سەرۆکایەتیی دادگای تێهەڵچوونەوەی ناوچەی سلێمانی راگەیەنراوێکی لەبارەی بڕیارێکی دادگای کارگێڕیی سلێمانی بڵاوکردەوە و جەخت دەکاتەوە، بەپێی دەستور و یاسا، هیچ بەربەستێک لەبەردەم هاووڵاتییانی عیراقدا نییە بۆ خاوەندارێتیی رەوای خانووبەرە لە سلێمانی.

دادگای تێهەڵچوونەوەی ناوچەی سلێمانییەوە ئاشکرایکرد، ئەمڕۆ دادگای کارگێڕیی سلێمانی بڕیاری ژمارە 57/ک/2026 لە 21ـی10ـی2026 دەرکردووە، کە بووەتە باس و خواسی راگەیاندنەکان و لێکدانەوەی جیاوازی جۆراوجۆری بۆ کراوە، بەجۆرێک پێچەوانەی یاسا و هەتا مەنتووقی بڕیاری ئاماژەبۆکراویشە.

ئاماژەی بەوەشکرد، سەرەتا ئەو بڕیارە تەنها لە مەنتووقەکەیدا هەڵوەشاندنەوەی فەرمانێکی کارگێڕی لەخۆ دەگرێت و ئەو بڕیارەش پلەی بنەبڕیی وەرنەگرتووە و هیچ بەڵگەیەک (حوجییەتێک) پێک ناهێنێت، واتە ئەو بڕیارە تەنها تاوتوێی حاڵەتێکی تایبەتی لەخۆ گرتووە کە بە یەکلاکەرەوە دانانرێت هەتاوەکو بڕیارەکە پلەی کۆتایی وەرنەگرێت، لەکاتێکدا بڕیارەکە تەنها بڕیارێکی کارگێڕی هەڵوەشاندووەتەوە لە رووی تایبەتمەندێتیی (اختصاص)ەوە.

دادگای تێهەڵچوونەوەی ناوچەی سلێمانییەوە ئەوەشی خستەڕوو، بابەتی خاوەندارێتیی خانووبەرە لە شاری سلێمانی هاوشێوەی شارەکانی تری عیراق، دەستوور پاشان یاسا تایبەتەکان و لە پێشیانەوە یاسای تۆمارکردنی خانووبەرە رێکیخستووە، هیچ بەربەستێکی یاساییان تێدا نییە رێگر بێت لەبەردەم هاووڵاتیانی ناوچەکانی تری عیراق کە خاوەندارێتیی یاساییان هەبێت بۆ شوقە و خانووبەرە، چونکە بەپێی دەستوری عیراقیی بەرکار هاووڵاتیان یەکسانن لە ماف و ئەرکدا بەبێ جیاکاریی رەگەزی و تائیفی و ناوچەگەرێتی.

راشیگەیاند، بەوەش ناکرێت هەر کەسە و لای خۆیەوە راڤە و لێکدانەوە بۆ بڕیارێکی دادوەری بکات کە پلەی بنەبڕیی وەرنەگرتووە و گشتاندن بۆ ئەو حاڵەتە تایبەتە بکات کە ئەو بڕیارە تاوتوێی کردووە.

لیستی موچەی مانگی 10 و راپۆرتی تەرازوی پێداچوونەوەی مانگی نۆی موچەخۆرانی هەرێم رەوانەی بەغداد کرا.                                       

وەزارەتی دارایی و ئابوری هەرێم ئاشکرایکرد، ئێوارەی ئەمڕۆ چوارشەممە لیستی ووچەی مانگی تشرینی یەکەمی فەرمانبەران و موچەخۆرانی هەرێمی کوردستان و راپۆرتی تەرازووی پێداچوونەوەی مانگی ئەیلول لەلایەن تیمی تەکنیکی وەزارەتی دارایی و ئابوری هەرێمی کوردستانەوە رەوانەی شاری بەغداد کرا.

ئاماژەی بەوەشکرد، سبەینێ پێنجشەممە بە رەسمی رادەستی فەرمانگەی ژمێریاری لە وەزارەتی دارایی فیدراڵ دەکرێت.

پۆلیسی سلێمانی، سێ تۆمەتباریان بە تۆمەتی دزینی ماتۆڕسکیل دەستگیرکرد، کە لە لێکۆڵینەوە سەرەتاییەکاندا دانیان بە چەندین تاوانی دزینی ماتۆڕسکیلدا ناوە.

بەڕێوەبەرایەتی پۆلیسی سلێمانی ئاشکرایکرد، مەفرەزەکانی بنکەی پۆلیسی زەڕایەنی سەر بە بەشی پۆلیسی شارەزووری بەڕێوەبەرایەتییان، سێ تۆمەتباریان بەتۆمەتی دزینی ماتۆڕسکیل دەستگیرکرد.

ئاماژەی بەوەشکرد، دوای ئەوەی بنکەی پۆلیسی زەڕایەن ئاگادارکرایەوە لەروداوێکی دزیکردن لەناحیەی زەڕایەن، بڕیاری دادوەر وەرگیراو لێکۆڵینەوەو بەدواداچوون بۆ دۆزینەوەو دەستگیرکردنی تۆمەتبار دەستیپێکرد.

پۆلیسی سلێمانی راشیگەیاند، هەمان شەو بەهاوکاری مەفرەزەکانی بنکەی پۆلیسی عەربەت توانرا تۆمەتبارێک بەناوی (ش، ڕ، ع) دەستگیر بکرێت.

ئەوەشی خستەڕوو، لەبەردەوامیی لێکۆڵینەوەکانی هێزەکانی پۆلیسدا توانرا دوو تۆمەتباری تر بەناوەکانی (ڕ، س، ع - ڕ، ت، ی) لەسەر هەمان دۆسیە لەشاری سلێمانی دەستگیربکرێن.

پۆلیسی سلێمانی تیشکی خستەسەر ئەوەی لە لێکۆڵینەوەکاندا تۆمەتباران دانیان بەچەندین تاوانی دزینی ماتۆڕسکیلدا ناوەو لەچەند بنکەیەکی پۆلیس فەرمانی دەستگیرکردنیان هەبووە.

ئاماژە بەوەشکراوە، لەئێستادا تۆمەتباران بەبڕیاری دادوەر و بەپێی مادەی (31/443) لەیاسای سزادانی عیراقی راگیراون و لێکۆڵینەوەکان بەردەوامە.

قوباد تاڵەبانی، جێگری سەرۆکی ئەنجوومەنی وەزیران پێشوازیکرد لە ئەرمان تۆپجوو، کونسوڵی گشتیی تورکیا لە هەرێمی کوردستان و پێکەوە لەبارەی بەهێزترکردنی پەیوەندییەکانی نێوان هەردوولا گفتوگۆیان کرد.

لە کۆبوونەوەکەدا کە رۆژی چوارشەممە 21ـی 10ـی 2026 بەڕێوەچوو، قوباد تاڵەبانی کردنەوەی سەنتەری پێدانی ڤیزەی تورکیای لە سلێمانی بە هەنگاوێکی گرنگ زانی بۆ باشترکردنی پەیوەندییەکان بە تایبەت لە بوارەکانی بازرگانی و کلتووریدا.

هەردوولاش هاوڕابوون لەسەر پێویستیی کاری هاوبەش لە بواری کارئاسانیکردن بۆ بازرگانان و وەبەرهێنەرانی کوردستان و تورکیا بۆ ئەوەی ئاستی پەیوەندیی ئابووری و بازرگانیی نێوان هەردوولا بەرەوپێشچوونی زیاتر بەخۆیەوە ببینێت.

جێگری سەرۆکی ئەنجومەنی وەزیرانی هەرێم و هەڵسوڕێنەری کاروباری باڵیۆزخانەی ئەمریکا لە عیراق کۆبوونەوە و باسیان لە رەوشی سیاسیی هەرێم و عیراق و چەند پرسێکی دیکە کرد.

قوباد تاڵەبانی، جێگری سەرۆکی ئەنجومەنی وەزیرانی هەرێم، لەگەڵ باڵیۆز ستیڤ ڤەیگن، هەڵسوڕێنەری کاروباری باڵیۆزخانەی ئەمریکا لە عیراق کۆبووەوە و پێکەوە تاوتوێی رەوشی سیاسیی هەرێمی کوردستان و عیراق و چەند پرسێکی دیکەیان کرد.

لە کۆبوونەوەکەدا کە رۆژی چوارشەممە 21ـی 10ـی 2026، بە ئامادەبوونی گویندەلن ویندی گرین، کونسوڵی گشتیی ئەمریکا بەڕێوەچوو، گفتوگۆ کرا لەبارەی رەوشی سیاسیی هەرێمی کوردستان و هەردوولا جەختیان کردەوە لەسەر پێویستیی خێراترکردنی هەنگاوەکانی پێکهێنانی کابینەی نوێی حکومەتی هەرێم.

سەبارەت بە حکومەتی فیدڕاڵیش، هەردوولا خۆشحاڵیی خۆیان دەربڕی بە تەواوبوونی پرۆسەی پێکهێنانی کابینەی حکومەت و جەختیان کردەوە لەسەر چارەسەرکردنی کێشەکانی نێوان هەرێم و بەغداد بەپێی دەستوور. لەم چوارچێوەیەدا قوباد تاڵەبانی ئاماژەیدا بە گفتوگۆکانی پەیوەندیدار بە پرسی بودجە و بە پێویستی زانی لایەنە کوردستانییەکان بە یەکدەنگی و یەکڕیزییەوە لە بەغدا کاربکەن بۆ چەسپاندنی ماف و شایستە داراییەکانی هەرێمی کوردستان.

زیاتر لە 600 خێزانی ئاوارە لە سنوری حەسەکەی رۆژئاوای کوردستان وەک قۆناغی شەشەم گەرێندرانەوە بۆ زێدی خۆیان لە شاری سەرێکانی.

ئەمڕۆ چوارشەممە، بیسان رەسول، پەیامنێڕی کوردسات نیوز لە رۆژئاوای کوردستان، رایگەیاند 642 خێزانی تری ئاوارە لە حەسەکەوە دەگەرێندرێنەوە بۆ زێدی خۆیان لە شاری سەرێکانی، ئاماژەی بەوەشکرد ئەو خێزانانە عەرەبن.

لایخۆشیەوە روانگەى سورى بۆ مافەکانى مرۆڤ بڵاوىکردەوە، گەڕاندنەوەی ئەو خێزانانە وەک بەشێکە لە پرۆسەی گەڕاندنەوەی ئاوارەکانی سوریا بۆ شوێنی نیشتەجێبونیان.

ئەمە شەشەم قۆناغی گەڕاندنەوەی ئاوارەکانە لە سنوری حەسەکە و لە هەفەتی رابردوش قۆناغی پێنجەم، کە لە 385 خێزان پێکهاتوبن و گەڕێندرانەوە بۆ زێدی خۆیان.

ئەمە لە کاتێکدایە هەر لە سنوری حەسەکە ئەمڕۆ ژمارەیک ئاوارە دەستیانکرد بە خۆپیشاندان و نارەزایەتییان دەربڕی لەوەی کاتی گەڕاندنەوەیان دواخراوە و داوا دەکن بە زوی ئەو پڕۆسەیە کۆتایی بێت و ئەونایش بگەڕێنەوە بۆ ناو ماڵ وحاڵی خۆیان.

 

بەڕێوەبەرایەتیی گشتیی هاتوچۆی هەرێمی کوردستان لەبارەی ئەو دەنگۆیانەی باس لە پێدانی تابلۆی ئەمنی بە ئۆتۆمبێلی بێسەرەتا دەکات، راگەیەنراوێکی بڵاوکردەوە و تێیدا سەرلەبەری دەنگۆکانی رەتکردەوە.

لە راگەیەنراوەکەدا، بەڕێوەبەرایەتیی گشتیی هاتوچۆی هەرێمی کوردستان رایگەیاند، دەنگۆی پێدانی 'کۆد' یان 'تابلۆی ئەمنی' بە ئۆتۆمبێلە بێسەرەتا و تۆمارنەکراوەکان دەکەن، ناڕاستە و جەخیشدەکاتەوە کە ئەوان تاکە لایەنی رەسمین بۆ پێدانی تابلۆ.

لە راگەیەنراوەکەدا ئەوەش هاتووە: ئەو دەنگۆیانەی لە بەشێک لە کەناڵەکانی میدیادا بڵاوکراونەتەوە، هیچ پەیوەندییەکیان بە بەڕێوەبەرایەتییەکانی هاتوچۆوە نییە، چونکە بەپێی یاسا و رێنماییەکان، تەنها بەڕێوەبەرایەتیی هاتوچۆ لایەنی رەسمیی تۆمارکردن و پێدانی تابلۆیە بە ئۆتۆمبێل و ماتۆڕسکیل لە هەرێمی کوردستاندا.

هۆشداریش دەدات، هەر ئۆتۆمبێلێک تابلۆی رەسمیی چوار پارێزگاکەی هەرێم، پارێزگاکانی عیراق، یان تابلۆی رەسمیی بیانیی پێوە نەبێت، وەک ئۆتۆمبێلی 'بێتابلۆ'هەژماردەکرێت و لە کاتی بینینیدا لەلایەن تیمەکانی هاتوچۆوە، رووبەڕووی رێکاری یاسایی دەکرێتەوە.

بەڕێوەبەرایەتی پۆلیسی دارستان و ژینگەی راپەرین رایگەیاند، هێزەکانیان سێ تۆمەتباریان دەستگیرکردوە، کە هەشت کەروێشکیان راوکرد بوو.

ئەمڕۆ چوارشەممە  بەڕێوەبەرایەتی پۆلیسی دارستان و ژینگەی راپەرین رایگەیاند، شەوی رابردوو دوای وەرگرتنی زانیاری لەلایەن بازگەی ئاسایشی قەمتەران، بە سەرپەرشتی ئەفسەری بنکەی پۆلیسی دارستان و ژینگەی چوارقورنە توانیویانە بە تۆمەتی راوی نایاسایی سێ تۆمەتبار دەستگیر بکەن.

ئاماژەی بەوەشکردوە، سێ تۆمەتبارەکە لە کاتی دەستگیرکردنیاندا، دەست بەسەر هەشت کەروێشکدا گیراوە، کە ڕاویان کردون و  سێ تانجی و ئۆتۆمبێلێکیشیان پێبوە.

پۆلیسی دارستان و ژینگەی راپەرین دەڵێت؛ بەردەوامن لە پاراستنی سامانە سروشتییەکان و جێبەجێکردنی یاسا بۆ پاراستنی ژینگەیەکی پاک و سەلامە و پەڕاوی لێکۆڵینەوەش بۆ تۆمەتبارەکان کراوەتەوە.

کەشناسیی هەرێم رایگەیاند،  پلەکانی گەرما نزمدەبنەوە، بارانبارین دەستپێدەکات و بەردەوام هەورەبروسکەشی لەگەڵدا دەبێت.

ئەمڕۆ سێشەممە، بەڕێوەبەرایەتی گشتیی کەشناسیی و بومەلەرزەزانی هەرێم پیشبینی کەشوهەوای بۆ 48 سەعاتی داهاتوو بڵاوکردوەتەوە و بە گوێرەی پیشبینییەکان لە ئێوارەی ئەمڕۆوە بارانبارین دەستپێدەکات.

کەشناسیی هەرێم دەڵێت؛ ئەمڕۆ پلەکانی گەرما بەراورد بە تۆمارکراوەکانی دوێنێ  یەک بۆ دوو پلە نزمدەبنەوە.

لە بارەی کەشی سبەینێشەوە ئاماژەی بەوەکردوە، بارانبارین و هەورە بروسکە زیاتر دەبێت، لەکاتی بارانبارینیشدا پلەکانی گەرمان نزمدەبنەوە.

بەرزترین پلەکانی گەرمای پێشبینیکراو بە پلەی سیلیزی بۆ رۆژی چوارشەممە بەمشێوەیە دەبێت؛

هەولێر: 30 پلەی سیلیزی

پیرمام: 27 پلەی سیلیزی

سلێمانی: 29 پلەی سیلیزی

هەڵەبجە:31 پلەی سیلیزی

چەمچەماڵ: 30 پلەی سیلیزی

دهۆک: 29 پلەی سیلیزی

زاخۆ: 30 پلەی سیلیزی

ئاکرێ:31 پلەی سیلیزی

گەرمیان:34 پلەی سیلیزی

حاجی ئۆمەران:25 پلەی سیلیزی

قوباد تاڵەبانی، جێگری سەرۆكی ئەنجومەنی وەزیرانی هەرێمی كوردستان و جۆناسان پاوڵ راوێژكاری ئاسایشی نیشتمانی بەریتانیا لە هەولێر كۆبوونەوە، هەردوولا جەختیانكردەوە لە پێكهێنانی حكومەتێكی بەهێز و یەكگرتوو لە هەرێمی كوردستان.

لە كۆبوونەوەكەدا گفتوگۆ كرا لەسەر چۆنییەتی بەردەوامیدان بە هاوكاری و هەماهەنگییەكانی نێوان هەرێمی كوردستان و بەریتانیا كرا بە تایبەت لە بوارەكانی راهێنان بە هێزەكانی پێشمەرگە و زیاتر بە دامەزراوەییكردنی هێزە ئەمنی و هەواڵگرییەكانی هەرێم.

هەردوولا هاوڕابوون لەسەر پێكهێنانی حكومەتێكی بەهێز و یەكگرتوو لە هەرێم كە رۆڵی گرنگ و دیاری هەبێت لە پاراستنی ئاسایش و سەقامگیری عیراق و ناوچەكە.

لە بەشێكی تری كۆبوونەوەكەدا، پرسی كۆچ خرایە بەرباس و هەردوولا جەختیانكردەوە لە بەردەوامیدان بە هەماهەنگییەكان و كاری هاوبەش بۆ رێگریكردن لە كۆچی نایاسایی گەنجان.

بەڕێوەبەرایەتی پۆلیسی گەرمیان رایگەیاند، تۆمەتبارێکیان دەستگیرکردوە، کە دەستڕێژی تەقەی لە ئۆتۆمبێلی بەڕێوەبەری پۆلسی دارستانی خانەقین کردوە و زیاتر لە 30 گولـلە بەر ئۆتۆمبێلەکە کەوتوە.

پۆلیسی گەرمیان رایگەیاند، ئێوارەی ئەمڕۆ دووشەممە، لە ئەنجامی ئۆپەراسیۆنێکی هاوبەشی هەریەکە لە بەڕێوەبەرایەتیی پۆلیسی گەرمیان و بەڕێوەبەرایەتیی ئاسایشی گەرمیان، تۆمەتبارێک بە فەرمانی دادوەر دەستگیر کرا.

ئاماژەبەوەکراوە، دەستگیرکردنی ئەم تۆمەتبارە پەیوەندی بە روداوێکی پێشووی تەقەکردنەوە هەیە، کە تیایدا ناوبراو دەستڕێژی گولەی لە ئۆتۆمبێلی نەقیب (هاوڕێ جەلیل قادر)، بەڕێوەبەری بەشی پۆلیسی دارستانی خانەقین کردبوو؛ بە جۆرێک، نزیکەی (30) گولـلە بەر ئۆتۆمبێلەکە کەوتووە.

پۆلیسی گەرمیان دەڵێت؛ لە ئێستادا، تۆمەتبارەکە بە بڕیاری دادوەر و بەپێی ماددەی (430) لە یاسای سزادانی عیراقی دەستگیر کراوە، هاوکات لێکۆڵینەوە لە وردەکاری و هۆکارەکانی روداوەکە لەلایەن هێزە ئەمنییەکانەوە بەردەوامە.

لە راگەیەندراوێکدا، وەزارەتی کارەبای حکومەتی هەرێمی کوردستان دەڵێت خۆشحاڵە بە سەرکەوتنی هەڵمەتی داشکاندنی قەرزی پێش روناکی، کە تێیدا لێخۆشبوون بۆ زیاتر لە 400 ملیار دینار کراوە.

وەزارەتی کارەبای هەرێم رایگەیاند، زیاتر لە 400 ملیار دینار گەڕاوەتەوە بۆ هاووڵاتیان  و کۆی گشتیی هاوبەشانی سوودمەند گەیشتووەتە 951,098 هاوبەش، کە بە   بڕی 403.13 ملیار دینار لێخۆشبوونیان بۆ کراوە.

وەزارەتی کارەبا دەشڵێت؛  بەهۆی بڕیاری لێخۆشبونەکەوە، زیاتر لە 500 ملیار دینار  لە ماوەی سێ مانگدا (ئاب، ئەیلوول و تشرینی یەکەم) کۆکراوەتەوە و  لە ئێستادا زیاتر لە 70٪ی هەموو هاوبەشانی کارەبا لەسەرانسەری هەرێم هیچ قەرزێکی پێش روناکیان لەسەر نەماوە.

ئاماژەی بەوەشکرد، ئەو کەسانەش، کە قەرزیان ماوە بەشێوەی ئۆتۆماتیکی دەکرێنە قیستی درێژخایەن.

بەڕێوەبەرایەتی پۆلیسی پارێزگای هەولێر راگەیەندراوێکی بڵاوکردوەتەوە و تێیدا هاتووە؛ ئەو پارێزەرەیان دەستگیرکرد، کە لە ناو دادگا بەهۆی دەمەقاڵێی لەگەڵ هاوپیشەیەکیدا بە دەمانچە تەقەی کرد بوو.

ئەمڕۆ دووشەممە پۆلیسی هەولێر رایگەیاند، دوای دەمەقاڵێی نێوان دوو پارێزەر لە دادگای هەولێر، یەکێکیان دەمانچەی دەرکردووە و هەڵاتبوو، ئەمڕۆش لەلایەن پۆلیسەوە توانرا دەستگیر بکرێت.

بەپێی راگەیەندراوەکەی پۆلیس، روداوەکە رۆژی 18ی تشرینی یەکەمی 2026ـىوە و لەنێوان دوو پارێزەر بە ناوەکانی (ی. ز. م) و (س. ع. ح) روی داوە.

ئاماژە بەوەشکراوە، کاتێک ئەفسەر و کارمەندانی پۆلیسی دادگا هەوڵیان داوە رەوشەکە کۆنتڕۆڵ بکەن، پارێزەر (ی. ز. م) دەمانچەی دەرکردووە و دوای تەقەکردن هەڵاتووە.

پۆلیسی هەولێر دەڵێت؛ لە ئێستادا تۆمەتبارەکە بە فەرمانی دادوەر دەستگیر کراوە و پەڕاوی لێکۆڵینەوەی بۆ کراوەتەوە .

لە هەولێر پرۆسەی تیروپشک بۆ دابەشکردنی 1700 پارچە زەوی لە سنوری سەرۆکایەتیی شارەوانیی گوێر و سفەییە بەڕێوەچوو، وەزیری گەشتوگوزاریش رایگەیاند، تا ئێستا زیاتر لە 40 هەزار پارچە زەوی لە سنوری هەولێر دابەشکراوە.

ئەمڕۆ دووشەممە، وەزارەتی شارەوانی و گەشتوگوزار رایگەیاند، 1700 پارچە زەوی تر بەسە فەرمانبەران و هاووڵاتییدا دابەشکرا و لەو ژمارەیە، 1240 پارچە زەویان بۆ فەرمانبەران  بوە  و ژمارەکەی تریش بۆ جوتیاران و خاوەن مافەکان تەرخان کراون.

لە کۆنفرانسێکی رۆژنامەوانیشدا، بەڕێوەبەری گشتیی شارەوانییەکانی هەولێر رایگەیاند،  لە هەفتەی داهاتوەوە قۆناغی بەدیجیتاڵکردن و وردبینیی زەوییەکان دەست پێدەکات، بە جۆرێک فەرمانبەر دەتوانێت لە رێگەی مۆبایلەکەیەوە بزانێت زەوییەکەی دەکەوێتە چ قۆناغ و شوێنێکەوە.

ئاماژە بەوەکراوە، ئەم پرۆسەیە وەک پاداشتێک بۆ فەرمانبەران لە کۆتایی ساڵی 2024ـەوە دەستی پێکردووە و لە زۆربەی شوێنەکانیش رێژەی جێبەجێکردنی گەیشتووەتە 50٪ و بەردەوامیشی دەبێت.

لە میانی پرۆسەی تیروپشکەکەدا، وەزیری گەشتوگوزار رایگەیاند، تا ئێستا زیاتر لە 40 هەزار پارچە زەوی، کە نزیکەی 32 هەزاریان بۆ فەرمانبەران و ئەوی تریان بۆ جوتیاران بووە،  لە سنوری 15 شارەوانیدا دابەشکراون، هەروەها کاری وردبینی بۆ 50 هەزار ناوی تر لە 37 شارەوانیدا لە قۆناغی کۆتاییدایە.

سەرۆکی ئەنجومەنی وەزیرانی هەرێم، دەستلەکارکێشانەوەی وەزیری دارایی رەتکردووەتەوە.

بڕیار محەمەد، پەیامنێری کوردسات نیوز: مەسرور بارزانی، سەرۆکی ئەنجومەنی وەزیرانی هەرێم، دەستلەکارکێشانەوەی ئاوات شێخ جەناب، وەزیری دارایی رەتکردووەتەوە.

بەپێی زانیارییەکانی پەیامنێری کوردسات نیوز، دوێنێ بڕیاری رەتکردنەوەکە دراوە و وەزیری دارایی لە ئەرکەکەی بەردەوام دەبێت. 

ئەمە لەکاتێکدایە، رۆژی 30ـی 9ـی 2026، سەرچاوەیەک لە وەزارەتی دارایی بە کوردسات نیوزی راگەیاندبوو، ئاوات شێخ جەناب، وەزیری دارایی دەستلەکارکێشانەوەی پێشکەش کردووە.