کوردستان
پۆلیسی گەرمیان لەبارەی ونبوونی گەنجێک لە گەرمیان راگەیەنراوێکی بڵاوکردەوە و تێیدا هاتووە: لە ئەنجامی گەڕان و پشکنینەکان، تەرمی گەنجە ونبووەکە لە گوندی کۆکز دۆزرایەوە.
گەنجەکە ناوی (توانا وەلی)ـیە و تەمەنی 21 ساڵە، خێزاندارە و خاوەنی منداڵێکە.
عەقید سۆران محەمەد غەریب، وتەبێژی پۆلیسی گەرمیان رایگەیاند: ئەو گەنجەی چەند رۆژێک بوو دیار نەما بوو، تەرمەکەی لە گوندی 'کۆکز' دۆزرایەوە.
وتەبێژی پۆلیسی گەرمیان ئاماژەی بەوەداوە: دوای ئەوەی هەواڵی دیارنەمانی ئەو گەنجە گەیشتە پۆلیسی گەرمیان، هێزەکانی پۆلیسی ناحیەی کۆکز دەستبەجێ چوونە سەر شوێنی روداوەکە و دەستیان بە لێکۆڵینەوە کرد.
بەپێی زانیارییەکانی وتەبێژی پۆلیسی گەرمیان، لە ئەنجامی گەڕان و پشکنینەکان، تەرمەکەی لە گوندی کۆکز دۆزرایەوە، ئێستا لێکۆڵینەوە لەسەر هۆکار و وردەکارییەکانی روداوەکە بەردەوامە.
وەزارەتی سامانە سروشتییەكان پێنج بڕیاری بۆ چارەسەركردنی كێشەی كەمی بەنزین لە سەرتاسەری هەرێمی كوردستان دەركرد، دیارترینیان زیادكردنی بڕی بەنزینی نۆرماڵی 750 دیناری.
بە سەرپەرشتی كەمال محەمەد، وەزیری سامانە سروشتییەكانی هەرێم بە وەكالەت، كۆبوونەوەیەكی نەوت و كانزاكانی وەزارەت بەڕێوەچوو و تێیدا بۆ چارەسەركردنی كێشەی كەمی و هاوسەنگكردنی نرخی بەنزین چەند بڕیارێكی دەركران.
لە بڕیاری یەكەمدا هاتووە، هەموو هەوڵێك دەدەن بۆ زیادكردنی پشكی هەرێم لە نەوتی خاو لەلایەن حكومەتی عیراقەوە و پێویستە هەرێم رۆژانە بەغداد 126 هەزار و 700 بەرمیل بنێرێت بۆ هەرێم.
وەزارەتی سامانەسروشتییەكان بڕیاریداوە، بڕی بەنزینی نۆرماڵی حكومی 750 دیناری زیادبكرێت و رۆژانەش چاودێری نرخ و كوالێتی جۆرەكانی بەنزینی بازرگانی بكرێت و كاری لیژنەكانی چاودێری و بەدواداچوونی بەڕێوەبەرایەتی نەوت و كانزاكانیش زیاد بكرێت، بۆ پاراستنی كوالێتی جۆرەكانی بەنزین.
دواین بریاری وەزارەتی سامانە سروشتییەكانیش بریتیە لە پێشكەشكردنی هەموو ئاسانكارییەك بۆ هاوردەكردنی بەنزین و ماددەی كیمیاوی لەسەر بنەمای مەرج و رێنماییەكانی وەزارتی سامانە سروشتییەكان.
دەزگای ئاسایشی هەرێم راگەیەنراوێکی لەبارەی دەستگیرکردنی دوو تیرۆرستی داعش بڵاوکردەوە و تێیدا هاتووە: تیرۆرستەکان لە سنوری پارێزگای سلێمانی خۆیان حەشاردابوو.
دەزگای ئاسایشی هەرێم رایگەیاند، بەڕێوەبەرایەتی گشتیی ئۆپراسیۆنەكانی ئاسایش بەهەماهەنگی لەگەڵ دەزگای ئاسایشی نیشتمانیی عیراق، توانییان لەسەر بنەمای زانیاری هەواڵگری دوو تیرۆریستی داعش، دەستگیربکەن.
ئەوەشی روونکردووەتەوە، تیرۆرستەکان کە بەپێی ماددەی (چوار)ـی تیرۆر داواکراو بوون، لەسنوری پارێزگای سلێمانی خۆیان حەشاردابوو.
ئاماژەی بەوەشداوە، بەپێی تایبەتمەندی شوێنی تاوان و بەمەبەستی تەواوکردنی رێکارەکانی لێکۆڵینەوە هەردوو تیرۆریست لەڕۆژی 28ـی 7ـی 2026 رادەستی دەزگای ئاسایشی نیشتمانیی عیراق کران.
لە گەرمیان کەسێک بە تۆمەتی دزیکردن دەستگیرکرا، کە لە رابردووشدا لەسەر تۆمەتی دزیکردن و تێوەگلان لە مادە هۆشبەرەکان سزادراوە.
عەقید سۆران محمد غەریب، وتەبێژی پۆلیسی گەرمیان رایگەیاندووە: هێزەکانی پۆلیسی گەرمیان توانییان کەسێک بە ناوی (م. ح. م.)، لەدایکبووی ساڵی 1990، بە تۆمەتی دزیکردن دەستگیر بکەن.
وتەبێژی پۆلیسی گەرمیان دەشڵێت: بەپێی لێکۆڵینەوە سەرەتاییەکان، تۆمەتبار لە دوکانێک لە ناوچەی پیشەسازی دزیی کێبڵ، کۆسەرەی کارەبا، هاردی کامێرا، شاشە و جیهازێکی گەورەی لەحیمکردن کردووە، هەروەها هەوڵی شکاندن و چوونەناو دوکانێکی دیکەشی داوە.
بەپێی وتەی وتەبێژی پۆلیسی گەرمیان: لە ئێستادا تۆمەتبار بەفەرمانی دادوەر بەپێی ماددەی (446) لە یاسای سزادان راگیراوە و پرۆسەی یاسایی بەرانبەری بەردەوامە، تۆمەتبار پێشترش لەسەر تۆمەتی دزیکردن و تێوەگلان لە مادە هۆشبەرەکان حوکمی خواردووە.
کۆمپانیای ئاسیاسێڵ پێنج خەڵاتی تایبەت بە پەرەدان بە ژیریی دەستکرد بەدەستهێنا و دوو لە خەڵاتەکانیش زێڕین بوون.
کۆمپانیای ئاسیاسێڵ وەک پێشەنگی خزمەتگوزارییەکانی پەیوەندی لە عیراق رایگەیاند، دەستکەوتێکی مێژوویی نوێیان بە بەدەستهێنانی پێنج خەڵاتی نێودەوڵەتی Stevie® بۆ ساڵی 2026، تۆمارکردووە.
ئاسیاسێڵ ئاماژەی بەوەشداوە، ئەو خەڵاتانە کە دوو زێڕ، دوو زیو و یەک برۆنزی لەخۆگرتبوو، وەک دانپێدانانێکی جیهانییە بۆ پەرەپێدانی ژیریی دەستکردە لەلایەن کۆمپانیاکەیانەوە.
ئەوەشی روونکردووەتەوە، لە خەڵاتەکاندا، 'لەیلا' ،کە یاریدەدەرێکی ژیری دەستکردی ئاسیاسێڵە خەڵاتی زێڕینی بۆ باشترین پێشکەوتنی تەکنەلۆژی بەدەستهێنا، دوای ئەوەی توانی بە سێ زمانی جیاواز و بەڕێژەی %76ـی پرسیارەکان بە شێوەیەکی ئۆتۆماتیکی وەڵامی ملیۆنان بەشداربوو بداتەوە. هەروەها سیستەمی "+CEI" خەڵاتێکی تری زێڕینی بردەوە، کە رۆژانە ئەزموونی 20 ملیۆن بەشداربوو دەپێوێت و کوالێتی تۆڕەکەی بە شێوەیەکی بەرچاو بەرزکردووەتەوە.
هاوکات، عامر سوناع، بەڕێوەبەری جێبەجێکاری ئاسیاسێڵ رایگەیاند: ئەم خەڵاتانە بەڵگەن کە داهێنان لە عیراقدا لەدایک دەبێت و بەهرەمەندەکانمان دەتوانن کێبڕکێی گەورەترین کۆمپانیا جیهانییەکان بکەن.
ئەنجومەنی وەزیرانی هەرێمی کوردستان کۆبوونەوەی ئاسایی خۆی ئەنجام دەدات و تێیدا چەند دۆسیەیەکی گرنگی پەیوەست بە سوتەمەنی و کارەبا تاووتوێ دەکات.
بڕیارە سبەینێ ئەنجومەنی وەزیرانی هەرێمی کوردستان کۆببێتەوە و یەکێک لە تەوەرە سەرەکییەکانی کۆبوونەوەکە تەرخان کراوە بۆ تاووتوێکردنی بڕیاری چارەسەرکردنی کێشەی بەنزین و دۆزینەوەی رێگەچارەی بەپەلە بۆ ئاساییکردنەوەی نرخ و بڕەکەی لە بازارەکانی هەرێمدا.
لە بەشێکی تری کۆبوونەوەکەدا، ئامادەکاری و هەنگاوەکانی حکومەت بۆ دەستپێکردنەوەی بەرهەمهێنانی غاز لە وێستگەکانی کارەبا باسی لێوە دەکرێت، بە مەبەستی راگرتنی هاوسەنگی و باشترکردنی ئاستی پێدانی کاتژمێرەکانی کارەبای نیشتمانی بە هاوڵاتییان.
سەعدی ئەحمەد پیرە جەخت لەسەر بەشداریی هێزە سیاسییەکان لە کۆبوونەوە هاوبەشەکان دەکاتەوە و رایدەگەیەنێت کە کۆبوونەوەی داهاتوو جیاوازتر دەبێت، هاوکات هۆشداری لە گرانیی نرخی سووتەمەنی و بارگرانیی سەر هاوڵاتییان دەدات.
لە لێدوانێکیدا بۆ کوردسات نیوز، سەعدی ئەحمەد پیرە رایگەیاند: بەشداری لە کۆبوونەوەی حزبەکان دەکەین.
ئاماژەی بەوەش کرد: کۆبوونەوەی داهاتوو جیاوازتر دەبێت.
جەختیشی کردەوە کە لەم قۆناغەدا گەلەکەمان زیاتر لە هەر کاتێک پێویستی بە یەکڕیزی و رێزگرتن لە بەرژەوەندییە باڵاکان هەیە.
سەبارەت بە ئاڵۆزییەکان و دۆخی سیاسیی هەرێم، سەعدی ئەحمەد پیرە بە راشکاوی رایگەیاند: ئەوەی مەترسی لەسەر قەوارەی هەرێمی کوردستان دروست دەکات خۆمانین.
لە تەوەرێکی دیکەی قسەکانیدا سەبارەت بە گوزەرانی هاوڵاتییان، تیشکی خستە سەر قەیرانی وزە و رایگەیاند: کەمیی بڕی سووتەمەنی گرفتێکی گەورەی بۆ هاوڵاتییانی هەرێمی کوردستان دروستکردووە، بەوپێیەی هاوڵاتییان ناتوانن بەو نرخە بەرزەی ئێستا سووتەمەنی بکڕن و پێویستە ئاسانکارییان بۆ بکرێت.
وەزارەتی کارەبای حکومەتی هەرێمی کوردستان بڕیاری دا بە کۆتا بەخشین و داشکاندن بە رێژەی تاوەکو 50٪ بۆ قەرزی کۆنی پێش پڕۆژەی روناکی، لە هەمان کاتدا ئاگادارییەک ئاڕاستەی هاووڵاتییان دەکات سەبارەت بە راگرتنی کاتیی خزمەتگوزارییەکانی پارەدان.
بەپێی راگەیەندراوێکی وەزارەتی کارەبا، داشکاندنەکە تەنها قەرزە کۆنەکانی پێش پڕۆژەی رووناکی دەگرێتەوە و پارەی پسوولەکانی پڕۆژەی رووناکی ناگرێتەوە.
بڕیارەکە لە رێککەوتی 3ی ئاب تاوەکو 10ی ئەیلولی 2026 جێبەجێ دەکرێت، بە مەرجێک هاووڵاتیان بە یەکجار تەواوی بڕی داشکێندراوی قەرزەکانیان بدەنەوە.
وەزارەتی کارەبا ئاماژەی بەوەش کردووە، وەک ئامادەکارییەکی تەکنیکی، پارەدانی کارەبا لە رێگەی (ئی-پسوولە) و هۆبەکانی فرۆشتنی وزە بۆ ماوەیەکی کاتی لە نێوان 30ی تەمموز تاوەکو 3ی ئاب دەوەستێت، بەوهۆیەوە داوا لە هاووڵاتیان دەکات بەر لە 30ی تەمموز پارەی پسوولەکانی رووناکی بدەن.
وەزارەتەکە جەختی کردووەتەوە کە خێراترین رێگە بۆ دانەوەی قەرزەکان بەکارهێنانی (ئی-پسوولە)یە بۆ دوورکەوتنەوە لە قەرەباڵغی، هەروەها روونی کردووەتەوە کە ئەم داشکاندنە ئەو پارەدانانە ناگرێتەوە کە لە رێگەی کارمەندانی کۆکەرەوەی پسوولەوە دەکرێن.
لە کۆتاییدا وەزارەتی کارەبا رایگەیاندووە، ئەمە دوایین دەرفەت و ئاسانکارییە بۆ سڕینەوەی قەرزە کۆنەکان بەرەو چوونە ناو قۆناغی نوێی جێبەجێکردنی سیستمی 50 رۆژیی پارەدان، و هاووڵاتیان دەتوانن بۆ هەر پرسیارێک پەیوەندی بە سەنتەری خزمەتگوزاریی رووناکی لە رێگەی ژمارە 1992 بکەن.
دەزگای ئاسایشی هەرێم رادەستکردنی 682 سکەی زیوی مێژوویی سەدەی 12_13ی زایینی بە مۆزەخانەی سلێمانی راگەیاند، دوای ئەوەی توانیی رێگری لە مامەڵەکردن پێیانەوە بکات و سێ تۆمەتبار دەستگیر بکات.
عەقید کارزان شێرکۆ، وتەبێژی دەزگای ئاسایشی هەرێم ئاشکرای کرد، ئاسایش توانیویەتی دەست بگرێت بەسەر 682 سکەی زیوی کۆندا کە مێژووەکەیان بۆ سەدەی (12 - 13)ی زایینی و دەسەڵاتداریەتیی ئیلخانییەکان دەگەڕێتەوە، و ئەمڕۆ لە مەراسیمێکدا پێشکەشی مۆزەخانەی سلێمانی کران.
سەبارەت بە وردەکاریی کەیسەکە، وتەبێژی دەزگای ئاسایش ڕوونی کردەوە، بڕی سکەکان لە لایەن دوو هاوڵاتیی دانیشتووی شارەزوورەوە دۆزرابوونەوە کە پیشەیان شوان بووە و تەمەنیان لە نێوان 20 بۆ 25 ساڵیدایە. تۆمەتباران هەوڵیانداوە مامەڵە بەو سکە مێژووییانەوە بکەن.
ئاماژەی بەوەش کرد، لە ئۆپراسیۆنێکدا ئەو دوو هاوڵاتییە لەگەڵ کەسێکی تر کە ویستوویەتی سکەکانیان لێ بکڕێت، لە لایەن هێزەکانی ئاسایشەوە بەپێی مادەی (24) لە یاسای ژمارە (5)ی ساڵی 2021ی تایبەت بە شوێنەوار، دەستگیر کراون و رووبەڕووی رێکاری یاسایی بونەتەوە.
لە روداوێکی دڵتەزێندا لە سنووری قەزای پشدەر، دوو برای منداڵ لە کاتی مەلەکردندا لە ناو گۆماوێکدا خنکان و تەرمەکانیان دەرهێنرایەوە.
بەڕێوەبەرایەتیی بەرگریی شارستانیی ڕاپەڕین رایگەیاند، تیمەکانی غەواس (مەلەوان)ی بەڕێوەبەرایەتییەکەیان ئاگادارکراونەتەوە لە روداوێکی خنکان لە ناحیەی سەنگەسەری سەر بە قەزای پشدەر.
بەرگریی شارستانی ئەوەشی خستەڕوو، روداوەکە بووەتە هۆی گیانلەدەستدانی دوو برا بە ناوەکانی (هامنۆ هێمن عەبدوڵا) و (هێڤار هێمن عەبدوڵا) کە تەمەنیان لە نێوان هەشت بۆ 12 ساڵیدایە، دوای ئەوەی بە مەبەستی مەلەکردن چووبوونە ناو گۆماوێکەوە.
تیمەکانی بەرگریی شارستانی توانویانە تەرمی هەردوو منداڵەکە لە ناو ئاوەکە دەربێننەوە و بە مەبەستی رێکارە یاسایی و پزیشکییەکان رەوانەی پزیشکی دادوەریان کردوون.
دەزگای ئاسایشی هەرێم هەڵوەشاندنەوەی چەندین تۆڕی نێودەوڵەتی بازرگانی مادەی هۆشبەری راگەیاند.
بەڕێوبەری راگەیاندنی بەرێوبەرایەتی گشتی نەهێشتنی ماددەی هۆشبەر لەوەزارەتی ناوخۆی عیراق دەڵێت ، بە هاوكاری دەزگای ئاسایشی هەرێم توانیویانە چەندین تۆڕی نێودەڵەتی بازرگانی مادەی هۆشبەر هەڵبوەشێننەوە.
راشیگەیاند، لەساڵی 2023وە تا ئێستا 16 تۆن و 800 كیلۆ مادەی هۆشبەر دەستی بەسەرداگیراوە، 380 سزای لەسێدارەدان بۆ بازرگانانی مادەی هۆشبەر دەرچووە و زیاتر لە 1500 سزای زیندانی هەتاهەتایی سەپێندراوە،
لەلای خۆشیەوە كارزان شێركۆ، وتەبێژی دەزگای ئاسایشی هەرێم رایگەیاند، پارێزگای سلێمانی پاكرترین پارێزگایە لەسەر ئاستی عیراق و هەرێم لەرووی مادەی هۆشبەر.
ئەوەشی خستەڕوو، راشیگەیاند، كەسانێك كە خاوەن بڕوانامەی باڵا و دكتۆران لەسەر بەكارهێنانی مادەی هۆشبەر دەستگیركراون و زیاتر لە هەشت هەزار بەكارهێنەری ئەو مادانەش چارەسەر كراون،،
ئاشکراشیکرد، بە هەماهەنگی لەگەڵ عیراق،باندێكیان دەستگیركردووە كە بەنیازبوون لە هەرێمی كوردستان و دواتر دەروازەی عەرعەرەوە ماددەی هۆشبەر بگوازنەوە بۆ دەرەوەی وڵات و توانیویانە ئەو باندە دەستگیربكەن و شكست بە پیلانەكەیان بهێنن و دەستبەسەر 38 كیلۆگرام مادەی هۆشبەردا بگرن و دوو تۆمەتباریش دەستگیربكەن.
كۆمپانیای دانە غاز بڕیاریدا ئاستی بەرهەمهێنانی غاز لە كێڵگەی كۆرمۆر ئاسایی دەكاتەوە.
شاكر واجد شاكر بەڕێوەبەری كۆمپانیای دانە غاز لە عیراق بە كوردسات نیوزی راگەیاند، كۆمپانیای دانە غاز لە دوای هەڵسەنگاندنیان بۆ ئاڵۆزییەكان و وەرگرتنی گەرەنتیی ئەمنی و دڵنیابوونەوە لەلایەن حكومەتی هەرێمی كوردستان و حكومەتی عێراقەوە، بڕیاریانداوە ئاستی بەرهەمهێنانی غاز لە كێڵگەی كۆرمۆر ئاسایی بكەنەوە.
بەڕێوەبەری كۆمپانیای دانە غاز لە عیراق راشیگەیاند، بەرهەمهێنانی غازی شل ناسراو بە ئێڵ پی جی و غازی وێستگەكانی كارەبا دەگاتە ئاستی ئاسایی خۆی.
كۆمپانیای دانە غاز لەراگەیەنراوێكدا جەختی لەوەكردووەتەوە،پرۆسەی بەرزكردنەوەی ئاستی بەرهەمهێنان بە شێوەیەكی وورد و قۆناغ بە قۆناغ بەڕێوەدەچێت و ئامانجیشیان لەم هەنگاوە پشتیوانیكردنی تۆڕی كارەبا و دابینكردنی پێداویستییە خێراكانی هاووڵاتییانە لە هەرێمی كوردستان و ناوچەكانی دیكەی عێراق.
ئەوەش لەكاتێكدایە لە 16ی تەمموزدا كۆمپانیای دانە غاز بەهۆی هەڕەشەی ئەمنی لەسەر ناوچەكە بەشێوەیەكی كاتی بەرهەمهێنانی غازی راگرت.
روداوێکی سەختی هاتوچۆ لە گەڕەکی ئیبراهیم ئەحمەدی شاری سلێمانی رویدا و هاتوچۆی سلێمانیش دەڵێت، "بەهۆی تیژڕەوییەوە بووە".
هاتوچۆی سلێمانی رایگەیاندووە: پاش نیوەڕۆی ئەمڕۆ، روداوێکی هاتوچۆ لە گەڕەکی ئیبراهیم ئەحمەد لە سلێمانی رویدا، هۆکاری روداوەکە دەگەڕێتەوە بۆ ئۆتۆمبێلی جۆری 'تۆیۆتا کراون' کە بەهۆی تیژڕەوی و لەدەستدانی کۆنترۆڵ خۆی کێشاوە بە ستوونی کارەبا و پاشان پەڕیوەتەوە بۆ سایدی بەرانبەر و خۆی کێشاوە بە ئۆتۆمبێلێکی میریدا.
هاتوچۆی سلێمانی دەشڵێت: خۆشبەختانە روداوەکە زیانی گیانی تیادا نەبووە و زیانەکان تەنها مادی بوون .
حکومەتی هەرێمی کوردستان، کۆبوونەوەیەکی سەبارەت بە کێشەی کەمیی بەنزین و سوتەمەنی ئەنجامدا.
بەپێی راگەیەنراوێکی سەرۆکایەتی ئەنجومەنی وەزیرانی هەرێم، لە کۆبوونەوەکدا ئەم بڕیارانە دراون؛
یەکەم: نرخی بەنزینی نۆرمالی پاڵپشتیکراو لەلایەن حکومەتەوە، بە هەمان نرخی ئێستا بەردەوام دەبێت.
دووەم: پێداچوونەوە بە نرخی بەنزینی جۆری 'سوپەر و موحەسەن' بکرێت كه گونجاو بێت لەگەڵ بازاڕی هەرێم و ڕێگرییش بکرێت له قازانجى ناڕەوا.
سێیەم: داوا لە حکومەتی فیدراڵ بکرێت بۆ زیادکردنی رێژەی ناردنی نەوتی خاو بۆ هەرێمی کوردستان کە ئێستا 50 هەزار بەرمیلە، بۆ 126.7 هەزار بەرمیل.
چوارەم: رێگری لە قۆرخکاری لە بواری سووتەمەنی و بە تایبەتی بەنزین بکرێت.
سێ تۆمەتبار دەستگیرکراون و قاسەی ماڵێکیان دزیوە و پۆلیسی گەرمیانیش لەوبارەیەوە روونکردنەوە دەدات.
بەڕێوەبەرایەتیی پۆلیسی گەرمیان بڵاویکردەوە، سێ تۆمەتبار کە قاسەی هاووڵاتییەکەیان لە ماڵەکەیدا دزیوە، هەرسێکیان بە بڕیاری دادگا دەستگیرکران و لەئێستادا لێکۆێڵینەوە لە دۆسیەکە بەردەوامە.
ئاماژەی بەوەشداوە، سێ تۆمەتبارەکە قاسەیەکیان کە حەوت هەزار و 500 دۆلار و دەنابچەیەک و چەند پارچە زێڕێکی تێدابووە، دزیوە و دوای ئەوەی خاوەن ماڵەکە سکاڵای تۆمارکردووە، بەدواداچوونیان بۆ روداوەکە کردووە بە بڕیاری دادگا هەرسێ تۆمەتبار دەستگیرکراون و لە ئێستادا راگیراون.
پۆلیسی راپەڕین ئاشکرایکرد، لە قەزای حاجیاوا دوو کەس بە تۆمەتی رفاندن، لێدان و هەڕەشەی کوشتنی هاووڵاتییەک لەلایەن هێزە ئەمنییەکانەوە دەستگیرکران.
بەڕێوەبەرایەتیی پۆلیسی راپەڕین رایگەیاند، سەرلەبەیانی ئەمڕۆ یەکشەممە هاووڵاتییەک بە ناوی (ب.ب.ا) سەردانی بنکەی پۆلیسی حاجیاوای کردووە و سکاڵای تۆمارکردووە کە شەوی رابردوو لەلایەن دوو کەسەوە بە ناوی (ا.خ.م) و (ا.م.ک) بە ئۆتۆمبیل رفێنراوە بۆ شوێنێکی دوور و پاشان لێیان داوە، ئازاریان پێ گەیاندووە و هەڕەشەی کوشتنیان لێکردووە.
ئاماژەی بەوەشکرد، دەستبەجێ دادوەری لێکۆڵینەوەی حاجیاوا ئاگادار کرایەوە و دۆسیەی لێکۆڵینەوە بۆ روداوەکە کرایەوە، لە ماوەی کەمتر لە یەک سەعاتدا، مەفرەزەکانی بنکەی پۆلیسی حاجیاوا بە هاوکاریی بنکەی پۆلیسی (ماکۆک) توانیویانە شوێنی نیشتەجێبوونی تۆمەتباران دەستنیشان بکەن و دەستگیریان بکەن.
پۆلیسی راپەڕین ئەوەشی خستەڕوو، تۆمەتباران لە بەردەم دادوەردا دانیان بە تاوانەکەیاندا ناوە و لە ئێستادا بە بڕیاری دادوەر و بەپێی مادەی (422) لە یاسای سزادانی عیراقی راگیراون، هاوکات لێکۆڵینەوە لە روداوەکەش بەردەوامە.