لە بەرواری باڵا، بەهۆی تەقینەوەی مینەوە پێشمەرگەیەک بەناوی (محەمەد ئەحمەد) گیانی لەدەستدا.

پەیامنێری کوردسات نیوز رایگەیاند، بەهۆی تەقینەوەی مینێکەوە لە یەکێک لە خاڵە سەربازییەکانی  گوندی (بێقولکێ) لە بەرواری باڵا، پێشمەرگەیەک بەناوی (محەمەد ئەحمەد) گیانی لەدەستدا.

سەرۆکی فەرەنسا رایدەگەیەنێت، پێویستە رۆژئاوا لەبارەی دەسەڵاتدارانی نوێی سوریاوە ساویلکە نەبێت و ئاگاداری دۆخەکە بێت. دەشڵێت، "فەڕەنسا هەرگیز دەستبەرداری شەڕڤانانی کورد نابێت لە سوریادا".

ئیمانوێل ماکرۆن سەرۆکی فەرەنسا لە کۆنفرانسێکی رۆژنامەنووسیدا رایگەیاندووە، پێویستە رۆژئاوا لەبارەی دەسەڵاتدارانی نوێی سوریاوە ساویلکە نەبێت، کە لەدوای رووخانی رژێمەکەی بەشار ئەسەدەوە دەسەڵاتیان لەو وڵاتە گرتووەتە دەست.

ماکرۆن ئەوەشی خستەڕوو، "فەڕەنسا هەرگیز دەستبەرداری شەڕڤانانی ئازادی نابێت، وەک کوردەکان، کە دژی گروپە توندڕەوەکانی سوریا شەڕیان کرد".

سەرۆکی فەرەنسا ئاماژەی بەوەکردووە، "ئێمە پێویستە رێز لە گۆڕانی رژێمی سوریا بگرین".

زیاتر لە دوو مانگە لێبوردنی تایبەت لەلایەن سەرۆکایەتی هەرێمەوە بۆ رۆژنامەنووس قەهرەمان شوکری دەرچووە، بەڵام تاوەکو ئێستا ئازاد نەکراوە.

رەمەزان ئەرتیسی پارێزەری رۆژنامەنووس قەهرەمان شوکری بە کوردسات نیوزی راگەیاند، "زیاتر لە دوو مانگە لێبوردنی تایبەت لەلایەن سەرۆکایەتی هەرێم بۆ روژنامەنووس قەهرەمان شوکری دەرچووە، بەلڵم تاوەکو ئێستا لە زینداندایە".

ئاماژەی بەوەشدا، "چەندین جار پەیوەندیمان بە زیندان کردووە، دەڵێن تا ئێستا هیچ نووسراوێکی رەسمیمان لە ئەنجومەنی وەزیرانەوە بەدەست نەگەشتووە بۆ ئازادکردنی قەهرەمان شوکری".

دادگای پێداچوونەوەی هەرێم بڕیاریدا بە دەستبەجێ ئازادکردنی سلێمان محەمەدی رۆژنامەنووس، کە لە ٢٥ی ١٠ ساڵی ٢٠٢٣وە لە دەروازەی فیشخاپور دەستگیرکراوە.

بەشدار حەسەن سەرۆکی تیمی پارێزەرانی سزادراوانی بادینان لە هەژماری تایبەتی خۆی لە تۆڕی کۆمەڵایەتی فەیسبووک رایگەیاندووە، دادگای پێداچونەوەی هەرێمی کوردستان بڕیاریدا بە هەڵوەشاندەوەی سەرجەم تۆمەتەکانی سەر رۆژنامەنوس (سلێمان محەمەد ئەحمەد) و ئازادکردنی دەستبەجێ.

سلێمان محەمەد پێشتر سزای زیندانیکردنی سێ  ساڵی بۆ دەرچووبوو، کە لە مانگی ١٠ی ٢٠٢٣ـەوە لەلایەن ئاسایشی دهۆک لە دەروازی فیشخاپور دەستگیرکراوە کە دەستگیرکردنەکەی کاردانەوەی زۆری بەدوای خۆیدا هێنا لەسەر ئاستی ناوخۆیی و چەند وڵاتێکی دیکەش.

 لەو بارەیەوە سەنتەری میترۆ بۆ داکۆکیکردن لە مافی رۆژنامەنووسان رایگەیاندووە، پێشوازی لە بڕیارەکە و دەستخۆشی لە تیمی پارێزەرانی سلێمان محەمەد دەکەن.

سەنتەری میترۆ لەسەر زاری نەریمان ئەحمەدی پارێزەری سلێمانی رۆژنامەنووسەوە باسی لەوەکردووە، "هیچ بەڵگەیەک بۆ تۆمەتبارکردنی بەردەست نەبووە، بۆیە ئازادکراوە و لەئێستادا دەست دەکەن بە گرتنەبەری رێوشوێنەکانی ئازادکردنی".

سلێمان ئەحمەد هەواڵسازی بەشی عەرەبی ئاژانسی رۆژنیوز بوو لە سلێمانی، لە رۆژی ٢٥ی ١٠ی ٢٠٢٣دا دوای ئەوەی بۆ بەشداریكردن لە پرسەی باوكی سەردانی ڕۆژئاوای كوردستانی كردبوو، لە كاتی گەڕانەوەیدا بۆ هەرێم لە دەروازەی فیشخابوور دەسگیركرا و دوای ٢١١ رۆژ رێگە بە پارێزەرەكانی درا سەردانی بكەن.

رۆژی ٢٩ی ٧ی ساڵی رابردوو، لە هۆڵی دادگای دهۆك دانیشتنی دادگایی ئەو رۆژنامەنووسە بەڕێوەچوو، بە ماددەی ١ـی ژمارە ٢١ی ساڵی ٢٠٠٣ پەرلەمانی هەرێمی كوردستان، بۆماوەی سێ ساڵ بە تۆمەتی ئەندامبوون لە "پارتی یەكێتی دیموكرات-پەیەدە" سزای زیندانی بەسەردا سەپێنرا.

دوای ئەوەی ماوەی دوو رۆژە کەشێکی سارد و لە هەندێک ناوچە باران و لە هەندێکی دیکە بەفر هەرێمی گرتووەتەوە، کەشناسی پێشبینییەکانی کەشوهەوای ئەمڕۆ و سبەی ئاشکرا کردووە.

کەشناسیی هەرێم رایگەیاندووە، ئەمڕۆ دووشەممە، ئاسمان نیمچە هەور دەبێت بە گشتى، ئەگەرى نمەباران هەیە لە هەندێک ناوچەى شاخاویی بەتایبەت لە سنوورى پارێزگاى سلێمانى و بەشێک لە سنوورى پارێزگاى هەولێر، لەگەڵ دورستبوونى تەم لە هەندێک لە ناوچە شاخاوییەکان، پلەکانی گەرماش لە نزمیدا دەمێننەوە.

ئاماژەی بەوەشکردووە، سبەی ئاسمان هەور و نیمچەهەور دەبێت، پلەکانی گەرما کەمێک بەرزدەبنەوە.

بەرزترین پلەکانی گەرمای پێشبینیکراو بە پلەی سیلیزی :

هەولێر: ١٥ پلەى سیلیزى

سلێمانی: ١٣ پلەى سیلیزى

دهۆک: ١٤ پلەى سیلیزى

کەرکوک: ١٧ پلەى سیلیزى

هەڵەبجە: ١٣ پلەى سیلیزى

گەرمیان: ١٨ پلەى سیلیزى

زاخۆ: ١٤ پلەى سیلیزى

كەمێك پێش ئێستا بریندارێكی روداوەكەی سەر رێگای ھەڵەبجە - سیروان، بە ناوی (عەلی عەبدوڵا) گیانی لەدەستدا.

بەمەش ژمارەی گیانلەدەسدانی روداوەكەی ئەمڕۆ بوونە چوار كەس.

ئەمڕۆ یەكشەممە لەسەر رێگای ھەڵەبجە-سیروان روداوێكی ھاتوچۆ رویدا و دەستبەجێ سێ كەس گیانیان لەدەستدا، سێ كەسی دیكەش بەسەختی برینداربوون، كەمێك پێش ئێستا یەكێك لە بریندارەكان گیانی لەدەستدا.

پێشتر لە روداوەکە ئەو سێ هاووڵاتیەی لە وێنەکەدا ئاماژەیان پێکراوە گیانیان لەدەستدا، کەمێک پێش ئێستا (عەلی عەبدوڵا) کە شۆفێری یەکێک لە ئۆتۆمبێلەکان بوو گیانی لەدەستدا.

کەمێک پێش ئێستا لە رێگەی سیروان - هەڵەبجە روداوێکی هاتوچۆ رویدا و بەهۆیەوە چوار کەس گیانیان لەدەستدا.

پەیامنێری کوردسات نیوز لە شوێنی روداوەکەوە رایگەیاند، روداوەکە لەنێوان تەکسی و تراکتۆرێکدا بووە، چوار کەس گیانیان لەدەستداوە و کەسێکی دیکەش بەسەختی بریندارە و لە نەخۆشخانەی فریاکەوتنی هەڵەبجەیە.

بەپێی بەدواداچوونەكانی كوردسات نیوز، ئەو دەنگۆیانەی لەبارەی ئۆتۆمبێلی بێسەرەتا بڵاودەكرێنەوە كە گوایە لە بەردەم ماڵەكانیاندا دەستیبەسەردا دەگیرێت، دوورن لە راستی.

رۆژانی رابردوو چەند میدیا و پەیجێك هەواڵێكیان بڵاوكردەوە كە گوایە بەبێ ئاگاداری خاوەنەكانیان و لە بەردەم ماڵەكانیاندا دەستبەسەر ئۆتۆمبێلی بێسەرەتادا دەگیرێت، كوردسات نیوز بەدواداچوونی بۆ ئەو دەنگۆیانە كرد و سەرچاوەیەك لە لیژنە ئەمنییەكانی سلێمانی بە كوردسات نیوزی راگەیاند، شێواز و بڕیاری چۆنیەتی دەستبەسەرداگرتنی ئۆتۆمبێلە بێ سەرەتاكان هیچ گۆڕانكارییەكی بەسەردا نەهاتووە و ئەو دەنگۆیانەی بڵاودەكرێنەوە دوورن لە راستی.

هەروەها سەرچاوەكە بە كوردسات نیوزی راگەیاند، دانانی بازگە كاتییەكانی هێزە ئەمنییەكانی سلێمانی بۆ دەستبەسەرداگرتنی ئۆتۆمبێلە بێسەرەتاكان بەردەوامە و تاكو بڕیارێكی نوێ دەدرێت، نابێت لەسەر شەقامەكان هاتووچۆ بكەن.

حكومەتی عیراق ئیمزای لەسەر خەرجكردنی زیاتر لە  264 ملیار دینار بۆ موچەی مانگی 12ی هەرێم كرد .

سەرچاوەیەك لە وەزارەتی دارایی عیراق بە پەیامنێری كوردسات نیوزی راگەیاند، ئەمڕۆ ئیمزا كراوە لەسەر خەرجكردنی زیاتر لە 264 ملیار دینار بۆ تەواوكاری موچەی مانگی 12ی موچەخۆرانی هەرێم.

هاوكات سەرچاوەیەك لە وەزارەتی دارایی هەرێم بە  كوردسات نیوزی راگەیاند، تا ئێستا هیچ بڕە پارەیەك نەگەیشتوە . 

ئەوە لەكاتێكدایە، ئەمڕۆ دابەشكردنی موچەی مانگی 11ی ساڵی رابردووی موچەخۆرانی هەرێم دەستیپێكرد و  لە ماوەی 3 رۆژی داهاتوودا مووچەی سەرجەم وەزارەت و دەستەكان دابەش دەكرێت.

کەشناسیی هەرێم رایگەیاند، پلەکانی گەرما نزمدەبنەوە و بارانبارین دەستپێدەکات، لە لوتکەی شاخەکانیش بەفر دەبارێت.

کەشناسیی هەرێم رایگەیاندووە، ئەمڕۆ یەکشەممە، ئاسمان لە نێوان پەڵەهەور و نیمچەهەوردا دەبێت و لە شەودا هەورى تەواو دەبێت، لەگەڵ بارینى نمەباران لە هەندێک لە ناوچە شاخاوییەکان، هەروەها لە ناوچە سنوورییەکان کەمێک بەفر دەبارێت. 

سبەی دووشەممە، ئاسمان هەور دەبێت لە تەواوى ناوچەکە لەگەڵ بارینى نمەبارانى پچڕ پچڕ لەسەر هەندێک ناوچەى شاخاویی و لوتکەى شاخە بەرزەکان، لە ناوچە سنوورییەکان بەفر دەبارێت و لە سەنتەرى پارێزگاى دهۆک و سنوورى ناوچە شاخاوییەکانى پارێزگاى هەولێر ئەگەرى دابارین زیاتر دەبێت.

ئەوەش خراوەتەروو، سبەی پلەکانى گەرما نزم دەبنەوە بەتایبەت نزمترین پلەکانى گەرما بە نزیکەى ٤ بۆ ٦ پلەى سیلیزى و بەرزترین پلەکانى گەرما بەنزیکەى ٢ بۆ ٤ پلەى سیلیزى دادەبەزن.

بەرزترین پلەکانی گەرمای پێشبینیکراو بە پلەی سیلیزی :

هەولێر: ١٤  پلەى سیلیزى

سلێمانی: ١٢ پلەى سیلیزى

دهۆک: ١٣ پلەى سیلیزى

کەرکوک: ١٥ پلەى سیلیزى

هەڵەبجە: ١٢ پلەى سیلیزى

گەرمیان: ١٦ پلەى سیلیزى

سۆران: ٧ پلەى سیلیزى

زاخۆ: ١٣ پلەى سیلیزى

حاجی ئۆمەران: ١ پلەى سیلیزى

ئەمڕۆ دابەشكردنی موچەی مانگی ١١ی ساڵی رابردووی موچەخۆرانی هەرێم دەستیپێكرد و تا ئێستاش چارەنوسی موچەی مانگی ١٢ دیار نییە . 

بەپێی ئەو خشتەیەی وەزارەتی دارایی هەرێم بڵاویكردوەتەوە، ئەمرۆ خانەنشینانی شارستانی و پێشمەرگە و كەشوكاری شەهیدان و ئەنفالكراوان و خاوەن پێداویستتی تایبەت و زیندانە سیاسییەكان موچە وەردەگرن و موچەی سەرجەم وەزارەتەكانی تریش لە ماوەی سێ رۆژی داهاتوودا دابەش دەكرێت.بەپێی بەدواداچوونەكانی كوردسات نیوزیش، تا ئێستا چارەنوسی موچەی مانگی ١٢ دیار نییە.

هاوكات سۆران عومەر ئەندامی ئەنجومەنی نوێنەرانی عیراق دەڵێت، وەزارەتی دارایی هەرێم دوو رۆژ پێش ئێستا روونكردنەوەیەكی بڵاوكردووەتەوە، بەپێی ئەو روونكردنەوەیە ١٤٨ ملیار دینار كە بەغداد بۆ هەرێمی ناردووە، دیار نییە. هەروەها لە داهاتی ناوخۆش دوو ملیار دینار جیاوازی موچە هەیە.

سۆران عومەر دەڵێت، "لەو روونکردنەوەی کە وەزارەتی دارایی هەرێم بڵاویکردووەتەوە  ١٤٨ ملیارو ٦٧٩ ملیۆن دینار جیاوازی هەیە، ئەمە ژماردنی گوێز بووایە لە ملیۆنێکدا ١٠٠٠ دانەیان هەڵە بکردایە گرنگ نەبوو، بەڵام وتنی دوو ملیار دینار زیادەو ١٤٨ ملیار دینار کەمتر لەوەی هاتووە کارەسات و قوڕبەسەریە"

سۆران عومەر ئەندامی ئەنجومەنی نوێنەرانی عیراق لە هەژماری تایبەتی خۆی لە فەیسبوک دەڵێت، وەزارەتی دارایی هەرێم لەکاتی پشووی رەسمی و لەیەکەم روونکردنەوەی ساڵی نوێدا بڵاویکردۆتەوە کە بەغدا بڕی ١٠ ترلیۆن و ٧٥٢ ملیارو ٥٨٢ ملیۆن دیناری بۆ هەرێم ناردووە، بەڵام وەزارەتی دارایی عیراق بەفەرمی رایگەیاند بڕی ١٠ ترلیۆن و ٩٠١ ملیارو ٢٦١ ملیۆن دیناری بۆ هەرێم ناردووە.

سۆران عومەر دەشڵێت، ١٤٨ ملیارو ٦٧٩ ملیۆن دینار جیاوازی هەیە و بەپێی روونکردنەوەکەی هەرێم ١٤٨ ملیار دینار کە بەغدا ناردویەتی دیار نیە، ئەمە جگە لەوەی وەزارەتی دارایی هەرێم نووسیویەتی بۆ موچەی مانگی ١٠ نزیکەی ٢٣٩ ملیار دینار داهاتی ناوخۆ خراوەتە سەر موچە، لەکاتێکدا لەسەر نوسراوی فەرمی بەواژۆی وەزیری دارایی بڕی ٢٣٧ ملیار دینار خراوەتە سەر موچە، لێرەدا ٢ ملیار دینار جیاوازی هەیە.

ئاماژەی بەوەشداوە، دەکرا ئەمە ژماردنی گوێز بووایە لە ملیۆنێکدا ١٠٠٠ دانەیان هەڵە بکردایە گرنگ نەبوو، بەڵام وتنی دوو ملیار دینار زیادەو ١٤٨ ملیار دینار کەمتر لەوەی هاتووە کارەسات و قوڕبەسەریە.

هەسەدە رەتیدەكاتەوە تاكو هێرشەكانی توركیا و گرووپە چەكدارەكانی هاوپەیمانی لە دژیان بەردەوام بێت چەك دابنێن و دەشڵێت، تائێستا بانگهێشتنامەیان بۆ گفتوگۆی نیشتمانی پێنەگیشتووە.

ئەنجومەنی سەركردایەتی هێزەكانی سوریای دیموكرات (هەسەدە) رایگەیاند، تاكو هێرشی سوپای توركیا و گرووپە چەكدارەكانی هاوپەیمانی ئەو وڵاتە لە سوریا بۆ سەر هێزەكانی هەسەدە بەردەوام بێت، ئامادەنین دەستبەرداری چەكەكانیان بن.

ئەوەشی خراوەتەروو، پێویستیان بە بڕیاری یەكلاكەرەوە هەیە لەبارەی قۆناغی راگوزەری سوریا و چوونە ناو ریزی هێزەكانی وەزارەتی بەرگری سوریا لە داهاتوودا.

هەسەدە راشیگەیاند، تائێستا بانگهێشتنامەیان بۆ گفتوگۆی نیشتمانی لە سوریا پێنەگیشتووە.

هێزەکانی سوریای دیموکرات (هەسەدە) رایدەگەیەنێت، بەرپەرچی سەرجەم هێرشی گرووپە چەکدارەکانیان لە باشوور و رۆژهەڵاتی مەنبج دایەوە.

ناوەندی راگەیاندنی هێزەکانی سوریای دیموکرات (هەسەدە) رایگەیاند، بەرپەرچی سەرجەم هێرشی گرووپە چەکدارەکانیان دایەوە کە لەلایەن فڕۆکەی جەنگی و درۆنی تورکیاوە پاڵپشتی دەکران لە باشوور و رۆژهەڵاتی مەنبج، دەیان کـ*ـوژراو و برینداریش لە ریزەکانیاندا هەیە.

ئاماژەی بەوەشکرد، لە چەند سەعاتی داهاتوودا لە راگەیەندراوێکدا تەواوی وردەکارییەکان دەخرێنەڕوو.

بە نوێنەرایەتی سەرۆک بافڵ جەلال تاڵەبانی وەفدێکی یەکێتیی نیشتمانی کوردستان لە بەغداد بەشداری لە مەراسیمی رۆژی شەهیدی عیراق کرد.

وەفدێکی یەکێتیی نیشتمانی کوردستان بە نوێنەرایەتی سەرۆک بافڵ جەلال تاڵەبانی، کە پێکهاتبوو لە هەر یەک لە  د. یوسف گۆران ئەندامی مەکتەبی سیاسی و ستران عەبدوڵا لێپرسراوی سكرتاریەیی مەکتەبی سیاسی و ئەندامی سەرکردایەتی، لە بەغداد بەشداریانکرد لە مەراسیمی رۆژی شەهیدی عیراق، رۆژی "شەهادەتی شەهیدی میحراب سەماحەتی محەمەد باقر ئەلحەکیم".

زۆبەی جەنگەكانی جیهان لەئێستادا پێویستی بە پێشكەوتنی تەكنەلۆژیا و تاكتیكی نوێی سەربازیی هەیە.

ئەگەرچی بوێری و ئازایەتی كورد لە گۆڕەپانی جەنگدا حاشا هەڵنەگرە، بەڵام خاڵی بەهێزی دوژمنەكانی تەكنەلۆژیایە، كە كورد لێی بێبەشكراوە بە تایبەت لە روی جەنگی ئاسمانییەوە.

شەڕڤانانی هێزەكانی سوریای دیموكراتی هەسەدە چەند ساڵێكە سەرقاڵی دروستكردنی درۆنی سەربازی تایبەت بە خۆیانن، ئەگەرچی لە روی نێودەوڵەتیی و سەربازییشەوە دەستیان بە زۆر ئامیری تایبەت ناگات.

ئێستا شەڕڤانان بە كەمترین پێدواویستی توانیوایانە بە دروستكردنی دوو جۆری درۆن گۆڕەپانی جەنگ لە بەرژەوەندیی خۆیان بقۆزنەوە.

باز و بروسك ئەو دوو درۆنەی دروستكراوی دەستی شەرڤانانن كە بونەتە مۆتەكەی نەیارانی و دوژمنانی هێزەكانیان لە رۆژئاوای كوردستان و باكور و رۆژهەڵاتی سوریا.

ئەو دوو دورۆنە كە پێشتر ئەركیان چاودێریی بوە ئێستا ئەركیان بۆ هێرشكردنە سەر پێگەكانی دوژمن گۆڕاوە و  بە هەڵدانی بۆمب و هەندێك جاریش بە خۆتەقاندنەوە گورزی گەورە لە دوژمنان دەوەشێنن.

فەرماندەكانی هەسەدە جەختیان لەوە كردوەتەوە كە فڕۆكە بێ فرۆكەوانەكانیان تا ئێستا بە هەڵە خەڵكی مەدەنیان نەكردوەتە ئامانج و  تەنها چەكدارانی سوری هاوپەیمانی توركیایان كردوەتە ئامانج.

فەرماندەیەكی هەسەدە دەڵیت پێشتر بەهۆی درۆنەكانی توركیاوە روبەڕوی كێشە بونەتەوە، بەڵام شەڕڤانان توانیویانە لە ماوەیەكی زۆر كەمدا سێ درۆنی بەیرەقدار بخەنە خوارەوە و تۆمارە ڤیدیۆییەكانیشی بڵاو كراونەتەوە.

خستنە خوارەوەی بەیرەقدا وەك شكاندنی شكۆی توانای سەربازی ئاسمانیی توركیا لێك دەدرێتەوە.

هەسەدە بە كارهێنانی باز و بروسك توانیوانی دەیان ئۆتۆمبێل و زرێپۆشی چەكدارانی سوریی تێكشكێنێت و رێگەی نەدا ئەو چەكدارانەی هاپەیمانی توركیا لە هەوڵەكانیان بۆ داگیركرندی ناوچەكانی رۆژئاوا سەركەوتو بن.

ئەمە لەكاتێكدایە كە درۆنەكانی توركیا توانایەكی سەربازی باشیان هەیە و لە دووری سەدان كیلۆمەترەوە دەتوانن ئامانج بپێكن، بەجۆرێك كە لە 18ی مانگی ئەیلولی ساڵی 2023 بۆردومانی فڕۆكەخانەی كشتوكاڵیی عەربەتی كرد لە سنوری پارێزگای سلێمانی.

بیانوی توركیا بۆ بۆردومانكە ئەوە بوو كە ئەندامانی هەسەدە لەو فڕۆكەخانەیە سەرقاڵی مەشق و راهێنان بون بۆ دروستكردن و بەكارهێنانی درۆنی سەربازیی.

دەزگای هەواڵگریی توركیاش كە بە میت ناسراوە بڵاویكردەوە كە گومانیان هەبوە لەوەی كە شەڕڤانان لە فڕۆكەخانەكەی عەربەت سەرقاسڵی دروستكردنی درۆن بووبن.

سەرەڕای ئەو بۆردومانە و زیانە گیانی و مادییەكانی ، بەڵام شەڕڤانان لە خاكی رۆژئاوا و بە دروستكردنی درۆنی باز و بروسك توانیویانە سوپای توركیا و چەكدارانی سوپای نیشتیمانی سوریا روبەڕوی ئاستەنگی گەورە بكەنەوە، تەكنەلۆژیا خۆماڵییەكەی شەڕڤانان بووەتە مۆتەكە لە بەردەم پێشڕەویی هەر دوژمنێك كە بیەوێت بەرەو خاكی رۆژئاوا پێشڕەویی بكات.