لقی سلێمانیی سەندیکای رۆژنامەنووسانی کوردستان رێنماییەک ئاراستەی دەزگاکانی راگەیاندن دەکات و داوا دەکات لە کاتی رووماڵکردنی جەنگەکەدا زانیاریی جوگرافی و وردەکاری بڵاونەکەنەوە.

لە راگەیەندراوێکدا کە ئەمڕۆ 4ـی ئازاری 2026بڵاویکردووەتەوە، لقی سلێمانیی سەندیکای رۆژنامەنووسان هۆشداری دەداتە کەناڵەکانی سنوورەکە کە لەگەڵ دەستپێکردنی شەپۆلی موشەکباران و شەڕی درۆنی و سایبەریدا، ئەرک و بەرپرسیارێتیی میدیاکاران زیاتر دەبێت. سەندیکاکە داوا دەکات پێش بڵاوکردنەوەی هەر هەواڵ و راپۆرتێکی بەپەلە، وردبینیی زیاتر بکەن بۆ ئەوەی جوگرافیا و وردەکاریی جەنگیی تێدا نەبێت، چونکە رەنگە ببێتە چاوساغی بۆ هێرشبەران و دابەزاندنی ورەی هاووڵاتیان.

لە کۆتاییشدا سەندیکاکە جەختی لەسەر پاراستنی تەبایی، ورەی جەماوەر و سەلامەتیی تیمە میدیاییەکان کردووەتەوە وەک ئەرکی لەپێشینەی ئەم قۆناغە. ئەم رێنماییە هاوکاتە لەگەڵ ئەو هێرشە درۆنییەی کە ئەمشەو کرایە سەر گردی (UN) لە سلێمانی، کە وایکردووە دەزگا ئەمنی و ئیدارییەکان داوای مامەڵەی بەرپرسیارانە لە هەموو لایەک بکەن.

دەزگای ئاسایشی هەرێم بە رەسمی پشتڕاستی کردەوە کە ئەو تەقینەوەیەی ئەمشەو لە شاری سلێمانی روویدا، هێرشێکی درۆنی بووە بۆ سەر گردی (UN) و خۆشبەختانە هیچ زیانێکی مرۆیی نەبووە.

لە راگەیەندراوێکدا، دەزگای ئاسایشی هەرێم وردەکاریی رووداوەکەی ئاشکرا کرد و رایگەیاند کە کاتژمێر 10:20 خولەکی ئەمشەو سێشەممە، لەرێگەی فڕۆکەی بێفڕۆکەوانەوە (درۆن) هێرش کراوەتە سەر گردی ریعایە کە لە ناو خەڵکدا ناسراوە بە گردی نەتەوە یەکگرتووەکان (UN) لە شاری سلێمانی. ئاسایش ئاماژەی بەوە کردووە کە دەستبەجێ تیمەکانیان گەیشتوونەتە شوێنی رووداوەکە و لێکۆڵینەوەکانیان دەستپێکردووە.

لە ئەنجامی لێکۆڵینەوە سەرەتاییەکان دەرکەوتووە کە بەدڵنیاییەوە هێرشەکە بە درۆن ئەنجامدراوە، بەڵام هیچ زیانێکی مرۆیی لێ نەکەوتووەتەوە و لێکۆڵینەوەکانیش لە رووداوەکە هێشتا بەردەوامن. ئەم روونکردنەوەیەی ئاسایش هێوربوونەوەیەک دەداتە دانیشتووانی سلێمانی، بەتایبەت دوای ئەوەی پێشتر بەهۆی دەنگی بەهێزی تەقینەوەکەوە لە گەڕەکی بەرانان، دڵەڕاوکێیەکی زۆر دروست ببوو و پارێزگاری سلێمانیش هۆشداریی دابووە هاووڵاتیان.