کوردستان
بافڵ جەلال تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی سیاسی لە سلێمانی پێشوازیی لە سەید عەممار حەکیم، سەرۆکی رەوتی حیکمە کرد.
لەدیدارێکدا كە رەفعەت عەبدوڵا و نزار ئامێدی، ئەندامانی مەکتەبی سیاسی ئامادەبوون، یەکخستنی هەوڵە نیشتمانییەکان بۆ زاڵبوون بەسەر ئاڵنگارییەکان و چارەسەرکردنی ئەو کێشانەی بوونەتە بەربەست لەبەردەم پرۆسەی سیاسی دووپاتكرانەوە.
هەر لە دیدارەکەدا هەردوولا پەرۆشبوون بۆ چارەسەرکردنی کێشەکانی نێوان هەولێر و بەغداد لەسەر بنەمای دەستوور، رێککەوتنە سیاسییەکان و بەردەوامیی گفتوگۆ و لێکتێگەشتنەکان لەنێوان لایەنە بەشداربووەکانی پێکهێنانی حکومەت بۆ دۆزینەوەی دەرچەی یاسایی بۆ چارەسەرکردنی کێشەکان، سەرخستنی بەرنامەی خزمەتگوزاریی حکومەت و پشتگیریکردن لە دامەزراوە دەستوورییەکان.
دۆخی رۆژهەڵاتی ناوەڕاست و سووریا تەوەرێکیتری دیدارەکە بوون و جەخت لە دوورخستنەوەی وڵات لە ئاڵۆزییەكان کرایەوە بەشێوەیەک هەموولایەنەکان یەک گوتاری هاوبەشیان هەبێت لەپێناو پاراستنی سەقامگیری لە ناوچەکەدا.
سەرۆک بافڵ جەلال تاڵەبانی بۆ تەواوی پرسەکان هەڵویستی نیشتمانیی یەکێتی خستەڕوو و رایگەیاند، هەموو هەوڵەکانمان چڕکردووەتەوە بۆ پێکهێنانی حکومەتێکی خزمەتگوزار، دادپەروەر و دەربەست بە خەمی خەڵکەوە. لە هەنگاوەكانیشمان بۆ دوورخستنەوەی مووچەی فەرمانبەران و شایستەداراییەكانی هەرێمی كوردستانە لە ململانێ سیاسییەكان و دۆزینەوەی چارەسەرێكی هەمیشەیی لەچوارچێوەی بڕیارەكانی دادگای فیدراڵی بەردەوامین.
پەیوەست بە دۆخی رۆژهەڵاتی ناوەڕاستیش سەرۆک بافڵ وتی، چاودێریی پێشهات و گۆڕانكارییەكان دەكەین و پێشوازیی لە هەموو ئەو هەوڵانە دەكەین كە ئامانجەكەی بەدیهێنانی ئاشتی و سەقامگیری و پاراستنی ئاسایشی ناوچەكەیە.
هەزارانی هاووڵاتی هەرێمی كوردستان لە دەروازەی نێودەوڵەتی ئیبراهیم خەلیل گیریان خواردووە و ناتوانن لە توركیاوە بگەڕێنەوە بۆ هەرێم.
پەیامنێری كوردسات نیوز لە زاخۆ رایگەیاند، هەزاران هاووڵاتی هەرێم كە گەشتیان بۆ توركیا كردووە، زیاتر لە ٢٤ سەعاتە لە دەروازەی نێودەوڵەتی ئیبراهیم خەلیل لە دیوی توركیاوە گیریان خواردووە و ناتوانن بگەڕێنەوە بۆ خاكی هەرێم.
وتیشی، لێپرسراوانی دەروازەكە بە ئەو هاووڵاتیانەیان وتووە كێشەیەكی تەكنیكی لە سیستمی دەروازەكە هەیە و تا ئێستا چارەسەر نەكراوە.
پەیامنێری كوردسات نیوز راشیگەیاند، دەروازەی ئیبراهیم خەلیل لە دیوی هەرێمی كوردستانەوە گرفتی نییە و هاووڵاتیان دەتوانن هاتوچۆ بكەن.
سەرۆكی دەستەی ناوچە كوردستانییەكان رایگەیاند، دەبێت كێشەكانی ناوچە كوردستانییەكان بە گفتوگۆ لەگەڵ حكومەتی عیراق چارەسەر بكرێن و دەستور ببێتە بنەمای چارەسەری ئەو كێشانە.
فەهمی بورهان سەرۆكی دەستەی ناوچە كوردستانیەكانی دەرەوەی ئیدارەی هەرێم لەگەڵ وەفدێكی باڵیۆزخانەی ئەمریكا كۆبووەوە كە پێكهاتبوون لە ویلیام ماككوی لێپرسراوی سیاسی باڵیۆزخانەكە لە بەغداد و ئۆدری كێرانین لێپرسراوی سیاسی لە كونسوڵخانەی گشتی ئەمریكا لە هەولێر.
تەوەری سەرەكی كۆبوونەوەكە دۆخی ئێستای ناوچە جێناكۆكەكان و كێشەی زەوی و زاری جوتیاران و هەوڵەكانی هەڵوەشاندنەوەی بریارەكانی رژێمی پێشوو بوو، هەروەها باس لە هەوڵەكانی جێبەجێكردنی ماددەی ١٤٠ـی دەستور كرا و گفتوگۆیی لەبارەوە كرا .
سەرۆكی دەستە لە كۆبوونەوەكە رایگەیاند، باوەڕیان وایە دەبێت بە گفتوگۆ ئەو بابەتانە لەگەڵ حكومەتی عیراق چارەسەربكرێن و دەستور ببێتە بنمای چارەسەری ئەم كێشانە لەو ناوچانە و دەستور بۆ هەموو گەلانی عیراقە.
ئەردۆغان بە مەسرور بارزانی راگەیاندووە كە هەوڵ دەدەن سوریا سەقامگیر بكەن و ئاسایشی عیراق بۆ توركیا زۆر گرنگە.
ئاژانسی رۆیتەرز رایگەیاند، رەجەب تەیب ئەردۆغان سەرۆكی توركیا لە ئەنقەرە چاوی كەوت بە مەسرور بارزانی سەرۆكی حكومەتی هەرێمی كوردستان.
بەپێی زانیاریەكانی رۆیتەرز ئەردۆغان راگەیاندووە، توركیا كار لەسەر ئەوە دەكات كە گۆڕانكارییەكانی سوریا لە ماوەی رابردوودا ناسەقامگیری نوێ بۆ ناوچەكە نەهێنێتە ئاراوە و ئاسایش و سەقامگیری عیراق بۆ توركیا گرنگەز
سەرۆكایەتی كۆماری توركیاش رایگەیاند، توركیا هەوڵدەدات رێگری لەوە بكات پێشهاتەكانی سوریا نەبنەهۆی ناسەقامگیریی نوێ لە ناوچەكەدا لە داهاتووی سوریای نوێدا هیچ شوێنێك بۆ رێكخراوە تیرۆریستییەكان و هێزە پەیوەندیدارەكانی نییە.
فەرمانگەی میدیا و زانیاریش بڵاویكردەوە، مەسرور بارزانی لەگەڵ ئەردۆغان و هاكان فیدان وەزیری دەرەوەی توركیا كۆبوەتەوە و گفتوگۆیان لەبارەی پەیوەندییەكانی هەرێمی كوردستان و توركیاوە كردووە.
هاوكات شاسوار عەبدولواحید سەرۆكی جوڵانەوەی نەوەی نوێ گەیشتە توركیا و لەگەڵ لێپرسراوانی ئەو وڵاتە كۆبوەوە.
عەممار حەكیم سەرۆكی رەوتی حیكمە بە سەردانێك گەیشتە سلێمانی و لە دەباشان مەزاری سەرۆك مام جەلالی بەسەركردەوە، بڕیاریشە دواتر لە مەكتەبی سیاسی یەكێتی لەگەڵ بافڵ جەلال تاڵەبانی سەرۆكی یەكێتی كۆببێتەوە.
عەممار حەكیم سەرۆكی رەوتی حیكمە، لە مەزاری سەرۆك مام جەلال بە رۆژنامەنوسانی وت، سەردانەكەی گەیاندنی پەیامی خۆشەویستی و رێزە لە كورد و بە دیاریكراوی خەڵكی سلێمانی و هەڵەبجە، هەروەها دەرفەتێكە بۆ گفتوگۆكردن لەگەڵ سەرۆكی یەكێتی و سەركردەی لایەنە سیاسییەكان لەبارەی دوایین پێشهاتەكانی عیراق و ناوچەكە بۆ گەیشتنە تێڕوانینێكی هاوبەش بۆ چۆنیەتی مامەڵەكردن لەگەڵ پێشهاتەكان.
بڕیاریشە، سبەینێ عەممار حەكیم سەرۆكی رەوتی حكیمە سەردانی پارێزگای هەڵەبجە و مۆنۆمێنتی شەهیدانی هەڵەبجە بكات و چاوی بە لێپرسراوانی پارێزگاكە بكەوێت.
د. بڕیار رەشید دووپاتیدەکاتەوە، بەڵگەی پێویستیان سەبارەت بەو گرێبەستەی وەزارەتی تەندروستی لەگەڵ "کۆمپانیایەک" کردوویەتی خستووتەڕوو، کە دژی بەرژەوەندییەکانی هاووڵاتیانە، داواش لە د. سامان بەرزنجی دەکات دیبەیتی راستەوخۆ بکەن.
د. بڕیار رەشید ئەندامی ئەنجومەنی نوێنەرانی عێراق لە هەژماری تایبەتی خۆی لە تۆڕی کۆمەڵایەتی فەیسبووک رایگەیاند، دوای ئەوەی ئەمڕۆ بەڵگەی پێویستیان خستەڕوو کە ئەو گرێبەستەی وەزارەتی تەندروستی لەگەڵ "کۆمپانیایەک" کردویەتی دژی سەرجەم بەرژەوەندییەکانی هاووڵاتیانە، "چاوەڕوانبوون کە وەزیری تەندروستی پشت بەست بە بڕگەی ٤٤ـی رێکەوتنەکەی کردویانە، ئەو رێکەوتنە هەڵبوەشێنێتەوە، بەڵام سورە لەسەر قسەکانی کە ئەمەی کردویانە کارێکی باشە".
دەشڵێت، "داوا لە وەزیری تەندروستی هەرێم دەکەم مادام دڵنیایە لە قسەکانی فەرموو لە کام کەناڵەی پێی خۆشە دیبەیتێکی ڕاستەوخۆ لەبەردەم خەڵکی کوردستان بکەین و بۆی دەسلمێنین کە چۆن ئەم رێکەوتنەی کە کراوە دژی بەرژەوەندی گشتی و هاووڵاتیانی هەرێمی کوردستانە و لە داهاتوودا گرفتی گەورە بۆ هاوڵاتیان و سامانی گشتی دروست دەکات".
وەزارەتی پێشمەرگە رایدەگەیەنێت، سبەینێ چوارشەممە هاوکاریی دارایی هاوپەیمانان بۆ مانگی ١٢ بەسەر ئەفسەر و پێشمەرگەکانی سەر بە وەزارەت و لیواکانی پیادە دابەشدەکرێت.
راگەیاندنی وەزارەتی پێشمەرگە لە راگەیەنراوێکدا بڵاویکردەوە، دوای ئەوەی هاوکاری هێزەکانی هاوپەیمانان بۆ هێزی پێشمەرگە خرایە سەر هەژماری وەزارەت، بەڕێوەبەرایەتی گشتی بودجە و بەرنامەکان (ژمێریاری سەربازی) رێکارە دارایی و ژمێریارییەکانی ئەنجامداون.
ئاماژەی بەوەشکرد، بۆ ئەو مەبەستە سبەینێ چوارشەممە ٨ـی کانوونی دووەم هاوکاری هاوپەیمانان بۆ مانگی (٢٠٢٤/١٢) بەسەر ئەفسەر و پێشمەرگەکانی سەر بە وەزارەت و لیواکانی پیادە دابەشدەکرێت.
پەرلەمانتارێكی یەكێتی لە ئەنجومەنی نوێنەرانی عیراق گرێبەستەكەی نێوان وەزارەتی تەندروستی حكومەتی هەرێم و كۆمپانیایەكی تایبەت بۆ بەكرێدانی تاقیگەی نەخۆشخانە حكومییەكان بە نایاسایی ناو دەبات .
د. بریار رەشید ئەندامی ئەنجومەنی نوێنەران لە فراكسیۆنی یەكێتی لە كۆنفرانسێكی رۆژنامەوانیدا رایگەیاند ، ئەو گرێبەستەی وەزارەتی تەندروستی حكومەتی هەرێم لەگەڵ یەكێك لە كۆمپانیاكان ئیمزای كردوە بۆ پێدانی تاقیگەكان بە كەرتی تایبەت، نایاساییە.
وتیشی، كۆمپانیاكە هیچ شارەزاییەكی لەبوارەكەدا نییە و زۆر بە خێرایی دروستكراوەو پێش ئەوەی بە تەواوی تۆمار بكرێت حكومەتی هەرێم گرێبەستەكەی لەگەڵ ئیمزا كردووە .
وەزیری پێشمەرگەی هەرێم رایگەیاند، ئامانجمانە زۆرترین چاکسازی لە هێزەکانی پێشمەرگەدا بکەین و یەکیان بخەینەوە.
ئەمڕۆ سێشەممە، شۆڕش ئیسماعیل وەزیری پێشمەرگەی حکومەتی هەرێمی کوردستان لەگەڵ سینچۆل لیم کونسوڵی گشتیی کۆماری کۆریای باشوور لە هەرێمی کوردستان و پارک مینوو جێگری کۆنسوڵی گشتیی کۆبووەوە.
لە کۆبوونەوەکەدا باسیان لە دوایین پەرەسەندنە سیاسی و سەربازییەکانی ناوچەکە و عێراق و هەرێمی کوردستان کرد و شۆڕش ئیسماعیل رایگەیاند، "ئامانجمانە زۆرترین گۆڕانکاری و بەرەوپێشچوون ئەنجام بدەین لە پڕۆسەی چاکسازی و یەکخستنەوە و رێکخستنەوەی هێزی پێشمەرگەی کوردستان لە ٢٠٢٥دا".
لە راگەیەنراوێکی وەزارەتی پێشمەرگەدا ئەوە روون کراوەتەوە، کونسوڵی گشتیی کۆریای باشوور باسی لە بەهێزبوونی پەیوەندییەکان و کاری پێکەوەیی کرد و هێزی پێشمەرگەی بە قەڵغانی بەرگری و پاراستنی ئارامی ناوچەکە وەسف کردووە، بەرامبەر تێکشکاندنی داعش و مەترسییەکانی تیرۆر.
ئەوەشی خستووەتە روو، پێشمەرگە لای گەلی کۆریا ناوێکی پیرۆزە.
لە راگەیەنراوەکەدا ئەوەش هاتووە، "کونسوڵی گشتیی کۆریای باشوور باسی لە بنیاتنانی سەنتەرێکی لێکوڵینەوەی ئابووری کردووە لە هەرێمی کوردستان کە رۆڵی گرنگ و گەورەی دەبێت لە بەرەوپێشبردنی لایەنی ئابووری و بازرگانی هەرێمی کوردستان لەگەڵ وڵاتانی دەرەوەدا".
دوای ئەوەی پێشنیوەڕۆی ئەمڕۆ خاوەنی ئۆتۆمبێلە بێسەرەتاکان لەبەردەم باڵەخانەی پارێزگای سلێمانیدا گردبوونەوە و شەقامی سەرەکی سلێمانی- کەرکوکیان داخست.
هێزە ئەمنییەکان بەمەبەستی کردنەوەی شەقامەکە بڵاوەیان بە خۆپیشاندانەکە کرد و بەهۆیەوە گرژی لەنێوان خاوەنی ئۆتۆمبێلە بێسەرەتاکان و هێزە ئەمنییەکاندا دروستبوو.
خاوەنی ئۆتۆمبێلە بێسەرەتاکان داوا دەکەن، بڕیاری دەستبەسەرداگرتنی ئۆتۆمبێلەکانیان هەڵبوەشێنرێتەوە و بەو هۆیەوە پێشنیوەڕۆی ئەمڕۆ لەبەردەم باڵەخانەی پارێزگای سلێمانیدا گردبوونەوە.
لە درێژەی خۆپیشانەکانیاندا خاوەنی ئۆتۆبێلە بێسەرەتاکان هەردوو سایدی هاتن و چوونی شەقامی سەرەکی سلێمانی- کەرکوکیان داخست و رێگەیان بە هاتوچۆی ئۆتۆمبێل نەدەدا، هێزە ئەمنییەکانیش بە مەبەستی کردنەوەی شەقامەکە بڵاوەیان بە خۆپیشاندەران کرد و بەهۆیەوە گرژی لەنێوان خاوەنی ئۆتۆمبێلە بێسەرەتاکان و هێزە ئەمنییەکاندا دروستبوو، نزیکەی نیو کاتژمێر دوای ئەوەش شەقامەکە بەرووی شۆفێراندا کرایەوە.
ماوەی چەند ساڵێکە گرفتی ئۆتۆمبێلە بێسەرەتاکان بەردەوامە و لە ساڵانی رابردووشدا وەزارەتی ناوخۆ چەند جارێک داوای لە هاوڵاتیان کردووە، کە پارەی خۆیان لەو جۆرە ئۆتۆمبێلانەدا بەفیڕۆ نەدەن کە هیچ سەرەتایەکیان نییە.
پاسپۆڕتی سلێمانی داوا لە هاوڵاتیان دەکات، لەکاتی نۆرەگرتنی ئەلیکترۆنیدا چ کاتێکیان بۆ دیاری کراوە، لەو کاتەدا سەردانیان بکەن، بەپێچەوانەوە نۆرەکەیان دەفەوتێت.
پاسپۆڕتی سلێمانی رایگەیاندووە، "ئاگاداری هاوڵاتیانی سلێمانی و دەوربەری دەکەین، بە گوێرەی کاتی دیاری کراوی خۆیان کە بە نامەی ئەلیکترۆنی بۆیان دیاریکراوە سەردانمان بکەن، واتە کاتژمێر و بەرواری نۆرەی ئەلەکترۆنییەکەی لە چ کات و بەروارێکدا بوو، ئەوا لەو کاتەدا سەردانمان بکەن بۆ ئەوەی ئێمەش لە کاتی خۆیدا مامەڵەکانیان بۆ رایی بکەین".
ئاماژەی بەوەشكردووە، ئەگەر هاوڵاتیان پابەندی کاتی دیاریکراو نەبوون، ئەوا سەرەکەیان دەفەوتێت و مامەڵەکانیان بۆ جێبەجێ ناکرێت، چونکە سەرەی کەسێکی دیکە دەبێت و لەو کاتەشدا کێشە بۆ سیستمەکە دروست دەبێت.
ئەوەش لە کاتێکدایە، پێویستە بۆ ئەنجامدانی مامەڵە لە پاسپۆڕتی سلێمانی رۆژێک پێشتر بەشێوەی ئەلیکترۆنی لەرێگای ماڵپەڕی فەرمیی خۆیانەوە نۆرە بگریت.
بە هەوڵی فراكسیۆنی یەكێتی، حكومەتی عیراق بڕیاریدا بڕی ٥٠ ملیۆن لیتر نەوتی سپی بۆ هەرێم بنێرێت و بڕیارە لەماوەی ١٠ رۆژدا نەوتەكە بگات.
چرۆ حەمە شەریف ئەندامی ئەنجومەنی نوێنەرانی عیراق لە فراكسیۆنی یەكێتی بە كوردسات نیوزی راگەیاند، لە ئەنجامی هەوڵ و بەدواداچوونەكانیان بۆ دابینكردنی نەوتی سپی بۆ هاوڵاتیانی هەرێمی كوردستان، لەگەڵ وەزارەتی نەوتی عیراق گەیشتوونەتە رێككەوتن.
ئاماژەی بەوەشکردووە، وەزارەتی ناوبراو، بڕیاریداوە لەسەر ناردنی بڕی ٥٠ ملیۆن لیتر نەوتی سپی بۆ هەرێم.
ئەوەشی خستە روو، بڕیارە نەوتەكە لەماوەی ١٠ رۆژدا بگاتە هەرێمی كوردستان و هەر بەرمێلێكی بە نرخی ٥٠ هەزار دینار بدرێتە هاوڵاتییان.
ئەوەش لەكاتێكدایە، لەلایەن وەزارەتی سامانە سروشتییەكانەوە پرۆسەی دابەشكردنی نەوتی سپی لە هەرێم دەستیپێكردووە و هەر بەرمیلێكی ٢٠٠ لیتری نەوت بە نرخی ١٠٤ هەزار دەدرێت بە هاوڵاتییان.
پەیامنێری كوردسات نیوز رایگەیاند، وەفدی یەكێتیی نیشتمانیی كوردستان و پارتی دیموكراتی كوردستان لە بارەگای مەكتەبی سیاسی یەكێتی لە هەولێر كۆبوونەتەوە، بۆ گفتوگۆكردن لەسەر پێكهێنانی حكومەت و ئامادەكردنی رەشنوسی هاوبەشی هەردولا بۆ پێكهێنانی كابینەی نوێی حكومەت.
وتیشی، لە كۆبونەوەكەدا گفتوگۆكرا لەسەر تێڕوانیی چوار ساڵی داهاتووی حكومەتی هەرێم.
راشیگەیاند، بەپێی زانیارییەكان سبەینێ بەجیا یەكێتی و پارتی كۆبونەوەی خۆیان دەكەن، لەسەر داواكارییەكانی یەكتری بۆ پێكهێنانی حكومەت، رۆژی پێنجشەممەش جارێكی تر لیژنەی باڵای دانوستان لە لە هەولێر كۆدەبنەوە.
ئەوەش لە كاتێكدایە پێشتر وەفدی یەكێتیی نیشتمانیی كوردستان و پارتی دیموكراتی كوردستان لە 30ی 11ی 2024 لە سلێمانی و 17ی 12ی 2024 لە هەولێر كۆبونەوە، بۆ دەستپێكردنی گفتوگۆكان لەسەر پێكهێنانی كابینەی دەیەمی حكومەتی هەرێم.
توركیا بۆ جاری سێیەم قەدەغەی گەشتە ئاسمانییەكانی بۆ فڕۆكەخانەی نێودەوڵەتی سلێمانی بۆماوەی شەش مانگی دیكە درێژ كردەوە.
ئەمڕۆ ٧ی ١ی ٢٠٢٥، کە وادەی قەدەغەی گەشتەئاسمانییەکانی نێوان فڕۆکەخانەی نێودەوڵەتی سلێمانی و فڕۆکەخانەکانی تورکیا تەواو دەبوو، بۆ جاری سێیەم، دەسەڵاتی فڕۆکەوانی شارستانی تورکیا قەدەغەی گەشتەکانی بۆ ماوەی شەش مانگی دیکە درێژ کردەوە.
بۆ یەکەمجار لە ٣ی نیسانی ساڵی ٢٠٢٣دا لەرێگای ئی مەیڵێکەوە دەسەڵاتی فڕۆکەوانی شارستانی تورکیا فڕۆکەخانەی نێودەوڵەتی سلێمانی لە قەدەغەی گەشتە ئاسمانییەکانی نێوان وڵاتەکەی و سلێمانی راگەیاند.
قەدەغەی گەشتە ئاسمانییەکان تەنها ئەو گەشتانە نەبوون کە لەنێوان ئەو دوو وڵاتەدا ئەنجامدەدران، بەڵکو سەرجەم ئەو گەشتانەشی قەدەغە کرد کە لەنێوان فڕۆکەخانەی سلێمانی و وڵاتانی دیکەدا ئەنجام دەدران و وەستان و گۆڕینی فڕۆکە "ترانزێت"یان لە تورکیادا هەبوو.
لەوکاتەدا بیانووی تورکیا بوونی چەکدارانی پەکەکە بوو لە سنووری سلێمانی، بەڵام ماوەی نزیکەی دوو ساڵە لەسەر یەک، لەگەڵ تەواوبوونی وادەکەی جارێکی دیکە تورکیا قەدەغەی گەشتەکانی درێژ دەکاتەوە.
وەفدی دەم پارتی پەیامەكەی ئۆجەلانی گەیاندە ئاك پارتی و سەعادەت و ئاییندە، رۆژی هەینێش دووبارە سەردانی ئیمراڵی دەکاتەوە. وتەبێژی دەمپارتیش دەڵێت، پێویستە لە تورکیادا واز لە بەکارهێنانی زمانی رەتکردنەوەی کورد بهێنرێت.
وەفدی دەم پارتی بە ئەندامێتی پەروین بوڵدان و سڕی سورەیا ئۆندەر و ئەحمەد تورك، دەستی بە ژمارەیەك دیدار و كۆبوونەوە لەگەڵ پارتە سیاسییەكانی توركیا كرد بۆ گەیاندنی پەیامەكەی ئۆجەلان.
ئەمڕۆش وەفدەكە سەردانی پارتی دەسەڵاتدار ئاكپارتی و پارتی سەعادەت و پارتی ئاییندەیان كرد، پێشتریش سەردانی سەرۆكی پەرلەمان و سەرۆكی مەهەپەیان كردبوو.
دوای كۆبوونەوەكە سری سورەیا ئۆندەر رایگەیاند، لە چوارچێوە كۆبوونەوەكانیاندا سەردانی سەڵاحەدین دەمیرتاش، هاوسەرۆكی پێشووتری هەدەپەش دەكەن لە زیندان و ئەنجامی دیدار و كۆبوونەوەكانیان بڵاودەكەنەوە، بڕیارە لە ١٠ی ئەم مانگەشدا دووبارە سەردانی ئیمرالی بكەنەوە.
لای خۆیەوە ئایشە گول دۆغان، وتەبێژی دەم پارتی وتی، ئێستا دەبێت مەرجەكانی ئۆجەلان بگۆڕدرێت و هەلومەرجێك دروست بكرێت كە بەشدار بێت لەم قۆناغەدا و بیكاتە رووداوێكی مێژوویی.
جەختی لەوەشكردەوە، پێویستە پەرلەمان بتوانێت بە زووترین كات ئەم ڕۆڵە بگێڕێت و دەستپێشخەری بكات بۆ چارەسەر و واز لە بەكارهێنانی زمانی رەتكردنەوە بهێنرێت بەرامبەر كورد لە توركیا.
ئەوەش لە کاتێکدایە، دوای ١٠ ساڵ لە رێگریی دەسەڵاتدارانی توركیا، رۆژی ٢٨ی ١٢ی ساڵی رابردوو، رێگە درا وەفدێكی پەرلەمانتارانی پارتی یەكسانی و دیموكراسی 'دەم پارتی' بۆ دیدار لەگەڵ عەبدوڵا ئۆجەلان بچنە دوورگەی ئیمڕاڵی و لەگەڵیدا کۆببنەوە، کە کۆبوونەوەکەش سێ سەعاتی خایاند.
ئاگر لە پڕۆژەیەکی نیشتەجێبوون لە هەولێر کەوتەوە و بەپێی زانیارییەکانی پەیامنێری کوردسات نیوز، ئاگرەکە بەهۆی زۆپاوە کەوتووەتەوە.
پەیامنێری کوردسات نیوز ئەوەی خستە روو، کرێکارەکان بەر لەوەی بچنە سەر کارەکانیان زۆپایان داگیرساندووە، بەڵام زۆپاکە گڕی گرتووە و بەهۆیەوە چەند کابینەیەکی شوێنی مانەوەی کرێکارەکان سوتاوە.
ئەوەشی خستە روو، بەر لە کەوتنەوەی ئاگرەکە کرێکارەکان چوونەتە دەرەوە، کە دوکەڵەکەیان بینیوە گەڕاونەتەوە و بینیویانە زۆپای کابینەکەیان گڕی گرتووە.
باسی لەوەشکرد، ئاگرەکە تەنها زیانی ماددی لێکەوتووەتەوە و لەئێستادا کۆنتڕۆڵ کراوە، تیمەکانی بەرگری شارستانیش سەرقاڵی لێکۆڵینەوە لە رووداوەکەن و لە کۆنفرانسێکی رۆژنامەنووسیدا وردەکاریی زیاتر دەخەنە روو.