ئەپیكۆر رایدەگەیەنێت: وەزارەتی نەوتی عیراق ئامادە نییە گفتوگۆ لەسەر چارەسەركردنی كێشەكانی هەناردەكردنەوەی نەوتی هەرێم بكات.

كۆمەڵەی پیشەسازیی نەوتی كوردستان ناسراو بە "ئەپیكور" لە رایگەیەنراوێكدا ئاماژەی بەوەكردوە، كۆمپانیا نێودەوڵەوتییەكانی نەوت و حكومەتی هەرێم بە نیازێكی پاكەوە لەگەڵ حكومەت و نوسینگەی سەرۆك وەزیرانی عیراق، دەستیان بە گفتوگۆ كرد بۆ گەیشتن بە بڕیارێكی تایبەت بە دەستپێكردنەوەی هەناردەی نەوتی هەرێمی كوردستان كە گونجاوبێت، لەگەڵ رێككەوتنە یاساییەكان و بودجەی عیراق، بەڵام بۆیان رونبووەتەوە، وەزارەتی نەوتی عیراق ئامادەنییە گفتوگۆ لەسەر چارەسەرێك بكات و رێز لە گرێبەستی كۆمپانیاكان بگرێت.

راشیگەیاندوە، عیراق هەوڵدەدات رێگەیەك بگرێتەبەر، بەشێوەیەكی تاكلایەنە جێگرەوەیەك بۆ چوارچێوە یاساییەكە و گرێبەستە بەركارەكانیان لەگەڵ حكومەتی هەرێم دابنێت، بەڵام تا پابەندبوون لە حكومەتی عیراقەوە نەبێت، ئامادەنین دەست بە هەناردەكردنەوەی نەوت بكەن.

لە چوارچێوەی جێبەجێكردنی پرۆژەی روناكی كاركردنی 600 مۆلیدەی ئەهلی وەستێنراوە و هاووڵاتیانیش نیگەرانن لە زۆری پارەی كارەبا.

وەزارەتی كارەبای هەرێم رایگەیاند، لە درێژەی جێبەجێكردنی پرۆژەی روناكی بۆ دابینكردنی كارەبای 24 سەعاتی، پرۆژەكە بۆ شەش گەڕەكی تری هەولێر دابیندەكرێت.

ئاماژەی بەوەشكردوە، تائێستا لە هەولێر 26 گەڕەك و 346 هەزار هاووڵاتی لە پرۆژەی روناكی سوودمەندبوون، لە سەرتاسەری هەرێمیش 415 هەزار هاووڵاتی كارەبای 24 سەعاتییان بۆ دابینكراوە، كاركردنی نزیكەی 600 مۆلیدەی ئەهلیش لە 35 گەڕەك وەستێنراون.

ئەوەش لە كاتێكدایە بەشێكی زۆری هاووڵاتیانی هەرێمی كوردستان بەهۆی زۆری نرخەكەی، نیگەرانن لە جێبەجێكردنی پرۆژەی روناكی و داوا دەكەن یان پرۆژەكە رابگیرێت، یاخود نرخەكەی كەمبكرێتەوە، بەشێوەیەك لەگەڵ رەوشی دارایی هاووڵاتییان بگونجێت.

بەپێی پێشبینییەکانی کەشناسی رۆژانی یەکشەممە و دووشەممەی جەژنی رەمەزان باران بارین دەستپێدەکات و پلەکانی گەرماش نزمدەبنەوە.

بەڕێوەبەرایەتی گشتی کەشناسی هەرێم بڵاویکردەوە، سبەینێ ئاسمانى هەرێم نیمچە هەور بۆ هەوری تەواو بێت لە گەڵ هاتنى شەپۆلێکى نمە باران  لە کاتەکانى دوای نیوەڕۆدا، پلەکانی گەرماش نزمدەبنەوە.

ئاماژەی بەوەشکردووە، رۆژی دووشەممە نمە بارانى پچڕ پچڕ و هەورە بروسکە بەردەوام دەبێت بەتایبەت لە ناوچە شاخاویەکان و ناوچەکانى گەرمیان و رۆژهەڵاتى هەرێم, و لە دوای نیوەڕۆوە شەپۆلەکە کۆتایی دێت و پلەکانى گەرما (3-5) پلەى سیلیزى نزم دەبێتەوە بە بەراورد بە پلەکانى گەرمى ئەمڕۆ.

داهاتی نا نەوتی ئەم هەفتەیەی سنوری پارێزگاكانی سلێمانی و هەڵەبجە و هەردوو ئیدارەی گەرمیان و راپەڕین زیاتر لە هەشت ملیار و 727 ملیۆن دینار بووە.

ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی راپەڕین و گەرمیان دەكات، بڵاویكردەوە، داهاتی نانەوتی ئەم هەفتەیە لە رۆژی 22ی مانگ  تاوەكو ئەمڕۆ، زیاتر لە هەشت ملیار و 727 ملیۆن دینار بووە، رێژەی  88%ی داهاتەكە بەشێوەی نەختینە و رێژەی 12%  ش بەشێوەی چەك بووە.

ئاماژەی بەوەشكراوە، داهاتەكە بەراورد بە هەفتەی رابردوو، زیاتر لە 18 ملیار دینار كەمیكردووە كە لەو هەفتەیەدا داهاتی نانەوتی 26 ملیار دینار بووە.

ماڵپەڕی شەفافیەت هەفتانە داهاتی هەر شەش گەنجینەكەی سنوری پارێزگای سلێمانی ئاشكرا دەكات كە لە رێگەی دام و دەزگاكانی حكومەتەوە كۆدەكرێنەوە و بۆ رای گشتی ئاشكرا دەكرێت.

 

کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و بەپێی پێشبینییەکان، نمەباران دەبارێت.

کەشناسیی هەرێم رایگەیاند، ئەمڕۆ هەینی، ئاسمان ساماڵ و پەڵەهەور دەبێت و لە ناوچە سنورییەکانى پارێزگاى هەولێر هەندێکجار دەگۆڕێت بۆ نیمچەهەور، پلەکانی گەرماش 1 بۆ 2 پلەی سیلیزی بەرز دەبنەوە.

ئاماژەی بەوەشکردووە، سبەینێ شەممە، ئاسمان بە گشتى ساماڵ و پەڵەهەور دەبێت. لە ناوچە شاخاوییە سنورییەکانى هەردوو پارێزگاى هەولێر و دهۆک هەندێک کات دەگۆڕێت بۆ هەورى تەواو لەگەڵ کەمێک نمەباران ، پلەکانی گەرماش زیاتر بەرز دەبنەوە بە 1 بۆ 2 پلەی سیلیزی.

بەرزترین پلەکانی گەرمای پێشبینیکراو بە پلەی سیلیزی:

هەولێر : 29  پلەی سیلیزی

سلێمانی : 27 پلەی سیلیزی

دهۆک : 29  پلەی سیلیزی

کەرکوک : 30 پلەی سیلیزی 

زاخۆ  : 30 پلەی سیلیزی

هەڵەبجە : 25 پلەی سیلیزی

سۆران : 28 پلەی سیلیزی

حاجی ئۆمەران :9 پلەی سیلیزی

گەرمیان : 32 پلەی سیلیزی

لە روداوێکی هاتوچۆدا لە هەولێر کەسێک گیانی لەدەستدا و 12 کەسی دیکە بریندار بوون، کە سەرجەمیان یاریزان بوون.

روداوەکە لەدوای سەعات 3ی بەرەبەیانی ئەمڕۆ لەرێگای قەلاتگەی سەر بە شارۆچکەی سێبیران لە سنوری پارێزگای هەولێر رویداوە.

بەپێی زانیارییەکانی کوردسات نیوز، دوو ئۆتۆمبێل کە یەکێکیان لە جۆری تۆیۆتا- پیک ئەپ و ئەوەی دیکە لە جۆری مازدا بووە، هەردووکیان لە یاری تۆپی پێ بوون گەڕاونەتەوە، لە رێگادا کۆنتڕۆڵیان لەدەستداوە و وەرگەڕاون.

لە روداوەکەدا کەسێک بەناوی عەلی سەفین گیانی لەدەستداوە و 12 سەرنشینی دیکە بریندار بوون، کە برینی دووانیان سەختە.

 

کارەبای سلێمانی ئاماری قەرزی کارەبای نیشتمانی هاوبەشانی چەمچەماڵی راگەیاند و ئاماژەی بەوەکردووە، لە کۆی 53 هەزار و 237 هاوبەش، نزیکەی 41 هەزاریان قەرزارن.

کارەبای سلێمانی رایگەیاندووە، لە سنوری بەڕێوەبەرایەتییەكانی دابەشكردنی كارەبای چەمچەماڵ 53 هەزار و 237 هاوبەشی كارەبا هەن، کە هاوبەشی ماڵان، بازرگانی، پیشەسازی، کشتوکاڵی و حکومین. لە کۆی ئەو ژمارەیەش 47 هەزار و 302'یان هاوبەشانی ماڵانن.

ئەوەشی خستووەتە روو، لە ئێستادا 40 هەزار و 924 هاوبەش قەرزاری کارەبان و بەشی زۆریان رێژەی قەرزەکانیان لەنێوان 100 هەزار بۆ 500 هەزار دیناردایە.

بەپێی ئامارەکەی کارەبای سلێمانی بڵاویکردووەتەوە، هەشت هەزار و 422 هاوبەش کەمتر لە 100 هەزار دینار قەرزارن، ئەوانەشی لەنێوان 100 هەزار بۆ 500 هەزار دینار قەرزان زۆرینەن و ژمارەیان 15 هەزار و 983 هاوبەشە.

ئەوەش هاتووە، 12 هەزار و 304 هاوبەشی کارەبا قەرزەکانیان لەنێوان 100 هەزار بۆ یەک ملیۆن دیناردایە، هەروەها چوار هەزار و 122 هاوبەشیش یەک بۆ دوو ملیۆن دینار قەرزارن.

لە ئامارەکەدا، ئەوانەی قەرزەکانیان زیاترە لە دوو ملیۆن دینار 93 هاوبەشن، کە 92'یان لەنێوان دوو بۆ 10 ملیۆن قەرزارن و تەنها یەک هاوبەش سەروو 10 ملیۆن قەرزارە.

 

کەشناسیی هەرێم پیشبینییەکانی کەشوهەوای بۆ ئەمڕۆ و سبەینێ بڵاوکردەوە و ئاماژەی بەوەکردووە، ئاسمان بە گشتی پەڵەهەور بۆ نیمچەهەور دەبێت و پلەکانی گەرما بەرز دەبنەوە.

کەشناسیی هەرێم لە راگەیەنراوێکدا پێشبینییەکانی کەشوهەوای بۆ ئەمڕۆ و سبەینێ راگەیاند و ئاماژەی بەوەکردووە، ئەمڕۆ پێنجشەممە ئاسمان بە گشتى پەڵەهەور بۆ نیمچەهەور دەبێت و پلەکانی گەرما کەمێک بەرز دەبنەوە بەراورد بە تۆمارەکانی دوێنێ .

هاوکات سەبارەت بە کەشوهەوای سبەینێ رایگەیاند، ئاسمان لە نێوان پەڵەهەور بۆ نیمچەهەور دەبێت و لە ناوچە شاخاوییە بەرزەکان بۆ هەورى تەواو دەگۆڕێت، پلەکانی گەرماش بەراورد بە تۆمارەکانی ئەمڕۆ بەرزدەبنەوە .

ئەوەشی خستەڕوو، بەرزترین پلەکانی گەرمای پێشبینیکراو بە پلەی سیلیزی بەم شێوەیە دەبێت:

هەولێر: 27 پلەی سیلیزی

سلێمانی: 25 پلەی سیلیزی

دهۆک: 26 پلەی سیلیزی

کەرکوک: 28 پلەی سیلیزی

زاخۆ :27 پلەی سیلیزی

هەڵەبجە: 25 پلەی سیلیزی

سۆران: 24 پلەی سیلیزی

حاجی ئۆمەران: 16 پلەی سیلیزی

گەرمیان: 29 پلەی سیلیزی

 

 

ئێوارەی ئەمڕۆ لە قەزای ئاکرێ، ئۆتۆمبێلێک لە منداڵێکی سێ ساڵیدا و لە ئەنجامدا منداڵەکە گیانی لەدەستدا.

نێچیرڤان فەخرەدین، بەرپرسی راگەیاندنی تەندروستی ئاکرێ بە کوردسات نیوزی راگەیاند: ئێوارەی ئەمڕۆ لە ناوندی قەزای ئاکرێ ئۆتۆمبێلێک لە مندالێکیدا و گیانی دەستدا.

بەرپرسی راگەیاندنی تەندروستی ئاکرێ ئاماژەی بەوەشدا: منداڵەکە  تەمەنی سێ ساڵە، ناوی 'ئەرژەنگ ئەیاز'ـە و خەلکێ ناوەندی قەزای ئاکرێیە.

لیستی دابەشکردنی موچەی مانگی سێ بڵاوکرایەوە و لە ماوەی سێ رۆژدا سەرجەم وەزارەتەکان موچەی مانگی سێ وەردەگرن.

کەمێک پێش ئێستا وەزارەتی دارایی حکومەتی هەرێمی کوردستان لیستی دابەشکردنی موچەی مانگی سێی بڵاوکردەوە و لە رۆژانی 27 و 28 و 29ــی 3، سەرجەم وەزارەتەکان موچەکانیان وەردەگرن.

وەزارەتی دارایی حکومەتی هەرێم رایگەیاند کە سبەینێ دەست بە دابەشکردنی موچەی مانگی سێ دەکرێت.

لە راگەیەندراوێکدا وەزارەتی دارایی حکومەتی هەرێمی کوردستان رایگەیاند، بڕی 954 ملیار و 880 ملیۆن و 467 هەزار و 779 دینار وەک تەموویلی موچەی مانگی ئازاری موچەخۆران و فەرمانبەران و خانەنشینانی هەرێمی کوردستان، لەلایەن وەزارەتی دارایی حکومەتی فیدراڵەوە خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندی عیراق.

 

کوردسات نیوز پێشتر رایگەیاندبوو کە پارەی موچەی مانگی سێ بۆ هەرێم نێردراوە، هەروەها وەزارەتی داراییش رایگەیاندووە کە سبەینێ دەست بە دابەشکردنی موچەی مانگی سێ دەکرێت.

پەیامنێری کوردسات نیوز باسی لەوە کرد، سوپای تورکیا بەشێک لە هێزەکانی لە سنوری ئامێدی بەرەو سنورەکانی باکوری کوردستان دوور خستووەتەوە، بەڵام هێشتا نازانرێت ئەو هێزانەی دەکشێنێتەوە یان ئامانجی دیکەی لە پشتەوەیە.

پەیامنێری کوردسات نیوز باسی لەوە کرد، سوپای تورکیا بەشێک لە هێزەکانی لە سنوری ئامێدی بەرەو سنورەکانی باکوری کوردستان دوور خستووەتەوە، بە وتەی هاووڵاتیانی دانیشتووی سنورەکەش، لەماوەی چەند ساڵی رابردوودا ئەمە یەکەمجارە هێزەکانی سوپای تورکیا لەبری زیاتر چوونە ناو شارەکە؛ دوور بکەونەوە.

دانیشتوانی ئەو سنورە باس لەوەدەکەن، بەهۆی بوونی هێزەکانی تورکیاوە، نەیاندەتوانی بچنە سەر بەشێکی زەوییەکانی خۆشیان، یان لە وەرزی بەهار بۆ کۆکردنەوەی گژوگیای بەهارە بچنە بناری شاخەکان، بۆیە ئەگەر دوورکەوتنەوەی ئەو هێزانە کشانەوە بێت، ئەوا دڵخۆشییان دەکات.

هێشتا بە روونی نازانرێت سوپای تورکیا هێزەکانی کشاندووەتەوە یان تەنها جوڵەیان پێدەکات و لە دواتردا پلانی دیکەی دەبێت، بەڵام ئەوەی کە هەیە ئەوەیە، ماوەی چەند ساڵێکە بەشێکی هێزەکانی لە سنوری ئامێدی و چەند گوندێکی دیکەی سنوری پارێزگای دهۆک جێگیر کردووە، بە جۆرێک لە ئامێدی خاڵە سەربازییەکانی چەند سەت مەترێکی کەم لە ماڵی هاووڵاتییانەوە دوور بوون.

بەپێی زانیارییەكانی كوردسات نیوز، لە ئێستادا سوپای توركیا لە ناوچەكانی دێرەلوك و گوهەرزێ و چەند ناوچەیەكی دیكەی زنجیرە چیای مەتینا بە ئاڕاستەی باكوری كوردستان رۆیشتوون.

لە ئێستادا بەهۆی ئەوەی پرسی پرۆسەی ئاشتیی لە ئارادایە و لەلایەکی دیکەوە ماوەی تەنها چوار مانگە کۆتایی بە حوکمی بەشار ئەسەد هاتووە لە سوریادا، هەروەها گۆڕانکاری لە چەند پرسێکی سیاسیدا رویانداوە و دۆخی رۆژهەڵاتی ناوەڕاستیش بەگشتی جیاوازە لە ساڵانی رابردوو، بۆیە فشارێکی نێودەوڵەتی بە گشتیی لەسەر وڵاتانی رۆژهەڵاتی ناوەڕاست و بەتایبەت تر ئەو وڵاتانە هەیە کە شەڕ یان مشتومڕی سیاسییان تێدایە.

ئەگەرچی بەهۆی ئەو رووداوانەی لەو دواییانەدا لە تورکیا روویان داوە ئەویش بەدەر نییە لەو فشارانە، بەڵام لە رووی پرسەکانی پەیوەست بە هەرێمی کوردستانەوە، بەڵام هێشتا تورکیا بۆردومانەکانی لە چەند ناوچەیەکی ناو خاکی هەرێمی کوردستان بەردەوامە، بۆیە ئەو جوڵەیەی بە سەربازەکانی کردووە لە سنوری ئامێدی، هێشتا نا روونە و هۆکارەکەی دیار نییە.

سەرچاوەیەک لە وەزارەتی دارایی فیدڕاڵ بە کوردسات نیوزی راگەیاند: بڕی زیاتر لە 954 ملیار دینار خرایە سەر هەژماری بانکی وەزارەتی دارایی هەرێم.

پەیامنێری کوردسات نیوز راگەیاند، بەغداد موچەی مانگی سێی رەوانەی هەرێم کرد و بڕیارە لە ئەمرۆوە یاخود سبەینێ دەست بەدابەشکردنی موچە بکرێت.

هاوکات سەرچاوەیەکیش لە وەزارەتی دارایی هەرێم بە کوردسات نیوزی راگەیاند: ئەمڕۆ لیستی موچە رادەگەیەنرێت و دەست بە دابەشکردنی موچە دەکرێت.

جێگەی ئاماژەیە بەشێکی زۆری خانەنشینانی  هەرێم لە بەیانی ئەمڕۆوە لە بەردەم بانکەکانی هەرێم لە چاوەڕوانی خەرجکردنی موچەکانیان.

بافڵ جەلال تاڵەبانی، سەرۆکی یەکێتیی نیشتمانیی کوردستان دوایی سەردانی کردنی شاری کەرکوک  لە تۆڕی کۆمەلاتیەتی فەیسبووک راگەیەنراوێکی بڵاوکردوەتەوە و دەڵێت: جەخت لە پاراستنی پێکەوەژیانی ئاشتییانە لە کەرکوک و پابەندبوون بە زامنکردنی مافی هەمووان دەکەینەوە.

بافڵ جەلال تاڵەبانی، سەرۆکی یەکێتیی نیشتمانیی کوردستان بە یاوەری د. هاوڕێ شێخ دارۆ، ئەندامی مەکتەبی سیاسی و جەلال شێخ ناجی، سەرۆکی ئاژانسی پاراستن و زانیاری/زانیاری سەردانی شاری کەرکوکی کرد و لەلایەن رەفعەت عەبدوڵا، ئاسۆ مامەند و رزگار حاجی حەمە، ئەندامانی مەکتەبی سیاسی و رێبوار تەها، پارێزگاری کەرکوک و ژمارەیەک لە ئەندامانی سەرکردایەتی و هەڤاڵانی یەکێتییەوە بە گەرمی پێشوازیلێکرا.

لە یەکەم وێستگەی سەردانەکەیدا بۆ کەرکوک، سەرۆک بافڵ جەلال تاڵەبانی کە مەبەست لێی بەدواداچوون بوو بۆ جێبەجێکردنی بەڵێنەکانی یەکێتی و دانانی پارێزگار کە لە کاتی هەڵبژاردندا بە کەرکوکییەکان درابوو لە بارەگای مەکتەبی سیاسی لەگەڵ زانایان و مامۆستایانی پایەبەرزی ئایینیی کەرکوک کۆبووەوە.

سەرۆک بافڵ رۆڵی بەرچاوی زانایان و مامۆستایانی ئایینی بەرز نرخاند لە پاراستنی بەهابەرزەکان و ئاشتی کۆمەڵایەتی و بەهێزکردنی گیانی برایەتی و رایگەیاند، یەکێتی هەمیشە بە چاوی رێز و پڕبەهاوە لە مامۆستایانی ئایینی دەڕوانێت کە لە بوارە جیاجیاکاندا خزمەت دەکەن و بەشێکی گرنگن لە هۆشیارکردنەوەی کۆمەڵگە.

بافڵ جەلال تاڵەبانی ستراتیژی یەکێتی لە کەرکوک روونکردەوە و گوتی، لەم شارە خۆشەویستە ستراتیژمان بەشداریی هەموو نەتەوە و پێکهاتەکانە لە بەڕێوەبردندا و جەخت لە پاراستنی پێکەوەژیانی ئاشتییانە لە کەرکوک و پابەندبوون بە زامنکردنی مافی هەمووان دەکەینەوە.

هەر لە درێژەی سەردانەکەیدا بۆ کەرکوک، سەرۆکی یەکێتیی نیشتمانیی کوردستان سەردانی ناوشار و چەند شوێنێکی جیای کرد و چاویکەوت بە کەرکوکییەکان و گەنجانی شارەکە و لە نزیکەوە گفتوگۆی لەگەڵدا کردن لەبارەی ئیدارەی نوێ و خزمەتگوزاری لە شارەکە و پێداویستی خەڵک و ئەو کێشانەی کە رووبەڕوویان دەبێتەوە.

سەرۆک بافڵ بە کەرکوکییەکانی گوت، بە سیاسەتی چەپکە گوڵەکەی مام ئیدارەی کەرکوک دەدەین و خزمەتی دەکەین، هەر بۆیە ئیدارەی نوێ و پارێزگار لە ماوەیەکی کەمدا توانییان لە هەموو رووەکانەوە خزمەتی بەرچاوی شارەکە بکەن و حکومەتی خۆجێییان خستە خزمەت خەڵکی خۆشەویستی کەرکوک.

بافڵ جەلال تاڵەبانی لە درێژەی قسەکانیدا سوپاسی رێبوار تەها، پارێزگاری کەرکوکی کرد و پشتیوانی خۆی بۆ دووپاتکردەوە و گوتی، لای ئێمە کەرکوک قودسی کوردستانە و هەر بەوجۆرە دەمێنێتەوە، هەمیشە خزمەتکردنی کەرکوک کاری لەپێشینەمانە، چونکە کەرکوکییەکان شایەنی هەموو خزمەتێکن.

بەڕێوەبەرایەتی گشتیی حەج و عومرەی هەرێم رایگەیاند، عومرەکارێکی کورد لە  مەککە کۆچی دوایی کرد، کە ئەمە چوارەم عومرەکاری کوردە لە مانگی رەمەزاندا گیان لەدەست بدات.

بەڕێوەبەرایەتی گشتیی حەج و عومرەی هەرێم رایگەیاند، ‎دوێنی سێشەممە، هاووڵاتی 'ئازاد رەحیم کریم باجەلان' دانیشتووی ئیدارەی سەربەخۆی گەرمیان، دوای بەجێگەیاندنی سونەتی عومڕە دوێنی شەو لە شاری مەککە کۆچی دوایی کرد.

ئاماژەی بەوەشکردووە، ‎ئەم عومرەکارە تەمەنی ٤٨ ساڵە و پێشتر هیچ نەخۆشییەکی نەبووە،  بە ئۆتۆمبیلی خۆی گەشتی عومرەی کردووە، بەڵام بە شێوەیەکی کتوپڕ لە شاری مەککە کۆچی دوایی کردووە، هەر لە شاری مەککەش بە خاک سپێردراوە.

ئەوەشی خستووەتە روو، ئەمە دەیەم عومرەکاری کوردستانە، کە لە سەرەتای ئەمساڵەوە لە مەککە گیانیان لەدەستدابێت.

کارەبای سلێمانی نرخی کارەبای موەلیدەی سیتییەکانی بۆ مانگی رابردوو بڵاوکردەوە و بەپێی راگەیەنراوەکە، هەر کیلۆواتێک بە 268 دینار دیاری کراوە.

کارەبای سلێمانی رایگەیاند، ئەمڕۆ چوارشەممە، لیژنەی باڵای دیاریکردنی نرخی کارەباى کۆمەڵگاکانى نیشتەجێبوون (ستییەکان) کۆبوونەوەیەکی ئەنجام دا و تیایدا، نرخی هەرکیلۆواتێکی  کارەبای موەلیدەی بە 268 دینار دیاری کرد.

ئاماژەی بەوەشکردووە، هاوكات بۆ ئەو ستییانەش كە تاكە سەرچاوەی كارەبایان موەلیدەیە و كارەبای نشتمانیان نییە نرخی كیلۆواتێک بە 240 دینارە.

داواش دەکات، سەرجەم ستیيەکانی سنوری پارێزگای سلێمانی پابەند بن بە نرخەکەوە، بەپێچەوانەوە ئەگەر زیاتر لەو نرخە وەربگرن رووبەڕووی رێکاری یاسایی دەکرێنەوە.