روسیا، ئەوروپا بە بێدەنگبوون لە ئاست تاوانكاریەكانی ئۆكراین تۆمەتباردەكات و جەختیشدەكاتەوە لەوەی بەمەرجی پاراستنی ئاساییش و گەرەنتیكردنی بەرژەوەندیەكانی وڵاتەكەی ئامادەیە دانوستان لەگەڵ ئۆكراین بكات.

سێرگی لاڤرۆڤ، وەزیری دەرەوەی روسیا، لەمیانی وتارێكیدا لە كۆبوونەوەی گشتی كۆمەڵەی نەتەوە یەكگرتووەكان رایگەیاند، هەر دەستدرێژییەك بۆ سەر روسیا بە وەڵامێكی یەكلاكەرەوە بەرپەرچ دەدرێتەوە، پێوسیتیشە ناتۆ و یەكێتی ئەوروپا گومان لەو بابەتە نەكەن.

ئاماژەی بەوەش كرد، پێدەچێت ئۆكراین و ئەو وڵاتە ئەوروپییانەی پاڵپشتی دارایی لە كیێڤ دەكەن لە قورسایی رەوشەكە تێگەیشتبن بۆیە ئامادە نین دانوستانێكی راستگۆیانە بكەن.

ئاشكراشیكرد، روسیا تەنها لەسەر بنەمای پاراستنی ئاسایش و بەرژەوەندیەكانی و گەڕاندنەوەی ئەو خاكانەی خەڵك بە روسی قسەیان لەسەر دەكات و لەئێستادا لەژێر كۆنتڕۆڵی كیێڤدان، ئامادەیە تاووتوێی گەرەنتی ئەمنی بۆ ئۆكراین بكات.

ئەوەشی خستەڕوو، لە سایەی گفتوگۆكانی روسیا و ئەمریكا لە ئێستادا هیوایەك پەیدا بووە بۆ دۆزینەوەی رێگەیەكی واقیعی بۆ چارەسەری كۆتایی قەیرانی ئۆكراین.

لەدرێژەی وتارەكەشیدا لاڤرۆڤ ئەوروپای تۆمەتباركرد بەوەی رێگەی بە ئۆكراین داوە پێشێلكاریی گەورە ئەنجام بدات و لەوبارەیەوە رایگەیاند، ئۆكراین بەبەرچاوی ئەوروپاوە هێرشی تیرۆریستی و لەسێدارەدانی دەرەوەی دادگا و بۆردومانی خەڵكی مەدەنی و هێرشكردنە سەر رۆژنامەنووس و سیاسەتمەداران و تەنانەت بەئامانجگرتنی وێستگەكانی وزەی ئەتۆمیشی ئەنجامداوە.