کوردستان
نەوزاد شێخ کامیل، بەڕێوەبەری گشتیی بازرگانیی هەرێمی کوردستان، لە لێدوانێکدا بۆ کوردسات نیوز رایگەیاند، کە بڕیارەکەی عەلی زەیدی سەبارەت بە کاروباری باج یان رێکارە بازرگانییەکانەوە تا ئێستا لە هەرێمی کوردستان کاری پێ ناکرێت و جێبەجێ نەکراوە.
ناوبراو هۆکاری ئەمە بۆ ئەوە دەگەڕێنێتەوە: تاوەکو ئێستا هیچ رێککەوتنێکی رەسمی و کۆتایی لەسەر پرسی باج لە نێوان هەردوو حکومەتی هەولێر و بەغداد ئیمزا نەکراوە یان نەگەیشتوونەتە لێکتێگەیشتنێکی هاوبەش.
سەبارەت بە میکانیزمی جێبەجێکردنی بڕیارەکانیش لە داهاتوودا، بەڕێوەبەری گشتیی بازرگانی جەختی لەوە کردەوە: وەزارەت و بەڕێوەبەرایەتییەکانیان پابەندن بەو رێنمایی و فەرمانانەی کە بە رەسمی لەلایەن ئەنجوومەنی وەزیرانی هەرێمی کوردستانەوە دەردەچن و پێیان دەگات، و تەنها لەو رێگەیەوە مامەڵە لەگەڵ بڕیارە فیدراڵییەکاندا دەکەن.
بەپێی پێشبینییەكانی كەشناسیی هەرێم شەپۆلێكی بارانبارین روو لە هەرێم دەكات.
كەشناسیی هەرێم رایگەیاند، ئەمڕۆ چوارشەممە، لە بەشێكی ناوچەكانی هەرێم نمەباران دەبارێت و پلەكانی گەرما كەمێك بەرزدەبنەوە.
ئاماژەی بەوەشكردووە، سبەینێ پێنجشەممە لە ئەنجامی كاریگەری لاوازی نزمەپەستانی دەریای سپی ناوەراست شەپۆلێكی بارانبارین روو لە هەرێم دەكات، كە سەرەتا لەسنوری پارێزگای دهۆك و ئیدارەی سەربەخۆی زاخۆ دەستپێدەكات بەشێوەی نمەباران و بارانی مامناوەند و هەورەبروسكەی لەگەڵدا دەبێت، دواتر بارانبارینەكە دەگاتە سنوری پارێزگای هەولێر و ئیدارەی سەربەخۆی سۆران و تا درەنگانی شەو كاریگەری ئەم شەپۆلە لەسەر ئەم ناوچانە بەردەوام دەبێت.
بەپێی پێشبینییەكانی كەشناسیی هەرێم، سبەینێ پێنجشەممە، بەهەمان شێوەی ئەمڕۆ پلەكانی گەرما كەمێك بەرزدەبنەوە.
لە سنوری کەورکوک بەهۆی تەقینەوەی بۆمبێکی چێندراوەوە لە مۆڵگەکانی تیرۆرستان، ئەفسەرێک و سەربازێکی عیراق گیانیان لە دەستدا و سێ سەربازی تریش بریندارن.
ئاسۆ ئەحمەد، پەیامنێری کوردسات نیوز لە زاری سەرچاوەیەکی دژەتیرۆری عیراقەوە رایگەیاند، لە سنوری کەرکوک بە هۆی تەقینەوەی بۆمبێکی چێندراوەوە ئەفسەرێک و سەربازێک گیانیان لە دەستدا و سێ سەربازی تریش بریندارن.
ئاسۆ ئەحمەد رایگەیاند، روداوەکە لە ناوچەی وادی زاغیتون لە نزیک گوندی ئەلئەواشر لە قەزای داقوقی سنوری کەرکوک بووە.
ئاماژەی بەوەشکرد، بە گوێرەی زانیارییەکان بۆمبەکە بە لیوای 42ـی فیرقەی 11ـی سوپای عیراق تەقیوەتەوە، ئەمەش دوای ئەوەی شەوی رابردوو فڕۆکە جەنگییەکان بۆردومانی مۆڵگەکانی تیرۆرستانیان کردوە، دواتر سوپای عیراق دەستیکردوە بە کێوماڵکردنی ئەو شوێنانە و بۆمبەکەیان پێدا تەقیوەتەوە.
ئەمڕۆ سەرۆکایەتی ئەنجومەنی وەزیران کۆدەبێتەوە و دوو تەوەری سەرەکی گفتوگۆیان لەسەر دەکرێت، کە تەوەرێکیان تایبەتە بە پرسی بودجەی هەرێم لە ساڵی 2027 و ئەنجامی کۆبونەوەکانی ئەم دواییەی وەفدی دانوستانکاری هەرێم و بەغداد.
ئەمڕۆ چوارشەممە، ئەنجومەنی وەزیرانی هەرێم کۆبونەوەی ئاسایی خۆیدەکات و بە گویڕەی کارنامەی کۆبونەوەکەش دوو تەوەری سەرەکی گفتوگۆیان لەبارەوە دەکرێت.
لە تەوەری یەکەمدا، ئەنجامی کۆبونەوەکانی ئەم دواییەی وەفدی دانوستانکاری هەرێم لەگەڵ وەزارەتی دارایی فیدراڵی سەبارەت بە دەقە یاساییە پێشنیارکراوەکانی ماددەی (10)ی تایبەت بە هەرێم لە رەشنووسی یاسای بودجەی گشتیی فیدراڵی بۆ ساڵی دارایی 2027 دەخرێتە ڕوو.
لە بڕگەی دووەمدا، ئەنجومەنەکە گفتوگۆی لەسەر داواکاریی وەزارەتی کار و کاروباری کۆمەڵایەتی دەکات سەبارەت بە لێخۆشبونی رێژەی 75٪ لە سزای دواخستنی پێدانی پارەی بەشداری مانگانەی دەستەبەری کۆمەڵایەتی بۆ ئەو خاوەنکارانەی کە لە ماوەی 90 رۆژدا سەرجەم قەرزەکانیان بەیەکجار دەدەنەوە.
بافڵ جەلال تاڵەبانی لە هەولێر لەگەڵ مەزڵوم عەبدی کۆبووەوە و رایگەیاند؛ پشتیوانی لە چەسپاندنی مافە نەتەوەیی و دەستورییەکانی گەلی کورد لە سوریا دەکەن و هاوکار دەبن بۆ زامنکردنی پێکەوەژیانی ئاشتییانە و سەقامگیری لە سوریای نوێدا.
بافڵ جەلال تاڵەبانی، سەرۆکی یەکێتیی نیشتمانیی کوردستان لە هەولێر لەگەڵ مەزڵوم عەبدی، راوێژکاری سەرۆکایەتیی کۆماری سوریا کۆبووەوە.
لە کۆبوونەوەکەدا کە قوباد تاڵەبانی، جێگری سەرۆک وەزیرانی هەرێمی کوردستان و شاڵاو کۆسرەت رەسوڵ ئامادەبوون، دوایین پێشهاتە سیاسی و ئەمنییەکانی ناوچەکە تاوتوێکران.
بارودۆخی گشتیی سوریا و پرسی کورد لە رۆژئاوای کوردستان خرایەبەر باس و سەرۆک بافڵ پشتیوانیی نەگۆڕی یەکێتی بۆ مافەکانی گەلی کورد و سەرجەم پێکهاتەکان دووپاتکردەوە و رایگەیاند، ئێمە پشتیوانی لە چەسپاندنی مافە نەتەوەیی و دەستوورییەکانی گەلی کورد لە سوریا دەکەین و هاوکاری هەر هەنگاوێک دەبین کە زامنی پێکەوەژیانی ئاشتییانە و هێنانەدیی سەقامگیری بێت بۆ زاڵبوون بەسەر ئاڵنگارییەکان لە سوریای نوێدا.
لای خۆیەوە، مەزڵوم عەبدی بە پێزانینەوە رۆڵی سەرۆک بافڵ و یەکێتی بەرزنرخاند لە سەرخستنی گفتوگۆکان لە سوریا و پاراستنی مافی کورد لە چوارچێوەی رێککەوتنەکاندا.
مەزڵوم عەبدی دەڵێت؛ جەخت لە تێکەڵکردنی ئیدارە و هێزە ئەمنییەکان لەگەڵ دەوڵەتی نوێی سوریا بە پشتیوانیی نێودەوڵەتی دەکەنەوە و ئاشکرایکرد لەسەر پرسی زمانی کوردی گەیشتوونەتە چارەسەر.
مەزڵوم عەبدی، لە دیداری مێری لە بارەی پرسی کورد لە سوریای نوێ رایگەیاند، دەرفەتێکی گەورە بۆ گەلانی سوریا هاتووەتە ئاراوە، بەڵام لە هەمان کاتدا سوریای نوێ رووبەڕووی ئاڵنگاریی زۆر بووەتەوە و دەبێت بە جدی کار بۆ چارەسەرکردنیان بکرێت.
لەبارەی تێکەڵکردنی دامەزراوەکان مەزڵوم عەبدی رایگەیاند، پرۆسەی تێکەڵکردنی ئیدارە و هێزە ئەمنییەکان لەگەڵ دامەزراوەکانی دەوڵەتی نوێی سوریا ئیرادەیەکی بەهێزی لەپشتە و کۆمەڵگەی نێودەوڵەتیش پشتیوانی لەم پرۆسەیە دەکات.
سەبارەت بە پرسی زمانی کوردی ئاشکرایکرد، رێککەوتن و چارەسەر لەسەر پرسی زمانی کوردی لە سوریای نوێ کراوە، و خوێندن لە ناوچە کوردنشینەکان بە زمانی کوردی بەردەوام دەبێت.
ئەوەشی خستەڕوو، مەرسومەکانی تایبەت بە مافەکانی کورد پێویستە لە دەستووری نوێی سوریادا بچەسپێنرێن، و گفتوگۆکان بۆ زامنکردنی تەواوی مافەکانی کورد بەردەوامن.
مەزڵوم عەبدی باسی لەوەشکرد، بۆ یەکەمجارە کورد لە دەوڵەتی نوێی سوریادا رۆڵی کاریگەری دەبێت، چونکە وەک کورد بڕوای تەواومان بە بەشداریی لە بەڕێوەبردنی وڵاتدا هەیە.
هەر لەبارەی دەستکەوتەکانی کورد رایگەیاند، ئەگەرچی هێشتا هەموو مافەکانمان بەدی نەهاتوون، بەڵام ئەوەی تا ئێستا بەدەستهاتووە دەستکەوتی کەم نین و هەنگاوی گرنگن.
هەر لە دیدارەکەدا مەزڵوم عەبدی ئەوەشی خستەڕوو، یەكدەنگی و یەكگوتاری كورد لە سوریا زۆر گرنگە و لایەنە كوردییەكان لە سوریا پابەندی یەكڕیزین، دەشڵێت؛ یەكڕیز نەبین ناتوانین مافەكانمان لە سوریای نوێ بەدەستبهێنین و دەستكەوتەكان موڵكی گەلی كوردن نەك هی هێزێكی دیاریكراو.
قوباد تاڵەبانی، جێگری سەرۆک وەزیرانی هەرێم رایگەیاند هەموو کێشەکانی نێوان عیراق و هەرێم هۆکارەکەی جێبەجێنەکردنی دەستورە و بە گەڕانەوە بۆ دەستور دەتوانن کێشەکان چارەسەر بکەن.
ئەمڕۆ سێشەممە، لە میانی بەشداریکردنی لە دیداری مێری، قوباد تاڵەبانی رایگەیاند، گەڕانەوە بۆ جێبەجێکردنی دەستور کلیلی چارەسەرکردنی کێشەکانی نێوان هەرێم و بەغدادە.
ئاماژەی بەوەشکرد، بە جێبەجێکردنی تەواوی دەستور کێشەکانی نێوان هەرێم و بەغداد چارەسەر دەبن، بەڵام کێشەکانی ناوخۆی هەرێم هەردەمێنن تا ئەوکاتەی دەبنە خاوەن دەستورێک.
لە بارەی پەیوەندییەکانی هەرێم و بەغدادیش، قوباد تاڵەبانی رایگەیاند، وەک یەکێتی پەیوەندیی باشیان هەیە لەگەڵ بەغداد و کاریگەریان لەسەر بڕیارەکانیش هەیە.
ئاماژەی بەوەشکرد تا لە بەغداد بە هێزبن و بەشێکبن لە بڕیارەکان لە هەرێمیش بەهێزدەبن.
لەسەر پرسی یەکگرتنەوەی هێزی پێشمەرگەشەوە، قوباد تاڵەبانی رایگەیاند ئەوە هەنگاویكی گرنگ بوو، بەڵام تەواوی پرۆسەکە نییە و دەبێت کاری زیاتری بۆ بکرێت.
هەروەها هیواشیخواست هاوشێوەی هێزی پێشمەرگە، هێزە ئەمنییەکانیش لە هەرێم یەکبگرنەوە.
لەبارەی حکومەتی هەرێمی کوردستانەوە، قوباد تاڵەبانی وتی؛ "بە راشکاوی بڵێم، ئەم جۆرە حکومەتە بۆ ئێستا گونجاو نییە و دەبێت گۆڕانکاری تەواوەتی لە فەلسەفەی حکومڕانیدا بکرێت".
قوباد تاڵەبانی جەختیکردەوە ئیتر سەردەمی ئاوەدانکردنەوە نەماوە و دەبێت وەبەرهێنان بکەن و دەسەڵاتەکان بە تەواوەتی شۆڕبکەنەوە و بە جدی بیر لەوە بکرێتەوە خەڵکی چی دەوێت.
کاتی هاتوچۆکردن لە مەرزی کێلێ لە سنوری قەزای پشدەر درێژدەکرێتەوە بۆ سەعات شەشی ئێوارە، بڕیارەکە لە رۆژی شەممەوە دەچێتە بواری جێبەجێکردنەوە.
قائیمقامیەتی قەزای پشدەر رایگەیاند، دوای هەوڵێکی زۆر و لەسەر داوای ئیدارەی قەزاکە کۆماری ئیسلامیی ئێران رەزامەندی دەربڕیوە، کە لە رۆژی شەممەی داهاتوەوە کاتی هاتوچۆ درێژبکرێتەوە لە سەعات چواری عەسر بۆ شەشی ئێوارە.
قائیمقامیەتی پشدەر دەڵێت؛ بەم بڕیارە نوێیە، پڕۆسەی هاتوچۆی گەشتیاران لە مەرزی کێلێدا زیاتر دەکات و بڕیارەکە بۆ تەواوی رۆژەکانە جگە لە رۆژی هەینی.
بەڕێوەبەرایەتی گشتیی شارەوانییەکانی سلێمانی رایگەیاند، سبەینێ چوارشەممە، دەستدەکەن بە دابەشکردنی 253 پارچە زەوی بەسەر فەرمانبەراندا لە سنوری قەزای سەیدسادق.
شارەوانی سلێمانی ئاماژەی بەوەکردوە، سەعات نؤی بەیانی تیروپشکی دابەشکردنەکە لە هۆڵی رۆشنبیری سەیدسادق بەرێوە دەچێت و لیستەکە لە 223 فەرمانبەر و خانەنشین، 22 زیندانی سیاسی و هەشت وارسی شەهیدانن.
پڕۆسەکە بە چاودێریی نوێنەری بەڕێوەبەرایەتیی گشتیی شارەوانییەکانی سلێمانی و لایەنە پەیوەندیدارەکانی قەزاکە بەڕێوەدەچێت، شارەوانیی سەیدسادقیش جەخت دەکاتەوە کە دابەشکردنەکە بەپێی خاڵبەندی و قۆناغ بە قۆناغ لە بەرزترینەوە بۆ نزمترین خاڵ بەردەوام دەبێت.
شارەوانی سلێمانی داواشدەکات لە سەرجەم ئەو کەسانەی ناویان لە لیستەکەدا هاتووە، کە پێویستە پێنج کۆپی لە هەریەک لە کارتی نیشتمانی و کارتی زانیاری، لەگەڵ بەڵگەنامە ئەسڵییەکانیان پێبێت و دەبێت هاوژینەکانیشیان ئامادەبن.
کەشناسیی هەرێم رایگەیاند، بارانبارین لە ناوچە جیاوازەکانی هەرێم ناوبەنا بەردەوام دەبێت و پلەکان گەرماش کەمێک نزمدەبنەوە.
ئەمڕۆ سێشەممە، بەڕێوەبەرایەتیی کەشناسی و بومەلەرزەزانیی هەرێمی کوردستان رایگەیاند ئاسمان نیمچە هەور و لە ناوچە شاخاوییەکان هەوری تەواودەبێت لەگەڵ بارینی باران لە ناوچە شاخاوییەکان بەتایبەت ناوچەکانی باکوور هەرێم.
لەبارەی پلەکانی گەرماشەوە، کەشناسی دەڵێت؛ بەراورد بە تۆمارکراوەکانی دوێنێ کەمێک نزمدەبنەوە.
لەبارەی کەشی سبەینێشەوە، ئاماژەی بەوەکردوە، ئاسمان هەوری تەواو دەبێت لە زۆربەی ناوچەکانی هەرێم لەگەڵ ئەگەری کەمێک نمە باران لە ناوچە شاخاوییەوییەکان و پلەکانی گەرماش بەراورد بە ئەمڕۆ بەرزدەبنەوە.
بەرزترین پلەکانی گەرمای پێشبینیکراو بە پلەی سیلیزی بۆ سبەینێش بەمشێوەیە دەبێت؛
هەولێر: 29 پلەی سیلیزی
پیرمام: 25 پلەی سیلیزی
سلێمانی: 28 پلەی سیلیزی
هەڵەبجە:30 پلەی سیلیزی
چەمچەماڵ: 29 پلەی سیلیزی
دهۆک: 28 پلەی سیلیزی
زاخۆ: 26 پلەی سیلیزی
ئاکرێ:28 پلەی سیلیزی
گەرمیان:36 پلەی سیلیزی
حاجی ئۆمەران:18 پلەی سیلیزی
وەزارەتی تەندروستیی هەرێم ئاماری نۆ مانگی رابردووی شوشتنی گورچیلەی لە سنوری هەولێر بڵاوکردەوە، 53 هەزار و 26 جار شوشتنی گورچیلە بۆ 830 نەخۆش ئەنجامدراوە.
وەزارەتی تەندروستیی رایگەیاند، لە 1می کانوونی دووەم تا 1ـی تشرینی یەکەمی 2026، کۆی گشتیی 53 هەزار و 26 جار پرۆسەی شوشتنی گورچیلە بۆ نزیکەی 830 نەخۆش بە شێوەیەکی بەردەوام و بێبەرانبەر لە سەنتەرە پزیشکییەکانی پارێزگای هەولێر و ئیدارەی سەربەخۆی سۆران ئەنجام دراون.
ئاماژەی بەوەشکردوە، تەنها لە مانگی ئەیلولی 2026دا، پێنج هەزار و 840 جار شوشتنی گورچێلە ئەنجامدراوە.
نەخۆشخانەی هەولێری فێرکاری بە ئەنجامدانی سێ هەزار و 151 سوستنی گورچێلە پلەی یەکەمی لەسەر ئاستی هەولێر بەدەستهێناوە و بە رێژەی 54٪ پشکی سەرەکی بەرکەوتوە.
سەنتەری هەولێری رۆژئاوا، نەخۆشخانەی فێرکاری ئاشتی لە سۆران، سەنتەری کۆیە و چەند سەنتەرێکی تری شارۆچکەکان بە هەمانشیوە خزمەتگوزارییەکەیان پێشکەش بە نەخۆشان کردووە.
بانکی پێنجوێن مەرجی کۆتایی بۆ دابەشکردنی موچە بە شێوەی کاش رادەگەیەنێت و ئەو موچەخۆرانە ئاگادار دەکاتەوە کە بە کاش موچەکانیان وەردەگرن.
لە راگەیەندراوێکدا، بانکی پێنجوێن رایگەیاند؛ لە چوارچێوەی پرۆسەی یەکگرتنەوەی بانکەکان و گواستنەوەی بانکی پێنجوێن بۆ ناو کۆمەڵگەی مەرزی نێودەوڵەتی باشماخ، دابەشکردنی موچە بە کاش کۆتایی دێت.
بەپێی راگەیەندراوەکە، ئەو موچەخۆرانەی، کە موچەی ئەم مانگەیان بە شێوەی کاش وەردەگرن، پێویستە تا رۆژی پێنجشەممە سەردانی بانکی پێنجوێن بکەن بە مەبەستی وەرگرتنی موچەکانیان.
جەختیشدەکاتەوە، کە دوای تەواوبوونی ئەو ماوەیە و بەسەرچونی وادەی دیاریکراو، پرۆسەی وەرگرتنی موچە لە بانکی پێنجوێن کۆتایی دێت و تەنها لە رێگەی بانکی باشماخەوە ئەنجام دەدرێت.
سەنتەری راهێنانی پێداگۆجی و پەرەپێدانی ئەکادیمی لە زانکۆی سلێمانی، دەستپێکردنی خولی (12)ی راهێنانی پێداگۆجی راگەیاند.
لەم چوارچێوەیەدا، سەرجەم ئەو خوازیارانەی هەڵگری بڕوانامەی ماستەر و دکتۆران دەتوانن لە رێکەوتی (2026/10/12) تاوەکو (2026/10/25) فۆرمی داواکاری بۆ بەشداریکردن پێشکەش بکەن.
بۆ ئەنجامدانی خۆتۆمارکردن و بەدەستهێنانی زانیاریی زیاتر لەبارەی مەرج و رێنماییەکانەوە، دەتوانیت سەردانی ئەم بەستەرە خوارەوە بکەیت:
https://pc.univsul.edu.iq/.../%d9%be%db%8e%d8%b4%da%a9.../
نێچیرڤان بارزانی رایگەیاند، ئەوەی ئەو لە سەرۆک ئەردۆغان بینیویەتی؛ پرۆسەی ئاشتیی جدییە، بەڵام هەنگاوکان خاون و پێوستیان بە کاری زیاترە، ئاماژەی بەوەشکرد یەکێتی و پارتی رۆڵی یارمەتیدەریان هەبووە بۆ سەرخستنی پرۆسەی ئاشتیی.
ئەمڕۆ دووشەممە، نێچیرڤان بارزانی، سەرۆکی هەرێم لە دیداری مێری لە هەولێر، رایگەیاند پرۆسەی ئاشتیی لە باکور جدییە وهەردوولا جەخت لە جێبەجێکردنی پرۆسەکە دەکەنەوە.
سەرۆکی هەرێم رایگەیاند، ئەوەی ئەو لە سەرۆک ئەردۆغان بینیویەتی؛ راستە هەنگاوەکان خاون، بەڵام پرۆسەی ئاشتیی جدییە و پێوستیان بە کاری زیاترە.
ئەوەشیخستەڕوو؛ لایکەم ماوەی دوو ساڵە دایکان جگەر سوتاونابن و رۆڵەکانیان ناکوژرێت و شەڕ وەستاوە.
لە بارەی رۆڵی هەرێمی کوردستانیشەوە، نێچیرڤان بارزانی وتی؛ یەکێتی و پارتی رۆڵی یارمەتیدەریان هەبووە بۆ سەرخستنی پرۆسەی ئاشتیی وهەر کارێک بە هەرێمی کوردستان بکرێت دەیکەن و کردوشیانە.
لەبارەی روشی رۆژئاواشەوە، سەرۆکی هەرێم دەڵێت؛ دەبێت ئەو مافانەی، کە بە کورد و پێکهاتەکانی تر دراوە لە دەستوردا جێگیر بکرێت، ئەوکات دەتوانن دڵنیابن لە پێکەوە ژیان.
نێچیرڤان بارزانی وتیشی؛ ئەوەی لە رۆژئاوا كراوە تائێستا جێگەی دەستخۆشیە و سەرکەردە کوردەکان درێغیان نەکردوە و جەختیشیکردوە، " ئەحمەد شەرع هیچ عوقدەیەکی لەگەڵ کوردا نییە" و راستگۆیە لەگەڵ قەزیەی کورد لە سوریای نوێدا.
بەڕێوەبەرایەتیی هاتوچۆی سلێمانی لەبارەی مافی بەدەستهێنانی مۆڵەتی شۆفێری لەلایەن نابیستانەوە راگەیەنراوێکی بڵاوکردەوە و تێیدا ئاماژەی بە چەند مەرج و رێنماییەک کردووە بۆ بەدەستهێنانی مۆڵەتەکە.
هاتوچۆی سلێمانی رایگەیاند، ئەو هاووڵاتیانەی خاوەن پێداویستی تایبەتن 'نابیستن' و خوازیاری بەدەستهێنانی مۆڵەتی شۆفێرین، پێویستە لە سەرەتادا سەردانی بەڕێوەبەرایەتیی هاتوچۆی پارێزگای سلێمانی – بەشی مۆڵەت بکەن.
ئەوەشی روونکردووەتەوە، دواتر و دوای وەرگرتنی فۆڕمی داواکردنی مۆڵەتەکە، داواکاران ئاڕاستەی لیژنەی پزیشکی پەیوەندیدار دەکرێن بۆ پشتڕاستکردنەوەی باری تەندروستییان بەپێی مەرجە یاساییەکان.
ئاماژەی بەوەشداوە، لایەنی هەرە گرنگی ئەم رێنماییە ئەوەیە کە مامۆستایەکی تایبەت بە زمانی ئاماژە بۆ داواکارەکان دابینبکرێت و ئەوەش یارمەتیان دەدات بۆ ئەوەی بە سەربەخۆیی زیاتر ئەرک و کاری ڕۆژانەی خۆیان بەڕێوەبەرن.
هاوکات لای خۆشیانەوە، کۆمەڵەی نابیستانی کوردستان سوپاسی بەڕێوەبەری هاتووچۆی سلێمانی و سەرجەم ئەو لایانانەیان کرد کە بە دڵسۆزیان لەم دەستکەوتەدا هاوکار بوون.
بافڵ جەلال تاڵەبانی هۆشداری لە رەوشی ناوچەکە دەدات و داوای گۆڕینی سیاسەتی کورد لە بەغداد دەکات
بافڵ جەلال تاڵەبانی، سەرۆکی یەکێتیی نیشتمانیی کوردستان لە پانێڵی 'بنیاتنانی کوردستانێکی بەهێزتر: یەکگرتوویی، ئاسایش و هاوبەشی هەرێمی' لە دیداری مێری هۆشداری لە ئاڵۆزییەکانی رۆژهەڵاتی ناوەڕاست دا و رایگەیاند: ناوچەکە لەژێر مەترسییەکی گەورەدایە و پێویستیشە سیاسەتی کورد لە بەغداد بگۆڕێت.
لەبارەی پرۆسە ئاشتیش لە باکوری کوردستان و تورکیا وتی: دەبێت هەمووان پشتیوانی پرۆسەی ئاشتی بن لە توركیا.
سەبارەت بە چارەسەری ئاشتییانەی پرسی کورد، بافڵ جەلال تاڵەبانی ئەوەشی ئاشکراکرد: یەکێتیی نیشتمانیی کوردستان بەردەوامە لە هەوڵەکانی بۆ زیندووکردنەوە و پەرەپێدانی پەیوەندییە نێودەوڵەتییەکانی لەپێناو بەهێزکردنی پێگەی هەرێم و نەبوون و ناشبنە پیاوی هیچ وڵات و لایەنێک.
لە بەشێکی دیکەی وتەکانیدا پەیوەست بە رەوشی ناوخۆی عیراق، سەرۆکی یەکێتی باسی لە پەیوەندییەکانی حزبەکەی لەگەڵ هێز و لایەنە سیاسییەکان کرد و وتی: پەیوەندییەکی زۆرباشمان لەگەڵ سەرجەم لایەنەکانی عیراقدا هەیە، بەڵام پێویستە سیاسەتی خۆمان لە بەغداد بگۆڕین بۆ ئەوەی لە ئاست پێشهاتەکاندا بێت.
هەر لەو چوارچێوەیەدا و لەبارەی هەوڵەکان بۆ چاکسازی و گۆڕانکاری لە عیراقدا، بافڵ جەلال تاڵەبانی ئاماژەی بەوە کرد کە "عەلی زەیدی دەیەوێت گۆڕانکاریی جدی و قورس لە عیراقدا ئەنجامبدات".