ڕوانگەی سووری بۆ مافەکانی مرۆڤ، رایگەیاند، دوو فڕۆکەی بارهەڵگری ئەمریکی،  لە دوو کاتی جیاوازدا گەیشتووەتە حەسەکە، یەکێکیان لە بنکەی سەربازیی شاری شەدادی لە دەوروبەری باشووری حەسەکە نیشتۆەتەوە و ئەوی دیکەیان لە بنکەی سەربازیی خەرابەجیر لە دەوروبەری رمێلان لە باکووری حەسەکە نیشتووەتەوە.

ئاماژەی بەوەشداوە، فڕۆکەکان کەرەستەی سەربازی و لۆجستیان گواستۆتەوە بۆ هەسەدە ئەمەش لە چوارچێوەی بەردەوامی بەهێزکردنی بنکە سەربازییەکان و پاڵپشتیکردنی هێزەکانی هەسەدە .

ئەمە لەکاتێکدایە، هەڕەشەکانی تورکیا و گرووپە چەکدارەکانی نزیک لە تورکیا بۆسەر هەسەدە و رۆژئاوا بەردەوامە و زیاتر لە دوو هەفتەیە پێکدادانی قورس دەکرێت، هاوکات سەعاتی  سفری هەسەدەش بەرەو کۆتایی دەڕوات، کە پیشتر لە بەیاننامەیەکدا داوایان لە گرووپە چەکدارەکانی سەربە تورکیا کردبوو ناوچەکانی سەرێ کانی و گرێ سپی و عفرین چۆڵبکەن، چونکە ئۆپەراسیۆنی ئازادکردنی ئەو ناوچانە دەستپیدەکەن.

لێدان بە پاپوچ مێژوویەکی کۆنی هەیە، ئەگەرچی پاپوچ یەکێکە لەو کەرستانەی بەکارهێنانێکی رۆژانەی ئەرێنی هەیە، بەڵام بەشێوەیەکی جیاواز لە کلتورە جیاوازەکاندا بۆ سەرزەنشتکردن بەکارهێنراوە.

گۆزەیەک وەک پارچەیەکی هونەریی لە مۆزەخانەی نیشتیمانیی شوێنەواریی تارانتۆی ئیتاڵیادا پارێزراوە، کە مێژووەکەی دەگەڕێتەوە بۆ ٣٦٠ ساڵ بەر لە زایین، ئەو چیرۆکە روون دەکاتەوە.

وێنەی سەر ئەو پارچە هونەرییە ئەفسانەیەکی یۆنانی دەگێڕێتەوە، کە تیایدا ئەفرۆدیتی خواوەندی جوانی ئەفسانەی یۆنانییەکان، پاپووچێکی بەدەستەوەیە و سەرزەنشتی ئیرۆسی کوڕی دەکات.

ئیرۆس لە ئەفسانەی یۆنانییەکاندا بە خواوەندی خۆشەویستی ناوی دەبرێت و لەبەشێکی زۆری ئەفسانەکانیشدا بە خراپرەفتار وێنا کراوە.

ئەو گۆزەیە تاکە پارچەی هونەریی ناو مۆزەخانەکە نییە کە ئەو چیرۆکە دەگێڕێتەوە، بەڵکو پارچەی دیکەش هەن کە لەناویاندا پەیکەرێک هەیە.

ئەو وێنەیەی کە تیایدا ئەفرۆدیت لەرێگای پاپوچێکەوە سەرزەنشتی ئیرۆس دەکات، لە بەشێکی زۆری پارچە هونەرییەکانی دیکەی یۆنانیشدا دەبینرێت و بەوە لێکدەدرێتەوە، کە وەک بەشێکی پەروەردەی منداڵيکانیان لەو سەردەمەدا سزا بەکارهێنراوە. کە ئەوەش رەوایەتی نادات بەوەی سزادانی منداڵان لەرێگای لێدان و ئەشکەنجەوە جێبەجێبکرێت، بەڵکو تەنها مێژووی ئەو سەردەمە دەگێڕێتەوە.

بەکارهێنانی پاپوچ و پێڵاو بۆ دەربڕینی ناڕەزایەتی

بەدەر لە بەکارهێنانی پاپوچ بۆ سەرزەنشتکردنی منداڵان لەلایەن دایکیانەوە کە ئێستا بەشێوەیەکی بەرچاو کەمبووەتەوە، ئەو کلتورە درێژەی کێشاوە و لە زۆرکاتدا وەک دەربڕینی ناڕەزایەتیش بەکارهاتووە.

هەر بۆ نموونە لە بەشێکی پەرلەمانەکانی جیهاندا زۆرجار رووداوی لەو جۆرە روویانداوە کە پێڵاوەکانیان هەڵداوە، یان لە خۆپیشاندانەکاندا لەکاتی دروستبوونی گرژیدا پێڵاو بەکارهاتووە.

یانیش بەکارهێنانی پێڵاو لە هەڵمەت و رۆژە جیهانییەکاندا بەپێی دۆخە جیاوازەکان مانای جیاوازی بەخشیوە، هەروەک ئەوەی ماوەی چەند ساڵێکە لە هەڵمەتەکانی بەرەنگاربوونەوەی توندوتیژی دژی ژناندا دانانی سەدان پێڵاوی سوور بووەتە بەشێک لە چالاکییەکانی ئەو رۆژە.

ئەمڕۆ و بۆ یەکەمجار، حکومەتی نوێی سوریا ژنێکی وەک پارێزگاری بانکی ناوەندیی سوریا دیاریکرد.

میساء سابرین ئەو خانمەیە کە وەک پارێزگاری بانکی ناوەندیی سوریا دیاریکراوە، ئەمڕۆ دووشەممە، حکومەتی راگوزەری سوریا دەستبەکاربوونەکەی راگەیاند.

میساء خاوەنی بڕوانامەی ماستەر و دکتۆرایە لە ژمێریاریدا و لە مێژووی دامەزراوە داراییەکانی سوریادا ئەوە یەکەمجارە ژنێک بچیتە ئەو پۆستەوە.

میساء لە شوێنی محەمەد عیسامی پارێزگاری پێشووی بانکی ناوەندی دەستبەکاربووە، کە لە ساڵی ٢٠٢١ لەلایەن بەشار ئەسەدەوە بۆ ئەو پۆستە هەڵبژێردرابوو.

میساء بەر لە بوون بە پارێزگاری بانکی ناوەندی، چەندین پۆستی دیاری لە بانکەکەدا هەبووە و لە ساڵی ٢٠١٨شەوە جێگری یەکەمی محەمەد عیسام بووە. سەرەڕای ئەوەی پێشتریش سەرۆکی بەشی چاودێری بانکەکە بووە و چەند پۆستێکی دیکەشی هەبووە.

لەماوەی چەند رۆژی رابردووشدا، حکومەتی ئێستای سوریا عائیشە دبسیان بە پۆستی بەرپرسی نوسینگەی کاروباری ژنان دیاریکرد، کە عائیشە بووە یەکەم ژن لە حکومەتی نوێی سوریادا پۆستێکی فەرمی هەبێت و لەئێستاشدا میساء دووەم ژنە پۆستێکی فەرمی وڵاتەکەی پێبدرێت.

كۆریای باشوور سەرجەم فڕۆكەكانی بۆینگ ٧٣٧ - ٨٠٠ی لە ئەرك راگرت، ئاماژە بەوەشکراوە، تاوەکو ئەوكاتەی پشكنینی سەلامەتییان بۆ ئەنجام دەدرێت نەخرێنەوە کار.

دوێنێ یەکشەممە، فڕۆكەیەكی بۆینگ-٧٣٧ی هێڵی ئاسمانی جیجوی کۆریای باشور، بە ١٨١ سەرنشینەوە لە فڕۆكەخانەی نێودەوڵەتی یووان كۆنتڕۆڵی لەدەستدا و بەهۆیەوە ١٧٩ كەس گیانیانلەدەستدا.

دوای ئەو رووداوە، دەسەڵاتی فڕۆكەوانی كۆریای باشوور فەرمانێكی دەركرد بۆ پشكنینی سەرجەم فڕۆكەكانی بۆینگ ٧٣٧ -٨٠٠ و دڵنیابوون لەوەی كە هیچ كەموكوڕییەكیان نییە.

بەپێی لێكۆڵینەوە سەرەتاییەكان، فڕۆکەکەی دوێنێ گرفت لە میكانیزمی هایدرۆلیكی تایەكانیدا هەبووە و لەکاتی نیشتنەوەیدا تایەکانی نەهاتوونەتە دەرەوە.

لەوبارەیەوە سەرۆكی فەرمانگەی سیاسەتی فڕۆكەوانی لە وەزارەتی گواستنەوەی كۆریای باشوور رایگەیاندووە، کۆریای باشور ١٠١ فڕۆكەی بۆینگ ٧٣٧ - ٨٠٠ هەیە کە رۆژانە گەشت دەکەن، بۆیە پشكنینی تایبەتیان بۆ دەکرێت.

رووداوەکەی دوێنێ کاردانەوەی جیهانیی بەدوای خۆیدا هێنا، کۆمپانیا فڕۆکەوانییەکەش داوای لێبوردنی لە کەسوکاری سەرجەم قوربانییەکان کرد و باسی لەوەکرد، لە پشکنینی بەر لە فڕیندا فڕۆکەکە هیچ گرفتێکی نەبووە، لێکۆڵینەوەکان دەستپێدەکان بۆ زانینی هۆکاری رووداوەکە.

ئەمە دووەم رووداوی تێکشکانی فڕۆکەیە لەماوەی کەمتر لە هەفتەیەکدا، رۆژی ٢٥ی ئەم مانگەش، فڕۆکەیەکی هێڵی ئاسمانی کازاخستان بە ٧٢ سەرنشینەوە لە باکووری ئازەربایجانەوە بەرەو روسیا بە رێگاوە بوو، لە کازاخستان کۆنتڕۆڵی لەدەستدا و کەوتە خوارەوە.

سوپای پاسدارانی ئیران دەڵێت، حزبوڵای لوبنانی ریزەكانی خۆی رێكخستووەتەوە، سوپا سالاری ئیسرائیلیش دەڵێت، لە رووی سەربازییەوە بەسەر حزبوڵادا سەركەوتوون.

عەلی ناعینی وتەبێژی سوپای پاسدارانی ئێران رایگەیاند، تائێستا سوپای پاسداران بەهێزترین هێزی سەربازیی رۆژئاوای ئاسیایە، بە هیچ شێوەیەكیش چاوپۆشی لە دوژمنان ناكەن و هیچ دەرفەتێكیان پێنادەن بۆ جێبەجێكردنی پیلانەكانیان.

وتیشی، سوپای پاسداران خاوەنی ٤٦ ساڵ ئەزموونی شەڕە لە ئاستی جیهان و ئەستەمە ئیسرائیل بتوانێنت ئیرادەی تێكبشكێنێت.

راشیگەیاند، لە ئێستادا حزبوڵای لوبنانی ریزەكانی رێكخستووەتەوە و بەمنزیكانە هێرشەكانی دەستپێدەكاتەوە.

لەلایەكی تریشەوە هێرزی هەلێڤی سوپاسالاری ئیسرائیل لە گرتەیەكی ڤیدیۆیدا لە لوبنانەوە  رایگەیاند، بە تەواوی سەركەوتنیان بەسەر حزبوڵادا تۆماركردووە، بە تایبەتیش لە رووی سەربازییەوە.

حكومەتی ئەڵمانیا وەك هاوكاری ژمارەیەكی زۆر پرۆژەی مرۆیی بە بەهای زیاتر لە ٦٠ ملیۆن یۆرۆ لە سوریا جێبەجێدەكات.

سفینیا شۆڵتزە وەزیری گەشەپێدان لە حكومەتی ئەڵمانیا رایگەیاند، رەوشی مرۆیی لە سوریا بەهۆی ١٤ ساڵی شەڕ و ئاڵۆزییەوە كارەساتێكی گەورەیە و خەڵكی ئەو وڵاتە لە هەموو رویەكی ژیان و گوزەرانەوە لە خراپترین رەوشدان و پێویستیان بە هاوكارییەكی زۆر هەیە، پێویستە وڵاتانی جیهانیش بە هەموو شێوەیەك هاوكاری مرۆیی رەوانەی سوریا بكەن، چونكە زیاتر لە ٩٠٪ـی دانیشتووانی ئەو وڵاتە لە هەژاریدا دەژین و پشتیان بە هاوكارییە نێودەوڵەتییەكان بەستووە.

وتیشی، حكومەتی ئەڵمانیا بڕیاریداوە ژمارەیەكی زۆر پرۆژەی مرۆیی بە بەهای زیاتر لە ٦٠ ملیۆن یۆرۆ لە سوریا لە رێگەی نەتەوە یەكگرتووەكان و رێكخراوە ناحكومییەكانەوە جێبەجێبكات، لەو بڕە پارەیەش ٢٥ ملیۆن یۆرۆ دەدرێت بە رێكخراوی یونسێف كە تایبەتە بە منداڵان.

یەكێك لە سەرۆكەكانی پێشووتری ئەمریكا كۆچیدوایی كرد و یەكەم سەرۆكی ئەو وڵاتەشە تەمەنی بگاتە زیاتر لە ١٠٠ ساڵ.

میدیاكانی ئەمریكا بڵاویانكردەوە، جیمی كارتەر كە سەر بە دیموكراتەكانی ئەو وڵاتەیە و لە ساڵانی نێوان ١٩٧٧ بۆ ١٩٨١ سەرۆكی ئەمریكا بووە، لە تەمەنی زیاتر لە ١٠٠ ساڵیدا كۆچیدوایی كرد و لەماوەی رابردووشدا زیاتر لە ١٩ مانگ بوو لە خانەی چاودێری بەساڵاچووان لە ویلایەتی جۆرجیا لە ژێر چاودێری پزیشكدا بوو، كە پێشتریش حاكمی ئەو ویلایەتە بووە.

ئاماژە بەوەشكراوە، لە رۆژی یەكی تشرینی یەكەمی ئەمساڵ جیمی كاتەر سەرۆكی پێشووتری ئەمریكا مۆمی ١٠٠ ساڵەی تەمەنی كوژاندووەتەوە، بەوەش یەكەم سەرۆكی ئەمریكایە بگاتە تەمەنی زیاتر لە ١٠٠ ساڵ.

جۆ بایدن سەرۆكی ئەمریكاش رۆژی نۆی مانگی یەكی داهاتووی وەك رۆژی ماتەمینی بۆ كۆچیدوایی جیمی كارتەر دیاریكرد.

لە ئەمریكا لە رووداوێكی سەیردا كارمەندێكی گەیاندنی خواردنە خێراكان لەسەر دوو دۆلار ١٤ چەقۆ لە ژنێكی دووگیان دەدات و بە سەختی برینداری دەكات.

میدیاكانی ئەمریكا بڵاویانكردەوە، لە ویلایەتی فلۆریدا ژنێك بەناوی میلیندا ئیریزاری كە دوو گیان بووە، داوای خواردنی كردووە و كە خواردنەكە گەیشتووەتە ماڵەكەی بەهاكەی كە ٣٣دۆلار و ١٠ سەنت بووە، رادەستی كارمەندی گەیاندنی خواردنەكەی كردووە و كارمەندەكەش، داوای لە ژنەكە كردووە وەك بەخشش دوو دۆلاری پێبدات.

ئاماژە بەوەشكراوە، دوای ئەوەی ژنەكە رازی نەبووە دوو دۆلارەكە بدات، كارمەندەكەی گەیاندنی خۆراكەكە هێرشی كردووەتە سەر ژنەكە و ١٤ چەقۆی لێداوە و بەهۆیەوە زیانی زۆر بەر سییەكانی ژنەكە كەوتووە، بەڵام دوای ئەوەی نەشتەرگەری بۆكراوە، ئێستا تەندروستی جێگیرە و كارمەندەكەش لەلایەن پۆلیسەوە دەستگیركراوە.

سەرۆک وەزیرانی ئیسرائیل توشی پرۆساتەوە بەهۆی ئەوە توشی هەوکردنی بۆری میز بووە،ئەمشەو نەشتەرگەری بۆ دەکرێت.

نوسینگەی سەرۆک وەزیرانی ئیسرائیل بنیامین ناتانیاهۆی سەرۆک وەزیرانی ئیسرائیل چوارشەممەی رابردوو لە نەخۆشخانەی هەدەسا پشکنینی ئەنجامداوە و دەرکەوتووە بەهۆی پرۆساتەوە رێرەوی میزەوە توشی هەوکردن بووە.

سەرۆک وەزیرانی ئیسرائیل تەمەنی ٧٥ساڵە

نوسینگەی سەرۆک وەزیران ئەوەشی خستۆتە ڕوو بەهۆی ئەو کێشەوە ئەمشەو ناتانیاهۆی ٧٥ساڵان، نەشتەرگەری بۆ دەکرێت.

روانگەی سوری بۆ مافەکانی مرۆڤ، لە ٢٠ رۆژی شەر و ئاڵۆزیەکان لەنێوان هێزەکانی سوریای دیموکرات و گروپەچەکدارەکان ١٢٠ کەس کوژراون ،شەری نێوان ئەو دوو هێزە بەردەوامە و لەشەرەکاندا چەکی قورس بەکاردەهێنرێت.

روانگەی سوری رایگەیاند، لە٢٠ رۆژدا بەهۆی شەڕی نێوان هەسەدە و گروپەچەکدارەکان سەت و بیست کەس کوژراون.

رێکخراوەکە ئاماژە بەوەش دەکات، لەشەڕی نێوان ئەو دوو هێزەدا چەکی قورس بەکاردەهێنرێت ئەوەش هۆکارێکی سەرەکیە بۆ زیادبوونی گیانلەدەستدان لە هەردو هێزەکە.

ئەمە لەکاتێکدایە،ماوەی چەند هەفتەیەکە شەر لەنێوان هەسەدە و گروپەچەکداریەکانی سەر بە تورکیا بەردەوامە.

سەرۆکی ئازەربایجان دەڵێت روسیا فڕۆکەکەمانی خستۆتە خوارەوە و دەبێت بەرپرسیارێتی بگرێتە ئەستۆ و قەرەبوومان بکاتەوە،باکۆ هەرگیز رێگەنادات ئەم دەستدرێژیە بۆ سەر خاک و نەتەوەکەی بەبێ سزا تێپەرێت.

ئیلهام عەلیێڤ سەرۆکی ئازەربایجان رایگەیاند،روسیا فرۆکەکەی خستووینەتە خوارەوە چاوەرێ دانپێنانی روسیا دەکەین لەسەر ئەو کارەی کە بۆتە هۆی کوشتنی ٣٨ کەس،دەبێت روسیا قەرەبووی کەس و کاری قوربانیان بکاتەوە،روسیا سزای خۆی وەربگرێت بۆ ئەم کارە.

ئەمە لە کاتێکدایە هەفتەی رابردوو فڕۆکەی نەفەرهەڵگری جۆری Embraer 190  کەوتە خوارەوە و ٣٨ کەس گیانیان لەدەستدا کە پەنجەی تۆمەت بۆ روسیا درێژدەکرێت، فرۆکەکە بەهۆی موشەکێکەوە لەئاسمانەوە ئاراستەی فرۆکەکە کرابوو کەوتەخوارەوە، هاوکات لەوکاتەدا بەسەر ئاسمانی چیجانەوە بووە کەوتۆتە خوارەوە.

ئاژانسی هەواڵی لوبنانی رایگەیاند، ئیسرائیل لە ٢٤ سەعاتی رابردوودا ١١ جار پێشێلی رێككەوتنی ئاگربەستی كردووە و لە باشوری لوبنان پێشڕەوی دەستپێكردووە.

 ١١ جار ئاگربەستی پێشێلكردووە
 

ئاژانسی هەواڵی لوبنانی رایگەیاند، لە ٢٤ سەعاتی رابردوودا ئیسرائیل لە پارێزگای نەبتیەی باشوری لوبنان ١١ جار پێشێلی رێككەوتنی وەستانی شەڕی كردووە و خانووی هاووڵاتیانیانی سوتاندون و تەقەیان كردووە.

دەشڵێت، لە چەند ناوچەیەك دەستی بە پێشڕەوی كردووە و هەڵیانكوتاوەتە سەر ماڵی هاووڵاتیان و دەستیان گرتووە بەسەر كەلوپەلی ماسیگرەكانی بەندەری سەیادین لە قەزای سور لە باشوری لوبناندا.

ئاگربەست لەنێوان لوبنان و ئیسرائیل 

راشیگەیاند، ماوەی ٣٣ رۆژە ئاگربەست لە نێوان لوبنان و ئیسرائیل كراوە لەو ماوەیەدا ٣٣٠ پێشێلكاری لەلایەن ئیسرائیلەوە ئەنجامدراوە.
ئیسرائیل و لوبنان لە ٢٧ی ١١ ئاگربەستیان راگەیاند و بەپێی رێككەوتنەكە ماوەی ٦٠ رۆژ شەڕ لە نێوانیاندا دەوەستێت.

بابا ڤانگا، پێشبینیکارە نابیناکەی جیهان، لە پێشبینییەکانی بەردەوامە، بەڵام ئەمجارەیان لەڕێی تەکنەلۆجیای زیرەکیی دەستکردەوە زنجیرەیەک پێشبینیی بۆ رووداوەکانی ساڵی نوێ دەخاتەڕوو و کە دەشێت بۆ هەندێک لە سەرۆکی وڵاتان جێی نیگەرانی بێت.

بەپێی هەواڵێکی رۆژنامەی "زە سەن"ـی بەریتانی، تیمێک توانیویانە بابا ڤانگا بە تەکنەلۆجیای زیرەکیی دەستکرد دروستبکەنەوە و زنجیرەیەک پێشبینی بۆ ساڵی 2025 پێ ئەنجام بدەن، کە دەرکەوتووە؛ لەڕووی وەرزش و هونەرەوە پێشبینیی دەرئەنجامی باش و لەڕووی سیاسیشەوە پێشبینی کارەساتی گەورە و مەترسیدار دەکرێت.

پێشبینییەکان پێدەچێت بۆ دۆناڵد ترەمپ، سەرۆکی هەڵبژێردراوی ئەمریکا باش نەبن، وەک دەوترێت، لە ساڵی نوێدا لەڕووی یاساییەوە گرفتی بۆ دروست دەبێت و دۆخی تەندروستیشی تێکدەچێت، هەروەها جوڵاندنی دۆسیەیەکی لە دادگادا، ویلایەتە یەکگرتووەکانی ئەمریکا و تەنانەت جیهانیش تووشی دابەشبوون و لیکترازان دەکات.

ئاماژەی بەوەش داوە؛ ترەمپ هەوڵی ئەوە دەدات لەسەر ئاستی جیهاندا ئیمپراتۆریەتێکی میدیایی تایبەت بەخۆی دابمەزرێنێت، بە ئامانجی ئەوەی هەواڵی کار و چالاکییەکانی بگەیەنێت بە لایەنگرەکانی لە تەواوی جیهاندا.

پێشبینی ئەوەش دەکات ترەمپ پەیوەندییەکانی لەگەڵ ئیلۆن مەسک، دەوڵەمەندترین پیاوی جیهان پتەوتر بکات، بەڵام لەگەڵ دەستبەکاربوونیدا وەک سەرۆکی ئەمریکا، دۆخی تەندروستی تێکدەچێت و بەوهۆیەوە ماوەیەک لە چاوی میدیاکان دووردەکەوێتەوە، بەڵام پێشبینی دەکرێت وەک چۆن لە هەوڵی کوشتنی دەربازی بوو، بەهەمان شێوە ئەو ئاڵنگارییەش تێپەڕێنێت.

سەبارەت بە ڤلادیمێر پوتن، سەرۆکی رووسیا، وەشانی زیرەکیی دەستکردی بابا ڤانگا دەڵێت، " پوتنیش ساڵێکی سەخت بەڕێدەکات، تەندروستی تێکدەچێت و لەسەر شانۆی سیاسیی جیهانیشدا رۆڵی بچووک دەبێتەوە، هەروەها لە شەڕی ئۆکرایندا دووچاری زنجیرەیەک پاشەکشە دەبێت، سووپای ئۆکراینیش هێرشێکی بەرفراوان دەکات و سەرکەوتنی گەورە بەدەست دەهێنێت".

ئەوەش هاتووە، کە ساڵی نوێ بۆ کیەر ستارمەر، سەرۆک وەزیرانی بەریتانیا ساڵێکی سەخت و پڕ لە ئاڵنگاری دەبێت، هەروەها پێشبینیی ئەنجامی باش بۆ هەڵبژاردەی ئینگلتەرا دەکات.

بابا ڤانگا لە ساڵی 1911 لە شاری سترومیکا لە باکووری مەکەدۆنیا لەدایکبووە، دوای ئەوەی لە تەمەنی 12 ساڵیدا بینایی لەدەستدەدات، کۆمەڵێک پێشبینی بۆ رووداوەکانی جیهان دەکات، کە هەندێکیان روویانداوە، ڤانگا لە ساڵی 1989 پێشبینی ئەوەی کرد دوو فڕۆکە هێرش دەکەنە سەر ئەمریکا، ئەمەش وەک ئەوەی لە 11ـی سێپتەمبەری 2001ـدا روویدا، لەدوای ئەمەوە ئەستێرەی ئەم ژنە گەشایەوە و زۆرێک بە خاوەن توانای سەروو سرووشتی ناویان برد.

ئەم پێشبینیکارە لە ساڵی 1996 لە بولگاریا کۆچیدوایی کرد و لە سەرەمەرگدا رایگەیاند، کە 2025 جیهان تووشی زنجیرەیەک بوومەلەرزەی وێرانکەر دەبێت.

سەرۆكی میسر و فەرەنسا لە پەیوەندییەكی تەلەفونیدا جەختیان لەسەر پێویستی دەستپێكردنی پرۆسەیەكی سیاسی هەمەلایەنە لە سوریا كردەوە. 

سەرۆكایەتی میسر لە راگەیەنراوێكدا بڵاویكردەوە، عەبدولفەتاح سیسی سەرۆكی میسر و ئیمانوێل ماكرۆن هاوتا فەرەنسییەكەی لە پەیوەندییەكی تەلەفۆنیدا جەختیان لەسەر گرنگی پاراستنی سەروەری و یەكڕیزی سوریا و پێویستی دەستپێكردنی پرۆسەیەكی سیاسی گشتگیر كردووەتەوە.

راشیانگەیاند، هەردوو سەرۆك جەختیان لەسەر گرنگی بەردەوامبوون لەسەر بەرزكردنەوەی ئاستی هاوكارییەكانی نێوان هەردوو وڵات لە بوارە جیا جیاكاندا كردوەتەوە، بەتایبەتی ئابووری و وەبەرهێنان ، لە هەمان كاتدا جەخت لەسەر گرنگی گەیشتن بە ڕێككەوتنی ئاگربەست لە كەرتی غەززە، ئاڵوگۆڕی بارمتەكان و دەستگیركراوان، كۆتایهێنان بە قەیرانی غەززە كردەوە.

لە شەڕ و پێكدادانی نێوان شەڕڤانانی هەسەدە و گروپە چەكدارەكاندا لە دەوروبەری مەنبج، شەش چەكدار كوژران. 

ناوەندنی راگەیاندنی هێزەكانی سوریای دیموكرات ناسراو بە هەسەدە رایگەیاند، لە نزیك مەنبج روبەڕوبونەوە لەگەڵ گروپە چەكدارەكانی نزیك لە توركیا روویداوە و لە ئەنجامدا شەش چەكدار كوژراون و دوو ئۆتۆمبێلی سەربازیش تێكشكێنراون.

هەسەدە ئاماژەی بەوەشكردووە، لە ئۆپراسیۆنێكدا لە نزیك رەقە  27 كەس بە تۆمەتی لایەنگری بۆ رێكخراوی تیرۆرستی داعش دەستگیركراون.

هەسەدە وتیشی، ئەو هەڵمەتەیان لە ئەنجامی زیادبوونی چالاكییەكانی داعش لە ناوچەكە و بەپێی زانیاری وردی هەواڵگری ئەنجامداوە، چونكە لە هەوڵدا بوون رەوشی ئەمنی ناوچەكە تێكبدەن.

ئەحمەد شەرع رایگەیاند، ئیدارەی ئێستای سوریا لەگەڵ هەسەدە لە دانوستاندایە بۆ چارەسەركردنی كێشەكانی باكوری ڕۆژهەڵاتی سوریا، چونكە كورد بەشێكی دانەبڕاوە لە پێكهاتەكانی سوریا.

ئەحمەد شەرع فەرماندەی ئۆپراسیۆنە سوربازییەكانی سوریا لە چاوپێكەوتنێكی تەلەفزیۆنیدا رایگەیاند، ئەو گەلی سوریای رزگار نەكردووە، بەڵكو گەلی سوریا خۆی بڕیاریداوە خۆی رزگار بكات، وتیشی، سوریا پێویستی بە ساڵێك دەبێت بۆ ئەوەی هاووڵاتی هەست بە گۆڕانكاری ڕیشەیی لە سیستمی حوكمڕانی و خزمەتگوزارییەكاندا بكات.

راشیگەیاند، ئیدارەی ئێستا لەگەڵ هێزەكانی سوریای دیموكرات دانوستان دەكات بۆ چارەسەركردنی كێشەكانی باكوری رۆژهەڵاتی سوریا.

جەختیشیكردەوە، كورد بەشێكی دانەبڕاو لە پێكهاتەكانی سوریا، هیچ دابەشبوونێكی وڵاتیش لە ئارادا نییە. هیواشی خواست؛ ئیدارەی نوێی ئەمریكا بە سەرۆكایەتی دۆناڵد ترەمپ سزاكانی سەر سوریا هەڵبگرێت.