کوردستان
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە ستیڤ بێتنەر، کونسوڵی گشتیی ئەمریکا لە هەرێمی کوردستان کرد.
لەدیدارێكدا كە دەرباز کۆسرەت رەسوڵ، لێپرسراوی مەکتەبی پەیوەندییەکان ئامادەبوو، دۆخی رۆژهەڵاتی ناوەڕاست و سوریا، پێكهێنانی حكومەتی نوێی هەرێم و یەكگرتنەوەی هێزەكانی پێشمەرگە تاوتوێكران و جەخت لە بەردەوامی گفتوگۆ و لێكتێگەیشتنی نێوان سەرجەم هێز و لایەنە سیاسییەكان كرایەوە بەئامانجی پاراستنی سەقامگیری و هێنانەكایەی حوكمڕانییەكی خزمەتگوزار.
لەبارەی دۆخی سوریا و كوردانی رۆژئاوا، سەرۆك بافڵ جەلال تاڵەبانی ئاماژەی بەوەكرد، جەخت لە پاراستنی مافی هەموو نەتەوە و پێكهاتەكان بەتایبەت گەلی كورد دەكەینەوە و هەوڵەكانیشمان لەو پێناوەدا بەردەوامە. هیوادارین هەمووان بەرپرسانە مامەڵە بكەن و هاوبەشیی راستەقینە لە بەڕێوەبردنی وڵاتەكەدا پەیڕەو بكرێت.
پێكهێنانی حكومەتی نوێی هەرێمی كوردستان تەوەرێكیتری دیدارەكەبوو و لەوبارەیەوە سەرۆك بافڵ وتی، پێشتر باسمان لە هێنانەكایەی حوكمڕانییەكی دادپەروەر و خزمەتگوزار كردووە و ئێستاش دووپاتیدەكەینەوە، یەكێتی حکومەتێکی دەوێت كە پاراستنی مافی خەڵك و باشتركردنی ژیانیان ئامانجەكەی بێت، دوور لە جیاكاری خزمەتی هەموولایەك بكات و كار بۆ بەهێزتركردنی هەرێمەكەمان بكات. بە روانین و دیدگایەكی نوێوە هەوڵ بۆ چارەسەركردنی كێشەكان بدات و كوردستان بەرەو ئاوەدانی و سەقامگیری ئاڕاستە بكات.
سەبارەت بە یەكخستنەوەی هێزی پێشمەرگە و بەردەوامیی هەوڵەكان بۆ بونیادنانی هێزێكی نیشتمانیی تۆكمە، سەرۆك بافڵ ستایشی هاوكارییەكانی هێزەكانی هاوپەیمانان بەتایبەت ئەمریكای كرد و وتی، دەبێت هێزی پێشمەرگە بە بیركردنەوەیەكی نیشتمانییانە و دوور لە دەستتێوەردانی حزبی رێكبخرێتەوە، بۆ بەدیهێنانی ئەو ئامانجە باڵایەش یەكێتی بەهەمووشێوەیەك پشتیوان دەبێت.
وەزیری دارایی عیراق دەڵێت، لە كۆی زیاتر لە چوار ترلیۆن دیناری داهاتی نانەوتی، هەرێم تەنها 320 ملیاری رادەستی بەغداد كردووە و بەرپرس نین لەو موچانەی هەرێم دابەشی نەكردووە.
لە كۆبونەوەكەی لیژنەی دارایی ئەنجومەنی نوێنەراندا، تەیف سامی وەزیری دارایی عیراق وتویەتی، حكومەتی عیراق زیاتر لە 11 ترلیۆن دیناری بۆ موچەی فەرمانبەرانی هەرێمی كوردستان ناردووە، بەڵام هەرێم داهاتی نەوتی و نانەوتیشی رادەستی بەغداد نەكردووە.
ئاماژەی بەوەشكردووە، هەرێمی كوردستان لە كۆی زیاتر لە چوار ترلیۆن دیناری داهاتی نانەوتی تەنها 320 ملیار دیناری رادەستی بەغداد كردووە.
وەزیری دارایی عیراق راشیگەیاندووە، وەزارەتەكەی موچەی تەواوی مانگەكانی بۆ فەرمانبەرانی هەرێم ناردووە و بەرپرس نین لەو موچانەی حكومەتی هەرێم دابەشی نەكردووە.
پەری نوری راوێژکار لە سەرۆکایەتی کۆمار بە کوردسات نیوزی راگەیاند زۆرینەی ئەو رووفاتانەی لە چەند رۆژی رابردوودا هەڵگیراونەتەوە ژن و منداڵن، بە شێوەیەک کە دایکێک لەگەڵ منداڵەکانیدا باوەشیان بەیەکدا کردووە.
پەری نوری وتیشی، کۆی ژمارەی رووفاتە هەڵگیراوەکان تا ئێستا گەیشتووەتە ٩٣ رووفات و زۆرینەیان ژن و منداڵن.
بە هەوڵی خانمی یەکەمی عیراق لەگەڵ ژمارەیەک رێکخراوی ناوخۆی و نێودەوڵەتی ژمارەیەک گۆڕی بەکۆمەڵ لە بیابانەکانی سەماوە دۆزرانەوە، کە رووفاتی ئەنفالکراوانی کوردی تێدایە.
لە وەرزی زستانی ئەمساڵدا لە هەرێمی كوردستان خواست لەسەر كارەبا بۆ حەوت هەزار و 500 مێگاوات بەرزبووەتەوە.
وەزارەتی كارەبای هەرێم لە راگەیەندراوێكدا بڵاویكردووەتەوە، لە وەرزی زستانی ئەمساڵدا خواست لەسەر كارەبا بۆ حەوت هەزار و 500 مێگاوات بەرزبووەتەوە، لەكاتێكدا توانای بەرهەمهێنانی كارەبا تەنها سێ هەزار و 500 مێگاواتە.
ئاماژەی بەوەشكردووە، قەیرانی دارایی و كێشە تەكنیكییەكانی گواستنەوەی سووتەمەنی بۆ وێستگەكانی بەرهەمهێنانی كارەبا و هێرشە تیرۆریستییەكانی سەر كێڵگەكانی غاز، كاریگەریی نەرێنیان لەسەر ئاستی بەرهەمهێنانی كارەبا دروستكردووە.
وەزارەتی كارەبا راشیگەیاند، لە چەند ساڵی رابردوودا توانراوە هەزار و 500 مێگاوات بۆ كارەبای نیشتمانی زیاد بكرێت، ساڵی رابردووش تێكڕای كاتی پێدانی كارەبا بە هاووڵاتیان، 12 سەعات و 44 خولەک بووە.
مەكتەبی سیاسی یەكێتی كۆبوەوە و چەند تەوەرێكی گرنگ لەسەر كۆبونەوەكانی پێكهێنانی حكومەت تاوتوێ كراون.
پەیامنێری کوردسات نیوز رایگەیاند، لە كۆبونەوەكەی مەكتەبی سیاسی یەكێتیی نیشتمانیی کوردستاندا كە لە سلێمانی بەڕێوەچوو، بابەتی كۆبونەوەكانی رابردووی نێوان یەكێتی و پارتی بۆ پێكهێنانی كابینەی نوێی حكومەت تاوتوێكراون.
ئاماژەی بەوەشکرد، هاوکات كۆبونەوەی حكومەتی هەرێم لەگەڵ نوێنەرانی كورد لە عیراق و كێشەكانی نێوان هەرێم و بەغدادیش گفتوگۆیان لەسەر كراوە.
مەكتەبی سیاسی یەكێتی كۆدەبێتەوە، وتەبێژی یەكێتیش دەڵێت، چەند تەوەرێكی گرنگ لەسەر كۆبوونەوەكانی پێكهێنانی حكومەت تاوتوێ دەكرێت.
سەعدی ئەحمەد پیرە وتەبێژی یەكێتیی نیشتمانیی كوردستان بە كوردسات نیوزی راگەیاند، ئەمڕۆ مەكتەبی سیاسی لە سلێمانی كۆدەبێتەوە، بەپێی كارنامەی كۆبونەوەكەش بابەتی كۆبونەوەكانی رابردووی نێوان یەكێتی و پارتی بۆ پێكهێنانی كابینەی نوێی حكومەت تاوتوێ دەكرێت.
وتیشی، كۆبوونەوەی حكومەتی هەرێم لەگەڵ نوێنەرانی كورد و كێشەكانی نێوان هەرێم و بەغدادیش گفتوگۆیان لەسەر دەكرێت.
كەشناسی هەرێم رایگەیاند، پێشبینی دەكرێت لە دوانیوەڕۆوە بارانبارین بەشێوەی نمەباران دەستپێبكات و لە كاتەكانی شەودا بارانبارینەكە زیاد دەكات.
بەڕێوەبەرایەتی كەشناسی و بومەلەرزەزانی هەرێم بڵاویكردەوە، ئەمڕۆ شەممە ئاسمان نیمچە هەور دەبێت پاشان دەگۆڕێت بۆ هەوری تەواو و لە دوای نیوەرۆوە بارانبارین بە شێوەی نمەباران دەستپێدەكات لە كاتەكانی شەودا رێژەی بارانبارین زیاتر دەبێت بە تایبەتی لە ناوچەكانی رۆژهەڵاتی هەرێم لە گەڵ بارینی بەفر لە ناوچە شاخاوییە سنورییەكان.
راشیگەیاندوە، رۆژی یەكشەممەش ئاسمان هەوری تەواو دەبێت لەكاتەكانی بەیانیدا ئەگەری بارینی نمەباران هەیە لە ناوچەكانی رۆژهەڵاتی هەرێم پاشان ئاسمان دەگۆڕێت نیمچە هەور و شەپۆلەكە كۆتایی دێت.
كۆبوونەوەی نائاسایی ئەنجومەنی وەزیرانی هەرێم بە ئامادەبونی نوێنەرانی كورد بەڕێوەدەچێت، كۆبونەوەكەش تایبەتە بە كێشەكانی نێوان هەرێم و بەغداد و شایستە داراییەكان.
ئەمڕۆ شەممە، كۆبوونەوەی نائاسایی ئەنجومەنی وەزیرانی هەرێم، بە ئامادەبونی نوێنەرانی كورد لە حكومەتی فیدراڵی و ئەنجومەنی نوێنەران لە هەولێر بەڕێوەدەچێت، فەرمانگەی میدیاو زانیاریش بڵاویكردوەتەوە، ئامانجی كۆبوونەوەكە بریتییە لە خستنەڕووی زانیاری لەلایەن حكومەتی هەرێم و بەڵگەنامەی پێویست بۆ نوێنەرانی كورد لە حكومەتی فیدراڵی و ئەنجومەنی نوێنەران، تا بەپێی تایبەتمەندی بە ئەركی خۆیان هەستن بۆ پرسی نیشتمانیی و داكۆكیكردن لە ماف و شایستە داراییەكانی هەرێم و كۆتاییهێنان بە قەیرانی موچە و بودجەی هەرێم.
هەروەها لە كۆبوونەوەكەدا چەند پرسێك تاووتوێ دەكرێن كە بریتین لە خستنەرووی راپۆرتێك لە بارەی دارایی هەرێمی كوردستان بۆ ساڵی 2024 و خشتەی تەرخانكراوی هەرێم لە بودجەی فیدراڵ بۆ ساڵی دارایی 2024، پرسی نەوت لە هەرێم و هەنگاوەكانی دەستپێكردنەوەی هەناردەی نەوت.
بۆردومانەكانی توركیا مەترسی ئاوارەبوونی خەڵكی رۆژئاوای كوردستانی لێكەوتووەتەوە
لە دوای رووخانی رژێمەکەی بەشار ئەسەدەوە توركیا بە پشتیوانی گروپە چەكدارەكان هێرش و بۆردومانەكانی بۆ سەر ناوچەكانی رۆژئاوای كوردستان چڕكردووەتەوە، ئەمەش مەترسی ئاوارەبوونی خەڵكی ئەو ناوچانەی لێكەوتووەتەوە.
لەسەرەتای دەستپێكی روداوەكانی سوریا لە ساڵی 2011، زۆربەی خاكی رۆژئاوای كوردستان لەلایەن هێزە كوردییەكانەوە كۆنترۆڵكرا، لە تشرینی دووەمی 2013شدا، نوێنەرانی كورد و عەرەب و ئاشورییەكان و كەمینەكانی تر حكومەتێكی خۆبەڕێوەبەریی نیمچە سەربەخۆیان راگەیاند، ئەو كات حكومەتەكەی هێزە كوردییەكان پێكهاتبوو لە سێ كانتۆن، ئەوانیش كانتۆنی جزیرە كە زۆربەی پارێزگای حەسەكە دەگرێتەوە لەگەڵ كانتۆنەكانی كۆبانێ و عەفرین.
رۆژئاوای كوردستان رووبەری خاكەكەی 31 هەزار كیلۆمەتر دووجایە، تایبەتمەندیی خاكی رۆژئاوا بەو جۆرەیە كە زۆرینەی رووبەرەكەی لە دەشتی بەرفراوان پێكدێت و خەڵكی ئەو ناوچانە بژێوی سەرەكییان لەسەر كشتوكاڵە.
توركیا لەدوای قۆناغی بۆردومانی ئاسمانیی، پلانی ئەوەی هەیە لەشكركێشی بۆسەر ئەو ناوچانە دەستپێبكات، لە ئەگەری رێگری نەكردنی ئەنقەرە لەلایەن ئەمریكا و وڵاتانی تری هاوپەیمانەوە، داگیركاری بەرفراوان روودەدات و بەمەش بەشێكی زۆر لە خەڵكی كوردی ئەو ناوچانە جارێكی تر ئاوارە دەبنەوە.
چاودێرانیش باس لەوە دەكەن، توركیا بە دوو رێگە دەتوانێت لەشكركێشی یاخود هەژموونی سیاسی و سەربازیی خۆی لە رۆژئاوای كوردستان بسەپێنێت، یەكەمیان لە رێگەی داگیركاریی سەربازیی و دووەمیان بەبیانوی ئاوەدانكردنەوەی سوریا لە دیمەشقەوە بەڕێوەبردنی كانتۆنەكان بگرێتە دەست.
لە كانتۆنەكانی رۆژئاوای كوردستان نزیكەی 5 ملیۆن هاووڵاتی كورد نیشتەجێن و بە جۆرێك تەنها كانتۆنی جزیرە نزیكەی 3 ملیۆن كوردی تێدایە، كە نیشتەجێی هەردوو شاری قامیشلۆ و حەسەكەن، خاكەكەشی دەوڵەمەندە بە نەوت و غازێكی زۆر.
دەوڵەمەندی خاكی رۆژئاوای كوردستان، هۆكارێكی تری هەوڵەكانی داگیركاریی توركیا و گروپە چەكدارەكانە و هێزە كوردییەكانیش لەژێر چاودێریی ئەمریكا لە مەنبج و دێرەزوور كشاونەتەوە كە خاوەنی بڕیكی زۆر لە نەوتن.
لە ئێستاشدا ئاوارەبوونی كوردانی رۆژئاوای كوردستان، بووەتە ئەگەرێكی كراوە بەو پێیەی تاڕادەیەك گڵۆپی سەوزی ئەمریكا لەبەردەم ئەنكەرە هەڵكراوە و پێدەچێت توركیا رۆڵی داگیركاریی لە ناوچەكەدا ببینێت.
چاوەڕوانیش دەكرێت گۆڕانكارییەكانی ئەمریكا لە چەند رۆژی داهاتوودا و هاتنەوە سەر دەسەڵاتی دۆناڵد ترەمپ، ئاڕاستەی روداوەكانی ناوچەكە گۆڕانكارییان بەسەردا بێت، بەو پێیەی سیاستەكانی ترەمپ لە ناوچەكەدا هەمیشە روونبوون و كۆتایی روداوەكان بە كراوەیی نامێننەوە، بەڵكو لە نێوان ئاشتی و وێرانكاریدا یەكێكیان رودەدەن و بڕیاری یەكلاكەرەوە دەدات، بەڵام لە ئێستادا كوردانی رۆژئاوای كوردستان لە بەردەم چارەنووسێكی نادیاری هاوكێشە هەرێمیی و نێودەوڵەتییەكاندا ماونەتەوە و روداوەكانی ناوخۆی سوریاش بەو ئاڕاستەیەن كە دەبێت هێزەكانیان لە چوارچێوەی وەزارەتی بەرگریدا یەكبخرێنەوە، لە ئەگەری بڕیاری لەم شێوەیەشدا، پاراستنی كوردانی رۆژئاوا و خاكەكەی دەكەوێتە دەستی خاوەنە نوێیەكانی دیمەشق.
ئەنجومەنی وەزیرانی هەرێم لەگەڵ پەرلەمانتار و وەزیرانی كورد لە عیراق كۆدەبێتەوە
ئەنجومەنی وەزیرانی هەرێم لەگەڵ پەرلەمانتار و وەزیرانی كورد لە عیراق كۆدەبێتەوە لەبارەی موچە و شایستە داراییەكانی هەرێم لە بودجەی گشتی عیراقدا.
فارس عیسا سەرۆكی نوێنەرایەتی حكومەتی هەرێم لە بەغداد بە كوردسات نیوزی راگەیاند، لەسەر داوای ئەنجومەنی وەزیرانی هەرێم، رۆژی شەممە لە هەولێر ئەنجومەنی وەزیرانی هەرێم كۆبونەوەیەكی نائاسایی لەگەڵ پەرلەمانتار و وەزیرانی كورد لە عیراق ئەنجامدەدات بۆ تاوتوێكردنی پرسی موچە و شایستە داراییەكانی هەرێم لە بودجەی گشتی عیراقدا.
وتیشی، كێشەی دواكەوتنی موچەی فەرمانبەرانی هەرێم و پەیوەندییەكانی نێوان هەولێر و بەغداد، تەوەرێكی سەرەكی گفتوگۆكان دەبن و وەزیری دارایی هەرێمیش راپۆڕتێك لەسەر پابەندییەكانی وەزارەتەكی بەرامبەر عیراق تایبەت بە لیستی موچە و تەرازوی پێداچونەوە دەخاتەڕوو.
بافڵ جەلال تاڵەبانی سەرۆکی یەکێتیی نیشتمانیی کوردستان، بەهۆی کۆچیدوایی شێخ کامیل شێخ مەحمود شێخ عارف هەشەزینی پرسەنامەیەکی ئاڕاستەی بنەماڵەی کۆچکردوو دەکات و دەڵێت، "لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت".
دەقی پرسەنامەکە...
بەڕێزان بنەماڵەی تێکۆشەر و سەربەرزی شێخانی هەشەزینی بەرزنجی
بەداخێكی زۆرەوە هەواڵی کۆچی دوایی (شێخ کامیل شێخ مەحمود شێخ عارف هەشەزینی) تێكۆشەری دێرین و كەسایەتیی دیاری ناوچەی سەنگاومان پێگەیشت.
بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی بنەماڵە سەربەرزەكەتان و خزمانی هەشەزینی دەكەم و هاوبەشی خەمتانم.
لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
بومەلەرزەیەكی بەهێز لە سلێمانی رویدا و بەڕێوەبەری كەشناسی و بومەلەرزەزانی سلێمانیش دەڵێت، بومەلەزەكە 3.2 پلە بووە بە پێوەری رێختەر.
ئاسۆ كەمال بەڕێوەبەری كەشناسی و بومەلەرزەزانی سلێمانی بە كوردسات نیوزی راگەیاند، سەعات 2 و 39 دەقیقەی پاش نیوەڕۆ بەكاتی هەرێم، بومەلەرزەیەك بە گوڕی 3.2 پلە بە پێوەری رێختەر لە سلێمانی رویدا و لە هەندێك ناوچەی دەوروبەریشی هەستی پێكراوە.
وتیشی، بومەلەزەكە بە قوڵایی 12 كیلۆمەتر بووە و ناوەندەكەشی گوندی پوشێن بووە لە سنوری بەرزنجە.
هاوسەرۆكانی شارەوانی ئاكدەنیز سەر بە پارێزگای مێرسین دەستگیركران و قەیوم لە شوێنەكانیان دانرا.
بەرەبەیانی ئەمڕۆ پۆلیسی توركیا چووەتە سەر ماڵی هاوسەرۆكان و ئەندامانی ئەنجومەنی شارەوانی ئاكدەنیز سەر بە پارێزگای مێرسین لە باكوری كوردستان، لە ئەنجامدا هۆشیار ساریڵدز و نوریە ئارسەلان هاوسەرۆكانی شارەوانی ئاكدەنیز لە پارتی یەكسانی و دیموكراسی گەلان "دەم پارتی" و پێنج ئەندامی ئەنجومەنەكە دەستگیركران.
عەلی بۆزان پەرلەمانتاری دەم پارتیش رایگەیاند، هاوسەرۆكانی شارەوانی ئاكدەنیز دەستگیركراون و توركیا قەیومی لە شوێنەكانیان داناوە و بە هەموو شێوەیەك بڕیاری دانانی قەیوم رەتدەكەنەوە.
فەرماندەی گشتی هەسەدە ئاشكرایكردوە، سەقامگیری سوریا بەندە بەبونی هێزی ئەمریكا و ئەگەر بكشێتەوە دەبێتە هۆی گەڕانەوەی داعش و چەندین گروپی چەكداری توندڕەو.
مەزڵوم كۆبانێ فەرماندەی گشتی هێزەكانی سوریای دیموكرات "هەسەدە" لە چاوپێكەوتنێكی رۆژنامەوانیدا ئاماژە بۆ ئەوەكردووە، لە دوای روداوەكانی سوریا، داعش لە بیابانەكان بەهێزتربوون، لە زۆر شوێنیش دەستیان گرتووە بەسەر چەكی رژێمی سوریادا.
وتیشی، هۆكاری سەرەكی سەقامگیری لە ناوچەكانی سوریا بوونی سوپای ئەمریكایە، ئەگەر ئەو دوو هەزار سەربازە ئەمریكییە بكشێنەوە، دەبێتە هۆی گەڕانەوەی داعش و چەندین گرووپی چەكداری توندڕەو.
مەزڵوم كۆبانێ ئاماژەی بەوەشكرد، چەكدارانی داعش پیلان دادەنێن بۆ هێرشكردنە سەر ئەو زیندانانەی داعشیان تێدا دەستبەسەركراوە و دەیانەوێت سود لە سەرقاڵی هێزە كوردییەكان وەربگرن لە بەرگریكردن لە ناوچەكانیان دژی هێرشەكانی توركیا و گرووپە چەكدارەكان، داواشی لە دۆناڵد ترەمپ سەرۆكی ئەمریكا كرد، پشتیوانی لە كورد بكات و هێزەكانی لە رۆژائای كوردستان نەكشێنێتەوە.
قوباد تاڵەبانی، جێگری سەرۆکوەزیران پێشوازیکرد لە ئاندرۆ بیزلی، کونسوڵی گشتیی بەریتانیا لە هەرێمی کوردستان و لە کۆبوونەوەی نێوانیاندا گفتوگۆکانی پێکهێنانی حکومەت و پەیوەندییەکانی نێوان هەرێم و بەغدا و چەند پرسێکی دیکەی جێی بایەخی هەردوولا تاوتوێ کران.
لە تەوەری سەرەکیی کۆبوونەوەکەدا کە رۆژی پێنج شەمە(9/1/2025) لە هەولێر بەڕێوەچوو، باس لە گفتوگۆکانی نێوان لایەنە سیاسییەکان کرا بۆ پێکهێنانی کابینەی نوێی حکومەتی هەرێم.
قوباد تاڵەبانی روونی کردەوە گفتوگۆکان بەردەوامە بە ئاراستەی گەیشتین بە رێککەوتنێک کە رەزامەندیی هەموو لایەنەکانی بەشداری لەسەر بێت.
جەختیشی کردەوە کە حکومەتی داهاتوو دەبێت حکومەتێکی خزمەتگوزاربێت و کێشە سەرەکییەکانی خەڵکی کوردستان چارەسەر بکات.
سەبارەت بە پەیوەندییەکانی نێوان هەرێم و بەغداش، جێگری سەرۆکوەزیران ئاماژەی بەوەدا هەموو هەوڵێکیان بۆ ئەوەیە کێشەی موچە و بودجە و کێشەکانی دیکەی نێوان هەرێم و بەغدا لەسەر بنەمای دەستور چارەسەر بکرێت. لەمبارەیەوە کونسوڵی گشتیی بەریتانیا بە گرنگی زانی کێشەکان بە ڕێگەی گفتوگۆوە چارەسەر بکرێت و پشتیوانی وڵاتەکەشی بۆ چارەسەرکردنی کێشەکان دووپات کردەوە.
لە تەوەرێکی دیکە گفتوگۆکرا لەبارەی گرنگیی پەرەپێدانی تواناکانی گەنجان. لەمبارەیەشەوە قوباد تاڵەبانی ئاماژەیدا بە پڕۆژەکانی فاوندەیشن هەب و فاوندەیشن لاب بۆ تواناسازی گەنجانی داهێنەر و خاوەن بزنسی بچوک و روونی کردەوە؛ ئامانجیان لەم پڕۆژانە دەرخستنی تواناکانی گەنجان و ئاستی بەشدارییان لە گەشەپێدانی ئابوری کوردستاندا بەهێزتر بکەن.
لەم چوارچێوەیەدا کونسوڵی گشتیی بەریتانیا پڕۆژەکەی بە گرنگ وەسف کرد و ئامادەیی خۆی و کونسوڵخانەی بەریتانیای بۆ هاوکاریکردنی پڕۆژەکە دەربڕی.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان چاویکەوت بە نوێنەری خاوەنی ئۆتۆمبێلە بێسەرەتاکان.
لەسەرەتای کۆبوونەوەکەدا نوێنەری خاوەنی ئۆتۆمبێلە بێسەرەتاکان لە راپۆرتێکدا کێشە و داواکارییەکانیان خستەڕوو و راشیانگەیاند، پابەندی رێنمایی و رێکارە یاسایی و ئەمنییەکان دەبن و هاوکاری تەواوی دەزگای ئاسایش و سەرجەم دامەزراوەکان دەبن بۆ پاراستنی ئارامیی سلێمانی.
لەبەرامبەردا سەرۆک بافڵ جەلال تاڵەبانی پشتیوانیی خۆی بۆ سەرجەم چین و توێژەکانی کۆمەڵگە دووپاتکردەوە و ئاماژەی بەوەکرد، خۆمان بە پارێزەری سەرجەم خەڵکی کوردستان دەزانین بەهەموو چین و توێژەکانییەوە، ئەرکی ئێمە پاراستنی ماف و بژێویی ژیانی خەڵکە و رێگەنادەین غەدر و ناحەقی بەرامبەر هیچ کەسێک بکرێت.
سەرۆک بافڵ وتیشی، لەگەڵ سەرجەم لایەنە پەیوەندیدارەکان و دەزگا ئەمنییەکان هەماهەنگ دەبین تاوەکو لەچوارچێوەی یاسا و رێکارەکاندا کێشەی ئۆتۆمبێلە بێسەرەتاکان چارەسەر بکرێت، بێگومان پابەند بە رێنماییەکانی هاتوچۆ و ئاسایش ئەم کارە دەکرێت و دەبێت یاسا وەک یەک بەسەر هەموواندا جێبەجێبکرێت.
لەکۆتایی کۆبوونەوەکەشدا سەرۆک بافڵ رایگەیاند، نابێت لە کوردستاندا مافی هیچ توێژێکی کۆمەڵگە پێشێلبکرێت و نادادییان بەرامبەر بکرێت، پشتیوانیی هەمووان دەبین و هەرێمێکمان دەوێت تێیدا هەمووان هەست بە ئارامی و پارێزراوی بکەن و رێز لە مافەکانیان بگیرێت.