و سەرمایەگوزاریی مەترسیدار، و جەختی کردەوە لەسەر قەدەغەی ناردنی پاره بۆ لایەنی مۆڵەتنەدراو یان بەشکردنی زانیارییەکانی بانک، وشەی تێپەڕ بوون و کۆدی پشتڕاستکردنەوە لەگەڵ هیچ کەسێکدا.
وەزیری نەوتی عیراق پێشوازی لە وەفدێکی کۆمپانیای شیڤرۆنی ئەمریکی کرد و تاوتوێی چەند پڕۆژەیەکی پەرەپێدانی پیشەسازییان کرد.
وەزارەتی نەوتی عیراق رایگەیاند، ئەمڕۆ یەکشەممە باسم محەمەد، وەزیری نەوتی عیراق پێشوازی لە وەفدێکی کۆمپانیای 'شیڤرۆن'ـی ئەمریکی کرد.
لە کۆبوونەوەکەدا، نەسیر عەزیز، بریکاری وەزارەت بۆ کاروباری دەرهێنانی نەوت و کانزاکان، کەریم یاسر، بەڕێوەبەری گشتیی فەرمانگەی گرێبەست و مۆڵەتە نەوتییەکان ئامادە بوون.
هاوکات، تاوتوێی ئەو بابەتانە کرا کە پەیوەستن بە پڕۆژەکانی پەرەپێدانی پیشەسازیی نەوت.
كەشناسی عیراق پێشبینی دەكات پلەكانی گەرما تا كۆتایی ئەم هەفەتەیە بە بەرزی بمێننەوە بەڵام كاریگەری شەپۆلەكە لەسەر هەرێم كەمتر دەبێت.
دەستەی گشتی كەشناسی و بوومەلەرزەزانی عیراق رایگەیاند، پێشبینی دەكەن بەرزیی پلەكانی گەرما بە لانی كەمەوە تا پێنج رۆژی تریش بەردەوام بێت بەڵام كاریگەرییەكەی لەسەر پارێزگاكانی هەرێمی كوردستان كەمتر دەبێت.
لەبارەی كەشی رۆژی دووشەممەشەوە ئاماژە بەوە كراوە ، لە بەشێكی ناوچەكانی هەرێم ئاسمان نیمچە هەور دەبێت و كەشوهەوای ناوچەكانی ناوەڕاست و باشووری عیراقیش بە گشتی ساماڵ دەبێت، هەروەها بەهۆی خێرایی باوە خۆڵبارینێكی كەم باشووری وڵاتەكە دەگرێتەوە.
لەبارەی پلەكانی گەرماشەوە رایگەیاند، پێشبینی دەكەن پلەكانی گەرما بۆ سبەی لە سلێمانی 43 پلە و هەولێر 44 پلە و دهۆك 41 پلە و هەریەك لە كەركووك و واست و میسان 48 پلە بێت، هاوكات بەسرەش بە 49 پلەی سیلیزی بە گەرمترین پارێزگای عیراق دەمێنێتەوە.
هەرێم و عیراق لەسەر یەكخستنی رێكارەكانی هاتووچۆ و تۆماركردنی پێبژاردنی سەرپێچییەكان بەپێی سنووری جوگرافی گەیشتنە لێكتێگەیشتن.
عودەی سەمیر، بەڕێوەبەری بەڕێوەبەرایەتیی گشتیی هاتووچۆی عیراق رایگەیاند، لەگەڵ هەرێمی كوردستان گەیشتوونەتە لێكتێگەیشتن لەسەر چەند پرسێكی پەیوەست بە رێكارەكانی هاتووچۆ كە سەرەكیترینیان پێبژاردنی سەرپێچییە جۆراوجۆرەكانە بەتایبەت رەشكردن یان تاریككردنی جامی تۆتۆمبێل.
ئاماژەی بەوەش كرد، هەرێم و عیراق رێككەوتوون لەسەر ئەوەی هەردوولا مافی ئەوەیان هەیە بەپێی سنووری جێبەجێكردن سەرپێچی تۆمار بكەن و سزا بنووسن، واتە ئەو ئۆتۆمبێلانەی تابلۆی هەرێمیان پێوەیە لە ناوەڕاست و باشوور ئەگەر سەرپێچی بكەن، سزادەدرێن و بەپێچەوانەشەوە.
لەبارەی پرسی تاریككردنی جامی ئۆتۆمبێلیشەوە باسی لەوە كرد، رێككەوتوون لەسەر ئەوەی پابەندن بن بە بڕیار و رێنماییەكانی پەیوەست بەو بوارە و هەردوولا رێز لە یاساكانی یەكتر دەگرن.
جەختیشیكردەوە، تا ئێستا تووشی هیچ ئاستەنگێكی ئەوتۆ نەهاتوون و پرۆسەكەشیان بەردەوامە بۆ یەكخستنی رێكارەكان.
وەزارەتی نەوتی عیراق بڵاویکردەوە، وەزیری نەوتی عیراق، لە سەردانێکی رەسمیدا بۆ سعودیە، لەگەڵ هەریەکە لە وەزیرانی وزە و دارایی ئەو وڵاتە کۆبووەوە.
لە دیدارەکاندا باس لە پتەوکردنی پەیوەندییە دوولایەنییەکان و پەرەپێدانی ئاسۆکانی هاوکاری کرا، بەتایبەتی لە کەرتەکانی گاز، وزە و کارەبا.
وەزیری نەوتی عیراق جەختی کردەوە، وڵاتەکەی پەرۆشە بۆ بەهێزکردنی پەیوەندییەکانی لەگەڵ وڵاتانی ناوچەکە و بەتایبەت سعودیە، بە ئامانجی بەدیهێنانی بەرژەوەندییە هاوبەشەکانی هەردوو وڵات.
وەفدە عیراقییەکە جگە لە وەزیری نەوت، وەزیری دارایی و چەند لێپرسراوێکی باڵای دیکەی وەزارەتی نەوت و دارایی تێدابوو، کە تێیدا جەخت لە هەماهەنگیی نێوان هەردوو وڵات، لە بەرزترین ئاستدا کرایەوە.