عیراق
دەزگای ئاسایشی نیشتمانی عیراق لەبارەی دەستگیرکردنی عەجاج ئەحمەد حەردان راگەیەنراوێکی بڵاوکردەوە.
دەزگای ئاسایشی نیشتمانی عیراق بڵاویکردەوە، میانەی هەوڵەکان بۆ دەستگیرکردنی تاوانبارانی رژێمی پێشوی عیراق و لە هەوڵێکی کە ماوەی شەش مانگی خایاندووە بەهەماهەنگی لەگەڵ هێزەکانیان لە پارێزگای موسەنا و باشوری سەڵاحەدین توانیویانە یەکێک لە دیارترین تاوانبارانی رژێمی پیشوی عیراق دەستگیربکەن کە ئەفسەرێکی لێپرسراوبووە لە ئاسایشی زیندانی نوگرە سەلمان.
لە بڵاوکراوەکەدا ئاماژە بەوەکراوە، تۆمەتبار پێشتر لەناوچەکانی رومەیسە و نەجمی و هیلال و پارێزگای موسەنا و ناوچەی بەسیە بووە، لەکۆتایشدا زیندانی نوگرەسەلمان ئەفسەربووە.
رونیشیکردوەتەوە، تۆمەتبار تاوانی دەرهەق بە هاووڵاتیانی مەدەنی کردووە بەتایبەت نەتەوەی کورد بە ئەشکەنجەدان و دەستدرێژی کردنەسەریان لە زیندانی نوگرە سەلمان.
دەزگای نیشتمانی عیراق ئەوەشی خستوەتەڕوو، بەمەستی بەلاڕێدابردنی دەزگا ئەمنیەکان، کەسە نزیکەکانی ئەو تۆمەتبارە بۆماوەی چەندین ساڵ بە مردوو لە قەڵەمیانداوە، پاش کۆکردنەوەی زانیاری هەواڵگری ورد توانراوە ،شوێنی خۆحەشاردانی لە پارێزگای سەلاحەدین بدۆزرێتەوە و پاش وەرگرتنی رەزامەندی دادگا توانراوە دەستگیربکرێت.
دەزگای ئاسایشی نیشتیمانی عێراق جەختیکردوەتەوە، کە دەستی دادپەروەری بەردەوام دەبێت لە راوەدونانی هەموو ئەو کەسانەی دەستیان بە خوێنی کەسانی بێتاوان سورە و کاتیش نابێتە رێگر بۆ دەستگیرکردنی ئەو کەسانەی لەدەستی یاسا هەڵاتوون.
دەقی راگەیەنراوەکە...
"هەمیشە پشتیوانی کەسوکاری شەهیدان و قوربانیانی ئەنفال بووم ، وەک بەڵێنم پێدان هەوڵی بەدیهێنانی دادپەروەری بدەین هەرچەند بخایەنێت، لێپرسینەوە لەوانەش بکرێت کە دەستی چەپەڵیان بەخوێنی ژنان و منداڵانی بێتاوانمان سوورە.
دواجار توانیمان شوێنی عجاج ئەحمەد حەردان دیاری بکەین کە یەکێک بوو لەو جەلادە دڕندانەی زیندانی نوگرە سەلمان، کەلە لەقوڵایی بیابانی سەماوە لە پارێزگای موسەنا دەستگیربکەین، ئەو زیندانەی هەزاران ژن و منداڵ و پیر تێیدا ئەشکەنجە دران و برسی کران و بە بێدەنگی خرانە ژێر خاکەوە.
عەجاج بە مامەڵەی دڕندانە و دژ بە مرۆڤایەتی و ئەو ترس و تۆقاندنە ناسراو بوو کە لەگەڵ شەهیدانی ئەنفالکراو بەکاری دەهێنا، وا لەدوای 37 ساڵ چیتر ئەم تاوانبارە ئازاد نییە و دەستبەسەرە.
داوا لەهەموو زیندانیەکانی رابردوو، خێزانی قوربانیانی ئەنفال، کەسوکاری بێ سەروشوێنبوان ئەکەم سکاڵای یاسایی تۆمار بکەن و گەواهی بدەن تا دادپەروەری فەراهەم بێت و ئەم تاوانبارە خوێنمژە لەسەر تاوانەکانی دەرهەق بەگەلەکەمان، لێپرسینەوەی لەگەڵ بکرێت.
بەوپەڕی توانامەوە بەرگری لەم دۆسییە مرۆیی و مێژوویی و نیشتمانییە دەکەم و هەرگیز کۆڵنادەم لە یادکردنەوەی شەهیدانمان، هەروەها بەردەوام دەبم لە تێکۆشان لەپێناو راستی و دادپەروەری".
بە هاوكاری نوسینگەی سەرۆك كۆمار و خانمی یەكەمی عیراق تاوانبارێكی شاڵاوەكانی ئەنفال بە ناوی "عەجاج ئەحمەد حەردان" دەستگیر كرا.
بەپێی زانیارییەکان، تاوانبار "عەجاج ئەحمەد حەردان" یەکێک بووە لە سەرپەرشتیارانی زیندانی نوگرە سەلمان لە پارێزگای سەماوە لە باشوری عیراق.
نوسینگەی خانمی یەكەمی عیراق رایگەیاندووە: داوا لە زیندانیكراوان و كەسوكاری زیندانیكراوان و بێسەرشوێنبووەكان دەكەین پەیوەندیمان پێوەبكەن بۆ تۆماركردنی سكاڵا دژی ئەو تاوانبارە.
عەجاج کێیە؟
عەجاج یان حەجاج، ناوی (عەجاج ئەحمەد حەردان) تکریتیە، خەڵکی تکریتە و لە عەشیرەتی ئەلبوناسر و هۆزی نزارە، واتە عەشیرەتەکەی سەدام حسێن، هەروەها پلەی رائیدی ئەمن بووە.
لەدوای روخانی رژێمی بەعس، ماڵی لە کەرکوک بووە، دواتر بەرەو سوریا رایکردوە و لە گەڕەکی جەرمانەی دیمەشقی پایتەختی سوریا لە شوقەیەکدا ژیاوە.
لەکاتی دادگایکردنی سەرانی رژێمی بەعس، بەردەوام سەیری پرۆسەکەی کردوە و ئاگاداری ئەوە بووە ناوی وەک تاوانبار لە تاوانی ئەنفالدا هاتووە.
سێ کوڕی هەبووە، دووانیان بوونەتە چەکداری قاعیدە و لە شەڕێکدا لە ناحیەی (زلوعیە)ی پارێزگای سەڵاحەدین کوژراون، هەروەها کوڕە بچووکەکەی ناوی رائید بووە و لە سوریا لەگەڵ باوکی ژیاوە.
عەجاج دوو پاسەوانی تایبەتی هەبووە بەناوەکانی سەخر و شەوقی، چارەنووسی سەخر نادیارە، شەوقی لە ساڵی ٢٠١١ چووەتە ئەڵمانیا و داوای مافی پەنابەری کردوە.
د. لەتیف رەشید سەرۆک کۆماری عیراق پێشوازیکرد لە گلێن مایڵز باڵیۆزی ئوسترالیا لە عیراق.
لە میانی دیدارەکەدا، کە ڕۆژی پێنجشەممە 31-7-2025 لە کۆشکی بەغداد بەڕێوەچوو، سەرۆک کۆمار پەرۆشی عیراقی دووپات کردەوە بۆ پەرەپێدانی پەیوەندییەکانی لەگەڵ ئوسترالیا بە شێوەیەک کە خزمەت بە بەرژەوەندیی هاوبەشی هەردوو وڵات بکات. جەختیکردەوە لە گرنگی هەماهەنگی و کاری هاوبەش بۆ چەسپاندنی ئاسایش و سەقامگیری ناوچەکە و کەمکردنەوەی ئەو گرژیانەی کە هەڕەشە لە ئاشتیی ئیقلیمی و نێودەوڵەتی دەکەن.
سەرۆک کۆمار ئاماژەیکرد بە پێویستی هەوڵەکانی کۆمەڵی نێودەوڵەتی بۆ کۆتایی هێنان بە نەهامەتیەکانی گەلی فەلەستین کە بەهۆی بەردەوامی دەستدرێژییەکان بۆ سەر کەرتی غەززە روبەروی دەبنەوە و هەروەها کارکردن بۆ دەستەبەرکردن و گەیاندنی هاریکاری مرۆیی بۆ کەرتی غەززە.
لای خۆیەوە باڵیۆز مایڵز پێزانینی وڵاتەکەی بۆ پەیوەندیی نێوان هەردوو وڵات نیشاندا و پابەندبوونی ئوسترالیای دووپاتکردەوە بۆ بەردەوامبوونی پشتیوانییەکانی بۆ عیراق و ویستی بۆ پەرەپێدانی هاریکاری دووقۆڵی لەسەر مەسەلەی بەرژەوەندی هاوبەش.
سەرۆک کۆمار و سەرۆکی ئەنجومەنی وەزیرانی عیراق کۆبوونەوە و باسیان لە دوایین پێشهاتەکانی ناوچەکە، دۆسیەکانی نێوان عیراق و هەرێم، هەڵبژاردن، ئاسایش و سەروەری عیراق کرد.
ئەمڕۆ چوارشەممە، لە کۆشکی بەغداد د. لەتیف رەشید سەرۆک کۆماری عیراق لەگەڵ محەمەد شیاع سودانی سەرۆکوەزیران کۆبووەوە.
لە کۆبوونەوەکەدا گفتوگۆ لەبارەی دۆخی گشتیی وڵات کرا و جەخت لەسەر پێویستیی چڕکردنەوەی هەوڵەکان بۆ بەهێزکردنی ئاسایش و سەقامگیری، پاراستنی سەروەریی عێراق و پشتیوانیکردنی هەوڵەکانی حکومەت لە رووبەڕووبوونەوەی ئەو ئاڵنگارییە جیاوازانەی کە ناوچەکە پێیدا تێپەڕ دەبێت، کرایەوە، لەگەڵ رووبەڕووبوونەوەی توندی ئەو پێشێلکاریانەی کە ئاسایش و سەلامەتیی هاووڵاتیان دەکەنە ئامانج.
هەر لە کۆبوونەوەکەدا گفتوگۆ کرا لەسەر دۆسیە هەڵپەسێردراوەکانی نێوان حکومەتی فیدڕاڵی و حکومەتی هەرێمی کوردستان و جەخت کرایەوە لەسەر چارەسەرکردنیان بەپێی چوارچێوە دەستوری و یاساییە کارپێکراوەکان بە شێوەیەک کە دادپەروەریی کۆمەڵایەتی و گەشەپێدانی بەردەوام بەدی بهێنێت، ئەمە جگە لە جەختکردنەوە لەسەر یەکخستنی هەڵوێست و دیدگاکان لە نێوان سەرجەم هێز و لایەنە سیاسییەکان و زاڵکردنی بەرژەوەندیی نیشتمانی بەسەر بەرژەوەندییە کەسی و حیزبییەکاندا.
هەر لە دیدارەکەدا، ئامادەکارییە بەردەوامەکان بۆ ئەنجامدانی هەڵبژاردنەکانی ئەنجومەنی نوێنەران لە وادەی دیاریکراوی خۆیدا خرانەڕوو و جەخت کرایەوە لەسەر گرنگیی بەکارنەهێنانی سەرچاوە و توانستە مرۆیی و ماددییەکانی دەوڵەت بۆ مەبەستی هەڵبژاردن و رێگریکردن لە قۆستنەوەی پۆستە حکومییەکان بۆ کاریگەریکردنە سەر ئیرادەی دەنگدەر، بە شێوەیەک کە ببێتە هۆی بەهێزکردنی متمانەی هاووڵاتی بە پرۆسەی دیموکراسی و پابەندبوون بە یاسا و رێنماییەکان بۆ مسۆگەرکردنی پاک و بێگەردی هەڵبژاردنەکان.
وەزارەتی خوێندنی باڵا وردەکاریی دامەزراندنی سێ یەکەمەکان و خاوەن بڕوانامە باڵاکانی دانیشتوی دەرەوەی هەرێم لەسەر میلاکی حکومەتی فیدراڵی بڵاوکردەوە.
دەقی وردەکاریی و رێنماییەکان:
1.دەرچووانی ساڵی (٢٠٠٣) تا ئەمڕۆ دەگرێتەوە.
2. دەرچووانی دەرەوەی عێراق لە زانکۆى پارێزگاکانی خۆیان بەپێی کارتی زانیاری داوکاری پێشکەش دەکەن.
3.پێشکەشکار فۆرمی داوکاری دامەزراندن و فۆرمی وەرگرتنی کۆد بەدەستی پڕ دەکاتەوە و ئیمزاى لەسەر دەکات.
4.تۆماری کۆلێژ و پەیمانگەکان فۆرمی ئۆنلاین بۆ دەرچووان پڕ دەکەنەوە.
5.پێویستە دەرچوو ئەم بەڵگەنامانە لەگەڵ خۆی ببات لە کاتی پێشکەشکردن:
-کارتی نیشتمانی دەرچوو لەگەڵ کارتی نیشتمانی دایک و باوکی دەرچوو.
-کارتی زانیاری یان بەڵگەنامەی نیشتەجێبوونی مۆرکراو لە یەکێک لە پارێزگاکانی دەرەوەی هەرێمی کوردستان.
-هەر دەرچوویەک سەردانی تۆمارى کۆلێژ نەکات و فۆرمی دەستی پڕنەکاتەوە بێ بەش دەبێت لە وەرگرتنی کۆد و دامەزراندن.
-لە ئێستادا تەنها کۆد دروست دەکرێت و لە داهاتوودا دامەزراندنەکە لەسەر میلاکی حکومەتی فیدراڵی دەبێت بەپێی شوێنی نیشتەجێبوون.
6.ئەم پرۆسەیە تەنها دانەمەزراوەکان دەگرێتەوە.
7.ئەم پرۆسەیە تا رۆژی (2025/9/15) سەعات (4)ى ئێوارە بەردەوام دەبێت.
8.ماوەی سکاڵا لە (2025/9/16) دەست پێ دەکات تا (2025/9/30).
وەزارەتی خوێندنی باڵا ئاگاداری سێ یەکەمەکان و خاوەن بڕوانامە باڵاکانی دەرەوەی ئیدارەی هەرێم دەکاتەوە، لەمڕۆوە سەردانی تۆماری زانکۆکانیان بکەن.
وەزارەتی خوێندنی باڵا و توێژینەوەی زانستیی هەرێم رایگەیاندووە، لەمڕۆوە سێ یەکەمەکان و خاوەن بڕوانامە باڵاکانى ناوچەکانی دەرەوەى هەرێم، دەتوانن سەردانى تۆمارى زانکۆکان بکەن بۆ وردەکاریى لەبارەى پێشکەشکردنى فۆڕمی زانیارییەکانیان.
ئاماژەی بەوەشکردووە، فۆڕمی زانیارییەکان بۆ سێ یەکەمەکان و هەڵگرانی بڕوانامە باڵاکانى زانکۆکانى هەرێمە کە دانیشتوی پارێزگاکانى دەرەوەی ئیدارەی هەرێمن؛ بۆ ئەوەی لەسەر میلاکی حکومەتی فیدراڵی دابمەزرێنرێن.
ئەوەشی خستووەتە روو، لینکى ناردنى داتاکانى ئەنجومەنى راژەى گشتى فیدڕاڵى لەلایەن وەزارەتەوە ئاراستەى سەرجەم تۆمارى گشتى زانکۆکان کراوە.
ئەوەش هاتووە، دوای پڕکردنەوەی فۆڕمەکان داتاکان بۆ ئەنجوەنی راژەی گشتیی فیدڕاڵی دەنێردرێتەوە.
توركیا داوا دەكات، رێككەوتنی نوێی نێوان ئەنقەرە و بەغداد میكانیزمێك بۆ گرەنتیكردنی بەكارهێنانی تەواوەتی هێلی بۆری نەوتی كەركوك-جەیهان لەخۆبگرێت.
ئاڵب ئەرسەلان بەیرەكتار وەزیری وزەی توركیا رایگەیاند، لە چوارچێوەی ئەو دانوستانەی لە نێوان ئەنقەرە و بەغداد هەیە بۆ فراوانكردنی رێككەوتنی نێوانیان لە بواری وزەدا، ئەنقەرە داوایكردوە، رێككەوتنێكی نوێ دابڕێژرێت كە لە رێیەوە گرەنتی بەكارهێنانی تەواوی هێڵی بۆری نەوتی كەركوك-جەیهان بكرێت.
وتیشی، توانای ئەو هێڵە بۆ گواستنەوەی نەوت رۆژانە یەك ملیۆن و 500 هەزار بەرمیلە، بەڵام لە رابردوودا و لە كاتی كاركردنیدا هەموو تواناكەی بەكارنەهێنراوە، وەزیری وزەی توركیا بە دوریشی نەزانیوە لە چوارچێوەی رێككەوتنێكی نوێدا بتوانن هێڵەكە بۆ باشوری عیراقیش درێژ بكەنەوە.
د.لەتیف رەشید سەرۆک کۆماری عیراق، ئەمڕۆ سێشەممە 29ی تەمموزی2025 لە کۆشکی بەغداد، پێشوازیکرد لە عەتوان حەسەن سامر ئەلعەتوانی، پارێزگاری بەغداد و هادی مجید گزار پارێزگاری واست .
لە دیدارێکدا مەرسومی کۆماری تایبەت بە دامەزراندنی پارێزگارانی بەغداد و واست رادەستی پارێزگارە نوێیەکان کرا و رەوشی ئەمنی و ئابووری و خزمەتگوزاری لە هەردوو پارێزگاکە تاوتوێ کرا.
سەرۆک کۆمار جەختی لەسەر پێویستی تۆکمەکردنەوەی هەوڵەکان کردەوە بۆ باشترکردنی خزمەتگوزارییەکان بۆ هاووڵاتیان و نۆژەنکردنەوەی ژێرخانی ئابووری و چەسپاندنی ئاسایش و سەقامگیری.
هەروەها سەرەخۆشی خۆی بۆ قوربانیانی کارەساتی ئاگرکەوتنەوەکەی بازاڕی هایپەرمارکێتەکەی واست دووپات کردەوە و هیوای سەرکەوتنی بۆ هەردوو پارێزگار خواست لە خزمەتکردنی عیراق و گەلەکەیدا.
لەلایەن خۆیانەوە، هەردوو پارێزگار پلانەکانی داهاتوویان و ئەو بەرنامانەی کە بۆ پێشخستنی کەرتی خزمەتگوزاری و تەواوکردنی پڕۆژەکان و بەردەوامیدان بە پڕۆسەی گەشەپێدان و ئاوەدانکردنەوە لە بەغداد و واست ئامادەیان کردووە پێشکەش بە سەرۆک کۆمار کرد.
هەروەها سوپاسی خۆیان بۆ گرنگیپێدانی سەرۆک کۆمار و پەرۆشی بۆ دابینکردنی پێداویستییەکانی ژیانێکی شایستە بۆ هەموو عیراقییەکان لە سەرتاسەری وڵاتدا دەربڕی.
دیدارەکە بە ئامادەبوونی عەمار ئەلحەمدانی، سەرۆکی ئەنجومەنی پارێزگای بەغدا، بەڕێوەچوو.
لە پاش ئەوەی بەشیک لە میدیا عەرەبی و کوردییەکان بڵاویانکردەوە کە نوری مالکی سەرۆکی هاوپەیمانیی دەوڵەتی یاسا جەڵتە لێی داوە و باری تەندروستی ناجێگیرە؛ نوسینگەی راگەیاندنی نوری مالکی، سەرۆکی هاوپەیمانیی دەوڵەتی یاسا، ئەو دەنگۆیانەی رەتکردەوە و رایگەیاند: "کە ناوبراو چەند پشکنینێکی پزیشکیی لە نەخۆشخانەی "ئیبن بیتار" لە بەغدا ئەنجامداوە و پشکنینەکانیش ئاسایی و وەرزانەبوون".
لە راگەیەندراوێکی کورتدا، نووسینگەی مالکی ئاماژەی بەوەکردووە، پشکنینەکان لە چوارچێوەی "بەدواداچوونی مانگانە و ئاسایی"دا بوون بۆ دڵنیابوونەوە لە باری تەندروستیی ناوبراو.
لە کۆتایی راگەیەندراوەکەدا، سوپاسی هەموو ئەو کەس و لایەنانە کراوە کە پەرۆشیی خۆیان بۆ تەندروستیی مالکی دەربڕیوە و هیوای تەندروستییەکی باش بۆ هەمووان خوازراوە.
محەمەد شیاع سودانی سەرۆك وەزیرانی عیراق هێرشی گروپە چەكدارەكان بۆ سەر كێڵگە نەوتییەكانی هەرێم بە تیرۆریستی ناودەبات.
سودانی لە چاوپێكەوتنێكدا لەگەڵ ئاژانسی ئەسۆشیەیتد پرێس رایگەیاندووە، ئەو هێرشانەی گروپە چەكدارەكان بۆسەر كێڵگە نەوتییەكانی هەرێمی كوردستان ئەنجامی دەدەن، كارێكی تیرۆریستییە و لەگەڵ لێپرسراوانی هەرێمیش لە هەماهەنگیدان بۆئەوەی ئەنجامدەرانی ئەو هێرشانە بدۆزرێنەوە و بدرێنە دادگا.
وتیشی، لە ماوەی 12 رۆژی شەڕی نێوان ئێران و ئیسرائیلدا، رێگرییان كردوە لە 29 هەوڵی گروپە چەكدارەكان بۆ هێرشكردنەسەر ئیسرائیل و سەربازگەكانی ئەمریكا لە رێی موشەك و درۆنەوە، شكستپێهێنانی ئەو هەوڵانەش لە رێی ئۆپراسیۆنی ئەمنی سەربازیی عیراقیەوە بووە، دوپاتیشكردوەتەوە، رێگە بە هیچ كەس و لایەنێك نادەن عیراق وەك سەربازگەیەك بۆ ئەنجامدانی ئۆپراسیۆنی سەربازیی بەكاربهێنێت و وڵات ببێتە گۆڕەپانی جەنگی وڵاتانی تر.
هەر لەو چاوپێكەوتنەدا سودانی جەختیكردوەتەوە عیراق بەرژوەندیی خۆی دەپارێزێت و لایەنگری هیچ لایەنێك ناكات لە ململانێكاندا، چونكە سەقامگیری و ئاسایشی عیراق لە سەرو هەموو بەرژوەندییەكەوەیە.
راوێژكاری سندوقی دانیشتوانی سەر بە نەتەوە یەكگرتووەكان ئاشكرایدەكات، ئاستی منداڵبوون لە عیراق دابەزینی بەرچاوی بەخۆوە بینیوە.
مەهدی عەلاق راوێژكاری سندوقی دانیشتوانی سەر بە نەتەوە یەكگرتووەكان بە ئاژانسی هەواڵی عیراقی وتووە، هەرچەندە هێشتا عیراق وەك وڵاتێك پۆلێن دەكرێت كە ژمارەی دانیشتووانەكەی زۆرە، بەڵام لەدوایین سەرژمێری گشتیدا دەركەوتووە كە دابەزینی بەرچاو هەیە لە وەچە خستنەوە لەناو خێزانەكاندا.
ئاماژەی بەوەشكردووە، رێژەی منداڵبوون لە ئێستادا بۆ ژنانی عیراق لە نێوان 3 بۆ 4 منداڵدایە، لەكاتێكدا لە ساڵانی حەفتاكان زیاتر لە 7 منداڵ بووە.
عەلاق هۆكاری كەمبوونەوەی لەدایكبوونی منداڵی بەستووەتەوە بە زیادبوونی هۆشیاری خێزان و رەخساندنی ژیانێكی باشتر بۆ منداڵەكانیان.
باسی لەوەشكردووە، ڕێژەی دانیشتوانی تەمەنی كاركردن لەنێوان 15 بۆ 64 ساڵ دەستپێدەكات كە بەنزیكەیی 60%ی كۆی ژمارەی دانیشتوانی عیراق پێكدەهێنێت.
پارێزگاری کەرکوک و وەزیری خوێندنی باڵای عیراق کۆبوونەوە و رێبوا تەها دەڵێت، "خوێندکارانی کورد لە کەرکوک دەتوانن بە کوردی وەڵام بدەنەوە".
رێبوار تەها پارێزگاری کەرکوک ئەم وێنانەی بڵاوکردووەتەوە و دەڵێت، خۆشحاڵبووم بە دیداری د. نەعیم عەبودی وەزیری خوێندنی باڵا و توێژینەوەی زانستی، سەبارەت بە وەرگێڕانی پرسیارەکان و وەڵامدانەوەی خوێندکارانى زانکۆکانی کەرکوک بە زمانی کوردی گفتوگۆمان کرد، روونمانکردەوە کە کەرکوک تایبەتمەندی خۆی هەیە.
دەشڵێت، سوپاسی جەنابیان دەکەم کە تێگەیشتنی تەواوی هەیە بۆ واقعی خوێندن لە کەرکوک، جەختیکردەوە کە خوێندکارانی کورد لە کەرکوک دەتوانن بە کوردی وەڵامی تاقیكردنەوەكان بدەنەوە.
كۆمسیۆن رایگەیاند، لە ماوەی 48 سەعاتی داهاتوودا، وردبینی ناوی كاندیدەكان بۆ هەڵبژاردنی ئەنجومەنی نوێنەرانی عیراق تەواو دەكرێت.
عیماد جەمیل سەرۆكی تیمی راگەیاندنی كۆمسیۆنی باڵای سەربەخۆی هەڵبژاردنەكان رایگەیاند، لیژنە تەكنیكییەكان لە ماوەی دوو ڕۆژی داهاتوودا وردبینی ناوی كاندیدەكان بۆ هەڵبژاردنی ئەنجومەنی نوێنەرانی عیراق تەواو دەكەن، ئەمەش وەك ئامادەكارییەك بۆ ناردنیان بۆ لایەنی پەیوەندیدار بەمەبەستی پشتڕاستكردنەوەی ئەمنی و یاسایی.
وتیشی، ژمارەی كاندیدەكان حەوت هەزار و 900 كەسی تێپەڕاندووە، كە 46 كەسیان بەهۆی جێبەجێنەكردنی مەرجە یاساییەكانەوە دورخراونەتەوە
ئاماژەی بەوەشكرد، بڕیارە لە نۆی ئابدا تیروپشكی ریزبەندی كاندیدەكان ئەنجام بدرێت، هاوكات كۆمسیۆن بەردەوامە لە ڕاهێنانی ستافەكەی لەسەر بەكارهێنانی ئامێرەكانی دەنگدان.
کۆبوونەوەی وەفدی ئەمنی عیراق لەگەڵ بەرپرسانی هەرێم لەبارەی هێرشە درۆنییەکان کۆتایی هات و رایانگەیاند، ئەمڕۆ یەکەم رۆژی دەستپێکردنی کاری لیژنەکە بووە و لێکۆڵینەوەکان دەستیان پێ کردووە.
لەبارەی کاری لیژنەکەوە قاسم ئەعرەجی راوێژکاری ئاسایشی نیشتمانیی عیراق رایگەیاند، ئیدانەی هێرشەکان دەکەن، دەبێت تۆمەتباران بدۆزرێنەوە و رەوانەی دادگا بکرێن.
باسی لەوەشکرد، پاشماوەی هێرشەکان وا دەردەکەوێت پارچەی تێدا بێت لە دەرەوە دروست کرابن و بۆ ئەو مەبەستەش چاوەڕوانی ئەنجامی لیژنەی لێکۆڵینەوە دەکەن.
ئاماژەی بەوەشکرد، نازانرێت سەرچاوەی هێرشەکان یەک لایەنە یان نا، ئەوەش لەدوای دەرئەنجامی لێکۆڵینەوەکان دەردەکەون.
هاوکات، رێبەر ئەحمەد وەزیری ناوخۆی هەرێم رایگەیاند، ئامادەن هەموو هاوکارییەک پێشکەش بەو لیژنیەی عیراق بکەن و هیواخوازن ئەمە کۆتا لیژنە بێت و بگەنە دەرئەنجامێکی دروست.
وتیشی، هێرشەكان لە سنوری خۆی دەرچووە و نابێت دووبارە ببنەوە.
وەزیری ناوخۆی هەرێم راشیگەیاند، بەهۆی هێرشەكانەوە كۆمپانیاكانی نەوت كشاونەتەوە و بەرهەمهێنانی نەوت دابەزیوە.
ئەوەشی خستە روو، "پێویستمان بە کاتە بۆئەوەی كێڵگەكان بۆ بەرهەمهێنانی نەوت بگەنەوە توانای راستەقینەی خۆیان".
ئەوەش لە کاتێکدایە، لە سەرەتای ئەم مانگەوە هێرشی فڕۆکەی بێفڕۆکەوان بۆسەر کێڵگە نەوتییەکانی هەرێم بەردەوام بووە و بەهۆیەوە زیانی ماددی بەر کێڵگەکان کەوتووە.
تا کۆتایی ئەمساڵ یەکەم وێستگەی بەرهەمهێنانی کارەبا بە وزەی خۆر لە عیراق دەکرێتەوە، وەزیری نەوتیش دەڵێت: وێستەگەکە توانای بەرهەمهێنانی 250 مێگاوات کارەبای هەیە.
حەیان عەبدولغەنی وەزیری نەوتی عیراق رایگەیاند، لە رێگەی ئەو گرێبەستەی لەگەڵ کۆمپانیای تۆتاڵی فەرەنسی ئیمزاکراوە، یەکەم وێستگەی بەرهەمهێنانی کارەبا بە وزەی خۆر لە عیراق دەکرێتەوە.
وتیشی، وێستگەکە توانی بەرهەمهێنانی 250 مێگاوات کارەبای هەیە و کۆتایی ئەمساڵ دەکرێتەوە.
وەزیری نەوتی عیراق ئاماژەی بەوەشکرد، پشتیوانی وەزارەتی نەوت بۆ کەرتی وزە بەردەوام دەبێت، بۆ فراوانکردنی بنکەکانی وزەی پاک و کەمکردنەوەی دەردانی گازی ژەهراوی و رێگریکردن لە زیادبوونی کاربۆن لە ئاسماندا.