کوردستان
کارمەندێکی بەرێوەبەرایەتی کارەبای ئاکرێ بەهۆی تەزوی کارەباوە گیانی دەستداوە و کەسێکی دیکەش بریندارە.
نێچیرڤان فەخرەدین بەرپرسی راگەیاندنی تەندروستی ئاکرێ بە کوردسات نیوزی راگەیاند: ئەو کەسەی گیانی لەدەستداوە ناوی 'فیراس کەلحێ؛ـیە و تەمەنی 46 ساڵە، بریندارەکەش ناوی 'عومەرعەبدولخالقە' و تەمەن 56 ساڵە، ئەمرۆ لەکاتی کارکردندا توشی ئەم روداوە بون لە گوندی گەلۆک لە ئاکرێ.
ئەوەشی خستەروو، بریندارەکە ئێستا چارەسەر وەردەگرێت و لە بەشی فریاکەوتنە لە نەخۆشخانەی ئاکرێ.
کەشناسیی هەرێم پێشبینییەکانی کەشوهەوای ئەمڕۆ و سبەینێی راگەیاند و ئاماژەی بەوەکردووە، شەپۆلی بارانبارین و هەورەبروسکە بەردەوام دەبێت و لە سنوری سلێمانی و دەوروبەری شەپۆلەکە چڕتر دەبێتەوە.
کەشناسیی هەرێم رایگەیاند، ئەمڕۆ چوارشەممە، بە گشتی ئاسمان نیمچەهەور بۆ هەورى تەواو دەبێت لەگەڵ تاوەبارانی پچڕپچڕ و هەندێکجار هەورەبروسکەشى لەگەڵدا دەبێت بە تایبەتى لە سنورى پارێزگاى هەولێر و دهۆک.
ئاماژەی بەوەشکردووە، سبەینێ پێنجشەممە، ئاسمان هەورى تەواو دەبێت لە زۆربەى کاتەکاندا لەگەڵ بارانی پچڕپچڕ و هەندێکجار هەورەبروسکەى لەگەڵدا دەبێت، رێژەى دابارین لە سنورى پارێزگاى سلێمانى زیاتر دەبێت.
ئەوەشی خستووەتە روو، ئەمڕۆ پلەکانی گەرما هاوشێوەی دوێنێ دەبێت، بەڵام سبەینێ 4 بۆ 6 پلەی سیلیزی نزم دەبنەوە.
باسی لەوەشکردووە، خێرایی با هەندێک کات بۆ سەروو 30 کیلۆمەتر لە سەعاتێکدا چالاک دەبێت.
بەرزترین پلەکانی گەرمای پێشبینیکراو بە پلەی سیلیزی:
هەولێر : 24 پلەی سیلیزی
سلێمانی : 22 پلەی سیلیزی
دهۆک : 22 پلەی سیلیزی
کەرکوک : 30 پلەی سیلیزی
زاخۆ : 21 پلەی سیلیزی
هەڵەبجە : 25 پلەی سیلیزی
سۆران : 21 پلەی سیلیزی
حاجی ئۆمەران : 15 پلەی سیلیزی
گەرمیان :33 پلەی سیلیزی
بەڕێوەبەرایەتی ئەوقافی سلێمانی پڕۆژەیەکی بۆ یەکخستنی بانگی سەرجەم مزگەوتەکانی ناوشاری سلێمانی راگەیاند.
بەڕێوەبەرایەتی ئەوقافی سلێمانی رایگەیاند، لە پڕۆژەیەکدا بەناوی "پڕۆژەی بانگبێژی شار"، بانگی سەرجەم مزگەوتەکانی شاری سلێمانی یەکدەخەن.
راشیگەیاندووە، "داوا لە سەرجەم بانگبێژە دەنگخۆشەکان دەکەین، ئەوانەی خوازیارن بەشدار بن لەو پڕۆژەیە، پەیوەندی بە لیژنەی هەڵسەنگاندنەوە بکەن".
دەشڵێت، دوا کات بۆ تۆمارکردنی ناوەکان 14ی نیسانە.
ئەوەش دوای ئەوە دێت، لە ماوەی رابردوودا بەشێکی هاووڵاتیان گرفتیان هەبوو لەگەڵ بەرز و نزمی دەنگی بڵندگۆی بەشێکی مزگەوتەکان و بانگبێژەکان و داواکاربوون، بەڕێوەبەرایەتی ئەوقاف دەنگی بڵندگۆکان و توانا و دەنگی بانگبێژەکان بۆ بانگدان رێکبخاتەوە.
ئەمڕۆ 17یەم پێشانگەی نێودەوڵەتی هەولێر بۆ کتێب لە ژێر ناونیشانی "جیهان بە کوردی دەودوێت" دەستی پێ کرد.
ئەمڕۆ چوارشەممە، ٩ی نیسان، 17یەم پێشانگەی نێودەوڵەتی هەولێر بۆ کتێب دەستی پێ کرد و بڕیارە ماوەی 10 رۆژ تاوەکو 19ی نیسان بەردەوام بێت.
پێشانگەکە لەژێڕ ناونیشانی "جیهان بە کوردی دەودێت" دەکرێتەوە، کە ئاماژەیە بەوەی چەندین کتێبی نوێ لە نووسینی نووسەرانی کورد و وەرگێڕانی چەندین کتێبی جیهانی نوێی تێدایە بۆسەر زمانی کوردی.
بڕیارە سەنتەری توێژینەوەی پەرلەمانی کوردستان بە 65 ناونیشان بەشداری پێشانگەی نێودەوڵەتیی هەولێر بۆ کتێب بکات.
هەروەها زیاتر لە 200 دەزگای چاپ و پەخش و بڵاوکردنەوەی ناوخۆیی و بیانی لە پێشانگەکەدا بەشدارن.
حزبی بەعس ئەو حزبە دیکتاتۆرەی ماوەی زیاتر لە 40 ساڵ حوکمی عیراقی کرد، ئەمڕۆ 22 ساڵ تێدەپەڕێت بەسەر روخانیدا و ئازادبوونی عیراق لەدەست ئەو رژێمە.
حزبی بەعس، ئەو حزبەدیکتاتۆرە بوو کە 4ی نیسانی 1947 لەسەر دەستی میشێل عەفلەق، سەلاح بەیتار، جەلال سەید و وەهیب غانم لە سوریا دامەزرا، پابەندی بیری ناسیونالیستی عەرەبی بوو.
لە کۆنگرەی 1947دا سێ پەیامیان هەبوو، کە گرنگترینیان بەلای خۆیانەوە ئەوە بوو، دەیانویست هەموو عەرەب لەژێر چەتری یەک دەوڵەتدا کۆبکەنەوە.
حزبی بەعسی عیراق لە ساڵی 1958 بە سەرۆکایەتی عەبدولسەلام عارف کودەتای بەسەر سیستمی پاشایەتی عیراقدا کرد، تاوەکو لە ساڵی 1963 جارێکی دیکە کودەتایەکی دیکە بەسەرکردایەتی عەبدولسەلام عارف ئەنجام درا، تاوەکو لە ساڵی 1969 بەعسییەکان ئەحمەد حەسەن بەکریان کردە سەرۆک کۆمار و سەدام حسێنی دیکتاتۆریش لە ساڵی 1979دا بوو بە سەرۆک کۆمار، کە دوایین سەرۆکی ئەو حزبەش بوو.
حزبی بەعس بەهۆی سیاسەتە دیکتاتۆرییەکەی و سیاسەتی بەعەرەبکردنی ناوچەکانی کوردستان، چەندین تاوانی گەورەی دژ بە مرۆڤایەتی بەرانبەر کورد ئەنجام دا و بە مەبەستی بەدیهێنانی خواستەکانی خۆی چەندین رێگای دڕندانەی بەکارهێنا بۆ کەمکردنەوەی ژمارەی کورد و لەناوبردنی ئەو نەتەوە رەسەنە.
حزبی بەعس بە چەندین قۆناغ لە جینۆسایدکردنی کوردەکاندا بەردەوام بوو، هەر لە سەرەتاوە لە ساڵی 1963 بە بە تەعریبکردنی گوندەکانی دەوروبەری کەرکوک دەستی پێ کرد، تاوەکو لە ساڵی 1970وە دەستی کرد بە راگواستن و بێسەروشوێنکردنی کوردانی فەیلی، لە ساڵی 1983شدا ئەنفالکردنی هەشت هەزار کەس و لە کۆتایی 80کانیشدا چەکی کیمیایی قەدەغيکراوی دژ بە کورد بەکارهێنا.
لە ساڵی 1988یشەوە بە هەشت قۆناغ پرۆسەی ئەنفالی دژ بە کورد دەست پێ کرد.
دواجار گەلی کورد لە بەهاری ساڵی 1991دا دژ بە دەسەڵاتی بەعس راپەڕی و لە سەرتاسەری کوردستاندا راپەڕین دژ بە بەعس دەستی پێ کرد و توانیان لەماوەی 16 رۆژدا شارەکانی کوردستان لەدەست رژێمەکە ئازاد بکەن، بەڵام لە 27ی ئازاردا سوپای عیراق کەرکوکی گرتەوە و لە 31ی ئازاریشدا هەولێری گرتەوە، دواتر کۆڕەو دەستی پێ کرد و خەڵکی کوردستان بەرەو سنورەکانی ئێران و تورکیا ئاوارە بوون.
تاوەکو ئەنجومەنی ئاسایشی نێودەوڵەتی لە ٥ی نیسانی ساڵی 1991دا بڕیاری 688ی نەتەوە یەکگرتووەکانی دەرکرد کە تیایدا هاتبوو: نابێ سوپای عیراق پەلاماری باشووری کوردستان بدات و کۆمەڵ کوژی کورد بکات.
ناوچەیەکی ئارامیان لە سەرووی ھێڵی ٣٦، بۆ پاراستنی کورد دیاری کرد، دواتر ھیزی وڵاتانی ھاوپەیمان گەیشتنە بنکەی سەربازی (ئەنجەلیک) لە تورکیا، بۆ پاراستن و گەڕانەوەی ھاووڵاتیان بۆ شوێنەکانی خۆیان .
دواجار لە ساڵی 2003دا ئەمریکا سەدام حسێنی ئاگادار کردەوە کە لەماوەی دوو رۆژدا دەست لە دەسەڵات هەڵبگرێت و عیراق جێبهێڵێت، بەڵام سەدام حسێن ئەوەی رەتکردەوە، بۆیە ئەمریکا بڕیاریدا بەوەی لە سەعاتی سفردا هێرش بکاتە سەر عیراق و کۆتایی بە دەسەڵاتی سەدام بهێنێت.
تاوەکو لە 20ی ئازاری 2003دا یەکەم هێرشی ئەمریکا دەستی پێ کرد و تاوەکو 9ی نیسان هێزەکانی هاوپەیمانان بەغدایان بە تەواوی کۆنتڕۆڵ کرد، لە 25ی ئازاردا لەرێگای کەنداوەوە هێزی دەریایی گەیشتنە عیراق و لە 26ی ئازاریشدا لە رێگای هێزی ئاسمانییەوە بە هاوکاری هێزەکانی پێشمەرگە توانیان کوردستان ئازاد بکەن.
پڕۆسەی ئازادی عێراق کە تیایدا 49 وڵات هاوپەیمان بوون، لە 9ی نیساندا پەیکەری سەدام حسێن لە عیراق خرایە خوارەوە و رووخانی رژێمی بەعس راگەیەنرا، لە مانگی ئایاریشدا پۆل بریمەر حاکمی ئەوکاتی مەدەنی ئەمریکی لە عێراق، بە رەسمی هەڵوەشانەوەی حزبەکەی راگەیاند.
لە سلێمانی رێوڕەسمی بڵاوکردنەوەی کتێبی بیبلیۆگرافی خەڵاتی زێڕینی بلە بەڕێوەچوو
دامەزراوەی بیرمەند و روناکبیر ئیبراهیم ئەحمەد رێورەسمی دابەشکردنی کتێبی (بێبلۆگرافیای خەڵاتی زێڕینی بلە) بەڕێوەبرد
لە ساڵیادی کۆچی دوایی بیرمەند و نووسەر و سیاسەتمەدار و ڕۆماننووسی بەناوبانگ، ئیبراهیم ئەحمەد، دەزگای ئیبراهیم ئەحمەد مەراسیمێکی دابەشکردنی کتێبی لە شاری سلێمانی بەڕێوەبرد، بە ناوی "بێبلۆگرافیای خەڵاتی زێڕینی بلە" کە کتێبەکە هەموو روداوەکانی ساڵانی پێش خەڵاتەکە بە بەڵگە دەکات کە ساڵانە لە 8ی نیسان بەڕێوەدەچێت.
شاناز ئیبراهیم ئەحمەد خانمی یەکەمی عیراق لە وتارێکدا باسی لە شاکارەکانی بیرمەند و روناکبیر ئیبراهیم ئەحمەد کرد لە بواری سیاسی و فیکری و ئەدەبی و رۆڵی لە بەرەنگاربوونەوەی نادادپەروەری و ستەمکاری و بڵاوکردنەوەی ئازادی و دادپەروەری و ئاماژەیکرد، بە بیرۆکەی پێشکەشکردنی خەڵاتی (بلە) بۆ بەدیهێنانی خەونی خوالێخۆشبوو ئیبراهیم ئەحمەد بۆ ستایشکردن و پێزانین بۆ هەر کەسێکی دڵسۆز کە وەک سەربازێکی ون لە خزمەتی گەلی کوردستان کاری کردووە.
خانمی یەکەمی عیراق ئاماژەی بەوەشکرد، عیراق پڕە لەو کەسایەتیانەی کە شایەنی دەستخۆشی و دانپێدانان و شکۆن بۆ هەڵوێستە نیشتمانپەروەرییە دڵسۆزەکانیان، جەختیشیکردەوە کە ئەوان وەک گەوهەر بەنرخن کە ماندوونەناسانە کاردەکەن بۆ خزمەتکردنی گەلەکەمان.
شاناز ئیبراهیم ئەحمەد باسی لە قۆناغەکانی دامەزراندنی ئەم فێستڤاڵەکرد کە لە ساڵی 2002 وە بەهای باڵای بۆ براوەی خەڵاتەکان بەخشیوە، چ لە ناوخۆی هەرێمی کوردستان و چ بۆ کەسایەتییە نێودەوڵەتییەکان کە لە کاتە سەختەکانی خەباتیان دژی دەسەڵاتی دیکتاتۆری پشتیوانی و هاوسۆزی خۆیان لەگەڵ گەلی کوردمان دەربڕیوە.
لە میانی مەراسیمەکەدا کە ژمارەیەک لێپرسراو ئەوانەی لە ساڵانی پێشوودا خەڵاتەکانیان بەدەستهێنابوو ئامادەبون ، خانمی یەکەمی عیراق روناکی خستە سەر لایەنە گەشاوەکانی ژیانی بیرمەند و سیاسەتمەدار ئیبراهیم ئەحمەد و بەرهەمە ئەدەبییەکانی، بەتایبەتی رۆمانە بەناوبانگەکەی بە ناوی "ژانی گەل" کە لە ساڵی 1956دا چاپ و بڵاوکرایەوە.
هەروەها خانمی یەکەم گەلەری زاموای کردەوە کە ماڵی بیرمەند و روناکبیر ئیبراهیم ئەحمەدە کە تابلۆی هونەری جیاواز لەخۆدەگرێت .
ئەمشەو لە سنوری سەرگەڕان شەش تراکتۆری جوتیارانی کورد لەلایەن سوپای عیراق دەستی بەسەردا گیرا.
یەکێک لە جوتیارانی گوندی شەناغەی سەر بە ناحیەی سەرگەڕان بە کوردسات نویزی راگەیاند: ئەو پارچە زەوییەی سەرقاڵی كێڵانی بووین هیچ كێشەیەكی یاسایی نییە، بەڵام سوپای عیراق هەڵیانکوتاوەتە سەر زەوییەکانمان و دەستیان بەسەر شەش تراکتۆردا گرتووە.
ئاماژەی بەوەشکرد، لەساڵی 2021 پارچە زەوییەكە بە یاسا گەڕێندراوەتەوە بۆ خاوەنە رەسەنەكەی، راشیگەیاند، لەئێستادا لایەنە پەیوەندیدارەكانمان ئاگادار كردووەتەوە و سەرقاڵی چارەسەری كێشەكەن.
رێبوار تەها پارێزگاری کەرکوک بڕیاریدا سبەینێ بکاتە پشووی رەسمی لە کەرکوک، هاوکات زانکۆکانی سەر پشک کرد لە بڕیاردان بۆ پشوو بەهۆی بوونی تاقیکردنەوەکان
ئاماژەی بەوەشکرد، سبەینێ چوارشەممە، 9ی نیسان، لە دیوانی پارێزگا و هەموو فەرمانگەکان پشووە، بەڵام فەرمانگە خزمەتگوزارییەکان ئەو زانکۆیانەی تاقیکردنەوەیان هەیە پشوەکە نایانگرێتەوە
دەست بەسەر بڕی 30 کیلۆگرام ماددەی هۆشبەردا گیرا، بەڕێوەبەرایەتی گشتی ئاسایشی سلێمانیش دەڵێت؛ تۆمەتباری بازرگان کەسێکی بیانی بووە و دەیویست بۆ تورکیا بیگوازێتەوە.
بەڕێوەبەرایەتی گشتی ئاسایشی سلێمانی بڵاویکردەوە، بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم بەهەماهەنگی بەڕێوەبەرایەتی گشتی ئۆپراسیۆنەکانی ئاسایش و بەڕێوەبەرایەتی ئاسایشی بازگەکان توانییان لەچالاکییەکی سەرکەتوودا دەستبەسەر بڕی (30)کیلۆگرام ماددەی هۆشبەر لەجۆری(کریستاڵ)دا بگرن.
ئاماژەی بەوەشکرد، شەوی 6/4/2025 لەسەر بنەمای زانیاری پێشوەختە و چاودێری ووردی هێزەکانمان لەسەر سنورەکانی هەرێمی کوردستانەوە تا گەیشتن بە یەکێک لەبازگەکان، لەچوارچێوەی ئۆپراسیۆنێکی سەرکەوتوودا توانرا رێگری لەگواستنەوەی بڕی (30)کیلۆگرام ماددەی هۆشبەر بکرێت.
بەڕێوەبەرایەتی ئاسایشی سلێمانی راشیگەیاند، تۆمەتباری بازرگان کەسێکی بیانی بوو، کەبەنیازی گواستنەوەی ماددە هۆشبەرەکە بوو بۆ وڵاتی تورکیا و دوای ئەنجامدانی پشکنین و دۆزینەوەی ماددەکە توانرا بازرگانەکە دەستگیربکرێت و دەستبەسەر سەرجەم ماددە هۆشبەرەکە بگیرێت.
ئەوەشی خستەڕوو، لەئێستادا تۆمەتبار بەبڕیاری دادوەر بەماددەی (25) لەیاسای بەرەنگاربوونەوەی ماددە هۆشبەرەکان و کارتێکارە ئەقڵییەکان ڕاگیراوە و لێکۆڵینەوە لەدۆسیەکەی بەردەوامە.
بەهۆی كەمبونەوەی بەرهەمی تەماتە، وەزارەتی كشتوكاڵی هەرێم بڕیاریدا بە هەڵگرتنی باج و قەدەغە لەسەر هاوردەكردنی تەماتەی هاوردە.
وەزارەتی كشتوكاڵ و سەرچاوەكانی ئاوی هەرێم نوسراوێكی ئاراستەی وەزارەتی دارایی و بەڕێوەبەرایەتی گشتی گومرگ كردووە، لە نوسراوەكەدا هاتووە دوای بەدواداچوون بۆ بەرهەمی تەماتە، دەركەوت لە پارێزگاكان و ئیدارە سەربەخۆكان بەرهەمی تەماتە لە بازاڕەكاندا كەمبوەتەوە، بەوهۆیەشەوە نرخەكەی بەرزبوەتەوە، لەبەرئەوە پاڵپشت بەیاسای پاراستن و پێشخستنی بەروبوومی كشتوكاڵ، بڕیاریاندا بە هەڵگرتنی باج و قەدەغە لەسەر هاوردەكردنی تەماتە لە دەرەوەی وڵات.
هاوكات ئەنجومەنی وزاری ئابووری عیراقیش رایگەیاندووە، بڕیاردراوە بۆ لەمەودوا رێگە نەدرێت بە هاوردەكردنی هێلكە لە وڵاتانی دەرەوە بۆ ناو بازاڕەكانی عیراق، بەڵام رێگە دەدرێت بە هاوردەكردنی تەماتە و پەتاتە و كەلەرم و كاهو و چەوەندەر، بەو پێیەی وەرزی كشتوكاڵی بۆ ئەو بەرهەمانە كۆتایی هاتووە.
لەمەودوا لە هەولێر مامەڵکردن بەهەموو جۆرە دراوێکی ئەلیکترۆنی و کانزایی قەدەغەیە، ئاسایشی هەولێریش رایدەگەیەنێت؛ هەر کۆمپانیا و هەر کەسێک مامەڵەی پێوەبکات روبەڕوی لێپرسینەوە دەبێتەوە.
بەڕێوەبەرایەتی گشتی ئاسایشی هەولێر لە راگەیەنراوێکدا بڵاویکردەوە، مامەڵەکردن بە هەموو دراوێکی ئەلیکترۆنی و کانزایی(فۆڕێکس) و (USTD) یاسایی نییە و قەدەغەیە.
ئاسایشی هەولێر راشیگەیاندووە، کۆمپانیاکانی فۆڕێکس و دراوی ئەلکترۆنی لە هەرێمی کوردستان و عیراق مۆڵەتی رەسمییان نییە، هەروەها بەپێی رێنمایی بانکی ناوەندی عیراق و هەردوو وەزارەتی دارایی هەرێم و فیدرال، هیچ یاسا و رێنماییەک نییە بۆ رێکخستنی ئەم جۆرە مامەڵانە، بۆیە رێگە پێدراونییە.
ئاسایشی هەولێر داوا لە هاووڵاتیان دەکات بە دووربن لەمامەڵەکردن بەو جۆرە دراوانە بۆ ئەوەی روبەڕوی زیانی مادی نەبنەوە، چونکە لەماوەکانی رابردودا ژمارەیەکی زۆری هاووڵاتی زیانی مادییان بەرکەوتووە.
لە کۆتایی راگەیەنراوەکە ئاسایشی هەولێر، ئاماژەی بەوەشکردووە، هەر کۆمپانیا و هەر کەسێک لەرێگەی سۆشیال رێکلام بۆ بۆ کاری فۆڕێکس و دراوە ئەلیکترۆنیەکان بکەن، روبەڕوی لێپرسینەوەی یاسایی دەبنەوە.
بۆ بەشداریكردن لە كۆڕبەندی ئابوریی دێڵفی، قوباد تاڵەبانی جێگری سەرۆكی حكومەتی هەرێم بەرەو یۆنان بەرێكەوت.
قوباد تاڵەبانی، بە یاوەری هەریەك لە وەزیری پلاندانان و جێگری لێپرسراوی فەرمانگەی پەیوەندییەكانی دەرەوە، بەشداری لە كۆڕبەندی ساڵانەی ئابووری دێڵفی دەكات، كە ژمارەیەكی زۆر لە سەرۆك و سەرۆك وەزیران و بەرپرسانی باڵا و بیرمەندان و ئەكادیمیستانی جیهان بەشداری تێدا دەكەن.
لە كۆڕبەندەكەدا گفتوگۆ دەكرێت لەبارەی دوایین پێشهاتە سیاسی و سەربازی و ئابوورییەكان و پلان و ستراتیژی گشتگیر بۆ چارەسەركردنی قەیرانەكان، قوباد تاڵەبانیش بۆ سێهەمین ساڵە بەشداری لەو كۆربەندە نێودەوڵەتییەدا دەكات.
قائیمقامی سلێمانی سەردانی بازاڕی دارەسوتاوەکەی کرد و لە نزیکەوە چاودێری پڕۆسەی پاککردنەوەی پاشماوەی ئاگرەکەی کرد، هەروەها سوپاسی تیمەکانی بەرگری شارستانی و شارەوانی کرد کە لە سەرەتای روداوەکەوە بەردەوام لە کاردان.
ئاوات محەمەد، قائیمقامی سلێمانی، ئەمڕۆ سێشەممە سەردانی گوزەری دارەسوتاوەکەی کرد و رایگەیاند کە تیمەکانی شارەوانی توانای کارکردنیان بۆ سێ هێندە زیاد کراوە، بە جۆرێک زۆربەی ئامێرەکانی شارەوانی بەردەوام لە کاردان بۆ ئەوەی بە زوترین کات پڕۆسەی پاککردنەوەکە تەواو بکەن.
لە میانەی سەردانەکەیدا، قائیمقامی سلێمانی سوپاسی قوباد تاڵەبانی و سکرتاریەتی سەرۆک مام جەلالی کرد کە سەرپەرشتی پڕۆسەکە دەکەن و ئەرکی قەرەبووکردنەوەی زیانلێکەوتووانیان گرتووەتە ئەستۆ.
هاوکات، بەڵێنی بە کاسبکارانی ناوچەکە دا کە هەمو هەوڵێک دەدات تا بە زووترین کات بگەڕێنەوە سەر کارەکانیان و ژیانی ئاسایی خۆیان.
شایەنی باسە، ئاگرەکەی بازاڕی دارەسوتاوەکە زیانێکی زۆری لێکەوتەوە و لەلایەن چەندین تیمی فریاکەوتن و بەرگری شارستانییەوە کۆنتڕۆڵ کرا، ئێستاش بەردەوام کارەکانی پاککردنەوە و هەڵسەنگاندنی زیانەکان بەڕێوە دەچێت.
کەشناسیی هەرێم پێشبینی نوێی بۆ کەشوهەوای ئەمڕۆ و سبەینێ راگەیاند و ئاماژەی بەوەکردووە، شەپۆلێکی تاوەباران و هەورەبروسکە ناوچە جیاوازەکانی هەرێم دەگرێتەوە.
کەشناسیی هەرێم رایگەیاندووە، ئەمڕۆ سێشەممە، بە گشتی ئاسمان هەور و نیمچەهەور دەبێت، لەگەڵ تاوەبارانی پچڕپچڕ، هەروەها ئەگەری هەورەبروسکە هەیە، کاریگەری ئەم ناجێگیرییە سەرەتا لە سنوری پارێزگای دهۆک و ناوچە شاخاوییەکانی سەرهەڵدەدات، پاشان درێژ دەبێتەوە بۆسەر بەشێک لە سنوری پارێزگای هەولێر و لە شەودا دەگاتە سنوری ئیدارەى راپەڕین.
ئاماژەی بەوەشکردووە، سبەینێ چوارشەممە، لە کاتەکانی بەیانی تاوەکو نیوەڕۆ، لە بەشێک لە ناوچە سنوریی و شاخاوییە بەرزەکان ئەگەری کەمێک نمەباران و هەورەبروسکە هەیە، لە دوای نیوەڕۆوە دووبارە کاریگەری ئەم ناجێگیرییە زیاد دەکات لە تەواوی هەرێمدا، هەروەها هەندێک کات ئەگەری بەرزبوونەوەی تۆز و خۆڵ هەیە لەگەڵ بارانباریندا.
کەشناسیی دەشڵێت، هەورەبروسکە لە چەند ناوچەیەکی وەک شاخ و لوتکەی شاخ و گردۆڵکە و دەشتاییەکاندا مەترسیدارە.
ئەوەش هاتووە، ئەمڕۆ و سبەینێ خێرایی با زیاد دەکات و هەندێکجار دەگاتە سەروو 30 کیلۆمەتر لە سەعاتێکدا، پلەکانی گەرماش بەگشتی جێگیر دەبن، تەنها لەو ناوچانەی کە کەش تیایاندا ناسەقامگیرە، نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی:
هەولێر: 30 پلەی سیلیزی
سلێمانی: 29 پلەی سیلیزی
دهۆک: 28 پلەی سیلیزی
کەرکوک: 34 پلەی سیلیزی
زاخۆ: 29 پلەی سیلیزی
هەڵەبجە: 30 پلەی سیلیزی
سۆران: 28 پلەی سیلیزی
حاجی ئۆمەران: 18 پلەی سیلیزی
گەرمیان: 35 پلەی سیلیزی
شارەوانی سلێمانی رایگەیاند، پێویستە لەماوەی هەفتەیەکدا ئەو یاری جەمپانەی لە گەڕەک و شەقامەکاندا دانراون لاببرێن.
شارەوانی سلێمانی رایگەیاند، پاڵپشت بە رێنماییەکانی قایمقامییەتی پارێزگای سلێمانی دانانی یاری جەمپ لەناو گەڕەکەکاندا و لەسەر موڵکی گشتی هیچ مۆڵەتێکی یاسایی نییە و رێگەپێدراو نییە.
ئاماژەی بەوەشکردووە، بەهۆی ئەو روداوە نەخوازراوانەی لێیان دەکەوێتەوە، ئەو یارییانە هۆکارێکن بۆ زیانگەیاندن بە تەندروستی منداڵان و ئازاردانیان، سەرباری ئەوەش ساڵانە لەگەڵ هاتنی وەرزەکانی بەهار و هاوین، دیاردەی دانانی جەمپ لەناو گەڕەکەکانی شاری سلێمانی بەردەوام روو لە هەڵکشان دەکات.
شارەوانی سلێمانی راشیگەیاندووە، ئاگاداری خاوەنەکانیان دەکاتەوە، لەماوەی هەفتەیەکدا هەستن بە لادانی زیادەڕەوییەکانیان، بەپێچەوانەوە پاش تێپەڕاندنی ئەو ماوەیە و لە ئەگەری پابەندنەبوون بەم ئاگادارییەوە، بەشی لابردنی زیادەڕەویی شارەوانی هەڵدەستێت بە لابردن و تێکدانی ئەو جەمپانەی جێگیرکراون.
بافڵ جەلال تاڵەبانی، سەرۆکی یەکێتیی نیشتمانیی کوردستان، لە یادی کۆچی دوایی مامۆستا ئیبراهیم ئەحمەد، یەکێک لە دامەزرێنەرانی بزووتنەوەی سیاسی کورد، پەیامێکی بڵاوکردەوە.
بافڵ تاڵەبانی لە پەیامەکەیدا رایگەیاند: "وەک هەمیشە بە وەفاداریمانەوە یادی مامۆستا ئیبراهیم ئەحمەد بەرز رادەگرین و ژیان و کۆشش و خەباتی لەبواری رووناکبیری و سیاسی، هاندەرمان دەبێت تا بەهەمان رۆحیەتی بەرزی نەتەوەیی خزمەتی گەل و وڵاتەکەمان بکەین."
سەرۆکی یەکێتی، مامۆستا ئیبراهیمی وەک "سیاسەتمەدار و رۆشنکەرەوەی رێگای راست و رەوانی خەباتی کوردایەتی" وەسف کرد و ئاماژەی بەوەدا کە "هەمیشە ئامۆژگاری و رێنوێنییەکانی دەبێت هاندەری هەموولایەکمان بێت بۆ یەکڕیزی و برایەتی و کارکردنی پێکەوەیی لەپێناو خزمەتکردنی خەڵکە خۆشەویستەکەمان و هێنانەدی ئامانجە باڵاکان و پاراستنی کوردستانەکەمان."
لە کۆتایی پەیامەکەیدا، بافڵ تاڵەبانی جەختی کردەوە: "یاد و یادەوەری مامۆستا ئیبراهیم ئەحمەد هەمیشە لە دڵ و دەرونماندا زیندووە و بەنەمری دەمێنێتەوە."