جیهان
وەزیری وزەی ئەمریكا دەڵێت، بەمنزیكانە ئەمریكا و سعودیە رێككەوتنێكی مێژویی لەبواری ئەتۆمیدا ئیمزا دەكەن.
كریس رایت وەزیری وزەی ئەمریكا كە بە سەردانێك لە سعودیەیە و رایگەیاند، گەشەپێدانی وزەی ئەتۆم لەلایەن سعودیەوە گرنگییەكی زۆری پێدەدرێت و ریاز لەو كەرتەدا سەركەوتنی گەورەی تۆماركردوە، ئەمریكاش ئامادەكاریی دەكات بۆ ئیمزاكردنی رێككەوتنێكی گشتگیر لەگەڵ سعودیە لە بواری ئەتۆمی شارستانی.
وتیشی، سعودیە سەرچاوەی كانزایی گرنگی هەیە لە نێویاندا یۆرانیۆم و خواستیشی هەیە بۆ فراوانكردنی تواناكانی لە بەرهەمێهنانی وزە لە رێی سەرچاوەی ئەتۆمییەوە، لە بەرانبەریشدا ئەمریكا شارەزاییەكی دورودرێژی هەیە لە گەشەپێدانی تەكنیكی وزەی ئەتۆمدا، بۆیە رێككەوتنەكەیان مێژویی دەبێت.
زێلێنسکی سەرۆکی ئۆکراین بانگهێشتی دۆناڵد ترەمپی کرد بۆ وڵاتەکەی پێش هەر ئەنجامدانی رێککەوتنێک لەگەڵ روسیا بۆ کۆتاییهێنان بە شەڕەکە.
زێلێنسکی لە چاوپێکەوتنێکدا لە بەرنامەی ٦٠ خولەکی کەناڵی سی بی ئێس وتی: "تکایە، پێش هەر جۆرە بڕیارێک، هەر جۆرە دانوستانێک، وەرن بۆ بینینی خەڵک، مەدەنی، جەنگاوەر، نەخۆشخانە، کڵێسا، منداڵان کە لەناوچوون یان مردوون".
ئەم چاوپێکەوتنە پێش هێرشە مووشەکییە وێرانکەرەکەی رۆژی یەکشەممەی روسیابو بۆ سەر شاری سومی ئۆکراین، کە بووە هۆی کوژرانی 34 کەس - لەنێویاندا دوو منداڵ - و برینداربوونی 117ـی دیکە.
ترەمپ هێرشەکەی بە "شتێکی ترسناک" وەسف کرد لە کاتێکدا فریدریش مێرز، راوێژکاری ئەڵمانیا روسیای بە ئەنجامدانی تاوانی جەنگ تۆمەتبار کرد.
بڵاوکراوەی لۆ پوینتی فەرەنسی بڵاویکردەوە، دەسەڵاتدارانی ئەو وڵاتە ژنێکی ئێرانیان بەتۆمەتی "ستایشکردنی تیرۆر" دەستگیرکردوە.
ئەو ژنە، ناوی "مەهدیە ئەسفەندیار"ە و تەمەنی 39ساڵە، پیشەی وەرگێڕە و لە 1ـی ئاداری 2024ەوە دەستگیرکراوە.
بەپێی میدیاکانی فەڕەنسا، ئەو ژنە تۆمەتبارە بەوەی کە پەیامی پشتیوانی لە هێرشەکەی حەماس لە 7ـی ئۆکتۆبەر و وێنەی ئەوانی لە کەناڵێکی تێلێگرام بڵاوکردووەتەوە.
بەپێی زانیارییەکانی داواکاری گشتی پاریس، ئەم پەیامە وەک "هاندانی تیرۆر" و "سووکایەتیکردن بە کۆمەڵگەی جولەکە" دادەنرێت.
ماوەی رابردو، ئیسماعیل باقایی، وتەبێژی وەزارەتی دەرەوەی کۆماری ئیسلامی ئێران ئاماژەی بە دەستگیرکردنی هاوڵاتییەکی ژنی وڵاتەکەی لە فەڕەنسا کرد و داوای لە حکومەتی ئەو وڵاتە کرد، هۆکاری دەستبەسەرکردنی ناوبراو رون بکاتەوە و دەستڕاگەیشتن بە خزمەتگوزارییە کونسوڵگەرییەکانی بۆ دابین بکات.
ناوبراو وتی: وەزارەتی دەرەوەی کۆماری ئیسلامی لە رێگەی باڵوێزخانەی فەڕەنسا لە تاران و باڵوێزخانەی ئێران لە پاریس بەدواداچوونی پێویست سەبارەت بە چارەنووسی ئەم هاووڵاتیە ئەنجام دەدات.
لە 7ـی تشرینی یەکەمی 2023 ئەندامانی حەماس هێرشیان کردە سەر باشوری ئیسرائیل و نزیکەی هەزار و 200کەسیان کوشت و زیاتر لە 250 کەسیشیان بە بارمتە گرت. لە بەرامبەر ئەم لەشکرکێشییەدا، ئیسرائیل ئۆپەراسیۆنێکی سەربازی بەرفراوانی لە کەرتی غەززە دەستپێکرد، کە بەپێی ئامارەکانی وەزارەتی تەندروستی حەماس، تا ئێستا زیاتر لە 50 هەزار کوژراو و 116 هەزار برینداری لێکەوتووەتەوە.
تیمی پزیشکی کۆشکی سپی رایدەگەیەنێت: دۆناڵد ترەمپ سەرۆکی ئەمریکا لە تەمەنی 78 ساڵە و تا ئێستاش لە تەندروستییەکی زۆرباشدا ماوەتەوە.
لە راپۆرتەکەدا تیمی پزیشکی کۆشکی سپی ئاماژەی بەوەشکردووە، ترەمپ لە تەندروستی جەستەیی و مەعریفی نایابدایە و بە تەواوی لە توانایدایە بۆ ئەنجامدانی ئەرکەکانی فەرماندەی گشتی و سەرۆکی دەوڵەت.
ترەمپ دوی ئەوەی پشکنینی ساڵانەی پزیشکی ئەنجامدا رایگەیاند "هەستێکی باشی هەیە"، ستایشی دڵ و ڕۆح و توانای مەعریفی خۆی کرد.
ترەمپ ئاشکرایکرد، پزیشکەکان "کەمێک ئامۆژگاری"یان پێداوە سەبارەت بە گۆڕانکارییەکانی شێوازی ژیانی کە دەتوانێت تەندروستی باشتر بکات.
ترەمپ بە رۆژنامەنووسانی رایگەیاندووە: تاقیکردنەوەی مەعریفیم ئەنجامداوە، نازانم چیتان پێ بڵێم تەنها ئەوە نەبێت کە وەڵامی هەموو پرسیارەکانم بە دروستی داوەتەوە.
وەزارەتی دەرەوەی ئێران ئاشکرایکرد، خولی دووەمی دانوستانەکان لەگەڵ ئەمریکا کە بڕیارە هەفتەی داهاتوو بەڕێوەبچێت، بە ناڕاستەوخۆ دەمێنێتەوە.
ئیسماعیل باقایی وتەبێژی وەزارەتی دەرەوەی ئێران رایگەیاندووە، دانوستانەکان بە ناڕاستەوخۆ دەمێننەوە و تەنها لەسەر پرسی ئەتۆمی و هەڵگرتنی سزاکان دەبێت.
ئاماژەی بەوەشکرد،رەنگە شوێنی خوولی دووەمی دانوستانەکان بگۆڕێت، بەڵام عوممان وەک نێوەندگیر دەمێنێتەوە.
ئەوە لەكاتێدایە كە پێشتر ئەمریكا جەختیدەكردەوە لەوەی كە پێویستە دانوستانەكان دۆسێی گروپە چەكدارەكانی سەر بە ئێران و بەرنامە موشەكییەكان لە خۆ بگرن .
لە دوای هێرشەكەی روسیا بۆسەر شاری سومی ئۆكراین كە دەیان كوژراو و برینداری لێكەوتەوە ، ڤۆڵۆدیمێر زێلینسكی سەرۆكی ئۆكراین داوا دەكات فشاری زۆر بخرێتە سەر مۆسكۆ بۆ كۆتاییهێنان بە جەنگ .
زیلینسكی رایگەیاندوە ، ئەو هێرشەی كە روسیا بە موشەكی بالیستی بۆ سەر شاری سومی ئەنجامیدا ، دەیان كوژراو و برینداری مەدەنی لێكەوتۆتەوە . بۆیە پێویستە فشاری زۆر بخرێتە سەر مۆسكۆ بۆ ئەوەی كۆتایی بە جەنگ بهێنێت .
لەلایەكی ترەوە ، وەزارەتی بەرگری روسیا ئاشكرایكردوە ، هێزەكانی روسیا لە هەرێمی كۆرسك زەبری توندیان لە ئۆكراین داوە و لە ماوەی 24 سەعاتدا زیاتر لە 175 سەربازی ئۆكراینی لەو ناوچەیە كوژراون .
زیاتر لە 600 كۆچبەر لە یەك رۆژدا لە كەناڵی ئینگیزی پەڕیونەتەوە و گەیشتونەتە بەریتانیا.
ئامارە رەسمییەكانی وەزارەتی ناوخۆی بەریتانیا دەریدەخەن كە تەنها رۆژی شەممە 656 كۆچبەر بە 11 بەلەمی چوپی بچوك كەناڵی ئینگلیزیان بڕیوە و گەیشتوونەتە بەریتانیا، ئەمەش ژمارەیەكی پێوانەیی نوێیە كە لە یەك رۆژدا لەمساڵدا تۆماركرابێت و ژمارەی پێوانەیی رۆژی سێی ئاداری رابردووی تێپەڕاندووە كە لەو رۆژەدا 592 كۆچبەر لە یەك رۆژدا بە بەلەمی بچووك خۆیان گەیاندبووە بەریتانیا.
بەپێی ئامارەكانی وەزارەتی ناوخۆی بەریتانیا، لە سەرەتای ئەمساڵەوە هەشت هەزار و 61 كۆچبەر بە بەلەمی چوپی بچوك گەیشتوونەتە بەریتانیا و ئەو ژمارەیە بەراورد بە هەمان وادەی ساڵی رابردوو لە 46% زیادیكردووە.
پێشنیوەڕۆی ئەمڕۆ روسیا هێرشێکی ئاسمانی کردە سەر شاری سومی ئۆکراین و بەهۆیەوە تاوەکو ئێستا 32 کەس گیانیان لەدەستداوە، سەرۆکی ئۆکراینیش داوا دەکات، فشار بخرێتە سەر روسیا بۆ کۆتاییهێنان بە جەنگ.
میدیاکان باس لەوە دەکەن، ژمارەی ئەو کەسانەی گیانیان لەدەستداوە لە هێرشەکەدا تاوەکو ئێستا گەیشتووەتە 32 کەس، کە دووانیان منداڵن.
بەپێی ئاماری فریاگوزاری خێرای ئۆکراین، جگە لەو ژمارەی گیانلەدەستدانە، تاوەکو ئێستا 84 برینداریش تۆمار کراون، کە 10یان منداڵن.
تیمەکانی فریاگوزاری باس لەوەشدەکەن، لە گەڕان بەناو پاشماوەی بەڵەخانە رووخاوەکانی بۆردومانەکەدا بەردەوامن و هەر گۆڕانکارییەک لە ئامارەکاندا هەبێت رایدەگەیەنن.
لەبارەی هێرشەکەوە، ڤۆڵۆدیمیر زیلینسکی سەرۆکی ئۆکراین داوا دەکات، فشار بخرێتە سەر روسیا بۆ کۆتاییهێنان بە جەنگ.
رۆژی دووشەممە، مارۆس سێفكۆڤیچ، سەرۆكی دەستەی بازرگانی یەكێتی ئەوروپا دەگاتە واشنتۆن بۆ دەستپێكردنی دانوستانی بەپەلە سەبارەت بەو باجانەی كە ترەمپ لە 2ـی نیساندا رایگەیاندبوو، بەڵام پێدەچێت بەدەستی بەتاڵ بگەڕێتەوە، چونكە ئەو دانوستانكارەی بڕیارە گفتوگۆی لەگەڵدا بكات، لە ئەرجەنتینە.
یەكێتی ئەوروپا وەك گەورەترین هاوبەشی بازرگانی ئەمریكا دەیەوێت بەخێرایی رێككەوتنێك لەگەڵ ئیدارەی ترەمپ ئیمزا بكات، بەر لە تەواوبوونی وادەی 90 رۆژییەكە بۆ سەپاندنی باجەكان.
ساڵی رابردوو بڕی بازرگانی ئەمریكا و یەكێتی ئەوروپا نزیكەی یەك ترلیۆن دۆلار بووە، لەكاتێكدا لەگەڵ ئەرجەنتین تەنها 16 ملیار دۆلار بووە، ئەوەش گومان دەكاتە سەر پەرۆشی ئەمریكا بۆ رێككەوتن لەگەڵ ئەو بلۆكە ئابووریە گەورەیە.
تیمی بازرگانی ترەمپ لە ماوەی ئەو 90 رۆژ مۆڵەتەدا، بەدوای 90 گرێبەست و رێككەوتنی بازرگانیدا دەگەڕێت، شارەزایانی ئابوری پێیانوایە، رەنگە هەلێكی باشی تێدا نەبێت، بەوپێیەی ئاستەنگەكانی چارەسەركردنی خێرای شەڕی بازرگانی لە ئێستاوە سەریانهەڵداوە.
سێفكۆڤیچ یەكەم لێپرسراوی باڵای بازرگانی دەرەكی دەبێت كە دەچێتە واشنتۆن بۆ ئەوەی لەگەڵ سكۆت بێسنت دانوستانكاری باڵای گومرگی ترەمپ سەبارەت بە باجەكان گفتوگۆ بكات، بەڵام لەوكاتەدا بێسنت لەگەڵ وەزیری گەنجینەی ئەرجەنتین لە بوینس ئایرێس لە كۆبوونەوەدا دەبێت بۆ ئەوەی پشتگیری لە چاكسازییە ئابوورییەكانی ئەو وڵاتە نیشان بدات.
ئامادەنەبوونی بێسنت لە رۆژی دووشەممەدا تیشك دەخاتە سەر گومانەكانی شارەزایانی بازرگانی سەبارەت بەوەی كە ئیدارەی ئەمریكا بتوانێت بەشێوەیەكی خێرا و كاریگەر ئەو هەموو دانوستانانە لە یەك كاتدا بەڕێوەببات بۆ گەیشتن بە 90 گرێبەست لە ماوەی 90 رۆژدا.
وێندی كاتلەر، سەرۆكی پێشووی وەفدی دانوستانكاری بازرگانی ئەمریكا بە رۆیتەرزی وتووە، كۆكردنەوەی ئەم بڕیارانە هەندێك دانوستانی جددی دەوێت و هیچ ڕێگەیەك نییە لەم ماوەیەدا رێككەوتنێكی گشتگیر لەگەڵ هیچ كام لەم وڵاتانە ئەنجام بدرێت.
هەروەها دەڵێت، پێدەچێت تیمی ترەمپ ناچاربێت وڵاتانی سەرەكی لە پێشینە دابنێن و مۆڵەتی 90 رۆژە بۆ ئەوانی دیكە درێژبكەنەوە.
لە ئێستادا تیمە دانوستانكارەكەی ترەمپ لە 200 لێپرسراو لە كەرتە جیاوازەكان پێكهاتوون، بەدرێژایی رۆژ كاردەكەن لەگەڵ بەرەوپێشچوونەكان، لەنێویشیاندا جێگری وەزیری گەنجینەی ئەمریكا مایكل فۆلكەندەر كە رۆڵێكی دیاری دەبێت لە دانوستانەكاندا.
ترەمپ لەم هەفتەیەدا پاشەكشەی لە بڕیارێكی پێشووی خۆی كرد و مۆڵەتێكی 90 رۆژی بە تەواوی وڵاتان بەخشی جگە لە چین بۆ لێخۆشبوون لە باجەكان ئەگەر لەو ماوەیەدا بگەنە رێككەوتن لەگەڵ ئەمریكا، هەرچەندە دواتر بڕیارێكی دەركرد بۆ لێخۆشبوون لە باجی سەر مۆبایل و كۆمپیوتەر.
وەزیری دەرەوە و دارایی سوریا لەم مانگەدا سەردانی ئەمریكا دەكەن بۆ بەشداریكردن لە كۆبونەوەی سندوقی دراوی نێودەوڵەتی و بانكی نێودەوڵەتی.
ئەسعەد شەیبانی وەزیری دەرەوەی سوریا رایگەیاند، لەگەڵ محەمەد یوسر وەزیری دارایی وڵاتەكەی و عەبدولقادر حەسری پارێزگاری بانكی ناوەندیی و ژمارەیەك لێپرسراوی باڵا كۆتایی ئەم مانگە سەردانی ئەمریكا دەكەن بۆ بەشداریكردن لە كۆبوونەوەی سندوقی دراو و بانكی نێودەوڵەتی.
لەوبارەوە ئاژانسی رۆیتەرز بڵاویكردەوە، وەفدی سوریا ڤیزای ئەمریكایان پێ دراوە و ئەمەش جاری یەكەمە لە دوای نزیكەی 15 ساڵ لێپرسراوانی باڵای سوریا سەردانی ئەمەریكا بكەن.
دەشڵێت، لە دیدارەكانیشیان لە ئەمەریكا وەفدی سوریا هەوڵی كەمكردنەوەی سزاكانی سەر وڵاتەكەیان دەدەن.
ئەمرۆ لە ئەنتاڵیا پێنجەمین كۆبونەوەی ئەمنی لەسەر ئاستی باڵا لە نێوان عیراق و توركیا بەرێوەدەچێت .
وەزارەتی دەرەوەی توركیا لە راگەیەندراوێكدا بڵاویكردۆتەوە، ئەمرۆ پێنجەمین كۆبونەوەی ئەمنی عیراق و توركیا تایبەت بە میكانیزمی ئەمنی لە ئەنتاڵیا بەرێوەدەچێت ، فوئاد حسێن وەزیری دەرەوەی عیراق و هاكان فیدان وەزیری دەرەوەی توركیا سەرپەرشتی كۆبونەوەكە دەكەن و وەزیری بەرگری توركیا و سەرۆكی دەزگای هەواڵگری توركیا و هاوتا عیراقییەكانیان لە كۆبونەوەكەدا بەشدار دەبن .
بریارە لە كۆبونەوەكەدا هەماهەنگی نێوان عیراق و توركیا بۆ پاراستنی ئاسایش و سەقامگیری هەردوو وڵات تاوتوێ بكرێت .
وەزیری نەوتی ئێران رایگەیاند، لە چەند رۆژی داهاتوودا سەردانی عیراق دەكات بۆ جێبەجێكردنی چەند پرۆژەیەكی نەوتی لە نێوان هەردوو وڵاتدا.
موحسین پاكنەژاد وەزیری نەوتی ئێران رایگەیاند، لەسەر بانگهێشتی حەیان عەبدولغەنی وەزیری نەوتی عیراق لە چەند رۆژی داهاتوو لەگەڵ عەباس عەلی ئابادی وەزیری وزەی وڵاتەكەی، سەردانی عیراق دەكەن بۆ جێبەجێكردنی چەند پرۆژەیەكی نەوتی لە نێوان هەردوو وڵاتدا.
دەشڵێت، تاوتوێی چەند بابەتێكی پەیوەست بە وزە و نەوت دەكەن و هیوادارن یاداشتی نوێی لێكتێگەیشتن لەگەڵ عیراق ئیمزا بكەن.
وتیشی، لەگەڵ عیراق لە چەندیدن بواردا پەیوەندیی باشیان هەیە و دەیانەوێت پەیوەندییەكانیان لە بواری نەوت و غاز و پتڕۆكیمیایی و كارەبا پەرە پێبدەن.
بومەلەرزەیەکی دیکە بە گوڕی 5.5 پلە میانماری هەژاند و هێشتا هیچ روونکردنەوەیەک لەسەر زیانەکانی نەدراوە.
میدیا جیهانییەکان بڵاویانکردەوە، بومەلەرزەیەکی دیکە بە گوڕی 5.5 پلە بە پێوەری رێختەر میانماری هەژاند، چەقی بومەلەرزەکە کەوتووەتە نێوان ماندالای و نایپیتاوی پایتەخت.
ماندالای دووەم گەورەترین شاری میانمار، هەمان ئەو شارەی جاری پێشوو بومەلەرزە بەهێزەکە لێیدا.
ئەگەرچی هێشتا زانیاریی تەواو لەسەر زیانەکانی بڵاونەکراوەتەوە، بەڵام بەپێی زانیارییە سەرەتاییەکان بەهۆی بومەلەرزەکەوە زیان بە چەند باڵەخانەیەک گەیشتووە، بەتایبەت ئەوانەی لە بومەلەرزەکەی جاری پێشوودا زیانیان بەرکەوتبوو.
ئەوەش لە کاتێکدایە، رۆژی 28ی مانگی رابردوو، بومەلەرزەیەکی بەهێز بە گوڕی 7.7 پلە بەپێوەری رێختەر میانماری هەژاند و بەهۆیەوە چوار هەزار و 400 کەس گیانیان لەدەستدا.
کۆشکی سپی لە راگەیێندراوێکدا سەبارەت بە گفتوگۆی نێوان ئەمریکا و ئێران رایگەیاند کە "گفتوگۆکان لەگەڵ ئێران ئەرێنی و بونیادنەر بوون"، ئەمەش دوای ئەو دیدارە دێت کە لە نێوان بەرپرسانی هەردوو وڵات ئەنجامدرا.
بەپێی راگەیێندراوی کۆشکی سپی، ستیڤ ویتکۆف، نێردەی تایبەتی ئەمریکا بۆ رۆژهەڵاتی ناوەڕاست، وەزیری دەرەوەی ئێرانی دڵنیاکردۆتەوە کە لە لایەن سەرۆکی ئەمریکاوە راسپێردراوە "بۆئەوەی تا بکرێت، لە رێگەی گفتوگۆ و دیپلۆماسییەوە کێشەکانی نێوان هەردوو وڵات چارەسەر بکرێن".
راگەیەندراوەکەی کۆشکی سپی ئاماژەی بەوەش کردووە: "ئەو کۆبوونەوەی ئەم رۆ ئەنجامدرا، هەنگاوێکە بۆ بەرەو پێش بردنی هەوڵەکانب بۆ بەدیهێنانی ئەنجامێک کە سودی بۆ هەردوولا هەبێت".
لە راگەیێندراوەکەدا ئاماژە بەوەدراوە: "هەردوولا رێککەوتن شەممەی داهاتوو جارێکی دیکە کۆببنەوە"و بەردەوامبن لە گفتوگۆ.
ئەم لێدوانە هاوکاتە لەگەڵ لێدوانی عەباس عراقچی وەزیری دەرەوەی ئێران کە بەهەمان شێوەم گفتوگۆکانی بە بونیادنەر وەسفکرد.
ئیدارەی فیدراڵی گومرگ و پاراستنی سنورەکانی ئەمریکا شەوی هەینی رایگەیاند، بەشێکی بەرچاو لە ئامێرە تەکنەلۆژییەکان لەنێویاندا مۆبایل، کۆمپیوتەر و تەلەڤیزیۆنی زیرەک، لە پێناسە گومرگییەکانی حکومەتی ئەمریکا دەبەخشرێن.
بەپێی ڕێنماییە نوێیەکان، ژمارەیەکی بەرچاو لە وڵاتان لە مافی گومرگی سەر بەرهەمە تەکنەلۆژییەکان دەبەخشرێن، بەڵام چین گەورەترین سودمەندە کە رێژەی لێخۆشبوونەکەی دەگاتە ٪145.
بەپێی ئەم بڕیارە نوێیە، لاپتۆپ، تەلەڤیزیۆنی زیرەک، نیمچە گەیەنەرەکان و چەندین بەرهەمی تەکنەلۆژی دیکەش دەگرێتەوە.
شارەزایانی ئابووری پێشبینی دەکەن ئەم هەنگاوە کاریگەری راستەوخۆی لەسەر دابەزینی نرخی ئامێرە تەکنەلۆژییەکان لە بازاڕەکانی ئەمریکا هەبێت.
بڕیارە ئەمڕۆ ئەمریکا و ئێران لە مەسقەتی پایتەختی عوممان دانوستان ئەنجام بدەن، عەباس عراقچی نوێنەرایەتی ئێران دەکات و ستیڤن ویکتۆڤ نوێنەری ئەمریکایە.
پێشتر دۆناڵد ترەمپی سەرۆکی ئەمریکا نامەیەکی بە دیپلۆماتکارێکی ئیماراتیدا گەیاندە تاران، بەڵام ئێران عوممانی هەڵبژارد وەک جێگەی دانوستان.
ئەمریکا لەگەڵ ئیمارات پەیوەندی باشی هەیە، هەر لەو رێگەیەوە نامەکەی گەیاندە تاران، بەڵام لە بەرانبەردا تاران وەڵامی نامەکەی لە عوممانەوە گەیاندەوە ئەمریکا.
عەباس عراقچی کە نوێنەرایەتی ئێران دەکات لە دانوستانەکەی ئەمڕۆدا بەرانبەر ئەمریکا، سەبارەت بە هەڵبژاردنی عوممان بۆ دانوستان رایگەیاند: ئێمە ئەزمونی باشمان لە عوممان هەیە، ئاگاداری نیەتی باشی عوممانین و پەیوەندییەکی باشمان لەگەڵ ئەو وڵاتە هەیە، هەروەها هەڵباژردنی عوممان بۆ دانوستان بڕیارێکی ئاساییە. ئاماژەی بەوەشداوە: عوممان لە رابردشدا شوینی دانوستانی نێوان ئەمریکا و ئێران بووە.
مەسقەت گەورەترین شار و پایتەختی عوممانە، ژمارەی دانیشتوانەکەی زیاتر لە یەک ملیۆن و 400 هەزار کەسە.
ئەمڕۆ شەممە 12ـی 4ـی 2025، دانوستانی نێوان ئەمریکا و ئێران لە شاری مەسقەتی پایتەختی عوممان ئەنجام دەدرێت، کۆتا جار کە ئەو دوو وڵاتە لە مەسقەت کۆبونەوە ساڵی 2014 بوو.