هەواڵەکان
وەزارەتی نەوتی عیراق رایگەیاند، پێش دەستپێکردنی وەرزی سەرما، بەشە نەوتی سپی هەرێم بە نرخی پاڵپشتیکراو 100 لیتر بە 15 هەزار دینار دەنێرن.
ئەمڕۆ یەکشەممە، وەزارەتی نەوتی عیراق رایگەیاند، لەسەر داواکاری عەلی زەیدی، سەرۆک وەزیرانی عیراق بەشە نەوتی سپی بۆ هاووڵاتییانی هەرێمی کوردستان بە نرخی پاڵپشتیکراو دابیندەکەن، کە 100 لیتر بە 15 هەزار دینارە.
وەزارەتی نەوتی عیراق، بەبێ باسکردن لە بڕی ئەو نەوتەی دەینێرن بۆ هەرێم، ئاماژەی بەوەکردوە، لەگەڵ دەستپێکردنی وەرزی سەرما، بڕیاریانداوە بەشە نەوتی سپی بە نرخی پاڵپشتیکراو بۆ هاووڵاتیانی هەریمی کوردستان دابیندەکەن.
ئەمەش لە کاتێکدایە حکومەتی هەرێمی کوردستان و حکومەتی عیراق ناکۆکن لەسەر بەشە نەوتی سپی هەرێمی کوردستان، هەرێم داوای 268 ملیۆن لیتر نەوتی سپی کردووە لە بەرانبەریشدا،بەغداد پلانی هەیە 50 ملیۆن لیتر بنێرێت.
کەناڵ12ـی ئیسرائیل بڵاویکردوەتەوە، نیشانەکانی دەستپێکردنەوەی جەنگ رۆژ لە دوای رۆژ لە زیادبوندایە و هۆشداری دەدرێت زیاتر لە نێوەی کۆگاکانی موشەکی ئێران لەناو نەبراون.
ئەمڕۆ یەکشەممە، لە راپۆرتێدا، کەناڵە ئیسرائیلییەکە بڵاویکردوەتەوە،شارەزایان پێیانوایە، تەنیا چەند رۆژێک یان زۆرترینی چەند هەفتەیەک ماوە تا ترەمپ بەو ئەنجامە بگات کە بەردەوامبوون لە چاوەڕوانی وەڵامدانەوەی ئێران بێمانایە.،
کەناڵ 12ـی ئیسرائیل پێشبینی کردوە، دوای هەڵبژاردنەکانی ئیسرائیل، دۆناڵد ترەمپ هەوڵدەدات پێش دەستپێکردنی هەڵبژاردنەکانی ئەمریکا ئەو کارەبکات و هێرشەکان بۆسەر ئێران دەستپێبکاتەوە.
لە راپۆرتەکەدا هاتووە؛ ئێران لە ئێستادا نزیکەی هەزار و 500 موشەکی بالیستی هەیە و لە ئەگەری روبەڕوبونەوەیەکی دیکەدا شارەکانی ئیسرائیل جارێکی دیکە دەبنە ئامانجی ئەو موشەکانە.
حوسێن موحیبی، وتەبێژی سوپای پاسدارانی ئێران، رایگەیاند کە دەستنیشانکردنی ئامانجی نوێ و داڕشتنی ئۆپراسیۆن لە جوگرافیای تازەدا لە کارنامەی هێزەکانیاندایە لە ئەگەری دەستپێکردنەوەی جەنگدا.
وتەبێژی سوپای پاسدارانی ئێران بە میدیای وڵاتەکەی راگەیاند، ئێستا لە جەنگدان لەگەڵ دەسەڵاتێکی دوژمندا و قۆناغگەلێکیان لەو جەنگە بڕیوە و سەرکەوتنیان بەدەستهێناوە.
موحیبی ئاستی یەکەمی سەرکەوتنەکانی بۆ رێگریکردن لە گەیشتنی دوژمن بە ئامانجەکانی بۆ روخاندنی دەسەڵاتی ئێران و پارچەکردنی ئێران گەڕاندەوە.
هەروەها و جەختکردوەتەوە، کە دوژمن دوای شکستهێنان لەو ئامانجانانەی ئێستا روی لە دانوستان و ناوبژیوانی کردووە.
وتەبێژی سوپای پاسداران بانگەشەکانی سێنتکۆم رەتدەکاتەوە و دەڵێت؛ سوپای ئەمریکا نەیتوانیوە بۆ چەند سەعاتێکیش ئاسایش بۆ گەروی هورمز دابینبکات.
هەروەها باسی لەوە کرد کە پێگە سەربازییەکانی ئەمریکا لە ناوچەکەدا کەوتوونەتە بەر ئامانج و بوونەتە هۆی تێکدانی ئاسایش بۆ وڵاتانی ناوچەکە .
پۆلیسی گەرمیان رایگەیاند، بەیانی ئەمڕۆ لە ناوچەی پیشەسازی قەزای کەلار، تەرمی دوو کەس دۆزراونەتەوە، کە وەستا و شاگردێکن و شوێنەواری گولـلە بە جەستەیانەوە دیارە.
ئەمڕۆ یەکشەممە، سۆران حەمەغەریب، وتەبێژی پۆلیسی گەرمیان، بە کوردسات نیوزی راگەیاند، تەرمی دوو کەس لە ناوچەی پیشەسازی کەلار دۆزراونەتەوە و بە گوێرەی زانیارییە سەرەتاییەکان تەرمەکان لە نهۆمی دووەمی دوکانێکی ناوچەی پیشەسازییدا بوون.
ئەو دوو کەسەی کوژراون، لە دایکبووی ساڵانی (1991 و 1997)ـن و لەئێستادا بەمەبەستی توێکاری تەرمەکان رەوانەی پزیشکی دادی قەزای کەلار کراون.
ئاماژەی بەوەشکرد، شوێنەواری گولـلە بە جەستەیانەوە دیارە و گومان دەکرێت هەردوو کوژراوەکە شەوی رابردوو کوژرابن و دەستیانکردوە بە لێکۆڵینەوە لە روداوەکە.
دوای زیاتر لە سێ مانگ و گەمارۆ توندەکانی ئەمریکا، کەشتییەکی نەوتهەڵگری ئێران کە دوو ملیۆن بەرمیل نەوتی هەڵگرتووە، گەیشتە چین
کۆمپانیای تانکەر تراکەرز کە چاودێری جوڵەی کەستییەکان دەکات رایگەیاند، بارێکی نەوتی خامی ئێران کە بڕەکەی دەگاتە دوو ملیۆن بەرمیل، پاش سێ مانگ و نیو مانەوە لە ئاوەکاندا، بەم دواییانە گەیشتووەتە چین.
کۆمپانیاکە لە ڕێگەی پەیامێکەوە لە تۆڕی کۆمەڵایەتیی ئێکس ئاشکرای کرد، وێنە مانگە دەستکردەکان پەیوەستبوونی کەشتییەکی نەوتهەڵگری پەیوەندیدار بە ئێرانیان لە بەندەرەکانی چین پشتڕاستکردووەتەوە، بەڵام هیچ زانیارییەکی وردتری لەو بارەیەوە نەداوە.
ئەمەش لە کاتێکدایە کە بەپێی ڕاگەیەندراوە رەسمییەکانی ئێران، تەنیا لە شەش مانگی یەکەمی ئەمساڵدا زیاتر لە 16 ملیار دۆلار نەوت رەوانەی دەرەوە کراوە.
لە بەرانبەردا، سێنتکۆم رایگەیاندوە، لە دەستپێکی گەمارۆکانەوە ئێران نەیتوانیوە هیچ بڕە نەوتێک هەناردەی دەرەوە بکات و ئابورییەکەیان نزیکبوەتەوە لە سفر.
دۆناڵد ترەمپی سەرۆکی ئەمریکا، رایگەیاند توانای سەربازی ئێران بە تەواوەتی لاواز بووە، ئەو هەڕەشەی موجتەبا خامنەییش کردی، لوتکەی نائومێدییە کاتێک پۆشاکی دەسەڵات دەپۆشێت.
پێگەی هەواڵی ئیندیپێنت بڵاویکردوەتەوە، سەرۆکی ئەمریکا، وەڵامی هەڕەشەکەی موجتەبا خامنەیی داوەتەوە، کاتێک فەرمانی بە لێپرسراوە سەربازییەکانی کرد، ئامادەبن بۆ هەر وەڵامدانەوەیەک بە بێ دیاریکردنی سنوری جوگرافیا لە ئەگەریی هێرشی ئەمریکا یان ئیسرائیلدا.
ترەمپ بە بەراوردکردنی توانای سەربازیی کۆماری ئیسلامی پێش جەنگ و دوای هەشت مانگ لە جەنگ، جەختیکردوەتەوە، هێزی دەریایی ئێران تێکشکێنراوە، ژێرخانی ئەتۆمی لەناوبراوە و حزبوڵای لوبنانیش روبەڕووی لاوازییەکى زۆر بووەتەوە.
دۆناڵد ترەمپ لە پەیامەکەدا، ئاماژەی بەوەشکردوە، لە سەرەتاوە توانای سەربازیی ئێران زیاتر نمایش بووە تا راستی؛ لەم جەنگەدا ئەو راستییە سەلمێندرا.
كۆریای باكور بۆمبێكی هێشوویی تاقیدەكاتەوە كە 13 هێكتار زەوی دەوروبەری خۆی دەكاتە خۆڵەمێش.
ئاژانسی هەواڵی ناوەندی كۆریای باكور رایانگەیاند، پیۆنگیانگ بۆمبێكی هێشوویی تاقیكردۆتەوە كە دەكرێت لەسەر موشەكی بالیستی تاكتیكی جێگیر بكرێت، و بەڵێنیانداوە تا كۆتایی ئەمساڵ جۆرەها كڵاوەی جەنگیی هێشوویی بڵاوبكەنەوە.
بەپێی ئاژانسی یۆنهاپی كۆریای باشوریش، بۆمبی هێشووییەكە دەیان تا سەدان تەقەمەنی بچووك بەردەداتەوە، ئەمەش رێگەی پێدەدات بەپانی رووبەرێكی گەورە ئامانجی جۆراوجۆر بپێكێت.
پەیمانگاكانی توێژینەوەی سەر بە ئیدارەی موشەكی پشتڕاستیانكردەوە، كڵاوەی جەنگی بۆمبە هێشووییە نوێكەی كۆریای باكور، بەرزترین توانای وێرانكارییان هەیە و دەتوانن ناوچەیەكی ئامانجكراو كە رووبەرەكەی لە نێوان 12 بۆ 13 هێكتاردایە بكەنە خۆڵەمێش.
ئەندامێکی وەفدی ئیمرالی رایگەیاند، عەبدوڵا ئۆجەلان گوازراوەتەوە بۆ شوێنە نوێیەکەی و بە گوێرەی زانیارییەکانی کوردسات نیوز، ماڵێکی دوو نهۆمییە و هەر لە دورگەی ئیمراڵیدایە.
ئەمڕۆ شيممە، میدحات سانجار، ئەندامی وەفدی ئیمراڵی رایگەیاند، عەبدوڵا ئــۆجەلان لە زیندانی دورگەی ئیمراڵی گواستراوەتەوە بۆ شوێنە نوێیەکەی.
سەرچاوەیەکیش لە دەم پارتی بە کوردسات نیوزی راگەیاند، شوێنە نوێیەکە هەر لە دورگەی ئیمراڵییە و خانویەکی دوو نهۆمییە، بە روبەڕی 230 مەتر چوارگۆشە.
ئەو سەرچاوەیە ئاماژەی بەوەشکردوە، ئەو خانوە نوێیەی ئۆجەلانی تێدایە ئینتەرنێتی بۆدابین کراوە و بڕیاریشە مانگی 11 وەفدی دەمپارتی سەردانی ئۆجەلان بکەن.
بە گوێرەی زانیارییەکان، جگە لە ئۆجەلان خۆی، سەرجەم سکرتێرەکانی ئۆجەلان لەگەڵ ئەو گواستراونەتەوە بۆ شوێنە نوێیەکە.
دوای پازدە ساڵ، بە دەستگیرکردنی تاوانبارێک، کۆتایی بە کابووس و چیرۆکی بکوژی زنجیرەیی ئۆگەندا هات، کە بە خواردنی گۆشتی کوژراوەکان ترسی خستبووە دڵی خەڵکەوە.
موهوزی کاینەروگابا، فەرماندەی گشتیی هێزەکانی وڵاتی ئۆگەندا دەستگیرکردنی پیاوێکی بە ناوی "موسی موجوریزی" راگەیاند، کە تۆمەتبارە بەوەی لە ماوەی 15 ساڵدا 38کەسی لە وڵاتەکەدا کوشتووە و دواتر گۆشتی کوژراوەکانی خواردووە.
فەرماندەی گشتیی هێزەکانی وڵاتی ئۆگەندا لە تۆڕی کۆمەڵایەتیی ئێکس ئاماژەی بەوە کردووە کە ئەم تۆمەتبارە خراپترین بکوژی زنجیرەیی و مرۆڤخۆرە لە مێژوی وڵاتەکەیاندا.
هەرچەندە هێشتا هیچ بڕیارێکی رەسمی لە دادگاوە دەربارەی تاوانباربوونەکەی دەرنەچووە، بەڵام فەرماندەکەی ئۆگەندا جەختی کردووەتەوە، لە دادگایەکی گشتییدا و بە ئاشکرا ئەو تۆمەتبارە لەسێدارە دەدرێت.
بەگوێرەی زانیارییەکان، ئەم تاوانبارە مەترسیدارە لە رابردوودا چەندین جار لەلایەن پۆلیسەوە دەستگیرکراوە، بەڵام بە شێوازێکی گوماناوی هەمیشە ئازاد کراوە یان رایکردووە.
لە ئێستاشدا پۆلیسی ئۆگەندا رایگەیاندوە، لێکۆڵینەوەی لە دۆسیەکە دەستپێکردووە، چونکە گومانیان هەیە لەوەی ژمارەی کوژراوەکان زیاتربێت.
موحسن رەزایی، سکرتێری ئەنجومەنی باڵای ئاسایشی نەتەوەیی ئێران رایگەیاند، نامەکەی جەی دی ڤانس، جێگری سەرۆکی ئەمریکای خوێندوەتەوە، بەڵام هێشتا وەڵامی نەداوەتەوە.
موحسن رەزایی، لەبارەی نامەکەی جەی دی ڤانسەوە بە میدیایی وڵاتەکەی راگەیاندوە، نامەکەی بینیوە و شێوازی قسەکردنی ئەمریکا بە تەواوەتی گۆڕاوە.
ناوبراو، جەختیکردەوە، بەڕونیی لە نامەکەدا شێوازی قسەکردنی ئەمریکا گۆڕاوە و ئەمەش شتێکی باشي و نیشانەی چەسپاندنی سەرکەوتن و دەسەڵاتی گەلی ئێرانە.
موحسن رەزایی راشیگەیاندوە، تا ئێستا هیچ بڕیارێکی نوێ لەسەر ئاستی رەسمی و حکومی بۆ گۆڕینی بابەتی ئەتۆمییەکەی تاران نەدراوە.
ئەم لێدوانانە لە کاتێکدایە، عەباس عراقچی، وەزیری دەرەوەی ئێران و مارکۆ روبیۆ، وەزیری دەرەوەی ئەمریکا جەختیان لەسەر پشکنینی وردی نامەکە و ئامادەیی بۆ چارەسەری دیپلۆماسی کردووەتەوە.
12یەمین فێستیڤاڵی هەنار لە هەڵەبجە کۆتاییهات و لە ماوەی چوار رۆژی فێستیڤاڵەکەدا، پێشوازییەکی بێوێنە لە گەشتیار و سەردانیکاران کرا، بە جۆرێک زیاتر لە 502 هەزار کەس سەردانی فێستیڤاڵەکەیان کرد و کۆی گشتیی فرۆشی بەرهەمەکانیش گەیشتە ملیارێک و 820 ملیۆن دینار.
لە کۆنفرانسێکی رۆژنامەوانیدا، لیژنەی فێستیڤاڵی هەنار لە هەڵەبجە، رایگەیاند سەرکەوتوبون لە بەڕێوەچونی 12هەمین فێستیڤاڵی هەنار لە هەڵەبجە، و توانیویانە پلانێکی تۆکمەی هاتوچۆ و ئەمنی جێبەجێ بکەن و فرۆشیی فێستیڤاڵەکەش ملیارێک و 820 ملیۆن دیناری تێپەڕاندوە.
ئاماژە بەوەشکرا، لە چوار رۆژی فێستیڤاڵەکەدا زیاتر لە 500 هەزار سەردانیکار سەردانی فێستیڤاڵەکەیان کردوە و تێیدا پێشوازی لە 96 هەزار ئۆتۆمبێلی بچووک، زیاتر لە سێ هەزار مینی‌پاس، 2500 پاسی گەورە، 444 مەنشەئە و پێنج گەزار ماتۆڕسکیل کرا، بە بێ ئەوەی هیچ ڕووداوێکی نەخوازراو تۆمار بکرێت.
هەروەها، فێستیڤاڵەکە دەرفەتی کاری بۆ 1800 خاوەنكار و بەهرەمەند رەخساند و بە کۆی گشتی زیاتر لە 3500 کەس راستەوخۆ لە دەستکەوتەکانی ئەم ساڵی ناو فێستیڤاڵەکە سوودمەند بوون.
رابەری باڵای ئێران هۆشداری دەداتە ئەمریكا و ئیسرائیل و دەڵێت، لە ئەگەری هەڵگیرسانەوەی جەنگ ئێران وەڵامی دەستبەجێ و راستەوخۆی بۆ هەر هێرشێك دەبێت و هیچ جوگرافیایەكیش هێڵی سوور نابێت بۆ وەڵامدانەوەكان.
ئاژانسی هەواڵی" تەسنیم"ـی ئێرانی بڵاویكردەوە، موجتەبا خامنەیی رابەری باڵای ئێران تایبەت بە ئامادەكارییەكان بۆ ئەگەری هەڵگیرسانەوەی جەنگ، لەگەڵ فەرماندە باڵاكانی هێزە چەكدارەكانی وڵاتەكەی كۆبووەتەوە.
لە كۆبوونەوەكەدا خامنەیی جەختیكردەوە لە ئامادەباشی سەربازی بۆ بەرەنگاربوونەوەی دوژمنان، بڕیاریشدا هەر جۆرە هێرشێك بكرێتەسەر ئێران، هێزە چەكدارەكانی ئێران وەڵامی دەستبەجێ و راستەوخۆیان هەبێت بەبێ سنوورداركردنی جوگرافی.
هەروەها، خامنەیی بڕیاریدا لیستی ئامانجی هێزە چەكدارەكانی ئێران نوێ بكرێتەوە و زۆرترین بەرژەوەندیی و سەربازگە و بنكەكانی ئەمریكا و ئیسرائیل لە ناوچەكە بگرێتەوە، رێنماییشدا بۆ فراوانكردنی زانیاری سەربازی و پتەوكردنی بەرگری ناوخۆ لەسەر هەموو ئاستەكان، بە پشتبەستن بە تەكنەلۆژیای نوێ.
لەبەشێكی تری كۆبوونەوەكەشدا، خامنەیی جەختیلەوەكردەوە، ئەگەر جەنگی دژی ئێران دەستپێبكاتەوە ئەوە هێزە چەكدارەكان و گەلی ئێران مەرجەكانی كۆتاییهاتنی جەنگ دیاریدەكەن.
ئەندامێکی سەرکردایەتی یەکێتی دەڵێت؛ دید و تێڕوانینی یەکێتی بۆ راستکردنەوەی رێڕەوی حوکمڕانی و پێکهێنانی حکومەتێکی شەراکەتی راستەقینەیە کە رەنگدانەوەی کۆی هاوسەنگییە هەستیارەکانی حوکمڕانی بێت.
لوقمان وەردی، ئەندامی سەرکرایەتی یەکێتیی نیشتمانیی کوردستان لە لێدوانێکی رۆژنامەنووسیدا رایگەیاند، سەرەڕای بوونی قسە و گفتوگۆ، بەڵام تا ئێستا هەنگاوەکان نەگەیشتوونەتە قۆناغێکی دڵخۆشکەر بۆ پێکهێنانی کابینەی نوێ، ئەمەش دەکەوێتە سەر ئەوەی لایەنی بەرانبەر تا چەند هەنگاو بێتە پێشەوە.
لە بەشێکی تری قسەکانیدا، ئەوەشی خستەڕوو، سەرەڕای ناکۆکییە سیاسییەکانی ناوخۆی هەرێمی کوردستان، پێویستە هێزە کوردییەکان لە بەغداد یەکدەست و یەکگرتوو بن بۆ داکۆکیکردن لە مافەکانی خەڵکی کوردستان و چەسپاندنی پشکی کورد لە بودجەی عیراقدا.
لوقمان وەردی جەختیشیکردەوە، ماف و دەستوری خەڵکی کوردستان بە هیچ شێوەیەک سازشی ناکرێت.
نیگەرانییە سەربازییەکانی ئیسرائیل بەرانبەر ئەگەری دەستپێکردنی هەڵمەتێکی بۆردومانی خێرای ئەمریکا بۆ سەر ئێران لە هەڵکشاندایە؛ بەپێی راپۆرتێکی رۆژنامەیەکی ئیسرائیلی، تەلئەبیب مەترسیی هەیە هێرشە خێراکانی واشنتۆن نەبنە هۆی کۆتاییهێنان بە دەسەڵاتی تاران و لەناوبردنی تەواوەتیی بەرنامە ئەتۆمییەکەی.
سەرکردایەتیی سەربازیی ئیسرائیل نیشانەی نیگەرانیی بەرانبەر ئەگەری هەڵمەتێکی بۆردومانی خێرای ئەمریکا بۆ سەر ئێران نیشان دەدات، بە تایبەتی دوای هەڵبژاردنەکانی نیوەی خولی کۆنگرێسی ئەمریکا لە هەفتەی داهاتوودا، تێڕوانینی ئیسرائیل وا کە ئەو جۆرە هێرشە ناتوانێت کۆتایی بە دەسەڵاتی ئێران بهێنێت و ئامانجە سەربازییەکانی ئیسرائیل بپێکێت.
بەپێی راپۆرتێکی رۆژنامەی "هارتس"ـی ئیسرائیلی، لێپرسراوانی ئیسرائیل نیگەرانن لەوەی دۆناڵد ترەمپ سەرۆکی ئەمریکا دوای ئەنجامدانی لێدانە سەربازییەکان، بەرەو ئیمزاکردنی رێککەوتنێک لەگەڵ تاران هەنگاو بنێت؛ ئەمەش وەک ئەوەی لە دوو گەڕی هێرشەکانی پێشتریدا رویدا، وا لە ئێران دەکات توانای بەرگریی خۆی زۆر زیاتر لە رابردوو بەهێز بکاتەوە.
ئەم ئاگادارییانە ئاشکرای دەکەن کە ناکۆکی لە نێوان ئیسرائیل و ئەمریکادا هەیە لەسەر ئەو ئامانجانەی پێویستە لە ئەگەری هەڵگیرسانی جەنگێکی نوێدا بپێکرێن.
لە کاتێکدا بنیامین نەتانیاهۆ سەرۆک وەزیرانی ئیسرائیل کۆتاییهێنان بە دەسەڵاتی ئێران و تێکدانی تەواوەتی بەرنامە ئەتۆمییەکەی کردووەتە ئامانجی سەربازیی خۆی، واشنتۆن تەنها هەوڵی ئەوە دەدات دەستکەوت و سازش لە تاران وەربگرێت سەبارەت بە بەرنامە ئەتۆمییەکەی و دەستەبەرکردنی ئازادیی کەشتیوانی لە گەروی هورمزدا.
رۆژنامەی "هارتس" ئەوەشی خستووەتەڕوو، ئەفسەرانی هەواڵگریی سەربازیی ئیسرائیل و هێزی ئاسمانیی ئەو وڵاتە گومانیان لەوە هەیە هەڵمەتێکی هێرشی ئاسمانیی ئەمریکا کە چەند رۆژێک بخایەنێت، بتوانێت دەسەڵاتی ئێران ناچار بە خۆبەدەستەوەدان بکات، چ جای ئەوەی ببێتە هۆی کۆتاییهێنان بە دەسەڵاتەکەی.
تەنانەت هەڵسەنگاندنەکانی هەواڵگریی ئیسرائیل هۆشداری دەدەن کە هێرشە نوێیەکان لە باشترین حاڵەتدا تەنها دەبنە هۆی دواخستنی بەرنامە ئەتۆمییەکەی ئێران؛ چونکە تاران شوێنە هەستیارەکانی بەهێز کردووە و تا ئێستاش توانای ئەوەی هەیە بنکە و ژێرخانە تێکچووەکانی جارێکی تر دروستبکاتەوە و زیانەکانی سیستمی بەرگریی خۆی پڕبکاتەوە.
فەرماندە سەربازییەکانی ئیسرائیل کابینەی حکومەتەکەیان ئاگادارکردووەتەوە کە بەشداری کردن لە هەڵمەتێکی سەربازیدا بەبێ رێککەوتنی پێشوەختە لەسەر ئامانجی روون و هاوبەش، رێگە بە واشنتۆن دەدات بەپێی مەرجەکانی خۆی لە جەنگەکە بکشێتەوە بەبێ گوێدانە ئیسرائیل، بەمەش ئیسرائیل لە جەنگێکی کراوە و بەبێ کاتپێویستدا دەمێنێتەوە کە تێچووی سەربازی و ئابوریی بەردەوام لە بەرزبوونەوەدا دەبێت.
لێپرسراوانی وەزارەتی بەرگریی ئیسرائیل دان بەوەدا دەنێن کە ئێران توانای خۆڕاگریی بەردەوامی هەیە بەرانبەر بە لێکەوتەکانی جەنگ و گۆڕەپانی گەمارۆی دەریایی بۆ ماوەی دوو ساڵی تریش، بەمەش دەتوانێت تا کۆتایی هاتی خولی ئیدارەی ئێستای ئەمریکا خۆی رابگرێت بەبێ دەستبەرداربوون لە ئامانجە سەرەکییەکانی.
لە لایەکی ترەوە، دارێژەرانی پلانی سەربازیی ئیسرائیل دان بەوەدا دەنێن کە بەدەستهێنانی پشتگیریی جەماوەری بۆ هەڵگیرساندنی جەنگێکی نوێ دوای هەڵبژاردنە پەرلەمانییەکانی'کنێست'ـی ولاتەکەی، کارێکی ئاسان نابێت.
مەترسییەکانی ئیسرائیل لە خێرایی بووژانەوەی تواناکانی ئێران
بەپێی راپۆرتەکە، لێپرسراوانی بەرگریی ئیسرائیل بەردەوام سەرسامیی خۆیان دەربڕیوە بەرانبەر بەو خێراییەی کە ئێران توانیویەتی تواناکانی بەرهەمهێنانی موشەکی بالیستی نۆژەن بکاتەوە دوای هەر هەڵمەتێکی بۆردومانی ئەمریکی و ئیسرائیلییەوە.
زانیارییەکانی ناو راپۆرتەکە ئاماژە بەوە دەکەن، یەدەگی موشەکیی ئێران لە نێوان جەنگی حوزەیرانی 2025 و شوباتی 2026 دا نزیکەی دوو بەرانبەر زیادی کردووە و گەیشتووەتە رێژەی دوو هەزار و 500 موشەک.
ئاژانسەکانی هەوال ئاماژە بەوە دەکەن، سەرەڕای ئەوەی ئێران بەرکەوتەی زیاتر لە 20 هەزار لێدانی ئەمریکی و ئیسرائیلی بووە، بەڵام تا ئێستاش خاوەنی سەدان و هەزاران موشەکە و توانای داخستنی گەروی هورمزی هەیە.
هەروەها تاران سودی لە سەقامگیرییە کاتییەکان وەرگرتووە بۆ دووبارە پڕکردنەوەی کۆگاکانی سەربازی و بەهێزکردنی بەرگرییەکانی خۆی بە مەبەستی رووبەڕووبوونەوە لەگەڵ هەر ئەگەرێکی نوێدا.
هاوکات، کەناڵی 15ـی ئیسرائیلی بڵاویکردەوە، سوپای ئیسرائیل سەرجەم ئامادەکارییە سەربازییەکانی بۆ ئەنجامدانی هێرش بۆ سەر ئێران تەواو کردووە.
کەناڵەکە ئاماژەی بەوەکردووە، سوپای ئیسرائیل لە "ئامادەباشیی بەرزدایە بۆ هێرشکردنە سەر ئێران"، و روونیکردووەتەوە کە ئیسرائیل پێیوایە هەڵمەتی سەربازیی داهاتوو زۆر دەخایەنێت.
کەناڵەکە ئاشکراشیکردووە، ئەم گرژییانە لە کاتێکدا روو دەدەن کە ئیسرائیل لە ناوخۆدا لە رەوشێكی ئاڵۆزی سیاسی و پشێویدایە، هاوکات لەگەڵ پێشهاتە سیاسییەکانی ئەمریکا؛ ئەم هۆکارانەش بەیەکەوە بڕیاردەرانی ئیسرائیلیان لەبەردەم رێڕەوێکی زۆر هەستیار و یەکلاکەرەوەدا داناوە.
کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد، لە سلێمانی و ناوچەکانی دەوروبەری ئەگەری نمەباران هەیە.
بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ ئاسمان لە نێوان پەڵەهەور بۆ نیمچەهەور دەبێت، هەروەها ئەگەری بارینی نمە بارانێکی کەم لە هەندێک کاتدا لە دەوروبەری سنوری پارێزگاکانی سلێمانی و هەڵەبجە و بەشێک لە ئیدارەی گەرمیان هەیە.
کەشناسی ئاماژەی بەوەشکردووە، سبەینێ ئاسمان لە نێوان پەڵە هەور و نیمچە هەوردا دەبێت و لە کاتەکانی ئێوارەدا ئەگەری بارینی تاوە بارانی کورتخایەن هەیە، بە تایبەتی لە سنوری پارێزگای سلێمانی و هەڵەبجە و دەوروبەریان، هاوکات پلەکانی گەرماش یەک بۆ دوو پلە بەراورد بە تۆمارەکانی ئەمڕۆ بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر: 27 پلەی سیلیزی
سلێمانی: 24 پلەی سیلیزی
دهۆک: 26 پلەی سیلیزی
هەڵەبجە: 26 پلەی سیلیزی
سۆران : 25 پلەی سیلیزی
پیرمام: 24 پلەی سیلیزی
چەمچەماڵ: 27 پلەی سیلیزی
زاخۆ: 26 پلەی سیلیزی
گەرمیان: 31 پلەی سیلیزی
حاجی ئۆمەران: 16 پلەی سیلیزی
رۆژی 29ـی 10ـی 2026، هاووڵاتییەک بەناوی 'ئارام محەمەد حەمەساڵح' لە قەزای شارەزور بە دەستڕێژی گولـلە کوژرا و ئەمڕۆش تۆمەتباری کوشتنەکە دەستگیرکرا.
دەزگای ئاسایشی هەرێم رایگەیاندووە، دوای ئەوەی لە رۆژی 29ـی 10ـی 2026، لەقەزای شارەزوور هاووڵاتییەک بە دەستڕێژی گولـلە کوژرا، بەدواداچوون و لێکۆڵینەوە ئەنجامدرا، شوێنی خۆحەشاردانی تۆمەتبار دەستنیشان كرا و شەوی رابردوو تۆمەتبار خۆی رادەستی بەڕێوەبەرایەتی ئاسایشی پارێزگای هەڵەبجە کرد و دەستگیرا بەسەر ئۆتۆمبێل و دەمانچەی تۆمەتباردا.
بەپێی زانیارییەکانی دەزگای ئاسایشی هەرێم، لەئێستادا تۆمەتبار بەماددەی (406)لەیاسای سزادانی عیراقی راگیراوە و لێکۆڵینەوە لەدۆسیەکە بەردەوامە.