وەفدێكی باڵای حەماس بە سەرۆكایەتیی خەلیل حەییە گەیشتە قاهیرە بۆ تاوتوێكردنی چەسپاندنی ئاگربەستی غەززە.

میدیا عەرەبیەكان بڵاویانكردەوە، سەركردایەتیی بزووتنەوەی حەماس، بە سەرۆكایەتیی خەلیل حەییە سەرۆكی مەكتەبی سیاسیی بزووتنەوەكە، لە یەكەم سەردانیدا بۆ میسر لە دوای وەرگرتنی پۆستەكەی، گەیشتە قاهیرە.

راشیانگەیاند، ئامانجی سەردانەكە ئەنجامدانی دانوستانە لەگەڵ لێپرسراوی میسر و لە سەروویانەوە حەسەن رەشاد، سەرۆكی دەزگای هەواڵگریی گشتیی میسر، سەبارەت بە پەرەسەندنەكانی دۆزی فەلەستین و بەتایبەتی جێگیركردنی رێككەوتنی ئاگربەست لە كەرتی غەززە.

ئەم سەردانەی حەماس لە كاتێكدایە كە هەوڵەكانی میسر بۆ جێگیركردنی ئاگربەست بەردەوامن، بەڵام ناكۆكیی قووڵ لەسەر جێبەجێكردنی قۆناغەكانی دواتری رێككەوتنەكە دروست بووە، بە تایبەتیش رەتیكردنەوە، بنیامین ناتانیاهۆ، سەرۆك وەزیرانی ئیسرائیل، بۆ پلانی 15خاڵییەكەی دۆناڵد ترەمپ سەرۆكی ئەمریكا لە غەززە.

فەرماندەی فەرماندەیی ناوەندیی ئەمریكا سەردانی شەش وڵاتی ناوچەكەی كرد لە نێویاندا عیراق.

فەرماندەیی ناوەندیی ئەمریكا (سێنتكۆم) رایگەیاند: براد كۆپەر، فەرماندەی سێنتكۆم، سەردانێكی 10 رۆژەی بۆ رۆژهەڵاتی ناوەڕاست كۆتاییپێهێنا.

وتیشی: لەو گەشتەدا سەردانی شەش وڵاتی ناوچەكەی كردووە، ئەمە جگە سەردانی كەشتیی جەنگیی "یو ئیس ئیس ئابراهام لینكۆڵن"ی كردووە ئەمەش بە دووەم سەردانی كۆپەرە دادەنرێت بۆ سەر ئەو كەشتییە لەمساڵدا.

بەپێی راگەیەندراوی سێنتكۆم،  لە ماوەی گەشتەكەیدا، كۆپەر لەگەڵ لێپرسراوانی باڵای مەدەنی و سەربازیی وڵاتانی بەحرێن، عیراق، ئیسرائیل، ئوردن، سعودیە و ئیمارات كۆبووەتەوە.

سێنتكۆم ئاماژەی بەوەشكردووە كە فەرماندەی ناوەندیی ئەمریكا كاتی لەگەڵ هێزە ئەمریكییەكانی ناوچەكە بەسەر بردووە؛ كە لە ئێستادا زیاتر لە 50  هەزار سەربازی ئەمریكی لە بەشە جیاوازەكانی رۆژهەڵاتی ناوەڕاستدا جێگیركراون.

وەڵامێکی حکومەتی ئەڵمانیا بۆ پەرلەمانی ئەو وڵاتە ئاشکرای کردووە کە لە نیوەی یەکەمی ئەمساڵدا، 23.2٪ ی پێداچوونەوەکان بۆ داواکاریی پەنابەری کۆتاییان بە هەڵوەشاندنەوە یان کێشانەوە هاتوو، کە زۆربەیان سورین.

 ئەم بڕیارە دوای باشتربوونی رەوشی مرۆیی لە سوریا و رووخانی رژێمی ئەسەد لە کانونی یەکەمی 2024 هات، کە بووە هۆی گەڕانەوەی سەدان هەزار پەنابەر لە وڵاتانی دراوسێوە.

بەپێی یاساکان، مافی پەنابەری لە کاتێکدا هەڵوەشێنرێتەوە کە گۆڕانکاریی جەوهەری لە وڵاتی پەنابەرەکەدا رووبدات، هەروەها لە کاتی سەلماندنی پێدانی زانیاریی ئاڵوگۆڕکراو یان زانیاریی هەڵە مافەکە دەکێشرێتەوە.

کلارا بونگەر، شارەزای کوتلەی "چەپ"، دژی گەڕاندنەوەی زۆرەملێیە بەهۆی جێگیرنەبوونی رەوشی سوریا، و پێشنیازی دابینکردنی پاراستنی بەردەوام دەکات بۆ ئەو سورییانەی مێژوویەکی درێژترە لە ئەڵمانیان.

داواکارییەکانی پەنابەریی سوورییەکان دوای رووخانی ئەسەد بە شێوەیەکی بەرچاو کەمی کردووە، بە جۆرێک لە نیوەی یەکەمی ئەمساڵدا تەنها 5 هەزار داواکاری تۆمارکراوە، لە بەرانبەر 978،761 داواکاری لە ساڵی 2013وە. هاوکات رێژەی رەتکردنەوەی داواکارییەکان بۆ 68.6٪ بەرزبووەتەوە، لە کاتێکدا پێشتر زۆربەی داواکارییەکان وەردەگیران.