دەقی پەیامەکەی قوباد تاڵەبانی....

بەبۆنەی جەژنی قیامەوە بە گەرمی پیرۆزبایی لە ھەموو خوشک و برا کریستیانەکانی کوردستان و عێراق دەکەم. 

لەم بۆنەیەدا جارێکیتر جەخت دەکەینەوە لەسەر پتەوکردنی کلتوری پێکەوەژیانی ئاشتییانەی نێوان ھەموو پێکھاتە ئایینی و نەتەوەییەکانی کوردستان و عێراق. کوردستان وەک رابردوو و بۆ ھەمیشە بێ جیاوازی نیشتمانی ھەموو پێکھاتەکانی دەبێت و شانازیش بەو فرەڕەنگییەوە دەکات.

ھیوادارم خوشک و برا کریستیانەکانمان لە سایەی ئارامی و ئاسایشدا جەژنێکی پڕ لە خۆشی و شادییان ھەبێت.

قوباد تاڵەبانی
جێگری سەرۆکی ئەنجومەنی وەزیران

بەڕێوبەرایەتی گشتی تەندروستی سلێمانی لە راگەیەنراوەکەدا رایگەیاند، بەپێی ئامارەکانمان لە ماوەی مانگی رابردوودا، لە نەخۆشخانەی د.جمال ئەحمد ڕەشیدی منداڵان لە شاری سلێمانی ١٨ ھەزار و ٢١٨ منداڵی نەخۆش لەھەردوو بەشی دەوامی بەیانیان و بەشی ڕاوێژکاری نەخۆشخانەکە بینراون و سەرجەمیان چارەسەری پێویستیان بۆ کراوە، دوو ھەزار و ١٥٥منداڵیش داخڵ کراون.

بەپێی ئامارەکە لەمانگی ڕابردوودا، (١٣٨) منداڵ لەبەشی نەبەکام داخڵکراون و( ١٦٧) منداڵ لەبەشی بەدخۆراکی و ٢٣٩ منداڵ لەبەشی تیشک و دەمار و (٨١) منداڵ لەبەشی ڕاھێنانەوەی چارەسەری خۆراک و( ٢٣) منداڵ لەبەشی ھەرس و جگەر بینراون و (٨.١١٣ )حاڵەتی ھەناسەتوندی تۆمارکراون .

ھەروەھا لە راگەیەنراوەکەدا باس لەوەشکراوە، مانگی ڕابردوو لەنەخۆشخانەی د.جەمال ئەحمەد ڕەشیدی مناڵانی فێرکاری( ١٩.٤٤٣)پشکنینی تاقیگەیی جۆراوجۆر و( ٥٥٢) پشکنینی گەشەی ھۆرمۆن و (٣٥٢) سۆنەر و (١٤١) ئیکۆ و( ١٢) نازور ئەنجام دراوە و( ٧٠٣ )تیشک گیراوە.

کەنەکە راشیگەیاندووە، ھێرشەکانی ڕۆژانەی دەوڵەتی داگیرکەری تورک بۆ سەر باشوری کوردستان گەیشتوەتە ئاستێک کە ھەموو سنورەکانی سەروەری و یاسا ناوخۆیی و نێودەوڵەتییەکان پێشێل دەکرێن، ئەو ھێرشانە درێژەپێدەری کۆمەڵکوژییەکانە لە دژی گەلی کورد و دەستکەوتەکانی گەلەکەمان.

لە پامەکەدا هاتووە، پێویستە ھەموو جیھان و بەتایبەتی گەلی کورد و ھێزە سیاسییەکانی کورد و کوردستان ھەڵوێستێکی بەھێزیان ھەبێت بەرامبەر بەو ھێرشانە، سەرکۆنەیان بکەن و بێ سزا تێنەپەڕن.

کۆنگرەی نەتەوەیی کوردستان ئاماژەی بەوەشکردوە، دەوڵەتی داگیرکەری تورک و بە پلەی یەکەم ڕژێمی ڕەگەزپەرستی ئاکەپە و مەھەپە لە ھەر بەشێکی کوردستان دەستکەوتەکانی گەلی کورد بە ئامانجێکی دوژمنکارانە دەزانێت و بە ھەموو شێوەیەک ھێرش دەکاتە سەریان، دەشڵێت: ئەردۆگان لە دۆخێکی زۆر سەختدایە و بە تایبەتی لە پرۆسەی ھەڵبژاردنە گشتییەکانی پەرلەمان و سەرۆکی کۆماردا، دەیەوێت ھەندێک ھێرش لە دژی کورد و سەرکردەکانی کورد بە مەبەستی دروستکردنی بنەمایەک بۆ سەرکەوتنی ھەڵبژاردنەکان ئەنجامبدات، پێویستە ھەڵوێستێکی بەھێز بەرامبەر بەو کارانە بگیردرێتەبەر.

ھەر لە پەیامەکەدا کەنەکە جەختیکردوەتەوە کە ھۆکارەکان و ئەرگۆمێنتەکان ھەرچییەک بن ھێرشەکانی تورکیا ڕەوایەتی نیە و بە ھیچ شێوەیەک قبوڵ ناکەین، ئاگاداری لێدوانەکانی جوتیار عادل، وتەبێژی حکومەتی ھەرێمی کوردستانین کە ھێرشەکانی تورکیا بە شەرعی دەزانێت و یەکێتی تاوانبار دەکات، ئەو وەکو نوێنەری پارتی ناتوانێت بە ناوی حکومەتی ھەرێمەوە سیاسەتی حزبی خۆی بسەپێنێت، پێویست بوو سەرکۆنەی توندوتیژیی دەوڵەتی تورکیا بکەن و ھەڵوێستیان ھەبێت، نەک یەکێتی و ھەموو کورد تاوانبار بکەن کە ھۆکاری ئەم توندوتیژییەن.

ھاوکات کەنەکە باسی لەوەشکردووە، ئێمە جارێکی دیکە داوا لە ھاوپەیمانی نێودەوڵەتی دژ بە تیرۆر، نەتەوە یەکگرتووەکان، یەکێتی ئەوروپا و ھەموو ھێزەکانی دیموکراسی و ھێزە سیاسییەکانی کورد و کوردستان دەکەین، بە توندی سەرکۆنەی ئەو ھێرشانە بکەن و ھەڵوێستیان ھەبێت.

دەقی پەیامی بزووتنەوەی سەربەخۆییخوازانی کوردستان....

ڕژێمی تورکیا بە سەرۆکایەتی ئەردۆغان، لە ئێستادا چ لە ئاستی ناوخۆیی و چ لە ئاستی ناوچەیی و جیھانیدا، بە تایبەت لە پێوەندی بە پرسی کورد لە باکوور و ڕۆژئاوای کوردستان لە گەڵ شکستی گەورە بەرەوڕوو بۆتەوە و ھەر بۆیە لە بەرەبەری ھەڵبژاردنەکانی سەرۆک کۆماریی تورکیە دا، بە مەبەستی قەرەبووکردنەوە و حەشاردانی شکستەکانی و ھەروەھا بەلاڕێدابردنی بیروڕای گشتی،بە دروستکردنی قەیران و ئاڵۆزی دەیھەوێ جارێکی دیکە سەرۆکایەتی تورکیە بە دەستەوە بگرێتەوە.

ھێرشکردنە سەر فڕۆکە خانەی نێودەوڵەتی سلێمانی، جیا لەوەی کردەوەیەکی تیرۆریستیی ڕژیمی تورکیایە، تێیدا ئامانج تێکدانی ئەمنیەت و ئاسایش و دروستکردنی دووبەرەکی و ئاژاوە نانەوە لە نێوان ھێزە کوردستانیەکان و ھاوکات پێشێلکردنی ئاشکرای سەرەوەریی سیاسیی خاک و ئاسمانی ھەرێمی کوردسنانە و ھیچ پاساوێک ھەڵناگرێ.

بزووتنەوەی سەربەخۆییخوازانی کوردستان، جارێکی دیکە وێڕای مەحکوومکردنی ئەم کردەوە تیرۆریستیەی داگیرکەرانی تورک، لەم باوەڕە دایە: لە وەھا  ھەلومەرجێک دا کە داگیرکەرانی کوردستان ھەر جارە و بە بیانوویەک، سەرەوەرییەکانی گەلی کوردستان پێشێل دەکەن و ھەوڵی تێکدانی یەکڕیزیی نیشتمانیی  نەتەوەکەمان دەدەن، ئەرکی ھەموو ھێزە کوردستانیەکانە کە پاساو بۆ کردەوە تیرۆریستیەکانی داگیرکەرانی کوردستان نەھێننەوە و  وێڕای ئیدانەکردنی ئەم چەشنە ھێرشانە، ھەوڵی جیددیان لە پێناو یەکڕیزی و یەکگرتوویی ناوماڵی کورد بخەنە گەڕ و بەرژەوەندیی تەسکی حیزبی و تاکە کەسی نەکەنە قوربانیی بەرژەوەندیی باڵای نەتەوەیی.

شایانی باسە کە بە پێی سەرچاوەکانی ھەواڵ ئێوارەی ڕۆژی ھەینی ٧ی ئاوریلی ٢٠٢٣ی زایینی، فڕۆکە خانەی نێودەوڵەتی سلێمانی کرایە ئامانجی ھێرشی درۆنێکی سەر بە ڕژیمی تورکیە کە خۆشبەختانە زیانی گیانی لێنەکەوتەوە.

بزووتنەوەی سەربەخۆییخوازانی کوردستان
١٩ی خاکەلێوەی ٢٧٢٣ی کوردی
٨ی ئاپریلی ٢٠٢٣ی زایینی

دەقی پەیامەکەی سەرۆکایەتیی ھەرێمی کوردستان...

سەرۆکایەتیی ھەرێمی کوردستان سەرکۆنەی ئەو ڕووداوەی فڕۆکەخانەی نێودەوڵەتیی سلێمانی دەکات کە ئێواری دوێنێ ٧ی نیسان ڕوویدا. نیگەرانین لەو ئاڵۆزییانەی کە بەدوایدا ھاتن.

لە کاتێکدا داوا لە لایەنە پەیوەندیدارەکان دەکەین ئەرکی خۆیان جێبەجێ بکەن بۆ لێکۆڵینەوە لە سەرچاوە و ھۆکاری ڕووداوەکە، پێویستە ھەموو لایەک دان بە خۆیاندا بگرن و بە شێوازێکی دروست مامەڵە لەگەڵ ڕووداوەکە و لێکەوتەکانیدا بکەن و لەبری تۆمەتبەخشینەوە، ھەنگاو بنرێت بۆ نەھێشتنی ھۆکارەکانی.

سەرجەم ھاووڵاتییانی کوردستان، بەتایبەتی شاری خۆشەویستی سلێمانی دڵنیا دەکەینەوە کە پاراستنی ئاسایش و سەقامگیری و ژیان و گوزەرانیان، ئەرکی لەپێشینەی دامەزراوەکانی ھەرێمی کوردستانە و ڕێگە نادرێت بە ھیچ پاساوێک بکەونە مەترسییەوە.

کاروان یاروەیس، ئەندامی ئەنجومەنی نوێنەرانی عێراق رایگەیاند، لەسەر بڕیاری محەمەد شیاع سودانی سەرۆکوەزیرانی عێراق، بڕیارە ئەمڕۆ وەفدێکی باڵای عێراق بە سەرۆکایەتی قاسم ئەعرەجی راوێژکاری ئاسایشی نەتەوەیی عێراق سەردانی سلێمانی بکات بە مەبەستی لێکۆڵینەوە لە ھێرشەکەی سەر فڕۆکەخانەی نێودەوڵەتی سلێمانی.

راشیگەیاندووە، بڕیارە ئەنجومەنی نوێنەرانی عێراقیش لیژنەیەکی تایبەت بە دەرخستن و ئاشکراکردنی ڕاستییەکان لە لیژنە پەیوەندارەکانی ئەنجومەنی نوێنەران پێکبھێنێت بۆئەوەی سەردانی سلێمانی بکات.

دەقی پەیامەکەی مەکتەبی سیاسی یەکێتی:

هێرش کردنە سەر فرۆکەخانەی  نێو دەوڵەتی سلێمانی ، پیلانێکی پێشوەختە بۆ دارێژراوی  مخابەراتی و جاسوسیانەی دەرەکی و ناوخۆییە کە هەروەک چاوساغی  هێنانی  لەشکری  داگیرکەرە بۆ نێو خاکی  هەرێمی کوردستان، بۆیە ئەم پەلاماردانە بە توندی ئیدانە دەکەین، چاوەرێ‌ بووین  لایەنی پەیوەندیدار لەبری پاساو هێنانەوەو ڕەویەتیدانی کوێرانە بەم تاوانە ، رێوشوێن و بەدواداچوون و سەرکۆنەی بکردایە، بەڵام وەک پیشەی رابردوییان کەمینیەکی خۆسەپێنی نێو پارتی، کە پەیوەندی ژێر بە ژێر و تایبەتیان هەیە، دەبنە چاوساغ و دام و دەزگاکانی حکومەت بۆ کاری هەواڵگری دەوڵەتان و تێکدانی ئاسایشی هەرێمی کوردستان و پارێزگای سلێمانی بەکاردێنن.

یەکێتیی نیشتمانیی کوردستان، هەمیشە  بروای بە یەکێتیی و یەکڕیزی خەڵک و لایەنە سیاسیەکانی کوردستان بووە، هەروەک ئامانجی بووە لەسەر ئاستی بەشەکانی تری کوردستانیش هاوکاری و هەماهەنگی و پەیوەندی دۆستانە هەبێت لەسەر بنەمای پاراستنی بەرژەوەندییە نەتەوەییەکان، هەروەک دەستدرێژی و هێرشکردنە سەر هەر ناوچە و پارێزگایەکی هەرێمی کوردستان بە تاوان دەزانێت و سەرکۆنەی دەکات، چونکە لەچوارچێوەی دیدی نەتەوەییانەی خۆی هەموو هەرێمی کوردستان بە پیرۆز دەبینێت و لەم پێناوەدا خەباتی نەپساوەی کردووە و خوێنی رشتووە.
روورەشی بۆ دوژمنانی کورد و دەستوپێوەند و چاوساغەکانیان


مەکتەبی سیاسی
یەکێتیی نیشتمانیی کوردستان

بزوتنەوەی گۆڕان لە راگەیەنراوێکدا سەبارەت بە ھێرشکردنە سەر فڕۆکەخانەی سلێمانی ئاماژەی بۆ ئەوەکرد، ئێوارەی رۆژی ھەینی لە ڕێگەی ھێرشی ئاسمانی و درۆنەوە، فڕۆکەخانەی نێودەوڵەتیی سلێمانی، بە ئامانج گیرا، بە توندی ئیدانەی ئەو دەستدرێژی و ھێرشە ناڕەوایە بۆسەر دامەزراوەیەکی مەدەنی و گرنگی وەک فرۆکەخانەی نێودەوڵەتی سلێمانی دەکات.

بزوتنەوەی گۆڕان داوا لە دامەزراوە رەسمییەکان دەکات، ھەموو ڕێکارێک بگرنەبەر، بۆ پاراستنی ئاشتی و ئاسایش و ئارامی پارێزگای سلێمانی و ھەرێمی کوردستان بەیەکەوە.

د. ھەڤاڵ ئەبوبەکر ئاماژەی بۆ ئەوەشکردووە، پاراستنی ئارامیی ھاووڵاتیان و ئاسایش و سەقامگیریی سلێمانی و ھەرێمی کوردستان ئەرکی ھەموومانە، داواکارە ھەموولایەک ھاوکارو ھەماھەنگ بن بۆ دووبارەنەبوونەوەی ئەو ڕوداوە نەخوازراوانە.

راشیگەیاندوە، ھەموو لایەکیش دڵنیادەکاتەوە سلێمانی و فڕۆکەخانەی نێودەوڵەتیی سلێمانی ئارامن و لەگەڵ لایەنە پەیوەندیدارەکاندا لە ھەوڵی بەردەوامدان بۆ چارەسەرکردنی ئەو ڕێگرییانەی بۆ فڕۆکەخانەی نێودەوڵەتیی سلێمانی ھاتونەتە ئاراوە.

سەرۆکی پەرلەمان دەشڵێت، حکومەتیش واجبیەتی بە ھەمان پێوەر مامەڵە لەگەڵ ھەموو شارەکانی ھەرێمی کوردستان بکات.

راشیگەیاند، شەرمەزاری بۆ ئەنجامدەرانی ھێرشەکە و ھەرکەس ھێرشەکە بە ڕەوا دەبینێت.

وەزارەتی پەروەردە نوسراوێکی ئاڕاستەی بەڕێوەبەرایەتییە گشتییەکانی پارێزگاکان و ئیددارە سەربەخۆکارکردوە و ئاماژەی بۆ ئەوەکردوە، بەپێی ماددەی ٨٣ لە یاسای ژمارە ١٣ی ساڵی ٢٠٢٢ یاسای پەروەردە و فێرکردن لە ھەرێمی کوردستان، ھەر کەسێک دزە بە پرسیاری تاقیکردنەوەکان بکات یان زانیاری لەبارەیانەوە بدرکێنێت، یاخود مامەڵەی پێوە بکات، ئەوا بە بەندکردن بۆ ماوەیەک لە سێ ساڵ کەمتر نەبێت سزا دەدرێت.

لە بڕگەی دووەمی یاساکەدا ھاتووە، ئەگەر کەسەکە ئەندامی لیژنەی تاقیکردنەوەکان بوو یان تایبەتمەندبوو بە گواستنەوە یان پاراستن یان ھەڵگرتنی پرسیارەکان، سزاکەی دەبێت بە دوو ھێندە و بە تاوانی ئابڕوبەر ئەژمار دەکرێت و لە وەزیفە دەردەکرێت.

لە بەشێکی تری بڕبارەکەدا ھاتووە، لە حاڵەتی روودانی ھەر کەیسێکی تاوانکاری لەو جۆرە، پێویستە بەڕێوەبەری گشتی پەروەردەی پارێزگا یان ئیدارەی سەربەخۆ لە ھەمان رۆژدا نوسراو ئاڕاستەی دادگای لێکۆڵینەوەی ئەو سنورە بکات.

سەرۆکایەتیی شارەوانیی سلێمانی لە روونکردنەوەیەکەیدا دەڵێت، لە کۆنفرانسێکی رۆژنامەوانییدا کۆمەڵێک زانیاریی ناڕاست لەبارەی پەناگەی ئاژەڵانی بێلانە لە سلێمانی بڵاوکراونەتەوە.

راشیگەیاند، رووبەری ئەو پەناگەیەی بۆ سەگی بێلانە تەرخانکراوە، پێنج دۆنمە و دەبوو لەلایەن فەرمانگە پەیوەندیدارەکانەوە بە ھەماھەنگی بەڕێوەببرێت، پەناگەکە لە سەرەتای ساڵی ٢٠٢٢ کراوەتەوە و نزیکەی ھەزار و ٥٠٠ سەگی بۆ ھاتووە، کە ٤٠٠ سەگیان بەھۆی نەخۆشی و گەڕییەوە مرداربوونەتەوە، ٢٠٠ سەگیش نەزۆککراون و گەڕێندراونەتەوە ناو سروشت، لەئێستاشدا نزیکەی ٦٠٠ سەگ لە پەناگەکەدان.

سەرۆکایەتیی شارەوانیی سلێمانی دەشڵێت، بەپێی یاسا دەبێت یەکەی کارگێڕی و لایەنە پەیوەندیدارەکان ئەو پەناگەیە بەڕێوەببەن، ھەروەھا ئەرکی کۆکردنەوەی سەگەکانیش بە ھەردوو فەرمانگەی ڤێتێرنەری و بەڕێوەبەرایەتیی پۆلیس دراوە نەک شارەوانی.

د.ھەڤاڵ ئەبوبەکر پارێزگاری سلێمانی رایگەیاند، "ئەمڕۆ بە فەرمیی نیگەرانییەکانی پارێزگای سلێمانیمان؛ لە بەرامبەر داخستنی ئاسمانی تورکیا بەڕووی گەشتە ئاسمانییەکانی فڕۆکەخانەی نێودەوڵەتیی سلێمانیدا؛ گەیاندە بەڕێز مەمەت مەولوود یاکوت، کونسوڵی گشتیی تورکیا لە هەرێمی کوردستان".

پارێزگاری سلێمانی دەشڵێت، "دڵنیاییمان لە دۆخی ئارامیی و ئاسایشی سنوری پارێزگای سلێمانی و فڕۆکەخانەی نێودەوڵەتیی سلێمانی؛ داو، داوامانکرد  ڕێڕەوی ئاسمانیی بکرێتەوەو دەست بە گەشتە ئاسمانییەکانمان بکرێتەوە."

لە رۆژی ٣ـی ئەم مانگەوە کۆمپانیای تورکیش ئێرلاین بە ئیمێڵێک فڕۆکەخانەی نێودەوڵەتیی سلێمانی ئاگادار کردەوە کە گەشتەکانیان لەگەڵ فڕۆکەخانەکە رادەگرن، دوێنێش وەزارەتی دەرەوەی تورکیا رایگەیاند، "بەھۆی زیادبوونی چالاکییەکانی پارتی کرێکارانی کوردستان - پەکەکە لە سلێمانی" تاوەکو ٣ی تەممووزی داھاتوو، ئاسمانی وڵاتەکەی بە رووی فڕۆکەخانەی سلێمانیدا دادەخات.

ھەندرێن ھیوا، بەڕێوەبەری فڕۆکەخانەی نێودەوڵەتی سلێمانی بە کوردسات نیوزی راگەیاند، ئەمڕۆ ھێڵی ئاسمانی کۆندۆری ئەڵمانی ئاگاداریکردونەتەوە کە گەشتی سبەی نێوان سلێمانی-دۆسڵدۆرف ھەڵوەشێنراوەتەوە، ھۆکارەکەشی بۆ ئەوە دەگەڕێتەوە گەشتەکە بە ئاسمانی تورکیادا ئەنجام دەدرێت و تورکیاش ئاسمانی وڵاتەکەی بەڕووی سلێمانیدا داخستووە.

ئاماژەی بەوەشکرد، تائێستا نازانرێت راگرتنی گەشتەکانی سلێمانی-دۆسڵدۆرف بۆ رۆژانی داھاتووش بەردەوام دەبێت یاخود نا، چونکە کۆمپانیای کۆندۆری ئەڵمانی ناتوانێت بەسەر ئاسمانی تورکیادا گەشت بکات،  لەم کاتەشدا ھیچ رێگایەکی جێگرەوەی بۆ گەشتەکەی نییە.

بەڕێوەبەری فڕۆکەخانەی نێودەوڵەتی سلێمانی وتیشی، ھێڵی ئاسمانی کۆندۆر یەکێک بوو لە ھێڵە ئاسمانییە چالاکەکان بۆ فڕۆکەخانەی سلێمانی و ھەفتانە گەشتێکی ھەبوو، بڕیاریشبوو لە ھەفتەی داھاتوەوە بکرێن بە دوو گەشت کە ئەوانیش سلێمانی-دۆسڵدۆرف و سلێمانی-میوشن-ن. 

لە رۆژی ٣ـی ئەم مانگەوە کۆمپانیای تورکیش ئێرلاین بە ئیمێڵێک فڕۆکەخانەی نێودەوڵەتیی سلێمانی ئاگادار کردەوە کە گەشتەکانیان لەگەڵ فڕۆکەخانەکە رادەگرن، دوێنێش وەزارەتی دەرەوەی تورکیا رایگەیاند، "بەھۆی زیادبوونی چالاکییەکانی پارتی کرێکارانی کوردستان - پەکەکە لە سلێمانی" تاوەکو ٣ی تەممووزی داھاتوو، ئاسمانی وڵاتەکەی بە رووی فڕۆکەخانەی سلێمانیدا دادەخات.

دەقی پرسەنامەکە...

بەڕێزان: خانەوادەو کەسوکاری مامۆستا مەلا تەیب بەحرکە

بەداخێکی زۆرەوە ھەواڵی کۆچی دوایی مامۆستای ئایینی و زانای ناودارو یەکێک لە کەسایەتییە ناودارەکانی ھەولێرو بەڕانەتی (مامۆستا مەلا تەیب بەحرکە)م بیست، دڵگران و خەمباری کردم، ھاوبەشی خەمتانم، پرسەو سەرەخۆشی و ھاوخەمی خۆمتان ئاراستە دەکەم.

مامۆستا مەلا تەیب بەحرکە یەکێک بوو لە زانا ناودارەکان و کەسایەتییە کاریگەرەکانی ناوچەکە، رۆڵێکی دیارو بەرچاوی ھەبوو لە بڵاوکردنەوەی ئایینی پیرۆزی ئیسلام و پێکەوەژیان لە ناوچەکەدا، گیان لەدەستدانی زیانێکی گەورە بوو، دڵگران و خەمبارین، خوای گەورە سەبووری ھەموو لایەک بدات و کۆچکردوو جێگای بەھەشتی بەرین بێت.

کۆسرەت رەسول عەلی
سەرۆکی ئەنجومەنی باڵای سیاسی و بەرژەوەندی
یەکێتیی نیشتمانیی کوردستان

بەگوێرەی نوسراوێک کە رۆژی ٥ـی نیسان بانکی ناوەندی عێراق ئاڕاستەی بانکی کوردستانی نێودەوڵەتی کردووە، بڕیاردراوە بانکی کوردستان بێبەش بکرێت لەدەرکردنی (خیتاب زەمان) لەڕێی سەکۆی ئەلکترۆنی و ئەو قەرزانەی بانکی ناوەندی دەیدات، ھەروەھا بانکەکە بێ بەشکرا لە ھەر کردەیەکی خەرج کردنی پارە کە لە یەک ملیار دینار زیاتر بێت تا ئەوکاتەی کرداری چارەسەر و دانانی سیستمی ئەلیکترۆنی بانکەکە تەواو دەکرێت.

لە بڕیارێکی دیکەی بانکی ناوەندیدا ھاتووە، لێکۆڵینەوە لەگەڵ بانکی کوردستان و کەسی بەرپرسیار  لەسەر شاردنەوەی پارەیەکی کۆبۆوە لە ھالک بانکی تورکی دەست پێدەکات کەپێویستە لەماوەی مانگێکدا ئەنجامەکەی دەربچێت، بەھۆی پابەندنەبوون بە بڕیارو ڕێنماییەکانییش دوایین ھۆشداری دەدرێت بە بەڕێوەبەری ڕێپێدراوی بانکەکە و پابەندکراوە بەوەی لە شەش مانگدا ھەڵەکانی ڕاست بکاتەوە.