کوردستان
ئەندامێکی پێشووی لیژنەی دارایی ئەنجومەنی نوێنەران رایدەگەیەنێت: نەبوونی یاسای بودجە لە هەرێم وایکردووە داهاتی ناوخۆ بە شێوەیەکی نایاسایی و ناشەفافی بە بڕیاری کەسی خەرج بکرێت.
شیروان میرزا ئەندامی پێشووی لیژنەی دارایی ئەنجومەنی نوێنەرانی عیراق لە میانی بەشداریكردن لە بەرنامەی پرسی رۆژی كوردسات نیوزدا رایگەیاند، نەبوونی یاسای بودجە وایکردووە نەزانرێت داهاتی حکومەتی هەرێم چەندە و چۆن خەرجدەکرێت.
شیروان میرزا ئاماژەی بەوەشکرد، پێویستە یاسای بودجە لە پەرلەمانی کوردستان بە ئامادەبوونی هەموو لایەنەکان رێککەوتنی لەسەر بکرێت، بۆ ئەوەی بەپێی یاسا داهاتی ناوخۆ رێکبخرێتەوە و چیتر لە خەرجکردنیدا جیاوازی لە نێوان شار و شارۆچکەکاندا نەکرێت و بە شێوەیەکی دادپەروەرانە بێت.
ماوەی زیاتر لە 12 ساڵە لە هەرێمی کوردستان هیچ پڕۆژە یاسایەکی تایبەت بە بودجە نەبووە، ئەمەش وایکردوە داهات و خەرجی لە هەرێم ناڕوون بێت.
فراكسیۆنی یەكێتی بەدواداچوون بۆ ناردنی نەوت لە بەغداد و دابەشكردنی بەسەر هاووڵاتیان دەكات.
چرۆ حەمەشەریف و سروە محەمەد، ئەندامانی فراكسیۆنی یەكێتی لە ئەنجومەنی نوێنەرانی عیراق بەمبەستی بەدواداچوون بۆ ئەو بڕە نەوتەی بڕیارە لە بەغدادوە رەوانەی هەرێم بكرێت، سەردانی وەزارەتی نەوتی عیراقیان كرد و لەگەڵ د. عیزەت سابیر بریكاری وەزارەتی نەوت كۆبوونەوە.
لە كۆبونەوەكەدا د. عزەت سابیر بریكاری وەزارەتی نەوتی عیراق ئاماژەی بۆ ئەوەكردوە، لە ماوەیەكی نزیكدا بڕی 50 ملیۆن لیتر نەوتی سپی، رەوانەی هەرێمی كوردستان دەكرێت، بۆ هەر بەرمیلێكیش بڕی 50 هەزار دینار لە هاوڵاتییان وەردەگیرێت.
هاوكات چرۆ حەمەشەریف داوایكرد، بەشە نەوتی سنوری پارێزگای هەڵەبجە و پێنجوێن زیاد بكرێت، چونكە ناوچەیەكی سارد و شاخاویین.
هۆبەی تۆماری شێرپەنجەی پارێزگای سلێمانی رایگەیاندووە، ساڵی رابردوو سێ هەزار و ٣١٠ توشبووی نوێی شێرپەنجەیان تۆمار کردووە، کە ٢٠١یان منداڵن.
هۆبەی تۆماری شێرپەنجەی پارێزگای سلێمانی رایگەیاندووە، ئەو توشبووە نوێیانەی لە سنووری پارێزگاکە تۆمارکراون، ٩١.٨٪یان دانیشتووی پارێزگاکەن، ٢.٤٪یان دانیشتووی ناوچەکانی دیکەی هەرێمن و ٥.٩٪یان خەڵکی شارەکانی دیکەی عیراقن.
بەپێی ئامارەکە، لەو ژمارەیە رێژەی ٤٥،٤٠٪یان لە رەگەزی مێ و ٥٤.٦٠٪ی لە رەگەزی نێرن.
هۆبەری تۆماری شێرپەنجەی پارێزگای سلێمانی ئەوەشی خستووەتە روو، بەپێی ئامارەکە کە ١٩.٥٪ی توشبووان شێرپەنجەی مەمکیان هەبووە و ئەو جۆرەی شێرپەنجە زۆرترین توشبووی هەبووە و لە پلەی یەکەمدایە، لە پلەی دووەمیشدا شێرپەنجەی سی و بۆریەکانی هەناسە بوون کە رێژەکەی ٧٪ بووە.
پەیامنێری کوردسات نیوز باسی لەوەکرد، لە سلێمانی ژنێک دوای ئەنجامدانی نەشتەرگەریی دەرهێنانی چەوریی گیانی لەدەستدا.
دنیا ماجد پەیامنێری کوردسات نیوز ئاماژەی بەوەشکرد، شەوی رابردوو ژنێکی تەمەن ٤١ ساڵ لەدوای ئەوەی لە نەخۆشخانەیەکی تایبەتی سلێمانی نەشتەرگەریی دەرهێنانی چەوری بۆکراوە، گیانی لەدەستداوە.
روونیشیکردەوە، سەرەتا ماوەی حەوت کاتژمێر لە ژووری نەشتەرگەریدا بووە و دوای ئەوەی هاتووەتە دەرەوە، ماوەی ١٥ خولەک تەندروستی باش بووە، دواتر دۆخی تەندروستی تێکچووە و گیانی لەدەستداوە.
وتیشی، ئەو ژنە پێشتر هاوسەرگیری کردووە و خاوەنی دوو منداڵ بووە، لە ئێستاشدا تەرمەکەی لە پزیشکی دادی سلێمانییە و پزیشکەکەش دەستگیر کراوە.
بۆردومانەکانی تورکیا و هێرشی گروپە چەکدارەکانی سەر بەو وڵاتە لە بۆ سەر بەنداوی تشرین بەردەوامە ، هێزەکانی ''هەسەدە''ش بڵاویکردۆتەوە لە 24 سەعاتی رابردودا، 23 چەکداری هێزەکانی سەر بە تورکیا کوژراون و حەوتی دیکەش برینداربوون.
لەگەڵ بەردەوامی بۆردوومانەکانی تورکیا و هێرشی گروپە چەکدارەکانی سەر بەو وڵاتە لە بۆ سەر بەنداوی تشرین هێزەکانی سوریای دیموکراتیش ''هەسەدە'' روبەروی ئەو هێرشانە وەستاونەتەوە و بەنداوەکە لەژێر کۆنتڕۆڵی هێزەکانی ''هەسەدە''یە.
سەنتەری راگەیاندنی هێزەکانی سوریای دیموکرات لە راگەیەنراوێکدا، ئاماری 24 سەعاتی رابردووی بڵاوکردووەتەوە و دەڵێت، لە ناوچەکانی باشوری مەنبەج، 23 چەکداری هێزەکانی سەر بە تورکیا کوژراون و حەوتی دیکەش برینداربوون.
لەلایەکی دیکەشەوە بەپێی ئامارەکانی روانگەی سوری، لەماوەی زیاتر لە مانگێکی هێرشی گروپە چەکدارەکانی سەر بە تورکیا بۆ سەر بەنداوی تشرین، تا ئێستا 370 کەس کوژراون کە زۆربەیان لە ریزی گروپە چەکدارەکانن.
بەنداوی تشرین دەکەوێتە ناوچەیەکی ستراتیژیی لەنێوان پارێزگاکانی حەلەب و رەققە و حەسەکە، بەیەکێک لە گرنگترین بەنداوەکانی سوریا دادەنرێت کە لە ساڵی 1999 لەسەر روباری فورات دروستکراوە و سەرچاوەی وزەی کارەبا و ئاوی ناوچەیەکی بەرفراوانی ناوچەکانی باکوری سوریایە.
نوێنەری مامۆستایانی گرێبەست داوا دەكات حكومەتی هەرێم و وەزارەتی دارایی بە زووترین كات موچەی مانگی 12ی مامۆستایانی گرێبەست دابەش بكەن.
نوێنەری گشتی مامۆستایانی گرێبەست لە راگەیەنراوێكدا داوا دەكات، حكومەتی هەرێم و وەزارەتی دارایی بەزووترین كاتدا موچەی مانگی 12ی مامۆستایانی گرێبەست دابەش بكەن، چونكە موچەكەنیان لەداهاتی ناوخۆیە و پەیوەندی نییە بە هاتنی پارە لە بەغدادوە.
راشیگەیاندوە، كۆی موچەكانیان بۆ هەر مانگێك نزیكەی 19 ملیار دینارە بۆ سەرجەم مامۆستایانی گرێبەست كە ژمارەیان نزیكەی 38 هەزار مامۆستایە.
ئاماژەی بۆ ئەوەشكرد، تائێستا مامۆستایانی گرێبەستی سنوری پەروەردەكانی هەولێر و دهۆك و كەركوك شایستەی مانگەكانی 7 و 8ی ساڵی 2024 یان وەرنەگرتووە.
هاوسەرۆكانی شارەوانیی ئاكدەنیزی مێرسین لە باكوری كوردستان فەرمانی زیندانیكردنیان بۆ دەرچوو و قەیوم لە جێگەیان دانرا.
دوای ئەوەی هەینی رابردوو هۆشیار سارییەڵدز و نوریە ئاسلان، هاوسەرۆكانی شارەوانی ئاكدەنیزی مێرسین دەستبەسەر كران، رۆژی یەكشەممە رەوانەی دادگا كران و فەرمانی زیندانیكردنیان بۆ دەرچوو. وەزارەتی ناوخۆی توركیاش قەیومی بۆ شارەوانی ئاكدەنیز داناوە.
وەزارەتی ناوخۆی توركیا راشیگەیاندوە، زەید شەنەر قائیمقامی ئاكدەنیز وەك قەیوم كاروبارەكانی شارەوانی بەڕێوە دەبات، سێ ئەندامی ئەنجومەنی شارەوانیش لە ئەركەكەیان لادراون.
لەلایەكی ترەوە تولای حاتیمی ئۆغلاری و تۆنجەر باقرحان هاوسەرۆكانی گشتی پارتی یەكسانی و دیموكراسی"دەم پارتی" كاردانەوەیان بەرامبەر بە بڕیاری دانانی قەیوم راگەیاند و ئاماژەیان بۆ ئەوەكرد، دانانی قەیوم بۆ شارەوانی ئاكدەنیز كودەتایە و نكۆڵیكردنە لە ئیرادەی گەل.
راشیانگەیاندوە، حكومەت بە پاڵپشتی دەسەڵاتی دادوەری، جارێكی دیكە كودەتای بەدژی ئیرادەی گەل ئەنجامداوە.
وەفدێكی یەكێتیی نیشتیمانیی كوردستان و یەكگرتووی ئیسلامی كوردستان لە شاری هەولێر كۆبونەوە، بۆ گفتوگۆكردن لەسەر پێكهێنانی حكومەت و پەرلەمان و رەوشی سیاسی.
هادی عەلی یاریدەدەری ئەمینداری گشتی یەكگرتووی ئیسلامی كوردستان لە كۆنفرانسێكی رۆژنامەوانیددا رایگەیاند، سەردانی مەكتەبی سیاسی یەكێتییان لە هەولێر كردووە و لە كۆبوونەوەیەكدا گفتوگۆكیان كردووە لەبارەی پێكهێنانی كابینەی داهاتووی حكومەتی هەرێم و پەرلەمان و رەوشی سیاسی عیراق و هەرێمی كوردستان و گۆڕانكارییەكانی ناوچەكە.
هاوكات دەرباز كۆسرەت رەسوڵ ئەندامی مەكتەبی سیاسی یەكێتی ئاماژەی بۆ ئەوەكرد، جەختیان لەوەكردوەتەوە، پێویستە حكومەتێكی بەهێز و یەكگرتو پێكبهێنرێت، بۆ رووبەڕوبونەوەی هەموو ئەگەرەكان.
گۆڕێکی بە کۆمەڵی نوێ لە بیابانەکانی سەماوە دۆزرایەوە و روفاتی ئەو گۆڕە بە کۆمەڵەی کە چەند رۆژی رابردووش هەڵدرایەوە بووە 117 رووفات.
پەری نوری راوێژکار لە سەرۆکایەتی کۆمار بە کوردسات نیوزی راگەیاند، "گۆڕێکی بەکۆمەڵی دیکە لە بیابانەکانی سەماوە دۆزراوەتەوە"
ئاماژەی بەوەشدا، "ئەو گۆڕە بەکۆمەڵەی سەماوە کە لە چەند رۆژی رابردوودا بە هەوڵی شاناز ئیبراهیم ئەحمەد خانمی یەکەمی عیراق هەڵدرایەوە، ژمارەی رووفاتەکانی بووەتە 117 روفات، هەروەها بەپێی لێکۆڵینەوەکان ژمارەیەکیان منداڵی تازە لەدایکبوون".
بە هەوڵی شاناز ئیبراهیم ئەحمەد خانمی یەکەمی عیراق دۆزینەوە و هەڵدانەوەی گۆڕە بە کۆمەڵەکان بەردەوامە و لە چەند رۆژی رابردوودا لە بیابانەکانی سەماوە گۆڕێکی بەکۆمەڵ هەڵدرایەوە.
مۆزەخانەی نیشتمانیی ئەمنە سوورەكە ئاماری میوان و گەشتیار و چالاكیەكانی بۆ ساڵی 2024 بڵاوكردەوە و بەپێیی ئامارەكە زیاتر لە 26 هەزار گەشتیار سەردانی مۆزەخانەكەیان كردووە.
مۆزەخانەكە ئەوەی خستووەتە روو, ساڵی 2024 ژمارەی ئەو گەشتیارانەی كە لەناوخۆوە سەردانی مۆزەخانەكەیان كردووە 22 هەزار و 8 كەس بووە كە 18 هەزار و 520 كەسیان میوانی ئاسایی و 8 هەزار و 488 خوێندكاری خوێندنگە و زانكۆ و پەیمانگە بوون .
بەپێیی ئاماری مۆزەخانەكە 4هەزارو 710 میوانی بیانی و وەفدی رەسمی و باڵیۆز و كونسوڵخانەكان سەردانی مۆزەخانەی نیشتیمانی ئەمنەسورەكەیان كردووە و بەوەش كۆی گشتی گەشتیاران دەكاتە 26 هەزارو 718.
ئەوەش هاتووە, هەر لەو ساڵەدا 64 پێشانگە و 40 چالاكی جۆراوجۆر ئەنجامدراون.
مۆزەخانەی نیشتمانیی ئەمنەسورەكە لەسەردەمی رژێمی بەعسدا جێگەیەك بووە بۆ ئازاردان و ئەشكەنجەدانی گەنجان و ئازادیخوازانی كورد, بەڵام دوای روخاندنی رژێمی بەعس باڵەخانەكە چۆڵ كرا و كرا بە مۆزەخانەیەكی هاوچەرخ، بەناوی (مۆزەخانەی ئەمنە سوورەكە) تا لە یادمان نەچێت، ئەمەش بۆ ئەوەی نەوەی داهاتوو و تەواوی سەردانكەرانی ئەم مۆزەخانەیە بە بەڵگەوە تاوان و ناهەقییەكانی رژێمی پێشوو ببینن بەرانبەر بە خەڵكی ئازادیخوازی كورد
ئەنجومەنی نوێنەران خوێندنەوەی دووەمی بۆ هەمواری یاسای بودجەی فیدڕاڵی تایبەت بە تێچووی بەرهەمهێنان و گواستنەوەی نەوتی هەرێم كرد.
د. نەرمین مەعروف، ئەندامی لیژنەی دارایی ئەنجومەنی نوێنەران بە كوردسات نیوزی راگەیاند، لە دانیشتنەكەدا خوێندنەوەی دووەم كرا بۆ هەمواری یاسای بودجەی فیدراڵی بۆ ساڵەكانی 2023، 2024، 2025 و ماددەی 12، بڕگەی جیم كە تایبەتە بە تێچووی بەرهەمهێنان و گواستنەوەی نەوتی هەرێم.
وتیشی، لە دانیشتنەكەدا تەنها خوێندنەوەی دووەم كرا بۆ هەمواری یاساكە، لیژنەی دارایی و ئەندامانی ئەنجومەن چەند تێبینییەكیان لەسەر هەموارەكە هەبووە، بۆیە لیژنەی درایی داوایكردوە هەموو سەرنج و تێبینییەكان بە نوسراو رەوانەی لیژنەی دارایی بكەن بۆ ئەوەی پێداچوونەوە بە هەموارەكەدا بكرێت و لە داهاتوویەكی نزیكدا پرۆژەكە بخریتە دەنگدانەوە.
هەروەها د.بڕیار رەشید ئەندامی ئەنجومەنی نوێنەران بە كوردسات نیوزی راگەیاند، بە زۆرینەی دەنگ درێژكردنەوەی تەمەنی كۆمیسیۆنی باڵای سەربەخۆی هەڵبژاردنەكانی عیراق بۆ ماوەی دوو ساڵ پەسەندكرا.
هەر لە كۆبونەوەكەدا دەنگدرا لەسەر پێشنیازی هەمواری یەكەمی پاسپۆرت، هەمواری یاسای دەزگای هەڵگریش دواخرا، خوێندنەوەی یەكەمیش بۆ پێشنیازەیاسای خاوەن پێداویستی تایبەت كرا، هەروەها دەنگدانیش لەسەر پرۆژە یاسای هەمواری چوارەمی یاسای وەبەرهێنانی پیشەسازی دواخرا.
بەڕێوەبەرایەتی گشتیی حەج و عومرەی هەرێم رایگەیاند، گەشتی بێبەرامبەری عومرە بۆ سەرجەم مامۆستایانی ئایینی رێکدەخرێت.
بەڕێوەبەرایەتی گشتیی حەج و عومرەی هەرێم رایگەیاند، تەنها لە سێ مانگی کۆتایی ساڵی رابردوودا حکومەتی هەرێم گەشتی بێبەرامبەری عومرەی بۆ زیاتر لە ٣٠٠ مامۆستای ئایینی رێکخستووە.
ئاماژەی بەوەشكردووە، هێشتا پرۆسهكه بهردهوامه و له ماوهیهكی نزیكدا ههموو مامۆستایانی ئایینی گهشتی عومرهیان بۆ رێكدهخرێت.
بەشێوەیەکی گشتیی گەشتی عومرە لەرێگای فڕۆکەوە لەنێوان ٧٠٠ بۆ ٩٠٠ دۆلاری تێدەچێت و بەپێی ئەو خزمەتگوزاریانەی لە گەشتەکەدا پێشکەش دەکرێت نرخەکە دەگۆڕێت، لە رێگای وشکانیشەوە تێچووەکەی کەمترە و لەنێوان ٤٠٠ بۆ ٥٠٠ دۆلاردایە.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە ئاندرۆ بیزلی، کونسوڵی گشتیی بەریتانیا لە هەرێمی کوردستان کرد.
لەدیدارێكدا دوایین پێشهاتە سیاسییەكانی هەرێمی كوردستان و عیراق گفتوگۆیان لەبارەوەكرا و جەخت لە هەماهەنگیی نێوان هێز و لایەنە سیاسییەكان لەپێناو پاراستنی سەقامگیری و رووبەڕووبوونەوەی ئاڵنگارییەكان كرایەوە.
لەبارەی دۆخی هەرێمی كوردستان و پێكهێنانی حكومەتی نوێ، سەرۆك بافڵ جەلال تاڵەبانی ئاماژەی بەوەكرد، كاری لەپێشینەمان چارەسەركردنی كێشەی مووچەخۆرانی هەرێمی كوردستان و پێكهێنانی حكومەتێكی خزمەتگوزار و دادپەروەرە و دەبێت ئەم دۆخەی بەسەر هەرێمەكەماندا زاڵە كۆتایی پێبهێنرێت. پاراستن و بەدەستهێنانی مافەكانی خەڵك و دەستەبەركردنی ژیانێكی شایستەتر بۆیان بەرپرسیارێتیی هەموومانە و پێویستە كۆی هەوڵەكان لەو چوارچێوەیەدا بێت.
د. لەتیف رەشید سەرۆک کۆماری عیراق، پێشوازی لە نێچیرڤان بارزانی سەرۆکی هەرێمی کوردستان و وەفدی هاوڕێی کرد و پاڵپشتی خۆی بۆ دامەزراندنی پەیوەندییەکی پتەو لە نێوان حکومەتی فیدراڵ و حکومەتی هەرێمی کوردستان دووپاتکردەوە.
لە دیدارێکی دوو قۆڵیدا، کە ئەمڕۆ دووشەممە 13-1-2025 لە کۆشکی بەغداد بەڕێوەچوو، دوایین پێشهاتی سیاسی و ئەمنی و ئابوورییەکان لە گۆڕەپانی ناوخۆ و ناوچەیی تاوتوێ کرا، هاوکات پەیوەندییەکانی نێوان حکومەتی فیدراڵ و حکومەتی هەرێمی کوردستان تەوەرێکی تری کۆبونەوەکە بوو.
لەوبارەیەوە سەرۆک کۆمار گرنگی پەسەندکردنی پرەنسیپی گفتوگۆی نێوان هەردوولا و تێپەڕاندنی خاڵە ناکۆکەکان بەگوێرەی یاسا و دەستوور دووپاتکردەوە ، هاوکات هەوڵەکان بۆ بەرژەوەندی هاووڵاتیان و دەستەبەرکردنی موچەی فەرمانبەران و خانەنشینکراوانی هەرێمی کوردستان، هاوشێوەی براکانیان لە تەواوی عیراق بە کارێکی لە پێشینە دانا، لەلایەکی ترەوە جەختیشیکردەوە لە پاڵپشتی خۆی بۆ دامەزراندنی پەیوەندییەکی پتەو لە نێوان حکومەتی فیدراڵ و حکومەتی هەرێمی کوردستان.
دواتر، کۆبونەوەیەکی فراوان بەڕێوەچوو کە وەفدی یاوەری نێچیرڤان بارزانی ئامادەیبوون، کە لەو کۆبونەوەدا سەرۆک کۆمار ئاماژەیکرد بە گرنگی سەردانەکانی نێوان حکومەتی فیدراڵی و حکومەتی هەرێمی کوردستان بۆ گەیشتن بە لێکتێگەیشتنی هاوبەش و پتەوکردنی بناغەی دیالۆگی بنیاتنەر و کاریگەر لە نێوان هەردوولا بۆ چارەسەرکردنی کێشە و ناکۆکیەکان و دەستەبەرکردنی بەرژەوەندی هاووڵاتیان، بە ئاماژەدان بە پێویستی بەهێزکردنی هاریکاری و هەماهەنگی نێوان هەردوولا کە کاریگەریی راستەوخۆی هەیە لەسەر چارەسەرکردنی کێشە هاوبەشەکان و گرنگیدان بە بیناسازی و ئاوەدانکردنەوە و گەشەپێدان پڕۆژەکان لە وڵاتدا.
لە بەرانبەردا سەرۆکی هەرێمی کوردستان جەختیکردەوە، کە گەیشتن بە چارەسەرێک بۆ مەسەلەی موچەی فەرمانبەرانی هەرێم و لێکتێگەیشتنی بەردەوام یارمەتیدەردەبێت بۆ پتەوکردنی پەیوەندییەکانی نێوان حکومەتی فیدراڵی و حکومەتی هەرێم، هەروەها چڕکردنەوەی هەوڵەکان بۆ چارەسەرکردنی کێشە هەڵپەسێردراوەکان، هاوکات سوپاس و پێزانینی خۆی بۆ سەرۆک کۆمار دەربڕی بۆ وردبینی و بەدواداچوون و پەرۆشی بۆ دامەزراندنی بناغەی پەیوەندی نێوان بەغداد و هەولێر و لەپێناو بەرژەوەندی عیراق بە گشتی.
پەیامنێری کوردسات نیوز باسی لەوەکرد، تەقینەوە لە کارگەیەکی شیش لە هەولێر رویدا و بەهۆیەوە بەپێی ئامارە سەرەتاییەکان، کەسێک گیانی لەدەستداوە و دوو کەسی دیکەش بریندار بوون.
ئاماژەی بەوەشکرد، بەپێی زانیارییە سەرەتاییەکان تەقینەوەکە بەهۆی ئەوەوە رویداوە، لەناو ئەو ئاسنانەی کارگەکە دەیتواندنەوە، گوللـەهاوەنێک هەبووە و بەهۆی گەرمییەوە تەقیوەتەوە.
ئەوەشی خستە روو، ئەو کرێکارەی گیانی لەدەستداوە بە رەگەز ئێرانییە، بەڵام هێشتا نازانرێت خەڵکی رۆژهەڵاتی کوردستانە یان شارەکانی دیکە.
وتیشی، دوو کرێکارەکەی دیکە کە بریندار بوون، بە رەگەز هندین و برینی یەکێکیان سەختە، لە ئێستاشدا گواستراونەتەوە بۆ نەخۆشخانە و چارەسەری پێویستیان بۆ دەکرێت.
لە روداووێکی هاتوچۆدا لە کۆیە دوو کەس گیانیان لەدەستدا و چوار کەسی دیکەش بریندار بوون.
پەیامنێری کوردسات نیوز باسی لەوەکرد، روداوەکە لەسەر رێگای نێوان کۆیە- دوکان نزیک گوندی داوداوە بووە و بەهۆیەوە دوو کەس گیانیان لەدەستداوە، کە یەکێکیان لە رەگەزی نێر و ئەوی دیکەیان لە رەگەزی مێیە.
لەوبارەیەوە سەنگەر سەلاحەدین بەڕێوەبەری هاتوچۆی قەزای کۆیە بە کوردسات نیوزی راگەیاند، رووداوەکە بەهۆی تیژڕۆییەوە لەنێوان دوو ئۆتۆمبێلی جۆری مارسیدس و ئۆپڵدا رویداوە.
ئەوەشی خستە روو، جگە لەو دوو کەسەی گیانیان لەدەستداوە، چوار کەسی دیکەش بریندار بوون، کە لە ئێستادا لە نەخۆشخانەی فریاکەوتنی کۆیە چارەسەر وەردەگرن.
رێگای نێوان دوکان- کۆیە، یەکێکە لەو رێگایانەی هەرێم کە ناڕەزایەتییەکی زۆر لەسەر خراپی رێگاکە هەیە و ساڵانە ژمارەیەکی زۆر روداوی هاتوچۆی تێدا روودەدات.
ماوەی هەفتەیەکیشە لەسەر یەک دانیشتووانی گوندەکانی سنووری ناحیەی خەلەکان کە ئەو رێگایە رێگای سەرەکی ناحیەکەیانە، شەقامەکە دەگرن و ناڕەزایەتی دەردەبڕن دژی خراپی رێگاکە و داوای چاککردنی دەکەن.