کەناڵی 13ـی ئیسرائیلی لە زاری لێپرسراوانی  باڵای وڵاتەکەیەوە رایگەیاند، ئەمریکا خۆی بۆ فراوانکردنی ئۆپراسیۆنە سەربازییەکانی دژی ئێران ئامادە دەکات و لە چوارچێوەیەدا 100 فرۆکەی سوتەمەنی بۆ ناوچيکە گواستوەتەوە.

کەناڵەکە بە پشتبەستن بە سەرچاوە ئیسرائیلییەکان، رایگەیاندوە، هەفتەی داهاتوو بۆ ناوچەکە هەفتەیەکی چارەنوسساز دەبێت.

 لە راپۆرتی کەناڵە ئیسرائیلییەکەدا هاتووە؛ ناوخۆی ئیسرائیلدا وا دەخەمڵێندرێت کە دوای هەفتەیەک لە هێرشە بەردەوامەکانی ئەمریکا بۆ سەر خاکی ئێران، دۆناڵد ترەمپ، سەرۆکی ئەمریکا، نیازی هەیە مەودا و قەبارەی ئۆپراسیۆنە سەربازییەکانی زیاتر پەرە پێبدات.

هاوکات لێپرسراوێکی  باڵای سوپای ئیسرائیل بە کەناڵەکەی راگەیاندووە؛ ئێرانییەکان هەوڵێکی زۆر دەدەن بۆ ئەوەی ئیسرائیل پەلکێشی ناو ئەم ململانێیە نەکەن، بەڵام ئەگەر ئەمریکییەکان هێرشەکانیان چڕتر بکەنەوە، لەوانەیە ئەم رەوشە گۆڕانکاری بەسەردا بێت.

 لە لایەکی ترەوە  باڵیۆزخانەی ئەمریکا لە ئیسرائیل داوای لە هاووڵاتیانی خۆی کردووە، کە بەهۆی ئەگەری پەرەسەندنی چاوەڕواننەکراوی گرژییەکان، پێداچوونەوە بە گەشتەکانیاندا بکەن بۆ رۆژهەڵاتی ناوەڕاست، بەتایبەتی بۆ ئیسرائیل.

کەناڵی 13ـی ئیسرائیل ئاماژەی بەوەش کردووە، هەوڵە نێوەندگیرییەکانی قەتەر بۆ کەمکردنەوەی گرژییەکان هێشتا بەردەوامن، بەڵام سەرچاوە سیاسییەکانی ئیسرائیل پێیان وایە، کە ئەم هەوڵانە لە کورتماوەدا هیچ کاریگەرییەکیان لەسەر بڕیارەکانی دۆناڵد ترەمپ نابێت.

فەرماندەیی ناوەندیی ئەمریکا (سێنتکۆم) رایگەیاند، لە هێرشەکانی دوێنێ ئێراندا بۆسەر پێگەکانیان لە ئوردن دوو سەربازیان کوژراون و سەربازێکیشیان چارەنوسی نادیارە، چوار سەربازیشیان بریندارن و چارەسەر وەردەگرن.

لە راگەیەندراوەکەی سێنتکۆمدا هاتووە؛  کاتێک هێزەکانیان بەرپەرچی هێرشە موشەکییە بالیستی و  درۆنەکانی ئێرانیان داوەتەوە، حەوت سەربازیان بوون بە قوربانی، کە تا ئێستا چارەنوسی یەکیان نادیارە.

سێنتکۆم ئاماژەی بەوەشکردوە، بریندارەکان برینیان سوکە و وەک رێزێک لە بنەماڵەکانیان، ناوی کوژرا و بریندارەکان تا 24 سەعات بڵاوناکاتەوە .

موجتەبا خامنەیی، رێبەری باڵای ئێران لە پەیامێکیدا هێرشی توندی کردە سەر ئەمریکا و بە شەیتانی گەورە ناوی بردوە و دەڵێت؛ شکاندنی چەندین جارەی بەڵێنەکان نیشانەی بێ بەهایی ئیمزای دۆناڵد ترەمپە و درۆزنی شەیتانی گەورەیە.

موجتەبا خامنەیی، سەبارەت بە یاداشتی لێکتێگەیشتن رایگەیاندوە،  بەڵگەیەکی حاشاهەڵنەگرە لەسەر درۆزنیی ئەمریکا و بێبایەخیی ئیمزای دۆناڵد ترەمپ و سەلمێنەری ئەوەیە کە بە هیچ شێوەیەک ناتوانرێت متمانەی پێ بکرێت.

خامنەیی ئاماژەی بەوەش کرد، کە تاکڕەویی و بەرژەوەندیخوازی  بەشێکی دانەبڕاون لە رێبازی سیاسیی ئەمریکا.

ناوبراو لە پەیامەکەدا جەختی کردوەتەوە، کە ئەمریکای دوژمن هەوڵی هەڵگیرساندنی شەڕ دەدات، بەڵام پێویستە بزانێت کە گەلی ئێران و بەرەی بەرگریی، دەرسێکیان دادەدەن، کە هەرگیز لەبیری نەکات.

لە بەشێکی تری پەیامەکەیدا، خامنەیی جەختی لە گرنگیی بەهێزکردنی بەرەی ناوخۆیی کردەوە و رایگەیاند، کە یەکڕیزیی ناوخۆ و هاودەنگیی نێوان گەل و بەرپرسان لە تەواوی گۆڕەپانەکاندا، تاکە گەرەنتییە بۆ پاراستنی عیزەت و سەربەخۆیی ئێران، بەتایبەت لە روبەڕووبوونەوەی دوژمنێکی تاوانبار و فێڵبازی وەک ئەمریکادا.

رێبەری ئێران داوای لە سەرجەم لایەنەکان کردوە، پارێزگاری لە تەبایی بکەن و خۆیان لە ناکۆکی و ململانێی سیاسی بەدوور بگرن، ئاماژەی بەوە کردوە، پاراستنی ئەم یەکڕیزییە ئەرکی سەر شانی هەمووانە، بەڵام لەم نێوەندەدا رۆڵی بەرپرسان و دڵسۆزانی شۆڕش لە پاراستنی هاوسەنگی و یەکپارچەیی وڵاتدا زۆر گرنگتر و هەستیارترە.

وتەبێژی وەزارەتی دەرەوەی ئێران رایگەیاند، ئەمریکا پێشێلی یاداشتنامەی لێکتێگەیشتنی ئیسلام ئابادی کردوە و دەیەوێت خۆی گەروی هورمز بەڕێوەبەرێت، ئاماژەی بەوەشکردوە تا ئێستا هیچ بڕەپارەیەکی بلۆکراوەی وڵاتەکەی ئازاد نەکراوە

ئیسماعیل بەقایی، وتەبێژی وەزارەتی دەرەوەی ئێران جەختیکردەوە، ئەوان تەنها بەرگرییان کردوە و هەرگیز ئێرانییەکان شەڕیان لەگەڵ هیچ وڵاتێکدا نەویستووە، جا لە ناوچەکە بێت یان لە دەرەوەی وڵات.

ئاماژەی بەوەشکردوە، جگە لە بنکە سەربازییەکانی ئەمریکا و کەرەستەی سەربازیی ئەمریکا هێرشیان نەکردووەتە سەر هیچ ئامانجێک، ئێران و کۆماری ئیسلامی لە یەکتر جیا نین، نەتەوەی ئێرانیش دوژمنی لەگەڵ گەلی ئەمریکا نییە و ئەووەی ئەمریکا ئەنجامیدا پێشێلکردنی راستەوخۆی لێکتێگەیشتنەکە بووە.

بەقایی ئەوەشیخستوەتەڕوو، ئەمریکا ویستویەتی رێرەوێکی نوێ لە گەوری هورمزدا دروستبکاتو  هەژمونی ئێران نەهیڵێت، لە کاتێکدا رێککەوتن گەروەکە لە نێوان ئێراون و عوماندا بەڕێوە ببرێت.

لە بەشێکی دیکەی قسەکانیدا، بەقایی دەڵێت؛ تا ئێستا هیچ بڕە پارەیەکی بلۆکراوی وڵاتەکەی ئازاد نەکراوە، لە کاتێکدا پابەندبوونیان ئەوە بوو کە لە کاتی جێبەجێکردنی ئەم یاداشتنامەی لێکتێگەیشتنەدا، ئێران بە ئازادی دەستی بگات بە هەموو سەروەت و سامانە بلۆکراوەکانی.

ئاژانسی هەواڵی فارس هۆشداری دەدات، لە ئەگەری هێرشی ئەمریکا بۆ سەر ژێرخانی مەدەنی ئێران، سوپای پاسداران دەستناپارێزێت و دەستبەجێ فڕۆکەخانەکانی دوبەی و ئەبوزەبی  دەکرێتە ئامانجی موشەک و درۆنەکانی ئێران.

ئەمڕۆ شەممە، ئاژانسی فارس، لە زاری لێپرسراوانی سوپای پاسدارانەوە ئاشکرای کردوە، ئەگەر جارێکی تر ئەمریکا ژێخانی مەدەنی ئێران بکاتە ئامانج، لە وەڵامدا سوپای پاسداران هەریەکە لە فڕۆکەخانەکانی  دوبەی و ئەبوزەبی بە ئامانج دەگرێت.

ئاژانسەکە ئاماژەی بەوەشکردوە، جگە لەو فڕۆکەخانەکان، هەریەکە لە  بەندەری فوجەیرە لە ئیمارات و بەندەریجەبەل عەلی لە دوبەی  پێویست چۆڵبکرێن، چونکە لە ئامانجەکانی سوپای پاسداراندان.

ئەو لێپرسراوەی ئێران، بە ئاژانسی فارسی راگەیاندوە، ئەم هۆشدارییە بۆ پاراستنی هاووڵاتیان و دورکەوتنەوەیە لەو شوێنانە.

ئەم هەڕەشەی سوپای پاسداران  لە کاتێکدایە، چەند رۆژێکە ئەمریکا لە هێرشەکانیدا بۆسەر ئێران، پرد و تونێل و وێستگەی ئاوی خواردنەوەی کردوەتە ئامانج.

لە توركیا نزیكەی 120 كەس بە تۆمەتی هاوكاریكردنی گروپی تیرۆریستی داعش دەستگیركران كە لە رێگەی تۆڕە كۆمەڵایەتییەكانەوە پارەیان كۆكردووەتەوە.

وەزارەتی ناوخۆی توركیا رایگەیاند، لە ئۆپەراسیۆنێكدا كە لەلایەن دژە تیرۆر و فەرماندەیی گشتیی جەندەرمە و سەرۆكایەتییەكانی داواكاری گشتی لە 30 پارێزگا بەڕێوەچووە، 119 كەس بە تۆمەتی هاوكاریكردنی داعش دەستگیركران، كەلە رێگەی تۆڕە كۆمەڵایەتییەكانەوە پروپاگەندەیان بۆ ئەو گروپە تیرۆریستییە كردووە و لە رێگەی دامەزراوە خێرخوازییەكانیشەوە هاوكاری داراییان بۆ داعش كۆكردووەتەوە.

ئاماژەی بەوەشكردووە، لە ئەنجامی پشكنینەكاندا، دەستبەسەر ژمارەیەكی زۆر بەڵگەنامەی رێكخراوەیی و پێداویستی دیجیتاڵیدا گیراوە.

سوپای ئیسرائیل ئاشکرایدەکات، دەیان فڕۆکەی سەربازیی ئەمریکی کە تایبەتن بە تێکردنی سوتەمەنی لە ئاسماندا، لەبری فڕۆکەخانەی نێودەوڵەتیی بن گۆریۆن لە بنکە ئاسمانییە سەربازییەکانی وڵاتەکەدا جێگیر دەکرێن.

سوپای ئیسرائیل رایگەیاند، دەیان فڕۆکەی سوتەمەنی پڕکەرەوەی ئەمریکی کە بۆ تێکردنی سوتەمەنی لە ئاسماندا رەوانە کراون، لە بنکە ئاسمانییە سەربازییەکانی ئیسرائیلدا جێگیر دەکرێن نەک لە فڕۆکەخانەی نێودەوڵەتیی بن گۆریۆن.

بەپێی ئاژانسەکانی هەواڵ، بڕیاری جێگیرکردنی ئەم فڕۆکانە لە بنکە سەربازییەکاندا بە ئامانجی کەمکردنەوەی کێشە و ئاستەنگەکانە لەبەردەم هێڵە ئاسمانییە مەدەنییەکاندا.

رۆژنامەی (تایمز ئۆف ئیسرائیل) ئاماژەی بەوەکردووە، پێشتر وەزارەتی گواستنەوەی ئیسرائیل ژمارەی فڕۆکەی پڕکەرەوەی سوتەمەنی لە فڕۆکەخانەی بن گۆریۆن بە تەنیا 20 فڕۆکە دیاریکردبوو، تا رێگری بکات لە دروستبوونی پشێوی و دواکەوتنی گەشتە هاوینەییەکان.

ناردنی ئەم فڕۆکانە بۆ ناو بنکە سەربازییەکان بە هەماهەنگی لەگەڵ سوپای ئیسرائیل ئەنجامدراوە، ئەمەش رێگەی بە هێزی ئاسمانیی ئیسرائیل داوە ئامادەکاریی پێشوەختە بکەن.

سوپای ئیسرائیل راشیگەیاندووە، مەبەست لەم هەنگاوە رەخساندنی زۆرترین دەرفەتە بۆ بڵاوەپێکردنی هێزەکانی ئەمریکا لە ئیسرائیلدا، بەبێ ئەوەی زیان بە کەرتی فڕۆکەوانیی مەدەنی وڵاتەکە بگات.

سوپای پاسدارانی ئێران رایدەگەیەنێت، لە رێگەی هێرشێکی موشەکی و فڕۆکەی بێفڕۆکەوانەوە، بنکەی سەربازیی ئەمریکایان لە ناوچەی "ئەزرەق" لە وڵاتی ئوردن کردووەتە ئامانج و پێنج فڕۆکەی جەنگیی ئەو وڵاتەیان بە تەواوی تێکشکاندووە.

لە راگەیەنراوێکی هێزی ئاسمانیی سوپای پاسداراندا، هاتووە، هێزەکانیان لە رێگەی موشەک و فڕۆکەی بێفڕۆکەوانەوە، هێرشێکی چڕیان کردووەتە سەر بارەگای سەربازانی ئەمریکا لە بنکەی ئەمریکی لە ئەزرەق لە ئوردن."

سوپای پاسداران ئاشکراشیکرد،لە ئەنجامی ئەو هێرشەدا، بە لایەنی کەمەوە دوو فڕۆکەی جەنگیی شەڕکەر و سێ فڕۆکەی دیکەی ئەمریکی بە تەواوی تێکشکێنراون، هاوکات زیانێکی زۆر گەورەش بە ژمارەیەک فڕۆکەی دیکەی نێو بنکەکە گەیشتووە.

راوێژكاری سەربازیی فەرماندەی گشتیی هێزە چەكدارەكانی ئێران رایدەگەیەنێت، سیاسەتی شەڕ و دانوستان بەیەكەوە و لە یەك كاتدا كۆتایی هاتووە.

موحسین رەزایی، راوێژكاری سەربازیی فەرماندەی گشتیی هێزە چەكدارەكان و فەرماندەی سوپای پاسدارانی ئێران رایگەیاند: بەشێوەیەكی گشتیی هیچ لێكەتێگەیشتنێك لە نێوان ئێران و ئەمریكا نەماوە، تەنها ناوێك ماوەتەوە لەسەر كاغەز، ترەمپیش ئەو خاڵانەی پێشێلكردووە كە بۆ جێبەجێكردنی یاداشتەكە دیاریكرابوون.

وتیشی: یەكێك لەسەر پێچییەكان كێشەی لوبنان بوو كە سوپای ئیسرائیل لەو وڵاتە نەكشایەوە و ئەمریكاش رێڕەوێكی لە گەروی هورمز دروستكرد بۆ تێپەڕاندنی چەند كەشتییەك، كە بەپێی رێككەوتنەكە دەبێت ئێران گەروی هورمز بەڕێوەببات، یەكێكی تر لە پێشێلكارییەكان هێرشی ئەمریكابوو بۆسەر كەناراوەكانی ئێران و فڕۆكەخانەی بەندەر عەباس و دورگەی قشم.

لەبارەی ئازادكردنی پارە بلۆككراوەكانی ئێرانیش موحسین رەزایی وتی: بۆ ماوەی سێ‌ هەفتە لەسەر پێدانی 12 ملیار دۆلار دانوستانكرا، بەڵام چەند مەرجێك دانرا بۆئەوەی پارەكە نەدەنەوە بە ئێران و دەیان ویست ئێران ناچار بكەن داواكارییەكانیان قبوڵ بكات، ئەوەش بووە بەهۆی شكستی دانوستانەكان.

لێپرسراوێكی ئەمریكا رایگەیاند، ترەمپ تاوتوێی بۆردومان كردن و ناشتنی یۆرانیۆمە پیتێنراوەكەی ئێران دەكات بۆ ئەوەی بەهیچ شێوەیەك وڵاتەكە دەستی پێی نەگات. 

لێپرسراوێكی ئەمریكا رایگەیاندووە ئیدارەی دۆناڵد ترەمپ تاوتوێی هێرشی نوێ دەكات بۆ سەر دامەزراوە ئەتۆمییەكانی ئێران.

دەشڵێت، ئامانج لە هێرشە نوێیەكان شاردنەوەی زیاتری یۆرانیۆمی پیتێنراوەكەیە لە قوڵایی زەویدا بۆ ئەوەی ئێران نەتوانێت بەكاریبهێنێتەوە یاخود دەستی پێیبگات. 

راشیگەیاند، پێدەچێت هێرشەكەی ئەمجارە بۆ سەر دامەزراوە ئەتۆمییەكان توندتر و فراوانتر بێت لە جاری پێشوو. 

ئەوەش لەكاتێكدایە، هەفتەی رابردوو ئاژانسەكان بڵاویانكردەوە، ترەمپ دەیەوێت كێوی تەور لە ئێران بۆردومان بكات یان دەستی بەسەردا بگرێت كە یۆرانیۆمە پیتێنراوەكەی تێدا حەشارداوە. 

 

باڵیۆزخانەکانی ئەمریکا لە رۆژهەڵاتی ناوەڕاست هۆشدارییان دا لە گەشتکردن بۆ ناوچەی کەنداوی عەرەبی و رۆژهەڵاتی ناوەڕاست، و داوایان کرد کە خۆ لە گەشتکردن بۆ لوبنان و عیراق بەدوور بگرن، هەروەها پێداچوونەوەش بە بڕیاری سەردانیکردنیاندا بۆ عەرەبستانی سعوودی و بەحرەین بکەن.

باڵیۆزخانەکانی ئەمریکا لە هەر یەک لە وڵاتانی لوبنان، عێراق، بەحرەین و شانشینی عەرەبستانی سعوودی هۆشداری ئەمنیی هاوشێوەیان دەرکردووە و ئاماژەیان بەوە کردووە کە دۆخی ئەمنیی ناوچەکە بە ئاڵۆزی ماوەتەوە لەگەڵ ئەگەری ڕوودانی پەرەسەندنی چاوەڕواننەکراو. هاوکات ڕێنوێنی هاووڵاتیانی ئەمریکییان کردووە کە بەرزترین ئاستی وریایی بگرنە بەر، بەدواداچوون بۆ هەواڵە خۆجێییەکان بکەن و خشتەی گەشتە ئاسمانییەکانیان پشتڕاست بکەنەوە، لەگەڵ ئاگادارکردنەوەیان لە ئەگەری دروستبوونی پەککەوتن لە گەشتەکان یان داخرانی کایەی ئاسمانی بەبێ ئاگادارکردنەوەی پێشوەختە، و پێویستی پەنابردن بۆ حەشارگەکان لە ئەگەری ڕوودانی هەر هێرشێکدا.

لەم هۆشدارییانەدا بە توندی جەخت لەسەر "نەکردنی گەشت" بۆ لوبنان و عێراق کراوەتەوە، لە کاتێکدا داوا کراوە "پێداچوونەوە" بە بڕیاری گەشتکردندا بۆ بەحرەین و عەرەبستانی سعوودی بکرێت.

لە فراوانترین ئاستیشیدا، هۆشدارییەکەی وەزارەتی دەرەوەی ئەمریکا ١٥ شوێنی گرتووەتەوە کە ئەمانەن: بەحرەین، لوبنان، میسر، عومان، ئێران، قەتەر، عێراق، شانشینی عەرەبستانی سعوودی، ئیسرائیل، کەناری ڕۆژاوا و کەرتی غەززە، سووریا، ئوردن، دەوڵەتی ئیماراتی عەرەبی یەکگرتوو، کوێت و یەمەن.

ئێران هێرشەكانی بۆسەر وڵاتانی كەنداو چڕكردوەتەوە، شاری خەرج لە سعودیە و بەحرەین و كوەیت ئوردنی كردوەتە ئامانج.

بەرەبەیانی ئەمڕۆ سوپای ئێران لە چوارچێوەی هێرشەكانیدا بۆسەر بنكەكانی ئەمریكا لە وڵاتانی كەنداو هێرشیكردە سەر ئوردن و شاری خەرج لە سعودیە، بنكەی عەلی سالم لە كوەیت و بنكەی سەربازی شێخ عیسا لە بەحرەین.

سوپای ئوردنیش بڵاویكردەوە، بەرگری ئاسمانی وڵاتەكەی 10 موشەكی ئێرانییان خستەخوارەوە.

لەلایەكی ترەوە، سوپای پاسدارانی ئێران لە راگەیەنراوێكدا ئاماژەی بۆ ئەوەكردوە، ئەمریكا جارێكی تر لە ناوەڕاستی دانوستانەكاندا هێرشەكانی بۆسەر ئێران دەستپێكردوەتەوە، بەڵام ئەو هێرشانە، بێ وەڵام نامێنێتەوە.

راشیگەیاندوە، ئەو وڵاتانەی خاكی خۆیان خستوەتە بەردەست ئەمریكا بۆ هێرشكردنە سەر ئێران، دەبێت ئامادەی وڵامدانەوەی توندبن، هەموو ئەو وڵاتانە دەكەنە ئامانج.

هەروەها هێزی دەریایی سوپای پاسداران رایگەیاندوە، چوار كەشتی بە پشتیوانی ئەمریكا هەوڵیانداوە گەروی هورمز تێبپەڕێنن، بەڵام لە ئۆپراسیۆنێكدا رێگە لە تیپەڕبوونی ئەو كەشتیانە گیراوە.

 

عەباس عراقچی، وەزیری دەرەوەی ئێران، ئەمڕۆ هەینی، ئیسرائیلی تۆمەتبار کرد بە ئەنجامدانی کەمپینێکی بەرفراوان بۆ کاریگەری خستنە سەر ئیدارەی ئەمریکا و پاڵپێوەنانی بەرەو شەڕێکی بژاردەیی کە هیچ سەرکەوتنێکی تێدا بەدەست نایەت.

عراقچی لە پۆستێکدا لە تۆڕی کۆمەڵایەتی ئێکس رایگەیاند: ئەمریکییەکان هۆشداری لە هەژموونی بیانی دەدەن، بەڵام ئەی کەمپینی بەرفراوانی سئیسرائیلیەکان چییە بۆ فریودانی ئیدارەی ئەمریکا و پەلکێشکردنی بۆ ناو شەڕێکی بژاردەیی کە ناتوانرێت تێیدا سەرکەوتن بەدەست بهێنرێت؟

وەزیری دەرەوەی ئێران ئاماژەی بەوەش کردووە کە ئیسرائیل پاره‌ی باجدەرانی ئەمریکی بەکاردەهێنێت بۆ بێدەنگکردنی هەر رەخنەگرێکی ئەمریکی، و جەختیشی کردەوە کە بەم زووانە هەموو شتێک ئاشکرا دەبێت.

هاوکات لەگەڵ ئەم لێدوانانەدا، دەستەی رادیۆ و تەلەفزیۆنی رەسمی ئێران بڵاویکردەوە کە لە ماوەی شەوی رابردوودا چەندین هێرشی ئاسمانی کراوەتە سەر پردەکانی ناوخۆ و دەوروبەری شاری "بەندەر عەباس"، ئەمەش بووەتە هۆی داخرانی رێگا سەرەکی و خێراکان کە ئەو شارە بە پارێزگاکانی ترەوە دەبەستنەوە.

وەزارەتی کارەبا و ئاو و وزەی نوێبووەوەی کوەیت، ئەمڕۆ هەینی، رایگەیاند کە یەکێک لە وێستگەکانی بەرهەمهێنانی وزەی کارەبا و شیرینکردنی ئاوی وڵاتەکە بەهۆی هێرشێکی ئێرانەوە زیانی بەرکەوتووە، ئەمەش بەپێی ئەوەی ئاژانسی رۆیتەرز بڵاویکردووەتەوە.

وەزارەتی کارەبای کوەیت لە راگەیەندراوێکدا ئاماژەی بەوە کردووە: یەکێک لە وێستگەکانی هێزی کارەبا و شیرینکردنی ئاو بەر هێرشێک کەوتووە، کە بووەتە هۆی دروستبوونی زیان لە پاشکۆکانی وێستگەکە و کەوتنەوەی ئاگرکەوتنەوە، جگە لە زیانگەیشتن بە ژمارەیەکی زۆر لە یەکەکانی بەرهەمهێنانی وزەی کارەبا.

سوپای پاسدارانی ئێران، ئەمرۆ هەینی، هێرشێکی بەرفراوان و کتوپڕی بۆ سەر بنکەی ئاسمانیی "عەدید"ی ئەمریکی لە وڵاتی قەتەر ئەنجامدا و رایگەیاند، کە زیانی گەورەی بە بنکەکە گەیاندووە.

سوپای پاسداران لە راگەیەندراوێکدا ئاماژەی بەوە کردووە، کە هێزی ئاسمانی-فەزایی سەر بە هێزەکانیان هێرشێکی بەهێز و کتوپڕی کردووەتە سەر بنکەی ئاسمانیی عەدید کە گەورەترین بنکەی سەربازیی ئەمریکایە لە ناوچەکەدا.

لە راگەیەندراوەکەدا هاتووە: لەو هێرشەدا بۆ سەر بنکەی عەدید، توانیومانە سیستمێکی راداری دوورمەودا و چەندین فڕۆکەی ستراتیژیی ئەمریکی تایبەت بە سووتەمەنیپێدانی ئاسمانی بە تەواوی تێکبشکێنین و لەناوببەین.

تەلئەبیب پێشبینی دەکات لە ماوەی هەفتەی داهاتوودا، پێکدادانی سەربازیی نێوان ئەمریکا و ئێران زیاتر بێت، هاوکات میدیاکانی ئیسرائیل ئاشکرایدەکەن، واشنتۆن سەرقاڵی ئامادەکردنی پلانی زنجیرەیەک هێرشی نوێی لە ناوخۆی ئێران دەکات، کە پێدەچێت وێستگەکانی بەرهەمهێنان و گواستنەوەی وزەی کارەبا بگرێتەوە.

بەپێی راپۆرتێکی کەناڵی 12ـی ئیسرائیل، لە کۆبوونەوە ئەمنیی و سیاسییەکانی ئەم دواییەی وڵاتەکەدا، هەڵسەنگاندنەکان ئاماژەیان بەوە کردووە کە بەهۆی بەردەوامیی هێرشە سەربازییەکانی ئەمریکا بۆ سەر پێگەکانی ئێران، ئاستی گرژییەکانی نێوان واشنتۆن و تاران بەرەو فراوانبوونی زیاتر هەنگاو دەنێت.

کەناڵەکە ئاماژەی بەوەش کردووە، ئەمریکا دەیەوێت لە رێگەی بەئامانجگرتنی کەرتی کارەباوە، دەست بخاتە سەر خاڵی لاوازی ژێرخانی ئابوریی ئێران، کە ئەمەش هاوکاتە لەگەڵ لێدوانەکانی پێشووی دۆناڵد ترەمپ، سەرۆکی ئەمریکا.

لای خۆشییەوە، لێپرسراوێکی باڵای ئیسرائیل رایگەیاندووە: "خۆمان بۆ ئەگەری ئاڵۆزبوونی زیاتری رەوشەکە و هەموو سیناریۆیەکی چاوەڕوانکراو ئامادە کردووە، کە رەنگە کاردانەوەی بۆ سەر ئیسرائیل هەبێت."

جێی ئاماژەیە ئەم پێشهاتانە لە کاتێکدان، هێرشە ئاسمانییەکانی ئەمریکا بۆ سەر ئامانجە جیاوازەکانی ناو خاکی ئێران بۆ شەشەم شەوی لەسەریەک بەردەوامە، واشنتۆنیش جەخت دەکاتەوە کە ئامانجی لەم هێرشانە تێکشکاندنی توانای سەربازیی ئێرانە، هاوکات هەوڵە دیپلۆماسییەکانیش بۆ رێگریکردن لە ئاڵۆزبوونی سەرتاسەریی رەوشی ناوچەکە بەردەوامییان هەیە.