کوردستان
بەبۆنەی ساڵیادی ئەنفالەوە، مەکتەبی سیاسیی یەکێتیی نیشتمانی کوردستان، پەیامێکی بڵاوکردوەتەوە و تێیدا هاتووە؛ ئەمساڵ سی و هەشت ساڵ بەسەر ئەو تاوانە کۆمەڵکوژیەدا تێدەپەرێت کە بە هەشت قۆناغی پڕ ناسۆر دژی گەلەکەمان بەرپا کرا.
ئاماژەی بەوەشکردوە، لەو کۆمەڵکوژیەدا هەزاران هەزار ژن و پیاو و منداڵی کورد کرانە قوربانی سیاسەتی رژێمی دڕندەی بەعس، لەو ساڵیادەدا یەکێتیی دوپاتی دەکاتەوە خاوەندارێتی هەمیشەیی لە ماف و شایستەکانی قەرەبووکردنەوەی مادی و مەعنەوەی و خزمەتکردنی کەسوکاری ئەنفالکراوان و خەڵکە خۆراگرەکەمان دەکاتەوە و بێ درێغ هەوڵیان بۆ دەدات .
دەقی پەیامەکەی مەکتەبی سیاسیی
ئەنفال زامێکی قووڵە لە جەستەی نەتەوە و نیشتمان و خەمێکی هەمیشەیی کوردستانی و ئینسانییە.
ئەمساڵ کە سی و هەشت ساڵ بەسەر ئەو تاوانە کۆمەڵکوژیەدا تێدەپەرێت کە بە هەشت قۆناغی پڕ ناسۆر دژی گەلەکەمان بەرپا کرا و هەزاران هەزار ژن و پیاو و منداڵی کورد کرانە قوربانی سیاسەتی رژێمی دڕندەی بەعس، تەئکید لەسەر بڕیاری دادگای باڵای تاوانەکان دەکەینەوە کە ئەنفالی بە تاوانی جەنگ و دژە مرۆیی ناساندووە و خەباتی بێوچانیشمان بۆ بە نێودەوڵەتیکردنی کەیسەکە وەک جینۆساید و تاوانی دژی مرۆڤایەتی چڕ تر دەکەینەوە.
یەکێتیی نیشتمانیی کوردستان لە رێی دامودەزگاکانی حکومەتی هەرێم و فیدراڵەوە خاوەندارێتی هەمیشەیی لە ماف و شایستەکانی قەرەبووکردنەوەی ماددی و مەعنەوەی و خزمەتکردنی کەسوکاری ئەنفالکراوان و خەڵکە خۆراگرەکەمان دەکاتەوە و بێ درێغ هەوڵیان بۆ دەدات .
لەیادی ئەو کارەساتەدا
سەری رێز بۆ گیانی پاکی شەهیدانمان دادەنەوێنین.
درود بۆ خۆڕاگریی كەسوكاری بێسەرو شوێنبوانی ئەنفال.
مەکتەبی سیاسیی
یەکێتیی نیشتمانیی کوردستان
بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە محەمەد سەمعان ئاغا، سەرۆکی بەرەی تورکمانی عیراقی کرد و لە میانی دیدارەکەدا جەخت لە دوورخستنەوەی وڵات لە ململانێکان کرایەوە.
لە دیدارێکدا کە د. خالید شوانی، وەزیری دادی عیراق ئامادەبوو، هەڵسەنگاندن بۆ رەوشی ناوچەکە و عیراق کرا و جەخت لە دوورخستنەوەی وڵات لە ململانێکان کرایەوە.
هەردوولا دووپاتیان لە تەواوکردنی رێکارە دەستوورییەکان و پێکهێنانی حکومەتێکی نیشتمانیی خزمەتگوزار کردەوە کە ببێتە مایەی خۆشگوزەرانی و ئارامی زیاتر بۆ هاووڵاتیان.
لە روداوێکی هاتوچۆدا لەسەر رێگای (پێنجوێن – سەیدسادق) مێرمنداڵێکی تەمەن 13 ساڵ گیانی لەدەستداوە و باوکیشی بە سەختی بریندارە.
بە گوێرەی زانیارییەکانی پەیامنێری کوردسات نیوز، روداوەکە لە نێوان ماتۆڕسکیلێک و ئۆتۆمبێلێکی بارهەڵگردا رویداوە، باوک و کوڕەکە ماتۆڕسکیلیان پێبوە.
سەرچاوەیەک لە نەخۆشخانەی شەهید شەوکەت بە کوردسات نیوزی راگەیاند، تەرمی مێرمنداڵەکە رێکارە پێویستییەکانی بۆ ئەنجامدراوە و باوکیشی دوای وەرگرتنی چارەسەر بەهۆی سەختی برینەکەیەوە رەوانەی نەخۆشخانەی شاری سلێمانی کراوە .
بە گوێرەی زانیارییەکان ئەو کوڕ و باوکە، بە مەبەستی کۆکردنەوەی گیا بەهارییەکان رویان لە ناوچە کوێستانییەکانی پێنجوێن کردوە و لە کاتی گەڕانەوەدا توشی روداوەکە بوون.
ئەمڕۆ دووشەممە، بەهۆی خراپیی کەشوهەوا و ناسەقامگیریی بارودۆخی رێگاکان، روداوێکی سەختی هاتوچۆ لەسەر رێگای ئامێدی – زاخۆ رویدا.
لە روداوەکەدا پاسێکی گواستنەوەی خوێندکارانی زانکۆی زاخۆ وەرگەڕا و بەهۆیەوە 14 خوێندکار بریندار بوون. بەپێی زانیارییە سەرەتاییەکان، هۆکاری سەرەکی روداوەکە بۆ تەم و باران و ناسەقامگیریی کەشوهەوای ناوچەکە دەگەڕێتەوە.
لەلای خۆشیەوە، د. ئارام محەمەد قادر، وەزیری خوێندنی باڵا و توێژینەوەی زانستی، پەیامێکی بڵاوکردەوە و تێیدا هیوای تەندروستییەکی باش و سەلامەتی بۆ خوێندکارە بریندارەکان خواست.
وەزیری خوێندنی باڵا جەختیکردەوە، لەگەڵ لایەنە پەیوەندیدارەکان و نەخۆشخانەکان لەسەر هێڵە بۆ دابینکردنی هەر پێویستییەک و بەدواداچوون بۆ رەوشی تەندروستیی بریندارەکان.
وەزارەتی پەروەردە ساڵنامەی هەمواركراوی خوێندن و تاقیكردنەوەكانی بۆ پۆلی 9ی بنەڕەتی و 12ی ئامادەیی و پەیمانگەكان بڵاوكردەوە و رایگەیاند، ئەو خوێندنگەیانەی تاقیكردنەوەی نیوەی وەرزیان تەواونەكردووە لەگەڵ دەستپێكردنەوەی دەوام تاقیكردنەوە دەستپێبكەنەوە.
وەزارەتی پەروەردەی حکومەتی هەرێم رایگەیاند، ئەو خوێندنگەیانەی تاقیكردنەوەی نیوەی وەرزیان تەواونەكردووە لەگەڵ دەستپێكردنەوەی دەوام تاقیكردنەوە دەستپێبكەنەوە.
ئاماژەی بەوەشکرد، كارگێڕی خوێندنگەكان سەرپشكن بۆ دیاریكردنی رۆژانی تاقیكردنەوەی كۆتایی وەرزی دووەمی پۆلی 9 و 12.
وەزارەتی پەروەردە ئەوەشی خستەڕوو، تاقیكردنەوەكانی خولی یەكەمی پۆلی 9 لە رۆژی 14ی ئایار تا 25ی ئایار ئەنجام دەدرێت، هاوکات تاقیكردنەوەكانی نیشتمانی پۆلی 9 خولی دووەم لە 15ی 6 تا 30ی 6 ئەنجامدەدرێن.
راشیگەیاند، تاقیكردنەوەی خولی یەكەمی پۆلی 12 لە 14ی 6 تا 8ی 7 ئەنجامدەدرێن و تاقیكردنەوەكانی خولی دووەمی پۆلی 12 لە 11ی 8 تا 27ی 8 دەبێت.
سەبارەت بە تاقیکردنەوەی پەیمانگەکان وەزارەتەکە دەڵێت؛ تاقیكردنەوەكانی وەرزی دووەمی پەیمانگەكان لەگەڵ دەستپێكردنەوەی دەوامی پەیمانگەكان دەستپێبكەن و دەبێت كۆتا رۆژی تاقیكردنەوەی پەیمانگەكان لە 30ی 4 تێپەڕنەكات.
" تاقیكردنەوەی كۆتایی ساڵی پەیمانگەكان وەك خۆی دەبێت لە 9ی 5 تا 20ی 5 ئەنجامدەدرێن" وەزارەتی پەروەردە وا دەڵێت.
بەهۆی هاتنی شەپۆلێکی بارانبارین و هەورەبروسکە، پلەکانی گەرما لە زۆربەی ناوچەکانی هەرێمی کوردستان روو لە دابەزین دەکەن.
بەڕێوەبەرایەتی گشتی کەشناسی و بوومەلەرزەزانی هەرێم پێشبینییەکانی بۆ 48 سەعاتی داهاتوو بڵاوکردەوە و رایگەیاند، بۆ ئەمڕۆ دووشەممە ئاسمانی هەرێم بە گشتی هەوری تەواو دەبێت و لە دوای نیوەڕۆوە شەپۆلێکی تاوەباران و هەورە بروسکە زۆربەی ناوچەکان دەگرێتەوە.
ئەوەشی خستەڕوو، لە دوای نیوەڕۆوە بارانبارین فراوان دەبێت و ئەگەری هەورە بروسکە و تەرزە هەیە، بەتایبەت لە سەنتەری شارەکان و ناوچە دەشتاییەکانی هەولێر.
کەشناسی هەرێم ئاشکراشیکرد، سبەینێ سێشەممە ئاسمان بەرەو سەقامگیربوون دەچێت و دەبێتە پەڵەهەور، پلەکانی گەرماش کەمێک بەرز دەبنەوە.
بەرزترین پلەکانی گەرمای پێشبینیکراو بۆ ئەمرۆ:
هەولێر: 16 پلەی سیلیزی
پیرمام: 10 پلەی سیلیزی
سۆران: 12 پلەی سیلیزی
حاجی ئۆمەران: 6 پلەی سیلیزی
سلێمانی: 14 پلەی سیلیزی
چەمچەماڵ: 15 پلەی سیلیزی
دهۆک: 12 پلەی سیلیزی
زاخۆ: 13 پلەی سیلیزی
هەڵەبجە: 14 پلەی سیلیزی
گەرمیان: 20 پلەی سیلیزی
لە پەیامێکی پیرۆزبایدا، نوخشە ناسحی پارێزگاری هەڵەبجە پیرۆزبایی لە نزار ئامێدی، سەرۆک کۆماری نوێی عیراق دەکات و هیوای سەرکەوتنی بۆ دەخوازێت لەم بەرپرسیارێتییە نیشتمانییەدا، لە پەیامکەدا سوپاسی بافڵ جەلال تاڵەبانی سەرۆکی یەکێتیشی کردوە، کە توانیوتەی پارێزگاری لە پۆستی سەرۆک کۆمار بکات.
پارێزگاری هەڵەبجە ئاماژەی بەوەشکردوە بە پێویستی دەزانێت سوپاس و پێزانینی قوڵی خۆی و خەڵکی هەڵەبجە ئاڕاستەی د. لەتیف رەشید سەرۆک کۆماری پێشوی عیراق بکات، لە پای ئەو پاڵپشتییە بەردەوامانەی و ئەو هەوڵە مێژووییانەی کە دای لە پێناو تەواوکردنی ڕێکارە یاساییەکانی بەپارێزگابوونی هەڵەبجە وەک 19مین پارێزگای عیراق.
دەقی پەیامەکەی پارێزگاری هەڵەبجە
بە شانازییەکی زۆرەوە، پیرۆزباییەکی گەرم ئاراستەی بەڕێز هەڤاڵ بافڵ جەلال تاڵەبانی، سەرۆکی یەکێتیی نیشتمانیی کوردستان دەکەم بۆ ئەم سەرکەوتنە سیاسییە گەورەیە و پاراستنی پێگەی سەرۆکایەتی کۆمار وەک قەڵایەکی دەستووری بۆ کورد لە بەغدا.
هەروەها پیرۆزباییەکی دڵسۆزانە ئاراستەی برای بەڕێزم فەخامەتی سەرۆک کۆمار نزار ئامێدی دەکەم بەبۆنەی دەرچوونی وەک سەرۆک کۆماری عێراق. هیوای سەرکەوتنی بۆ دەخوازم لەم بەرپرسیارێتییە نیشتمانییەدا و دڵنیایین فەخامەتیان وەک هەمیشە خەمخۆری دۆزی ڕەوای گەلەکەمان و پارێزگای هەڵەبجە دەبن.
لێرەدا بە پێویستی دەزانم سوپاس و پێزانینی قووڵی خۆم و خەڵکی هەڵەبجە ئاراستەی فەخامەتی د. لەتیف ڕەشید سەرۆک کۆماری پێشووی عێراق بکەم، بۆ پاڵپشتییە بەردەوامەکانی و ئەو هەوڵە مێژووییانەی کە دای لە پێناو تەواوکردنی ڕێکارە یاساییەکانی بەپارێزگابوونی هەڵەبجە وەک ١٩مین پارێزگای عێراق؛ ئەو خەمخۆرییەیت هەرگیز لە یادی خەڵکی ئەم شارە ناچێت.
هیوای خێر و ئارامی بۆ هەموو لایەک دەخوازین.
نوخشە ناصح
پارێزگاری هەڵەبجە
کونسوڵخانەی ئەمریکا لە بەغداد پیرۆبایی خۆی ئاراستەی نزار ئامێدی، سەرۆک کۆماری نوێی عیراق کرد.
ئەمڕۆ یەکشەممە، کونسوڵخانەی ئەمریکا لە بەغداد لە بڵاوکراوەیەکدا رایگەیاند، گەرمترین پیرۆزبایی خۆی ئاراستەی سەرۆک نزار ئامێدی دەکات بەبۆنەی هەڵبژاردنی و دەستبەکاربوونی وەک سەرۆک کۆماری نوێی عیراق.
جەختی لەسەر ئەوەشکردەوە، کە بەوپەڕی خۆشحاڵییەوە چاوەڕێی کارکردن لەگەڵ سەرکردایەتی نوێی عیراق دەکەن بۆ هەنگاونان بەرەو ئایندەیەکی سەروەری و سەقامگیر و خۆشگوزەران بۆ هەموو عیراقییەکان، لە چوارچێوەی بەرژەوەندییەکانی هەردوولا.
نزار ئامێدی سەرۆك كۆماری عیراق، لە كۆشكی بەغداد پێشوازی لە بافڵ جەلال تاڵەبانی، سەرۆكی یەكێتیی نیشتمانیی كوردستان و قوباد تاڵەبانی، جێگری سەرۆك وەزیرانی هەرێم كرد.
لەدیدارێكدا كە دەرباز كۆسرەت رەسوڵ ئەندامی مەكتەبی سیاسی یەكێتی و د. خالید شوانی وەزیری داد و د.هەڵۆ عەسكەری وەزیری ژینگە ئامادەیبوون، ئامادەبووان پیرۆزبایی ئاڕاستەی نزار ئامێدی كرد بەبۆنەی دەستبەكاربوونی وەك سەرۆك كۆماری عیراق و هیوای سەركەوتنیان بۆ خواست لە جێبەجێكردنی ئەركە نیشتمانییەكانی و خزمەتكردنی گەلی عیراق و پتەوكردنی سەقامگیری لە وڵاتدا.
هەروەها باس لەبارودۆخی گشتیی سیاسی و ئەمنی عیراق و پێشهاتەكانی ناوچەكە كراو جەخت لەسەر گرنگی بەهێزكردنی هاوكاری و هەماهەنگی نێوان حكومەتی فیدراڵی و حكومەتی هەرێمی كوردستان كرایەوە بۆ ئەوەی بەشداربن لە چەسپاندنی سەقامگیری و گەیشتن بە بەرژەوەندی هاوبەش.
هاوكات جەختیان لەسەر پێویستی یەكخستنی هەوڵەكان بۆ روبەڕوبوونەوەی ئاستەنگەكانی ئێستاو كاركردن بۆ پاڵپشتی دیالۆگ و لێكتێگەیشتن لەنێوان هێزە سیاسییە جیاوازەكان بۆ بەدیهێنانی خواستەكانی گەلی عیراق بۆ ئاسایش و گەشەپێدان و سەقامگیری كردەوە.
وەزارەتی کارەبا ئاگاداری هاووڵاتیان دەکات کە ئێستا دەتوانن لە رێگەی ئی-پسوڵە پارەی کارەبا بدەن.
بەڕێوەبەرایەتی گشتیی کارەبای سلێمانی رایگەیاندووە: وەزارەتی کارەبا بە خۆشحاڵییەوە رایدەگەینێت کە پارەدانی کارەبا دووبارە بەردەستە و سەکۆی ئی-پسووڵە دەگرێتەوە، ئەمەش دوای ئەوەدێت کە زانیارییەکانی هاوبەشانی نوێ گواسترانەوە سیستەمی نوێی پسوولەکردن.
لە راگەیەندراوەکەشدا هاتووە: سیستمی نوێی پسوڵەکردنی تایبەت بەوەزارەتی کارەبا بەشێکە لە پڕۆژەی روناکی و ئامانج لێی بریتییە لە باشترکردنی خزمەتگوزاری و پڕۆسەی پسوولەکردنە لەڕێگەی سیستەمێکی یەکخراو
قائیمقامیەتی سلێمانی دڵنیای دەدات هاووڵاتیان رایگەیاند، قەیرانی غاز كۆتایهاتووە رەوشەكە وەك پێش جەنگی لێهاتووەتەوە.
عومەر عەبدوڵا، سەرۆكی لیژنەی دابەشكردنی غاز لە قائیمقامیەتی سلێمانی بە كوردسات نیوزی راگەیاند، لە ئەمڕۆوە میكانیزمی دابەشكردنی غاز گەڕاوەتەوە بۆ دۆخی پێش جەنگ، روونیشیكردەوە، ڕۆژانە 240 تۆن غاز رەوانەی پارێزگای سلێمانی دەكرێت و لە رێگەی 12بارهەڵگرەوە وەردەگرێت، كە پێشتر لە كاتی جەنگدا رۆژانە تەنها دوو بارهەڵگر دەهات.
روونیشیكردەوە، شەش ئۆتۆمبێلی بارهەڵگر تەرخانكراون بۆ دابینكردنی پێداویستییەكانی سەنتەری شاری سلێمانی، لەكاتێكدا ئەو بڕە دەمنێتەوە بەسەر قەزاو ناحیەكاندا دابەشدەكرێت، ئاماژەی بەوەشكرد، قەیرانەكە بەتەواوەتی كۆتاییهاتووە، و چیتر پێویست ناكات هاووڵاتیان بچنە وێستگەكانی و سەرەبگرن.
دووپاتیكردەوە، ئەو رێكارانە دەبێتە هۆی دابینكردنی جێگیری غاز و دابینكردنی پێداویستییەكانی هاووڵاتیان لەسەرتاسەری سلێمانی.
خاتوو شاناز ئیبراهیم ئەحمەد پەیامێکی هاوخەمی بۆ کۆچی دوایی د. دیار نەجیب بڵاوکردەوە و تێیداهاتووە: کۆچی ئەم پزیشکە دڵسۆزەی شار خەمێکی تر و کەلێنێکی تری لە کەرتی تەندروستیدا لەسلێمانی جێهێشت.
دەقی پەیامەکە
بەبیستنی هەواڵی ماڵئاوایی یەکجارەکی (د. دیار نەجیب عەبدولکەریم مودەڕیس)، زۆر غەمباربووم.
پرسەو سەرەخۆشی لەخێزان و کەسوکارەکەی و هاوڕێکانی و هەموو پزیشکان و ئەکەم و هاوبەشی خەم و پەژارەیانم.
خواى گەورە لەکۆچکردوو خۆش بێت، وجێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.
کۆچی ئەم پزیشکە دڵسۆزەی شار خەمێکی تر و کەلێنێکی تری لە کەرتی تەندروستیدا لەسلێمانی جێهێشت.
شاناز ئیبراهیم ئەحمەد
سەرۆکی فراکسیۆنی یەکێتی لە ئەنجومەنی نوێنەرانی عیراق پەیامێکی سوپاس و پێزانینی ئاڕاستەی تەواو ئەو کەس و لایەنانەکرد کە هاوکاربوون لە هەڵبژاردنی نزرار ئامێدی سەرۆک کۆماری نوێی عیراق
دەقی پەیامەکە:
سوپاس و پێزانین
بەناوی فراکسیۆنی یەکێتیی نیشتمانیی کوردستان لە ئەنجومەنی نوێنەران، سوپاس و پێزانینی زۆری خۆمان ئاراستەی سەرۆکایەتی ئەنجومەنی نوێنەران و جێگری یەکەم، و سەرجەم سەرۆک فراکسیۆنەکان و خانم و بەڕێزان ئەندامانی ئەنجومەنی نوێنەران دەکەین، بۆ هەڵوێستە نیشتمانییەکانیان و هەوڵە جدییەکانیان کە بووە هۆی سەرکەوتنی پرۆسە دیموکراسییەکە لە هەڵبژاردنی بەڕێز (نزار ئامێدی) وەک سەرۆک کۆماری عێراق.
ئەم هەنگاوە بەرهەمی تەبایی و هەڵوێستی هاوبەشی هەموو نوێنەران بوو، کە تێیدا پاراستنی ئیرادە و شکۆی دامەزراوەی یاسادانان ئامانجی کۆکەرەوەی هەمووان بوو، ئەمەش بووە هۆی گرتنەبەری ئەم بڕیارە دروست و هاوسەنگە لەپێناو خزمەتکردنی بەرژەوەندیی گشتیدا. لێرەشەوە، سوپاسی دووبارەی خۆمان بۆ هەر پەرلەمانتارێک دەردەبڕین بۆ دڵسۆزی و کۆششەکانیان لە بە ئەنجامگەیاندنی ئەم ئیستیحقاقە دەستوورییە گرنگە.
هەرێم کەمال ئاغا
سەرۆکی فراکسیۆنی یەکێتیی نیشتمانیی کوردستان
لە ئەنجومەنی نوێنەرانی عێراق
بەبۆنەی هەڵبژاردنی وەک سەرۆک کۆماری عیراق، شۆڕش ئیسماعیل، وەزیری پێشمەرگەی حکومەتی هەرێمی کوردستان پیرۆزبایی لە نزار ئامێدی سەرۆک کۆماری نوێی عیراق دەکات و ئاماژەی بەوەشکردوە متمانەبەخشین پێتان لەم قۆناغەدا، بەرپرسیارێتییەکی گەورەیە بۆ پاراستنی بەرژەوەندییە باڵاکان.
دەقی پەیامەکە:-
‘’بەڕێز کاک نزار ئامێدی، سەرۆک کۆماری نوێی عێراقی فیدراڵ.
بەبۆنەی هەڵبژاردن و دەستبەکاربوونی بەڕێزتان وەک سەرۆک کۆماری عێراق، گەرمترین پیرۆزباییتان ئاڕاستە دەکەم. متمانەبەخشین بە ئێوە لەم قۆناغەدا، بەرپرسیارێتییەکی گەورەیە بۆ پاراستنی بەرژەوەندییە باڵاکان.
هیوای سەرکەوتنتان بۆ دەخوازم لەم ئەرکە نیشتمانییەدا؛ ئومێدەوارین دەستبەکاربوونتان ببێتە هەوێنی یەکڕیزی و چەسپاندنی مافە دەستوورییەکانی گەلی کوردستان و تەواوی پێکهاتەکانی عێراق، وەک پارێزەری دەستوور و سەروەریی یاسا.
"دووبارە پیرۆزباییتان لێدەکەم و هەمیشە سەرکەوتوو بن.’’
شۆڕش ئیسماعیل
وەزیری پێشمەرگەی حکومەتی هەرێمی کوردستان
١١ی نیسانی ٢٠٢٦
دوای هەڵبژاردنی وەک سەرۆک کۆماری عیراق، نزار ئامێدی لە یەکەم وتاریدا رایگەیاند، شەرەفمەندە بە ئەرکەکەی و بەڵێنیش دەدات بەرگریکارێکی دادپەروەربێت لە بەرژەوەندییەکانی گەلی عیراق و بەرپرسیارانە هەڵسوکەوت بکات.
سەرۆک کۆماری نوێی عیراق جەختیکردەوە، لهسهر رێبازی سهرۆك مام جهلال بهردهوام دەبێت و سوپاسی یەکێتی نیشتیمانی کوردستانیشی کرد بۆ پێدانی ئەو متمانەیە و کاندیدکردنی بۆ پۆستی سەرۆک کۆماری عیراق
لە بەشێکی دیکەی وتارەکەیدا، نزار ئامێدی ئاماژەی بەوەکرد، پێویسته لهم ساته ههستیارهدا، کە ناوچهكهی پێدا تێدهپهڕێت بهرپرسیارانهتر ههڵسوكهوت بكهن و هەموو هەوڵێکیان بۆ ئەوەبێت عیراق لە جەنگ بە دور بێت.
ناوبراو دوپاتیشیکردەوە، كاردهكهن بۆئهوهی عیراق بهرهو پێش بچێت و پابەند دەبێت بە کارکردن لەگەڵ دەسەڵاتەکانی جێبەجێکردن، یاسادانان و دادوەرییەکان.
مەکتەبی سیاسی یەکێتیی نیشتمانیی کوردستان بەبۆنەی هەڵبژاردنی نزار ئامێدی بە سەرۆک کۆماری عیراق، پەیامێکی بڵاوکردەوە و تێیدا هاتووە: وێڕای پیرۆزبایی لە تیمی دانوستاندکارمان بە سەرۆکایەتی هەڤاڵ بافل جەلال تاڵەبانی سەرۆکی یەکێتیی نیشتمانیی کوردستان کە لەگەڵ لایەنەکان هەوڵی چڕی دیبلۆماسیی و گفتوگۆیان و بردنەوەی کاندیدی یەکێتیی سەرخست، پیرۆزبایی لە پەرلەمانتاران و هێز و لایەنە سیاسییەکانی وڵات دەکەین کە ئەم ئیستحقاقە دەستووری و دیموکراتییەیان جێبەجێکرد ، بەرەو ئەرکەکانی داهاتووی پێکهێنانی حکومەت و دامەزراوەکانی.
دەقی پەیامەکە
برا و هەڤاڵمان فەخامەتی سەرۆک کۆمار نزار محەمەد سەعید ئامێدی
بەبۆنەی هەڵبژاردنتان وەك سەرۆك كۆماری عێراقی فیدڕاڵ ، پیرۆزباییەكی
گەرمتان ئاراستە دەكەین و هیوای سەرکەوتنتان بۆ دەخوازین.
ئەرکی سەرۆک کۆماری ئەرکێکی سەنگین و قورسە و دڵنیاین بەرێزتان کە خوێندکاری بە وەفای خوێندگەی سەرکردەی کۆچکردوو سەرۆک مام جەلال و رێڕەوی نیشتمانیی و دیموکراتی عێراقی دەستووری و فیدراڵن ، لەم ئەرکەدا سەرکەوتوو دەبن و متمانەی بەدەستهێنراوی ئەندامانی ئەنجومەنی نوێنەران دەپارێزن .
بەم بۆنەیەشەوە وێڕای پیرۆزبایی لە تیمی دانوستاندکارمان بە سەرۆکایەتی هەڤاڵ بافل جەلال تاڵەبانی سەرۆکی یەکێتیی نیشتمانیی کوردستان کە لەگەڵ لایەنەکان هەوڵی چڕی دیبلۆماسیی و گفتوگۆیان و بردنەوەی کاندیدی یەکێتیی سەرخست، پیرۆزبایی لە پەرلەمانتاران و هێز و لایەنە سیاسییەکانی وڵات دەکەین کە ئەم ئیستحقاقە دەستووری و دیموکراتییەیان جێبەجێکرد ، بەرەو ئەرکەکانی داهاتووی پێکهێنانی حکومەت و دامەزراوەکانی.
ئومێدەوارین ئەم قۆناغەی سەرۆكایەتی فەخامەتتان ببێتە مایەی كردنەوەی دەرگای چارەسەری كێشەكانی نێوان هەرێمی كوردستان و حكومەتی فیدراڵی لەپێناو پتەوكردنی گیانی پێكەوەیی و لێتێگەیشتنی نێوان گشت لایەنەکان .
دووبارە پیرۆز بێت
مەكتەبی سیاسی
یەكێتیی نیشتمانیی
١١-٤-٢٠٢٦