بافڵ جەلال تاڵەبانی سەرۆکی یەکێتیی نیشتمانیی کوردستان و مەسرور بارزانی سەرۆکی حکومەتی هەرێمی کوردستان لە پیرمام  کۆبوونەوە.

کۆبوونەوەکە بۆ تاوتوێكردنی پێكهێنانی كابینەی نوێی حكومەتی هەرێمی کوردستانە.

پۆلیسی سلێمانی دەستگیرکردنی یەکێک لە تۆمەتبارانی هەڵکوتانە سەر رێستۆرانتەکەی سلێمانی راگەیاند، دەشڵێت بەردەوامن لە گەڕان بەدوای تۆمەتبارەکانی دیکەدا.

پۆلیسی سلێمانی رایگەیاندووە، شەوی رابردوو لە رێستۆرانتی فانسی لە شاری سلێمانی شەڕ و ئاڵۆزی دروست بوو و تەقەکرا، هێزەکانی پۆلیس و ئاسایشی سلێمانی بەردەوام بوون لە گەڕان و بەدواداچوونەکان بۆ دۆزینەوە و دەستگیرکردنی تۆمەتباران، سەرئەنجام یەکێک لە تۆمەتبارەکان خۆی رادەستی هێزەکانی پۆلیس کرد.

ئاماژەی بەوەشکردووە، لەگەڵ دەستگیرکردنی ئەو تۆمەتبارەدا دەستگیراوە بەسەر چەکێک لە جۆری دەمانچەی تورکیدا.

باسی لەوەشکردووە، لە ئێستادا تۆمەتبار (ز،ح،ع ) بەبڕیاری دادوەر راگیراوە و لێکۆڵینەوە لە روداوەکە بەردەوامە.

پۆلیسی سلێمانی دەشڵێت، هێزەکانمان بەردەوامن لە گەڕان بۆ دەستگیرکردنی ئەو تۆمەتبارانەی دیکە کە لەلایەن دادوەرەوە فەرمانی دەستگیرکردنیان بۆ دەرکراوە.

پارێزەری شێروان شێروانی بە کوردسات نیوزی راگەیاند، دادوەر ئازادبوونی بە مەرجی شێروان شێروانی رەتکردەوە. دەشڵێت، ئەگەر ئازاد نەکرێت تاوەکو مانگی ئەیلولی ئەمساڵ لە زینداندا دەمێنێتەوە.

محەمەد عەبدوڵا پارێزەری شێروان شێروانی بە کوردسات نیوزی راگەیاند، "ئەمڕۆ دوای پێشکەشکردنی داواکاری ئازادبوونی بریکاردارم لە دادگای بەرایی دەشتی هەولێر، بەڵام داواکاریەکەمان رەتکرایەوە".

وتیشی، "جارێکی تر ستەم لە شێروان شێروانی کرا و دادوەر بڕیاریدا بە رەتکردنەوەی داواکاری بریکاردارم رۆژنامەنووس شێروان ئەمین ناسراو بە شێروان شێروانی بە ئازاد بوونی بە مەرج، کە بەداخەوە بڕیارێکی چاوەڕوان نەکراو بوو".

ئەو پارێزەرە وتیشی، تانە لە بڕیارەکە دەدەن و پێیان وایە نادادی تێدایە، بۆیە چاوەڕێی ئەنجامی تانەکە دەکەن.

ئاماژەی بەوەشکرد، ئەگەر ئازادبوونی بە مەرج شێروان شێروانی نەگرێتەوە، ئەوا تاوەکو مانگی ئەیلولی ئەمساڵ ئەو رۆژنامەنووسە لە زینداندا دەمێنێتەوە.

ئەوەش لە کاتێکدایە، بڕیاربوو رۆژی 9ی ئەم مانگە، دوای تێپەڕبوونی زیاتر لە چوار ساڵ و 5 مانگ بەسەر زیندانیکردنیدا، رۆژنامەنووس شێروان شێروانی، یەکێک لە گیراوەکانی کەیسی بادینان، ئازاد بکرێت.

قوباد تاڵەبانی رایگەیاند، یادکردنەوەی زامی هەڵەبجە و ئەنفال و ئازارەکانی دیکە بۆنەیەکن بۆ بیرکردنەوە لەبوون و مێژوومان.

قوباد تاڵەبانی جێگری سەرۆکی حکومەتی هەرێم لە ساڵیادی کیمیایی بارانکردنی هەڵەبجەدا رایگەیاند، "یادکردنەوەی زامی هەڵەبجە و ئەنفال و ئازارەکانی دیکە تەنها یادکردنەوەیەکی سادە نین، بەڵکو بۆنەیەکن بۆ بیرکردنەوە لەبوونمان و لە مێژوومان".

ئاماژەی بەوەشکردووە، "ئەوانە بۆنەیەکن بۆ تێڕامان لەو کارەسات و نەهامەتییانەی بەسەر میلەتەکەماندا هاتووە و بۆنەیەکیشن بۆ تێگەیشتن لە هاوچارەنووسیمان وەک گەلی کورد بەبێ جیاوازی".

ئەمڕۆ 37 ساڵ بەسەر کیمیایی بارانکردنی هەڵەبجەدا تێدەپەڕێت، ئەو تاوانەی چەکی کیمایی قەدەغەکراوی بەرامبەر بە کورد تێدا بەکارهێنرا و بەهۆیەوە پێنج هەزار هاووڵاتیی شەهید و بە سەدانی دیکەش بریندار بوون.

سەرۆک کۆماری عیراق پەیامێکی بەبۆنەی ساڵیادی کیمیایی بارانکردنی هەڵەبجە بڵاوکردەوە و رایگەیاندووە، تاوانی كیمیابارانكردنی هەڵەبجە سەلمێنەری ئەو ستەمەیە كە رژێمی بەعس بەرانبەر گەلی كورد ئەنجامیدا. دەشڵێت، "هانی لایەنە پەیوەندیدارەکان دەدەین پەلە بکەن لە گۆڕینی هەڵەبجە بۆ پارێزگا و هەنگاوە یاساییەکانی تەواو بکەن".

د. لەتیف رەشید سەرۆک کۆماری عیراق لە ساڵیادی کیمیایی بارانکردنی هەڵەبجەدا رایگەیاند، "ئەم تاوانە دڕندانەیە، کە بووە هۆی شەهیدبوون و برینداربوونی هەزاران منداڵ و ژن و پیر و لەناوبردنی چەندین گوندی کوردنشین، دەربڕی ئەو ستەمەیە کە رژێمی لەناوچووی پێشوو دژ بە هاووڵاتیانی کورد بە تایبەتی و گەلی عیراق بە گشتیی ئەنجامی داوە".

ئاماژەی بەوەشکرد، تاوانی هەڵەبجە ویژدانی جیهانی هەژاند، راشیگەیاندووە، "تراژیدیای شاری هەڵەبجە ئەمڕۆ داوامان لێدەکات بەرەو پێشەوە هەنگاو بنێین بۆ چەسپاندنی ئەزموونی دیموکراسی لە وڵاتەکەماندا، هاوکات داواکردن لە کۆمەڵگەی نێودەوڵەتی بۆ ڕێگریکردن لە بڵاوبوونەوەی چەکە کۆکوژیە قەدەغەکراوە نێودەوڵەتییەوە و راگرتنی جەنگ و ململانێکان و چەسپاندنی سەقامگیری ئاسایش و ئاشتی لە ناوچەکە و جیهاندا".

روونیشیکردووەتەوە، جەخت لەسەر گرنگی هاوکاری و هەماهەنگی نێودەوڵەتی دەکەینەوە بۆ دۆکیۆمێنتکردنی ئەو تاوانانەی کە دژ بە هاووڵاتیان ئەنجام دراون، بۆ ئەوەی ببنە بەڵگە بۆ ئەو تاوانانەی کە رژێمە دیکتاتۆرییەکان بەرامبەر بە خەڵکی بێتاوان ئەنجامیان داوە.

لە کۆتاییشدا ئەوەی خستووەتە روو، "بەرپرسیارێتی نیشتمانی و مرۆییمان داوامان لێدەکات کەهانی لایەنە پەیوەندیدارەکان بدەین پەلە بکەن لە گۆڕینی هەڵەبجە بۆ پارێزگا و هەنگاوە یاساییەکانی لە ئەنجومەنی نوێنەران تەواو بکەن، بۆ بەدەستهێنانی ئەو مافە بۆ شارەکە و بەرجەستەکردنی ئەو خزمەتگوزارییانەی کە پێویستیان پێیەتی و قەرەبووکردنەوەی کەسوکاری قوربانیان لەبەرامبەر ئەو زیانانەی کە هێشتا بەدەستیانەوە دەناڵێنن".

ئەمڕۆ 37 ساڵ بەسەر کیمیایی بارانکردنی هەڵەبجەدا تێدەپەڕێت، ئەو تاوانەی چەکی کیمایی قەدەغەکراوی بەرامبەر بە کورد تێدا بەکارهێنرا و بەهۆیەوە پێنج هەزار هاووڵاتیی شەهید و بە سەدانی دیکەش بریندار بوون.

شۆڕش ئیسماعیل وەزیری پێشمەرگەی حکومەتی هەرێمی کوردستان لە ساڵیادی کیمیابارانی هەڵەبجەدا پەیامێكی بڵاکردەوە و رایگەیاند، دەبێت ئەو تاوانەی دەرحەق بە هەڵەبجە و هەڵەبجەییەکان کرا ببێتە وانەیەک و یەکگرتوویی و تەباییمان بەهێزتر بکات، لە بەرامبەر سەرجەم پرسە چارەنووسازەکاندا کە رووبەڕووی گەلەکەمان دەبێتەوە”.

دەقی پەیامەکەی وەزیری پێشمەرگە:

پەیامی وەزیری پێشمەرگە لە ساڵیادی کارەساتی کیمیابارانکردنی هەڵەبجەدا.

“لـە ساڵیادی کارەساتی جینۆسایدکردنی هەڵەبجـەدا، درود بۆ رۆحی پاک و بێگەردی شەهیدانی کارەساتی کیمیابارانکردنی هەڵەبجە و سەرجەم شەهیدانی کوردستان دەنێرین، سەری ڕێزو وەفاداری بەرامبەر کەسوکاری شەهیدان و بریندارانی چەکی کیمیایی لە هەڵەبجە دادەنەوێینین.

کارەساتی هەڵەبجـە، تاوانی کۆمەڵکوژی و مەرگەساتی گەلێک بوو، لەلایەن رژێمی ڕەفتارفاشیی بەعسی ڕووخاو، کە بە چەندین جۆر گازی کیمیایی بۆمبارانی هەڵەبجەی کردو بەوھۆیەوە زیاتر لە پێنج ھەزار ھاووڵاتیی سڤیل شەھیدبوون و زیاتر لە 10 هەزار ھاووڵاتیی دیکەش برینداربوون، کە تاوەکوو ئێستاش بەشێکیان بەدەست ئازارەکانییانەوە دەناڵێنن.

هەڵەبجـە، بیرەوەرییەكی خەمناك و پەژارەیەكی نیشتمانی و نەتەوەییمانە كـە هەرگیز لە هزر و ئەندێشەی گەلەكەمان و مرۆڤی بەویژدان دەرناچێت.

دووژمنانی گەلەکەمان هەمیشە ویستوویانە بە زەبری ئاگر و ئاسن وەڵامی داواکارییە ڕەواکانی گەلی کوردستان بدەنەوە؛ بەڵام هەرگیز نەیانتوانیوەو ئەو خەونەیان بردۆتە ژێرگڵ. 

دەبێت ئەو تاوانەی دەرحەق بە هەڵەبجە و هەڵەبجەییەکان کرا ببێتە وانەیەک و یەکگرتوویی و تەباییمان بەهێزتر بکات، لە بەرامبەر سەرجەم پرسە چارەنووسازەکاندا کە رووبەڕووی گەلەکەمان دەبێتەوە”.

شۆڕش ئیسماعیل

وەزیری پێشمەرگەی حکومەتی هەرێمی کوردستان
١٦ـی ئاداری ٢٠٢٥

بافڵ جەلال تاڵەبانی سەرۆکی یەکێتیی نیشتمانیی کوردستان، لە یادی کیمیابارانی هەڵەبجەدا دەڵێت، ئیتر کاتی هاتووە دوور لە دروشم، هەنگاوی کرداری بنرێت بۆ ئاوەدانکردنەوەی زیاتری هەڵەبجە و بە یەک دەست هەموومان بە پرۆژەیەکی نیشتمانییەوە کاربکەین بۆ سەرخستنی هەنگاوەکانی دەنگدان بە پارێزگابوونی هەڵەبجە و قەرەبووکردنەوەی قوربانیان، و گەیاندنی خزمەتگوزاری زیاتر بە ناوچەکە.

دەقی پەیامەکەی سەرک بافڵ...

هەمیشە دەست لەسەر سنگ، هاوسۆزین لەگەڵ خانەوادەی سەربەرزی شەهیدان و قوربانیانی چەکی کیمیایی.
هەڵەبجە بۆ ئێمە هێمای قوربانی و مەزڵومیەتی گەلەکەمانە، دوای ٣٧ ساڵ لە جینۆسایدکردن و کیمیابارانکردنی هەڵەبجەی هەمیشە زیندوو، تاوەکو ئێستا ئاسەوار و کاریگەرییە خراپەکانی بەسەر خەڵک و خاکی شارەکەوە ماوە. 

ئێمە لە ئازاری کەسوکارەکانمان، داواکاری و خواستەکانیان لە هەڵەبجەی سەربەرز تێدەگەین، بۆیە لەگەڵ هەموو گلەیی و پێویستییەکانیاندام و لە پێشەوەی بەرگری لە مافەکانتان و پارێزەری راستەقینەشتان دەبم بۆ هێنانەدییان.

یەکێتیی نیشتمانیی کوردستان پەرۆشانە لە رێگای نوێنەرەکانی لە ناوەندەکانی دەسەڵات و یاسادانان وەک هەمیشە بێ درێغیکردن بۆ پرسی هەڵەبجە کاردەکات و بەردەوام لە هەوڵدا دەبین تا خزمەتی شاری شەهیدان و خەڵکە خۆشەویستەکەی بکەین، ئەمەش ئەرکە لەسەرشانی هەموو یەکێتییەک کە خزمەتکاری هەڵەبجە بێت.

ئیتر کاتی هاتووە دوور لە دروشم، هەنگاوی کرداری بنرێت بۆ ئاوەدانکردنەوەی زیاتری هەڵەبجە و بە یەک دەست هەموومان بە پرۆژەیەکی نیشتمانییەوە کاربکەین بۆ سەرخستنی هەنگاوەکانی دەنگدان بە پارێزگابوونی هەڵەبجە لە ئەنجوومەنی نوێنەرانی عیراق و قەرەبووکردنەوەی قوربانیان، و گەیاندنی خزمەتگوزاری زیاتر بە ناوچەکە.

ئەرکی حکومەتیشە خزمەتکردنی هەڵەبجە و ئاوەڕدانەوەی زیاتر لە شارەکە بکاتە ئەولەویەتی کارکردنی و بودجە و شایستەی دارایی پێویست دابینبکات کە لە ئاست گەورەیی هەڵەبجەدا بێت.

سڵاوی وەفاداریمان بۆ گیانی پاک و نەمری شەهیدانی کیمیابارانی هەڵەبجە، سەربەرزی بۆ هەڵەبجە و هەڵەبجەییەکان.

بافڵ جەلال تاڵەبانی
سەرۆکی یەکێتیی نیشتمانیی کوردستان

لە سەرەتای راگەیەندراوەکەدا هاتووە: "ئەمڕۆ بە خەمێکی قوڵەوە یادی 37 ساڵەی تاوانی دڕندانەی دژ بە گەلەکەمان دەکەینەوە کە لە شاری هەڵەبجە لە لایەن هێزەکانی رژێمی بەعسی روخاوەوە بەرامبەر بە خەڵکی بێدیفاع و مەدەنی ئەو شارە ئەنجامدرا."

راگەیەندراوەکە ئاماژە بەوە دەکات کە ئەو تاوانەی شۆڤێنیەکانی بەعس بەسەر ئەم شارەدا هێنایان، رقێک بوو بەرامبەر رۆڵی مێژوویی هەڵەبجە کە لە جوڵانەوەی فەرهەنگی و شارستانێتی و سیاسیدا خاوەنی بیری دەوڵەمەند و پێشکەوتنخوازی کوردایەتی بوون و لە راپەڕین و شۆرشەکانی گەلەکەشماندا هەمیشە سەرمەشق بوون.

هەروەها لە راگەیەندراوەکەدا جەخت کراوەتەوە: "وەک چۆن هەر لە پاش راپەڕینەوە یەکێتیی نیشتمانیی کوردستان لەسەر ئەرکی خۆی و دواتر لە رێگەی حکومەتی هەرێمەوە هەوڵی بێوچانی خستە گەڕ بۆ گەڕاندنەوەی سیمای ئاوەدانی و پێشکەشکردنی خزمەتگوزاری بە هەڵەبجە و خەڵکەکەی، ئیمڕۆش زیاتر لە جاران و پاش بەڕەسمی ناساندنی هەڵەبجە وەک چوارەمین پارێزگای کوردستان لە لایەن پارلەمان و حکومەتی هەرێمەوە، لەپێناو سارێژکردنی زامەکان و باشتر قەرەبوکردنەوەی زیانلێکەوتوانی تاوانی جینۆسایدکردنی ئەم شارە تێدەکۆشێت."

مەکتەبی سیاسی یەکێتی لەم بۆنە خەمناکەدا تەئکیدی کردووەتەوە کە سەرکردایەتی یەکێتی لە رێگەی فراکسیۆنەکەیەوە لە پەرلەمانی عیراق و تیمی ئیدارەی هەڵەبجە و حکومەتی فیدراڵی، لە هەوڵی بەردەوامدان تاوەکو لە ئەنجومەنی نوێنەران پرۆژە یاسای بەرەسمی ناساندنی هەڵەبجە وەک نۆزدەیەمین پارێزگای عێراق دوا خوێندنەوە و دەنگدانی لەسەر بکرێت و بە پێی یاسا و بنەما دەستورییەکان گشت شایستە و مافەکانی بۆ دابین بکرێت.

لە کۆتایی راگەیەندراوەکەدا هاتووە: "تاوانی کیمیایبارانی هەڵەبجە زامێکی لە بیرنەکراوە. درود بۆ رۆحی شەهیدانی کیمیایبارانی هەڵەبجە و گشت شەهیدانی جینۆسایدی گەلەکەمان.

ئەنجومەنی پشتیوانی یەکێتی نیشتمانی کوردستان لە یادی 37 ساڵەی کارەساتی کیمیابارانی هەڵەبجەدا پەیامێکی بڵاوکردەوە.

لە پەیامەکەدا هاتووە: "ئەمڕۆ یادی گەورەترین تاوانی دەرهەق بە مرۆڤ و مرۆڤایەتی دەکەینەوە ئەویش کیمیابارانکردنی هەڵەبجەیە. ئەو تاوانەی کە پەڵەیەکی ڕەش و شەرمەزارییە بە نێوچاوانی ڕژێمی بەعس و برینێکی قوڵیشە لە جەستەی مرۆڤایەتیدا."

لە بەشێکی دیکەی پەیامەکەدا، ئەنجومەنی پشتیوانی یەکێتی نیشتمانی کوردستان ئاماژەی بەوە کردووە کە لە ساتێکی کەمدا نزیکەی 5000 پێنج هەزار مرۆڤی پەپولە ئاسا کرانە قوربانی ڕق و کینەی ئەو رژێمە خوێنڕێژە، و شارێکیان لە خەندەو پێکەنین نوقمی هاوارو ناڵەی مردن بە گازە ژەهراوییەکان کرد.

پەیامەکە بەم شێوەیە کۆتایی هاتووە: "لەم بۆنە خەمناک و کارەساتبارەدا پەیامی هاوخەمی و ماتەمینی خۆمانتان پێ رائەگەیەنین و لەئاست شەهیدو قوربانیانی ئەو تاوانەدا سۆزو وەفا ئەنوێنین... درود دەنێرین بۆ رۆحی پاکی شەهیدان و قوربانیانی کیمیابارانی هەڵەبجە، دروود بۆ رۆحی پاکی شەهیدان و ئەنفال..."

حاجی مەسیفی، سکرتێری ئەنجومەنی پشتیوانی یەکێتی نیشتمانی کوردستان

بڕیارە سبەینێ لە هەولێر سەرۆک بافڵ جەلال تاڵەبانی و مەسرور بارزانی سەبارەت بە رەوشی سیاسی هەرێمی کوردستان، عیراق، ناوچەکە و لێکەوتە سیاسییەکان و چەند پرسێکی دیکە کۆببنەوە.

نووسینگەی رۆژنامەوانی بافڵ جەلال تاڵەبانی سەرۆکی یەکێتیی نیشتمانیی کوردستان رایگەیاند، سبەینێ یەکشەممە ١٦ی ٣ی ٢٠٢٥ لە شاری هەولێر بافڵ جەلال تاڵەبانی، سەرۆکی یەکێتیی نیشتمانیی کوردستان و مەسرور بارزانی، سەرۆکی حکومەتی هەرێمی کوردستان کۆدەبنەوە لەبارەی رەوشی سیاسی هەرێمی کوردستان، عیراق و ناوچەکە و لێکەوتە سیاسییەکان و خۆئامادەکردن بۆ پێشهاتەکان.

ئاماژەی بەوەشکرد، لە کۆبوونەوەکەدا پێگەی هەرێمی کوردستان و پێکهێنانی کابینەی نوێی حکومەتی هەرێمی کوردستان تاوتوێدەکرێت.

دابەشكردنی موچەی مانگی دووی موچەخۆرانی هەرێم بەردەوامە و سەرجەم فەرمانگە و وەزارەتەكانی حكومەتی هەرێمیش راسپێردراون تاكو پێشنیوەڕۆی سبەینێ لیستی موچەی مانگی سێ ئامادە بكەن.

پەیامنێری كوردسات نیوز لە هەولێر رایگەیاند، لە چوارچێوەی بڕیارەكانی كۆبوونەوەی رابردووی ئەنجومەنی وەزیرانی هەرێم، سەرجەم فەرمانگە و وەزارەتەكانی هەرێم راسپێردراون تاكو سەعات 11ـی پێشنیوەڕۆی سبەینێ لیستی موچەی مانگی سێ ئامادەبكەن و رادەستی وەزارەتی دارایی هەرێمی بكەن، تاكو بەزووترین كات رێوشوێنە یاساییەكان بۆ لیستەكە ئەنجامبدرێت و دواتر رادەستی وەزارەتی دارایی عیراق بكرێت.

ئەوەشی خستەڕوو، هەوڵەكانی حكومەتی هەرێم بە ئاڕاستەی ئەوەیە، پێش هاتنی جەژنی رەمەزانی پیرۆز، موچەی مانگی سێی موچەخۆرانی هەرێم دابەشبكرێت.

پەیامنێری كوردسات نیوز راشیگەیاند، موچەی مانگی سێ هاوشێوەی موچەی مانگی دوو دەبێت و هیچ گۆڕانكارییەك لە دەرماڵە و بڕی موچەخۆراندا ناكرێت، لە چەند حاڵەتێكدا نەبێت ئەوانیش، گەڕانەوە لە مۆڵەتی بێ موچە و مۆڵەتی دایكایەتی و سزا، هاوكات سەرەموچەش بۆ فەرمانبەران نابەسترێت.

‎بەڕێوەبەرایەتی گشتی حەج و عومرەی هەرێمی کوردستان، رایگەیاند: ئەمڕۆ شەممە هاووڵاتی "ئەحمەد حەسەن محمد" دانیشتووی پارێزگای دهۆک، کە بە مەبەستی ئەنجامدانی عومرە سەردانی وڵاتی سعوودیەی کردبوو، دوای بەجێگەیاندنی سوننەتی عومرە تووشی جەڵتە بوو و پاش مانەوەی نزیکەی مانگێک لە نەخۆشخانەکانی مەککە، بەداخەوە ئەمڕۆ کۆچی دوایی کرد.

بەپێی راگەیەندراوەکەی ‎بەڕێوەبەرایەتی گشتی حەج و عومرە، ئەم عومرەکارە تەمەنی سەرووی 70 ساڵ بووە و سوننەتی عومرەی بەجێ گەیاندووە. لەو ماوەیەی لە نەخۆشخانە بووە، بەردەوام لەلایەن نووسینگەی دهۆکی حەج و خاوەن کۆمپانیاکەوە چاودێری کراوە و ئاسانکاری بۆ خانەوادەکەی کراوە. هەر ئەمڕۆش دوای وەرگرتنی رەزامەندی خانەوادەکەی، بڕیارە مامەڵەکان تەواو بکرێن و لە شاری مەککەی پیرۆز بە خاک بسپێردرێت.

شایانی باسە ئەمە حەوتەم عومرەکاری کوردستانە کە لە سەرەتای ئەمساڵەوە لە سعوودیە کۆچی دوایی بکات.

بڕیارە لەم هەفتەیەدا كۆبوونەوەی لوتكە لەنێوان یەكێتی و پارتی بۆ گفتوگۆکردن لەسەر پێكهێنانی كابینەی نوێی حكومەتی هەرێم بەڕێوەبچێت.

د.مەجید حەمەئەمین ئەندامی سەركردایەتی یەكێتیی نیشتمانیی كوردستان لە لێدوانێكدا رایگەیاند، وەفدی دانوستانكاری یەكێتی و پارتی لە 90%ـی كارەكانی تایبەت بە نووسینەوەی رەشنووسی حكومڕانییان لە هەرێمی كوردستان تەواوكردوە.

وتیشی، ئەو بەشەی تائێستا تەواونەكراوە، پێویستی بە كۆبوونەوەیەكی لوتكە لەنێوان سەرۆكی یەكێتی و سەرۆكی پارتی یان جێگرەكەی هەیە، ئامادەكاریش كراوە و بڕیارە ئەم كۆبوونەوەكە بەڕێوەبچێت.

 

 

کۆمیتەی بەڕێوەبەری پەکەکە پەیوەست بە نەورۆزی 2025 ڕاگەیەنراوێکی بڵاو کردەوە و رایگەیاند، نەورۆزی ئەمساڵ بکرێتە نەورۆزی ئازادیی جەستەیی ئۆجالان و ئاماژەی بەوەد، لە پاش ئاگر بەست تورکیا 4175جار هێرشی کردووەتە سەر.

کۆمیتەی بەڕێوەبەری پارتی كرێكارانی كوردستان (پەکەکە) لە راگەیاندراوێکی تایبەت بە نەورۆزی ساڵی 2025 رایگەیاند کە ئاگربەستی تاکلایەنەیان راگەیاندووە بە مەبەستی دەستپێکردنی پڕۆسەی ئاشتی بەپێی مەرجەکانی بانگەوازەکەی عەبدوڵڵا ئۆجەلان، بەڵام تاکو ئێستا هیچ هەنگاوێکی کردەیی لە پەرلەمانی تورکیا نەبینراوە.

لە راگەیاندراوەکەیاندا، پەکەکە ئاماژەی بەوە کردووە کە لە ماوەی دوو هەفتەی ئاگربەستی تاکلایەنەدا، سوپای تورکیا بەراورد بە ماوەکانی پێشوو هێرشەکانی کەم کردووەتەوە، بەڵام بەگشتی 73 هێرشی ئاسمانی و 4175 هێرشی موشەکی ئەنجام داوە. هەروەها هەشت جار چەکی قەدەغەکراوی بەکارهێناوە، جگە لەوەی فڕۆکەی سیخوڕی بۆمبڕێژکراو هەموو رۆژێک بەسەر ناوچەکەدا دەفڕن.

راگەیاندراوەکە جەختی کردووەتەوە کە "ناتوانرێت هەنگاوی کردەیی لەو جۆرە بگیرێتەبەر بۆ وەستاندنی شەڕ بەشێوەیەکی تاکلایەنە، بۆیە دەبێت هەنگاوی کردەیی بنرێت و هەموو چەکەکان بێدەنگ بکرێن."

لە بەشێکی دیکەی راگەیاندراوەکەدا، کۆمیتەی بەڕێوەبەری پەکەکە راشیگەیاندووە کە خۆشحاڵن لەوەی بانگەوازەکەی عەبدوڵڵا ئۆجەلان و بەیاننامەکەیان لەسەر ئاستی ناوخۆ و نێودەوڵەتیدا بە شێوەیەکی ئەرێنی پێشوازی لێکراوە، بەڵام جەختیان کردووەتەوە کە "کات زۆر گرنگە و بۆ سەرکەوتن دەبێت کات بە باشی بەکاربهێنرێت و پێکەوە هەنگاو بنێن."

هەروەها پەکەکە ئاشکرای کردووە کە لەدوای 27ـی شوباتەوە دیدار لەگەڵ عەبدوڵڵا ئۆجەلان نەکراوە و نازانن ئایا گۆڕانکاری لە مەرجەکانی ئیمراڵی کراوە یان هەمان مەرجەکانی پێشوویە. هەرچەندە رۆژنامەنووسان باس لە کۆبوونەوە و گفتوگۆ دەکەن، بەڵام هیچ هەنگاوێکی کردەیی لەلایەن پەرلەمانەوە نەبینراوە.

لە کۆتاییدا، کۆمیتەی بەڕێوەبەری پارتی كرێكارانی كوردستان بانگەوازی بۆ گەلی وڵاتپارێز و دۆستانی دیموکراسی، بەتایبەتی ژنان و گەنجان کردووە کە "لە هەموو شوێنێک مەیدانەکانی نەورۆز پڕ بکەنەوە و لە هەموو کاتێک زیاتر هاوار بۆ ئازادکردنی ئۆجەلان بکەن."

ئەوەشیان ئاماژە پێداوە، کە ئەم نەورۆزە بکرێتە نەورۆزی "ئازادی جەستەیی ئۆجەلان". 

 

 

 

نوێدەکرێتەوە

بەردی بناغەی پردی تەنگی سەید محەمەد لە پارێزگای هەڵەبجە دانرا و بڕیارە لە ماوەی 900 رۆژدا جێبەجێ بکرێت.

لە میانەی سەردانێکیدا بۆ پارێزگای هەڵەبجە، قوباد تاڵەبانی، جێگری سەرۆکوەزیران بە یاوەری دانا عەبدولکەریم، وەزیری ئاوەدانکردنەوە و نیشتەجێکردن بەردی بناغەی پردی تەنگی سەید محەمەدی دانا.

پردی تەنگی سەید محەمەد پڕۆژەیەکی ستراتیژییە لە ناوچەکەدا و پارێزگای هەڵەبجە و ئیدارەی گەرمیان پێکەوە دەبەستێتەوە. درێژی پردەکە 600 مەتر دەبێت و بە گوژمەی نزیکەی 27 ملیارد دینار لەماوەی 900 رۆژدا جێبەجێ دەکرێت.

هەر لە سەردانەکەیدا بۆ پارێزگای هەڵەبجە، قوباد تاڵەبانی پڕۆژەی سایلۆی هەڵەبجەی بەسەر کردەوە و بە دواداچوونی کرد بۆ چۆنییەتی بەرەوپێشچوونی کارەکانی پڕۆژەکە. سایلۆی هەڵەبجەش لە پرۆژە ستراتیژییەکانی پارێزگاکەیە و لە ساڵی 2024دا بەردی بناغەکەی دانراوە و لە ماوەی دوو ساڵدا تەواو دەکرێت.

سبەینێ ساڵیادی کیمیابارانکردنی هەڵەبجەیە، حکومەتی عیراق پێشتر لە پەرلەمان ئەو رۆژەی کردە پشوو، بەڵام فەرمانگەی میدیا و زانیاری حکومەتی هەرێم رایگەیاندووە کە سبەینێ پشوو نییە و گۆڕانکاری لە بۆنە و یاد و پشووەكاندا ناکرێت و هەر وەك خۆی دەمێنێتەوە.

روونكردنەوەیەك لە فەرمانگەی میدیا و زانیارییەوە

حكومەتی هەرێمی كوردستان بۆنە و یاد و ڕۆژانی پشووە فەرمییەكانی لە ساڵنامەی فەرمیی حكومەتدا دیاری كردووە، لە ئێستادا بۆنە و یاد و پشووەكان هەر وەك خۆی دەمێنێتەوە، هیچ گۆڕانكارییەكیش لەو ساڵنامەیەدا ناكرێت تا پەرلەمانی كوردستان بەپێی دەسەڵاتەکانی خۆی پێداچوونەوەی بۆ دەكات و بڕیاری نوێی بۆ دەر دەكات.