گروپی کۆمپانیاکانی IQ هەڵمەتێکی گەورەی بەخشین و هاوکاری مرۆیی  بۆ زیان لێکەوتوانی لافاوەکەی چەند رۆژی رابردوی سنوری چەمچەماڵ راگەیاند، وەک پاڵپشتیەکیش کۆمپانیاکە 100 ملیۆن دیناری عیراقی وەک هاوکاری دەداتە زیانلێکەوتوەکان.

گروپی کۆمپانیاکانی IQ رایگەیاندوە، بۆ بەهاناوەچوونی ئەو خێزانانەی بەهۆی باران بارینی بەخوڕ و لافاوی توندی رۆژانی رابردوو زیانێکی زۆریان پێگەیشتووە، بە تایبەتی لە ناوچەکانی چەمچەماڵ و تەکیە، هەڵمەتێکی گەورەی بەخشین و هاوکاری مرۆیی رادەگەیەنێت.

ئاماژەیان بەوەکردوە، بڕیاردانی پشتیوانی دارایی بۆ زیانلێکەوتوان و هەڵمەتی هاوکاری بۆیان،  لەسۆنگەی هەستکردنە بە بەرپرسیارێتی نیشتمانی، کۆمەڵایەتی و مرۆیی بەرانبەر پایتەختی شەهیدان و ئەنفالکراوان، تا یارمەتیدەر بێت لە گێڕانەوەی ژیان بۆ زیانلێکەوتوان و کەمکردنەوەی نەهامەتی و قورساییەکانی ژیانی دانیشتووانی سەربەرزی چەمچەماڵ و تەکیە.

لای خۆیەوە ئاسۆز رەشید، بەڕێوەبەری جێبەجێکاری گروپی کۆمپانیاکانی iQ رایگەیاند؛  گرووپی کۆمپانیاکانی iQ بڕی 100 ملیۆن دیناری عیراقی تەرخان دەکات بۆ پشتیوانیکردن لە خێزانە زیانلێکەوتووەکان، بۆ دابینکردنی پێداویستیە سەرەکییەکانی ژیان و یارمەتیدان لە تێپەڕاندنی ئەم رەوشە سەختەدا، بە هیوای ئەوەی ئەم هاوکارییە ببێتە هۆکاری کەمکردنەوەی ئازار و خەمەکانی ئەم خێزانانە.

قوباد تاڵەبانی رایگەیاند، جارێکیتر دووپاتی دەکەنەوە دڵیان لای یەکە بە یەکەی زیانلێکەوتووان و خەڵکی ئازیزی چەمچەماڵ و دەوروبەرییەتی، جەختیشیکردوەتەوە، دڵنیایی دەداتە هەموویان، کە  قەرەبوو دەکرێنەوە.

قوباد تاڵەبانی، جێگری سەرۆک وەزیرانی هەرێم رایگەیاند، بۆ جاری دووەم سەردانی چەمچەماڵی ئازیزیان کردوە، بە مەبەستی دەربڕینی هاوخەمی لەگەڵ خانەوادە و کەسوکاری سەربەرزی شەهید ئاکۆ سابیر و  بە دواداچونیش بۆ ئەو لیژنانەی لە دوای روداوی لافاوەکەو پێکهێندراوبوون.

 ئاماژەی بەوەشکردوە؛ جێی دەستخۆشی و پێزانینە، کە یەکەی فریاکەوتنی خێرا بە هاوکاریی خەڵکی خێرخواز و خۆبەخش و سەرمایەدارەکان و هەموو لایەنە پەیوەندیدارە حکومییەکان تا رادەیەکی باش توانیویانە خزمەتی زیانلێکەوتووان بکەن و بەردەوامن لە جێبەجێکردنی ئەرکەکەیان.

دڵنیایشیداوە بە خەڵکی چەمچەماڵ و دەروبەری، لە ئەمڕۆ بە دواشەوە هەروەک رۆژانی پێشوو سات بە سات لەگەڵ لیژنەکە بەردەوام دەبن تا ئەو کاتەی هەموو زیانلێکەوتووان بە تەواوی قەرەبوو دەکرێنەوە و بۆ ئەم مەبەستەش هەموو سەرچاوە داراییەکان بەکاردەهێنن.

قوباد تاڵەبانی سوپاسی ئەندامانی کۆمیسیۆنی لێکۆڵینەوەش دەکات کە لە چەند رۆژی رابردوودا بە شێوەیەکی زانستی لێکۆڵینەوەیان لە روداوەکە و کەمتەرخەمییەکان و چۆنییەتی رێگریکردن لە دووبارەبوونەوەی روداوی هاوشێوە لە داهاتوودا کردووە.

ئەوەشیخستوەتەڕوو، بەپێی ئەنجامی لێکۆڵینەوەکان هەر یەکە لە قائیمقامی چەمچەماڵ، سەرۆکی شارەوانیی چەمچەماڵ، سەرۆكی شارەوانیی ناحیەی شۆڕش و بەڕێوەبەری پەروەردەی چەمچەماڵ لە پۆستەکانیان بەخشران و بەڕێوەبەری ناحیەی شۆڕشیش کە ئامادەنەبوو داوای بەخشین بکات، بەڵام بەپێی راپۆرتی کۆمیسیۆن کەمتەرخەم بووە و  لێپرسینەوەی لەگەڵدا دەکرێت.

جێگری سەرۆک وەزیرانی هەرێم، سوپاسی  هاوسۆزی و هاوخەمیی هەموو خەڵکی کوردستان دەکات، کە هەر کەس بەپێی توانای دارایی خۆی یارمەتی زیانلێکەوتووانی کردووە و دەشڵێت؛ ئەم هەستی هاوسۆزی و هاوکارییەی لەکاتی کارەسات و ناخۆشیدا هەیە، گەورەترین سەرمایەی نیشتمانییە و جێی شانازی و سەربەرزی و لە هەمان کاتیشدا ساڕێژکەرەوەی برینەکانە.

بەڕێوەبەرایەتیی گشتیی بەرگریی شارستانیی هەرێمی کوردستان دۆزینەوەی تەرمێکی لە نزیک گوندی ئیستریان لەسەر زێی گەورە راگەیاند و ئاماژەی بەوەکردوە، تیمی پسپۆڕ پێکهێنراوە بەمەبەستی زانینی چارەنوسی تەرمەکە.

ئەمڕۆ یەکشەممە، دوای دۆزینەوەی تەرمێک لە زێ بچوکدا، بەڕێوەبەرایەتیی گشتیی بەرگریی شارستانیی هەرێمی رایگەیاند،  لەسەر فەرمانی وەزیری ناوخۆ تیمێکی هاوبەشی تەندروستی هەولێر و پزیشکی دادی و بەرگری شارستانی و بەڵگەکانی تاوان پێکهێندراوە.

دەشڵێن؛ فەرمانیان پێ کراوە تەرمەکە بە شێوەیەکی زانستی هەڵبگرنەوە و بۆ پشکنین و وەرگرتنی نمونەی DNA و بۆ دیارکردنی چارەنووسی تەرمەکە دەهێندرێتەوە هەولێر.

بەرگریی شارستانیی هەرێمی داواش لە راگەیاندنەکان دەکات چاوەڕوانی لێدوانی رەسمی بن لەسەر چارەنوسی تەرمەکە. 

ئەمە لە کاتیكدایە بە گوێرەی ئەو وێنانەی بڵاوکراوەتەوە، ئەو تەرمە رەنگە تەرمی مامۆستا ئاڤێستا بێت، کە لە گەشتێکی سەیراندا، لەگەڵ خێزانەکەی لە رۆژی 5ی نیسانی ئەمساڵ کەوتە ناو روباری تەنگاتوور لە قەزای مێرگەسۆر لە ئیدارەی سەربەخۆی سۆران و دوای گەڕانێکی زۆر نەتوانرا تەرمەکەی بدۆزرێتەوە.

قوباد تاڵەبانی رایگەیاند، وەک هەستکردن بە بەرپرسیاریەتی چوار لێپرسراوی چەمچەماڵ و ناحیەی شۆرش داوای بەخشینیان کردوە لە پۆستەکانیان و ئەویش پەسەندی کردوە، ناوبراو جەختیکردەوە بەڵێن بە خەڵکی چەمچەماڵ دەدات کە تەواوی سەرچاوە داراییەکان دەخەنەگەڕ بۆ ئەوەی هەموویان قەرەبو بکرێنەوە.

ئەمڕۆ یەکشەممە قوباد تاڵەبانی، جێگری سەرۆک وەزیرانی هەرێم، لە کۆنگرەیەکی رۆژامەوانیدا لە چەمچەماڵ رایگەیاند، بەپێی دەرئەنجامی راپۆرتی لیژنەکان لەسەر روداوی لافاوەکەی چەمچەماڵ و دەوروبەری وەك پێویست ئامادەكاری نەكرابوو بۆ کارەساتەکە و دەكرا كاربكرایە زیانەكانی ئەو كارەساتە سروشتییە كەمبكرایەتەوە .

قوباد تاڵەبانی رایگەیاند، دەستلەکارکێشانەوەی قائیمقامی چەمچەماڵ و سەرۆکی شارەوانییەکانی چەمچەماڵ و شۆرشی پەسەند کردوە، بەڕێوەبەری ناحیەی شۆرشیش بە گوێرەی لێکۆڵینەوەکان کەمتەرخەمبوە، بەڵام ئەو رەتیکردوەتەوە دەست لەکاربکێشیتەوە  و لێکۆڵینەوەی لەگەڵدا دەکرێت.

لە وەڵامی رۆژنامەنوسانیشدا، کە کێ لە شوێن ئەو کەسانە دادەنرێت کە دەستیان لە کارکێشاوەتەوە، ناوبراو رایگەیاند، بە زوترین کات کەسی شیاو لە شوێنیان دادەنرێت و پۆستەکانیان پڕدەکرێتەوە.

لەبارەی قەرەبوکردنەوەی زیانەکانیشەوە، قوباد تاڵەبانی دڵنیای دایە خەڵکی چەمچەماڵ، وەک حکومەت  هەموو سەرچاوە داراییەکان بەکاردەهێنن بۆ قەرەبوکردنەوەیان و هەموویان قەرەبوو دەکرێنەوە، جەختیکردەوە دەبێت هەمووان دەست لەناودەست، وەک یەک تیم كاربكەن بۆ خەڵكی چەمچەماڵ. 

بەڕێوەبەرایەتی هاتوچۆی چەمچەماڵ رایگەیاند؛ بەمەبەستی پشکنین بۆ ئۆتۆمبێلە زیانلێکەوتوەکان،  سبەینێ تیمێکی بەرێوەبەرایەتی هاتوچۆی سلێمانی سەردانی چەمچەماڵ دەکەن، بۆ دیاریکردنی رێژەی ئەو زیانانەی بەر ئۆتۆمبێلەکان کەوتوە بە مەبەستی قەرەبوکردنەوەیان.

ئەمڕۆ یەکشەممە، بەڕێوەبەرایەتی هاتوچۆی چەمچەماڵ ئاگاداری سەرجەم ئەو خاوەن ئۆتۆمبێلانە دەکات، کە بەهۆی لافاوەکەی رۆژانی رابردوەوە، ئۆتۆمبێلەکانیان زیانی بەرکەوتوە، سبەینێ تیمێک دێت بۆ پشکنین و دیاریکردن رێژەی زیانەکان.

هاتوچۆی چەمچەماڵ، داوا لە سەرجەم خاوەن ئۆتۆمبێلە زیانلێکەوتوەکان دەکات، لەبەردەم ماڵی خۆیان ئۆتۆمبێلەکان ئامادەبکەن، بۆ ئەوەی پشکنینیان بۆ بکرێت و رێژەی زیانەکان دیاری بکرێت،  بە مەبەستی قەرەبووکردنەوەیان.

ئاماژەیان بەوەشکردوە، سبەینێ تیمەکان تەنها سەردانی ئەو ئۆتۆمبێلانە دەکەن، کە دانیشتووی ناو چەمچەماڵن، رۆژانی دواتر سەردانی ناحیەی شۆرش و تەکیەش دەکەن، سەردانەکانیش بەردەوام دەبێت، تا سەرجەم ئۆتۆمبیلەکان زیانلێکەوتوەکان دەپشکنن.

قوباد تاڵەبانی، جێگری سەرۆکی حکومەتی هەرێمی کوردستان، بەمەبەستی لە نزیکەوە ئاگاداربوون لە زیانەکانی لافاوەکەی چەند رۆژی رابردوو و چۆنیەتیی بەهاناوەچوونی زیانلێکەوتووان، لەگەڵ كۆمیسیۆنی فریاگوزاریی چەمچەماڵ و بەڕێوەبەری یەكە ئیدارییەكانی شارۆچكەكە لە کۆبوونەوەدایە.

کۆبوونەوەکە لە چوارچێوەی هەوڵەکانی حکومەتی هەرێمە بۆ هەڵسەنگاندنی ئەو زیانە ماددییە زۆرانەی کە بەهۆی لافاوەکەوە بەر ماڵ و موڵکی هاووڵاتیانی چەمچەماڵ کەوتووە.

بڕیارە لە کۆبوونەوەکەدا، جێگری سەرۆکی حکومەت گوێ لە راپۆرتی لیژنەکە و یەکە ئیدارییەکان بگرێت سەبارەت بە قەبارەی زیانەکان و ئەو پێداویستییە بەپەلانەی کە زیانلێکەوتووان هەیانە.

ئەم کۆبوونەوەیە لەکاتێکدایە کە دوای دروستبوونی لافاو لە قەزاکە، "کۆمسیۆنی فریاگوزاری و بوژانەوەی چەمچەماڵ" پێکهێنرا بۆ رێکخستنی پرۆسەی کۆکردنەوە و دابەشکردنی هاوکارییەکان بەسەر لێقەوماواندا.

کۆمسیۆنی فریاگوزاری و بوژانەوەی چەمچەماڵ، کردنەوەی ژمارە حسابی بانکیی تایبەتی بۆ کۆکردنەوەی کۆمەک و هاوکاری بۆ زیانلێکەوتووانی لافاوەکەی چەمچەماڵ راگەیاند.

لە راگەیەندراوێکدا، کۆمسیۆنەکە داوا لەئەو کۆمپانیا و هاووڵاتیان دەکات کە دەیانەوێت هاوکاریی خەڵکی لێقەوماوی چەمچەماڵ بکەن، لە رێگەی ئەم ژمارە حسابانەی خوارەوە هاوکارییەکانیان بگەیەنن:

• بانکی (FIB): هاوکارییەکانتان دەتوانن لە رێگەی ژمارە مۆبایلی 07701594561 بنێرن کە حسابی بانکیی (FIB) لەسەر کراوەتەوە.

• بانکی چەرمۆ (بۆ پارەی کاش):

  • حسابی دینار: ژمارە 3018

  • حسابی دۆلار: ژمارە 1

کۆمسیۆنەکە جەختدەکاتەوە کە ئەم رێگایانە بۆ دڵنیابوونە لە گەیشتنی هاوکارییەکان بە شێوەیەکی رێکخراو و شەفاف بە دەستی زیانلێکەوتووان.

حکومەتی عیراق گوژمەیەکی دیکەی شایستەی دارایی جوتیارانی هەرێمی کوردستانی رەوانە کرد و بڕیارە دوای تەواوبوونی رێکارەکان بەسەر جوتیاراندا دابەشبکرێت.

نەسرین ئەحمەد، بەڕێوەبەری سایلۆکانی سلێمانی، بە کوردسات نیوزی راگەیاند، حکومەتی عیراق سێهەمین گوژمەی پارەی گەنمی جوتیارانی هەرێمی رەوانە کردووە کە بڕەکەی 24 ملیار و 250 ملیۆن دینارە.

وتیشی، "پارەکە نێردراوە، تەنها رێکارە تەکنیکی و کارگێڕییەکان ماون بۆ ئەوەی بەسەر جوتیاراندا دابەشبکرێت."

شێوازی دابەشکردنی پارەکە:

بەڕێوەبەری سایلۆکانی سلێمانی ئاماژەی بەوەشکرد، لەو بڕە پارەیە:

• 9 ملیار و 500 ملیۆن دینار بۆ جوتیارانی سلێمانییە.

• 7 ملیار و 750 ملیۆن دینار بۆ جوتیارانی هەولێرە.

• 7 ملیار دینار بۆ جوتیارانی دهۆکە.

حکومەتی عیراق تا ئێستا سێ گوژمە پارەی گەنمی جوتیارانی رەوانەی هەرێم کردووە، بەڵام هێشتا زیاتر لە 250 ملیار دیناری دیکەی شایستەی دارایی جوتیاران ماوە کە لەلایەن بەغدادەوە رەوانە بکرێت.

ئەمساڵ حکومەتی عیراق 400 هەزار تۆن گەنمی لە جوتیارانی هەرێم وەرگرت و نرخی هەر تۆنێکی بە 850 هەزار دینار دیاریکردبوو.

بەڕێوەبەرایەتیی گشتیی کەشناسی و بومەلەرزەزانیی هەرێم، پێشبینییەکانی بۆ کەشوهەوای 48 سەعاتی داهاتوو بڵاوکردەوە و رایگەیاند، ئەمڕۆ لە ناوچە شاخاوییە سنورییەکان ئەگەری بەفربارین هەیە و سبەینێش پلەکانی گەرما بەرزدەبنەوە.

بەپێی راگەیەندراوێکی کەشناسی، ئەمڕۆ یەکشەممە، ئاسمان بەگشتی نیمچە هەور دەبێت و لە ناوچە جیاجیاکاندا تەم دروست دەبێت، ئەمەش دەبێتە هۆی کەمبوونەوەی مەودای بینین.

کەشناسی ئاماژەی بەوەشکردووە، لەدوای نیوەڕۆی ئەمڕۆوە لە هەندێک ناوچەی شاخاویی سنوریی ئەگەری بەفربارین و لە ناوچە شاخاوییە بەرزەکانیش ئەگەری نمەباران هەیە.

سبەینێ پلەکانی گەرما بەرزدەبنەوە:

سەبارەت بە کەشوهەوای سبەینێ دووشەممە، پێشبینی دەکرێت ئاسمان ساماڵ و پەڵە هەور بێت و لە کاتەکانی بەیانیدا ئەگەری دروستبوونی تەم لە ناوچە شاخاوییەکاندا هەیە.

هەروەها پلەکانی گەرما بەراورد بە ئەمڕۆ بە (1 بۆ 2) پلەی سیلیزی بەرزدەبنەوە.

بەرزترین پلەکانی گەرمای پێشبینیکراو بۆ ئەمڕۆ بەم شێوەیە دەبن:

• هەولێر: 13 پلە

• سلێمانی: 12 پلە

• دهۆک: 11 پلە

• کەرکوک: 14 پلە

• هەڵەبجە: 12 پلە

• گەرمیان: 15 پلە

• سۆران: 9 پلە

• زاخۆ: 13 پلە

• ئاکرێ: 13 پلە

• ئامێدی: 8 پلە

بەڕێوەبەرایەتیی گشتیی کشتوکاڵی هەڵەبجە، نوێترین ئاماری بارانبارینی لە سنوری پارێزگاکەدا بڵاوکردەوە و بەپێی ئامارەکە، کۆی گشتیی بارانبارینی ئەمساڵ لە زۆربەی ناوچەکاندا لەچاو ساڵی رابردوو زیادیکردووە.

بەپێی ئەو خشتەیەی کە ئەمڕۆ، لەلایەن هۆبەی کەشناسیی بەڕێوەبەرایەتیی گشتیی کشتوکاڵی هەڵەبجەوە بڵاوکراوەتەوە، لە ماوەی 24 سەعاتی رابردودا لە تەواوی ناوچەکانی هەڵەبجە، سیروان، خورماڵ، بیارە و تەوێڵە باران باریوە.

ئاماری بارانبارین لە 24 سەعاتی رابردودا:

• بیارە: 5.7 ملم

• هەڵەبجە: 5.5 ملم

• خورماڵ: 5.5 ملم

• سیروان: 5.0 ملم

• تەوێڵە: 4.6 ملم

کۆی گشتیی بارانبارینی ئەمساڵ بەراورد بە پارساڵ:

ئامارەکە دەریدەخات کە کۆی گشتیی بارانبارینی ئەمساڵ تا ئەم بەروارە، لە ناوچەکانی هەڵەبجە، سیروان و بیارە زیاتر بووە بەراورد بە هەمان کات لە ساڵی رابردودا. زۆرترین رێژەی بارانبارینی ئەمساڵیش لە سیروان تۆمارکراوە کە 263.1 ملم بووە.

• سیروان: ئەمساڵ 263.1 ملم | پارساڵ 188.2 ملم

• بیارە: ئەمساڵ 259.0 ملم | پارساڵ 253.3 mلم

• هەڵەبجە: ئەمساڵ 239.4 ملم | پارساڵ 213.4 ملم

• خورماڵ: ئەمساڵ 220.5 ملم | پارساڵ 227.1 ملم

• تەوێڵە: ئەمساڵ 211.3 ملم | پارساڵ 247.9 ملم

لە بەرانبەردا، لە هەردوو ناوچەی خوڕماڵ و تەوێڵە، رێژەی بارانبارینی ئەمساڵ بە بەراورد بە ساڵی رابردوو کەمیکردووە.

ئەندامێكی مەكتەبی سیاسی یەكێتی جەخت لە یەكڕیزیی لایەنە كوردییەكان دەكاتەوە و رایدەگەیەنێت، كلیلی بەدەستهێنانی مافەكان بوونی پرۆژەیەكی هاوبەشە.

سەعدی ئەحمەد پیرە، ئەندامی مەكتەبی سیاسی یەكێتیی نیشتمانیی كوردستان رایگەیاند، بە ئامادەكردنی پرۆژەی هاوبەش و یەكگرتووی كورد لە هەولێر و بەغداد، دەتوانن زۆرترین دەستكەوت بۆ بەدەست بهێنن و پێگەی كورد بەهێزتر بكەن.

ئەو ئەندامەی مەكتەبی سیاسیی یەكێتی هۆشداریشیدا، ئەگەر كورد یەكگرتوو نەبێت و بە یەك پرۆژەوە نەچێتە بەغداد ئەوا مەترسیی ئەوە هەیە زۆرێك لە دەستكەوت و مافەكانی كورد هەرێم و عیراقیش لەدەستبچن.

وەزیری خوێندنی باڵا و توێژینەوەی زانستی بڕیاریدا بە لێخۆشبوون لە تەواوی کرێی خوێندنی خوێندکارانی چەمچەماڵ و دەوروبەری بۆ ساڵی خوێندنی 2025-2026، ئەوەش وەک هاوخەمییەک بۆ زیانلێکەوتووانی ناوچەکە.

د. ئارام محەمەد قادر، وەزیری خوێندنی باڵا و توێژینەوەی زانستی بە ئیمزای خۆی بڕیارەکەی دەرکردووە و ئاماژەی بەوەداوە، لەپێناو بەشداریکردن لە خەمی خەڵکی چەمچەماڵ و بەدەنگەوەهاتنی خوێندکارەکانیان بەهۆی ئەو کارەساتە سروشتییەی روویکردووەتە ناوچەکە، بڕیاردراوە بە لێخۆشبوون لە پارەی کرێی خوێندن بۆ دانیشتووانی قەزاکە.

بەپێی بڕیارەکە، لێخۆشبوونەکە سەرجەم ئەو خوێندکارانە دەگرێتەوە کە دانیشتووی چەمچەماڵن و لە سیستمی پارالێل یان خوێندنی ئێواران لە زانکۆکان وەرگیراون.

بڕیارەکە گشتگیرە و هەردوو قۆناغی خوێندنی بەرایی (دبلۆم و بەکالۆریۆس) و خوێندنی باڵا (دبلۆمی باڵا، ماستەر و دکتۆر) دەگرێتەوە.

وەزارەتی خوێندنی باڵا مەرجی ئەوەی داناوە، کە پێویستە خوێندکاران بە بەڵگەنامەی رەسمی و یاسایی بیسەلمێنن کە دانیشتووی قەزای چەمچەماڵن یان ئەو ناوچانەی زیانیان بەرکەوتووە، بۆ ئەوەی بڕیارەکە بیانگرێتەوە.

رێبوار تەها، پارێزگاری کەرکوک بەهۆی بەردەوامیی دۆخی کەشوهەوا و شەپۆلی بارانبارینەوە، بڕیاریدا سبەینێ یەکشەممە لە سەرجەم ناوەندەکانی خوێندنی سنورەکە پشوی رەسمی بێت.

بەپێی بڕیارەکەی پارێزگاری کەرکوک، لەپێناو سەلامەتی خوێندکاران، پشووەکە سەرجەم قۆناغەکانی باخچەی ساوایان، سەرەتایی، ناوەندی و ئامادەیی لە سەنتەری کەرکوک و سەرجەم قەزا و ناحیە و گوندەکان دەگرێتەوە.

هاوکات ئاماژە بەوەش کراوە، پشوەکە فەرمانگە حکومییەکان و زانکۆ و پەیمانگاکان ناگرێتەوە و سبەینێ دەوام تێیاندا وەک رۆژانی ئاسایی بەردەوام دەبێت.

وەک بەدەنگەوەهاتنێک بۆ دۆخی لێقەوماوانی چەمچەماڵ، گروپی کۆمپانیاکانی قەیوان بڕی یەک ملیار دیناری بەخشییە سندوقی قەرەبوکردنەوەی زیانلێکەوتووانی قەزاکە.

دلێر کەمال، بەڕێوەبەری راگەیاندن و پەیوەندییەکانی قەیوان گروپ بە کوردسات نیوزی راگەیاند، لە سۆنگەی هەستکردن بە بەرپرسیارێتی و ئەو خەمە گەورەیەی رووی لە چەمچەماڵ کردووە، بڕی یەک ملیار دیناریان بەخشیوە بە کۆمیسیۆنی قەرەبوکردنەوەی زیانلێکەوتووانی قەزای چەمچەماڵ و دەوروبەری.

بەڕێوەبەری راگەیاندنی قەیوان گروپ ئاماژەی بەوەشکرد، خەرجکردنی ئەو بڕە پارەیە لەرێگەی نوسینگەی قوباد تاڵەبانی، جێگری سەرۆک وەزیرانەوە سەرپەرشتی دەکرێت، تا بەشێوەیەکی شەفاف بگاتە دەست زیانلێکەوتووان.

جگە لەم هاوکارییە داراییە گەورەیە، پێشتریش قەیوان گروپ لەرێگەی کەمپینەکانی دیکەوە بڕی 100 ملیۆن دیناری بەخشیوەتە لێقەوماوانی ناوچەکە.

هاوکات لەرووی لۆجیستییەوە و بۆ خستنەوەسەرپێی ژیان لە چەمچەماڵ، ماوەی چەندین رۆژە زیاتر لە 20 ئامێری جۆراوجۆر لە (شۆفڵ، گەڵابە و تەنکەری ئاو)ی کۆمپانیاکە لە ناوچە زیانلێکەوتووەکاندا خراونەتەگەڕ و لە کاردابوون.

بافڵ جەلال تاڵەبانی سەرۆکی یەکێتی پرسەنامەیەک ئاڕاستەی خانەوادەی کارمەندەکەی بەڕێوەبەرایەتیی ئاسایشی رۆژئاوای سلێمانی دەکات و دەڵێت: کەسوکاری سەربەرزی کاکە ئاکۆ دڵنیا دەکەمەوە بەهیچ شێوەیەک ناهێڵم خوێنی رۆڵەکەیان بەهەدەر بڕوات.

دەقی پرسەنامەکەی بافڵ جەلال تاڵەبانی سەرۆکی یەکێتیی نیشتمانیی کوردستان....

لە دڵەوە نیگەران و غەمباربووم بە شەهیدبوونی کاک (ئاكۆ سابیر حەمە ڕەزا) کارمەندی بەڕێوەبەرایەتیی ئاسایشی رۆژئاوای سلێمانی کە لەکاتی راپەڕاندنی ئەرکەکەیدا و بۆ خزمەتکردنی کەسوکاری سەربەرزی چەمچەماڵ بە ناحەق شەهیدکرا.

بۆ ئەم خەمە، پرسە و سەرەخۆشی لە خێزان و بنەماڵە تێکۆشەرەکەیان و هاوڕێ و هاوکارانی دەکەم و هاوبەشی ماتەمیانم. لە خوای گەورە داواکارم گیانی کۆچکردوو بە بەهەشتی بەرین شادبکات، سەبووری و ئارامی بە هەموولایەک ببەخشێت.

کەسوکاری سەربەرزی کاکە ئاکۆ دڵنیا دەکەمەوە پارێزەری پاراستنی مافەکانیان دەبم و بەهیچ شێوەیەک ناهێڵم خوێنی رۆڵەکەیان بەهەدەر بڕوات.

قوباد تاڵەبانی بەهۆی شەهیدبوونی ئاکۆ سابیر کارمەندی دڵسۆزی هێزەکانی ئاسایش پرسە و سەرخۆشی ئاڕاستەی خانەوادە و کەسوکارەکەی دەکات و دەڵێت: هەموو لایەک دڵنیا دەکەینەوە ئەم تاوانە چەپەڵە بێ سزای یاسایی تێپەڕ نابێت.

قوباد تاڵەبانی رایگەیاند، زۆر بە داخەوە کاک ئاکۆ سابیر کارمەندی دڵسۆزی هێزەکانی ئاسایش کە دوێنێ لەگەڵ دوو هەڤاڵی دیکەی لەکاتی ئەرکی هاوکاریکردنی زیانلێکەوتووانی لافاوەکەی چەمچەماڵ لەلایەن چەند چەکدارێک تەقەیان لێ کرا و برینداربوون، ئەمڕۆ لە نەخۆشخانە بەهۆی قورسیی برینەکەیەوە گیانی لەدەستدا و تێکەڵ بە کاروانی شەهیدان بوو.

ئاماژەی بەوەشکرد، لە دڵەوە پرسە و سەرەخۆشی ئاراستەی خانەوادە و کەسوکاری سەربەرزی شەهید ئاکۆ و هەموو هەڤاڵانی لە هێزەکانی ئاسایش و خەڵکی چەمچەماڵ و هەموو کوردستان دەکەم. هەموو لایەکیش دڵنیا دەکەینەوە ئەم تاوانە چەپەڵە بێ سزای یاسایی تێپەڕ نابێت و ئەو تاوانبارانەی دەستگیرکراون سزای یاسایی خۆیان وەردەگرن.