بافڵ جەلال تاڵەبانی، سەرۆکی یەکێتیی نیشتمانیی کوردستان، لە دەباشان پێشوازی لە کریستیان ئۆلفکێ، کونسوڵی گشتیی نوێی ئەڵمانیا لە هەرێمی کوردستان کرد.

لە دیدارەکەدا، سەرۆکی یەکێتی پیرۆزبایی دەستبەکاربوونی لە کونسوڵی نوێی ئەڵمانیا کرد و هیوای سەرکەوتنی لە ئەرکە نوێیەکەیدا بۆ خواست. هاوکات ئامادەیی یەکێتیی نیشتمانیی کوردستانی بۆ هەر هاوکاری و هەماهەنگییەک لەپێناو سەرخستنی کارەکانیدا دووپاتکردەوە.

هەروەها تاوتوێی دۆخی گشتیی هەرێمی کوردستان، عێراق و ناوچەکە کرا. لای خۆیەوە بافڵ جەلال تاڵەبانی جەختی لە گرنگیی بەردەوامیی هاریکاری و پەیوەندییەکانی نێوان لایەنەکان کردەوە، لەپێناو زاڵبوون بەسەر ئاڵنگارییەکان و کەمکردنەوەی گرژییەکاندا.

ئەمڕۆ یەکشەممە، 11ـی 10ـی 2026 لەسەر رێگای پێنجوێن سەیدسادق بارهەڵگرێک وەرگەڕا و سێ کەس بەو هۆیەوە بریندار بوون.

پەیامنێری کوردسات نیوز رایگەیاند، سێ کەسەکە لە دایک و باوکێک و منداڵەکەیان پێکهاتوون و باوکەکە تەمەنی 55 ساڵە و دایکەکەش تەمەنی 35 ساڵە.

وتیشی، بارهەڵگرەکە باری 'تەماتە'ـی پێبووە و جگە لە زیانە گیانییەکانی روداوەکە، زیانی مادیشی لێکەوتووەتەوە و بارەکەی بەهەدەر چووە.

هاوکات، سەرچاوەیەک لە نەخۆشخانەی 'شەهید شەوکەت' بەهۆی سەختی برینەکەیەوە پیاوەکە رەوانەی فریاکەوتنی نەخۆشخانەی شار کراوە و دایک و منداڵەکە بۆ چاودێری پزیشکی لەنەخۆشحانەی 'شەهید شەوکەت' هێڵراونەتەوە.

 

 

قوباد تاڵەبانی، جێگری سەرۆک وەزیران سەردانی قەزای کۆیەی کرد و لە یەکەم وێستگەی سەردانەکەیدا زانکۆی کۆیەی بەسەرکردەوە و لەگەڵ سەرۆک و ئەنجومەنی زانکۆ کۆبووەوە.

لە دەستپێکی سەردانەکەیدا قوباد تاڵەبانی، بەردی بناغەی پارکی "بەردی بناغە"ـی لە هەواری زانکۆی کۆیە دانا کە بەبۆنەی یادی 23 ساڵەی دامەزراندنی زانکۆکە بە هاوکاری دامەزراوەی سەرۆک مام جەلال دروست دەکرێت.

دواتر جێگری سەرۆک وەزیران لەگەڵ سەرۆک و ئەنجومەنی زانکۆکە کۆبووەوە. سەرۆکایەتی زانکۆی کۆیە سوپاسی پشتیوانییە بەردەوامەکانی قوباد تاڵەبانیان کرد بۆ پێشخستنی زانکۆکە و بە تایبەتیش کە لەم دوایانەدا پاسی کارەبایی بۆ زانکۆ دابین کردوە.

قوباد تاڵەبانیش لە کۆبوونەوەکەدا دڵخۆشی خۆی دەربڕی بەوەی هەر کاتێک سەردانی زانکۆی کۆیە دەکات گۆڕانکاری و پێشکەوتنی نوێ دەبینێت. دەستخۆشیشی لە سەرۆکایەتی زانکۆ و مامۆستایان و خوێندکارانی زانکۆکە کرد بۆ داهێنان و هەوڵە بەردەوامەکانیان بۆ خزمەتکردنی ژینگە. داواشیکرد ئەو پڕۆژانەی هەیانە لە بوارەکانی ریسایکلین و بەکارهێنانی وزەی پاک و دابینکردنی کارەبا لە وزەی خۆر، زیاتر پەرەی پێ بدەن بۆ ئەوەی لە شارەکانی دیکەی کوردستان و عێراق سوودی لێ وەربگیرێت.

بەڵێنیشی پێدان بۆ لەمەودواش پشتیوانی هەموو هەوڵێک دەکات بۆ پێشخستنی زیاتری زانکۆی کۆیە، بە تایبەتیش پشتگیری لە پڕۆژە داهێنەرانەکانیان دەکات.

قوباد تاڵەبانی سەردانی کۆیەی کرد و بەردی بناغەی 'پارکی بەردی بناغەی زانکۆی کۆیە'ـی دانا و سەبارەت بە پێکهێنانی حکومەتی هەرێمیش نوێترین زانیاری بۆ کوردسات نیوز خستەڕوو.

قوباد تاڵەبانی، جێگری سەرۆکی ئەنجومەنی وەزیرانی هەرێم، بە کوردسات نیوزی راگەیاند: ئێمە بەشێکین لە عیراق و بەشێکیشین لە پێکهێنانی حکومەتەکەی، لە چەند رۆژی رابردوودا کاک بافڵ لە بەغداد بوو بۆ گفتوگۆکردن لەگەڵ هاوپەیمانەکانمان بۆ تەواوکردنی پڕۆسەی پێکهێنانی حکومەت.

سەبارەت بە پێکهێنانی حکومەتی هەرێم، قوباد تاڵەبانی ئاماژەی بەوەدا: گفتوگۆکان بەردەوامە و ئیشەڵا دەگەینە ئەنجامێک کە لە بەرژەوەندی کۆمەڵانی خەڵکی کوردستان بێت.

سه‌رۆکایه‌تیی هه‌رێمی کوردستان، لە پەیامێکدا سەرکۆنەی هێرشەکانی سەر فڕۆکەخانەی شا خالیدی سعودیە دەکات و تێیداهاتووە، " پشتیوانی و هاوسۆزیمان له‌گه‌ڵ شانشينى عه‌ره‌بستانى سعووديه‌ دووپات ده‌که‌‌ینه‌وه‌".

دەقی پەیامەکە

به‌ توندى سه‌رکۆنه‌‌ى ئه‌و هێرشه‌ ده‌که‌ین كه‌ دوێنێ شه‌ممه‌ كرایە سه‌ر فڕۆكه‌خانه‌ى نێوده‌وڵه‌تيى شا خالد له‌ ڕيازى پايته‌ختى عه‌ره‌بستانى سعووديه‌ و ژمارەیەک قوربانى و برينداری لەنێو خەڵکدا لێکه‌وته‌وه‌.

پرسه‌ و سەرەخۆشی و هاوخه‌میمان ئاراستەى سه‌ركردايه‌تى، حكوومه‌ت و خەڵكی شانشينى عه‌ره‌بستانى سعووديه‌ و كه‌سوكارى قوربانييان ده‌كه‌ین و هیوای چاکبوونەوەی خێرا بۆ برینداران دەخوازین.

پشتیوانی و هاوسۆزیمان له‌گه‌ڵ شانشينى عه‌ره‌بستانى سعووديه‌ دووپات ده‌که‌‌ینه‌وه‌ ‌و جەخت لە پێویستیی پاراستنی گیانی خەڵکی سڤیل، ڕاگرتنی گرژییەکان و پاراستنی ئاسایش و سەقامگیریی ناوچەکە دەکه‌ینه‌وه‌.

سه‌رۆکایه‌تیی هه‌رێمی کوردستان

2026/10/11

جێگری سەرۆک وەزیرانی هەرێم دەڵێت، نیەتێک بۆ پێکهێنانی حکومەت هەیە و ئەگەر هەیە لەم پاییزەدا کابینەی نوێ پێکبهێنرێت.

قوباد تاڵەبانی، جێگری سەرۆک وەزیرانی هەرێمی کوردستان، لە کۆنفرانسێکی رۆژنامەوانیدا تیشکی خستە سەر دوایین پێشھاتەکانی پرۆسەی سیاسی و پێکهێنانی کابینەی نوێی حکومەت و رایگەیاند: "ئەگەر هەیە لەم پاییزەدا حکومەت پێکبهێندرێت."

سەبارەت بە پەیوەندییەکانی نێوان هێزە سیاسییە سەرەکییەکان، قوباد تاڵەبانی ئاماژەی بەوەکرد کە کۆبوونەوە لەنێوان یەکێتیی نیشتمانیی کوردستان و پارتی دیموکراتی کوردستان "هەر دەبێت"، و جەختی کردەوە کە کۆبوونەوەکان گرنگن و نیەتێکی راستەقینە بۆ پێکهێنانی حکومەت بوونی هەیە.

هەروەها سەبارەت بە کۆسپ و بەربەستەکانی بەردەم پرۆسەکە، قوباد تاڵەبانی وتی: "رەنگە ئەو بەربەستانەی کە هەن لەبەردەم پێکهێنانی حکومەتدا، هەندێکیان چارەسەر بووبن و هەندێکیشیان مابن، بەڵام من گەشبینم و حکومەت هەر پێكدێت."

لە تەوەرێکی تری قسەکانیدا، جێگری سەرۆک وەزیران باسی لە هاوپەیمانییەکەیان لەگەڵ نەوەی نوێ کرد و جەختی کردەووە، "نەوەی نوێ هەر بەوەی کە هاوپەیمانی ئێمەن، بەو واتایە نییە کە حەز بکەن لەناو حکومەتدا بن؛ خۆیان سەرپشکن لەوەی کە بەشدار دەبن یان نا، و ئێمەش رێز لە بڕیاری ئەوان دەگرین." لەگەڵ ئەوەشدا، جەختی لە گرنگیی هاوپەیمانییەکە کردەوە و وتی: "ئەم هاوپەیمانییە هاوپەیمانییەکی جدییە، شانازیی پێوە دەکەین و پابەند دەبین پێوەی."

قوباد تاڵەبانی دەڵێت؛ زیرەکیی دەستکرد تەنها هاوڕێیەك نییە، بەڵكو كەرەستەیەكی زۆر بەهێزە، كێشەكانت بۆ رووندەكاتەوە و چارەسەرت بۆ پێشنیاز دەكات، بەمەش رێگەی دوورت بۆ نزیك دەكاتەوە.

قوباد تاڵەبانی جێگری سەرۆك وەزیرانی هەرێمی كوردستان، ئەمڕۆ لە ئیڤێنتی فاوندەیشن هەب تایبەتە بە پێشبڕکێی زیرەکیی دەستکرد کە بە پاڵپشتی میدیایی دەزگای میدیایی كوردسات بەڕێوەدەچێت وتارێکی پێشکەشکرد و رایگەیاند، هێشتا مرۆڤ زاڵە بەسەر AI دا و من لە   AIی ناترسم و پێم وانییە AIی كۆتایی دنیا بێت، خۆم AIی بەكاردەهێنم و سودم لێ‌ وەرگرتووە، وای كردووە كاره كانی خێراتربێت، بەڵام دەبێت AIی بەرپرسیارانە بەكاربهێنرێت.

ئاماژەی بەوەشكرد، زیرەكیی دەستكرد بەبێ‌ مرۆڤ بێسوودە، لەم ئیڤێنتەدا كۆمەڵێك گەنج بە بەرپرسیارییەوە مامەڵەیان لەگەڵ ئەی ئای كردووە، هەربۆیە حكومەتی هەرێم پێویستی بە گەنج و داهێنانەكانیانە و ئێمەش لە هەركوێ‌ بین پشتیوانیان دەبین.

بە ئامانجی چاودێریکردنی نرخ و کوالیتیی پێداویستییەکان، لیژنە هاوبەشەکانی قائیمقامیەتی سلێمانی هەڵمەتێکی مەیدانی بۆ سەر کۆگاکانی خواردن لە ناوچەی هوانە دەست پێکرد و لە نزیکەوە بەدواداچوونی بۆ رەوشەکە کرد.

لەو بارەیەوە، بابان ئەحمەد، سەرۆکی لیژنە هاوبەشەکانی قائیمقامیەتی سلێمانی، لە کۆنفرانسێکی رۆژنامەوانیدا رایگەیاند: "لەدوای بڕیاری بەرزکردنەوەی بەهای دۆلار بەرانبەر بە دینار لەلایەن حکومەتی عیراقەوە، هەندێک نیگەرانی و ترسی لای هاووڵاتییان دروست بووە، بەڵام ئەوان هاووڵاتییان دڵنیا دەکەنەوە کە رێگە بە زیادکردنی نرخەکان نادەن."

سەرۆکی لیژنە هاوبەشەکان ئاماژەی بەوەشکرد، لە رێگەی چاودێریکردنی وردی کۆگاکانی خۆراک و ناو بازاڕەوە، رێگری لە هەر سەرپێچییەک دەکرێت و هۆشداریشی دا کە "هەر بازرگان و کاسبکارێک نرخ لەسەر هاووڵاتییان زیاد بکات، رووبەڕووی سزای توندی یاسایی دەبێتەوە."

لە کۆتاییشدا جەخت کرایەوە کە لیژنە تایبەتمەندەکان بەردەوام دەبن لە سەردانیکردنی مەیدانی بۆ ناو بازاڕ، کۆگاکان و مارکێتەکان، و هەر شوێنێک پابەند نەبێت رووبەڕووی رێکاری توندی یاسایی دەکرێتەوە.

لەم لینکەوە بینەری کۆنفڕانسە رۆژنامەوانییەکەی قائیمقامیەتی سلێمانی ببە

 

 

سەندیکای زێڕنگەرانی هەولێر نوێترین نرخەکانی زێڕی بۆ ئەمڕۆ بڵاوکردەوە، کە تێیدا نرخی مسقاڵێک زێڕی عەیار 21 گەیشتووەتە 970 هەزار دینار.

بەپێی نرخەکانی سەندیکای زێڕنگەران لە هەولێر، ئەمڕۆ، نرخی یەک ئۆنسەی زێڕ لە بازاڕەکانی جیهاندا بە چوار هەزار و 121 دۆلار دیاری کراوە.

نرخی فرۆشتنی جۆرەکانی زێڕ لە بازاڕدا بەم شێوەیەیە:

مسقاڵێک زێڕی عەیار 22: 1,015,000 دینار

مسقاڵێک زێڕی عەیار 21: 970,000 دینار

مسقاڵێک زێڕی عەیار 18: 831,000 دینار

مسقاڵێک زێڕی عەیار 14: 646,000 دینار

مسقاڵێک زێڕی عەیار 12: 554,000 دینار

مسقاڵێک زێڕی عەیار 9: 415,000 دینار

سەندیکای زێڕنگەران ئاماژەی بەوەشکردووە، هەر گۆڕانکارییەک له نرخەكان پەيوەستە بە بەهاى بەرزبوونەوە و نزمبوونەوەى دۆلار لە بازاڕەكانى هەرێمی کوردستان و كردنەوەى بۆرسەكانى جيهان گۆڕانکاریەکان بەردەوام  دەبێت.

کەشناسیی هەرێم پێشبینی دەکات ئەمڕۆ لە چەند ناوچەیەک نمەباران ببارێت و سبەینێش شەپۆلێکی بارانبارین ناوچە شاخاوییەکان دەگرێتەوە.

بەڕێوەبەرایەتی گشتی کەشناسی و بوومەلەرزەزانی هەرێم رایگەیاند، ئەمڕۆئاسمان بە گشتی لە نێوان پەڵە هەور و نیمچە هەور دەبێت، لە کاتەکانی بەیانیدا ئەگەری بارینی نمەباران لە هەندێک ناوچەی سنوریی رۆژهەڵاتی هەرێم سەر بە پارێزگای سلێمانی، هەڵەبجە و بەشێک لە ئیدارەی گەرمیان هەیە.

ئاماژەی بەوەشکرد، سبەینێ ئاسمان بە گشتی پەڵەهەور و نیمچە هەور دەبێت، لە کاتەکانی شەودا لە ناوچە شاخاوییە سنورییەکانی باکور و باکوری رۆژئاوای هەرێم دەگۆڕێت بۆ هەوری تەواو، و ئەگەری هەیە لە دوای نیوەشەو بارانبارین لەو ناوچانەدا دەست پێبکات.

کەشناسی هەرێم ئەوەشی خستەڕوو، پلەکانی گەرما نزیک دەبێتەوە لە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی

هەولێر: 30 پلەی سیلیزی

پیرمام: 27 پلەی سیلیزی

سلێمانی: 29 پلەی سیلیزی

هەڵەبجە: 30 پلەی سیلیزی

چەمچەماڵ: 31 پلەی سیلیزی

دهۆک: 30 پلەی سیلیزی

زاخۆ: 30 پلەی سیلیزی

ئاکرێ: 30 پلەی سیلیزی

گەرمیان: 35 پلەی سیلیزی

حاجی ئۆمەران: 22 پلەی سیلیزی

سۆران : 27 پلەی سیلیزی

سەرۆکی حکومەتی هەرێم هێرشەکانی سەر فڕۆکەخانەکانی ریاز و ئەبها بەتوندی سەرکۆنە دەکات، هاوکات جەخت دەکاتەوە بەئامانجگرتنی خەڵکی سیڤیل قبووڵنەکراوە.

مەسرور بارزانی، سەرۆکی حکومەتی هەرێمی کوردستان لە پەیامێکدا رایگەیاند، هێرشکردنە سەر فڕۆکەخانەی نێودەوڵەتیی شا خالید لە ریاز و فڕۆکەخانەی نێودەوڵەتیی ئەبها قبووڵکراو نییە و جەختی کردەوە کە بە ئامانجگرتنی خەڵکی سیڤیل و ژێرخانی مەدەنی رەتکراوەیە.

لە پەیامەکەیدا سەرۆکی حکومەتی هەرێمی کوردستان ئاماژەی بەوەکرد، "پرسە و سەرەخۆشی لە کەسوکاری قوربانیان دەکەم و هاوسۆزیی خۆمان لەگەڵ گەل و سەرکردایەتیی شانشینی عەرەبستانی سعودی دەردەبڕین."

لە حەسەكەی رۆژئاوای كوردستان ئاڵۆزییەكان بەردەوامە و هێزەكانی ئاسایشی ناوخۆش خراونەتە حاڵەتی ئامادەباشیدا.

دوایی ئەوەی كە رۆژی رابردوو و لە کاتی هەڵكردنی ئاڵای سوریا لە پارێزگای حەسەكە رێوڕەسمێک بەڕێوەچوو، عەرەبەكانی شاری حەسەكە دەستیانكرد بە خۆپیشاندان لە دژی كوردەكان و هەڕەشەیان لە كوردەكان كرد و ئەوە بووە هۆی ئاڵۆزی لەناو ئەو شارە و هێزەكانی ئاسایشی ناوخۆ هەوڵی كۆنترۆڵكردنی رەوشەكەیان دا.

ئەمڕۆش لە دوایی نوێزی هەینی لە سێ گەڕەكی عەرەبنشینی غوەیران ، نشوە و عەزیزیەی سەر بە شاری حەسەكە جارێكی تر عەرەبەكانی ئەو گەڕەكە هەوڵی ئاژاوەگێڕیان دا و لە دژی هاووڵاتییانی كورد خۆپیشاندانیان ئەنجام دا و لە ئەنجامدا هێزەكانی ئاسایشی ناوخۆ لە ناو شار بڵاوەیان پێكرا و خرانە حاڵەتی ئامادەباشیدا.

لەلای خۆشیەوە، نورەدین ئەحمەد، پارێزگاری حەسەکە رایگەیاند، "داوا لە هەمووتان دەکەم، بەتایبەتی گەنجان، کە ژیرانە بیربکەنەوە و خۆڕاگر بن، هێزەکانی ئاسایش رۆڵە و برای ئێوەن و ئەرکیان پاراستنی ئێوە و دامەزراوە نیشتمانییەکانە، وەرن با دەست لە ناو دەست بنێین بۆ لەناوبردنی هەلی هەر لایەنێک کە هەوڵ دەدات هەست و نەستتان بقۆزێتەوە بۆ کێشکردنی وڵات بەرەو پشێوی و توندوتیژی."

هاوکات لەگەڵ بەردەوامبوونی گرژییەکان، پەیامنێری کوردسات نیوز رایگەیاند، بەهۆی ئاڵۆزییەکانەوە سێ هاووڵاتی مەدەنی کورد بریندرابوون.

پارێزگاری حەسەکە داوای هێوربوونەوە و پاراستنی ئارامی لە هاووڵاتییان دەکات و رایدەگەیەنێت؛ داوا لە گەنجان دەکەم دان بە خۆیاندا بگرن و رووبەڕووی هێزە ئەمنییەکان نەبنەوە.

نورەدین ئەحمەد، پارێزگاری حەسەکە لە هەژماری تایبەتی خۆی لە تۆڕی کۆمەڵایەتیی  ئێکس پەیامێکی ئاراستەی هاووڵاتییانی پارێزگاکە کرد و رایگەیاند، ئەمڕۆ بە دڵسۆزییەوە بۆ ئاسایش و سەلامەتیی هەر تاکێکی ئێوە و ئاسایشی وڵاتەکەمان روتان تێدەکەم، دەربڕینی داواکردنی مافەکان مافێکی رەوایە و یاسا گەرەنتی کردووە، ئێمەش بە هەموو رێز و پێزانینێکەوە گوێ لە دەنگتان دەگرین."

ئاماژەی بەوەشکرد، بۆ ئەوەی دەنگتان بە بەرزی و بەهێزی بپڕێتەوە، پێویستە هەموومان پارێزگاری لە ئاشتییانەبوونی ئەم جووڵانەوانە بکەین. تێکدانی موڵکوماڵ یان چوونە ناو ڕووبەڕووبوونەوە لە بەرژەوەندیی دۆزەکەتاندا نییە، بەڵکو سەرنجەکان لەسەر داواکارییە رەواکانتان دوور دەخاتەوە و زیان بە ئاسایشی کۆمەڵگە دەگەیەنێت."

پارێزگاری حەسەکە راشیگەیاند، "داوا لە هەمووتان دەکەم، بەتایبەتی گەنجان، کە ژیرانە بیربکەنەوە و خۆڕاگر بن، هێزەکانی ئاسایش رۆڵە و برای ئێوەن و ئەرکیان پاراستنی ئێوە و دامەزراوە نیشتمانییەکانە، وەرن با دەست لە ناو دەست بنێین بۆ لەناوبردنی هەلی هەر لایەنێک کە هەوڵ دەدات هەست و نەستتان بقۆزێتەوە بۆ کێشکردنی وڵات بەرەو پشێوی و توندوتیژی."

ماڵپەڕی شەفافییەت داهاتی ئەم هەفتەیەی سلێمانی بڵاوکردەووە، کە زیاتر لە حەوت ملیار دینارە.

ماڵپەڕی شەفافییەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان بڵاویکردەووە، لە رۆژی 3ـی10ـی2026 تا 9ـی10ـی2026 داهاتی نانەوتی حەوت ملیار و 950 ملیۆن و 743 هەزار دیناربووە.

ئاماژەی بەوەشکردووە، بە بەراورد بە هەفتەی رابردوو زیاتر لە شەش ملیار دینار داهات کەمی کردووە.

ماڵپەڕی شەفافییەت ئەوەشی خستووەتەڕوو، داهاتەکە ٪84 بە شێوەی نەختینەیە و ٪16ـی بە شێوەی چەکە.

جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.

کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاماژەی بەوەکرد، ئەگەری هەورەبروسکە و تاوەبارانی کورتخایەن لە ناوچە جیاجیاکان بە پچڕپچڕی هەیە.

ئەمڕۆ هەینی، بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، لە زۆربەی کاتەکان نیمچەهەور دەبێت و لە هەندێک ناوچە دەگۆڕێت بۆ هەوری تەواو، ئەگەری بروسکە و تاوەبارانی کورتخایەن لە ناوچە جیاجیاکان بە پچڕپچڕی هەیە.

ئاماژەی بەوەشکرد، لەکاتەکانی شەودا کاریگەری ئەم شەپۆلە لەسەر ناوچەکە لاواز دەبێت و کەشوهەوا ئاسایی دەبێتەوە، پلەکانی گەرماش نزیکدەبێتەوە لە تۆمارەکانی دوێنێ .

کەشناسیی هەرێم ئەوەشی خستەڕوو، سبەىنێ کەشوهەوا بە گشتی لە نێوان پەڵەهەور و نیمچەهەور دەبێت.

بەرزترین پلەکانی گەرمای پێشبینیکراوی سبەینێ بە پلەی سیلیزی:

هەولێر:31 پلەی سیلیزی

پیرمام: 28 پلەی سیلیزی

سلێمانی: 30 پلەی سیلیزی

هەڵەبجە:31 پلەی سیلیزی

چەمچەماڵ: 32 پلەی سیلیزی

دهۆک: 29 پلەی سیلیزی

زاخۆ: 30 پلەی سیلیزی

ئاکرێ: 30 پلەی سیلیزی

گەرمیان: 37 پلەی سیلیزی

حاجی ئۆمەران: 22 پلەی سیلیزی

سۆران : 30 پلەی سیلیزی

 

دوای بێسەروشوێنبوونی ژمارەیەک گەنجی دەڤەری راپەڕین، توانرا بەدواداچونی خێرا بۆ بابەتەکە بکرێت گەڕاندنەوەی سەرجەم کۆچبەران بە سەلامەتی.

دوای ئەوەی چەند هەفتەیەک لەمەوبەر 33 گەنج و لە رۆژانی رابردووشدا سێ گەنجی تر گەڕێندرانەوە، بەرەبەیانی ئیمڕۆ هەینی، 11 گەنجی تری دەستبەسەرکراوی لیبیا بە سەلامەتی گەیەندرانەوە خاکی هەرێمی کوردستان و رادەستی خێزانەکانیان کرانەوە.

ئەم پڕۆسەیە بە یاوەریکردنی سەلیم پاشا، ڕاوێژکار لە فەرمانگەی پەیوەندییەکانی دەرەوە بەڕێوەچوو. لە فرۆکەخانەش لەلایەن عەلی سەعید، بەڕێوەبەری داتا و زانیاری لە ناوەندی هاوبەشی هەماهەنگی قەیرانەکان (JCC) و تیمەکانی وەزارەتی ناوخۆ پێشوازییان لێکرا. دوای ئەنجامدانی پشکنینی تەندروستی، سەرجەم گەنجەکان گەیەندرانەوە باوەشی بنەماڵەکانیان.

لە ئێستاشدا هەوڵەکانی حکومەتی هەرێمی کوردستان بۆ دۆزینەوەی سۆراخ و گەڕاندنەوەی 10 گەنجی تری بەندکراوی دەڤەری راپەڕین لە لیبیا بەردەوامن.

شایەنی باسە، بەهۆی رێکارە توندەکانی حکومەتی هەرێمی کوردستان لە ماوەی رابردوودا بۆ رووبەڕووبوونەوەی تۆڕەکانی قاچاخچێتی، ئاستی کۆچی نایاسایی بە شێوەیەکی بەرچاو کەمی کردووە.