جیهان
لە دوای کۆبونەوەی لەگەڵ سەرۆکی ئیدارەی نوێی سوریا ئەحمەد شەرع ، نوێنەری نەتەوەیەکگرتووەکان رایدەگەیەنێت، ئامادەین هەموو هاوکارییەک پێشکەش بە گەلی سوریا بکەین.
گییەر پیدەرسن نوێنەری نەتەوەیەکگرتووەکان، لە کۆنفرانسێکی رۆژنامەوانیدا رایگەیاند: پێویستە لە رێگەی دانوستانەوە کاربکرێت بۆ پێکهێنانی سوپای نیشتیمانی سوریا، دەشڵێت، تاکە رێگە بۆ پاراستنی سەقامگیری ئەو وڵاتە پێکهێنای سوپایەکە لە ژێر چەتری وەزارەتی بەرگری.
نوێنەری نەتەوەیەکگرتووەکان ئاماژەی بەوەشکرد: دەبێت پەیوەندی سیاسی هەمەلایەنە هەبێت لەپێناو گەیشتن بە کۆنفڕانسی دیالۆگی نیشتیمانی لە سوریا.
جێی ئاماژەیە لە دوای ڕووخانی رژێمی ئەسەدەوە، چەند وڵاتێک دەستیان کردووە بە هەوڵدان بۆ پەیوەندیکردن لەگەڵ سەرکردایەتی نوێی سوریا، نەتەوە یەکگرتووەکانیش چەندین جار رایگەیاندووە، ئامادەن هەموو جۆرە هاوکارییەک پێشکەش بە گەلی سوریا بکەن.
رێكخراوی تەندروستی جیهانی نیگەرانیی لە بڕیارەكەی دۆناڵد ترەمپ دەردەبڕێت سەبارەت بە كشانەوە لە رێكخراوەكە و داوای لێدەكات بە بڕیارەكەیدا بچێتەوە.
رێكخراوی تەندروستی جیهانی لە راگەیەندراوێكدا ئاماژەی بۆ ئەوە كردووە، رێكخراوەكەیان رۆڵێكی گرنگ و یەكلاكەرەوەی هەیە لە پاراستنی تەندروستی و ئاسایشی گەلانی جیهان لە نێویاندا ئەمریكییەكان و نیگەرانن لە بڕیارەكەی ترەمپ بۆ كشانەوە لە رێكخراوەكە.
تاریق یاساریفیچ وتەبێژی رێكخراوی تەندروستی جیهانی وتی، هیوادارە سەرۆكی ئەمریكا لەو هەڵوێستە پاشگەز ببێتەوە و لە رێی دیالۆگەوە كێشەكان چارەسەر بكرێن لەپێناو تەندروستی ملیۆنان كەس لە جیهاندا.
لە یەكەم رۆژی دەستبەكاربوونیدا، دۆناڵد ترەمپ سەرۆكی ئەمریكا ئەو بەڵێنەی جێبەجێكرد كە لە كاتی بانگەشەی هەڵبژاردن بە ئەمریكییەكانی دا و بڕیاری كشانەوەی لە رێكخراوی تەندروستی جیهانی ئیمزا كرد.
فەرماندەی ئەركانی دەستلەكاركێشاوەی سوپای ئیسرائیل رایگەیاند، لە ماوەی 15 مانگی جەنگی غەززەدا ، نزیكەی 20 هەزار چەكداری بزوتنەوەی حەماس كوژراون .
هرتسی هالیفی فەرماندەی ئەركانی سوپای ئیسرائیل دوای چەند سەعاتێك لە دەستلەكاركێشانەوەی لە لێدوانێكدا رایگەیاند ، لە جەنگی غەززەدا باڵی سەربازی بزوتنەوەی حەماس زیانی گەورەی بەركەوت و لە 15 مانگدا گەورە سەركردەكانی بزوتنەوەكە و نزیكەی 20 هەزار چەكداریش كوژران .
لەلایەكی تریشەوە سەرباری راگەیاندنی ئاگربەست لە غەززە، بەڵام تا ئێستا رۆژانە هێرشەكانی ئیسرائیل بۆ سەر كەرتەكە بەردەوامە و بەپێی سەرچاوە پزیشكییەكانی فەلەستینیش ، ئاماری كوژراوانی جەنگی غەززە بۆ 47 هەزار و 107 كەس بەرز بووەتەوە كە زۆرینەیان ژن و منداڵن .
جەنگی نێوان ئیسرائیل و حەماس نزیکەی 470 رۆژ بەردەوام بوو کەرتی غەززەش روبەرووی کارەساتێکی مرۆیی گەورە بووە و بەشێکی زۆری دانیشتوانەکەی ئاوارە بوون، لە رۆژی 19ی ئەم مانگە گەیشتنە ئاگربەست، جێگەی ئاماژەیە، قۆناغی یەکەمی ئاگربەستەکە بۆ ماوەی شەش هەفتە بەردەوام دەبێت.
هێزەكانی سوریای دیموكرات-هەسەدە رایگەیاند، لە نزیك شاری مەنبج هەشت چەكداری گرووپەكانی سەر بە توركیا كوژران و چەند ئۆتۆمبێلێكی سەربازی تێكشكێنران.
هەسەدە لە راگەیەنراوێكدا ئاماژەی بۆ ئەوەكردووە، شەوی رابردوو پێكدادان لەگەڵ گروپە چەكدارەكانی سەر بە توركیا لە نزیك مەنبج روویداوە و بەهۆیەوە شەش چەكداریان لێ كوژرا و دوو چەكداری تریش برینداربوون.
دەشڵێت، چەند ئۆتۆمبێلێكی سەربازی ئەو گروپەش تێكشكاون و لە هێرشكردن بەردەوامن.
وتیشی، یەكینەكانی پاراستنی ژنان-یەپەژە ئۆپراسیۆنێكیان لە دژی گروپە چەكدارەكانی سەر بە توركیا ئەنجامدا و دوو چەكداریان كوژران و 16ی تریش برینداربوون.
فەڕەنسا فەرمانی دەستگیركردنی بۆ بەشار ئەسەد سەرۆكی پێشووی سوریا دەركرد .
دەسەڵاتی دادوەری فەڕەنسا، بە تۆمەتی بەشداریكردن لە تاوانی جەنگ و كوشتنی هاووڵاتیەكی فەرەنسی-سوریی لە ساڵی 2017 لە پارێزگای دەرعا، فەرمانی دەستگیركردنی بۆ ئەسەد دەركرد.
"جان نویل بارو" وەزیری دەرەوەی فەڕەنساش رایگەیاندووە ، تاوانەكانی ئەسەد بەتایبەت ئەو تاوانانەی لە گرتوخانەی سیدنایا ئەنجامدراون، نابێت بە بێ سزا تێبپەرێت و دوپاتیشیكردۆتەوە كە فەرەنسا هەوڵەكانی بۆ بەدیهێنانی دادپەروەری لە سوریا چر دەكاتەوە.
لە ساڵی 2023شدا فەرەنسا فەرمانی دەستگیركردنی بۆ ئەسەد دەركرد بە تۆمەتی ئەنجامدانی هێرشی كیمیایی لە ناوچەی غۆتەی رۆژهەڵات لە نزیك دیمەشق لە ساڵی 2013 دا .
ئیدارەی نوێی ئەمریكا رایگەیاند، 500 ملیار دۆلار بۆ ژێرخانی ژیری دەستكرد تەرخان دەكات.
سام ئاڵتمان سەرۆكی جێبەجێكاری ژیری دەستكرد و "ماسایوشی یۆن" سەرۆكی جێبەجێكاری كۆمپانیای "سۆفت بانك" لەگەڵ دۆناڵد ترەمپ سەرۆكی نوێی ئەمریكا لە كۆشكی سپی گەورەترین پرۆژەی ژێرخانی ژیری دەستكردیان بە ناوی ستارگەیت راگەیاند.
لە كۆنفرانسێكی رۆژنامەوانیدا ترەمپ وتی، كۆمپانیاكان 100 ملیار دۆلار تەرخان دەكەن لە سەرەتادا و دواتر دەیگەیەننە 500 ملیار دۆلار وەكو ژێرخانی ژیری دەستكرد، ئەوەش 100 هەزار هەلی كار دەڕەخسێنێت.
دەشڵێت، پرۆژەكە دەستدەكات بە كردنەوەی چەند ناوەندێك لە سەرانسەری وڵاتدا و زانیاری كۆدەكاتەوە.
لای خۆیەوە سام ئاڵتمان رایگەیاند، ئەمە گرنگترین پرۆژە دەبێت كە ئەنجام بدرێت و بەبێ ترەمپ ناتوانن ئەو كارە بكەن.
سەرۆكی ئەمریكا رایدەگەیەنێت، لە یەكەم وێستگەی گەشتكردنی بۆ دەرەوەی وڵات، سەردانی سعودیە دەكات و وتیشی ئەگەری هەیە بەمزووانە سعودیە و ئیسرائیل پەیوەندییەكانیان ئاسایی بكەنەوە.
دۆناڵد ترەمپ سەرۆكی ئەمریكا لە میانی ئیمزاكردنی ژمارەیەك بڕیار لە نوسینگەكەی لە كۆشكی سپی بە رۆژنامەنوسانی راگەیاند، لەو باوەڕەدایە، کە سعودیە بەمزووانە دەچێتە ناو پەیماننامەی ئەبراهامەوە.
لە ساڵی 2020دا، هەریەك لە ئیمارات، بەحرێن، سودان و مەغریب بە نێوەندگیریی ئەمریكا، رێككەوتننامەی ئاساییكردنەوەی پەیوەندیەكانیان لەگەڵ ئیسرائیل ئیمزاكرد كە دواتر ناوی لێنرا رێككەوتننامەی ئەبراهام.
هاوكات دۆناڵد ترەمپ وتیشی، لە یەكەم خولی سەرۆكایەتی ئەمریكادا، یەكەمجار سەردانی سعودیەی كرد كە بەرپرسانی ئەو وڵاتە رەزامەندییان لەسەر ئەوە نیشاندا كە بە بەهای 450 ملیار دۆلار لە بەرهەمەكانیان بكڕن.
دۆناڵد تڕەمپ سەرۆكی ئەمریكا لە دەستپێكی دەستبەكاربوونیدا رایگەیاند، متمانەی بە ئاگربەستی نێوان ئیسرائیل و بزوتنەوەی حەماس نییە.
ترەمپ لە كۆشكی سپییەوە بە رۆژنامەنووسانی راگەیاند، لە جەنگی غەززەدا بزوتنەوەی حەماس لاواز بوو، كەرتی غەززەش بووەتە ناوچەیەكی وێرانەی گەورە كە ژمارەیەكی زۆر دانیشتووانی تێدایە، بۆیە دەبێت بە شێوازێكی جیاواز نوێ بكرێتەوە.
ئاشكراشی كردووە، ئیدارەكەی هاوكار دەبێت لە دووبارە ئاوەدانكردنەوەی غەززەدا.
تڕەمپ نەشیشاردووەتەوە، متمانەی بە بەردەوامبوونی ئاگربەستی نێوان ئیسرایل و بزوتنەوەی حەماس نییە .
ئەوە لەكاتێكدایە، لە رۆژی یەكشەممەوە رێككەوتنی ئاگربەستی غەززە لە نێوان بزوتنەوەی حەماس و ئیسرائیل چووەتە بواری جێبەجێكردنەوە و لە قۆناغی یەكەمیشدا حەماس سێ بارمتەی ئیسرائیلی لە بەرامبەر 90 دەستگیركراوی فەڵەستینیدا ئازاد كرد.
ئەنجومەنی پیرانی ئەمریکا مارکۆ روبیۆی وەک وەزیری دەرەوەی ویلایەتە یەکگرتووەکان پەسەند کرد، بەوەش بووە یەکەم وەزیری کابینەکەی تڕەمپ.
موکۆ روبیۆی سیناتۆری کۆمارییەکان، یەکێک بوو لەو کاندیدانەی تڕەمپ کە کەمترین مشتومڕی لەسەر بوو. دوای ئەوەی هەفتەی رابردوو گفتوگۆیەکی راستەوخۆی لەگەڵ ئەنجومەنی پیرانی ئەمریکادا ئەنجامدا، کە چوار کاتژمێری خایاند و تیایدا چەندین پرسی جیهانیان شەن و کەو کرد. شەوی رابردوو وەک وەزیری دەرەوەی کابینەکەی تڕەمپ پەسەند کرا.
لەو بارەیەوە چاک گراسلی سیناتۆر ئەوەی خستووەتە روو، مارکۆ روبیۆ پیاوێکی زیرەکە و تێگەیشتنێکی باشی بۆ سیاسەتی دەرەوەی ئەمریکا هەیە.
رۆبیۆ بەوە ناوی دەرکردووە، "وەک باز وایە لە سیاسەتی دەرەوەدا" و بە تەواوی دژی جەنگی نێوان ئیسرائیل و غەززەیە، پێی وایە، بوونی گروپە چەکدارەکانی وەک حەماس و حزبوڵای لوبنان هۆکاری ئەو شەڕەن کە لەو دوو وڵاتەدا هەیە و لەو رووەوە پشتگیری لە ئیسرائیل دەکات.
لەلایەکی دیکەوە، رۆبیۆ دژی ئێرانە و لە رابردوودا ئەو سیستمەی لە ئێراندا هەیە، بە تیرۆرست ناوی هێناون.
ساڵی رابردووش باسی لەوەکرد، "سەرهەڵدانی بەرەیەک کە چین و روسیا و ئێران سەرکردایەتی بکەن، گەورەترین هەڕەشەی جیۆسیاسییە بۆ ویلایەتە یەکگرتووەکان".
مارکۆ روبیۆ لە ساڵی ١٩٧١ لەدایک بووە، سیناتۆر و سیاسەتوانە و لە دایک و باوکێکی کوبایی لەدایک بووە. خێزاندارە و خاوەنی چوار منداڵە، رۆبیۆ دەڵێت: هیچ کارێک لە بوون بە باوک گرنگتر نییە.
لە ساڵی ٢٠٠٠دا بووە بە ئەندامی ئەنجومەنی نوێنەرانی ئەمریکا و لە ساڵی ٢٠٠٦دا بووە وتەبێژی ئەنجومەنەکە، لە ساڵی ٢٠١١شەوە وەک سیناتۆر لە ئەنجومەنی پیراندا کار دەکات.
توركیا سنوری بەنداوی تشرین و گوندەكانی باشوری كۆبانێ و شاری زیرگانی سەر بە كانتۆنی سیزری لە رۆژئاوای كوردستان بۆردومان كرد.
ناوەندی ڕاگەیاندنی هێزەكانی سوریای دیموكرات"هەسەدە"بڵاویكردەوە، توركیا و گروپە چەكدارەكان هێرشێكی بەرفراوانیان كردوەتە سەر گوندەكانی دەوروبەری بەنداوی تشرین، لە باشوری رۆژهەڵاتی مەنبج، هێزەكانی هەسەدە وەڵامی هێرشەكەیان داوەتەوە، لە ئەنجامدا چوار ئۆتۆمبێلی سەربازی تێكشكێنراون، 8 چەكدار كوژراون، 14 چەكداریش برینداربوون.
راشیگەیاندوە، توركیا بە فڕۆكەی جەنگی ناوچەی دەوروبەری بەنداوی تشرین و شاری زیرگانی سەر بە كانتۆنی سیزری بە چەكی قورس بۆردومان كردووە.
بەهۆی کەوتنەوەی ئاگر لە هۆتێلی کۆمەڵگەیەکی گەشتیاری تورکیادا 10 کەس گیانیان لەدەستدا و 32 کەسی دیکە بریندار بوون.
میدیاکانی تورکیا ئەوەیان خستووەتە روو، ئاگرەکە لە هۆتێلی ناوچەیەکی گەشتیاریی تایبەت بە خلیسکێنە و تەلەفریکی سەر بەفردا کەوتووەتەوە لە پارێزگای بۆلۆ.
لەوبارەیەوە عەلی یەرلی کایا وەزیری ناوخۆی تورکیا رایگەیاندووە، ئاگرەکە بەرەبەیانی ئەمڕۆ لە کۆمەڵگەی گەشتیاریی کارتالکایا کەوتووەتەوە و بە خێرایی تەشەنەی کردووە.
لە ئێستادا تیمەکان سەرقاڵی ئەوەن بە خێرایی بریندارەکان رزگار بکەن، تەرمی ئەو کەسانەشی لە ئاگرەکەدا گیانیان لەدەستداوە بەرەو پزیشکی دادی پارێزگاکە دەبرێن.
وەزیری ناوخۆی تورکیا دەشڵێت، لە ئێستادا لێکۆڵینەوە لە هۆکاری کەوتنەوەی ئاگرەکە دەستی پێکردووە و بەدەر لە زیانی گیانی ئاگرەکە بووەتە هۆی ئەوەی بەشێکی زۆریی باڵەخانەکە بسوتێنێت.
دۆناڵد ترەمپ، سەرۆكی ئەمەریكا لە یەكەم رۆژی دەستبەكاربوونیدا دەیان بڕیاری دەركرد لەنێویشیاندا هەڵوەشاندنەوەی چەندین فەرمانی جۆ بایدنی سەرۆكی پێشوو.
ترەمپ دوای گەیشتنی بە كۆشكی سپی، بە رۆژنامەنوسانی وت، نزیكەی 80 فەرمانی ئیدارەی پێشووی بایدن هەڵدەوەشێنێتەوە لەنێویشیاندا كشانەوەی ئەمریكا لە ڕێككەوتنی كەشوهەوای پاریس كە هەوڵێكە بۆ بەرەنگاربوونەوەی گەرمبوونی گۆی زەوی.
لەنێو ئەو بڕیارانەی ترەمپدا بڕیاری لێخۆشبوون بۆ نزیكەی 1500 زیندانی هەیە كە ساڵی 2020 هێرشیانكردە سەر بینای كۆنگرێس.
یەكێكی تر لەو بڕیارانە، هەڵوەشاندنەوەی سزاكان بوو لەسەر ژمارەیەك راستڕەویی توندڕەوی ئیسرائیلی كە تۆمەتبارن بە توندوتیژیی و داگیركاری لە كەناری ڕۆژئاوای فەلەستین.
هەروەها كۆتایی هێنان بە مافی پێدانی ڕەگەزنامە بەو منداڵانەی كە لە ئەمەریكا لە دایك دەبن و دایك و باوكییان كۆچبەری نایاسایین لەگەڵ گۆڕینی ناوی كەنداوی مەكسیك بە كەنداوی ئەمریكا.
راوێژكارێكی ترەمپ وادەی بڕیارە قورسەكان دژ بە ئێران ئاشكرا دەكات و دەڵێت، تاران هەژموونی ناوچەیی لەدەستداوە.
مایك واڵتز راوێژكاری ئاسایشی نیشتیمانی ئەمریكا رایگەیاندووە، ئێران لە قۆناغی بەرگریدایەو كاریگەری ناوچەیی و بەرگری ئاسمانی لەدەستداوە.
وتیشی، ئیدارەی ترەمپ بەنیازە لە مانگی داهاتوودا كۆمەڵێك بڕیاری یەكلاكەرەوە دژ بە ئێران دەربكات و ئەوەش كاتێكی گونجاوە.
ترەمپ لە مانگی تشرینی دووەمی ساڵی رابردوو رایگەیاند، ئەمریكا هەوڵی زیانگەیاندن بە ئێران نادات، بەڵام رێگەش نادات ببێتە خاوەنی چەكی ئەتۆمی.
دوای ئەوەی دوێنێ بە رەسمی تۆڕی کۆمەڵایەتی تیک تۆک لە ویلایەتە یەکگرتووەکانی ئەمریکا راگیرا، ئەمڕۆ کەوتەوە کار و لەئێستادا بەکارهێنەران دەتوانن کاری پێبکەن.
دوێنێ دۆناڵد تڕەمپ سەرۆکی هەڵبژێردراوی ئەمریکا کە ئەمڕۆ مەراسیمی سوێندخواردنو دەستبەکاربوونەکەی بەڕێوەدەچێت رایگەیاند، تیک تۆک دەگەڕێنێتەوە بۆ ئەمریکا.
دوێنێ یەکشەممە، بە رەسمی تیک تۆک لە ویلایەتە یەکگرتووەکانی ئەمریکا راگیرا، شەوی پێش ئەوەش، لە پەڕەی سەرەکی ئەپڵیکەیشنەکە لای ئەو بەکارهێنەرانەی لە ویلایەتە یەکگرتووەکانەوە ئەپەکە بەکاردەهێنن نووسرا، یاساکانی ئەمریکا لە رۆژی ١٩ی مانگەوە تیک تۆک رادەگرن و ئەوان کاردەکەن بۆئەویە چی زووە بتوانن زووتر ئەپڵیکەیشنەکە بخەنەوە کار.
داوای لێبوردنیشیان لە بەکارهێنەرانیان کرد و داوایان لێکردن، لەسەر ئەپەکە بمێننەوە.
بەپێی هەواڵێکی ماڵپەڕی بی بی سی، تیک تۆک 170 ملیۆن بەکارهێنەری هەیە لە ویلایەتە یەکگرتووەکانی ئەمریکادا.
رۆژی 17ی ئەم مانگە دادگای باڵای ئەمریكا بڕیاری قەدەغەكردنی تیك تۆكیدا، ئەوەش دوای ئەوەی ئیدارەی بایدن بە دادگای باڵای راگەیاند، تیكتۆك زانیاری لەسەر ئاسایشی نیشتمانیی لە بەکارهێنەران كۆدەكاتەوە بۆیە پێویستە قەدەغە بكرێت، چونكە چین دەتوانێت بە نهێنی دەستكاری پلاتفۆڕمەكە بكات بۆ پێشخستنی بەرژەوەندییە سیاسییەكانی و زیان بە ئەمریكا بگەیەنێت.
لەبەرامبەر ئەوەشدا میدیاكانی ئەمریكا باسیان لەوە دەکرد، ترەمپ نایەوێت تیك تۆك لە ئەمریكا قەدەغە بكرێت بەڵكو دەیەوێت ئەپەكە لە چین بكڕێتەوە و ئەمریكا خاوەندارێتی بكات، لەسەر ئەم پرسەش قسەی لەگەڵ سەرۆكی چین كردووە و بڕیار وایە لەماوەی سەرۆكایەتییەكەیدا ئاڵوگۆڕی خاوەندارێتی ئەپەكە ئەنجامبدات.
ئەمڕۆ رێوڕەسمی دەستبەکاربوونی دۆناڵد تڕەمپ سەرۆکی هەڵبژێردراوی ئەمریکا بەڕێوەدەچێت، لەو بارەیەوە تڕەمپ رایگەیاند، دوای دەستبەكاربوونی بە خێرایی و هێزێكی بێوێنەوە كارەكانی دەست پێ دەكات.
ترەمپ لە میانی بەشداریكردنی لە ئاهەنگی سەركەوتن كە بە بەشداری هەزاران لە لایەنگرانی لە واشنتن بەڕێوەچوو، وتارێكی پێشكەشكرد و رایگەیاند، دوای دەستبەكاربوونی بە خێرایی و هێزێكی بێوێنەوە كارەكانی دەست پێ دەكات بۆ چارەسەركردنی هەر قەیرانێك كە رووبەڕووی ئەمریكا دەبێتەوە.
بەڵێنیشی دا بە كۆتاییهێنان بە دۆسیەی كۆچبەرە نایاساییەكان و جارێكی تریش دوپاتیكردووەتەوە كە لە یەكەم رۆژی دەستبەكاربوونیدا 100 مەرسومی سەرۆكایەتی دەردەكات.
سەبارەت بە تیكتۆكیش ترەمپ رایگەیاند، دەبێت تیك تۆك رزگار بكەن و هیچ بژاردەیەكی تریان لەبەردەستدا نییە جگە لە رزگاركردنی.
كەناڵی سی ئێن ئێنیش ئاشكرای كردووە، ترەمپ یاریدەدەرەكانی راسپاردووە بۆئەوەی دوای چەند رۆژێكی كەم لە دەستبەكاربوونی، پەیوەندییەکی تەلەفۆنیی لەگەڵ ڤلادیمیر پوتن سەرۆكی روسیا بۆ رێكبخەن.
سەرۆك كۆماری عیراق بە مەبەستی بەشداریكردن لە كۆڕبەندی ئابووری جیهانی لە داڤۆس، سەردانی سویسرا دەكات.
سەرۆكایەتی كۆماری عیراق بڵاویكردەوە، ئەمڕۆ د.لەتیف رەشید سەرۆك كۆماری عیراق بەرەو سویسرا بەڕێدەكەوێت بۆ بەشداریكردن لە كۆڕبەندی ئابووری جیهانی لە داڤۆس.
كۆڕبەندی ئابووری جیهانی لە داڤۆس بە ناونیشانی "هاوكاری بۆ سەردەمی زیرەك"، 20ی ئەم مانگە دەستپێدەكات و چوار رۆژ بەردەوام دەبێت.
نزیكەی سێ هەزار سەركردە لە 130 وڵاتی جیاواز و 350 سەرۆكی حكومەت بەڕێوەدەچێت، گفتوگۆكانی كۆڕبەندەكەش لە چوارچێوەی پێنج تەوەردا دەبن، كە بریتین لە پاراستنی سەرچاوەكانی گەشەكردن و پیشەسازیی لەسەردەمی زیرەك و وەبەرهێنان لە خەڵك و گۆڕانكارییە جیۆئابوورییەكان، لەگەڵ پاراستنی هەسارە و بنیادنانەوەی متمانە لە جیهانێكی ئاڵۆز و خێرادا.