کوردستان
بڕیارە سبەینێ مەكتەبی سیاسی یەكێتیی نشتیمانیی كوردستان بەسەرپەرشتی بافڵ جەلال تاڵەبانی كۆببێتەوە و تاوتوێی چەند تەوەرێكی گرنگ بكات.
سەعدی ئەحمەد پیرە وتەبێژی یەكێتی بە كوردسات نیوزی راگەیاند، كۆبوونەوەكە تایبەتە بە تاوتوێكردنی چەند تەوەرێكی گرنگی پەیوەست بە هەرێمی كوردستان و عیراق.
پەیامنێری كوردسات نیوز زانیویەتی گرنگترین تەوەرەكانی كۆبوەنەوەكەی مەكتەبی سیاسی یەكێتی خۆی دەبینێتەوە لە هەڵسەنگاندن بۆ ئەو دەرەنجامانەی كە هەردوو وەفدی دانوستانكاری یەكێتی و پارتی لە بارەی پێكهێنانی كابینەی نوێی حكومەتی هەرێم لە ماوەی رابردوودا پێی گەیشتوون، هەروەها مانگرتنی مامۆستایان و فەرمانبەرانی سلێمانی و هەوڵەكانی نێوان هەرێم و بەغداد بۆ چارەسەركردنی كێشەی موچەی فەرمانبەرانی هەرێم، بەشێكی دیكەی گفتوگۆكانی نێو كۆبوونەوەكەی مەكتەبی سیاسی یەكێتی دەبێت.
سبەینێ شەپۆلێکی باران بارین هەرێمی کوردستان دەگرێتەوە، وەزارەتی گواستنەوەو گەیاندنیش بڵاویکردوەتەوە، لەشاری سلێمانی ئەگەری بەفر بارین هەیە.
وەزارەتی گواستنەوەو گەیاندنی هەرێم بڵاویکردەوە، پێشبینی دەکرێت سبەی ڕۆژی شەممە شەپۆلێکی کورت خایەنی باران بارین، لە کاتەکانی بەرەبەیان باکوری رۆژئاوای هەرێم و بەشێک لە ناوچەکانی دەشتی هەولێر و کەرکوک و خورماتوو و بەشێک لە ناوچەکانی گەرمیان بگرێتەوە.
ئاماژەی بەوەشکردوە، ئەو شەپۆلی باران بارینە لە کاتەکانی ئێوارەدا ناوچەکانی سلێمانی و هەڵەبجەش دەگرێتەوە.
وەزارەتی گواستنەوەو گەیاندن راشیگەیاندوە، لە هەندێ ناوچە ئەگەری بارینی (تێکەڵەی بەفر و باران) هەیە، بەتایبەت شاری سلێمانی و بەشێک لە ناوچە شاخاویەکانی باکوری رۆژهەڵاتی هەرێم.
لە رۆژی 16ـی ئەم مانگەوە، كاركردن بە سیستمی پارەدانی كاش، لە سەرجەم فەرمانگەكانی كارتی نیشتمانی سلێمانی و هەڵەبجە رادەگیرێت و كار بە پارەدانی ئەلیكترۆنی دەكرێت.
بەڕێوەبەرایەتی رەگەزنامە و باری شارستانی سلێمانی لە ئاگادارییەكدا بڵاویكردەوە، لە رۆژی 16ـی ئەم مانگەوە، لە سەرجەم فەرمانگەكانی كارتی نیشتمانی سنووری پارێزگای سلێمانی و هەڵەبجە، كار بە سیستمی پارەدانی ئەلیكترۆنی دەكرێت.
ئەوەشی خستووەتەڕوو، هەر هاووڵاتییەك سەردانی فەرمانگەكانی كارتی نیشتمانی بكات، پێویستە خاوەنی كارتی بانكی بێت، بەپێچەوانەوە هیچ كارێكی بۆ رایی ناكرێت.
فڕۆکە بێفڕۆکەوانەکانی تورکیا، خانوی هاووڵاتییەکی مەدەنییان لە گوندی مژێ لە قەزای ئامێدی بۆردوومانکرد
کامەران عوسمان، ئەندامی تیمی کوردستانی رێکخراوی CPTی نێودەوڵەتی رایگەیاند: دوانیوەڕۆی ئەمڕۆ سەعات 3:40 خولەک، فڕۆکە بێفڕۆکەوانەکانی تورکیا, بۆردوومانی خانوی هاووڵاتییەکی مەدەنییان لە (گوندی مژێ)ی بەری گارە لە قەزای ئامێدی کردووە.
ئاماژەی بەوەشکرد، تاوەکو ئێستا زیانە گیانییەکانی ئەو بۆردوومانە نەزانراوە.
لە 15ی حوزەیرانی ساڵی رابردووەوە، سوپای تورکیا ئۆپەراسیۆنی بۆسەر گوندەکانی دەڤەری نهێلێ و بەری گارا و بەشێک لە گوندەکانی بەرواری باڵا دەستپێکردووە، جێی ئاماژەیە گوندەکانی مژێ، کەفنە مژێ، سپیندارێ و گرگاشێ، لەگەڵ دەستپێکی ئۆپەراسیۆنەکەی سوپای تورکیادا لەلایەن دانیشتوانەکەیەوە چۆڵکراون.
دەزگای ئاسایشی هەرێم دەستگیرکردنی ئەو کەسەی راگەیاند کە بووە هۆی وەرگەرانی ئۆتۆمبێلێک لە رێگای پێنجوێن-سلێمانی و گیان لەدەستدانی شۆفێری ئۆتۆمبێلەکە.
لە راگەیەندراوێکدا دەزگای ئاسایشی هەرێم رایگەیاندوە، هۆکاری روداوەکەی شەوی 5-2-2025 کە بووە هۆی گیان لەدەستدانی شۆفێری ئۆتۆمبێلێک و برینداربوونی یەکێک لە سەرنشینانی، دروستبوونی شەڕ و دەمەقاڵێ بووە لەنێوان دوو شۆفێردا لە ناحیەی ناڵپارێز.
ئاماژەی بەوەشداوە، لەپاش بریندارکردنی یەکێکیان بە چەقۆ، تۆمەتبار شوێنیان دەکەوێت و دەبێتە هۆی وەرگەڕان و گیان لەدەستدانی شۆفێرەکە و برینداربوونی یەکێک لە سەرنشینانی ئۆتۆمبێلەکە.
ئەوەش هاتووە، تۆمەتباردوای روداوەکە هەڵهاتووە و لە پاش بەدواداچونەکانی دەزگای ئاسایشی هەرێم دەستگیرکراوە و لە ئێستادا لێکۆڵینەوە لە کەیسەکەی بەردەوامە.
ئەمڕۆ وەفدێكی ئەنجومەنی نوێنەرانی عیراق سەردانی مانگرتووانی سلێمانی دەكات و ئەنجومەنی سەرتاسەریی مامۆستایان و فەرمانبەرانی ناڕازییش دەڵێت، یەكشەممە بۆ پشتیوانی لە مانگرتووان دەرۆن بۆ هەولێر.
ئەمڕۆ 11 رۆژە بەشێك لە مامۆستایان و فەرمانبەران لە سلێمانی، دژی جێبەجێ نەكردنی داواكارییەكانیان مانیان لە خواردن گرتووە، تائێستاش حكومەت و لایەنی پەیوەندیدار وەڵامی داواكارییەكانی نەداونەتەوە، مانگرتوانیش دەڵێن، بەردەوام دەبن تا وەڵام وەردەگرن.
كاروان یاروەیس ئەندامی ئەنجومەنی نوێنەرانیش رایگەیاند، ئەمڕۆ وەفدێكی باڵای ئەنجومەنی نوێنەران، سەردانی خێمەی مانگرتوان لە سلێمانی دەكات.
هاوكات ئەنجومەنی سەرتاسەریی مامۆستایان و فەرمانبەرانی ناڕازیی لە راگەیەنراوێكدا ئاماژەی بۆ ئەوەكردووە، داوایان لە مامۆستایانی ئایینی كردوە لە وتاری هەینیدا پشتیوانیی بۆ مانگرتوان دەرببڕن.
هەروەها سەعات 2ـی دوای نیوەڕۆی ئەمڕۆش لە پاركی مەلیك مەحمودەوە بەخۆپیشاندان بەرەو خێمەی مانگرتوان دەڕۆن و رۆژی یەكشەممەش لەگەڵ مانگرتوان بەرەو هەولێر دەڕۆن.
پۆلیسی توركیا رۆژنامەنوسێكی لە مێردینی باكوری كوردستان دەستگیركرد و دەستیشی بەسەر كەلوپەلە رۆژنامەوانیەكەیدا گرت.
بەرەبەیانی ئەمڕۆ پۆلیسی توركیا هەڵیكوتایە سەر ماڵی رۆژنامەنووس (ئۆزنور دێگەر) لە ناحیەی قۆسەری سەر بە شاری مێردین و دەستگیریان كرد، بەپێی زانیارییەكان لە كاتی دەستگیركردنیدا لەلایەن پۆلیسی توركیاوە ئەشكەنجە دراوە و دەرگای ماڵەکەشی شکێنراوە.
هەروەها دوای پشكنینی ماڵەكەی، پۆلیس دەستی بەسەر ئامێرە تەكنیكییەكانی رۆژنامەنووسەكەدا گرت و لە بنكەی پۆلیسی شارەكە لێكۆڵینەوەیان لەبارەوە دەكرێت.
کۆمەڵەی ڕۆژنامەنووسانی ژنانی میزۆپۆتامیا سەبارەت بەو پرسە ڕاگەیەندراوێکی بڵاوکردەوە و ڕایگەیاند: "ئێمە سیستەمێک قبوڵ ناکەین کە سزای بکەرانی سوکایەتییەکە نەدات، بەڵکو سزای ئەو ڕۆژنامەنووسە بدات کە سووکایەتی پێدەکرێت". "ئێمە لەگەڵ هاوڕێکەمانداین."
ئەمڕۆ هەینی 15 كامێرای چاودێریكردنی تیژڕەوی لەناو شاری هەولێر بۆ تۆماركردنی سەرپێچی شۆفێران دەخرێنەكار.
بەڕێوەبەرایەتیی هاتوچۆی هەولێر لە راگەیەنراوێكدا ئاماژەی بەوەكردووە، ماوەی 10 رۆژە بەشێوەی ئەزموونی 15 كامێرا كاردەكەن و رۆژی هەینی دەستدەكەن بە تۆماركردنی سەرپێچییەكان.
بە پێی راگەیەندراوەكە، نەوەستان لە گلۆپی سوری ترافیكلایت، لێخورین بە خێرایی زیاتر لەو خێراییەی كە رێگەی پێدراوە، تێپەڕاندنی هێڵی پەڕینەوەی پیادە، ئەو ئۆتۆمبێلانەی لە رێڕەوی كراوەی سووڕانەوەی دەستەڕاستی ترافیكلایتەكان دەوەستن، بە سەرپێچی دادەنرێت.
بافڵ جەلال تاڵەبانی، سەرۆكی یەكێتیی نیشتمانیی كوردستان لەگەڵ نوێنەری تایبەتی سەرۆكی روسیا بۆ كاروباری رۆژهەڵاتی ناوەڕاست و ئەفریقا كۆبوویەوە.
سەرۆكی یەكێتی لە بارەگای مەكتەبی سیاسی لە هەولێر پێشوازی لە وەفدێكی باڵای روسیا بە سەرۆكایەتیی میخائیل بۆگدانۆف، نوێنەری تایبەتی سەرۆكی روسیا بۆ كاروباری رۆژهەڵاتی ناوەڕاست و ئەفریقا و جێگری وەزیری دەرەوەی ئەو وڵاتە كرد.
لە دیدارەكەدا بافڵ جەلال تاڵەبانی پەرۆشی یەكێتی دووپاتكردووە بۆ فراوانكردنی ئاسۆی هاریكارییەكان و هەماهەنگییەكان كە خزمەت بە سەقامگیری لە ناوچەكەدا بكات.
هەر لەوبارەیەوە سەرۆكی یەكێتی ستراتیژی حزبەكەی بۆ كۆی پرسەكان خستەڕوو و رایگەیاند، ویستی یەكێتی دیدگایەكی بەرپرسیارانە و دەربەستە بە چارەسەركردنی ئاشتییانەی كێشەكان و بوونی پەیوەندی هاوسەنگە لە نێوان هەموو جەمسەر و لایەنەكان تا بتوانن وڵاتەكە لە شەڕ و ناكۆكییەكان بپارێزن.
ئارام فەتاح خەراجیانی، یاریزانی لەشجوانی ئەمڕۆ لەگەڵ وریا حەمەکەریمی ڕۆژنامەنوسدا لەڕوداوی هاتوچۆکەی ڕێگەی عەربەت-سلێمانی گیانی لەدەستدا.
ئارام خەراجیانی پاڵەوانێکی لەشجوانی ئاست بەرزبوو، کە خاوەنی چەندین دەستکەوت و نازناوبوو لە ئاستی ناوخۆ و نێودەوڵەتیی.
ئارام، سەر لەبەیانی ئەمڕۆ، لە رووداوێكی هاتوچۆدا لە هەمان شوێنی رۆژنامەنووس و پێشكەشكار وریا حەمە كەریم، گیانی لەدەستدا.
پۆلیسی هاتوچۆی عەربەت رایگەیاند، وریا حەمە كەریم ئۆتۆمبێلەكەی وەستاندوە و ویستویەتی هاوكاریی مامۆستا ئارام بكات، لەو كاتە بارهەڵگرێك خۆی بە ئۆتۆمبێلی هەردووكیاندا كێشاوە و گیانیان لەدەستداوە، شۆفێری بارهەڵگرەكەش كە ئێرانییە، بریندار بووە و لە نەخۆشخانەیەكی سلێمانییە.
بافڵ جەلال تاڵەبانی سەرۆکی یەکێتیی نیشتیمانیی کوردستان، بەبۆنەی 31 ساڵەی راگەیاندنی یەکگرتووی ئیسلامی کوردستانەوە، پەیامێکی پیرۆزبایی ئاراستەی ئەو حیزبە کردو تیایدا ستایشی ئەو رۆڵە میانڕەوانەی یەکگرتووی ئیسلامی کرد و هیوای بەردەوامبوونی بۆ خواستن لەسەر ئەو رێچکەیە.
دەقی پەیامەکەی سەرۆکی یەکێتیی نیشتمانیی کوردستان:
بەڕێز مامۆستا سهڵاحهدین محەمەد بههادین، ئەمیندارى گشتیی یهكگرتووى ئیسلامى كوردستان
بەڕێزانمان لە سەرکردایەتی و برایان و خوشکانمان لە یەکگرتووی ئیسلامی کوردستان.
سڵاوی خودای گەورەتان لێبێت.
بەبۆنەی سی و یەکەمین ساڵەی راگەیاندنی یەکگرتووی ئیسلامی کوردستانەوە، لەدڵەوە پیرۆزبایی گەرمتان ئاڕاستەدەکەین و هیوادارم رۆڵی میانڕەوانەی یەکگرتووی ئیسلامی کوردستان بەردەوام بێت لە پێناو بەهێزترکردنی قەوارەی هەرێم و بەدیهێنانی ئامانجە باڵاکانی گەلەکەمان.
لەم دەرفەتەدا بەڕێزو پێزانینەوە لە رۆڵی جەنابتان و یەکگرتووی ئیسلامیی کوردستان دەڕوانین، وەک هێزێکی کاریگەریی گۆڕەپانی سیاسی لەهەرێم، کە هەمیشە بەشێک بوون لە یەکڕیزی و یەکخستنی ماڵی کورد و تەبایی و برایەتی نێوان پێکهاتەکانی کوردایەتی.
پەرۆشی یەکێتیی نیشتمانیی کوردستان دووپاتدەکەمەوە لە گەشەپێدانی پەیوەندییەکانمان و کارکردنی پێکەوەیی لەپێناو سەرخستنی هەنگاوەکان بۆ هێنانە کایەی حکومڕانییەکی تەندروست و خزمەتگوزار و چارەسەرکردنی کێشەکان و دابینکردنی ژیانێکی شایستەتر بۆ خەڵکە خۆشەویستەکەمان.
هەر شاد و سەربەرزو سەرکەوتووبن
بافڵ جەلال تاڵەبانی سەرۆکی یەکێتیی نیشتمانیی کوردستان
قوباد تاڵەبانی لەگەڵ پارێزگاری کەرکوک و ئەندامانی ئەنجومەنی پارێزگا کۆبووەوە و رایگەیاند؛ ئەم ئیدارە نوێیەی کەرکوک هەڵەی ئیدارەکانی پێشوو دووپات ناکاتەوە و هەوڵی بەهێزکردنی پێکەوەژیانی نێوان پێکهاتەکان دەدات.
لە کۆبوونەوەکەدا جێگری سەرۆکوەزیران پشتیوانی خۆی بۆ ئیدارەی نوێی کەرکوک و ئەنجومەنی پارێزگای کەرکوک دووپاتکردەوە و دەستخۆشی لە پارێزگار و ئیدارەی نوێی کەرکوک کرد کە لە ماوەیەکی کورتدا توانیویانە هەنگاوی زۆر گرنگ بنێن لە خزمەتکردنی هاوڵاتییانی کەرکوک وەک پاککردنەوەی کۆڵان و شەقامەکان و دانانی بەردی بناغەی چەندین پڕۆژەی گرنگ.
قوباد تاڵەبانی ئاماژەیدا بە دۆخی تایبەتی کەرکوک و وتەی سەرۆک مام جەلالی بیرهێنایەوە کە هەمیشە کەرکوکی وەک شاری برایەتی پێناسە دەکرد و رایگەیاند ئەم ئیدارە نوێیەی کەرکوک خۆشبەختانە هەڵەی ئیدارەکانی پێشوو دووپات ناکاتەوە و هەوڵی بەهێزکردنی پێکەوەژیانی نێوان پێکهاتەکان دەدات و بەبێ جیاوازی خزمەتی هەموو کەرکوکییەکان دەکات. هەر لەم چوارچێوەیەدا داوایکرد ئیدارە نوێی کەرکوک رۆژ لە دوای رۆژ بە هەنگاوەکانی لە خزمەتکردنی بێ جیاوازیی هاوڵاتییان زیاتر بیسەلمێنێت کە بە کردار حکومەتی هاوڵاتییانە.
جێگری سەرۆک وەزیران باسی لەوەشکرد کە بەداخەوە لە چەند ساڵی رابردوودا بە هۆکاری جۆراوجۆر وەک پێویست خزمەتی کەرکوک نەکراوە و پڕۆژەی خزمەتگوزاری و وەبەرهێنان لە شارەکە جێبەجێ نەکراوە. جەختیشی کردەوە کە ئەم ئیدارە نوێیەی کەرکوک پێویستە هانی وەبەرهێنەران بدات و ئاسانکارییان بۆ بکات بۆ وەبەرهێنان لە شارەکەدا و هەروەها هەوڵ بدات گرنگی بە سەوزکردن و باشترکردنی دۆخی ژینگەی کەرکوک بدات و پڕۆژەی خزمەتگوزاری زیاتریش لە شارەکەدا جێبەجێ بکات.
هەر لەم چوارچێوەیەدا داوایکرد حکومەتی فیدرال لەرووی دابینکردنی بودجەی پێویستەوە هاوکاری ئیدارەی نوێی کەرکوک بکات.
لە هەردوو کۆبوونەوەکەدا گفتوگۆکرا لەبارەی بڕیارەکەی دادگای فیدراڵی کە بە فەرمی دانی نا بە ئەنجومەنی پارێزگا و ئیدارەی نوێی کەرکوکدا. لەم بارەیەوە قوباد تاڵەبانی داوایکرد ئەو لایەنانەی کە تا ئێستا بایکۆتی پڕۆسەکەیان کردوە، بگەڕێنەوە بۆ ناو ئەنجومەنی پارێزگا و دەنگی ئەو هاوڵاتییانە بگەیەنن کە لە هەڵبژاردنەکاندا دەنگیان پێداون.
وەزارەتی پێشمەرگە پلە بەرزكردنەوەی زیاتر لە هەشت هەزار پێشمەرگەی راگەیاند.
وەزارەتی پێشمەرگەی حكومەتی هەرێمی كوردستان لە فەرمانێكی وزاریدا رایگەیاندوە، پشت بەست بە ماددەی چوای ژمارە 6 ی ساڵی 2011 ی سیستمی راژە و خانەنشینی بڕیاریداوە بە پلە بەرزكردنەوەی فەرمانبەرانی.
لە فەرمانەكەی ئاماژەی بە پلەبەرزكردنەوەی هەشت هەزار و 168 پێشمەرگەی سەر بە دیوانی وەزارەت و لیواكان كردووە.
ئەوەش لەكاتێكدایە، لە حكومەتی هەرێمی كوردستان لە مانگی 1ی ساڵی 2016ەوە پلەبەرزكردنەوەی فەرمانبەرانی راگرت.
توركیا بۆردومانی چەند ناوچەیەكی شاربازێر دەكات و پاسەوانی سنوریش دەڵێت زیانەكانی بۆردومانەكە بەهۆی كەشوهەواوە نەزانراوە.
سەرچاوەیەك لە پۆلیسی پاسەوانی سنور بە كوردسات نیوزی راگەیاند، پێشنیوەڕۆی ئەمڕۆ توركیا بە چڕی بۆردوومانی سنوری ماوەت و گوندی گەڵاڵەی كردووە تا ئێستا زیانەكانی بۆردومانەكە دیار نییە.
كامەران عوسمان؛ لێپرسراوی بەشی مافی مرۆڤی رێكخراوی CPT ئەمریكی رایگەیاندوە؛ لە سەعات 10:47 خولەكی پێشنیوەڕۆ ، فڕۆكە جەنگییەكانی سوپای توركیا بە چڕی بۆردوومانی (دۆڵی ژاژۆلان، كوێرەكانی و كێوی كوڕیس)یان لە دەووروبەری گوندی گەڵاڵەی سەر بە قەزای ماوەت كردوە.
پەیامنێری كورسات لە زاری پاسەوانی سنور ئاماژەی بەوە كردوە هەرچەندە بۆردومانەكانی توركیا لە دەوروبەری گەڵاڵە چڕبوون بەڵام بەهۆی رەوشی كەش و هەواوە ئاستی زیانەكان نەزانراون.
بافڵ جەلال تاڵەبانی؛ سەرۆکی یەکێتیی نیشتمانیی کوردستان بۆ کۆچیدوایی رۆژنامەنووس "وریا حەمەکەریم " پرسەنامەیەکی بڵاوکردەوە و رایگەیاند؛ لەدڵەوە نیگەران و غەمباربووم بە کۆچیدوایی ناوەختی کاک وریا کە لە رووداوێکی دڵتەزێندا گیانی سپارد.
دەقی پرسەنامەکە...
لەدڵەوە نیگەران و غەمباربووم بە کۆچی دوایی ناوەختی رۆژنامەنووس کاک (وریا حەمەکەریم) کە لە رووداوێکی دڵتەزێندا گیانی سپارد.
بۆ ئەم خەمە گەورەیە پرسە و سەرەخۆشی قووڵی خۆمان بە کەسوکار و بنەماڵە و خانەوادە سەربەرز و قوربانی بەخشەکەیان و رۆژنامەنووسان و هاوڕێیانی دەکەم و بەشداریی ماتەمیانم.
لەخوای گەورە داواکارین گیانی رۆژنامەنووسی بە ئەزموون و خۆشەویست کاک وریا بە بەهەشتی بەرین شادبکات، سەبووری و ئارامی بەهەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
بەرەبەیانی ئەمڕۆ لە رووداوێكی هاتوچۆدا رۆژنامەنووس و پێشكەشكار وریا حەمە كەریم و مامۆستایەكی هۆڵی لەشجوانی گیانیان لەدەستدا.
پەیامنێری كوردسات نیوز رایگەیاند، بەیانی ئەمڕۆ بارهەڵگرێك لەسەر رێگای عەربەت-سلێمانی كۆنتڕۆڵی لەدەستدا و خۆی كێشاوە بە دوو ئۆتۆمبێلدا و بەهۆیەوە رۆژنامەنووس و پێشكەشكار وریا حەمەكەریم و ئارام فەتاح مامۆستای هۆڵی لەشجوانی گیانیان لەدەستدا.
پۆلیسی هاتوچۆی عەربەت رایگەیاند، وریا حەمە كەریم ئۆتۆمبێلەكەی وەستاندوە و ویستویەتی هاوكاریی مامۆستا ئارام بكات، لەو كاتە بارهەڵگرێك خۆی بە ئۆتۆمبێلی هەردووكیاندا كێشاوە و گیانیان لەدەستداوە، شۆفێری بارهەڵگرەكەش كە ئێرانییە، بریندار بووە و لە نەخۆشخانەیەكی سلێمانییە.