کوردستان
کۆبوونەوەی ئەنجومەنی وەزیرانی هەرێم لەبارەی دوا پێشهاتەکانی دۆسیەی هەناردەکردنی نەوتی هەرێم و بابەتی داهاتی نانەوتییەکان و موچەی موچەخۆرانی کۆتایی هات، لە کۆبووەنەوەکەدا جەخت کرایەوە نابێت چیتر ئاستەنگ لەبەردەم خەرجکردنی موچەی موچەخۆرانی هەرێم دروستبکرێت.
ئەمڕۆ ئەنجومەنی وەزیرانی هەرێم لەراگەیەنراوێکدا بڵاویکردەوە، هەرێمی کوردستان هەموو ئەرک و پابەندییە دەستورییەکانی بە زیادەوە جێبەجێ کردووە و هەموو نەرمییەکی نواندووە بۆ نەهێشتنی هەموو ئەو کێشە و ئاستەنگ و بەربەستانە تەکنیکییانەی کراونەتە بیانوو بۆ نەناردنی موچە، بۆیە نابێت چیتر ئەم بابەتانە، ببنە رێگر لەبەردەم خەرجکردنی موچەی موچۆخۆرانی هەرێمی کوردستان، کە مافێکی یاسایی و رەوای خۆیانە موچەکانیان لەلایەن حکومەتی فیدراڵەوە بنێردرێت.
هەر لە کۆبوونەوەکەدا، ئامانج رەحیم سکرتێری ئەنجومەنی وەزیران، لە دووتوێی راپۆرتێکدا، وردەکاریی دواپێشنیازی هاوبەشی هەردوو حکومەتی فیدراڵ و هەرێمی خستەڕوو سەبارەت بە پەلەکردن لە دەستپێکردنەوەی هەناردەی نەوتی هەرێم، کە لە کۆبوونەوەی دوێنێی ئەنجومەنی وەزیرانی عیراق پەسەندکرا، ئەمەش دوای ئەوەی لە هەفتەی رابردوو، لەلایەن ئەنجومەنی وەزیرانی هەرێمی کوردستانەوە، پەسەند کرا و رەوانەی بەغدا کرا.
ئەنجومەنی وەزیران ئاماژەی بەوەشکردووە، بە پێی ئەم لەیەکگەیشتنە نوێیە، سەرەڕای پشتگیری لە جێبەجێکردنی بڕیاری پێشووتری ئەنجومەنی وەزیرانی هەردوولا، کە تەواوی نەوتی بەرهەمهاتووی هەرێم رادەستی کۆمپانیای سۆمۆ بکات ( جگە لە بڕی بەکارهێنانی ناوخۆ)، ئەم قۆناغەش لەسەر ئیمزاکردنی رێککەوتننامەی سێقۆڵی بۆ هەناردەی نەوت وەستاوە، بەڵام دانوستانەکان بەرەوپێشچوونی باشیان بەخۆیانەو بینیوە و وا چاوەڕوان دەکرێت، لە کۆتایی ئەم هەفتەیە، ئەو رێککەوتننامەیە گەڵاڵە بکرێت.
ئەوەشخراوەتەڕوو، تا کاتی ئیمزاکردنی رێککەوتننامەی سێقۆڵیش، هەرێمی کوردستان بەشەنەوتی خۆی رادەستی وەزارەتی نەوتی فیدراڵ دەکات، بۆ ئەم مەبەستە، ئەنجومەنی وەزیران، وەزیری سامانە سروشتیيەکان و وەفدی دانوستانکاری راسپارد ، رێکاری پێویست بگرنەبەر و پێویستە حکومەتی فیدڕاڵیش لە بەرانبەردا، پابەندیی خۆی لە ناردنی موچە دەستبەجێ جێبەجێ بکات.
لە کۆبوونەوەکەدا وەزیری سامانە سروشتییەکان بە وەکالەت و ئەندامانی دیکەی وەفدی دانوستانکار، وردەکاریی زیاتری گفتوگۆکانی ئەم دواییە و لایەنە تەکنیکی و یاساییەکانیان خستەڕوو.
دوای گفتوگۆ، ئەنجومەنی وەزیران وێڕای پێشوازیکردن لە بڕیاری هاوبەشی هەردوولا، جەختی کردەوە کە ئیتر لە بەرانبەر ئەم بەرەوپێشچوونانە، پێویستە وەزارەتی دارایی فیدراڵ، دەستبەجێ موچەی مانگی تەمووز و ئابی ساڵی 2025 ی موچەخۆرانی هەرێم خەرج بکات و بۆ لەمەودواش، هاوشێوەی بەشەکانی دیکەی عیراق، موچەخۆرانی هەرێم، وەک هاوتاکانیان لە حکومەتی فیدراڵ، تەواوی موچەکانیان لە کاتی خۆی وەربگرن.
لە بڕگەی دووەمی کۆبوونەوە، ئەنجومەنی وەزیران گفتوگۆی لەسەر بابەتی هاوئاهەنگیی تایبەت بە رێکارە داراییەکان لە ناویشیاندا بابەتی باجەکان لە نێوان حکومەتی هەرێم و حکومەتی فیدراڵ کرد، ئەویش بە ڕەچاوکردنی دەسەڵات و تایبەتمەندییە دەستوریەکانی هەرێم وەک لە دەستوری هەمیشەیی عیراق جێگیر کراوە، لەمبارەیەوە بەڕێوەبەری گشتیی باجەکان و خانووبەرەی میریی هەرێمی کوردستان کە بۆ ئەم بڕگەیە میوانداریی کۆبوونەوەکە کرابوو، چەند پێشنیاز و راسپاردەیەکی هاوبەشی تایبەت بە رێکار و رێنماییەکانی باج و رێژەکانیان خستەڕوو کە پێشتر لەگەڵ دەستەی گشتی باجەکانی عیراق گفتوگۆیان لەسەر کردووە.
ئەنجومەنی وەزیران هاوئاهەنگیی و هاریکاریی فەرمانگە و دامەزراوەکانی باجی لە حکومەتی فیدراڵ و هەرێم بە گرنگ زانی و پشتیوانی لێ دەکات، لە هەمان کاتدا، ئەنجومەنی وەزیران دووپاتی کردەوە کە هەرێمی کوردستان وەک قەوارەیەکی فیدراڵیی، مافی پیادەکردنی دەسەڵات و تایبەتمەندییە داراییە دەستوریەکانی خۆی هەیە، بۆ ئەم مەبەستەش، ئەنجومەنی وەزیران وەزارەتی دارایی وئابوری و بەڕێوەبەرایەتی گشتی باجەکانی هەرێمی کوردستانی راسپارد کە بەم ئاراستەیە و لە چوارچێوەی دەستور، پەرە بە هاوئاهەنگیی و هاریکاریی و پەیوەندیەکانیان لەگەڵ هاوتاکانیان لە حکومەتی فیدراڵ بدەن.
لە بڕگەی سێیەمی کۆبوونەوەکەش، پرسی دەسپێکردنەوەی ساڵی نوێی خوێندن و ئامادەکارییەکان بۆ ئەو پڕۆسەیە گفتوگۆی لەبارەوە کرا.
دوای ئەوەی بە هەوڵی قوباد تاڵەبانی کێشە پزیشکییەکانی سنووری سلێمانی چارەسەرکرا، ئەمڕۆ دەست بە خەرجکردنی پارەی دەرمان کرا.
بەڕێوەبەرایەتی گشتیی تەندروستی سلێمانی دەڵێت: دوای ئەوەی لەسەر راسپاردەی قوباد تاڵەبانی، جێگری سەرۆکی ئەنجومەنی وەزیرانی هەرێم و ئاوات شێخ جەناب وەزیری دارایی بڕیاری چارەسەرکردنی کێشەی نەشتەرگەری و دەرمان و نەبوونی کەرەستەی پزیشکی لە سلێمانی درا ئەمڕۆ دەستکرا بە خەرجکردنی پارەکە.
لە راگەیەندراوەکەدا هاتووە، "بەمەش کێشەی نەشتەرگەری و دەرمان و نەبوونی کەرەستەی پێویستی پزیشکی لە سلێمانی تا کۆتایی ئەمساڵ کۆتاییهات".
ئەمڕۆ ئەنجومەنی وەزیرانی هەرێمی كوردستان بۆ تاوتوێكردنی سێ بابەت كۆدەبێتەوە، كە گرنگترنیان دواپێشهاتی دۆسیەی هەناردەكردنی نەوت و بابەتی داهاتە نانەوتییەكان و شایستە داراییەكانی مووچەخۆرانی هەرێمە.
فەرمانگەی میدیا و زانیاری هەرێم بڵاویكردەوە، ئەمڕۆ چوارشەممە، ئەنجومەنی وەزیرانی هەرێمی كوردستان بۆ تاوتوێكردنی سێ بڕگە كۆبوونەوەی ئاسایی خۆی ئەنجامدەدات.
لە بڕگەی یەكەمدا، ئەنجومەنی وەزیران، دواپێشهاتی دۆسیەی هەناردەكردنی نەوتی هەرێم و بابەتی داهاتە نانەوتییەكان و مووچە و شایستە داراییەكانی مووچەخۆرانی هەرێم گفتوگۆ دەكات.
لە بەشێكی دیكەی كۆبونەوەكەدا ئەنجومەنی وەزیران گفتوگۆ لەبارەی پرۆسەی یەكخستنەوەی ڕێكارە داراییەكان لەنێوان حكومەتی هەرێم و حكومەتی فیدراڵی، لەبارەی ڕێنماییەكانی باج و ڕێژەكانیان دەكات.
لە بڕگەی كۆتاییدا، پڕۆسەی دەستپێكی ساڵی نوێی خوێندن لە هەرێمی كوردستان، بۆ ساڵی 2025-2026 دەخرێتە ڕوو.
لە سنوری ئیدارەی راپەڕین دوو کەس بەتۆمەتی دزیکردن لە کارگەیەک دەستگیرکران، کە بە بەهای 25 هەزار دۆلار ئامێر و کەلوپەلیان دزیبوو.
بەڕیوەبەرایەتی پۆلیسی ئیدارەی راپەڕین لە راگەیەنراوێکدا بڵاویکردەوە،دوای ئەوەی هاووڵاتیەک لە نوسینگەی نەهێشتنی تاوانی پشدەر، سکاڵای تۆمارکرد کە بەوتەی خۆی "دزی لە کارگەکەی کراوە کە تایبەتە بە تێکەڵەکردن و ئامادەکردنی قیر و زیانەکانیشی 25 هەزار دۆلار دەخەمڵێندرێت، هێزەکانیان توانیان تۆمەتبارەکان دەستگیربکەن.
ئاماژەی بەوەشکردووە، دوای بەدواداچوون و بەدەستهێنانی زانیاری، توانیان هەردوو تۆمەتبارەکە دەستگیربکەن و لەکاتی لێکۆڵینەوە لەگەڵیاندا دانیان بە تاوانەکەیاندا ناوە، هەروەها بە وتەی خۆیان "ژمارەیەک بزوێنەر و کەلوپەلی تری کارگەکەیان دزیووە"
پۆلیسی راپەڕین ئەوەشی خستووەتەڕو، بەبڕیاری دادوەر و بە مادەی 443 لە یاسایی سزادانی عیراقی تۆمەتباران ڕاگیرکران، هاوکات بە هاوکاری بنکەی پۆلیسی حاجیاوا ژمارەیەک لە کەلوپەلە دزراوەکان دەستیان بەسەرداگیراوە و لێکۆڵینەوەش لەسەر روداوەکە بەردەوامە.
ئەنجومەنی وەزیرانی عیراق رازی بوو لەبری پارەی خەرجی بەرهەمهێنانی نەوت، نەوتی خاو بدرێت بە كۆمپانیاكان و رەزامەندی لەسەر ئەنجامدانی گرێبەستی سێقۆڵی لەنێوان بەغداد و هەولێر و كۆمپانیاكانیش دەربڕی.
نوسینگەی محەمەد شیاع سودانی سەرۆك وەزیرانی عیراق لە راگەیەنراوێكدا بڵاویكردەوە، ئەنجومەنی وەزیرانی عیراق لە كۆبوونەوەی هەفتانەی رۆژی سێشەممەدا دوو بڕگەی تایبەت بە نەوتی هەرێمی كوردستانی پەسەند كردووە.
لە بڕگەی یەكەمدا ئەنجومەنی وەزیران رازی بوو بەوەی كە لە بری پێدانی پارە بۆ تێچووی دەرهێنانی نەوت بە كۆمپانیا كە بۆ هەر بەرمیلێك بڕەكەی 16 دۆلارە، نەوتی خاویان پێبدرێت و بۆ خۆیان بیفرۆشن.
لە بڕگەی دووەمیشدا حكومەتی عیراق رەزامەندی دەربڕی لەسەر ئەنجامدانی گرێبەستێكی سێقۆڵی لەنێوان حكومەتی هەرێم و حكومەتی عیراق و كۆمپانیا نەوتییەكان.
ئاماژە بەوەشكراوە، ئەمیندانرێتی ئەنجومەنی وەزیران گرێبەستەكە بەرز دەكاتەوە بۆ لیژنەی راوێژكاریی وەزارەتی نەوتی عیراق و چاوەڕوان دەكرێت لیژنەكە لە ماوەی 48 سەعاتی داهاتوودا وەڵامی كۆتایی خۆی لەو بارەوە بداتەوە بە ئەنجومەنی وەزیران، تاوەكو گرێبەستە سێ قۆڵییەكە بە رەسمی ئەنجام بدرێت.
ئەوەش لە كاتێكدایە، رۆژی چوار شەممە ئەنجومەنی دەوڵەتی عیراق جارێكی تر كۆدەبێتەوە بۆ تەواوكردنی تاوتوێی یاسایی راپۆرتی لیژنەی یاسایی ئەنجومەنی وەزیران لەبارەی داهاتە نانەوتییەكانی هەرێم و دیاریكردنی پشكی هەردولا لە داهاتەكان.
کۆبوونەوەکانی هەرێم و ئەمەریکا تایبەت بە پرۆسەی چاکسازی پێشمەرگە بەردەوامن و هەردوولا جەخت لە خێراکردنی پڕۆسەکە دەکەنەوە.
ئەمڕۆ سێشەممە لە سەرۆکایەتیی هەرێمی کوردستان، گەڕێکی دیکەی کۆبوونەوە هاوبەشەکانی نێوان بەرپرسانی ژمارەیەک لە دامەزراوە پەیوەندیدارەکانی هەرێمی کوردستان و وەفدێکی سەربازی و دیپلۆماسی ئەمریکا، بۆ گفتوگۆکردن لەسەر پرۆسەی چاکسازی و رێکخستنەوەی هێزی پێشمەرگە بەڕێوە چوو.
لە کۆبوونەوەکەدا، شێخ جەعفەر شێخ مستەفا جێگری سەرۆکی هەرێمی کوردستان، سەرۆکی هەرێمەوە، سوپاسی رۆڵ و هەوڵەکانی ئەمریکا و هێزە هاوپەیمانەکانی لە پرۆسەکەدا کرد و بە کاریگەر لە قەڵەمی دان.
لە گفتوگۆکانی کۆبوونەوەکەشدا، وێڕای جەختکردنەوە لە گرنگی سەرخستنی پرۆسەی چاکسازی هێزی پێشمەرگە و پێویستیی یەکخستنەوەیان، دوا هەنگاوەکانی پرۆسەکە و ئەو قۆناغانەی کە ماون خرانەڕوو.
هەر لە کۆبوونەوەکەدا، هەوڵ و هەنگاوی هاوبەش بە ئاراستەی خێراکردنی پرۆسەکە و چارەسەرکردنی ئاستەنگەکانی بەردەمی دووپاتکرایەوە و بیروڕا سەبارەت بە فراوانکردنی هەماهەنگی و هاریکاری لە نێوان هەردوولادا، ئاڵوگۆڕ کرا.
سبەینێ ئەنجومەنی وەزیرانی هەرێم کۆدەبێتەوە و بەپێی کارنامەی کۆبوونەوەکە گفتوگۆ لەبارەی هەناردەکردنەوەی نەوت و داهاتە نانەوتییەکان و پرسی موچەی موچەخۆرانی هەرێم دەکرێت.
بەپێی نوسراوێکی رەسمی ئەنجومەنی وەزیرانی هەرێم کە دەست کوردسات نیوز کەوتووە، سبەینێ چوارشەممە، ئەنجومەنی وەزیرانی هەرێم کۆدەبێتەوە و لە بڕگەی یەکەمی کۆبوونەوەکە، پرسی هەناردەکردنەوەی نەوت و داهاتە نانەوتییەکان و پرسی موچەی موچەخۆرانی هەرێم گفتوگۆی لەبارەوە دەکرێت.
لە نوسراوەکەدا ئاماژە بەوەشکراوە، میکانیزم و رێکارەکانی جێبەجێکردنی پاپەندیی حکومەتی هەرێم و فیدراڵ، بەپێی بڕیاری نێوان هەردوو حکومەت ولێکتێگەیشتنی هاوبەشی پەسندکراوی نێوانیان، لەلایەن وەفدی دانوستانکارەوە دەخڕێتەڕوو.
هەر لە نوسراوەکەدا ئەوەش هاتووە، لەبڕگەی دووهەمی کۆبوونەوەکە، لەچوارچێوەی پڕۆسەی یەکخستنەوەی رێکارە داراییەکان لەنێوان حکومەت فیدراڵ و هەرێم لەبەر رۆشنایی کۆنووسی نێوان هەردوو حکومەت راسپاردەیەک دەخرێتەڕوو بۆ یەکخستنی رێکار و رێنماییەکانی باج و رێژەکانیان.
بەپێی زانیاری چەند سەرچاوەیەكی ئەمنی و ناوخۆیی، حكومەتی عیراق لە چەند رۆژی رابردوودا هێزی زیاتری رەوانەی شەنگال كردووە.
بەپێی ئەو سەرچاوانە كە بە "عەرەبی جەدید"یان وتووە، هێزەكان لە سوپا و پۆلیسی فیدراڵی پێكهاتوون و لە ناوچەكانی سنونی و خانەسور و قیلبت، تا سێگۆشەی پیشخاپوری سنوری بە ئاراستەی خاكی سوریا جێگیركراون و ئاڵای عیراقیان لەسەر باڵەخانەكان بەرزكردووەتەوە و خاڵی پشكنینی و بەربەستیشیان دروستكردووە.
لێپرسراوێكی سەربازیی سوپای عیراقیش رایگەیاندووە، بڵاوكردنەوەی ئەو هێزانە تەنها بۆ سەپاندنی هەژموونی دەوڵەت و یاسایە، هەرچەندە تا ئێستا ژمارەیان ئاشكرا نەكراوە كە لەلایەن حكومەتی عیراقەوە رەوانە كراون، بەڵام بەپێی زانیارییەكان هەزاران سەرباز دەبن، لەگەڵ ئۆتۆمبێلی سەربازیی.
دەزگای ئاسایشی هەرێمی کوردستان ئەمڕۆ رایگەیاند، لە ئۆپەراسیۆنێکی هاوبەشدا لەگەڵ دەزگا ئەمنییەکانی عیراق و سعودیە، دوو بازرگانی گەورەی ماددەی هۆشبەر لە شاری مەدینەی وڵاتی سعودیە دەستگیرکراون و دەست بەسەر بڕی 142 کیلۆگرام مادەی هۆشبەری جۆری "کریستاڵی شل"دا گیراوە.
دەزگای ئاسایشی هەرێم لە راگەیەندراوێکدا بڵاویکردەوە، دوای بەدواداچوونی ورد و کۆکردنەوەی زانیاری لەلایەن بەڕێوەبەرایەتی گشتیی نەهێشتنی ماددە هۆشبەرەکانەوە، توانراوە ئەو دوو بازرگانە بە 142 کیلۆگرام ماددەی هۆشبەرەوە دەستگیربکرێن. ئاماژەی بەوەشکردووە کە تۆمەتبارەکان خەڵکی پارێزگای سەڵاحەدینن و خاوەنی کۆمپانیای تایبەت بە حەج و عومرەن، کە ئەم کارەیان بۆ شاردنەوەی بازرگانییەکەیان بەکارهێناوە.
بەپێی راگەیەندراوەکە، ئەو دوو تۆمەتبارە ماوەی شەش ساڵە کاری بازرگانی ماددەی هۆشبەریان لەنێوان عیراق، سعودیە، تورکیا و چەند وڵاتێکی کەنداودا کردووە. لە رێگەی پاسەکانی گواستنەوەی عومرەکارانەوە و بە شێوازێکی شاراوە و بەکارهێنانی تەکنیکی جۆراوجۆر، ماددەکەیان گواستووەتەوە.
دەزگای ئاسایشی هەرێم جەختی کردەوە کە ئەم چالاکییە لەسەر بنەمای زانیاریی وردی بەڕێوەبەرایەتی گشتیی نەهێشتنی ماددە هۆشبەرەکانی سەر بە دەزگاکە و بە هەماهەنگیی باڵا لەگەڵ لایەنی سعودی ئەنجامدراوە، دوای ئەنجامدانی لێکۆڵینەوەکان دەرکەوت کە مادە هۆشبەرەکان لەدەروازەی سنوری (عەر عەر) گەیەنراوەتە ناو خاکی ووڵاتی سعودیە.
چاوەڕواندەكرێت سبەینێ ئەنجومەنی دەوڵەت تاوتوێكردنی یاسایی بۆ پرسی داهاتی نانەوتیی هەرێم تەواو بكات و ئەنجامەكەی رادەستی ئەنجومەنی وەزیرانی عیراق بكات، وەزیری سامانە سروشتییەكانی هەرێمیش دەڵێت، بەمنزیكانە كێشە و ئاستەنگەكانی بەردەم هەناردەكردنەوەی نەوتی هەرێم چارەسەر دەكرێن.
پەیامنێری كوردسات نیوز لە بەغداد رایگەیاند، چاوەڕوان دەكرێت سبەینێ ئەنجومەنی دەوڵەت تاوتوێكردنی یاسایی پرسی داهاتی نانەوتیی هەرێم تەواو بكات و ئەنجامەكەی بەر لە كۆبوونەوەی سبەینێی ئەنجومەنی وەزیرانی عیراق ئاراستەی ئەنجومەنەكە بكات، تاكو لە كۆبوونەوەكەدا بخرێتە بەر باس و بڕیاری لەبارەوە بدرێت.
ئەوەشی خستەڕوو، ئەگەر ئەنجومەنی دەوڵەت بەر لە كۆبوونەوەی ئەنجومەنی وەزیرانی عیراق كارەكانی تەواو نەكات، ئەوا پێشبیندەكرێت لە رۆژانی چوارشەممە و پێنجشەممەی داهاتوو كارەكانی تەواو بكات و راو بۆچوونی خۆی لەو بارەوە بخاتە بەردەم ئەنجومەنی وەزیران.
هاوكات، كەمال محەمەد وەزیری سامانە سروشتییەكانی هەرێم بە وەكالەت لە پەراوێزی دیدارێكیدا لەگەڵ لیوجیون كونسوڵی چین لە هەرێم رایگەیاند، بەمنزیكانە كێشە و ئاستەنگەكانی بەردەم هەناردەكردنەوەی نەوتی هەرێم چارەسەر دەكرێن.
ئەوەش لەكاتێكدایە، یەكلایی نەكردنەوەی دۆسییەی داهاتی نانەوتی و دەستپێنەكردنەوەی هەناردەی نەوتی هەرێم، بوونەتە بەربەست لەبەردەم خەرجكردنی مووچەی مووچەخۆرانی هەرێم لەلایەن حكومەتی عیراقەوە.
مەکتەبی سیاسی یەکێتیی نیشتمانیی کوردستان بەبۆنی کۆچی دوای ئاکۆ عەباس ئاغا سەرۆکی عەشیرەتی ئاکۆ پرسەنامەیەکی خانەوادە و کەسوکاری ئاکۆی عەباس ئاغا کرد.
دەقی پرسەنامەکەی مەکتەبی سیاسی یەکێتیی نیشتمانیی کوردستان.......
بەڕێزان/ خانەوادە و کەسوکاری کاک ئاکۆی عەباس ئاغا
بۆ کۆچی دوایی کەسایەتی ناسراوی کۆمەڵایەتی دەڤەری ڕاپەڕین ، کاک ئاکۆی عەباس ئاغا، لەناخی دڵەوە پرسە و ماتەمی خۆمان ئاڕستەی بەڕێزتان وگشت بنەماڵە سەربەرزەکەتان دەکەین.
لەیەزدانی مەزن داواکارین کۆچکردوو بە بەهەشتی بەرین شاد بکات و ئارامی بەگشت لایەک ببەخشێت.
انا للە وانا الیە راجعون
مەکتەبی سیاسی
یەکێتیی نیشتمانیی کوردستان
بافڵ جەلال تاڵەبانی سەرۆکی یەکێتیی نیشتمانیی کوردستان پرسەنامەیەک ئاڕاستەی خانەوادە و کەسوکاری ئاکۆی عەباس ئاغا دەکات.
دەقی پرسەنامەکە
لە دڵەوە غەمباربووین بە کۆچی دوایی کاک ئاکۆ عەباس ئاغا، سەرۆکی عەشیرەتی ئاکۆ.
کاک ئاکۆ عەباس ئاغا، دۆستی دێرینی سەرۆک مام جەلال و کەسایەتییەکی کۆمەڵایەتی و خۆشەویستی هەموولایەک بوو کە لە قۆناغە سەختەکانی خەباتی کوردایەتی خۆی و بنەماڵە تێکۆشەرەکەیان و عەشیرەتی سەربەرزی ئاکۆ، بەشدار و هاوکاری شۆڕش بوون.
بۆ لەدەستدانی کاک ئاکۆ پرسە و سەرەخۆشی خۆمان ئاڕاستەی کەسوکارە سەربەرزەکەیان دەکەم و هاوبەشی ماتەمیانم، خوای گەورە گیانی کۆچکردوو بە بەهەشتی بەرین شادبکات و سەبووریش بە هەمووان ببەخشێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
كاروان گەزنەیی وتەبێژی یەكێتیی نیشتمانی كوردستان سەردانی پارێزگای كەركوكی كردو لەلایەن رێبوار تەها پارێزگاری شارەكە پێشوازی لێكرا.
لە دوای كۆبونەوەی نێوانیان پارێزگاری كەركوك لە كۆنفرانسێكی رۆژنامەوانیدا رایگەیاند، "یەكێتی هەمیشە پشتیوانی كەركوكیەكان بووە".
لای خۆشییەوە كاروان گەزنەیی وتەبێژی یەكێتی نیشتانی كوردستان رایگەیاند، سیاسەتی ئێستای سەرۆكی یەكێتی ئەوەیە كە خزمەتی هە موو پێكهاتەكانی كەركوك بكەین بەبێ جیاوازی.
دوو تۆماتبار بەتۆمەتی دزینی زیاتر لە 120 ملیۆن دینار و نزیکەی 60 مسقاڵ زێڕ لە قەزای چەمچەماڵ دەستگیرکران.
بەڕێوەبەرایەتی پۆلیسی سلێمانی بڵاویکردەوە، دوای ئەوەی هاووڵاتیەک سکاڵای تۆمارکردوە کە بڕی 126 ملیۆن دینار و نزیکەی 60 مسقاڵ زێڕی لێ دزراوە ، دەستبەجێ مەفرەزەکانی نوسینگەی نەهێشتنی تاوانی چەمچەماڵ دەستیان بە لێکۆڵینەوە و بەدواداچوون دەستپێکردوە.
ئاماژەی بەوەشکردوە، پاش وەرگرتنی بڕیاری دادوەر توانرا هەردوو تۆمەتبار دەستگیربکرێن، هەروەها دەستبەسەر بڕێک پارەش گیراوە.
لە بڵاوکراوەکەی بەڕێوەبەرایتی پۆلیسدا هاتووە، تۆمەتباران (ب، ع، ع لەدایکبووی ساڵی 1999 - م، م، إ لەدایکبووی ساڵی 2000 ) دانیان بەتاوانەکەیاندا ناوە و لەئێستادا بەبڕیاری دادوەر و بەپێی ماددەی 443 لەیاسای سزادان سزاگیراون و لێکۆڵینەوە لەدۆسیەکە بەردەوامە.
د. نەرمین مەعروف ئەندامی ئەنجومەنی نوێنەرانی عیراق میوانی پانۆرامایە و باس لە نوێترین زانیاری دەکات سەبارەت بە کێشەکانی نێوان هەرێم و بەغداد.
د.نەرمین مەعروف دەڵێت، ماددەی 29ی یاسای ئیدارەدانی عیراق کۆنکریتی نیە.
رایگەیاند، لەئێستادا پرسی موچەی هەرێم زیاتر وابەستەی داهاتی نانەوتییە, هەروەها گرنگە هەرێم پاپەندی ئەرکەکانی بێت بەرانبەر عیراق.
دەشڵێت، حکومەتی فیدراڵی عیراق دەیەوێت هەرێم بەشداربێت لە داهاتی عیراق، هەروەها تەیف سامی وەزیری دارای عیراق دەیەوێت کێشەکان چارەسەر بکرێن و نایەوێت یاسا پیشێل بکات.
وتیشی، سەرۆک بافڵ نوێنەری هەرێم بوو لە رێککەوتنی 17ی تەمموز.
محەمەد عەبدولرەحمان پەیامنێری کوردسات نیوز لە بەغداد رایگەیاند: کەمێك بەر لە ئێستا کۆبونەوەیەکی گرنگ و فراوان لە نێوان سێ وەزیری کورد لە حکومەتی عیراق و بەرپرسێکی باڵا لە نێو ئەنجومەنی وەزیرانی عیراق، لەگەڵ وەفدی باڵای حکومەتی هەرێمی کوردستان گفتوگۆیان کردوە و بڕیاردراوە لە چەند رۆژی داهاتوود، هەناردەی نەوتی هەرێمی کوردستان دەستپێبکاتەوە و نەوتەکە رادەستی کۆمپانیای سۆمۆ بکات.
بەپێی زانیارییەکان، وەفدی حکومەتی هەرێم پێکهاتبوون لە دکتۆ ئامانج رەحیم، سکرتێری ئەنجومەنی وەزیرانی حکومەتی هەرێمی کوردستان و ئومێد سەباح سەرۆکی دیوانی حکومەت و کەمال محەمەد وەزیری سامانە سروشتییەکان و پشتیوان سادق وەزیری ئەوقاف و عەبدولحەکیم خەسرەو بەرپرسی هەماهەنگی و بەدواداچون لە ئەنجومەنی وەزیرانی هەرێم.
پەیامنێری کوردسات نیوز وتیشی:ئەمڕۆ مۆڵەتی حکومەتی هەرێمی کوردستان بۆ کۆمپانیا نەوتییەکان لە پێناو دەستپێکردنەوە بە هەناردەکردنەوەی نەوتی هەرێم کۆتاییهات، حکومەتی هەرێم بە کۆمپانیا نەوتییەکانی وتوە کە بڕی ئێستای نەوتی بەرهەمهێنراو رادەستی کۆمپانیای سۆمۆ دەکات، بە گلدانەوەی 50 هەزار بەرمیل نەوت بۆ پێداویستی ناوخۆی هەرێم، بەو مەرجەی حکومەتی عیراق گرفت بۆ داهاتی نانەوتی دروست نەکات و راستەوخۆ لە مووچەی مانگی حەوتەوە، تەمویلی مووچەخۆرانی هەرێمی کوردستان بکرێت.
محەمەد عەبدولرەحمان وتیشی: وەفدی هەرێم رەزامەندی حکومەتی هەرێمی کوردستانیان بە بەرپرسە کوردەکان گەیاندوە بۆ رادەستکردنی نەوتی بەرهەمهێنراوی هەرێمی کوردستان بە حکومەتی عیراق، کە رەزامەندی ئەنجومەنی وەزیرانی هەرێمی کوردستانیشی لەسەرە.
بەپێی زانیارییەکان، حکومەتی هەرێمی کوردستان، بڕیاریداوە رێبوار هادی کە سەرۆکی لیژنەی یاساییە لە ئەنجومەنی نوێنەرانی عیراق، نوێنەرایەتی حکومەتی هەرێمی کوردستان دەکات لە کۆبونەوەکەی ئەنجومەنی دەوڵەت، سەبارەت بە دەرکردنی روونکردنەوەیەك لەلایەن ئەنجومەنی دەوڵەتەوە تایبەت بە داهاتە نانەوتییەکان.