جیهان
لە بەردەوامیی هەڕەشەكانی ئەمریكا بۆسەر ئێران و دوایین پێشهاتەكانی ڤەنزوێلا، نرخی نەوت بەرزتر بووەوە و بەرزترین ئاستی لە ماوەی دوو مانگدا تۆماركرد.
لەگەڵ كردنەوەی بازاڕەكاندا بەرمیلێك نەوتی خاو بە 64 دۆلار و 15 سەنت مامەڵەی پێوە كرا كە بەراورد بە رۆژی دووشەممە 28 سەنت بەرزبووەوە.
نرخی بەرمیلێك نەوتی تەكساس گەیشتە 59 دۆلار و 78 سەنت و بە هەمان شێوەی برێنت 28 سەنت بەرزبووەوە.
ئەوەش بەرزترین ئاستە كە هەردوو جۆرەكەی نەوت لە ماوەی دوو مانگدا تۆماری دەكات، شارەزایانیش هۆكاری بەردەوامیی بەرزی نرخی نەوت بۆ هەڕەشەكانی ئەمریكا بۆ هێرشكردنەسەر ئێران و دوا پێشهاتەكانی ڤەنزوێلا دەگەڕێننەوە.
ترەمپ پێناسی گومرگی بەسەر ئەو وڵاتانەدا دەسەپێنێت کە مامەڵەی بازرگانی لەگەڵ ئێران ئەنجام دەدەن.
دۆناڵد ترەمپ سەرۆکی ئەمریکا رایگەیاند، پێناسی گومرگی بە رێژەی ٪25 بەسەر ئەو هەموو وڵاتانەدا دەسەپێنێت کە مامەڵەی بازرگانی لەگەڵ ئێران ئەنجام دەدەن.
ئاماژەی بەوەشکرد، هەر وڵاتێك بەردەوام بێت لە مامەڵەی بازرگانی لەگەڵ ئێران دەبێت پێناسی گومرگی بەرێژەی 25% بدات بە هەر مامەڵەیەك كە لەگەڵ ئەمریكا دەیكات.
هاوکات، کاڕۆلین لیڤێت وتەبێژی کۆشکی رایگەیاند، هێرشی ئاسمانی لەنێو بژاردەکانی سەرۆکی ئەمریکادایە، بەڵام هەمیشە هەڵبژاردەی دیپلۆماسی لە بژاردەی یەکەمی دۆناڵد ترەمپە.
لەلای خۆشیەوە، وەزیری دەرەوەی ئێران رایگەیاند، وڵاتەکەی ئامادەی جەنگ و گفتوگۆشن.
شارەزایانی بواری تەكنەلۆژیا هۆشداری دەدەن لەوەی شەڕی "چیپە ئەلیكترۆنییەكان" و هەڵكشانی داواكاری لەسەر تەكنەلۆژیای زیرەكی دەستكرد، نرخی مۆبایل و لاپتۆپ و ئامێرە ئەلیكترۆنییەكان لە بازاڕەكانی جیهان و عیراق بەڕێژەیەكی بەرچاو بەرز دەكاتەوە.
لە ساڵانی رابردوودا بەهۆی پێشكەوتنی خێرای زیرەكی دەستكرد و فراوانبوونی سەنتەرەكانی داتا، داواكاری لەسەر چیپ و میمۆرییە پێشكەوتووەكان بەرزبۆتەوە، ئەوەش لەكاتێكدایە كە توانای بەرهەمهێنانی جیهانی سنووردارە و بەشی پێداویستییەكان ناكات، ئەم دۆخە بووەتە هۆی بەرزبوونەوەی تێچووی بەرهەمهێنان و لە ئەنجامدا گرانبوونی نرخی ئامێرە ئەلیكترۆنییەكان.
چیپە ئەلیكترۆنییەكان چین و لە كوێ دروست دەكرێن؟
چیپە ئەلیكترۆنییەكان (Microchips) پارچەی زۆر بچووكی سیلیكۆنین كە ملیاران ترانزستەری وردیان لەسەرە و پرۆسەی چارەسەركردن و هەڵگرتنی زانیاری ئەنجام دەدەن. ئەمانە وەك "مێشكی شاراوە"ی ئامێرەكان، لە مۆبایل و كۆمپیوتەرەوە تا ئۆتۆمبێل و كەرەستەی سەربازی و پزیشكی كار دەكەن. پیشەسازیی ئەم چیپانە لە دەستی چەند وڵاتێكی كەمدا قۆرخكراوە، بەتایبەت تایوان، كۆریای باشوور و ئەمریكا.
زیرەكی دەستكرد.. بزوێنەری شەڕی چیپەكان:
شارەزایانی بوارەکە، تیشک دەخەنە سەر هۆکاری بابەتەکەو دەیگەڕێننەوە بۆ زیرەکی دەستکرد، پێیان وایە؛ داواكاریی زۆر لەسەر چیپە ئەلیكترۆنییەكان بەهۆی گەشەی زیرەكی دەستكردەوە، بووەتە هۆی بەرزبوونەوەی نرخی بەرهەمهێنان و پێشبینی دەکەن نرخی كۆمپیوتەر و مۆبایلەكان بە لایەنی كەمەوە 20% بەرزببێتەوە.
ململانێی ئەمریكا و چین.. هۆكاری سەرەكی گرانییەكان:
لە پشت پەردەی ئەم گرانییە، ململانێیەكی توند لەنێوان ئەمریكا و چین هەیە. واشنتۆن سنوورداركردنی توندی خستووەتە سەر هەناردەكردنی چیپە پێشكەوتووەكان بۆ پەكین، لەبەرامبەردا چین هەوڵی دروستكردنی پیشەسازیی ناوخۆیی و كۆنترۆڵكردنی كانزا ستراتیژییەكان دەدات. ئەم ململانێیە تێچووی بەرهەمهێنانی بەرزكردووەتەوە و كۆمپانیاكان ناچار دەكات باجەكەی لەسەر شانی بەكاربەر دابنێن.
كاریگەرییەكان لەسەر بازاڕی عیراق، ئایا عیراق رووبەرووی چی دەبێتەوە؟
بۆ وڵاتێكی وەك عیراق كە بە تەواوی پشت بە هاوردەكردن دەبەستێت، كاریگەرییەكان قورستر دەبن. جگە لە بەرزبوونەوەی نرخە جیهانییەكان، تێچووی گواستنەوە، باج و گۆڕانكاری لە نرخی دراویش هۆكاری دیكەن كە وادەكەن هاووڵاتیی عیراقی باجێكی قورستر بدات و لەوانەیە ناچار بێت ئامێرە كۆنەكانی بۆ ماوەیەكی درێژتر بەكاربهێنێت یان روو لە كڕینی ئامێری كواڵێتی نزمتر بكات.
گۆگڵ بەهۆی زانیاریی هەڵەوە وەڵامدانەوەی بەشێك لە پرسیارە تەندروستییەكان رادەگرێت
دوای ئەوەی لێكۆڵینەوەیەكی رۆژنامەی "گاردیان" ئاشكرایكرد كە كورتەی دروستكراو بە زیرەكی دەستكردی گۆگڵ زانیاریی هەڵە دەداتە بەكارهێنەران، كۆمپانیاكە وەڵامدانەوەی بەشێك لە پرسیارە تەندروستییەكانی لەڕێگەی خزمەتگوزاری AI Overviews راگرت.
خزمەتگوزاری AI Overviews بریتییە لە كورتەیەك كە بە زیرەكی دەستكرد ئامادە دەكرێت و لە سەرەتای ئەنجامەكانی گەڕاندا وەك وەڵامی پرسیارێك دەخرێتەڕوو.
بەپێی لێكۆڵینەوەكەی گاردیان، بەشێك لەو كورتانە زانیاریی تەندروستیی هەڵەیان تێدایە و خەڵك رووبەڕووی مەترسی دەكەنەوە، بۆ نمونە لە وەڵامی پرسیارەكانی پەیوەست بە "پشكنینی خوێن" و "فەرمانی جگەر"، ژمارەی بێ سەروبەری خستۆتەڕوو بەبێ رەچاوكردنی جیاوازیی رەگەز، تەمەن و نەتەوە.
هەر بەپێی راپۆرتەكە، گۆگڵ ئامۆژگاریی توشبووانی "شێرپەنجەی پەنكریاس"ی كردووە كە خۆیان لە خواردنی چەور بەدوربگرن، بەڵام شارەزایان بە گاردیانیان راگەیاندووە، ئەمە ئامۆژگارییەكی خراپە و دەكرێت مەترسیی مردن زیاد بكات.
ئەم لێكۆڵینەوەیە لەكاتێكدایە كە شارەزایان هۆشداری دەدەن لەوەی چاتبۆتەكانی زیرەكی دەستکرد توشی "خەیاڵكردن" (Hallucination) دەبن، واتە كاتێك زانیاریی دروستیان لەبەردەست نییە، وەڵامی هەڵبەستراو دەدەنەوە.
هاوكات گۆگڵ لەم هەفتەیەدا تایبەتمەندیی AI Overviewsـی بۆ خزمەتگوزاریی ئیمەیڵ (Gmail) زیادكرد، كە رێگە بە بەكارهێنەران دەدات لەبری گەڕان بە كلیلە وشە، پرسیار دەربارەی ئیمەیڵەكانیان بكەن و وەڵام وەربگرنەوە.
سەرۆك وەزیرانی دانیمارك دەڵێت، دورگەی گرینلاند بە ساتێكی هەستیاردا تێپەڕدەبێت و سەرۆكی ئەمریكاش پلان بۆ دەسبەسەرداگرتنی ئامادە دەكات.
میتە فریدریكسن سەرۆك وەزیرانی دانیمارك لە كۆبوونەوەیەكیدا لەگەڵ پارتە سیاسییەكانی وڵاتەكەی رایگەیاند، ململانێیەكی زۆر لەسەر دورگەی گرینلاند هەیە و ئێستا ساتێكی هەستیارە، وتیشی، رەوشەكە مەترسیدارترە لەوەی دەبینرێت.
رۆژنامەی دەیلی مەیڵی بەریتانیش بڵاویكردەوە، دۆناڵد ترەمپ سەرۆكی ئەمریكا دوای سەركەوتنی لە هێرشەكەی سەر ڤەنزوێلا، فەرمانی بە فەرماندەیی ئۆپراسیۆنە تایبەتەكانی سوپای ئەمریكا كردووە پلانێكی تایبەت بۆ داگیركردنی دورگەی گرینلاند ئامادە بكات، باسی لەوەشكردووە، فەرماندە سەربازییەكان دژی پلانەكەن و بە شێتانە و نایاسایی وەسفی دەكەن، هەوڵیش دەدەن بە پێشنیازكردنی ئۆپراسیۆنی تر، سەرنجی ترەمپ لەسەر ئەو دورگەیە لابدەن.
سەرۆکی کوبا وەڵامی سەرۆکی ئەمریکا دەداتەوە و دەڵێت: بڕیار لە هیچ کەسێک وەرناگرن و تا دڵۆپی خوێن بەرگری لە نیشتمانەکەیان دەکەن.
میگێل دیاز کانێل سەرۆکی کوبا لە تۆڕی کۆمەڵایەتی ئێکس رایگەیاند، کوبا نەتەوەیەکی ئازاد و سەربەخۆیە و بڕیار لە هیچ کەسێک وەرناگرن، ئەمەش لە وەڵامی هەڕەشەکانی ترەمپ کە رایگەیاندبوو، تا کات درەنگ نەبووە بگەنە رێککەوتن.
وتیشی، وڵاتەکەی دەستدرێژی ناکاتە سەر هیچ وڵاتێک، بەڵکو ئەوە ئەمریکایە ماوەی 66 ساڵە دەستدرێژی دەکاتە سەر کوبا، دەشڵێت، ئامادەن تا دڵۆپی خوێن بەرگری لە نیشتمانەکەیان بکەن.
میگێل دیاز کانێل ئەوەشی خستەڕوو، ئەوان هەڕەشە ناکەن و بەڵکو بۆ هەموو ئەگەرێک ئامادەن.
جێگەی ئاماژەیە، ترەمپ لە تۆڕی کۆمەڵایەتی تروس ئاشکرایکرد، مارکۆ رۆبیۆ، وەزیری دەرەوەی ئەمریکا، کە لە دایک و باوکێکی کۆچبەری کوبی لەدایکبووە، رەنگە ببێتە سەرۆکی داهاتووی کوبا.
سەرۆکی ئەمریکا هۆشداری دەداتە کوبا و دەڵێت: تا درەنگ نەبووە بگەنە رێککەوتن.
دۆناڵد ترەمپ سەرۆکی ئەمریکا لە تۆڕی کۆمەڵەیەتی تروس رایگەیاند، ئەگەر کوبا نەگاتە رێککەوتن روبەڕووی کۆمەڵێک سزا دەبێتەوە کە ئەنجامەکەی دیار نییە چۆن دەبێت.
ئاماژەی بەوەشکرد، کوبا چیتر نە نەوت و نە پارە، هیچ شتێک لە ڤەنزوێلا وەرناگرێت، بۆیە پێشنیاز دەکەم بگەنە رێککەوتن.
ترەمپ ئەوەشی خستەڕوو، ڤەنزوێلا پێویستی بە پاراستن نییە لە لایەن کوباوە؛ چونکە پارێزراوە بەهێزترین هێزی سەربازی لە جیهاندا.
رۆژنامەی نیویۆرك تایمزی ئەمریكی ئاشكرایكرد ، دۆناڵد ترەمپ سەرۆكی ئەمریكا بە جددی تاوتوێی هێرشكردنە سەر ئێران دەكات .
نیویۆرك تایمز لە زاری چەند لێپرسراوێكی ئەمریكاوە ئاشكرایكردوە ، چەند بژاردەیەك خراوەتە بەردەم ترەمپ بۆ هێرشكردنە سەر ئێران و ئەویش بە جددی تاوتوێی پێدانی رەزامەندی لەسەر هێرشەكە دەكات ، بەڵام تا ئێستا بریاری كۆتایی نەداوە.
هەروەها ئاشكرایانكردوە لە نێو بژاردەكاندا، هێرشكردنە سەر چەند ئامانجێك هەن لە تاران كە سەربازیی نین .
رۆژنامەكە ئاماژەی بەوەشداوە، لێپرسراوە ئەمریكییەكان درك بەوە دەكەن كە دەكرێت هێرشكردنە سەر ئێران ئەنجامی پێچەوانەی هەبێت و هۆكار بێت بۆ ئەوەی سەرباز و دیپلۆماتكارە ئەمریكییەكان لە ناوچەكەدا بكرێنە ئامانج .
لە یەكەم لێدوانیدا لە دوای دەستگیركردنی نیكۆلاس مادورۆ، سەرۆكی دورخراوەی ڤەنزوێلا بە پارێزەرەكەی راگەیاندووە، ئەو باشە و دڵتەنگ نییە.
نیكۆلاس ئێرنێستۆ مادورۆ گێرا، كوڕی نیكۆلاس مادورۆ سەرۆكی دورخراوەی ڤەنزوێلا لە كۆبونەوەی پارتە سۆسیالیستە یەكگرتووەكانی ڤەنزوێلا بڵاویكردەوە، پارێزەرەكانی مادورۆ پەیامی باوكیان پێگەیاندووە و وتویەتی، ئەو دڵتەنگ نییە و باشە و ئەو تێكۆشەرە.
مادورۆی كوڕ بانگەوازێكی گشتی ئاراستەی ڤەنزوێلییەكان كرد بۆ رژانە سەر شەقامەكان و یەكگرتوویی دژی هەڕەشە بۆ سەر سەروەری وڵاتەكە و بەڵێنیدا وەڵامی دەستگیركردنی باوكی بدەنەوە.
راشیگەیاند، لە سەختترین ساتەكاندا گیانی شۆڕشگێڕی ناسنامەی ئەوان دیاری دەكات و یەكڕیزی كلیلی شوێنكەوتنی هەنگاوەكانی چاڤێز و ڕێنماییەكانی باوكیەتی.
دۆناڵد ترەمپ، سەرۆکی ئەمریکا رایگەیاند، پێویستە وڵاتەکەی ببێتە خاوەنی دورگەی گرینلاند بۆ ئەوەی رێگری بکات لەوەی روسیا و چین دەستی بەسەردا بگرن، راشیگەیاند "وڵاتان دەبێت خاوەندارێتی بکەن، نەک بە کرێی بگرن".
لە وەڵامی پرسیارێکی بی بی سی-دا، ترەمپ وتی: "دەبێت بەرگری لە گرینلاند بکەین". ئاماژەی بەوەشکرد، ئەوان کارەکە ئەنجام دەدەن جا بە "رێگە ئاسانەکە بێت یان بە زەحمەت". پێشتر کۆشکی سپی ئاشکرای کردبوو، ئیدارەی ترەمپ تاوتوێی کڕینی ئەو هەرێمە نیمچە سەربەخۆیە دەکات کە ئەندامی ناتۆیە و سەر بە دانیمارکە، تەنانەت بژاردەی بەکارهێنانی هێزیش بۆ لکاندنی بە ئەمریکاوە بەدوور نەزانراوە.
لە بەرامبەردا، دانیمارک و گرینلاند جەختیان کردۆتەوە کە خاکەکەیان بۆ فرۆشتن نییە. حکومەتی دانیمارک هۆشداریداوە لەوەی هەر جوڵەیەکی سەربازی دەبێتە هۆی کۆتاییهێنان بە هاوپەیمانێتی بەرگری ئەتڵەسی (ناتۆ).
گرینلاند بەهۆی پێگە جوگرافییەکەیەوە لەنێوان ئەمریکای باکور و جەمسەری باکور، گرنگییەکی ستراتیژی هەیە بۆ دانانی سیستمی ئاگادارکردنەوەی پێشوەختە لە هێرشی موشەکی و چاودێریکردنی کەشتییەکان. ترەمپ بانگەشەی ئەوە دەکات کە ناوچەکە "پڕ بووە لە کەشتی روسیا و چین"، ئەمە لە کاتێکدایە ئەمریکا خۆی بنکەیەکی سەربازی لەو دورگەیە هەیە.
ترەمپ دەڵێت رێککەوتنی بەکرێگرتن بەس نییە و وتی: "خەڵکی چین و روسیام خۆشدەوێت، بەڵام نامەوێت لە گرینلاند دراوسێم بن، ئەوە روونادات و دەبێت ناتۆش لەوە تێبگات".
رێكخراوی نەتەوەیەكگرتوەكان ئاشكرایكرد، لە ئەنجامی هێرشكردنە سەر شێخ مەقسود و ئەشرفییە لە حەلەب نزیكەی 30 هەزار خێزان ئاوارەبوون.
نوسینگەی رێكخراوی نەتەوە یەكگرتوەكان بۆ هەماهەنگی كاروباری مرۆیی لە سوریا لە راگەیەنراوێكدا ئاماژەی بۆ ئەوەكردووە، بەهۆی پەرەسەندنی گرژییەكان و لە ئەنجامی هێرشكردنە سەر هەردوو گەڕەكی شێخ مەقسود و ئەشرەفییە، تائێستا نزیكەی 30 هەزار خێزان لەو دوو گەڕەكە ئاوارە بوون، زیاتر لە 20 هەزاریان بۆ عەفرین گواستراونەتەوە، هەروەها هەزار و 100 كەسیش لە نۆ ناوەندی حەوانەوەی بەكۆمەڵدا نیشتەجێكراون و شوێنە ئایینییەكانیان وەك پەناگەی كاتی بۆ تەرخانكراوە.
جەختی لەوەشكردوەتەوە، رەوشی مرۆیی بەرەو خراپی دەچێت لەگەڵ سنورداركردنی هاتوچۆ، راگرتنی خوێندن لە خوێندنگە و زانكۆكان، تیمەكانی وەڵامدانەوەش كار دەكەن بۆ دابەشكردنی هاوكارییەكان.
رێكخراوی نەتەوەیەكگرتوەكان داواشدەكات، هەموو لایەنەكان پابەندبن بە پاراستنی مەدەنییەكان و پاراستنی دامەزراوەكانی تەندروستی و خزمەتگوزارییەكانی ئاو و راگرتنی هێرشەكان بۆ سەر خزمەتگوزارییە بنەڕەتییەكان.
ئاژانسی فرانس پرێس، بڵاویکردوەتەوە ئەمریکا دەستیکردوە بە هەناردەی نەوتی ڤەنزوێلا بۆ وڵاتەکەی و رۆژی پێنجشەممە، لە کۆی 11 کەشتی کە سەر بە کۆمپانیای "شیڤرۆن"ـن سێ کەشتی نەوت هەڵگر، کە نەوتی ڤونزوێلایان تێدابووە ئەو وڵاتەیان بەرەو ئەمریکا بەجێهێشتوە .
بە گوێرەی زانیارییەکانی ئاژانسە فەرەنسییەکە کۆمپانیای "شیڤرۆن" تەنیا کۆمپانیای ئەمریکییە، کە رێگەی پێدراوە لە ڤەنزوێلا کاربکات، ئەم کەشتیانەی نەوتیشی بەکرێگرتووە وەک بەشێک لە خشتەیەکی پلان بۆدانراو بۆ بارکردنی نەوتی خاو بەرەو ویلایەتە یەکگرتووەکانی ئەمریکا.
گەرچی کۆمپانیای "شیڤرۆن" رەتیکردەوە ئەو جموجۆڵەی کەشتییەکان بۆ ئاژانسی فرانس پرێس پشتڕاست بکاتەوە، تەنها ئەوەندەی وتوە، هێشتا سەرنجیان لەسەر سەلامەتی کارمەندەکانیانە و بەردەوامن لە کارکردن بەپێی یاساکان.
شیکەرەوەکانی کێپلەر هۆشداریدا لەوەی گەمارۆدانی ئەمریکا بۆ سەر هەناردەی ڤەنزوێلا، دەبێتە هۆی کەڵەکەبوونی نەوت لە کۆگاکانی ئەو وڵاتەدا و رۆژی سێشەممەش دۆناڵد ترەمپ رایگەیاند، کە کاراکاس بڕی 30 بۆ 50 ملیۆن بەرمیل نەوتی خاو رادەستی ئەمریکا دەکات.
دۆناڵد ترەمپ، سەرۆکی ویلایەتە یەکگرتووەکانی ئەمەریکا رایگەیاند، دەسەڵاتی ئەو وەک فەرماندەی گشتی تەنها بە "ئەخلاقی کەسی" سنووردارە، بەبێ گوێدانە یاسا نێودەوڵەتییەکان و کۆت و بەندەکانی تر، کە توانای بەکارهێنانی هێزی سەربازی بۆ هێرشکردن، داگیرکردن، یان ناچارکردنی وڵاتان لە سەرانسەری جیهان سنووردار دەکەن.
سەرۆکی ئەمریکا لە میانی چاوپێکەوتنێکی لەگەڵ رۆژنامەی نیویۆرک تایمزی ئەمریکی رایگەیاندوە؛ تەنها بنەما ئەخلاقییەکانم دەتوانێت رێگری لێبکات لە بە کارهێنانی دەسەڵاتەکانی، ئەمەش دوای ئەوە دێت دوێنێ ئەنجومەنی پیرانی ئەمریكا پڕۆژە بڕیارێكی پەسەندكرد، كە ئامانج لێی سنوورداركردنی دەسەڵاتە جەنگییەكانی دۆناڵد ترەمپە لە ڤەنزوێلا و بەپێی ئەو پرۆژە بریارە ترەمپ بەبێ گەڕانەوە بۆ كۆنگرێس ناتوانێت ئۆپراسیۆنی تر ئەنجام بدات.
لە چاوپێکەوتنەکەدا سەرۆکی ئەمریکا جەخت لەوەدەکاتەوە، کە بەهۆی کارەکانیەوە بە بوێرانەوە هەستی بە کاریگەری خۆی کردووە لە لە سەرانسەری جیهاندا.
لەبارەی ڤەنزوێلاشەوە ترەمپ دەڵێت؛ ئەمریکا دەتوانێت بۆ ساڵانی داهاتوو تێکەڵ بە ڤەنزوێلا بێت و "کات" ماوەی چاودێری راستەوخۆی ڤەنزوێلا لە ژێر هەڕەشەی بەردەوامی کردەوەی سەربازیدا دیاری دەکات.
ترەمپ هۆشداریش دەداتە نێجیریا و دەڵێت؛ ئەگەر بەدەوام بن لە کوشتنی مەسیحییەکان، بە دڵنیاییەوە هێرشی سەربازی زیاتر دەکەینە سەر ئەو وڵاتە.
ئەنجومەنی پیرانی ئەمریكا پڕۆژە بڕیارێكی پەسەندكرد، كە ئامانج لێی سنوورداركردنی دەسەڵاتە جەنگییەكانی دۆناڵد ترەمپە لە ڤەنزوێلا و بەپێی ئەو پرۆژە بریارە ترەمپ بەبێ گەڕانەوە بۆ كۆنگرێس ناتوانێت ئۆپراسیۆنی تر ئەنجام نادات.
پرۆژە بڕیارەكە بە 52 دەنگی بەڵێ و 47 دەنگی نەخێر پەسەندكرا و جگە لە دیموكراتەكان پێنج سیناتۆری كۆماریش دەنگیان پێدا.
ئەنجومەنی پیرانی ئەمریكا داوا لە ترەمپ دەكات، كە بۆ هەر هێرشێك یان بەكارهێنانی سەربازی لە دژی ڤەنزوێلا، پێشوەختە مۆڵەت لە كۆنگرێس وەربگرێت.
ئەوەش لەكاتێكدایە، لەكاتی هێرشكردنەسەر ڤەنزوێلا ترەمپ رایگەیاندبوو، پێشوەختە كۆنگرێسی لە ئۆپەراسیۆنەكە ئاگادار نەكردووەتەوە چونكە كۆنگرێس كێشەی دزەكردنی زانیارییەكانی هەیە و ئەمەش نیگەرانی زۆری لای یاسادانەران دروستكرد.
دوای زیاتر لە مانگێك لە ململانێ، بۆ یەكەمجار سەرۆكی ئەمریكا و هاوتا كۆڵۆمبییەكەی پەیوەندییەكی تەلەفۆنیان ئەنجامدا و بڕیارە لەماوەیەكی نزیكدا لە كۆشكی سپی چاویان بە یەكتر بكەوێت.
وەزارەتی دەرەوەی كۆڵۆمبیا رایگەیاند، گۆستاڤۆ پێترۆ سەرۆكی كۆڵۆمبیا پەیوەندییەكی تەلەفۆنی لەگەڵ دۆناڵد ترەمپی سەرۆكی ئەمریكا ئەنجامداوە و باسیان لە دوایین پێشهاتەكانی ناوچەكە كردووە.
لای خۆشییەوە دۆناڵد ترەمپ رایگەیاند، بە تەلەفۆن قسەم لەگەڵ پێترۆ كردووە و باسم لە كارە سەرپێچییەكانی ئەم دواییانەی كردووە، لەناویشیاندا پرسی بەقاچاغبردنی مادەی هۆشبەر.
ئاماژەی بەوەشكردووە، رێز لە پەیوەندییەكەی و ئەو تۆنی دەنگە دەگرێت كە پێترۆ قسەی پێكردووە و بڕیارە بەم زووانە لە كۆشكی سپی یەكتر ببینن.
د.لەتیف رەشید، سەرۆک کۆماری عیراق ئەمڕۆ چوارشەممە، لەنیقۆسیا بەشداری رێوڕەسمی ئاهەنگی کردنەوەی سەرۆکایەتی قوبرس بۆ ئەنجومەنی یەکێتی ئەوروپا، لەسەر بانگهێشتی هاوتا قوبرسییەکەی کرد.
سەرۆک کۆمار و خانمی یەکەم لە لایەن سەرۆکی قوبرس نیکۆس خریستۆ دۆلیدیس و خاتو فلیپا کارسێرا دولیدیس پێشواییان لێکرا.
لەڕێوڕەسمەکەدا ژمارەیەک سەرۆکی دەوڵەت و حکومەت و سەرۆکی نوێنەرایەتییە دیپلۆماسییەکان و رێکخراوە نێودەوڵەتییەکان ئامادەبوون.
بەشداری عیراق دووپات کردنەوەی پابەندبوونی بە پاڵپشتیکردنی هاریکاریی هەرێمی و نێودەوڵەتی و تیشک خستنە سەر ئامادەبوون وپێگەی لە کۆڕبەندییە نێودەوڵەتییەکاندا دەکاتەوە.