کەشناسی هەرێم، بڵاویکردوەتەوە بە گشتی کەشی ئاسمان لە نێوان هەور و نیمچە هەور دەبێت و ئەگەرێکی کەم هەیە بۆ بارینی نمەباران لە دوانیوەڕۆدا، لەبارەی کەشی سبەینێشيوە دەڵێت؛ لە ناوچە شاخاوییەکان ئەگەری باران بارین هەیە.

ئەمڕۆ هەینی، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، کەشەکە تەواو بەهارەیە و پلەکانی گەرماش نزیکن لە تۆمارکراوەکانی دوێنێ.

لەبارەی کەشی سبەینێ شەممەوە، کەشناسی ئاماژەی بەوەکردوە، پلەکانی گەرما یەک بۆ دوو پلە بەرز دەبنەوە بەراورد بە تۆمارکراوەکانی ئەمڕۆ و پێشبینی باران بارین لە ناوچە شاخاوییەکان دەکرێت.

بەرزترین پلەکانی گەرمای پێشبینیکراو بۆ سبەینێ بەم شێوەیە؛

هەولێر: 24 پلەی سیلیزی

پیرمام: 23 پلەی سیلیزی

سۆران: 20 پلەی سیلیزی

حاجی ئۆمەران: 13 پلەی سیلیزی

سلێمانی: 23 پلەی سیلیزی

چەمچەماڵ: 26 پلەی سیلیزی

دهۆک: 25 پلەی سیلیزی

زاخۆ: 25 پلەی سیلیزی

هەڵەبجە: 27 پلەی سیلیزی

گەرمیان: 29 پلەی سیلیزی

ئەمڕۆ 24ی نیسان، یادی 52 ساڵەی تاوانێکی گەورەی دەسەڵاتی بەعس بەرانابەر بە قەڵادزێ، کاتێک لە ساڵی 1974دا شاری قەڵادزێی بە بۆمبی قەدەغەکراوی "ناپاڵم" بۆردومان کرد و بەهۆیەوە زیاتر لە 400 شەهیدی و برینداری لێکەوتەوە.

 لەم هێرشە دڕندەیەدا کە سەعات 10ـی   سەرلەبەیانی ئەنجامدرا، ناوەندی شارەکە و بیناکانی زانکۆی سلێمانی کرانە ئامانج، کە لە ئەنجامدا 165 خوێندکار و هاووڵاتی مەدەنی شەهید بوون و 250 کەسی دیکەش بریندار بوون، ئەمە جگە لەو وێرانکارییە گەورەیەی بەر سیمای شارەکە کەوت.

مێژووی ئەم شارە پڕە لە رووبەڕووبوونەوەی ستەم، بە جۆرێک دوای ئەو هێرشە دڕندانەیە، لە کۆتایی هەشتاکاندا، رژێمی باعسی ئەوکات، سیاسەتی راگواستنی زۆرەملێی بەسەردا سەپاندن و لە ٢٦26ـی حوزەیرانی 1989دا، قەڵادزێ بە تەواوی لەگەڵ زەوی تەخت کرا و هەموو گوندەکانی دەوروبەری وێران کران، بە مەبەستی سڕینەوەی ناسنامەی نەتەوەیی و تێکشکانی ئیرادەی خەڵکەکەی.

قەڵادزێ کە ئێستا ناوەندی قەزای پشدەرە و سەر بە ئیدارەی راپەڕینە، بەهۆی پێگە جوگرافییەکەی و هاوسنووریی لەگەڵ رۆژهەڵاتی کوردستان، هەمیشە وەک مەڵبەندێکی گرنگی شۆڕش و بەرخودان ماوەتەوە.

 ئەم شارە بە پێنج ناحیە و نزیکەی 400 گوندەکەیەوە، وەک هێمایەکی زیندووی قوربانیدان لە مێژووی کوردستاندا دەمێنێتەوە و یادی شەهیدانی 24ی نیسان وەک بەشێکی دانەبڕاو لە یادەوەری نەتەوەیی کوردا ساڵانە بەرز رادەگیرێت.

داهاتی نانەوتی ئەم هەفتەیەی پارێزگاکانی سلێمانی و هەڵەبجە و هەردوو ئیدارە سەربەخۆکانی راپەڕین و گەرمیان، زیاتر لە نۆ ملیار دینار بووە.

ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی راپەڕین و گەرمیان دەكات بڵاویکردەوە، داهاتی ئەم هەفتەیە لە رۆژی 18 بۆ 24ـی04ـی2026، بڕی 9 ملیار و 958 ملیۆن و 290 هەزار و 188 دینار بووە.

ماڵپەرەکە ئاماژەی بەوەشکردوە، داهاتەکە لە 85%ی بەشێوەی نەختینەیە و 13% ی داهاتەكە بەشێوەی چەكە و 2% ی داهاتەكە بەشێوەی مقاصەیە.

جێگەی ئاماژەیە، ماڵپەڕی شەفافییەت بۆ داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.

چاكسازیی گەورانی هەولێر دوو داواكاری شێروان شێروانی رەتدەكاتەوە، دەستەی مافی مرۆڤیش دووپاتیدەكاتەوە بەردەوام دەبێت لە بەدواداچوونەكانی بۆ گەیشتن بە ئەنجامێكی یاسایی.
وەفدێكی دەستەی سەربەخۆی مافی مرۆڤ بە مەبەستی ئاگاداربوون لە رەوشی سزادراوان سەردانی چاكسازیی گەورانی هەولێریان كرد و لەنێویشیاندا چاویان بە سزادراو شێروان شێروانی كەوت. 
بەپێی راگەیەندراوێكی دەستەی سەربەخۆی مافی مرۆڤ، شێروان شێروانی داوای مۆڵەتی چوونەوەی ماڵەوە یان گواستنەوەی بۆ چاكسازیی سلێمانی كردووەو رایگەیاندووە كە جێبەجێكردنی داواكانی مەرجە بۆ شكاندنی مانگرتنەكەی.
لە بەرامبەردا، ئیدارەی چاكسازی گەورانی هەولێر رایگەیاندووە، بەپێی یاسا ناتوانرێت مۆڵەتی پێ بدرێت، چونكە هێشتا ساڵێكی تەواوی لە حوكمەكەی نەبڕیوە. 
سەبارەت بە گواستنەوەشی بۆ سلێمانی، دەڵێت، بەهۆی ئەوەی شوێنی نیشتەجێبوونی خێزانەكەی لە هەولێرە، داواكارییەكەی رەتكراوەتەوە. 
دەستەی مافی مرۆڤ دووپاتی كردەوە كە بەردەوام دەبێت لە بەدواداچوون و گفتوگۆ لەگەڵ لایەنە پەیوەندیدارەكان بۆ گەیشتن بە ئەنجامێكی یاسایی و پاراستنی مافی سزادراوان.

قوباد تاڵەبانی جێگری سەرۆک وەزیرانی هەرێمی کوردستان لەگەڵ  کۆستیس هاتزیداکیس جێگری سەرۆک وەزیرانی یۆنان کۆبووەوە و دوایین پێشهاتەکانی ناوچەکەیان تاوتوێکرد

لە بەردەوامیی کۆبوونەوەکانیدا لە پەراوێزی کۆڕبەندی نێودەوڵەتیی ئابووریی دێڵفی، قوباد تاڵەبانی، لەگەڵ کۆستیس هاتزیداکیس، جێگری سەرۆکوەزیرانی یۆنان کۆبووەوە.

لە کۆبوونەوەکەدا باس لە دۆخی ناوچەکە و کاریگەرییەکانی جەنگی ئەمریکا و ئیسرائیل لەگەڵ ئێران کرا. قوباد تاڵەبانی لەمبارەیەوە جەختی کردەوە کە ئێمە نامانەوێت هەرێمی کوردستان و عێراق ببنە بەشێک لەو جەنگە، بەڵکو لەگەڵ پاراستنی بێلایەنیی خۆمان، هەوڵ دەدەین هاوکاربین لە چارەسەرکردنی کێشەکان.

لە تەوەرێکی دیکەی کۆبوونەوەکەدا باسی گرنگیی کۆڕبەندی نێودەوڵەتیی ئابووریی دێڵفی کرا و هەردوولا هاوڕابوون کە ئەم کۆڕبەندە کاریگەریی بەرچاوی داناوە لە پێشخستنی پەیوەندییەکانی نێوان یۆنان و هەرێمی کوردستان و لەم رێگەیەوە کۆمپانیاکان و کارسازان و گەورەوەبەرهێنەران زیاتر بە دەرفەتەکانی وەبەرهێنان لە کوردستان ئاشنا بوون.

هەر لەم چوارچێوەیەدا گفتوگۆکرا لەبارەی بەڕێوەچوونی دووەمین کۆڕبەندی نێودەوڵەتیی ئابووریی دێڵفی لە سلێمانی لە ئەمساڵدا. قوباد تاڵەبانی، بە فەرمی بانگهێشتی جێگری سەرۆکوەزیرانی یۆنانی کرد بۆ بەشداریکردن لەم کۆڕبەندەدا.

لە بەشێکی دیکەی کۆبوونەوەکەدا هەردوولا بە پێویستیان زانی پێکەوە زیاتر کاربکەن بۆ پتەوکردنی پەیوەندییەکانی نێوان هەرێم و یۆنان لە بوارەکانی بازرگانی و گەشتوگوزار و تەندروستی و کشتوکاڵدا. لەسەر داوای قوباد تاڵەبانی، جێگری سەرۆکوەزیرانی یۆنان بەڵێنی دا کار دەکات بۆ کردنەوەی گەشتی راستەوخۆی ئاسمانی لەنێوان سلێمانی و ئەسینادا و ئەمەشی بە هەنگاوێکی گرنگ زانی بۆ بەهێزترکردنی پەیوەندییە بازرگانییەکانی نێوان هەردوولا.

بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە ئیلبروس کۆتراشێڤ، باڵیۆزی رووسیا لە عیراق کرد.

لە کۆبوونەوەکەدا دوایین پێشهات و گۆڕانکارییەکانی ناوچەکە خرایەبەر باس و هەردوولا هاوڕابوون لەسەر کەمکردنەوەی گرژییەکان و بەرقەرارکردنی ئاسایش و ئارامی.

هەر لە کۆبوونەوەکەدا جەخت لە پەرەپێدانی پەیوەندییەکانی نێوان هەردوولا و بەردەوامبوونی هەماهەنگییەکان کرایەوە.

قوباد تاڵەبانی لەگەڵ ئەندەرس ئەنلید، بەڕێوەبەری گشتیی ئەنجومەنی نیشتمانیی بازرگانیی سوید کۆبووەوە

 

بافڵ جەلال تاڵەبانی، سەرۆكی یەكێتیی نیشتمانیی كوردستان رایدەگەیەنێت، لە وادەیەكی نزیكدا بە رەسمی رێككەوتنی سیاسیی نێوان یەكێتی و نەوەی نوێ ئیمزا دەكرێت.

ئەمڕۆ بافڵ جەلال تاڵەبانی لە بەغداد، سەردانی فراكسیۆنی نەوەی نوێی كرد و لەلایەن سروە عەبدولواحید، سەرۆكی فراكسیۆنەكەوە پێشوازی لێكرا. 

لە كۆبوونەوەكەدا جەخت لە پەرەپێدانی پەیوەندییەكان و هەماهەنگیی زیاتری نێوان هەردوولا كرایەوە.

سەرۆك بافڵ سوپاسی فراكسیۆنی نەوەی نوێی كرد بۆ هاوكارییان لەگەڵ یەكێتی لە پرسی یەكلاكردنەوەی پۆستی سەرۆك كۆماردا.

هەروەها بە گرنگییەوە باسی لە رێككەوتنی سیاسیی نێوان یەكێتی و نەوەی نوێ كرد و ئاشكرایكرد، لە وادەیەكی نزیكدا بە رەسمی ئیمزای دەكەن، ئەمەش وەك هەنگاوێك بۆ بەهێزكردنی كاری پێكەوەیی لە پێناو بەرژەوەندییە گشتییەكاندا.

قوباد تاڵەبانی، جێگری سەرۆکوەزیران لە میانەی دووەم رۆژی بەشداریکردنی لە کۆڕبەندی نێودەوڵەتیی ئابووریی دێڵفیدا لەگەڵ ئادۆنیس جۆرجیادیس، وەزیری تەندروستیی یۆنان کۆبووەوە و پێکەوە تاوتوێی چۆنییەتی دروستکردنی هەماهەنگی لەنێوان هەردوو کەرتی تەندروستیی هەرێم و وڵاتی یۆنانیان کرد.

لە بەشێکی کۆبوونەوەکەدا کە رۆژی پێنجشەممە (23/4/2026) بەڕێوەچوو، قوباد تاڵەبانی باسی پێشکەوتنەکانی کەرتی تەندروستیی  هەرێمی کوردستانی کرد لەم ساڵانەی دواییدا و داوایکرد بۆ پێشکەوتنی زیاتر حکومەتی یۆنان هاوکاربێت تا کەرتی تەندروستیی هەرێم سوود لە ئەزموونی دەوڵەمەندی تەندروستیی ئەو وڵاتە وەربگرێت.

هەر لەم چوارچێوەیەدا باسی چۆنییەتی دروستکردنی هەماهەنگی لەنێوان کەرتی تەندروستیی هەردوولادا کرا. جێگری سەرۆک وەزیران بۆ ئەم مەبەستە بانگهێشتی وەزیری تەندروستیی یۆنانی کرد سەردانی کوردستان بکات، ئادۆنیس جۆرجیادیس لەمبارەیەوە رایگەیاند، لە نزیکترین ماوەدا لەگەڵ وەفدێک سەردانی هەرێم دەکات.

لە کۆبوونەوەکەدا بڕیاری ئەوەش درا ئامانجی سەردانەکەی وەزیری تەندروستیی یۆنان بۆ دروستکردنی پەیوەندی و هەماهەنگی دەبێت لەگەڵ کەرتی تەندروستیی کوردستان، بە تایبەتیش لە بوارەکانی پێشخستنی پیشەسازیی دەرمان و بەکارهێنانی زیرەکیی دەستکرد بۆ باشترکردنی خزمەتگوزارییە تەندروستییەکان.

هەر لە کۆبوونەوەکەدا باس لەوەکرا پێویستە هەرێمی کوردستان گرنگی بە گەشتیاریی تەندروستی بدات، بەوپێیەی لە هەرێم ئەو زەمینەیە هەیە کە بەپێی پلانێکی تۆکمە ساڵانە رێژەیەکی بەرچاو گەشتیاری تەندروستی لە ناوچەکانی دیکەی عیراق و وڵاتانی دەوروبەرەوە سەردانی هەرێمی کوردستان بکەن و لەمبارەیەشەوە وڵاتی یۆنان هاوکاری هەرێمی کوردستان دەکات.

 

وەزارەتی پەروەردە لە كۆنفڕانسێكی رۆژنامەوانیدا رایگەیاند، كە خوێندی ساڵی 2026 بۆ 2027  لە سەرجەم خوێندگەکان بە حكومی و تایبەتەوە سیستمی یەكپۆشی رەچاودەكرێت.

ئالان حەمە سەعید، وەزیری پەروەردە لە كۆنفرانسێكی رۆژنامەوانیدا رایگەیاند، خوێندی ساڵی 2026 بۆ 2027  سەرجەم قوتابخانەكان بە حكومی و تایبەتەوە سیستمی یەكپۆشی رەچاودەكرێت و هۆشداریشی بەو بازرگانان و دوكانەنەدا كە جلوبەرگی خوێندن دەفرۆشن لەوەی كە جلەكان هەمان شێوەی ساڵی رابردووی نییە و دەگۆڕێت.

راشیگەیاند، هیچ بڕیارێكی زۆرە ملە لە كڕینی ئەو جلانە لە دوكانێكی تایبەت  نیە و دایكوباوكان سەربەستن لەوەی لە كوێ دەیكڕن.

سەبارەت بە كۆمەڵگە پەروەردەییەكان و خوێندنگە تایبەتاكانیش هۆشداریدا كە دەبێت سەرجەم پابەندی ئەو یەكپۆشییە بن.

بەڕێوەبەرایەتی گشتی کەشناسی و بوومەلەرزەزانی هەرێم، پێشبینییەکانی بۆ کەشوهەوای 48 سەعاتی داهاتوو بڵاوکردەوە و ئاماژە بە ئەگەری بارانبارین لە چەند ناوچەیەک دەکات.

کەشناسی هەرێم رایگەیاند، ئەمڕۆ ئاسمان بە گشتی ساماڵ و پەڵە هەور دەبێت، لە هەندێک شوێن دەگۆڕێت بۆ نیمچە هەور، هەروەها پلەکانی گەرما بەرزتر دەبنەوە.

ئاماژەی بەوەشکرد، سبەینێ هەینی ئاسمان لە پەڵەهەورەوە بۆ نیمچە هەور دەگۆڕێت، لە هەندێک کات و شوێنیشدا دەبێتە هەوری تەواو.

کەشناسی ئەوەشی خستەڕوو، لە کاتەکانی نیوەڕۆوە، بارانبارین لە ناوچەکانی رۆژهەڵات و باکور بە شێوەی گەواڵە بارانی بەهاری و هەورە بروسکە دەستپێدەکات، بەتایبەت لە ناوچە شاخاوییەکان رێژەی بارانەکە زۆرتر دەبێت.

ئاشکراشیکرد، پێشبینی دەکرێت تا کاتەکانی ئێوارە، تاوەباران و هەورە بروسکە لە کات و ناوچەی جیاجیا بەردەوامی هەبێت.

بەرزترین پلەکانی گەرمای پێشبینیکراو بە پلەی سیلیزی

هەولێر: 24 پلەی سیلیزی

پیرمام: 20 پلەی سیلیزی

سۆران: 21 پلەی سیلیزی

حاجی ئۆمەران: 15 پلەی سیلیزی

سلێمانی: 23 پلەی سیلیزی

چەمچەماڵ: 23 پلەی سیلیزی

دهۆک: 23 پلەی سیلیزی

زاخۆ: 24 پلەی سیلیزی

هەڵەبجە: 24 پلەی سیلیزی

گەرمیان: 26 پلەی سیلیزی

بە ئامانجی پاراستنی سەلامەتی هاووڵاتیان و چەسپاندنی یاسا، رێکاری نوێ دژ بە ئۆتۆمبێلی بێ‌سەرەتا و سەرپێچییەکان پەیڕەو دەکرێت.

بەڕێوەبەرایەتی هاتوچۆی راپەڕین رایگەیاند، ئۆتۆمبێلی بێ‌ سەرەتا و بڕاوە هەڕەشەیە بۆ سەر ئاسایشی نیشتمانی، بۆیە مەفرەزەکانیان راسپێردراون دەست بەسەر ئەو جۆرە ئۆتۆمبێل و ماتۆڕسکیلانەدا بگرن و هیچ جۆرە سازشێک لەم بڕیارەدا ناکرێت.

 ئاماژەی بەوەشکرد، لێخوڕینی بێ مۆڵەت و بێزارکردنی هاووڵاتیان بە دەنگی نائاسایی و سەرکێشی، وەک بەزاندنی سنوری ئازادیی گشتی هەژمار کراوە، ئەوەشی خستەڕوو، سەلامەتیی گشتی هێڵی سورە و هەر کەسێک بیبەزێنێت، رووبەڕووی سزای قورسی یاسایی و بێ گەڕانەوە دەبێتەوە.

هاتوچۆی راپەڕین ئاشکراشیکرد، پلانێکی تۆکمە لەگەڵ لایەنە ئەمنییەکان داڕێژراوە بۆ کۆنترۆڵکردنی زیاتری سنورەکان و ناو شارەکان، تا ئەو ئاستەی "یاسا ببێتە تاکە دادوەر لەسەر شەقام."

هاتوچۆی ڕاپەڕین جەخت دەکاتەوە، ئەفسەر و کارمەندانیان لە پێناو پاراستنی گیانی هاووڵاتیان لە ئەرکدا دەبن و داوا لە هەمووان دەکەن پابەندی یاساکان بن بۆ پاراستنی بەرژەوەندی گشتی و دوورکەوتنەوە لە زیانەکان.

لەیادی 128 ساڵەی رۆژنامەگەریی کوردیی، ئەمڕۆ، لە بارەگای مەکتەبی سیاسی لە شاری هەولێر، کاروان گەزنەیی وتەبێژی یەکێتیی نیشتمانیی کوردستان، میوانداریی کۆمەڵێکی بەرفراوان لە رۆژنامەنووسان و راگەیاندنکارانی (کوردی، عەرەبی، و بیانی) کرد.

لە دیدارەکەدا، سەرۆک و ئەندامانی رێکخراوی پەیامنێرانیش تیایدا ئامادەبوو، وێڕای ئاراستەکردنی گەرمترین پیرۆزبایی بەو بۆنەیەوە، وتەبێژی یەکێتی جەختی لە پاڵپشتی رۆژنامەنووسان و  رای ئازاد کردەوە،  کە یەکێتیی نیشتمانیی کوردستان بەردەوام دەبێت لە بوون بە چەتر و پاڵپشتیکاری سەرەکی بۆ میدیای ئازاد و پاراستنی مافی رۆژنامەنووسان، بەو پێیەی ئازادیی رادەربڕین یەکێکە لە کۆڵەکە سەرەکییەکانی دیموکراسی.

هەروەک کاروان گەزنەیی ئاماژەی بە گرنگیی هەماهەنگی بەردەوامی نێوان دامەزراوە رەسمییەکان و میدیاکاران کرد، بە ئامانجی گەیاندنی راستییەکان و خزمەتکردنی کۆمەڵگە، بەبێ جیاوازیی نەتەوەیی و زمانیی.

وتەبێژی یەکێتی جەختی لەوەکردەوە، هەوڵەکانیان بۆ رەخساندنی ژینگەیەکی لەبار و ئارام بۆ رۆژنامەنووسان چڕ دەکەنەوە، بۆ ئەوەی رۆژنامەنووسان بتوانن بەبێ ترس و فشار ئەرکە پیشەییەکانیان جێبەجێ بکەن.

سەفین غەفور، راوێژکاری باڵای جێگری سەرۆک وەزیرانی هەرێم لە پانێڵیکدا لە ژێر ناوی "گەروی هورمز: ناسەقامگیری جیهانی و نەزمی ئابوری نوێ" لە کۆڕبەندیی نێودەوڵەتیی ئابووری دێڵفی بەشداربوو.

لە پانێڵەکەدا سەفین غەفور ئاماژەیدا بە کاریگەرییە نەرێنییەکانی داخستنی گەروی هورمز لەسەر بازاڕی وزە و ئابوری جیهان و ناوچەکە کە ئەگەر بێتو بۆ ماوەیەکی درێژ بەردەوام بێت زیانی زۆر بە ئابوری وڵاتانی هەناردەکاری وزە دەگەیەنێت، بە تایبەتیش عیراق کە لە قۆناغی سەرەتای گەشەسەندنی ئابوریدایە و بۆ دابینکردنی نزیک بە 90٪ بودجەکەی پشت بە هەناردەکردنی نەوت دەبەستێت.

سەفین غەفوور باسی لەوەشکرد، لەم قۆناغەدا پێویستە هەردوو حکومەتی هەرێم و بەغداد پێکەوە کاربکەن تا توانای هەناردەکردنی نەوت لەڕێی هێڵەکانی بۆری لە تورکیاوە زیاتر بکەن و هەروەها پلان بۆ جێگرەوەی دیکەش دابنێن، چونکە ساڵانێکی زۆرە ناوچەکە بەردەوام بەرەو ناسەقامگیری هەنگاو دەنێت و هەردەم ئەگەری ئەوە هەیە لە شوێنێکەوە گرفت بۆ هەناردەکردنی وزە دروست ببێت.

هەر لەم چوارچێوەیەدا راوێژکاری باڵای قوباد تاڵەبانی ئاماژەی بە پلان و سیاسەتی ئابوری جێگری سەرۆک وەزیران کرد، کە ساڵانێکە هەوڵ دەدات بۆ فرەچەشنکردنی سەرچاوەکانی داهات و کەمتر پشتبەستن بە نەوت، روونیکردەوە حکومەتی عیراق و حکومەتی هەرێم پێویستە پێکەوە هاوکار و هەماهەنگ بن بۆ جێبەجێکردنی ئەم پلانە تا لە داهاتوودا کەمتر شەڕ و ئاڵۆزییەکان ئابوری عیراق و کوردستان بخاتە مەترسییەوە.

قوباد تاڵەبانی جێگری سەرۆك وەزیرانی هەرێمی كوردستان بۆ بەشداریكردن لە  كۆڕبەندی نێودەوڵەتیی ئابووریی دێڵفی، سەردانی یۆنانی كردووە و لە میانی کۆبوونەوەکانیدا لەگەڵ عەبدوڵا گول سەرۆك كۆماری پێشووی توركیا کۆبووەوە.

قوباد تاڵەبانی رایگەیاندووە، خۆشحاڵ بووم بە دیدارم لەگەڵ عەبدوڵڵا گویل، سەرۆک کۆماری پێشووی تورکیا، دەستخۆشیم لێ کرد کە بە هەموو شێوەیەک پشتیوانیی سەرخستنی پرۆسەی ئاشتی لە تورکیا دەکات.

ئاماژەی بەوەشکرد، عەبدوڵڵا گویل وەبیری هێنایەوە کە پرۆسەی ئاشتی خەونێکی گەورەی سەرۆک مام جەلال بوو و بەردەوام لە دیدار و کۆبوونەوەکانیدا لەگەڵ لێپرسراوانی تورکیا هەوڵی دەدا پرسی کورد بە شێوەیەکی ئاشتییانە و بە دوور لە شەڕ و توندوتیژی چارەسەر بکرێت.

قوباد تاڵەبانی راشیگەیاند، سەرۆک کۆماری پێشووی تورکیا ستایشی هەڵوێستی هەرێم و یەکێتی کرد لەبارەی جەنگی ئەمریکا و ئیسرائیل لەگەڵ ئێران، هەروەها بەبۆنەی گۆڕانکاری لە پۆستەکانی ئیدارەی کەرکوکیشەوە ستایشی سیاسەت و هەڵوێستی یەکێتی کرد کە کار دەکات بۆ قوڵکردنەوەی گیانی برایەتی و پێکەوەژیان لەناو هەموو پێکهاتەکانی کەرکوکدا.

قوباد تاڵەبانی، جێگری سەرۆک وەزیرانی هەرێمی کوردستان، لەگەڵ تاریق مەتری، جێگری سەرۆک وەزیرانی لوبنان کۆبووەوە و تیشکیان خستە سەر لێکەوتەکانی جەنگ و پەرەپێدانی پەیوەندییە دووقۆڵییەکان.

قوباد تاڵەبانی ئەم وێنانەی بڵاویکردووەتەوە و نووسیویەتی: لەگەڵ تاریق متری، جێگری سەرۆک وەزیرانی لوبنان باسمان لەوە کرد کوردستان و لوبنان، بەهۆی ئەم جەنگەی ناوچەکەوە زیانی زۆریان بەرکەوتووە، هیوامان خواست کێشە و ناکۆکییەکان بە گفتوگۆ چارەسەر بکرێن و ئاشتی و سەقامگیری بۆ گەلانی ناوچەکە بگەڕێتەوە.

راشیگەیاند، باسمان لە چۆنییەتی پتەوکردنی پەیوەندییە ئابوری و بازرگانی و گەشتیارییەکانی نێوان هەردوولامان کرد و جەختمان کردەوە لەسەر کارکردنی زیاتر بۆ باشترکردنی پەیوەندییەکانمان بە جۆرێک کە خزمەت بە ئابوریی هەردوولامان بکات.