کوردستان
لە چوارچێوەی رێکارە داراییەکان و پابەندبوون بە رێنماییەکانی بانکی ناوەندییەوە، پڕۆژەی هەژماری من بڕیاری دوورخستنەوەی بانکی گەشەپێدانی نێودەوڵەتی IDMـی لە پڕۆژەکە راگەیاند، بەو هۆیەوە ناوبراو ئێستا لە مامەڵەکردن بە دۆلاری ئەمریکی بێبەش کراوە و سوودمەندەکانی دەگوازرێنەوە بۆ بانکێکی دیکە.
بەگوێرەی زانیارییەکانی پڕۆژەی هەژماری من، لە ئەیلوولی 2025ـدا ئەم بڕیارە دراوە و تێیدا بانکی گەشەپێدانی نێودەوڵەتی بە تەواوی لە پڕۆژەکە دوورخراوەتەوە. ئامانجی سەرەکی لەم گواستنەوەیە ئەوەیە کە سوودمەندانی حکومەتی هەرێمی کوردستان بتوانن بەبێ کێشە مامەڵە داراییەکانیان بە دۆلاری ئەمریکی ئەنجام بدەن و کارتە بانکییەکانیان لە ناوخۆ و دەرەوەی عیراق بەکاربهێنن.
پڕۆژەی هەژماری من جەختی لەوە کردەوە، لە ئێستادا بەردەوامە لە کارکردن لەگەڵ حەوت بانکی بەشدار کە بە تەواوی پابەندن بە رێنمایی و رێساکانی بانکی ناوەندی عیراقەوە، بە مەبەستی پاراستنی مافی سوودمەندان و مسۆگەرکردنی خزمەتگوزاریی متمانەپێکراو.
كۆنفرانسی كورد لە ئەوروپا كۆتایی هات و لەبارەی پرۆسەی ئاشتی و داهاتووی حوكمرانی لەسوریا ژمارەیەك راسپاردە ئاراستەی حكومەتی توركیا و یەكێتی ئەوروپا كرا.
كۆنفرانسی كورد لە ئەوروپا كە لە برۆكسلی پایتەختی ئەوروپا بەڕێوەچوو، بە راسپاردەیەكی 20 خاڵی كۆتایی بەكارەكانی هێنا كە دیارترینیان بریتین لە بەردەوامبوونی پرۆسەی ئاشتی بە پشتبەستن بە گەرەنتیی یاسایی و دیموكراتی و ئازادكردنی عەبدوڵا ئۆجەلان و سەرجەم زیندانە سیاسییەكان و دەرهێنانی پەكەكە لە لیستی رێكخراوە تیرۆریستییەكانی یەكێتیی ئەوروپا.
هەروەها داواكراوە، توركیا هەموو بڕیارەكانی دادگای مافەكانی مرۆڤی ئەوروپا جێبەجێ بكات و حكومەت و پەرلەمانی توركیاش بنەمای دەستووری و یاسایی بۆ پرۆسەی ئاشتی بنیات بنێن و چاكسازی لە دەستوری توركیا بكرێت.
هاوکات داواش لە یەكێتی ئەوروپا كراوە، لە سیستمی سیاسیی داهاتووی سووریادا، پشتگیری لە پرۆسەیەكی سیاسی بكات كە فرەیی و بەشداریكردنی هەموو پێكهاتەكانی كۆمەڵگە گەرەنتی بكات.
داهاتی نانەوتیی پارێزگاكانی سلێمانی و هەڵەبجە و هەردوو ئیدارە سەربەخۆكەی گەرمیان و راپەڕین لەم هەفتەیەدا 9 ملیار دینارە و زیاتر لە نیو ملیار بەراورد بە هەفتەی رابردوو كەمیكردووە.
ماڵپەڕی شەفافیەت بۆ خستنەڕووی داهاتی نانەوتی پارێزگاكانی سلێمانی و هەڵەبجە و هەردوو ئیدارەی سەربەخۆی راپەڕین و گەرمیان ئاشكرایكردووە، داهاتی ئەم هەفتەیە، بڕی نۆ ملیار و 908 ملیۆن و 70 هەزار و 84 دیناری عیراقی بووە.
ئاماژەی بەوەشداوە، داهاتی ئەم هەفتەیە بەراورد بە هەفتەی رابردوو 665 ملیۆن دینار كەمیكردووە و ئەوەش دەكاتە %6 داهاتی هەفتەی رابردوو كە 10 ملیار و 573 ملیۆن و 991 هەزار و 971 دیناری عیراقی بووە.
بەپێی ماڵپەڕی شەفافیەت، 82%ی ئەم داهاتە بەشێوەی نەختینەو 18%شی بەشێوەی چەك بووە.
وەزارەتی ناوخۆی عیراق رایگەیاند، لەسەر راسپاردەی عەلی زەیدی، سەرۆک وەزیرانی عیراق تێچوی دەرکردنی پاسپۆرتی عیراقی بە 91 هەزار دینار دەمێنێتەوە و زیاد ناکرێت.
ئەمڕۆ پێنجشەممە، وەزارەتی ناوخۆی عێراق لە راگەیەندراوێکدا رایگەیاند، تێچوی دەرهێنانی پاسپۆرت زیاد ناکرێت و وەک خۆی دەمێنێتەوە.
ئاماژەی بەوەشکردوە، ئەم بڕیارە لە چوارچێوەی جێبەجێکردنی رێنماییەکانی عەلی زەیدی، سەرۆک وەزیرانی عیراقدا دراوە.
ئەمەش لە کاتێکدایە، دەنگۆی ئەوە بڵاوکراوەیەوە، کە رسوماتی دەرهێنانی پاسپۆرت گۆڕانکاری بەسەردا دێت و لە 91 هەزار دینارەوە دەکرێت بە 101 هەزار دینار.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە مەزڵوم عەبدی، راوێژکاری سەرۆکایەتیی کۆماری سوریا کرد، رایگەیاند باوەڕی نەگۆڕمان وایە، مافەکانی گەلی کورد تەنها لە رێگەی گفتوگۆوە دەستەبەر دەبن.
ئەمڕۆ پێنجشەممە، بافڵ جەلال تاڵەبانی و مەزڵوم عەبدی کۆبونەوە و لە کۆبونەوەکەد، کە شێخ ئەحمەد حەمەکەریم و د. هاوڕێ شێخ دارۆ، ئەندامانی مەکتەبی سیاسی ئامادەیبوون، دوایین پێشهاتەکانی ناوچەکە و دۆخی سووریا تاوتوێ کران و جەخت لە فراوانکردنی هەماهەنگیی نێوان هەردوولا کرایەوە.
بافڵ جەلال تاڵەبانی جەختی لە یەکخستنی هەوڵەکان بۆ سەرخستنی دیالۆگ کردەوە و رایگەیاند، باوەڕی نەگۆڕمان وایە کە مافەکانی گەلی کورد و پێکەوەژیانی ئاشتییانە تەنها لە رێگەی گفتوگۆوە دەستەبەر دەبن.
هەروەها ئاماژەی بەوەکرد، سوریای نوێ دەبێت لەسەر بنەمای هاوبەشیی نیشتمانی و فرەڕەنگی بنیاد بنرێتەوە، لەو پێناوەشدا یەکێتی هەموو پشتیوانییەکی خۆی دەخاتەگەڕ.
لای خۆیەوە، مەزڵوم عەبدی رۆڵی سەرۆک بافڵ و یەکێتیی نیشتمانیی کوردستانی بە گرنگ ناوبرد و وتی، پشتیوانی و هەوڵە بەردەوامەکانیان بناغەیەکی گرنگ بوون بۆ زاڵبوون بەسەر ئاڵنگارییەکان و رەخساندنی زەمینەی لێکتێگەیشتن، بە جۆرێک کە مافەکانی گەلی کورد پارێزراو بن و خزمەت بە داهاتووی سووریای نوێ بکات.
لە راگەیەندراوێکی هاوبەشی بەڕێوەبەرایەتیی گشتیی شوێنەوار و کەلەپووری هەرێمی کوردستان و زانکۆی کەیمبریجی بەریتانیدا، ئاشکراکردنی توێژینەوەیەکی زانستیی نوێی گۆڤاری (Scientific Reports) راگەیەندرا، کە تیشک دەخاتە سەر پاشماوەکانی «شانەدەر A» بە تەمەنی 75 هەزار ساڵ.
بەپێی توێژینەوەکە کە سەرپەرشتیارەکەی دکتۆر ئێما پۆمیرۆییە، کونێکی بازنەیی بە پانیی 15 ملم لە ئێسکی شانی ئەم نیاندەرتالەدا دۆزراوەتەوە کە رەنگە کۆنترین بەڵگەی بێت لەسەر توندوتیژیی کوشندە بە بەکارهێنانی رمی دارینی تیژکراو کە بەرەو دڵ ئاراستە کرابێت.
سەرەڕای ئەم کۆتاییە توندوتیژە، بوونی برینی پێشوتری چاکبوەوە لە دەموچاویدا دەریخستووە کە ئەم کەسە دوای برینداربوونی سەخت لانیکەم ساڵێک ژیاوە، ئەمەش بەڵگەیەکی رونە لەسەر بوونی چاودێری، هاوسۆزی و پەیوەندیی قوڵی کۆمەڵایەتی لەنێوان نیاندەرتالەکاندا.
محەمەد لەشکری لە بەڕێوەبەرایەتیی گشتیی شوێنەوار ئاماژەی بەوەداوە، ئەم هاوکارییە درێژخایەنە دەروازەیەکی جیهانییە بۆ ناساندنی دەوڵەمەندیی مێژویی ناوچەکە و لای خۆشیانەوە توێژەرانی کەیمبریج جەختیان لەسەر گرنگیی پشتگیریی بەڕێوەبەرایەتییەکانی شوێنەواری هەرێم و سۆران کردەوە لە بەدیهێنانی ئەم دەستکەوتە زانستییەدا کە بە شێوەیەکی هاوکات بە هەردوو زمانی کوردی و ئینگلیزی بڵاوکرایەوە.
حكومەتی هەرێمی كوردستان سوودمەندبوونی زیاتر لە 15 هەزار خاوەنكار و پڕۆژە لە بڕیاری لێخۆشبوونی سزای قەرزەكانی دەستەبەری كۆمەڵایەتی رادەگەیەنێت، هاوكات مۆڵەتی 90 رۆژ بۆ دانەوەی بنەڕەتیی قەرزەكان دیاری دەكات.
مەریوان بەگۆك، بەڕێوەبەری گشتیی كار و دەستەبەری كۆمەڵایەتی لە هەرێمی كوردستان لە لێدوانێكدا بۆ كوردسات نیوز ئاشكرای كرد: بەپێی نوێترین ئامارەكان، 15 هەزار و 498 خاوەنكار و پڕۆژە سوود لە بڕیاری لێخۆشبوونی سزای دواكەوتنی قەرزەكانی دەستەبەری كۆمەڵایەتی وەردەگرن.
روونیشیكردەوە: خاوەنكاران دەرفەتیان هەیە لە ماوەی 90 رۆژدا قەرزەكانیان بگەڕێننەوە، بە پێچەوانەوە دوای تەواوبوونی ئەم وادەیە حكومەت لە رێگەی دادگاوە شایستە داراییەكان وەردەگرێتەوە.
بەپێی داتاكان، لە پارێزگای سلێمانی 7 هەزار و 941 خاوەنكار، لە هەولێر 4 هەزار، لە دهۆك 1600، لە گەرمیان 908، لە سۆران 762، لە هەڵەبجە 205 و لە زاخۆش 82 خاوەن پڕۆژە لەم بڕیارەی حكومەت سوودمەند دەبن.
دادگای تاوانەکانی 2ـی سلێمانی سزای دەستگیرکراوانی لالەزاری راگەیاند و لاهور جەنگی بورهان بە پێنج ساڵ و سێ مانگ زیندانیکردن سزادرا
ئەمڕۆ دادگای تاوانەکانی 2ـی سلێمانی سزای پێنج ساڵ و سێ مانگ زیندانیکردنی بۆ لاهور جەنگی بورهان دەرکرد، هەروەها پۆڵاد جەنگی بورهان سێ ساڵ و شەش مانگ سزادرا.
هاوکات، رێبوار حامید حاجی غالی بە دوو ساڵ زیندانیکردن سزادرا و هەر یەک لە رێبوار قودرەت و پێشەوا حەسەن و رێنوار زریان بە سێ ساڵ و شەش مانگ بەندکردن سزادران .
دادگای تاوانەکانی 2ـی سلێمانی، ئاراس حەمە عەلى و سەربەست مینا حەمە بە ساڵێک و شەش مانگ زیندانیکردن سزادا.
بەپێی پێشبینییەکانی کەشناسی، لە 48 سەعاتی داهاتوودا شەپۆلێکی بارانبارین ناوچە جیاجیاکانی هەرێمی کوردستان دەگرێتەوە.
بەڕێوەبەرایەتی گشتی کەشناسی و بوومەلەرزەزانی هەرێم رایگەیاند، ئەمڕۆ ئاسمان لە نیمچە هەورەوە دەگۆڕێت بۆ هەوری تەواو، لە دوای نیوەڕۆوە بارانبارین لە ناوچەکانی رۆژئاوای هەرێم و سنوری پارێزگای دهۆک دەستپێدەکات و پاشان بە پچڕپچڕی ناوچەکانی تر دەگرێتەوە.
ئاماژەی بەوەشکرد، لە شەودا لە ناوچەکانی باکور و باکوری رۆژهەڵات کاریگەرییەکە زیاتر دەبێت و ئەگەری هەورەبروسکەش هەیە.
کەشناسیی هەرێم ئەوەشی خستەڕوو، سبەینێ ئاسمان هەوری تەواو دەبێت و بارانبارین بە پچڕپچڕی لە زۆربەی ناوچەکان بەردەوام دەبێت 'لە هەندێک کاتدا بە شێوی تاوەباران و هەورەبروسکە'، هاوکات لە کاتەکانی شەودا کاریگەرییەکە لاواز دەبێتەوە.
ئاشکراشیکرد، پلەکانی گەرما بە نزیکەی یەک بۆ دوو پلەی سیلیزی نزمتر دەبنەوە بە بەراورد بە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی
هەولێر: 32 پلەی سیلیزی
پیرمام: 28 پلەی سیلیزی
سلێمانی: 30 پلەی سیلیزی
هەڵەبجە:31 پلەی سیلیزی
چەمچەماڵ: 33 پلەی سیلیزی
دهۆک: 29 پلەی سیلیزی
زاخۆ: 31 پلەی سیلیزی
گەرمیان:35 پلەی سیلیزی
حاجی ئۆمەران:20 پلەی سیلیزی
لە چوارچێوەی گرنگیدانی بەردەوام بە تەندروستیی هاووڵاتییان و جەختکردنەوە لەسەر گرنگیی پشکنینی پێشوەختە، ئاماری کار و چالاکییەکانی کلینیکی چارەسەری نەخۆشییەکانی مەمک بۆ ماوەی هەشت مانگی رابردوو (لە سەرەتای ئەمساڵ تا کۆتایی مانگی ئاب) بڵاوکرایەوە.
بەپێی ئامارە رەسمییەکان، لەو ماوەیەدا کۆی سەردانیکاران گەیشتووەتە 6,418 خانم کە بە شێوەی راستەوخۆ، رەوانەکراو، یان سەردانی بەردەوام سەردانی کلینیکەکەیان کردووە، و تێیدا 38 حاڵەتی شێرپەنجەی مەمک تۆمار کراون.
سەبارەت بە هۆکاری سەردانەکان، 823 نەخۆش بەهۆی بوونی ئازار و 455 نەخۆشیش بەهۆی بوونی گرێ سەردانیان کردووە، هەروەها پشکنین بۆ 44 منداڵیش ئەنجام دراوە.
لە بەشێکی تری ئامارەکاندا هاتووە کە 2,583 پشکنینی مامۆگرافی و 1,310 پشکنینی سۆنەر بۆ چارەخوازان ئەنجام دراون.
لە کۆتاییدا، وەزارەتی تەندروستی پەیامێکی ئاراستەی هاووڵاتییان کرد و رایگەیاند: پشکنینی پێشوەختە باشترین رێگایە بۆ پاراستنی تەندروستی و زوو دەستنیشانکردن، کە رۆڵێکی یەکلاکەرەوەی هەیە لە سەرکەوتنی پرۆسەی چارەسەرکردندا. تەندروستیی خێزان و کۆمەڵگە لە سەرووی هەموو کارپێشینەکانمانەوەیە.
باس لەوەش کرا کە قۆناغێکی نوێ لە پەیوەندییەکان هاتووەتە ئاراوە و لەمەودوا بە گرنگییەکی زیاترەوە کار بۆ پەرەپێدانی پەیوەندییەکان لە هەموو بوارەکاندا و بە تایبەتیش لە بواری ئابووری و بازرگانیدا، دەکرێت.
وەزارەتی خوێندنی باڵا و توێژینەوەی زانستیی هەرێمی کوردستان راگەیەنراوێک بۆ دەرچوانی دوانزەی ئامادەیی لە ناوچە کوردستانییەکانی دەرەوەی ئیدارەی هەرێمی کوردستان بڵاوکردەوە و تێیدا وادە و رێکارەکانی پێشکەشکردنی فۆرمی زانکۆلاین ئاشکرادەکات.
لە راگەیەنراوەکەدا هاتووە، دەرچوانی دوانزەی ئامادەیی لە ناوچە کوردستانییەکانی دەرەوەی ئیدارەی هەرێمی کوردستان لە کەرکوک و شەنگال و خانەقین، دەتوانن لە سەعات 8:30ـی سەرلەبەیانی سبەینێ 15ـی 10ـی 2026 تاکو سەعات 12ـی شەوی رۆژی دووشەممە 19ـی 10ـی 2026 دەتوانن لە هەمان سایتی زانکۆلاین regayzanko.com داواکارییەکانیان بۆ وەرگرتن لە زانکۆ حکومییەکانی هەرێمی کوردستان پێشکەش بکەن.
هاوکات، عەباس ئەکرەم وتەبێژی وەزارەتی خوێندنی باڵای هەرێم رایگەیاند: سەرجەم دەرچوانی خوێندنگە کوردییەکانی ناوچە کوردستانییەکانی دەرەوەی هەرێمی کوردستان، ئەوانەی ناویان لە نوسینگەی کەرکوکی وەزارەتەکەمان تۆمارکردوە، لە سەعات 8:30ـی سبەینێ پێنجشەممەوە هاوشێوەی دەرچوانی هەرێمی کوردستان دەتوانن داواکاری لەڕێگەی زانکۆلاین بۆ وەرگرتنیان لە زانکۆ حکومییەکانی هەرێمی کوردستان پێشکەش بکەن.
وتیشی: بۆ هەر کێشە و گرفتێک سەبارەت بە پرۆسەکە دەرچوان دەتوانن سەردانی نوسینگەی کەرکوکی وەزارەتەکەمان بکەن و ئاسانکاری و رێنوێنیان پێشکەش دەکرێت.
ئەوەشی روونکردەوە، ساڵانە لەگەڵ دەرچوانی دوانزەی ئامادەیی هەرێمی کوردستان، دەرچوانی خوێندنگە کوردییەکانی ناوچە کوردستانییەکان دەرەوەی ئیدارەی هەرێمیش بەهەمان مەرج و پێوەرەکانی وەرگرتنی خوێندکارانی کوردستان لە زانکۆ و پەیمانگە حکومییەکانی هەرێمی کوردستان وەردەگیرێن.
ئاماژەی بەوەشدا، بۆ ئەمساڵیش 2700 لە دەرچوانی دوانزەی ئامادەیی ناوچە کوردستانییەکان دەتوانن بە کۆدەکانیان بچنە ناو سیستم و راستەوخۆ داواکاری بۆ وەرگرتن لەهەمان سایتی زانکۆلاین پێشکەش بکەن.
لە دیدارەکەدا کە شاناز ئیبراهیم ئەحمەد، د. یوسف گۆران، ئەندامانی مەکتەبی سیاسی، سالار لالە سەرحەد، لێپرسراوی بۆردی پەیوەندییە کوردستانییەکان ئامادەبوون، جەخت لە بەردەوامیی هەماهەنگی و هاریکاریی هاوبەش و بەهێزکردنی پەیوەندی نێوان هەردوولا لە چوارچێوەی پاراستنی بەرژەوەندییە باڵاکان کرایەوە، بەشێوەیەک ببێتە مایەی سەقامگیریی زیاتر لە ناوچەکەدا.
پەیوەست بە پرۆسەی ئاشتیش لە باکوری کوردستان و تورکیا، هەردوولا بیروڕایان ئاڵوگۆڕ کرد و سەرۆکی یەکێتیش پشتیوانیی حزبەکەی بۆ ئەم هەنگاوە مێژووییە دووپاتکردەوە و وتی: لەسەر هەمان سیاسەتی سەرۆک مام جەلال بەردەوام دەبین تاوەکو ئەم پرسە گرنگ و چارەنووسسازە سەربکەوێت، باوەڕمان وایە بە پێکەوەژیان و ئاشتی دەتوانین خزمەتی گەلەکەمان بکەین، چونکە لە شەڕ و دووبەرەکیدا جگە لە ماڵوێرانی هیچ بەدەست نایەت، بۆیە هیوادارم هەمووان لاپەڕەیەکی نوێ هەڵدەنەوە بەرەو ئاشتییەکی بەردەوام.
لای خۆشیەوە، تونجەر باکرهان سوپاسی هەوڵەکانی بافڵ جەلال تاڵەبانی و یەکێتی کرد بۆ سەرخستنی پرۆسەی ئاشتی و وتی، ئێمە بە رێزەوە لە رۆڵتان دەڕوانین و پێزانینمان هەیە بۆ هەنگاوەکانتان کە لە خزمەتی سەقامگیری و پێکەوەژیانی ئاشتییانەدایە لە ناوچەکەدا.
بەڕێوەبەرایەتی پۆلیسی پارێزگای سلێمانی، لە راگەیەندراوێکدا سەرلەبەری ئەو دەنگۆ و هەواڵانەی رەتکردەوە کە لەبارەی گرانیی شتومەک و بڕینی پارەی راگیراوان لە بەشی پۆلیسی گرتن و گواستنەوە بڵاوکرابوونەوە.
لە راگەیەندراوەکەی پۆلیسدا هاتووە: دوای ئەوەی لەلایەن چەند دەزگایەکی راگەیاندن و کەسانی نابەرپرسەوە هەواڵێک بڵاوکرایەوە گوایە لە فرۆشگای بەشی گرتن و گواستنەوەی سلێمانی نرخی کەلوپەل لەسەر راگیراوان گران کراوە و بڕی (%15) لەو پارانە وەردەگیرێت کە کەسوکاریان بۆیان دەنێرن.
ئاماژەی بەوەشکردووە، بۆ دەرخستنی و راستیی و ناڕاستیی ئەو بابەتە دەستبەجێ لەسەر فەرمانی بەڕێوەبەری پۆلیسی سلێمانی لیژنەیەکی لێکۆڵینەوە پێکهێنرا و لیژنە تایبەتمەندەکە بە هاوبەشی لەگەڵ نوێنەری داواکاری گشتی و نووسینگەی مافی مرۆڤی سلێمانی، سەردانی بەشی گرتن و گواستنەوەیان کردووە و لەوێ لە نزیکەوە چاودێری مەرج و بڕگەکانی گرێبەستی فرۆشگاکە (کە لەلایەن کەرتی تایبەتەوە بەڕێوەدەبرێت) کراوە و راوێژ و گوێگرتن بۆ چەندین راگیراو ئەنجامدراوە.
پۆلیسی سلێمانی دووپاتی دەکاتەوە: «دوای بەدواداچوونەکان، دەرکەوت سەرلەبەری ئەو هەواڵانە ناڕاست و هەڵبەستراون، بەو پێیەش دەرئەنجامی لیژنەکە تەواوی ناوەڕۆکی ئەو هەواڵانەی بە ناڕاست لە قەڵەمدا».
لە کۆتایی راگەیەندراوەکەدا ئەوەش روونکراوەتەوە، بەڕێوەبەرایەتی پۆلیسی سلێمانی بە مافی یاسایی خۆی دەزانێت رێکاری یاسایی لە دژی هەموو ئەو کەس، لایەن و دەزگایانەی راگەیاندن بگرێتەبەر کە بە بڵاوکردنەوەی ئەم جۆرە هەواڵە ناڕاستانە، هەوڵی چەواشەکردنی رای گشتی دەدەن.
بافڵ جەلال تاڵەبانی، سەرۆکی یەکێتیی نیشتمانیی کوردستان پێشوازی محەمەد سەمعان، پارێزگاری کەرکوک کرد و جەختی کردەوە لە خزمەتکردنی زیاتری هاووڵاتیانی کەرکوک بە بێ جیاوازی.
ئەمڕۆ چوارشەممە، سەرۆکی یەکێتی لە دەباشان پێشوازی لە پارێزگاری کەرکوک کرد و رەوشی پارێزگاکە و ئاستی پێشکەشکردنی خزمەتگوزارییەکانیان تاوتوێ کرد.
لە کۆبونەوەکەدا هەردولا جەختیان لە پاراستنی هاوسەنگی و کارکردنی پێکەوەیی نێوان سەرجەم لایەن و پێکهاتەکانی کەرکوک کردەوە.
سەرۆک بافڵ ئاماژەی بەوەکرد، کەرکوک نمونەی باڵای برایەتی و تەبایی نێوان پێکهاتەکانە، بە کاری هاوبەش و یەکڕیزی دەتوانن سەقامگیری بپارێزن و مافە رەواکانی سەرجەم کەرکوکییەکان بەبێ جیاکاری دەستەبەر بکەن.