جیهان
وەزارەتی گەنجینەی ئەمریكا سزای لەسەر هێڵی ئاسمانی فلای بەغداد و دوو هێڵی تری فڕۆكەوانی سەر بە سوپای پاسداران هەڵگرت.
وەزارەتی گەنجینەی ئەمریكا لە راگەیەنراوێكدا ئاماژەی بەوەكردووە، سزا سەپێنراوەكانی سەر هێڵی ئاسمانیی فلای بەغداد و ماهان و بۆینگ 737 هەڵگرتووە دوای ئەوەی گۆڕانكاری لە هەڵسوكەوتیان بەدیكرا و هەرسێ هێڵەكەشی بە سەر بە سوپای پاسداران وەسفكردووە.
ئاماژەی بەوەشكردووە، نوسینگەی لێكۆڵینەوەی فیدراڵی بەدواداچوونی بۆ ئەو سێ هێڵە ئاسمانییە كردووە و ئێستا بەشێوەیەكن ئەمریكا لە هەڵسوكەوتیان رەزامەندە.
وەزارەتی گەنجینەی راشیگەیاندووە، ئەو هەنگاوە بە مانای گۆڕینی بۆچوونی ئەمریكا نییە لەسەر سیستمی ئێران و سوپای پاسداران و بڕیارەكەش پەیوەندی بە دانوستانەكانەوە نییە.
لە ساڵی 2024 وەزارەتی گەنجینەی ئەمریكا سزای بەسەر هێڵی ئاسمانیی فلای بەغداد و ئەو دوو هێڵەی تردا سەپاند بە تۆمەتی پەیوەندییان بە فەیلەقی قودسی سوپای پاسدارانی ئێران.
روسیا بە موشەکی بالیستی و درۆن هێرشێکی بەرفراوانی کردە سەر ئۆکراین و دەیان کوژراو و برینداری لێکەوتەوە، سەرۆکی ئۆکراینیش دەڵێت، نەیانتوانیوە بەرپەرچی هێرشە موشەکیەکانی دوێنێی روسیا بدەنەوە.
ئاژانسەکانی هەواڵ بڵاویانکردەوە، لە هێرشێکی بەرفراوانی دوێنێ روسیادا بە موشەکی بالیستی و درۆن بۆ سەر چەند ناوچەیەکی ئۆکراین، لانی کەم 21 کەس کوژران و بە دەیان کەسی تریش بریندار بوون.
لەلای خۆیەوە، ڤۆلۆدیمێر زیلینسکی سەرۆکی ئۆکراین رایگەیاند، دواکەوتنی گەیشتنی سیستمەکانی دژەبالیستی لەلایەن هاوبەشەکانیانەوە دەبێتە هۆی زیانی گیانی و وێرانکاریی تۆقێنەر." ئاشکراشی کرد کە ناردنی موشەکی بەرگریی لەلایەن هاوپەیمانانیانەوە لەمساڵدا بە شێوەیەکی بەرچاو کەمی کردووە.
ئاژانسەکانی هەواڵ ئەوەشیان خستوەتەڕوو، درەنگانی شەوی رابردوو کیێڤی پایتەخت و ناوچەکانی دەوروبەری، رووبەڕووی هێرشیکی بەرفراوانی روسیا بوونەوە و بەهۆیەوە 17 کەس گیانیان لەدەستداوە. هاوکات لە ئەنجامی هێرشەکانی تردا بۆ سەر هەردوو پارێزگای خارکیڤ و دۆنێتسک، چوار کەسی تر کوژراون.
لە بەرانبەردا، وەزارەتی بەرگریی روسیا ئاشکرایکرد، لە هێرشەکاندا ناوەندەکانی لۆجستیکی و کۆگاکردنی چەک و درۆنیان لە کیێڤ کردووەتە ئامانج، ئاماژەی بەوەشکرد، لە نزیک بەندەری ئۆدێسا لە دەریای رەش، سێ کەشتیی بارهەڵگریان پێکاوە کە کەرەستەی سەربازی و چەکیان گواستووەتەوە.
ئاژانسی نۆڤۆستی، دوای شیکردنەوەی دواین راپۆرتەکانی پنتاگۆن گەیشتە ئەو ئەنجامەی کە کۆی ژمارەی بریندارەکانی سوپای ئەمریکا لە جەنگی ئەو وڵاتە لەگەڵ ئێران بەرزبووەتەوە بۆ 687 کەس.
بەپێی ئامارە ناوخۆییەکانی پنتاگۆن تا 4ی ئاب، 417 سەرباز لە میانی ئۆپەراسیونی "ئیپیک فیوری" بریندار بوون، کە ئیدارەی ترەمپ لە ٥ی ئایار کۆتاییهاتنی راگەیاندبوو.
هەروەها 270 سەربازی تر لە زنجیرە ئۆپەراسیونە نوێیەکانی دژی ئێران کە لە 7ی تەمووزەوە دەستیان پێکردووە بریندار بوون، بەمەش کۆی ژمارەی بریندارەکان گەیشتووەتە 687 کەس.
لە لایەکی ترەوە، ژمارەی راگەیەندراوی کوژراوانی سوپای ئەمریکا گەیشتە 18 سەرباز.
دۆناڵد ترەمپ، سەرۆکی ویلایەتە یەکگرتووەکانی ئەمریکا لە لێدوانێکدا بۆ "فۆکس نیوز" رایگەیاند: کە وڵاتەکەی خەریکی دانوستانی زۆر باشە لەگەڵ ئێران، جەختیشی کردەوە کە تاران بە درێژایی رۆژ سەرقاڵی دانوستان بووە و ئێرانییەکان دەیانەوێت بگەنە رێککەوتن.
ترەمپ ئاماژەی بەوەدا کە کاتی پێویستی لەبەرجەستەدایە سەبارەت بە پرسی ئێران، بەڵام جەختی کردەوە: ئێران بە هیچ شێوەیەک ناوەستێت تا ببێتە خاوەنی چەکی ئەتۆمی، چونکە ئەگەر ئێران دەستی بە چەکی ئەتۆمی بگات، جیهان دەبێتە شوێنێکی تەواو جیاواز.
سەبارەت بە ئاڵۆزییە سەربازییەکان و گەروی هورمز، سەرۆکی ئەمریکا ئاشکرای کرد کە وڵاتەکەی نزیک بووەوە لە ئەنجامدانی هێرشێک بۆ سەر ئێران کە بە گەورەترین هێرشی سەربازی دادەنرا لە دوای جەنگی جیهانی دووەمەوە. وتیشی: گەروی هورمز بەم زووانە زۆر بە کراوەیی دەمێنێتەوە، یانیش ئێران بەر زەبرێکی زۆر توند و سەخت دەکەوێت.
هێزە ئەمنییەکانی ویلایەتە یەکگرتووەکانی ئەمریکا پیاوێکی چەکداریان دەستگیرکرد کە گومانی لێدەکرێت چاودێری رێکارە ئەمنییەکانی یاریگای گۆڵفی دۆناڵد ترەمپ، سەرۆکی ئەمریکای کردبێت لە نزیک شاری لۆس ئانجلوس، ئەوەش بەر لە سەردانە بەرنامە بۆ داڕێژراوەکەی ترەمپ بۆ یانەکە.
بەرێوەبەرایەتی پۆلیسی پارێزگای لۆس ئانجلوس رایگەیاند: تۆمەتبارەکە تەمەنی 38 ساڵە و سەرقاڵی گرتنی وێنە و ڤیدیۆ بووە لە دەوروبەری شوێنەکەدا، لە کاتی پشکنیندا مەخزەنێکی فیشەک بە توانای گرتنی 16 فیشەک و بڕێک تەقەمەنی پێبووە، هەروەها پۆلیس لە ناو ئۆتۆمبێلەکەیدا دەمانچەیەکی دۆزیوەتەوە.
پۆلیس ئاماژەی بەوەش کردووە، دەستگیرکردنی ئەو کەسە هاوکات بووە لەگەڵ ئامادەکارییەکانی سەرۆک ترەمپ بۆ گەیشتن بە یانەی گۆڵفەکەی لە دەرەوەی شاری لۆس ئانجلەس، بە مەبەستی بەشداری کردن لە ئاهەنگێکی شێوانە بۆ کۆکردنەوەی هاوکاری دارایی.
مارکۆ روبیۆ، وەزیری دەرەوەی ئەمریکا ئاشکرای کرد کە دانوستانەکانیان لەگەڵ تاران بۆ بەگەڕخستنەوەی هاتوچۆی دەریاوانی لە گەروی هورمز پێشچوونی بەخۆیەوە بینیوە.
روبیۆ لە لێدوانێکی رۆژنامەوانیدا ئاماژەی بەوە کرد: پێشچوون لە دانوستانەکان لەگەڵ ئێران بۆ بەگەڕخستنەوەی گەروی هورمز هەیە، هاوکات جەختیشی کردەوە: نابێت ئێران ببێتە خاوەنی چەکی ئەتۆمی.
وەزیری دەرەوەی ئەمریکا وتیشی: بەشداریین لە دانوستانەکان لەگەڵ ئێران بۆ دەستەبەرکردنی کردنەوەی گەروی هورمز، و ئاماژەی بەوەش کرد: هێشتا نەگەیشتووینەتە لێکگەیشتنی کۆتایی سەبارەت بە گەروی هورمز، بەڵام هیواداریین بەم نزیکانە بگەیەنە رێککەوتن.
لە هەفتەی رابردوودا زیاتر لە 72 هەزار کۆچبەر بە شێوەیەکی نایاسایی پەڕیوونەتەوە بۆ شارۆچکەی سبتە، تا ئێستاش 70 هەزار کەسیان بۆ مەغریب گەڕێنراونەتەوە.
وەزیری ناوخۆی ئیسپانیا رایگەیاند، لە هەفتەی رابردوودا زیاتر لە 72 هەزار کۆچبەر بە شێوازێکی نەریتی و نایاسایی چووبوونە ناو شارۆچکەی سبتە، تا ئێستاش 70 هەزار کەسیان بۆ مەغریب گەڕێنراونەتەوە.
وەزارەتی ناوخۆی ئیسپانیا ئاماژەی بەوەکرد، زۆربەی ئەو کۆچبەرانەی بە شێوەی نایاسایی چوووبوونە خاکی ئیسپانیاوە رادەستی مەغریب کراونەتەوە.
هاوکات لۆران نونێز، وەزیری ناوخۆی فەرەنسا ئاشکرایکرد، بەپێی ئامارە رەسمییەکانی ئیسپانیا، لە ئاکامی ئاڵۆزی و هەوڵەکانی بەزاندنی سنوور لە سبتە، ژمارەی گیانلەدەستدان بۆ 75 کەس بەرزبووەتەوە.
لەلای خۆشیەوە وەزیری ناوخۆی فەرەنسا ئاماژەی بەوەکرد، وەزیرانی ناوخۆی وڵاتانی یەکێتیی ئەوروپا پشتیوانیی تەواوی خۆیان بۆ رێکارەکانی ئیسپانیا لە کۆنتڕۆڵکردنی قەیرانەکە دەربڕیوە، بەو هۆیەوەش فەرەنسا بڕیاری داوە رێکارە ئەمنییەکانی لەسەر سنوورەکانی لەگەڵ ئیتالیا توندتر بکات.
لەلایەکی دیکەوە، وەزارەتی کۆچ و ئینتیگراسیۆنی دانیمارک پێشوازیی لە کاردانەوەی خێرای مەدرید کرد لە بڵاوەپێکردنی هێزەکانی پۆلیس و سوپا، جەختیشی کردەوە لە گرنگیی پاراستن و کۆنتڕۆڵکردنی سنورەکانی یەکێتیی ئەوروپا.
شەپۆلی گەرما و وشکەساڵی، کەرتی وزەی لە فەرەنسا تووشی ئاستەنگ کردووە و پاریس ناچار دەکات بەهۆی هۆکاری ژینگەیی کارکردنی سێ کارگەی ئەتۆمی رابگرێت.
دەزگاکانی راگەیاندنی ناوخۆیی لە سەرچاوەکانی کۆمپانیای کارەبای فەرەنساوە گواستیانەوە کە دوو کارگە لە وێستگەی "شۆز" و مفاعلی سێیەم لە وێستگەی "ئاردێن" کارکردنیان راوەستێنراوە، هاوکات ئاستی بەرهەمهێنانی چەندین کارگەی تریشیان کەم کردووەتەوە.
لە مانگی ئایاری رابردووەوە، فەرەنسا رووبەڕووی شەپۆلی یەکبەدوایەکی گەرما بووەتەوە کە تێیاندا پلەکانی گەرما ئاستی پێوانەییان تۆمار کردووە، ئەمەش کاریگەرییەکی راستەوخۆی لەسەر کەرتەکانی کۆنترۆڵکردنی سەرچاوەکانی ئاو و وزە دروست کردووە.
لە دوای راپۆرتی لێپرسراوانی ئەمریکا سەبارەت بە ئەنجامدانی هێرشی ئەلیکترۆنی رێکخراو بۆ سەر سیستمەکانی ئاو لە چەند ویلایەتێکی ئەمریکا دەنگۆکانی تێوەگلانی تاران رویان لە زیادبوون کردوە.
هەفتەی رابردوو لێپرسراوانی ویلایەتی مینیسۆتا رایانگەیاند، کە زیاتر لە 30 سیستمی ئاوی ئەو ویلایەتە کراونەتە ئامانج، دواتریش نووسینگەی لێکۆڵینەوەی فیدراڵی (FBI) ئاشکرای کرد، کە هێرشی هاوشێوە لە حەوت ویلایەتی تر رویان داوە و کێشەیان بۆ کارکردنی ئەو دامەزراوانە دروست کردووە.
هەرچەندە ئاژانسی ئاسایشی سایبەری و ئاسایشی ژێرخانی ئەمریکا (CISA) بێدەنگی هەڵبژاردووە، بەڵام میدیاکانی ئەمریکا ئاماژە بەوە دەکەن، کە لێکۆڵینەوە لە روداوەکان دەکرێت =و بە دواداچون دەکرێت بۆ ئەگەری تێوەگلانی ئێران لەو هێرشانەدا.
لای خۆشیەوە، مورگان رایت، راوێژکاری پێشووی وەزارەتی دەرەوەی ئەمریکا، ئاماژەی بەوە کردووە کە بەپێی ئاڵۆزییەەکانی نێوان واشنتن و تاران، ئێران لە سەروی لیستی تۆمەتباراندایە، بەڵام لێپرسراوانی ئەمریکی ئەگەری ئەوەش لێک دەدەنەوە، کە رەنگە ئەوانەی ئەو کارەیانکردوە بە مەبەست خۆیان وەک لایەنی ئێرانی نیشان دابێت تا ئاڵۆزییەکان زیاتر بکەن.
ئەمە لە کاتێکدایە تا ئێستا تاران هیچ لێدوانێکی لەسەر ئەو بابەتە نەبووە و لە ناوخۆی ئەمریکاشدا، دوناڵد ترامپ بەرپرسیارێتیی روداوەکەی خستە ئەستۆی بەرپرسانی ویلایەتی مینیسۆتا و بە کەمتەرخەمی لەقەڵەمداون، بەڵام ئەوانیش لە وەڵامدا رایگەیاندوە، دۆناڵد ترەمپ بە باشی دەزانێت، کە چ وڵاتێک لە پشتی ئەم هێرشانەوەیە.
بەهۆی سەپاندنی باج بەسەر 60 وڵاتدا، لە 25 ویلایەتی ئەمریكا سكاڵا لەسەر ئیدارەكەی ترەمپ تۆمار دەكرێت.
بەپێی یاداشتنامەیەك لە 25 ویلایەتی ئەمریكا كە دوانیان لەلایەن كۆمارییەكانەوە بەڕێوەدەبرێن، سكاڵا لەسەر ئیدارەكەی دۆناڵد ترەمپ تۆماركراوە، بەهۆی ئەوەی باجی گومرگیی بەسەر 60 وڵاتدا سەپاندووە، چونكە پێیان وایە ترەمپ سنوری دەسەڵاتە رێگە پێدراوەكانی تێپەڕاندوە.
ئەو ویلایەتانە سكاڵاكەیان پێشكەشی دادگای بازرگانیی نێودەوڵەتی ئەمریكا كردووە لە نیویۆرك و بەپێی سكاڵاكەش هیچ پەیوەندییەكی لۆژیكی لە نێوان كێشەی هاوردەی نێودەوڵەتی و باجە گومرگییە جیهانییە گشتگیرەكاندا نییە.
هەینی رابردوو لەلایەن ئیدارەكەی ترەمپەوە باجی گومرگیی بەسەر 60 وڵاتی هاوبەشی بازرگانیی ئەمریكادا سەپێندرا.
رۆژنامەی واشنتۆن پۆست، کە رۆژنامەیەکی ئەمریکییە، ئاشکرای کردوە، ژمارەیەک لە جەنەڕاڵەکانی ئەمریکا وەزارەتی بەرگریی وڵاتەکەیان ئاگادار کردوەتەوە، لە ئێستادا توانای پاراستنی ئیسرائیلیان نییە، ئەگەر ئێران هێرشەکانی دەستپێبکاتەوە.
ئەو سەرچاوەی قسە بۆ رۆژنامەکە کردوە وتویەتی، لە ئێستادا بەهۆی کەمیی کەشتی جەنگییەوە، توانای پێویستیان نییە بۆ ئەوەی بەردەوام بن لە پاراستنی ئیسرائیل لە موشەکە بالیستیکییەکانی ئێران.
ئەلێکسۆس گرینکوویچ، کە فەرماندەی هێزەکانی ئەمریکایە لە ئەوروپا، ئەو کەسەیە هۆشدارییەکەی داوەتە پنتاگۆن و رایگەیاندووە، بێ دابینکردنی کەشتییەکی تری جەنگی لە رۆژهەڵاتی ناوەڕاست، ناچار دەبن، لە کاتی هێرشيکانی ئێراندا، تەنها بەرگری لە هێزەکانی خۆیان بکەن، نەک ئیسرائیل.
گەرچی تا ئێستا پنتاگۆن، ئامادە نەبووە هیچ لێدوانێک بدات، لەسەر ئەم راپۆرتەی رۆژنامەی واشنتۆن پۆست، بەڵام لێپرسراوێکی تری وەزارەتی بەرگریی ئەمریکاش،راگەیاندووە، هۆشدارییەکەی گرینویچ لە جێی خۆیدایە و لە ئەگەری سەرهەڵدانەوەی هێرشەکاندا توانای پێویستیان نییە بۆ بەرگریکردن لە بەرانبەر موشەکە بالیستییەکانی تاران.
كردنەوەی گەروی هورمز لە بەرانبەر هەڵوەشاندنەوەی گەمارۆدا تەوەری سەرەكی دانوستانەكانی نێوان واشنتۆن و تاران دەبێت.
بە پێی سەرچاوەیەكی ئاگادار لە وەفدی نێوەندگیر بە تۆڕی هەواڵی سی بی ئێس نیوزی ئەمریكی ئاشكرایكردووە، پێشنیازێك لەلایەن ترەمپەوە خراوەتەڕوو دوای هەڵوەشاندنەوەی هێرشێكی چاوەڕوانكراو بۆ سەر ئێران كە تێیدا داوا لە واشنتۆن و تاران دەكات بگەڕێنەوە سەر مێزی دانوستان.
ئەو سەرچاوەیە راشیگەیاندووە، پێشنیارەكە داوای راگرتنی هێرشەكانی ناوچەكەی كردووە، لەوانەش هێرشی ئەو گروپانەی كە لەلایەن ئێرانەوە پشتگیری دەكرێن بۆ سەر وڵاتانی كەنداو و ئوردن، هاوكات مەرجی ئەوەی داناوە كە دەبێت گەروی هورمز دەستبەجێ بە تەواوی بكرێتەوە.
لە هەمان كاتدا، پێشنیارەكە لەخۆگرتنی كۆتاییهێنانە بەو شتەی كە ترەمپ بە هەڕەشەی ناوخۆیی ئێران ناوی بردووە، و لە بەرانبەردا ئەمریكا كۆتایی به گەمارۆ دەریاییەكە‌ی سەر ئێران بهێنێت و رێگە بە تاران بدات نەوت هەناردە بكات.
لێپرسراوەکە جەختی لەوە كردووەتەوە، تا ئێستا هەردوولا نەگەیشتوونەتە رێككەوتن، بەڵام هەوڵەكانی نێوەندگیران بەچڕی بەردەوامە.
سەرۆکی ئەمریکا رایدەگەیەنێت، ئەمرۆ گەڕێكی نوێی دانوستانەكان لەگەڵ ئێران دەست پێ دەكات و جەختیشی كردەوە كە تاران نایەوێت رووبەرووی هێرشی سەربازی ببێتەوە.
دۆناڵد ترەمپ، سەرۆكی ئەمریكا رایگەیاند، بڕیارە ئەمرۆ دووشەممە گەڕێكی نوێی گفتوگۆكان لەگەڵ نوێنەرانی ئێران دەست پێبكات.
ترەمپ ئاشكرایكرد، كە لە دوا خولەكدا پلانێكی بۆردومانی زۆر گەورەی بۆ سەر ئێران هەڵوەشاندووەتەوە كە لە دوای جەنگی دووەمی جیهانییەوە وێنەی نەبووە، ئەوەش دوای داواكاریی هەریەكە لە وڵاتانی سعودیە، ئیمارات، قەتەر و خودی ئێران.
لەلای خۆشییەوە، مەسعود پزیشكیان، سەرۆك كۆماری ئێران رایگەیاند، ئەو رەشنووسی تێگەیشتنەی لەگەڵ ئەمریكا هەیانە، دەبێتە تەوەری سەرەكیی پەیوەندییە دەرەكییەكانی تاران لە داهاتوودا و ئاسایشی ناوچەكە بەهێزتر دەكات.
بەهۆی بەردەوامیی ئاگركەوتنەوە لە دارستانەكانی ئەمریكا، زیاتر لە 101 هەزار هیكتار زەوی لە واشنتۆن سوتا.
دەسەڵاتدارانی واشنتۆن رایانگەیاندووە، بەهۆی ئاگركەوتنەوە لە دارستانەكان 101 هەزار و 171 هیكتار زەوی سوتاوە و بەوهۆیەوە ژمارەیەك لە دانیشتوانی ئەو ناوچانە ماڵەكانیان بەجێهێشتوە.
بەپێی راپۆرتە سەرەتاییەكان، ئاگر زیانی بە تۆرەكانی كارەبا گەیاندووەو لە هەندێك ناوچەش كارەبا پچراوە، لە ئێستادا لە رۆژهەڵاتی واشنتۆن 60 هەزار كەس بەهۆی پچرانی كارەباوە گرفتارن، هەر بە وتەی بەرپرسان تا ئێستا هیچ زیانێكی گیانی تۆمار نەكراوە.
ڤۆلدمێر زێلینسکی، سەرۆکی ئۆکراین رایگەیاند، هێزەکانی وڵاتەکەی بەردەوامن لە وەشاندنی گورزی بەهێز لەو دامەزراوانەی روسیا کە پاڵپشتیی دارایی و سەربازیی جەنگەکە دەکەن.
زێلینسکی ئاماژەی بەوەش کرد، شەوی رابردوو لە ناوچەی ساراتۆڤی روسیا، زیاتر لە 600 کیلۆمەتر لە بەرەکانی جەنگەوە دوورە، دوو بنکە کە یەکێکیان پاڵاوگەیەکی نەوتە و ئەوەی دیکەشیان بنکەیەکی سەربازیی ئاسمانییە.
هەر بەپێی وتەکانی سەرۆکی ئۆکراین، لە هەرێمی کالوگا کۆگایەکی گەورەی نەوت و لە هەرێمی بریانسکیش پێگەیەکی تایبەت بە کۆگاکردن و ئاراستەکردنی درۆن، بەوردی پێکراون.
زێلینسکی سوپاسی هێزەکانی بەرگریی وڵاتەکەی کرد بۆ فراوانکردنی تواناکانیان لە وەشاندنی گورزی بەهێز و وتیشی: ئێمە جەنگ دەگەڕێنینەوە بۆ ئەو شوێنەی کە لێیەوە هاتووە.
وەزیری دەرەوەی ئەمریكا رایگەیاند، دەبێت دەسەڵاتی ئێران بگۆڕدرێت و جەختیشی كردەوە كە تاران تاوەكو ئێستا رووبەرووی سەرۆكێكی وەك دۆناڵد ترەمپ نەبووەتەوە، كە توانیویەتی هاوكێشەكان لەرێگەی فشاری سەربازی و ئابوورییەوە بگۆڕێت.
ماركۆ رۆبیۆ وەزیری، دەرەوەی ئەمریكا رایگەیاند: كە پێویستە رژێمی ئێران بگۆڕدرێت، چونكە تاران تا ئێستا رووبەڕووی سەرۆكێكی وەك ترەمپ نەبووەتەوە كە فشارە سەربازی و ئابوورییەكانی بۆ سەر ئەو وڵاتە گەیاندووەتە ئاستێكی بێپێشینە.
رۆبیۆ ئاماژەی بەوە كرد كە ئیدارەكانی پێشووی واشنتۆن تەنها هەڕەشەی بێكرداریان هەبووە، بەڵام ترەمپ رێگەی نەداوە تاران چەتری سەربازی بۆ بەرنامە ئەتۆمییەكەی دروست بكات و پەیوەندی ئەو وڵاتەش لەگەڵ چینیش پێویستی بە هاوسەنگییە.
هۆشداریشیدا كە هەر جۆرە رووبەرووبوونەوەیەكی سەربازی یان ئابووریی لەنێوان ئەمریكا و چین، كارەساتبار دەبێت بۆ هەردوو وڵات و ئابووریی جیهان.