سەرۆكی لوبنان كابینەی نوێی حكومەتی وڵاتەكەی بە بەشداری 24 وەزارەت و بە سەرۆكایەتی نەواف سەلامی سەرۆك وەزیران ئیمزا كرد.

سەرۆكایەتی كۆماری لوبنان پێكهێنانی حكومەتی نوێی لە 24 وەزیر بە سەرۆكایەتی نەواف سەلام راگەیاند و دەڵێت، حكومەتی نوێ چاكسازییە ئابورییەكان جێبەجێ دەكات، سەرۆك وەزیرانی نوێش جەختی لەسەر چاكسازی و گێڕانەوەی متمانەی هاووڵاتیان كردەوە.

دەشڵێت، لوبنان بڕیارنامەی 1701ی نەتەوە یەكگرتوەكان جێبەجێ دەكات، كە لە ساڵی 2006 كۆتایی بە شەڕی پێشوی حزبوڵا و ئیسرائیل هێنا، بۆیە هیوادان لەم كابینە نوێیەدا حكومەتێكی چاكسازی و رزگاری بێتە ئاراوە.

ئەمەش لەكاتێكدایە حكومەتی لوبنان دوای زیاتر لە سێ هەفتە گفتوگۆ لەگەڵ لایەنە سیاسییەكانی وڵاتەكە پێكهێنرا و پۆستەكانی حكومەتیش بەپێی سیستمی پشك دابەشكراون.

ویلایەتە یەکگرتووەکان رایگەیاند، پەتایەکی وەرزیی بەهێز وڵاقتەکەی گرتووەتەوە، کە لەماوەی 15 ساڵی رابردوودا، پەتای لەو جۆرە تۆمار نەکراوە. باس لەوەشدەکەن، تەنها لەم وەرزی پەتایەدا 24 ملیۆن کەس توشی پەتا بوون.

بەرپرسانی ویلایەتە یەکگرتووەکان باس لەوەدەکەن، ئەو پەتا وەرزییە نیشانەکانی لە هەندێک کەسدا توندن و بەهێزترین پەتایە، کە لە زستانی ساڵی 2010وە وڵاتەکەی گرتبێتەوە.

بەهۆی پەتاکەوە لە بەشێکی ویلایەتەکان خوێندنگەکان داخراون، بە جۆرێک تەنها لە یەک قوتابخانەی ویلایەتی تەکساس، هەفتەی رابردوو 650 خوێندکار و 60 مامۆستا و تیمی قوتابخانەکە توشی پەتاکە بوون.

لەوبارەیە ناوەندی کۆنتڕۆڵکردنی نەخۆشییەکان باسی لەوەکردووە، تاوەکو ئێستا لانیکەم 24 ملیۆن کەس لەم وەرزی پەتایەدا توشی پەتاکە بوون و 310 هەزار کەسیان لە نەخۆشخانە داخڵ کراون، هەر بەهۆی پەتای وەرزییەوە 13 هەزار کەس گیانیان لەدەستداوە، کە 57یان منداڵن.

پزیشکەکان باس لەوە دەکەن، ئێستا لەدوای بڵاوبوونەوەی ڤایرۆسی کۆرۆناوە، تاڕادەیەک نیشانەکانی هەندێک لە پەتا وەرزییەکان توندتر بوون و هەندێک جار کەسانی توشبوو ئازار دەدەن.

لە راگەیەندراوێکدا کۆریای باکور رایگەیاند، بەرهەمهێنانی چەکی ئەتۆمی لەو وڵاتەدا بە مەبەستی راگرتنی کردەوەی دوژمنکارانەی هێزەکانی بەرانبەریانە، هەروەها بەهیچ جۆرێک بابەتی گفتوگۆ و سازش نییە و چەکەکانمان بۆ بەکار هێنانن نەک مامەڵە پێوەکردن. 

لە وەڵامی دیدارەکەی رۆژی هەینی نێوان سەرۆکی ئەمەریکا و سەرۆک وەزیرانی ژاپۆن، کە تیایدا ئاماژە بە داماڵینی چەکە ئەتۆمییەکەی کۆریای باکوور درا، کۆریا راگەیەنراوێکی بڵاوکردەوە و ئاماژەی بەوەدا "ئەرکی هێزە چەکدارەکانمان وەڵامدانەوەی هەر کردەوەیەکی دوژمنکارانەیە کە بەرانبەرمان بکرێت، وڵاتەکەمان پێویستی بە دانپێدانانی هیچ کەسێک نییە و ئامادەش نییە لە ژێر ناوی هیچ رێککەوتنێکدا دەستبەرداری چەکی ئەتۆمی بێت. 

پێشتریش بەرپرسانی ناتۆ و یەکێتی ئەوروپا ئاماژەیان بە داماڵینی کۆریای باکوور دابوو لە چەکی ئەتۆمی و کۆریاش ناتۆ و یەکێتی ئەورەپای بە " ناواقعی و گاڵتەجاڕ" ناوبرد." 

دەسەڵاتدارانی ئەمریکا ڕایانگەیاند، پارچەی ئەو فڕۆکە نەفەر هەڵگرەیان بە تێکشکاوی دۆزیوەتەوە، دوێنێ لە ئالاسکاوە بەرەو شاری نۆمێ، هەڵفڕیبوو.

میدیاكانی ئەمریكا دوێنێ هەینی بڵاویان کردەوە، فڕۆکەیەک لە ئالاسکا بە 10 سەرنشینەوە هەڵفڕیوە و لە پەیوەندیدا نەماوە، رەنگە کەوتبێتە خوارەوە.

 ئەمڕۆ شەممە، مایک سالێرنۆ وتەبێژی پاسەوانی کەناراوەکانی ئەمریکا رایگەیاند: دوای زیاتر لە 13 کاتژمێر لە ونبوونی، پاشماوەی ئەو فڕۆکەیە لە بەستەڵەکی ئالاسکا دۆزرایەوە و لەو 10کەسەی لە فڕۆکەکەدا بوون سەرجەمیان گیانیان لەدەستداوە. 

دیارنەمانی ئەم فڕۆکەیە، سێیەم رووداوی گەورەی فڕۆکەوانیە لە ماوەی هەشت رۆژدا.

پێرێ بوو کە فڕۆكەیەكی سەربازی ئەمریكا بە چوار سەرنشینەوە لە فلیپین تێكشكا و سەرجەمیان گیانیان لەدەستدا، پێشتریش، فڕۆکەیەکی ژاپۆنی لە فرۆکەخانەی تاکۆما لە سیاتڵ، خۆی کێشا بە کلکی فڕۆکەیەکی ئەمریکیدا بەڵام هیچ زیانێکی گیانی لێنەکەوتەوە، ئەم ڕوداوانە دوای تەنیا لە هەفتەیەک دێن لە پێکدا کێشانی نێوان فڕۆکەیەک و هێلیکۆپتەرێک لە ئەمریکا، کە بووە هۆی گیان لەدەست دانی 86 کەس.

ئەمریكا وەڵامی خامنەیی دەداتەوە و دەڵێت بۆئەوەی سزاكانی سەر ئێران قورستر نەبێت، پێویستە بگەڕێتەوە سەر مێزی گفتوگۆ و دانوستانەكان.

وتەبێژی وەزارەتی دەرەوەی ئەمریكا لە وەڵامی وتەكانی عەلی خامنەیی رابەری باڵای شۆڕشی ئیسلامی ئێران رایگەیاند، دۆناڵد ترەمپ سەرۆكی ئەمریكا بە ئاشكرا لەگەڵ ئەوەی خوازیاری رێگریكردنە لە بەرنامە ئەتۆمییەكەی ئێران، لە هەمان كاتیشدا پێداگریی لە دانوستان و گفتوگۆ لەگەڵ ئێران دەكات.

وتیشی، ئەگەر ئێران نایەوێت دانوستان و گفتوگۆ بكات، روبەڕوی سزای زیاتر و فشاری زۆرتری ئەمریكا دەبێتەوە.

ئەو وەڵامەی ئەمریكا دوای ئەوە دێت كە خامنەیی لە كۆبونەوەیەكدا لەگەڵ هێزی ئاسمانی ئێران رایگەیاند، ئەمریكا هیچ كاتێك پابەندی رێككەوتنە نێودەوڵەتییەكان و بە تایبەتیش رێككەوتنی ئەتۆمیی نەبووە، بۆیە سوود لەم ئەزمونەكان وەردەگرن و دانوستان لەگەڵ حكومەتێكی لەو جۆرەدا ناكەن.

کۆمیسياری باڵای مافەکانی مرۆڤی سەربە نەتەوە یەکگرتووەکان (OHCHR)، بڵاویکردەوە نیگەرانە لەوەی دۆناڵد ترەمپ بڕیاری سەپاندنی سزای بەسەر بەرپرسانی دادگای تاوانی نێودەوڵەتیی (دادگای لاهای)دا ئیمزا کردووە.

لەو بارەیەوە، کۆمیسياری باڵای مافەکانی مرۆڤی سەر بە نەتەوە یەکگرتووەکان راگەیاندراوێکی سەبارەت بە بڕیارەکانی سەر بەرپرسانی دادگای تاوانی نێودەوڵەتیی بڵاوکردەوە.

لە راگەیانراوەکەدا هاتووە، "پشتیوانی تەواو لە کارە سەربەخۆکانی دادگای تاوانی نێودەوڵەتیی و گشت دۆسیەکانی ناو دەسەڵاتی دادوەری دەکەین".

ئەوەشی خستووەتە روو، "دادگای تاوانی نێودەوڵەتیی کە دوو لەسەر سێی وڵاتانی جیهان پشتیوانی دەکەن، دامەزراوەیەکە چەقی سیستمی دادوەری سزای نێودەوڵەتییە. دامەزراوەیەکی بنەڕەتییە بۆ دەستەبەرکردنی دادپەروەری و لێپرسینەوە لەو تاوانانەی لە هەر شوێنێک ئەنجام دەدرێن لە ئۆکراینا، سودان، میانمار، خاکی داگیرکراوی فەڵەستین یان هەر شوێنێکی دیکە".

ئەوەش هاتووە، "زۆر نیگەرانین لەو سزا کەسییانەی دوێنێ (لەلایەن ئەمریکاوە) دژ بە کارمەندانی دادگای تاوانی نێودەوڵەتیی دەرکرا. داوا دەکەین لەو ڕێوشوێنانە پاشگەز ببنەوە".

ئەوەش دوای ئەوە دێت، دوێنێ، دۆناڵد ترەمپی سەرۆکی ئەمریکا، بەهۆی دەرکردنی بڕیاری دەستگیرکردن بۆ بنیامین ناتانیاهۆ سەرۆکوەزیرانی ئیسرائیل، بڕیارنامەیەکی سەرۆکایەتیی ئیمزا کرد کە پێشنیاری سەپاندنی سزا دەکات بەسەر دادگای تاوانی نێودەوڵەتییدا.

سبەینێ حەماس لە پێنجەمین ئاڵوگۆڕدا سێ بارمتەی دیكەی ئیسرائیلی ئازاد دەكات، لە بەرامبەریشدا ئیسرائیل 183 بەندكراوی فەلەستینی ئازاد دەكات.

گروپی قەسام باڵی چەكداری حەماس ناوی سێ بارمتە ئیسرائیلییەكەی بڵاوكردەوە كە بڕیارە سبەینێ ئازادیان بكات، لە بەرامبەریشدا ئیسرائیل بڕیاریدا 183 بەندكراوی فەلەستینی ئازاد بكات كە 18یان سزای هەتاهەتایی و 54یان سزای قورسیان بەسەردا سەپێنراوە.

هەروەها سبەینێ وەفدێكی ئیسرائیل دەگاتە دەوحە بۆ دانوستان لەسەر قۆناغی دووەمی رێككەوتنی ئاگربەست لە غەززە، بەڵام حەماس نێوەندگرانی ئاگادار كردووەتەوە كە ئیسرائیل پابەند نەبووە بەو پرۆتۆكۆڵە مرۆییانەی لەسەری رێككەوتوون.

قۆناغی یەكەمی ئاگربەست كە 20 رۆژی بەسەردا تێپەڕیوە و تا ئێستا 13 بارمتەی ئیسرائیلی و 737 بەندكراوی فەلەستینی ئازاد كراون.

ئەمریكا رەتیدەكاتەوە رێگە بە حزبوڵا بدات بەشداربێت لە حكومەتی داهاتوو، سەرۆكایەتی لوبنانیش دڵنیایی دەداتە ئەمریكا كە چیتر حزبوڵا جێی مەترسی نییە.

مۆرگان ئۆرتاگۆس، جێگری نوێنەری ئەمریكا لە رۆژهەڵاتی ناوەڕاست لەگەڵ جۆزێف عەون سەرۆكی لوبنان كۆبوویەوە و رایگەیاند، ئەمریكا هێڵێكی سووری داناوە لە بەشداریكردنی حزبوڵا لە حكومەتی داهاتووی لوبنان.

ئۆرتاگۆس بە رۆژنامەنووسانی راگەیاند، ئەمریكا ناترسێت لە حزبوڵای لوبنان، چونكە لە رووی سەربازییەوە شكستیهێناوە، بەڵام نابێت لە حكومەتی نوێدا بەشدار بێت.

هەرزوو سەرۆكایەتی لوبنان وەڵامی لێدوانەكانی ئۆرتاگۆسی دایەوە و رایگەیاند، دڵنیایی دراوەتە ئەمریكا كە چیتر حزبوڵا جێی مەترسی نییە و هەوڵەكانیش بۆ پێكهێنانی حكومەتی نوێ نزیكە لە تەواوبوون.

هاوكات حزبوڵا لێدوانەكانی ئۆرتاگۆسی بە دەستوەردانێكی ئاشكرا لە كاروباری لوبنان وەسف كرد.

رۆژنامەنووسان بۆ سەردانی زیندانی ئیمراڵی و چاوپێكەوتن لەگەڵ ئۆجەلان، داواكاری پێشكەش بە وەزارەتی دادی توركیا دەكەن.

دیجلە موفتوئۆغڵو هاوسەرۆكی كۆمەڵەی رۆژنامەنووسانی دیكلێ ئۆراسیا رایگەیاند، بۆ چاوپێكەوتن لەگەڵ عەبدوڵا ئۆجەلان، رێبەری زیندانیكراوی پەكەكە، داواكارییان پێشكەش بە وەزارەتی دادی توركیا كردوە، بە مەبەستی بەدواداچوون بۆ ئەو گفتوگۆیانەی سەبارەت بە پرۆسەی ئاشتی و چارەسەری پرسی كورد لەگەڵ ئۆجەلان ئەنجامدراون.

راشیگەیاندووە، كەمێك زانیاری لەسەر ئەو وەفدانە دەزانن كە تا ئێستا سەردانی ئیمراڵییان كردووە و پێویستە رۆژنامەنوسانیش لە نزیكەوە بیروڕای ئۆجەلان لەسەر پڕۆسەكە بزانن.

دوێنێ روسەکان مووشەکێکی بالیستی لە جۆری Oreshnikیان بەرەو کێڤ هەڵداوە، بەڵام بەهۆی هەڵەیەکی تەکنیکیەوە کاری نەکردووە و لەخاکی روسیا خۆی کەوتووەتە خوارەوە و زیان بە چەندین خانو و باڵەخانە کەوتووە.

روداوەکە بووەتە جێگەی تەنزی ئۆکراینییەکان و لە ئێکس دەنگدانەوەی گەورەی لێکەوتووەتەوە، ئۆکراینییەکان نووسیویانە" روسیا ویستی لەلای ترەمپ خۆی نمایش بکات بەڵام نەیتوانی".

موشەکی "ئۆریشنی بالیستی" ئەو موشەکە بەناوبانگە روسییەبوو کە لە ماوەکانی رابردودا پوتین لە بارەیەوە وتی؛ "بەخێرایی دەنگ دەڕوات" و ئامانجەکانی دەپێکێت.

گۆڕێكی بە كۆمەڵ لە شەنگال دۆزرایەوە كە 20 روفاتی ئێزدی تێدایە، لە ئێستادا تیمێكی هەڵدانەوەی گۆڕە بە كۆمەڵەكان سەرقاڵی هەڵدانەوەی گۆڕەكەیە.

پەیامنێری كوردسات نیوز رایگەیاند، گۆڕێكی بەكۆمەڵ لە گەڕەكی ئازادی قەزای شەنگال دۆزراوەتەوە كە 20 روفاتی ئێزدی تێدایە. وتیشی، لەلایەن تیمێكی هەڵدانەوەی گۆڕی بە كۆمەڵ كە لە بەغداد و موسڵەوە چونەتە شوێنەكە، دەست بە هەڵدانەوەی گۆڕەكە كراوە.

دوای ڕووخانی دەسەڵاتی ڕێکخراوی تیرۆریستیی داعش، 93 گۆڕی بە کۆمەڵ لە سنووری شنگال دۆزراونەتەوە و لەو ژمارەیە 53ـیان هەڵدراونەتەوە. 

میدیاكانی ئەمریكا بڵاویانكردەوە، فڕۆكەیەكی نەفەرهەڵگر بە 10 كەسەوە لە ویلایەتی ئەلاسكا دیار نەماوە و پێدەچێت كەوتبێتە خوارەوە.

میدیاكانی ئەمریكا باسیان لەوەكردووە، فڕۆكەكە 9 سەرنشین و فڕۆكەوانێكی هەڵگرتووە و سەنتەری هەماهەنگی رزگاركردنی ئەلاسكا ئاگاداركراوەتەوە لە دیارنەمانی فڕۆكەكە.
بەهۆی خراپی كەشوهەوای ناوچەكەوە، تیمەكانی گەڕان روبەڕوی ئاستەنگی گەورە دەبنەوە، لەوانەش زریانی بەفر و كەمی بینین كە رێگری لە گەڕانی ئاسمانی دەكات.

روداوە فڕۆکەوانییەکان لە ئەمریکا بەردەوامن و دواهەمینیان دوێنێ بوو کە فڕۆكەیەكی سەربازی ئەمریكا بە چوار سەرنشینەوە لە فلیپین تێكشكا و سەرجەمیان گیانیان لەدەستدا، پێشتریش، فڕۆکەیەکی ژاپۆنی لە فرۆکەخانەی تاکۆما لە سیاتڵ، خۆی کێشا بە کلکی فڕۆکەیەکی ئەمریکیدا بەڵام هیچ زیانێکی گیانی لێنەکەوتەوە، ئەم ڕوداوانە دوای تەنیا لە هەفتەیەک دێت لە پێکدا کێشانی نێوان فڕۆکەیەک و هێلیکۆپتەرێک لە ئەمریکا، کە بووە هۆی گیان لەدەست دانی 86کەس.

سیناتۆرێکی ئەمریکی لەسەر لێدوانەکانی ترەمپ دەربارەی گواستنەوەی خەڵکی غەززە بۆ وڵاتانی تر، رایگەیاند؛ ترەمپ دەیەوێت زیاتر لە دوو ملیۆن فەلەستینی لە غەززە دەربکات بۆ ئەوەی هاوینەهەوار بۆ دەوڵەمەندەکان دروست بکات، ئەمەش جێگەی هەڵوەستەکردنە.

بێرنی ساندەرز، سیناتۆری ئەمریکی و لایەنگری دیموکراتەکان لە کۆبونەوەیەکدا وتی: پێویستە کەرتی غەززە بۆ فەلەستینییەکان ئاوەدان بکەینەوە نەک ملیۆنێرەکان.

بێرنی ساندەرز، کە لە ساڵی 2016 بۆ 2020 داوای لە دیموکراتەکان کرد بیکەن بە کاندیدی سەرۆکایەتی، لە قسەکانیدا هێرشی کردە سەر ئیدارەی نوێی ئەمریکا و وتی؛ "ئیدارەی ترەمپ زۆر بە شێوەیەکی شەڕانگێزانە کاردەکات بۆ فەرامۆشکردنی دەستور و یاسای وڵاتەکەمان، بۆ ئەوەی دەسەڵاتی زیاتر بدرێتە کۆشکی سپی و ئەو ملیاردێرانەی ئێستا حکومەتەکەمان کۆنترۆڵ دەکەن".

ساندەرز ئاماژەی بەوەشدا "زۆر دەترسم کە لە سەردەمی سەرۆکایەتی ترەمپدا، "ئەو حکومەتە نەبینین کە لە خەڵکەوە بۆ خەڵکەو ببێت بە حکومەتی چینی ملیاردێر".

باڵیۆزخانەی ئەمریکا لە مانیلای فلیپین بڵاویکردەوە کە ئەمڕۆ پێنجشەممە فڕۆکەیەکی بچووکی ئەمریکی، لە باشووری فلیپین کەوتە خوارەوە و بەهۆیەوە لانیکەم چوار کەس لەناو فڕۆکەکەدا گیانیان لەدەستدا.

سوپای فلیپین لە بەیاننامەیەکدا ڕایگەیاندووە، ناتوانن زانیاری لەسەر ڕووداوەکە ئاشکرا بکەن، کە لە دوورگەی مینداناو ڕوویداوە، چونکە "بابەتەکە نهێنییە و لێکۆڵینەوەکان بەردەوامن".

بەپێی سەرچاوە میدیاییەکان، زیاتر لە چوار سەرنشینی سەربازی لەناو فڕۆکەکەدا بوون و سەرجەمیان گیانیان لەدەستداوە.

روداوە فڕۆکەوانییەکان لە ئەمریکا بەردەوامن و دواهەمینیان بەیانی دوێنێ بوو، فڕۆکەیەکی ژاپۆنی لە فرۆکەخانەی تاکۆما لە سیاتڵ، خۆی کێشا بە کلکی فڕۆکەیەکی ئەمریکیدا بەڵام هیچ زیانێکی گیانی لێنەکەوتەوە، ئەم ڕوداوانە دوای تەنیا لە هەفتەیەک دێت لە پێکدا کێشانی نێوان فڕۆکەیەک و هێلیکۆپتەرێک لە ئەمریکا، کە بووە هۆی گیان لەدەست دانی 86کەس.

میدیاکان وێنەیەکی ئەو دیارییەیان بڵاوکردەوە، بنیامین ناتانیاهۆ سەرۆک وەزیرانی ئیسرائیل لە سەردانەکەیدا بۆ ئەمریکا بەخشی بە دۆناڵد ترەمپ، سەرۆکی ئەمریکا.

 دیارییەکە یەکێک لە جۆرە دیارەکانی ئەو پەیجەرانەبوو کە ڕۆژانی 17 و 18ـی ئەیلولی 2024، لە لوبنان و سوریا بە ئەندامانی حیزبوڵادا تەقییەوە و لە ئەنجامی تەقینەوەی ئەو ئامێرانە 39 کەس کوژران و 3 هەزار کەسی دیکەش بریندار بوون.

سەرۆکوەزیرانی ئیسرائیل 10-11-2024 لە پاش ماوەیەک، دانی بەوەدانا کە سوپای وڵاتەکەی لە پشت تەقاندندەوەی ئامێرە پەیوەندییەکانی پەیجەری بزووتنەوەی حیزبوڵڵای لوبنان بووە.

ناتانیا هۆ رۆژی چوارشەممە وەک یەکەم سەرکردەی ئەوروپی سەردانی کۆشکی سپی کرد و لەگەڵ خۆشیدا پەیکەرێکی نەخشێنراو بە پەیجەری بەدیاری بۆ ترەمپ برد. میدیاکانی جیهان، ئەمەیان بە پەیام و ئیهانە بۆ حیزبوڵای لوبنانی ناوبرد.

سەرۆكی فەڕەنسا لە پەیوەندییەكەی تەلەفۆنیدا لەگەڵ ئەحمەد شەرع، پشتیوانیی وڵاتەكەی بۆ دیمەشق و  هەسەدە راگەیاند.

ئاژانسی هەواڵی فڕانس پرێس بڵاویكردەوە؛ ئیمانۆێل ماكرۆن سەرۆكی فەڕەنسا لە پەیوەندییەكی تەلەفۆنیدا لەگەڵ ئەحمەد شەرع سەرۆكی كاتی دەسەڵاتی راگوزەری سوریا، پشتیوانیی پاریسی بۆ حكومەتی راگوزەری دیمەشق و ئاسایشی وڵاتەكە دەڕبڕیوە.

ماكرۆن لەو پەیوەندییە تەلەفۆنییەكەدا هاوكات لەگەڵ پیرۆزبایی لە گەلی سوریا لەبارەی رزگاربونیان لە دەسەڵاتی رژێمی پێشوو، جەختی كردوەتەوە لەسەر بەرەنگاربونەوەی تیرۆر و جەنگ  لەی دژی داعش.

سەرۆكی فەڕەنسا پشتیوانیی وڵاتەكەی بۆ هێزەكانی سوریای دیموكرات هەسەدە دەڕبڕیوە و رایگەیاندوە، پێویستە ئەو هێزە ببێتە پەشێك لە پێكهاتەی سوپای وڵاتەكە.

سەرۆكایەتی فەڕەنسا لە  راگەیەنراوێكدا ئاشكرایكردووە، پەیوەندییە تەلەفۆنییەكەی ماكرۆن و شەرع ئامادەكارییە بۆ كۆنفڕانسی ئاشتی بۆ سوریا كە بڕیارە لە 13 مانگ  لە پاریسی پایتەخت بەڕێوەبچێت.