کوردستان
ئارام فەتاح خەراجیانی، یاریزانی لەشجوانی ئەمڕۆ لەگەڵ وریا حەمەکەریمی ڕۆژنامەنوسدا لەڕوداوی هاتوچۆکەی ڕێگەی عەربەت-سلێمانی گیانی لەدەستدا.
ئارام خەراجیانی پاڵەوانێکی لەشجوانی ئاست بەرزبوو، کە خاوەنی چەندین دەستکەوت و نازناوبوو لە ئاستی ناوخۆ و نێودەوڵەتیی.
ئارام، سەر لەبەیانی ئەمڕۆ، لە رووداوێكی هاتوچۆدا لە هەمان شوێنی رۆژنامەنووس و پێشكەشكار وریا حەمە كەریم، گیانی لەدەستدا.
پۆلیسی هاتوچۆی عەربەت رایگەیاند، وریا حەمە كەریم ئۆتۆمبێلەكەی وەستاندوە و ویستویەتی هاوكاریی مامۆستا ئارام بكات، لەو كاتە بارهەڵگرێك خۆی بە ئۆتۆمبێلی هەردووكیاندا كێشاوە و گیانیان لەدەستداوە، شۆفێری بارهەڵگرەكەش كە ئێرانییە، بریندار بووە و لە نەخۆشخانەیەكی سلێمانییە.
بافڵ جەلال تاڵەبانی سەرۆکی یەکێتیی نیشتیمانیی کوردستان، بەبۆنەی 31 ساڵەی راگەیاندنی یەکگرتووی ئیسلامی کوردستانەوە، پەیامێکی پیرۆزبایی ئاراستەی ئەو حیزبە کردو تیایدا ستایشی ئەو رۆڵە میانڕەوانەی یەکگرتووی ئیسلامی کرد و هیوای بەردەوامبوونی بۆ خواستن لەسەر ئەو رێچکەیە.
دەقی پەیامەکەی سەرۆکی یەکێتیی نیشتمانیی کوردستان:
بەڕێز مامۆستا سه‌ڵاحه‌دین محەمەد به‌هادین، ئەمیندارى گشتیی یه‌كگرتووى ئیسلامى كوردستان
بەڕێزانمان لە سەرکردایەتی و برایان و خوشکانمان لە یەکگرتووی ئیسلامی کوردستان.
سڵاوی خودای گەورەتان لێبێت.
بەبۆنەی سی و یەکەمین ساڵەی راگەیاندنی یەکگرتووی ئیسلامی کوردستانەوە، لەدڵەوە پیرۆزبایی گەرمتان ئاڕاستەدەکەین و هیوادارم رۆڵی میانڕەوانەی یەکگرتووی ئیسلامی کوردستان بەردەوام بێت لە پێناو بەهێزترکردنی قەوارەی هەرێم و بەدیهێنانی ئامانجە باڵاکانی گەلەکەمان.
لەم دەرفەتەدا بەڕێزو پێزانینەوە لە رۆڵی جەنابتان و یەکگرتووی ئیسلامیی کوردستان دەڕوانین، وەک هێزێکی کاریگەریی گۆڕەپانی سیاسی لەهەرێم، کە هەمیشە بەشێک بوون لە یەکڕیزی و یەکخستنی ماڵی کورد و تەبایی و برایەتی نێوان پێکهاتەکانی کوردایەتی.
پەرۆشی یەکێتیی نیشتمانیی کوردستان دووپاتدەکەمەوە لە گەشەپێدانی پەیوەندییەکانمان و کارکردنی پێکەوەیی لەپێناو سەرخستنی هەنگاوەکان بۆ هێنانە کایەی حکومڕانییەکی تەندروست و خزمەتگوزار و چارەسەرکردنی کێشەکان و دابینکردنی ژیانێکی شایستەتر بۆ خەڵکە خۆشەویستەکەمان.
هەر شاد و سەربەرزو سەرکەوتووبن
بافڵ جەلال تاڵەبانی سەرۆکی یەکێتیی نیشتمانیی کوردستان
قوباد تاڵەبانی لەگەڵ پارێزگاری کەرکوک و ئەندامانی ئەنجومەنی پارێزگا کۆبووەوە و رایگەیاند؛ ئەم ئیدارە نوێیەی کەرکوک هەڵەی ئیدارەکانی پێشوو دووپات ناکاتەوە و هەوڵی بەهێزکردنی پێکەوەژیانی نێوان پێکهاتەکان دەدات.
لە کۆبوونەوەکەدا جێگری سەرۆکوەزیران پشتیوانی خۆی بۆ ئیدارەی نوێی کەرکوک و ئەنجومەنی پارێزگای کەرکوک دووپاتکردەوە و دەستخۆشی لە پارێزگار و ئیدارەی نوێی کەرکوک کرد کە لە ماوەیەکی کورتدا توانیویانە هەنگاوی زۆر گرنگ بنێن لە خزمەتکردنی هاوڵاتییانی کەرکوک وەک پاککردنەوەی کۆڵان و شەقامەکان و دانانی بەردی بناغەی چەندین پڕۆژەی گرنگ.
قوباد تاڵەبانی ئاماژەیدا بە دۆخی تایبەتی کەرکوک و وتەی سەرۆک مام جەلالی بیرهێنایەوە کە هەمیشە کەرکوکی وەک شاری برایەتی پێناسە دەکرد و رایگەیاند ئەم ئیدارە نوێیەی کەرکوک خۆشبەختانە هەڵەی ئیدارەکانی پێشوو دووپات ناکاتەوە و هەوڵی بەهێزکردنی پێکەوەژیانی نێوان پێکهاتەکان دەدات و بەبێ جیاوازی خزمەتی هەموو کەرکوکییەکان دەکات. هەر لەم چوارچێوەیەدا داوایکرد ئیدارە نوێی کەرکوک رۆژ لە دوای رۆژ بە هەنگاوەکانی لە خزمەتکردنی بێ جیاوازیی هاوڵاتییان زیاتر بیسەلمێنێت کە بە کردار حکومەتی هاوڵاتییانە.
جێگری سەرۆک وەزیران باسی لەوەشکرد کە بەداخەوە لە چەند ساڵی رابردوودا بە هۆکاری جۆراوجۆر وەک پێویست خزمەتی کەرکوک نەکراوە و پڕۆژەی خزمەتگوزاری و وەبەرهێنان لە شارەکە جێبەجێ نەکراوە. جەختیشی کردەوە کە ئەم ئیدارە نوێیەی کەرکوک پێویستە هانی وەبەرهێنەران بدات و ئاسانکارییان بۆ بکات بۆ وەبەرهێنان لە شارەکەدا و هەروەها هەوڵ بدات گرنگی بە سەوزکردن و باشترکردنی دۆخی ژینگەی کەرکوک بدات و پڕۆژەی خزمەتگوزاری زیاتریش لە شارەکەدا جێبەجێ بکات.
هەر لەم چوارچێوەیەدا داوایکرد حکومەتی فیدرال لەرووی دابینکردنی بودجەی پێویستەوە هاوکاری ئیدارەی نوێی کەرکوک بکات.
لە هەردوو کۆبوونەوەکەدا گفتوگۆکرا لەبارەی بڕیارەکەی دادگای فیدراڵی کە بە فەرمی دانی نا بە ئەنجومەنی پارێزگا و ئیدارەی نوێی کەرکوکدا. لەم بارەیەوە قوباد تاڵەبانی داوایکرد ئەو لایەنانەی کە تا ئێستا بایکۆتی پڕۆسەکەیان کردوە، بگەڕێنەوە بۆ ناو ئەنجومەنی پارێزگا و دەنگی ئەو هاوڵاتییانە بگەیەنن کە لە هەڵبژاردنەکاندا دەنگیان پێداون.
وەزارەتی پێشمەرگە پلە بەرزكردنەوەی زیاتر لە هەشت هەزار پێشمەرگەی راگەیاند.
وەزارەتی پێشمەرگەی حكومەتی هەرێمی كوردستان لە فەرمانێكی وزاریدا رایگەیاندوە، پشت بەست بە ماددەی چوای ژمارە 6 ی ساڵی 2011 ی سیستمی راژە و خانەنشینی بڕیاریداوە بە پلە بەرزكردنەوەی فەرمانبەرانی.
لە فەرمانەكەی ئاماژەی بە پلەبەرزكردنەوەی هەشت هەزار و 168 پێشمەرگەی سەر بە دیوانی وەزارەت و لیواكان كردووە.
ئەوەش لەكاتێكدایە، لە حكومەتی هەرێمی كوردستان لە مانگی 1ی ساڵی 2016ەوە پلەبەرزكردنەوەی فەرمانبەرانی راگرت.
توركیا بۆردومانی چەند ناوچەیەكی شاربازێر دەكات و پاسەوانی سنوریش دەڵێت زیانەكانی بۆردومانەكە بەهۆی كەشوهەواوە نەزانراوە.
سەرچاوەیەك لە پۆلیسی پاسەوانی سنور بە كوردسات نیوزی راگەیاند، پێشنیوەڕۆی ئەمڕۆ توركیا بە چڕی بۆردوومانی سنوری ماوەت و گوندی گەڵاڵەی كردووە تا ئێستا زیانەكانی بۆردومانەكە دیار نییە.
كامەران عوسمان؛ لێپرسراوی بەشی مافی مرۆڤی رێكخراوی CPT ئەمریكی رایگەیاندوە؛ لە سەعات 10:47 خولەكی پێشنیوەڕۆ ، فڕۆكە جەنگییەكانی سوپای توركیا بە چڕی بۆردوومانی (دۆڵی ژاژۆلان، كوێرەكانی و كێوی كوڕیس)یان لە دەووروبەری گوندی گەڵاڵەی سەر بە قەزای ماوەت كردوە.
پەیامنێری كورسات لە زاری پاسەوانی سنور ئاماژەی بەوە كردوە هەرچەندە بۆردومانەكانی توركیا لە دەوروبەری گەڵاڵە چڕبوون بەڵام بەهۆی رەوشی كەش و هەواوە ئاستی زیانەكان نەزانراون.
بافڵ جەلال تاڵەبانی؛ سەرۆکی یەکێتیی نیشتمانیی کوردستان بۆ کۆچیدوایی رۆژنامەنووس "وریا حەمەکەریم " پرسەنامەیەکی بڵاوکردەوە و رایگەیاند؛ لەدڵەوە نیگەران و غەمباربووم بە کۆچیدوایی ناوەختی کاک وریا کە لە رووداوێکی دڵتەزێندا گیانی سپارد.
دەقی پرسەنامەکە...
لەدڵەوە نیگەران و غەمباربووم بە کۆچی دوایی ناوەختی رۆژنامەنووس کاک (وریا حەمەکەریم) کە لە رووداوێکی دڵتەزێندا گیانی سپارد.
بۆ ئەم خەمە گەورەیە پرسە و سەرەخۆشی قووڵی خۆمان بە کەسوکار و بنەماڵە و خانەوادە سەربەرز و قوربانی بەخشەکەیان و رۆژنامەنووسان و هاوڕێیانی دەکەم و بەشداریی ماتەمیانم.
لەخوای گەورە داواکارین گیانی رۆژنامەنووسی بە ئەزموون و خۆشەویست کاک وریا بە بەهەشتی بەرین شادبکات، سەبووری و ئارامی بەهەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
بەرەبەیانی ئەمڕۆ لە رووداوێكی هاتوچۆدا رۆژنامەنووس و پێشكەشكار وریا حەمە كەریم و مامۆستایەكی هۆڵی لەشجوانی گیانیان لەدەستدا.
پەیامنێری كوردسات نیوز رایگەیاند، بەیانی ئەمڕۆ بارهەڵگرێك لەسەر رێگای عەربەت-سلێمانی كۆنتڕۆڵی لەدەستدا و خۆی كێشاوە بە دوو ئۆتۆمبێلدا و بەهۆیەوە رۆژنامەنووس و پێشكەشكار وریا حەمەكەریم و ئارام فەتاح مامۆستای هۆڵی لەشجوانی گیانیان لەدەستدا.
پۆلیسی هاتوچۆی عەربەت رایگەیاند، وریا حەمە كەریم ئۆتۆمبێلەكەی وەستاندوە و ویستویەتی هاوكاریی مامۆستا ئارام بكات، لەو كاتە بارهەڵگرێك خۆی بە ئۆتۆمبێلی هەردووكیاندا كێشاوە و گیانیان لەدەستداوە، شۆفێری بارهەڵگرەكەش كە ئێرانییە، بریندار بووە و لە نەخۆشخانەیەكی سلێمانییە.
ئەنجومەنی وەزیرانی هەرێم وەزارەتی سامانە سروشتییەكانیشی راسپارد، لە زووترین كاتدا، هەناردەكردنەوەی نەوتی هەرێم لەلایەن سۆمۆ دەستپێبكاتەوە.
ئەنجومەنی وەزیرانی هەرێمی كوردستان كۆبووەوە، بەپێی راگەیەنراوی كۆبونەوەكەش، لە پێناو گرەنتیكردنی مووچەی سەرجەم مانگەكانی ساڵی 2025 و نەهێشتنەوەی هیچ پاساو و بیانوویەك بۆ رێگری لە جێبەجێكردنی رێككەوتنەكە، بڕیاری پەسەندكردنی سەرجەم ئەو پێشنیازانە دراوە كە لە كۆبوونەوەكەدا خراونەتەڕوو.
هەر لە كۆبوونەوەكەدا بڕیاریدا بە پەسەندكردن و پابەندبوونی بە میلاكی سەرجەم مووچەخۆرانی هەرێم بۆ ساڵی 2025 بەپێی ئەو ژمارە و خەرجییانەی لە كۆبوونەوەكە خرانەڕوو، بڕیاریشدرا بە پەسەندكردنی رێكاری گواستنەوەی خانەنشینانی پێشمەرگە و سەربازیی و هێزەكانی ئاسایشی ناوخۆ و شایستەكانی كەسوكاری شەهیدان و ئەنفالكراوان بۆ سەر بەڕێوەبەرایەتی گشتیی خانەنشینی لە وەزارەتی دارایی هەرێم.
ئەنجومەنی وەزیران وەزارەتی سامانە سروشتییەكانیشی راسپارد، لە پەیوەندی بەردەوامدا بێت لەگەڵ وەزارەتی نەوتی عیراق و كۆمپانیای سۆمۆ و كۆمپانیا نەوتییە بەرهەمهێنەرەكان لە هەرێم، تا لە زووترین كاتدا، هەناردەكردنەوەی نەوت لە لایەن سۆمۆوە دەستپێبكاتەوە و داهاتەكەشی بخرێتەوە خزمەتی خەزێنەی گشتیی عیراق.
وەزارەتی دارایش راسپێردرا، بە ناردنی بەشی گەنجینەی عیراق لە داهاتی ناوخۆ بۆ مانگی یەكی ئەمساڵ بۆسەر ئەژماری وەزارەتی دارایی عیراق لە چەند ڕۆژی داهاتوودا.
قوباد تاڵەبانی، جێگری سەرۆکوەزیران پێشوازیکرد لە ئەرمان تۆپجو، کونسوڵی گشتیی تورکیا و لە کۆبوونەوەی نێوانیاندا چەند پرسێکی جێی بایەخی هەردوولا تاوتوێ کران.
لە بەشێکی کۆبوونەوەکەدا کە ئەمڕۆ چوارشەمە لە هەولێر بەڕێوەچوو، لەبارەی دواگۆڕانکارییە سیاسی و ئەمنییەکانی ناوچەکەوە ئاڵوگۆڕی بیروڕا کرا، تیایدا قوباد تاڵەبانی جەختی کردەوە؛ پێویستە هەموو لایەنەکانی ناوچەکە بەرپرسیارانە هەنگاو بنێن.
لە تەوەرێکی دیکەدا باسی دۆخی هەرێمی کوردستان و گفتوگۆکانی پێکهێنانی حکومەتی نوێی هەرێم کرا. جێگری سەرۆکوەزیران ئاماژەی بە گفتوگۆکانی یەکێتی و پارتی-دا و روونی کردەوە؛ تیمە تەکنیکییەکان گفتوگۆکانیان تەواو کردەوە و بەهیواین لە ماوەیەکی نزیکدا بگەنە رێککەوتن بۆ پێکهێنانی حکومەتێک کە لە ئاستی چاوەڕوانی هاوڵاتییانی هەرێمدابێت.
سەبارەت بە پەیوەندییەکانی نێوان هەرێم و بەغداش، قوباد تاڵەبانی ئاماژەی بەوەدا بۆ چارەسەرکردنی ریشەیی کێشە داراییەکان، هەنگاوی زۆر باش نراوە و لە دوای پەسەندکردنی هەمواری یاسای بودجەش، زەمینەی لەبار دروست بووە بۆ چارەسەرکردنی کێشە و ناکۆکییەکانی دیکەی نێوان هەرێم و بەغدا.
لای خۆیانەوە، کونسوڵخانەی تورکیا لە تۆڕی کۆمەڵایەتیی ئێکس، سەبارەت بە دیدارەکە بڵاوی کردەوە، لەگەڵ بەڕێز قوباد تاڵەبانی، جێگری سەرۆکی ئەنجوومەنی وەزیرانی حکومەتی هەرێمی کوردستانی عێراق کۆبووینەوە و گفتوگۆمان لەسەر پێشهاتە گرنگەکان کرد".
بەڕێوەبەرایەتی گشتی كەشناسی و بومەلەرزەزانی هەرێم رایگەیاند، لە سبەینێوە شەپۆلێكی باران و بەفر ناوچەكانی هەرێمی كوردستان دەگرێتەوە.
بەڕێوەبەرایەتی گشتی كەشناسی و بومەلەرزەزانی لەڕاگەیەندراوێكدا بڵاویكردەوە، لە ئەمشەوەوە كاریگەری شەپۆڵێكی بارانبارین لەسەر هەرێمی كوردستان دەستپێدەكات و سەرەتا لە سنوری پارێزگای دهۆك و بەشێك لەناوچە شاخاوییەكان دەبێت.
پاشان كاریگەری ئەو شەپۆڵە بەلاوازی درێژ دەبێتەوە بۆ سەرجەم ناوچە جیاجیاكان بە نمە بارانی پچڕپچڕ و بارینی بەفرێكی كەم لەناوچە سنورییەكان.
كەشناسی راشیگەیاندووە، لە درەنگانی ئەمشەوەوە شەپۆلی بارانبارین زیاد دەكات و سبەینێ بە درێژایی كاتەكان باران دەبارێت، هەروەها شەپۆڵێكی بەفربارین سەرجەم ناوچە شاخاوییەكان دەگرێتەوە.
هەر بەپێی راگەیەندراوەكەی كەشناسی، كاریگەری ئەو شەپۆلە لە رۆژی هەینییەوە لاواز دەبێت بەڵام پلەكانی گەرما هەر بەنزمی دەمێنێتەوە .
ئەنجومەنی باڵای دادوەری عیراق بریارەكەی دادگای فیدراڵی سەبارەت بە راگرتنی جێبەجێكردنی سێ یاسا رەتدەكاتەوە .
بەپێی راگەیەندراوێكی ئەنجومەنی باڵای دادوەری عیراق، لە كۆبونەوەی ئەمڕۆی ئەنجومەنەكەدا تاوتوێی بڕیارەكەی دادگای فیدراڵی كراوە سەبارەت بە راگرتنی جێبەجێكردنی یاساكانی "گەڕاندنەوەی موڵك و ماڵ بۆ خاوەنەكانیان و باری كەسێتی و لێبوردنی گشتی"، ئەنجومەنەكە رایگەیاندووە كە دەبێت هەر تانەیەك كە لە یاسایەك دەدرێـت، دوای بڵاوكردنەوەی یاساكە بێت لە رۆژنامەی رەسمی دەوڵەت، بەڵام ئەو سێ یاسا لە رۆژنامەی رەسمی بڵاونەكراونەتەوە و دادگای فیدراڵی رایگرتوون.
ئەنجومەنەكە راشیگەیاندووە، بەپێی ماددەی 129 لە دەستوری عیراقی، نابێت هیچ یاسایەك كە بەڵگە لەسەر نادەستوری بوونی نەبێت رابگیرێت.
هەربۆیە ئەنجومەنی دادوەری جەخت دەكاتەوە لەوەی، دەبێـت دادگای فیدراڵی پابەند بێت بە جێبەجێكردنی ئەو یاسایانەوە.
حكومەتی هەرێمی كوردستان رەزامەندی دەربڕی بە نوێكردنەوەی مینحەی هەزار و 500 مامۆستایانی ئاینی خۆبەخش بۆ ساڵی 2025 و داواكارییەكەیانی بۆ بوون بە گرێبەست قبوڵ نەكرد.
بەپێی نوسراوێكی وەزارەتی دارایی و ئابوری هەرێم كە بە دەست كوردسات نیوز كەوتووە، تێیدا هاتووە كە حكومەتی هەرێم رەزامەندی دەربڕیوە لەسەر نوێكردنەوەی مینحەی هەزار و 500 مامۆستای ئاینی خۆبەخش وەك پێش نوێژ و وتارخوێن.
هەر لە نوسراوەكەدا هاتووە، ئەو مامۆستا ئاینیە خۆبەخشانە بۆ ماوەی یەك ساڵی تر مانگانە 250 هەزار دیناریان بۆ خەرج دەكرێت.
لە ماوەی رابردوودا مامۆستایانی ئاینی خۆبەخش چەندین جار گردبوونەوەیان كرد و داوایان كرد وەك مامۆستایانی وانەبێژ ئەمانیش بكرێن بە گرێبەست، بەڵام حكومەتی هەرێم داواكەی قبوڵ نەكردن و وەك ساڵی رابردوو مینحەی بۆ بڕینەوە.
خانمی یەکەم دوپاتیکردەوە لەسەر پەیرەوکردنی سیاسەتێکی ڕوون کە زامنی پاراستنی مافی کەمینەکان بکات.
شاناز ئیبراهیم ئەحمەد خانمی یەکەمی عیراق پێشوازیکرد لە وەفدی باڵای کڵێساکان هەریەکە لە قەشە نیک بەینز و قەشە سام کۆرلی لە کڵێساکانی بریتانیا و ئۆتۆ مێرسیس قەشەی کڵێسا لە نەرویژ و نوێنەرانی ڕێکخراوی هاوپشتی مەسیحی.
لە میانی دیدارەکەدا خانمی یەکەم ئاماژەیکرد بە مێژووی پێکەوەژیانی ئاشتیانە لە کۆمەڵی عێراقدا کە رێچکەیەکی جیاوازی هاوبەشی نیشتمانی و چارەنووسی هاوبەشە بە جەختکردنەوە لەسەر پێویستی داڕشتنی پلانێکی ستراتیژی بۆ ئاوەدانکردنەوەی ئەو شار و گوندانەی کە زێدی ڕەسەنی مەسیحییەکانن و ئامادەکردنیان بۆ دڵنیابوون لە گەڕانەوەی ژیان بۆیان، جگە لە ڕەخساندنی دەرفەتی کار کە دەبێتە مایەی سەقامگیری بۆ ئەم پێکهاتە گرنگەی وڵات . هاوکات خانمی یەکەم دوپاتیکردەوە لەسەر پەیرەوکردنی سیاسەتێکی ڕوون کە زامنی پاراستنی مافی کەمینەکان بکات و دەستەبەری بەدیهێنانی پرەنسیپ و دەرفەتی یەکسان بکات.
لای خۆیەوە وەفدەکە ستایشی ئەو ڕۆڵە دیارەی خانمی یەکەمی کرد کە لە بوارەکانی مرۆیی و ڕۆشنبیریدا بینیویەتی، پێزانینی خۆیان بۆ ڕوونکردنەوەکانی دەربڕی سەبارەت بە چۆنیەتی پشت بەستن بە گفتوگۆ و کاری ئەرێنی لەنێوان ئایینەکاندا.
لە کۆبوونەوەکەدا، مەریوان نەقشبەندی نوێنەری وەزارەتی ڕۆشنبیری هەرێمی کوردستان و خالید جەمال بەڕێوەبەری گشتیی کاروباری مەسیحییەکان لە حکومەتی هەرێمی کوردستان و خاتوو ئاوات حوسام الدین نوێنەری ئایینی زەردەشتی ئامادەی بون.
ئەنجومەنی وەزیرانی هەرێمی كوردستان كۆدەبێتەوە و رێكحستنەوەی میلاكی دامودەزگاكان و رێكخستنەوەی داهاتی ناوخۆ و خەرجی تاوتوێ دەكات.
پەیامنێری كوردسات نیوز لە هەولێر رایگەیاند، ئەمڕۆی ئەنجومەنی وەزیرانی هەرێمی كوردستان كۆدەبێتەوە و رێكخستنەوەی بارای دارایی و داهات و خەرجییەكان و میلاكات تاوتوێ دەكات، ئەوەش لەبەر رۆشنایی دوایین رێككەوتنی هەرێم و بەغداد. هەروەها ئەنجومەنی وەزیران كاردەكات بۆ پەسەندكردنی پەیڕەوی لیستی مووچە بەشێوەی ئەلیكترۆنی و تەرازووی پێداچوونەوەی مانگانە.
وتیشی لە تەوەرێكی تردا پەسەندكردنی میلاكی سەرجەم مووچەخۆرانی حكومەتی هەرێم بۆ ساڵی 2025 و پەسەندكردنی رێكاری گواستنەوەی خانەنشینانی پێشمەرگە و سەربازی و شایستەكانی كەسوكاری شەهیدان و ئەنفالكراوان بۆ سەر بەڕێوەبەرایەتی گشتی خانەنشینی وەزارەتی دارایی و ئابووری گفتوگۆی لەبارەە دەكرێت.
لە بڕگەی كۆتایی كۆبوونەوەكەشدا رێكخستنەوەی داهاتی ناوخۆ و بەشی وەزارەتەكان لە داهات و ناردنی بەشی گەنجینەی فیدراڵ بۆ مانگی كانوونی دووەم بڕیاری لەبارەوە دەدرێت.
بڕی 100 هەزار لە موچەی بەشێك لە خانەنشینانی هەرێم بڕدراوە، بەڕێوەبەری خانەنشینی سلێمانیش دەڵێت چاوەڕێی بڕیارێكی سودانین بۆ گەڕانەوەی بەو بڕە پارەیە.
ژیان سابیر بەڕێوەبەری خانەنشینی سلێمانی بە كوردسات نیوزی راگەیاند، بڕی 100 هەزار دینار لە موچەی ئەو خانەنشینانەی موچەكەیان خوار ملیۆنە بڕدراوە. وتیشی ئەو 100 هەزار وەك دەرماڵەی ژیان لە لایەن سەرۆك وەزیرانی عیراق بۆ خانەنشیان بڕدراوەتەوە، بەڵام بەپێی بڕیارەكە تەنها خانەنشینانی پارێزگاكانی عیراق دەگرێتەوە و هەرێم ناگرێتەوە و چەند مانگە بە هەڵە دراوە بە خانەنشینانی هەرێم.
سەبارەت بە گەڕانەوەی ئەو 100 هەزارە، بەڕێوەبەری خانەنشینی سلێمانی رایگەیاند، دەبێت سودانی ئیمزای بكات تاكو خانەنشینانی هەرێمیش بگرێتەوە، ئەگەر نا ئەو دەرماڵەیە بە تەواوەتی دەبڕدرێت.
وەزارەتی دارایی هەرێم خشتەی موچەی مانگی یەكی موچەخۆرانی بڵاوكردەوە و ئاماژەی بەوەکرد، تاكو دووشەممەی داهاتوو موچەی سەرجەم وەزارەتی و دامەزراوەكان دابەشدەكرێت.
راگەیاندنی وەزارەتی دارایی و ئابووری هەرێم لە راگەیەنراوێکدا رایگەیاند، رۆژی چوارشەممە پێنجی شوباتی 2025، دابەشکردنی موچە بە خانەنشینانی شارستانی دەستپێدەکات
راشیگەیاند، رۆژی دووشەممە 10ـی شوباتی 2025، دابەشکردنی موچە کۆتاییدێت.