شەپۆلێكی خۆڵبارین شارەكانی عیراق و هەرێمی كوردستانی گرتووە و بەهۆیەوە ژمارەیەكی زۆری هاوڵاتیان سەردانی نەخۆشخانەكانیان كردووە.

دەستەی كەشناسی عیراق لە راگەیەنراوێكدا ئاماژەی بەوەكردووە، ئەمڕۆ ئاسمان ساماڵ دەبێت لەگەڵ بوونی چەند پەڵەهەورێك و خۆڵبارینیش لە رۆژدا كاریگەرییەكەی كەمدەبێتەوە و پلەكانی گەرماش نزم دەبنەوە بە تایبەتیش لە ناوچەكانی باكور و ناوەڕاستی عیراق.

راشیگەیاندووە، بەهۆی دابەزینی پلەكانی گەرماوە هەست بە سەرما دەكرێت لە بەرەبەیاندا و رەشەباش هەڵدەكات، سبەینێش پلەكانی گەرما لە هەرێمی كوردستان و عیراق بە نزمی دەمێننەوە و كاریگەری رەشەباش كەمتر دەبێتەوە.

تەندروستی سلێمانیش رایگەیاند، بەهۆی خۆڵبارینەوە تا درەنگانی شەوی رابردوو 44 هاووڵاتی سەردانی نەخۆشخانەیان كردووە.

كەشناسی ئێرانیش بڵاویكردەوە، خۆڵبارین ناوچەكانی رۆژهەڵاتی كوردستانی گرتووەتەوە و رێنمایی هاووڵاتیانیش دەكات تەنها لە كاتی پێویست بچنە دەرەوە.

بەهۆی ئەو شەپۆلە خۆڵبارینەی کە ناوچەکەی گرتووەتەوە، ژمارەی ئەو هاووڵاتیانەی لە کەرکوک تووشی تەنگەنەفەسی بوون بۆ 39 کەس بەرزبووەوە و نۆشیان منداڵن.

سامان یابە، بەڕێوەبەری راگەیاندنی تەندروستی کەرکوک، رایگەیاند: "ژمارەکە رو لە بەرزبوونەوەیە و تەواوی ئامادەکارییەکان کراون بۆ پێشوازیکردن و چارەسەرکردنی هەر حاڵەتێکی نوێ."

فەرمانگەی تەندروستی داوا لە هاووڵاتیان دەکات، بەتایبەتی ئەو کەسانەی کە نەخۆشیی هەناسەدان و هەستیارییان هەیە، تا دەکرێت لە ماڵەکانیان بمێننەوە و خۆیان لە چوونە دەرەوە بپارێزن.

بەرێوبەرایەتی هاتوچۆی سلێمانی لە راگەیەندراوێکدا چەند رێنماییەکی ئاراستەی شۆفێران کرد بۆ خۆپاراستن و سەلامەتی لەکاتی خۆڵباریندا و داوادەکات پابەندی ئەم خاڵانە بن.

1. کەمکردنەوەی خێرایی: لەبەرئەوەی لە کاتی خۆڵبارینی چڕدا ئاستی بینین زۆر کەم دەبێتەوە، پێویستە خێرایی ئۆتۆمبێلەکەت بە شێوەیەکی بەرچاو کەم بکەیتەوە.

2. پاراستنی ماوەی سەلامەتی: هەمیشە ماوەیەکی سەلامەت و گونجاو لەنێوان ئۆتۆمبێلی خۆت و ئۆتۆمبێلی پێشەوەت بهێڵەرەوە.

3. دڵنیابوون لە فڵچەی جامەکان: پێویستە دڵنیابیت لەوەی کە بڕی پێویست ئاو لە دەبەی فڵچەکاندا هەیە و فڵچەکان بە باشی کاردەکەن بۆ پاککردنەوەی جامی پێشەوە.

4. خۆپاراستن لە شۆفێریی شەوانە: تا دەکرێت لە شۆفێریکردن لە کاتەکانی شەودا خۆت بپارێزە، بەتایبەتی ئەگەر خۆڵبارینەکە چڕ بوو.

5. سنووردارکردنی گەشتی دەرەوەی شار:
* ئەگەر زۆر پێویست نەبێت، گەشتکردن و شۆفێری لە رێگاوبانی دەرەوەی شارەکان دوابخە تا کۆتاییهاتنی شەپۆلی خۆڵبارینەکە.
* لە ئەگەری ناچاریدا، پێویستە زیاتر پابەندی خێرایی دیاریکراو بیت، لایتی نزمی ئۆتۆمبێل (رووناکی نزم) دابگیرسێنیت، و بە هیچ شێوەیەک هەوڵی تێپەڕاندنی (سەبقەکردن) هەڵە و مەترسیدار نەدەیت.

6. پەیوەندیکردن لە کاتی پێویستدا: لە کاتی رودانی هەر حاڵەتێکی نەخوازراودا، دەتوانیت پەیوەندی بە هێڵی گەرمی کۆنترۆڵی هاتوچۆی سلێمانییەوە بکەیت لەسەر ژمارە 188.

هاتوچۆی هەولێر ئاشکرایدەکات، زۆربەی روداوەکانی هاتوچۆ بەهۆی ماتۆڕ سکیلەوەیە، بۆ کەمکردنەوەی ئەو روداوانەش چەند رێوشوێنێک دەگیرێتەبەر.

بەڕێوەبەرایەتی هاتوچۆی هەولێر رایگەیاند، بە گوێرەی بە دواداچوونەکان، بەشی زۆری روداوەکانی هاتووچۆ یان بە هۆی ماتۆڕسوارەوەیە یان ماتۆڕسکیل و ماتۆرسوار یەکێکن لە لایەنەکانی هەر روداوێکی هاتووچۆ، کە بەردەوام یان مردن یاخود برینداربوونی سەختی لێدەکەوێتەوە.

ئەوەشی خستوەتەڕوو، بە فەرمانی وەزارەتی ناوخۆ لێژنەیەکی هاوبەشی نێوان پۆلیسی هاتوچۆ و پۆلیسی هەولێر ئاگاداری بازاڕەکانی کڕین و فرۆشتن و چاککردنەوەی ماتۆڕسکیلیان لە ناو سەنتەری شاری هەولێر کردوەتەوە، بۆ ئەوەی خۆیان دوور بگرن لە دروستکردنی ماتۆڕسکیل بە پارچە و مامەڵەکردن بە ماتۆڕی بێ سەرەتا و تۆمارنەکراو.

دەشڵێت، ئەمڕۆ تیمەکانیان لە بازاڕی شێخڵا و بازاڕی هەینی هەولێر ئامادەبوون بۆ ئاگادارکردنەوەی هاووڵاتیان لە رێوشوێنەکانی یاسایی بەرانبەر بە ماتۆڕی بێ سەرەتا.

هاتوچۆی هەولێر داوا لە دایکان و باوکان دەکات، رێگری بکەن لە هەرزەکارانیان بۆ ئەوەی نەبنە قوربانی مانۆڕەکانی ماتۆڕسواری و هەروەها توشی سزای دارایی نەبنەوە.

شارەوانی سلێمانی هەڵمەتێکی یەک هەفتەیی بۆ کۆکردنەوەی سەگی بێلانە ئەنجامدەدات، هەر کەسێکیش سەگێک بگرێت و رادەستی شەڵتەری بکات سێ هەزار دینار پاداشت دەکرێت.

سەرۆکایەتی شارەوانی سلێمانی لە راگەیەنراوێکدا بڵاویکردەوە، بەهۆی زۆربوونی سەگی بێلانە لە شەقام و کۆڵانەکان و گەڕەکەکان، نزیک بوونەوە لە کردنەوەی خوێندنگەکان، سەرۆکایەتیی شارەوانیی سلێمانی ئاگاداری هاووڵاتییان دەکات، هەڵدەستێت بە ئەنجامدانی هەڵمەتێکی چڕتری کۆکردنەوەی سەگە بێلانەکان بۆ (ماوەی هەفتەیەک).

ئاشکراشیکردووە، سبەینی، رۆژی ٢٠ـی ئەیلولی ٢٠٢٥، هەڵمەتەکە دەستپێدەکات و مەرجەکانی گرتنی سەگەکانیش بریتین لەوەی هەر سەگێک بەچکەی هەبێت بەبێ بەچکەکە نەبێت، هەروەها لە کاتی رادەستکردنەوەیان بە شەڵتەرەکە بڕی (سێ هەزار دینار) پاداشت دەکرێت، ئەگەر رادەستی تیمەکانی کۆکردنەوەی سەگ بکرێت بڕی (دوو هەزار دینار) پاداشت دەکرێت، واتە (لەشوێنێک کۆبکرێتەوە و تیمەکانیان بێنە شوێنی مەبەست بۆ بردنیان) بەمەرجێک تەنها ئەوانەی سنوری شارەوانیی سلێمانی بن.

شارەوانی سلێمانی راشیگەیاندووە،  کارەکانی تیمەکانی کۆکردنەوەی سەگ و رادەستکردنەوەی بە شەڵتەرەکە چڕتر کردوەتەوە، تا بتوانرێت بە کەمترین ماوە زۆرترین سەگ کۆبکرێتەوە لە شەقام و کۆڵانەکان لەلایەن ئەو کەسانەی کە شارەزاییان لە گرتنی سەگ هەیە.

هەروەها شارەوانی سلێمانی داوا  لە ئاژەڵ دۆستان و رێکخراوەکانی تایبەت بە پاراستنی ئاژەڵان کە پشتیوان و هاوکاریان بن، بۆ ئەم هەڵمەتە کە سودی بۆ بەرژەوەندی گشتی و پاراستنی تەندروستی و گیانی هاووڵاتیان هەیە.

شارەوانی سلێمانی ئەم ژمارە تەلەفونەی و ناونیشانی شەڵتەرەکەی داناوە بۆ پەیوەندیکردن.....

دەتوانن پەیوەندی بەم ژمارەیەوە بکەن:

ژمارە مۆبایل: 07719914460

شوێنی شەلتەرەکە: ڕازیانە، نزیک بازگەی عەربەت.

یەكێتی مامۆستایانی كوردستان لە دەستپێكردنەوەی ساڵی نوێی خوێندن داوا دەكات كێشەی موچە چارەسەر بكرێت و پلە بەرزكردنەوەش دەستپێبكاتەوە.

یەكێتی مامۆستایانی كوردستان لە راگەیەنراوێكدا بەبۆنەی دەستپێكردنەوەی ساڵی نوێی خوێندن داوا دەكات، بۆئەوەی پرۆسەی پەروەردە و خوێندنی باڵا بەباشی بەڕێوەبچێت، پێویستە كێشەی موچە چارەسەر بكرێت و مانگانە لە كاتی خۆیدا دابەش بكرێت و تێكەڵ بە ئەجێندای جۆراوجۆر نەكرێت، داوا دەكات پلە بەرزكردنەوەش دەستپێبكاتەوە.

لە بەشێكی تری داواكارییەكاندا هاتووە، ئەو مامۆستایانەی گرێبەستن بكرێن بە هەمیشەیی و سود لەو مامۆستا وانەبێژانەش وەربگیرێت كە گرێبەستیان بۆ نەكراوە.

بەپێی پێشبینییەکانی کەشناسی لە 48 کاتژمێری داهاتوودا پلەکانی گەرما نزمدەبنەوە و خۆڵبارین ناوچە جیاجیاکانی هەرێم دەگرێتەوە.

بەڕێوەبەرایەتی کەشناسی هەرێم کەشوهەوای بۆ 48 کاتژمێری داهاتوو بڵاوکردەوە و رایگەیاندووە، ئەمڕۆ هەینی ئاسمان ساماڵ دەبێت لە ناوچە شاخاوییەکان بەتایبەتی ناوچە سنوریەکانی باکوور پەلە هەور دەبێت.

ئاماژەی بەوەشکردووە، تۆز و خۆڵ بەرزدەبێتەوە، لە نیوەڕۆوە چڕییەکەى زیاد دەکات بە تایبەتى سنورى پارێزگاى سلێمانى و کەرکوک و ئیدارەى راپەڕین وگەرمیان.

کەشناسی هەرێم راشیگەیاندووە، سبەینێ شەممە، ئاسمان ساماڵ دەبێت، لەگەڵ بەردەوامى بەرز بوونەوەی تۆز و خۆل تا  کاتەکانی نیوەڕۆ, پاشان کەشەکە سەقامگیر دەبێت.

بەپێی داتاکانی ماڵپەڕی شەفافیەت داهاتی نانەوتی ئەم هەفتەیەی سلێمانی زیاتر لە 11 ملیار دیناربووە.

ماڵپەڕی شەفافیەت داهاتی ئەم هەفتەیەی بڵاوکردەوە و بەپێی ئامارەکە، لە رۆژی 13ـی 9 تا 19ـی ئەم مانگە، داهاتی پارێزگاکانی سلێمانی و هەڵەبجە و هەردوو ئیدارە سەربەخۆکانی راپەڕین و گەرمیان زیاتر لە 11 ملیار و 59 ملیۆن دینار بووە.

هەر بەپێی داتای ماڵپەڕی شەفافیەت، بە بەراورد بە هەفتەی رابردوو نزیکەی 2 ملیار دینار داهاتی نانەوتی کەمتر بووە.

جێگەی ئاماژەیە، ماڵپەڕی شەفافییەت بۆ داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.

بزوتنەوەی گۆڕانی گردی زەرگەتە پەیامێکی بڵاوکردووەتە و تێیدا هاتووە، "پلنیۆم لە دەستوری گۆڕاندا بوونی نییە و ئاگاداری سەرجەم (هەڵسوڕاوان، مەکۆکان و ئەندامانی دەستەی گشتی) ئەکەین کە خۆیان بە دوور بگرن لە بەشداری لەو کۆبونەوەیە، چونکە هیچ پەیوەندی بە مەکۆی سەرەکی بزوتنەوەی گۆڕان لە گردی زەرگەتەوە نییە".

بزوتنەوەی گۆڕان – زەرگەتە لە پەیامێکدا دەڵێت: دەنگۆی ئەوە هەیە رۆژی شەممە، 20ـی 9ـی 2025 لە شاری سلێمانی پێشێلکارانی دەستوری گۆڕان و بەرنامەی سیاسی و هەموو بنەماکانی قانون و کاری رێکخراوەیی، کۆبونەوەیەک بە ناونیشانی (خۆ رێکخستنەوە، کاری پێکەوەیی و ئاشتەوایی) لە شاری سلێمانی ئەنجام بدەن. 

لە پەیامەکەدا هاتووە، ئەو کۆبونەوەیە کە جارێک ئەڵێن پلینیۆمە (پلینیۆم لە دەستوری گۆڕان هەر بونی نیە)، یان کۆبونەوەی فراوان یان کۆنفرانس هیچ پەیوەندییەکی بە مەکۆی سەرەکی گۆڕان لە گردی زەرگەتەوە نیە. نە کاری پێکەوەییە و نە بۆ ئاشتەواییە، هەروەها کاتێک پەیوەندی لەگەڵ هەڵسوڕاوان دەکەن بە درۆ دەڵێن کە کۆبونەوەی هەردو لایە یان بۆ ئاشتەواییە، ئەمەش دورە لە راستییەوە و ئەو بەڕێزانە هەرچی پرۆژەی ئاشتەوایی هەیە رەتیانکردۆتەوە.

بزوتنەوەی گۆڕان – زەرگەتە دەشڵێت: لە 13ـی 4ـی 2025 هەموو سیفەتێکی قانونیان لەدەستداوە، ئەمەش بە نووسراوی رەسمی کۆمسیۆنی باڵای سەربەخۆی هەڵبژاردنەکان، کە لە فەرمانگەی گشتی پارت و رێکخراوە سیاسیەکانەوە دەرچوە، هەروەها مەرامی پشت ئەم جۆرە کۆبونەوانە بۆ فریودانی گۆڕانخوازانە چونکە بە بڕیاری ئەنجومەنی کۆمسیاران شەش مانگ دەرفەت دراوە بە گۆڕان، تاکو کێشەکانی چارەسەر بکات. ئەم کارانە بۆ تێکدانی رەوشەکەیە.

لە پەیامەکەشدا هاتووە، ئاگاداری سەرجەم (هەڵسوڕاوان، مەکۆکان و ئەندامانی دەستەی گشتی) ئەکەین کە خۆیان بە دوور بگرن لە بەشداری لەو کۆبونەوەیە، چونکە هیچ پەیوەندی بە مەکۆی سەرەکی بزوتنەوەی گۆڕان لە گردی زەرگەتەوە نیە.

لە کۆتایی پەیامەکەدا ئاماژە بەوەدراوە: دووپاتی دەکەینەوە کە پابەندین بە پەیام و بەرنامەو دەستووری ناوخۆیی بزوتنەوەی گۆڕان و رەوانشاد نەوشیروان مستەفاوە، هاوتەریب بە کردەوەش سەلماندومانە پابەند بووین بە سەرجەم بڕیارو راسپاردە قانونییەکانی کۆمسیۆنی باڵای سەربەخۆی هەڵبژاردنەکانەوە، کە لە چوارچێوەی یاسا بەرکارەکاندا پەیڕەو کراوە.

حکومەتی هەرێمی کوردستان، لە رێگەی گشتاندنێکی سەرۆکایەتیی دیوانی ئەنجومەنی وەزیرانەوە، روماڵکردنی روداوەکانی تاوانی لەلایەن کەناڵەکانی میدیا و تۆڕە کۆمەڵایەتییەکانەوە قەدەغە کرد، کە بڵاوکردنەوەی دیمەن و ڤیدیۆی تاوانباران و شوێنی روداوەکان دەگرێتەوە.

بەپێی گشتاندنەکە کە ئاراستەی سەرجەم وەزارەت و دامودەزگاکانی حکومەت کراوە، لەمەودوا رێگە بە هیچ میدیایەک نادرێت دیمەنی روداوی تاوان، تۆمەتباران، و شوێن و کاتی روداوەکان بڵاوبکاتەوە و روماڵی بکات.

ئەم بڕیارە لەسەر بنەمای داواکارییەکی "دەستەی سەربەخۆی مافی مرۆڤ" لە هەرێمی کوردستان دەرچووە، کە داوای لە ئەنجومەنی وەزیران کردبوو رێگری لەم جۆرە روماڵانە بکرێت.

ئامانج لەم گشتاندنە، وەک لە راگەیەندراوەکەدا هاتووە، بریتییە لە پاراستنی رێڕەوی لێکۆڵینەوە یاساییەکان، رەچاوکردنی باری دەروونی و کۆمەڵایەتی هاوڵاتیان، و رێگریکردن لە بەکارهێنانی روداوەکان بۆ مەرامی سیاسی و دروستکردنی دووبەرەکی.

هەروەها جەخت لەسەر پاراستنی سەلامەتیی گشتی، ئاسایشی تاک و کۆمەڵگە، و رێزگرتن لە بنەماکانی مافی مرۆڤ کراوەتەوە.

ئەفسەرێکی پلە باڵای بەڕێوەبەرایەتیی بەرگریی شارستانیی دهۆک، کە بەرپرسی بەشی ژمێریارییە، بە گومانی تێوەگلان لە دۆسیەی گەندەڵی روبەروی لێکۆڵینەوە بووەتەوە. هاوکات، دەستەی دەستپاکی دوو دۆسیەی دیکەی پەیوەست بە سوتانی بازاڕی چەلێ لەسەر هەمان بەڕێوەبەرایەتی تۆمار کردووە.

بەپێی ئەو زانیارییانەی دەستکەوتوون، ئەفسەرە پلە باڵاکە بۆ ماوەی هەفتەیەک لە شاری هەولێر راگیراوە و دواتر بە کەفالەت ئازاد کراوە، بەڵام لێکۆڵینەوەکان لەگەڵیدا بەردەوامن.

سەرچاوە تایبەتەکان ئەوەشیان ئاشکرا کردووە کە دوو دۆسیەکەی دیکە کە لەلایەن دەستەی دەستپاکیەوە جوڵێندراون، پەیوەندییان بە روداوی سوتانی بازاڕی 'چەلێ' لە دهۆک و پرسی قەرەبووکردنەوەی دوکاندارە زیانلێکەوتووەکانەوە هەیە.

بەڕێوەبەرایەتی گشتیی کەشناسی و بوومەلەرزەزانی هەرێمی کوردستان، رەوشی کەشوهەوای 48 سەعاتی داهاتووی  راگەیاند و ئاماژەی بەوەدا کە سبەی هەینی، شەپۆلێکی تۆز و خۆڵ ناوچەکانی هەرێم دەگرێتەوە و پلەکانی گەرما بە شێوەیەکی بەرچاو دادەبەزن، لەگەڵ ئەگەری تاوەبارانی پچڕپچڕ لە ناوچە سنورییەکانی باکوری رۆژهەڵات.

کەشوهەوای ئەمڕۆ پێنجشەممە:

بەپێی پێشبینییەکان، ئاسمانی هەرێمی کوردستان بە گشتی ساماڵ دەبێت و پلەکانی گەرما نزیک دەبن لە تۆمارکراوەکانی دوێنێ. خێرایی با لەسەرخۆ دەبێت و لە نێوان 5 بۆ 15 کیلۆمەتر لە کاتژمێرێکدا دەبێت.

کەشوهەوای سبەی هەینی:

ئاسمان ساماڵ دەبێت، بەڵام لە ناوچە شاخاوییەکانی باکور و باکوری رۆژهەڵات دەگۆڕێت بۆ پەڵەهەور و نیمچەهەور.

لەلایەکی دیکەوە، لە کاتەکانی بەیانییەوە شەپۆلێکی تۆز و خۆڵ بەهۆی چالاکبوونی باوە لە ناوچەکانی رۆژئاواوە دەستپێدەکات و پاشان زۆربەی ناوچەکانی هەرێم دەگرێتەوە تا درەنگانی ئێوارە. لەگەڵ ئەمەشدا، ئەگەری تاوەبارانی پچڕپچڕ لە ناوچە سنوورییەکانی باکوری رۆژهەڵاتدا هەیە.

خێرایی با سەرەتا لە نێوان 15 بۆ 25 کیلۆمەتر لە کاتژمێرێکدا دەبێت، بەڵام دواتر چالاک دەبێت بۆ سەرووی 40 کیلۆمەتر لە کاتژمێرێکدا.

هەروەها، پلەکانی گەرما بە شێوەیەکی بەرچاو دادەبەزن کە نزیکەی 5 بۆ 6 پلەی سیلیزی دەبێت.

بەرزترین پلەکانی گەرمای پێشبینیکراو بۆ سبەی هەینی:

• هەولێر: 34 پلە

• سلێمانی: 31 پلە

• دهۆک: 32 پلە

• کەرکوک: 35 پلە

• هەڵەبجە: 33 پلە

• زاخۆ: 32 پلە

• ئاکرێ: 31 پلە

• ئامێدی: 26 پلە

• سۆران: 29 پلە

• حاجی ئۆمەران: 21 پلە

• گەرمیان: 37 پلە

بەبۆنەی نزیکبوونەوەی دەستپێکی وەرزی نوێی خوێندن و کردنەوەی دەرگای قوتابخانەکان لە سەرانسەری هەرێمی کوردستان، بەڕێوەبەرایەتی هاتووچۆی پارێزگای سلێمانی  پلانی تایبەتی خۆی بۆ رێکخستنی هاتووچۆ و پاراستنی سەلامەتی قوتابیان راگەیاند.


خاڵە سەرەکییەکانی پلانەکەی هاتووچۆی سلێمانی:

1. سنووردارکردنی هاتنی بارهەڵگرەکان:

    * لە رۆژی یەکشەممە، 21ی ئەیلوولی 2025، لە کاتژمێر 7:30ی بەیانی تا 8:30ی بەیانی، هاتنە ناوەوەی بارهەڵگرەکان بۆ ناو شاری سلێمانی (لە رێگەی بازگەکان و سنووری شەقامی بازنەیی مەلیک مەحمود) قەدەغە دەکرێت، جگە لە رۆژانی هەینی.

    * ئامانج لەم بڕیارە کەمکردنەوەی قەرەباڵغی و گیروگرفتەکانی هاتووچۆیە لە کاتی چوونی قوتابیان بۆ قوتابخانە.

    * ئەم کارە لە ئەستۆی مەفرەزەکانی بەشی هاتووچۆی بازگەکان و هەردوو بەڕێوەبەرایەتی هاتووچۆی ناو شار (ڕۆژهەڵات و رۆژئاوا) دەبێت. هەر سەرپێچییەکیش بەدوایدا لێپرسینەوەی یاسایی لێدەکرێت.

2. خێرایی و ئاگاداری شۆفێران:

    * داوا لە شۆفێرانی بەڕێز دەکرێت، رەچاوی خێراییەکان بکەن لە ناوچەکانی نیشتەجێبوون و بەردەم سەرجەم ناوەندەکانی خوێندن.

    * پێویستە شۆفێران ئاگادارییەکی زیاتریان هەبێت بۆ منداڵان و پیادەڕەوان، بەتایبەتی لە کاتی دەستپێکی رۆژ و کۆتایی هاتنی دەوامدا.

3. ڕێنمایی تایبەت بە پاسی قوتابخانەکان:

    * داوا لە شۆفێرانی ئەو پاسانە دەکرێت کە منداڵ و قوتابیان دەگوازنەوە، رەچاوی ژمارەی یاسایی قوتابیان لەناو پاسەکانیاندا بکەن و سەرنشینی زیادە سەر نەخەن.

    * نابێت رێگە بە منداڵان بدرێت بەشێک لە جەستەیان لە جامەکان دەربکەن و دەبێت لە جێی خۆیان دابنیشین.

    * لە کاتی سەرکەوتن و دابەزین لەبەردەم قوتابخانەکاندا، نابێت ئاستەنگ و قەرەباڵغی دروست بکرێت.

    * هاتووچۆی ناو شار رایگەیاندووە کە لە کاتی سەرپێچیکردنی شۆفێرەکان، لێپرسینەوەی یاسایی دەکرێت.

سبەینێ لە ئاکرێ گەورەترین فێستیڤاڵی بەرهەمی خۆماڵی بەڕێوەدەچێت، زیاتر لە 70 بەرهەمی خۆماڵی نمایش دەکرێت.

دلبرین غازی پەیامنێری کوردسات نیوز لە ئاکرێ رایگەیاند، لە فێستیڤاڵەکەدا زیاتر لە 60 کەپر بۆ جوتیارانی دەڤەرەکە ئامادەکراوە و زیاتر لە 70 جۆر بەرهەمی خۆماڵی چوار وەرزە تێیدا نمایش دەکرێت.

وتیشی، چاوەڕوان دەکرێت لە هەموو شارەکانی کوردستان گەشتیاران روو لە فێستیڤاڵەکە بکەن.

بافڵ جەلال تاڵەبانی سەرۆکی یەکێتیی نیشتمانیی کوردستان، پرسەنامەیەک ئاڕاستەی هۆمەر بابەکر ئاغای گردەسپیان، پێشمەرگەی مەفرەزە سەرەتاییەکانی یەکێتیی نیشتمانیی کوردستان دەکات.

دەقی پرسەنامەکە

هەڤاڵی تێکۆشەر هۆمەر بابەکر ئاغای گردەسپیان، پێشمەرگەی مەفرەزە سەرەتاییەکانی یەکێتیی نیشتمانیی کوردستان و کەسایەتیی دیاری عەشیرەتی میراودەلی. 

بەداخ و خەمێکی زۆرەوە، هەواڵی کۆچی دوایی هەردوو کچی بەڕێزتان (خاتوو مینا و خاتوو رێزان)ـمان پێگەیشت. 

بۆ ئەم خەمە گەورەیە، لە دڵەوە هاوبەشی ماتەمتانین و پرسە و سەرەخۆشی ئاڕاستەی ئێوە و بنەماڵە سەربەرزەکەتان دەکەین. 

لە خوای گەورە داواکارین گیانی ئازیزانتان بە بەهەشتی بەرین شادبکات، ئارامی و دڵنەوایش بە هەموولایەک ببەخشێت. 

بافڵ جەلال تاڵەبانی 
سەرۆکی یەکێتیی نیشتمانیی کوردستان