کۆشکی کرملن ئاشکرایکرد، دەمانەویت ئەمریکا لەبارەی ئەنجامی دانوستانەکانیان لەگەڵ ئۆکراین لە سعودیە ئاگادارمان بکاتەوە، پێش ئەوەی لێدوان لەسەر ئاگربەستی پێشنیارکراو بدات.

دیمیتری پێسکۆڤ، وتەبێژی کۆشکی سەرۆکایەتی کۆماری روسیا (کرملن) لە لێدوانێکی رۆژنامەوانیدا رایگەیاند، ئەگەری پەیوەندی تەلەفۆنی نێوان ڤلادیمێر پوتن و دۆناڵد ترەمپ رەتناکاتەوە، ئاماژەی بەوەشدا ئەگەر پێویست بکات دەتوانرێت زۆر بە خێرایی سەبارەت بە راگرتنی شەڕ لە ئۆکراین ئەو پەیوەندییە رێکبخرێت.

بەپێی ئاژانسی رۆیتەرز، ئەمریکا و ئۆکراین رۆژی سێشەممە لە راگەیەنراوێکی هاوبەشدا ئاشکرایانکرد، کیێڤ رازی بووە بە پێشنیارێکی ئەمریکا بۆ ئاگربەستی خێرا بۆ ماوەی 30 ڕۆژ و هەنگاوەکانی گەڕاندنەوەی ئاشتییەکی هەمیشەیی.

وەزیری دەرەوەی ئەمریکا رایدەگەیەنێت: ئەمریکا پاڵپشتی لە کوردەکانی رۆژئاوا دەکات، رێککەوتنی نێوان هەسەدە و حکومەتی سوریاش گرنگی زۆری هەیە بۆ بنیادنانەوەی سوریایەکی یەکگرتوو.

مارکۆ رۆبیۆ، وەزیری دەرەوەی ئەمریکا رایگەیاند، واشنتۆن پێشوازی لە رێککەوتنی هێزەکانی سوریای دیموکرات و حکومەتی نوێی سوریا دەکات، دەشڵێت؛ کوردەکانی باکور رۆژهەڵاتی سوریا لەلایەن ئەمریکاوە پاڵپشتی دەکرێن.

روبیۆ ئاشکرایکردووە: ئەو رێککەوتنەکەی نێوان و هێزەکانی سوریای دیموکرات و دەسەڵاتدارانی کاتی سوریادا راگەیەنرا، هەنگاوێکی گرنگە بۆ یەکخستنی باکوری رۆژهەڵاتی سوریا بۆ سوریایەکی یەکگرتوو.

سەرۆکایەتی کۆماری سووریا رۆژی دووشەممە بڵاویکردەوە: هەسەدە و حکومەتی نوێی سوریا رێککەوتنیان ئیمزاکرد بۆ یەکخستنی سەرجەم دامودەزگا مەدەنی و سەربازییەکانی سەر بە خۆبەڕێوەبەریی کورد لە چوارچێوەی دەوڵەتی سوریا.

سەرۆك كۆماری ئێران رێككەوتن لەگەڵ ئەمریكا رەت دەكاتەوە و كۆشكی سپیش جەخت لەوە دەكاتەوە تەنها بژاردەی، رێككەوتن یان هێرشی سەربازیی لەبەردەم ئێراندایە.

دوای ئەوەی مەسعود پزیشكیان، سەرۆك كۆماری ئێران رایگەیاند لە ژێر هەڕەشەی دۆناڵد ترەمپ، سەرۆكی ئەمریكا ئامادەنابن دانوستان و رێككەوتن لەگەڵ واشنتۆن بكەن، وتەبێژی ئەنجومەنی ئاسایشی نیشتمانی كۆشكی سپی  جەختی لەو بژاردانە كردەوە كە سەرۆكی ویلایەتەیەكگرتوەكان رایگەیاندبو.

كۆشكی سپی جەختی لەوە كردەوەتەوە كە تەنها بژاردەكانی دانوستان و جەنگ لەبەردەم ئێراندایە و ئەمریكا بە هیچ شێوەیەك رێگە نادات ئێران ببێتە خاوەنی چەكی ئەتۆمیی.

پێشتر پزشكیان وتبوی چونكە دۆناڵد ترەمپ هەڕەشەی كردوە، ئامادە نییە دانوستانی لەگەڵ بكات.

دۆناڵد ترەمپ، سەرۆكی ئەمریكا لە نامەیەكدا بۆ عەلی خامنەیی، رێبەری ئێران داوای دانوستانی لەگەڵ وڵاتەكە كردبو و جەختیشی لەوە كردبوەوە كە ئەو وڵاتە دوو بژاردەی رێككەوتن و جەنگی لەبەردەمدایە و خامنەییش رەتی كردەوە.

كۆبوونەوەكەی جەدە لەنێوان هەردوو وەفدی ئەمریكا و ئۆكراین لەبارەی راگرتنی شەڕ كۆتاییهات و ئۆكراین ئامادەیی نیشاندا، بۆ دەستپێكردنی دانووستانی راستەوخۆ لەگەڵ روسیا بۆ راگرتنی هەمیشەیی شەڕ لە ئۆكراین،

بەگوێرەی راگەیەنراوی كۆتایی كۆبوونەوەكە، ئەمریكا دەستبەجێ ئاڵوگۆڕی زانیارییە هەواڵگرییەكانی لەگەڵ ئۆكراین و هاوكارییە سەربازییەكانی بۆ ئەو وڵاتە دەستپێدەكاتەوە، هەروەها واشنتۆن و كیێڤ گەیشتنە رێككەوتن لەسەر پەرەپێدانی كانزا بەنرخەكانی ئۆكراین و لە نزیكترین كاتیشدا، رێككەوتنی كانزا بەنرخەكان  لەنێوان هەردوو وڵاتدا ئیمزابكرێت.

هەریەك لە كۆشكی سپی و ڤۆڵۆدیمێر زیلینسكی سەرۆكی ئۆكراین پێشوازییان لە ئەنجامی كۆبوونەوەكە كرد و رایانگەیاند، كۆبوونەوەكە ئەرێنی و بەرهەمدار بووە، زیلینسكی راشیگەیاند، ئۆكراین پشتیوانی لە پێشنیازەكەی كۆشكی سپی دەكات بۆ راگەیاندنی 30 رۆژ ئاگربەست.

هاوكات، ماركۆ رۆبیۆ وەزیری دەرەوەی ئەمریكا رایگەیاند، واشتنۆن و كیێڤ گەیشتنە رێككەوتن بۆ دەستپێكردنی دانووستانەكان بە ئاڕاستەی ئاشتی هەمیشەیی لە ئۆكراین. راشیگەیاند، ئۆكراین هەنگاوی ناوە بەرەو ئاشتی، وەزیری دەرەوەی ئەمریكا جەختیلەوەشكردەوە، ئۆكراین هەنگاوی ناوە بەرەو ئاشتی.

هەروەها، مایك واڵتز راوێژكاری ئاسایشی نەتەوەیی ئەمریكا رایگەیاند، لەگەڵ روسیا گفتوگۆدەكات سەبارەت بە پێشنیازەكەی كۆشكی سپی بۆ راگەیاندنی ئاگربەست.

كۆبوونەوەی وەفدی ئەمریكا و ئۆكراین لە شاری جەدەی سعودیە دەستیپێكردووە و تاوتوێی ئاگربەستی جەنگ  دەكرێت.

دانوستانەكان بە ئامادەبوونی ماركۆ رۆبیو وەزیری دەرەوەی ئەمریكا و ئەندریە سیبیگا وەزیری دەرەوەی ئۆكراین و ژمارەیەك لێپرسراوی دیكەی هەردوو وڵاتە.

بەر لە بەڕێوەچوونی ئەو دانوستانە، محەمەد بن سەلمان جێنشینی سعودیە پێشوازی لە ڤۆلۆدمیر زیلینسكی سەرۆكی ئۆكراین كرد و باسیان لەدوایین پێشهاتەكانی جەنگ  كرد. جێنشینی سعودیە جەختیشی كردەوە لە پابەندی وڵاتەكەی بۆ گەیشتن بە ئاشتی لە ئۆكراین. هاوكات زیلینسكی رایگەیاند، دانوستانەكان بنیاتنەر دەبن و تیشك دەخاتە سەر گرەنتییە ئەمنییەكان.

روسیاش لە زاری دیمتری بیسكۆڤ وتەبێژی كرملن رایگەیاند، ئەمریكا لەڕێی ئەو دانوستانەوە دەیەوێت بزانێت ئۆكراین تا چەند ئامادەیە بۆ كۆتاییهێنان بە جەنگ.

دانوستانەكان لەكاتێكدایە شەوی رابردوو ئۆكراین هێرشێكی گەورەی بە زیاتر لە 330 فڕۆكەی بێفڕۆكەوان كردە سەر چەند ناوچەیەكی روسیا. لێپرسراوانی ئۆكراینیش دەڵێن، ئەو هێرشە بۆ ئەوەیە فشار لەسەر ڤلادمیر پوتن سەرۆكی روسیا دروست بكەن، كە بە ئاگربەستی ئاسمانی و دەریایی رازی بێت.

هاوكات ئەو كۆبوونەوەیەی سعودیە گرنگترین كۆبوونەوەیە لە دوای مشتومڕە توندەكەی سەرۆكانی ئەمریكا و ئۆكراین، كە لە 28ی شوبات لە كۆشكی سپی روویدا.

بڕیارە سبەینێ‌ وەفدی ئیمراڵی لەگەڵ پارتی كرێكارانی توركیا و سەعادەت و پارتی ئایندە كۆببێتەوە.

لە چواچێوەی سەردان و كۆبونەوەكانی وەفدی ئیمراڵی لە دوای بانگەوازەكەی ئۆلاجەن بۆ پرۆسەی ئاشتی، بڕیارە رۆژی چوارشەممە وەفدی ئیمراڵی، لەگەڵ پارتی كرێكارانی توركیا و پارتی سەعادەت و پارتی ئایندە كۆببێتەوە.

هەروەها بەپێی راگەیەنراوێكی دەم پارتیش بڕیارە وەفدەكە، دووشەممەی داهاتووش لەگەڵ ئاكەپە و مەهەپە كۆببێتەوە.

ئەوەش لە كاتێكدا دووشەممەی رابردوو وەفدی ئیمراڵی لەگەڵ جەهەپە و پارتی دەڤا كۆبوەوە، بڕیارە جارێكی تر بۆ گەیاندنی ئەنجامی كۆبونەوەكان، لە ئیمراڵی لەگەڵ عەبدوڵا ئۆجەلان رێبەری زیندانیكراوی پارتی كرێكارانی كوردستان كۆببنەوە. 

دەم پارتی: رێككەوتنەكەی دیمەشق ئاشتی و سەقامگیری بۆ سوریا دابین دەكات

دەم پارتی سەبارەت بە رێككەوتنی نێوان مەزڵوم كۆبانێ‌ و ئەحمەد شەرع رایگەیاند، ئەم رێككەوتنە ئاشتی و سەقامگیری بۆ سوریا دابین دەكات و مافەكانی كورد لە دەستوردا دەناسێنێت.

گوڵستان كڵچ سەرۆكی فراكسیۆنی دەم پارتی لە پەرلەمانی توركیا لە لێدوانێكدا بۆ رۆژنامەنوسان رایگەیاند، رێككەوتنی نێوان مەزڵوم كۆبانێ‌ و ئەحمەد شەرع، دەبێتە هۆكاری سەقامگیری لە سوریا، هەروەها هەنگاوێكە بۆ ناساندنی مافەكانی كورد لە دەستوری سوریادا.

لە پاش دەستبەكاربوونی لە پۆستی وەزیری كارامەیی حكومەت، ئیلیۆن مەسك دەوڵەمەندترین پیاوی جیهان، كێشە بۆ بەشێك لە كارە بازرگانییەكانی دروست بووە و سەرۆکی ئەمریکاش دەڵێت: بۆ پشتگیری مەسک سبەینێ ئۆتۆمبێلێکی تێسلا دەکڕم.

كۆمپانیای تێسلا كە مەسك بەڕێوەبەری جێبەجێكاریەتی، بەهای پشكەكانی بە شێوەیەكی گەورە دابەزیوە، بە جۆرێك لە دەستبەكاربوونییەوە لە پۆستی وەزیری كارامەیی حكومەت، هەر پشكێكی تێسلا لە 426 دۆلار نزیكەی 165 دۆلاری لەدەست داوە.

بەو هۆکارە، دۆناڵد ترەمپ سەرۆکی ئەمریکا: " لە تۆڕە کۆمەڵایەتیەکەی خۆی، رولە کۆمارییەکان و ئەو کەسانە دەکات دژ بە مەسک قسەدەکەن، دەڵێت: ئیلیۆن مەسک خۆی دەخاتە مەترسییەوە لە پێناو ئەمریکا، ئەمە کارێکی گەورەیە، بۆچی دەبێت سزا بدرێت؟ دەشڵێت: سبەینێ بۆ پشتگیری لەو تێسلایەک دەکڕم. 

پۆستە نوێکەی ئەو، تەنها كاریگەریی خراپی لەسەر پشكی كۆمپانیاكانی نەبووە، بەڵكو زیانی گەورەی بە سامانەكەشی گەیاندووە.پشكی كۆمپانیای تێسلا لە كەمتر لە دوو مانگدا 165 دۆلار دابەزیوە، سامانی ئیلیۆن مەسك بۆ 330 ملیار دۆلار دابەزیوە.

ئەمڕۆ دانوستانەكانی وەفدی ئەمریكا و ئۆكراین لە شاری جدەی سعودیە دەستپێدەكات و سەرۆكی ئۆكراینیش دەڵێت، دانوستانەكان بنیاتنەر دەبن.

بەر لە بەڕێوەچوونی ئەو دانوستانە، محەمەد بن سەلمان جێنشینی سعودیە پێشوازی لە سەرۆكی ئۆكراین كرد و باسیان لەدوایین پێشهاتەكانی جەنگ كرد. جێنشینی سعودیە جەختیشی كردەوە لەسەر پابەندی وڵاتەكەی بۆ گەیشتن بە ئاشتی لە ئۆكراین. 

هاوكات زیلینسكی رایگەیاند، دانوستانەكانی وەفدی وڵاتەكەی و ئەمریكا بنیاتنەر دەبن و تیشك دەخاتە سەر گرەنتییە ئەمنییەكان.

هاوكات ماركۆ رۆبیۆ وەزیری دەرەوەی ئەمریكاش گەشبینە بە ئەنجامی ئەو دانوستانە و وتی، ئەگەر چاوەڕێی ئەنجامی ئەرێنی نەبوونایە ئامادەی كۆبوونەوەكە نەدەبوون. 

بەپێی ئەو وەردەكاریییانەشی ئاژانسی رۆیتەرز لە زاری لێپرسراوانی ئەمریكی بڵاویكردووەتەوە، كۆبوونەوەكە ئاستی ئامادەیی ئۆكراین ئاشكرا دەكات بۆ سازشكردن بۆ مۆسكۆ لەپێناو كۆتاییهێنان بەجەنگ . هەروەها ئاشكرای دەكات كە ئۆكراین تا چەند جدییە لە باشكردنی پەیوەندییەكانی لەگەڵ ئیدارەكەی ترەمپ.

سوپای ئیسرائیل بۆردوومانی چەندین بنكە و پێگەی سەربازی لە باشوری سوریا كرد، كە بە وتەی لێپرسراوانی ئیسرائیل هەڕەشە بوون لەسەر تەلئەبیب. 

ئەفیخای ئەدرعی؛ وتەبێژی سوپای ئیسرائیل رایگەیاند، درەنگانی شەوی رابردوو فڕۆكە جەنگییەكانیان چەندین پێگەی سەربازییان لە باشوری سوریا بۆردوومان كردووە، كە سەر بە رژێمی پێشووی سوریا بوون و هەڕەشە بوون بۆ سەر ئیسرائیل. وتیشی، پێگەكان كەلوپەلی سەربازی و چەك و تەقەمەنییان تێدا بووە.

میدیاكانی سوریاش بڵاویانكردووەتەوە، فڕۆكە جەنگییەكانی ئیسرائیل 28 بۆردوومانیان لە شارۆچكەی جەباب و شاری ئەزرع لە ریفی دەرعا ئەنجامداوە. 

بڕیارە لەم هەفتەیەدا دەسەڵاتدارانی ئەمریكا و ئۆكراین لە سعودیە كۆببنەوە، بۆ گفتوگۆكردن لەسەر كۆتایهێنان بە شەڕی نێوان ئۆكراین و روسیا.

وەزارەتی دەرەوەی ئەمریكا رایگەیاندووە، لە رۆژانی 10 بۆ 12ی ئەم مانگە، ماركۆ رۆبیۆ وەزیری دەرەوەی وڵاتەكەی دەگاتە سعودیە بۆ كۆبوونەوە لەگەڵ ئاندری سێپیا هاوتا ئۆكراینەكەی سەبارەت بە ئامادەكاری بۆ كۆبوونەوەیەكی گرنگی هەردوو وڵات لەسەر كۆتاییهێنان بە شەڕ.

ئاماژەی بەوەشكردووە، ئامادەبوونی سەركردایەتی ئەمریكا پێویستە بۆ دەستەبەركردنی ئاشتییەكی بەردەوام.

پێشتر وەزارەتی دەرەوەی سعودیە بڵاویكردەوە، ریاز میوانداری ئەو دوو وڵاتە دەكات بۆ تاوتوێكردنی شەڕی نێوان روسیا و ئۆكراین كە پێدەچێت رۆژی چوارشەممە بەڕێوەبچێت بۆ ئامادەكاری كۆبوونەوەی داهاتووی نێوان ترەمپ و زیلینسكی لە ریاز.

لە 28ی شوباتدا، دیداری ترەمپ لەگەڵ هاوتا ئۆكراینییەكەی لە كۆشكی سپی، كەشێكی ئاڵۆزی بەخۆیەوە بینی و لە بەردەم كامێراكاندا مشتوومڕێكی توندیان ئەنجامدا، دواتریش زیلینسكی بە توڕەییەوە كۆشكی سپی بەجێهێشت.

وەزیری دەرەوەی ئەمریکا ئیدانەی ئەو توندوتیژییانە دەکات کە لە سوریا رویانداو دەڵێت: ئەمریکا پاڵپشتی  کەمە ئایینی و نەتەوەییەکانی سوریا دەکات

مارکۆ روبیۆ، وەزیری دەرەوەی ئەمریکا ئەمڕۆ رایگەیاند، ئەمریکا ئیدانەی "ئەو توندوتیژییانە دەکات، کە لە چەند رۆژی رابردوودا لە رۆژئاوای سوریا روویدا خەڵکی مەدەنی کۆمەڵکوژکراون".

روبیۆ ئاماژەی بەوەشکردووە، "ئەمریکا پاڵپشتی کەمە ئایینی و نەتەوەییەکانی سوریا دەکات، لەوانە پێکهاتەکانی کورد، مەسیحی، دروز و عەلەوی، سەرەخۆشی خۆمان ئاراستەی کەسوکاری کوژراوەکان دەکەین".

وتیشی: دەسەڵاتدارانی کاتی لە سووریا دەبێ لێپرسینەوە لە ئەنجامدەرانی ئەم کۆمەڵکوژییانە بکەن کە دژی کەمینەکان لە سووریا ئەنجام دراون.

سەرۆكی سوریا رایگەیاند، ئەوەی ئێستا لە سوریا دەگوزرەرێت، ئاڵانگاریەكی چاوەروانكرابوو، بەڵام هیچ شتێكی لێ سەوز نابێت.

ئەحمەد شەرع سەرۆكی سوریا، بەیانی ئەمڕۆ دوای چوونی بۆ مزگەوتی مەززە لە وتارێكدا رایگەیاند، یەكپارچەیی خاكی سوریا دەپارێزن و رێگا بە رشتی خوێنی زیاتر نادەن.

وتیشی، ئەوەی لە ئێستادا لە سوریا دەگوزەرێت ئاڵانگارییەكی چاوەڕوانكرا بوو بەڵام ئەو كەسانە هیچ شتێكیان لێی دەستناكەوێت و هیچی لێ سەوز نابێت.

شەرع گەلی سوریای دڵنیاكردەوە كە وڵاتەكەیان بە بەهێزی  دەمێنێتەوە، جەختیشی لەوەكردەوە كە بەردەوام دەبن لە گەڕان بەدوای پاشماوەی چەكدارانی پێشووی رژێمی ئەسەد و دەستگیریان دەكەن، داواشی لەو چەكدارانە كرد خۆیان و چەكەكانیان رادەست بكەن.

پاش گۆڕانی سیاسەتی جیۆپۆلەتیكی ئەمریكا بەرانبەر هاوپەیمانەكانی، پۆڵەندا هەوڵی بەدەستهێنانی چەكی ئەتۆمی دەدات.

دۆناڵد توسك سەرۆك وەزیرانی پۆڵەندا رایگەیاند، بەهۆی دوایین گۆڕانكارییەكانی ئەمریكا لە بارەی چۆنێتی مامەڵەكردن لەگەڵ هاوپەیمانەكانیدا، پۆڵەندا و ئۆكراین كەوتوونەتە دۆخێكی دژوار، بۆیە پێویستە پۆڵەندا توانا سەربازیەكانی بەڕێژەیەكی بەرچاو بەهێزتر بكات و تەنانەت هەوڵ بۆ بەدەستهێنانی چەكی ئەتۆمی بدات.

سەرۆك وەزیرانی پۆڵەندا بە دیاریكراوی پێشنیازی پەرەپێدانی هیچ پلانێكی ئەتۆمی نەكردووە، بەڵام ئاماژەی بەوە كردووە كە كاتی ئەوە هاتووە سەیری ئەگەرەكان بكەن لەبارەی هەبوونی تازەترین چەك  و بژاردەی چەكی ئەتۆمی.

دۆناڵد توسك ئاشكراشی كرد، حكومەتەكەی قسەی جددی لەگەڵ فەرەنسا كردووە، كە تاكە هێزی ئەتۆمی ئەوروپایە جگە لە بەریتانیا و ڕوسیا، سەبارەت بە ئەگەری وەرگرتنی ئاسایشی ئەتۆمی لەلایەن فەرەنساوە بۆ وڵاتانی دیكەی ئەوروپا.

حكومەتی سویسرا بڕیاریدا سامانی زیاتری بەشار ئەسەد و كەسە نزیكەكانی لە وڵاتەكەی بلۆك بكات.

ئەنجومەنی فیدڕالی سویسرا رایگەیاند، سامانی زیاتری بەشار ئەسەد سەرۆكی پێشووی سوریا و كەسە نزیكەكانی بلۆك دەكات و ئەو رێكارانەش بۆ دڵنیابوونەوەیە لەوەی هیچ پارەیەكی ئەسەد لە سویسرا دەرنەچێت پێشئەوەی لەلایەن دەسەڵاتی دادوەرییەوەی لێكۆڵینەوەی لەسەر بكرێت سەبارەت بە یاساییبوونی ئەو سامانە.

دەشڵێت، ئەگەر روونبووەوە ئەو سامانە بەشێوەیەكی نایاسایی بەدەستهاتووە، حكومەتی سویسرا هەوڵ دەدات بەشێوەیەك بیگەڕێنێتەوە كە سودی بۆ گەلی سوریا هەبێت.

ئەوەش لەكاتێكدایە، لە مانگی 12ی ساڵی رابردوو سویسرا رایگەیاند، 112 ملیار دۆلاری ئەمریكی پارەی سوریا لە ساڵی 2011ەوە بلۆك كراوە بەهۆی سزاكانی یەكێتی ئەوروپا لەسەر سوریا.

بەریتانیا و فەرەنسا رێكکەوتنێكی نوێیان ئیمزا كرد، كە ئامانج لێی دەستگیركردنی قاچاخچیەكان و رێگریكردنە لە چوونی كۆچەری نایاسایی بۆ بەریتانیا.

لە رێكکەوتنەكەدا هاتووە كە یەكەیەكی نوێی هەواڵگری و پۆلیسی پسپۆڕ لە شاری دانكیخی فەرەنسا دادەمەزرێنرێت، بۆ دەستگیركردنی قاچاخچییەكان، هەروەها كۆچەران دیپۆرتی ئەو وڵاتانە دەكرێنەوە كە لێوەی هاتوون.

لە خاڵێكیشدا ئاماژە بەوە كراوە، پەرە دەدەن بە راهێنانی فڕۆكەوانی و فڕۆكەی بێ فڕۆكەوان بۆ زیاتر چاودێریكردنی كەناڵی ئینگلیز و رێگریكردن لە پەڕینەوەی بەلەمی بچووكی كۆچەران.

هاوكات ئیڤێت كوپەر، وەزیری ناوخۆی بەریتانیا رایگەیاند، لەبەرانبەر رێكکەوتنەكەدا نزیكەی 8 ملیۆن و 300 هەزار یۆرۆ دەدەنە فەرەنسا.