کوردستان
قوباد تاڵەبانی جێگری سەرۆکوەزیرانی هەرێمی کوردستان لە دیوانی ئەنجوومەنی وەزیران پێشوازی لە ئەکیرا ئیندۆ باڵیۆزی نوێی ژاپۆن لە عێراق کرد.
لە کۆبوونەوەکەدا کە ئەمڕۆ چوارشەمە بە ئامادەبوونی ئەراکاوا میکیهیرۆ کونسوڵی گشتیی ژاپۆن لە هەرێم بەڕێوەچوو، گفتوگۆ لەبارەی چۆنییەتی پەرەپێدانی پەیوەندییەکانی نێوان ژاپۆن و هەرێمی کوردستان و چەند پرسێکی دیکەی جێی بایەخی هەردوولا کرا.
لە میانەی کۆبوونەوەکەدا، جێگری سەرۆکوەزیران پیرۆزبایی دەستبەکاربوونی لە باڵیۆزی نوێی ژاپۆن کرد و هیوای خواست لە ماوەی ئەرکەکەیدا لە عیراق، پەیوەندییەکانی نێوان هەرێمی کوردستان و وڵاتی ژاپۆن بەرەوپێشچوونی زیاتر بەخۆیەوە ببینێت، هەروەها بەبۆنەی کۆتاییهاتنی ئەرکەکەی لە هەرێم، ماڵئاوایی لە کونسوڵی گشتیی ژاپۆن کرد و هیوای سەرکەوتنی بۆ خواست لە ئەرکی داهاتوویدا.
لە لایەکی دیکەوە، جێگری سەرۆکوەزیران سوپاسی حکومەتی ژاپۆنی کرد بۆ هەموو هاوکارییەکانی لە هەرێمی کوردستان، بە تایبەتیش جێبەجێکردنی پڕۆژەی ئاوی هەڵەبجە و یارمەتیدانی مۆزەخانەی سلێمانی و گەڕاندنەوەی کۆمەڵێک شوێنەواری مێژوویی بۆ مۆزەخانەی سلێمانی.
بەپێی راگەیاندراوەکە، لە کۆبوونەوەکەدا هەردوولا جەختیان کردەوە لەسەر پێویستیی پەرەپێدانی پەیوەندییەکانی نێوان هەرێم و وڵاتی ژاپۆن لە بوارە جیاوازەکاندا، لەم چوارچێوەیەدا قوباد تاڵەبانی داوای کرد، حکومەتی ژاپۆن لە پەرەپێدانی تواناکانی گەنجان لە بوارەکانی تەکنەلۆژیا و کارسازییدا هاوکاری هەرێمی کوردستان بکات.
فەرماندەی گشتیی هەسەدە رایگەیاند، هەڵوێستی دەسەڵاتدارانی ئێستای دیمەشق لەژێر كاریگەریی توركیادایە و شەڕی وڵاتەكەش دژی باكوور و رۆژهەڵاتی سوریا توندتر بووەتەوە.
مەزڵوم كۆبانێ، فەرماندەی گشتیی هێزەكانی سوریای دیموكرات 'هەسەدە' لە لێدوانێكدا بۆ تەلەفیزیۆنی بی بی سی رایگەیاند، تاوەکو ئێستا لەگەڵ دەسەڵاتدارانی نوێی سوریا لە دیمەشق نەگەیشتوونەتە رێككەوتن، چونكە دیمەشق لە ژێر فشار و كاریگەریی توركیادایە.
كۆبانێ وتوویەتی، رون نییە هەڵوێستی دیمەشق دوای فشارەكانی توركیا بەرانبەر كورد و خۆسەریی لە باكور و رۆژهەڵاتی سوریا چۆن دەبێت، بەڵام لێدوان و هەڵوێستەكانی دەسەڵاتدارانی سوریا تاوەکو ئێستا ئەرێنیی بووە.
بە وتەی فەرماندەی گشتیی هەسەدە، ئەمریكا و فەڕەنسا هەندێك وڵاتی عەرەبی خوازیاری ئەوەن دیمەشق پابەندی مافەكانی كورد بێت لە سوریا.
ئاماژەی بەوەش كردووە، ئەگەر توركیا ئۆپەراسیۆنی سەربازیی دژی رۆژئاوای كوردستان ئەنجام بدات، ئەوان ناچارن تاكتیكی سەربازیی خۆیان بگۆڕن و رەنگە ئەوەش ببێتە هۆی هەڵاتنی زیندانیكراوانی داعش لە هەندێك ناوچەی ژێر دەسەڵاتی ئەوان.
کارەبای سلێمانی رایگەیاند، بۆ مانگی رەمەزان بەرنامەی کارکردنی مووەلیدە ئەهلییەکان دەگۆڕێت و کاتی کارکردنیان زیاد دەکرێت.
بەڕێوەبەرایەتی گشتیی کارەبای سلێمانی رایگەیاندووە، لە یەکەم رۆژی مانگی رەمەزانەوە بەرنامەی کارکردنی مووەلیدەکان دەگۆڕێت و لە پارشێوەوە کاردەکەن.
ئاماژەی بەوەشکردووە، رۆژانە مووەلیدەکان لە سەعات 1ی نیوەڕۆ تاوەکو 1ی شەو کاردەکەن و لە 1ی شەوەوە مووەلیدەکانیان دەکوژێننەوە.
ئاماژەی بەوەشکردووە، لە سەعات 3 و 30 خولەکی شەوەوە مووەلیدەکان دادەگیرسێن تاوەکو 8ی بەیانی و بە درێژایی مانگی رەمەزان بەرنامەی کارکردنیان بەو جۆرە دەبێت.
هەفتەی داهاتوو مانگی رەمەزان دەستپێدەکات و بە ئەگەری زۆرەوە 1ی ئازار، یەکەم رۆژی مانگی رەمەزان دەبێت.
بڕیارە سبەینێ وفدەكەی دەمپارتی سێیەمین دیدار لەگەل ئۆجەلان ئەنجام بدات و ئەحمەد تورك سیاسەتمەداری كوردیش دوایی 16 ساڵ سەردانی ئیمراڵی دەكات.
سەرچاوەكانی هەواڵی توركیا بڵاویانكردوەتەوە وەفدەكەی دەم پارتی كە پێكهاتووە لە پەرلەمانتارانی دەم پارتی "پەروین بۆڵدان و سورەیا ئۆندەر "سبەینێ سەردانی ئیمراڵی دەكەن و ئەحمەد تورك سیاتمەداری كوردیش سەردانی ئیمراڵی دەكات و چاوی بە ئۆجەلان دەكەوێت.
هاوكات ئایشەگوڵ دۆغان وتەبێژی دەمپارتی ڕایگەیاند، وەفدەكەی دەمپارتی بۆ ئەنجامدانی دیدار لەگەل عەبدوڵا ئۆجەلان سەردانی وەزارەتی دادی توركیایان كردووە و داواشیان كردووە ئەحمەد تورك لە ناو وەفدەكەدا جێ بگرێت بەڵام تا ئێستا وەزارەتی داد وەڵامی نەداوەتەوە
ئەمە لە كاتێكدایە كە ئەحمەد تورك و ئایلا ئاكات ئاتا، لە ساڵی ٢٠٠٩ وەك یەكەمین پەرلەمانتارانی كورد سەردانی ئیمراڵییان كردو و لەگەڵ ئۆجەلان كۆبوونەوە .
وەزارەتی ئەوقاف و کاروباری ئایینی چەند رێنمایی و بڕیارێکی تایبەت بە مانگی رەمەزان بڵاوکردەوە و تیایدا هاتووە، لە مانگی رەمەزاندا و لەبەر بارودۆخی رۆژووەوانان 15 بۆ 20 خولەک دوای بانگ، نوێژی شەوان ئەنجام دەدرێت.
دەقی رێنماییەکان:
1.پێویستە چێشتخانە و كافتریار و دوكان و بازاڕەكان رێزی ئەم مانگە بگرن و هەستی رۆژووەوانان بپارێزن.
2.لەم مانگەدا هیچ جۆرە خواردن و خواردنەوەیەك لە دامودەزگا فەرمییەكان پێشكەش ناكرێت.
3.پێویستە گشت كەناڵەكانی راگەیاندن تایبەتمەندی ئەم مانگە لەبەرچاو بگرن شتێك بڵاو نەكەنەوە، كە لەگەڵ گەورەیی و پیرۆزی ئەم مانگەنە گونجێت.
4.سەرجەم كەناڵەكانی راگەیاندن بەرپرسن لە هەر هەواڵێكی نادروست سەبارەت بە راگەیاندنی یەكەم رۆژ و كۆتا رۆژی مانگی رەمەزان.
5.لەكانی پێشكەشكردنی بابەتی ئایینی دەبێت كەسێكی پسپۆڕ لەبواری ئایینی و مامۆستایانی ئایینی كە بە فەرمی كار دەكەن میوانداری بكرێن.
6.تەنها پێش نوێژ و وتارخوێنی فەرمی مزگەوت بۆی هەیە مەراسیمە ئایینیەكان و بەتایبەتی تەراویح ئەنجام بدات، بەپێچەوانەوە هیچ كەسێك بۆی نییە چالاكی ئەنجام بدات.
6.رێنمایی تایبەت بەمزگەوت و مامۆستایانی ئایینی لە وەزارەتی ئەوقاف و كاروباری ئایینی دەرچووە، پێویستە گرنگی جێبەجێكردن و پراكتیزەكردنی ناوەڕۆكی بدرێت.
7. لە مانگی رەمەزاندا 15 بۆ 20 خولەک پاش بانگدانی شەوان نوێژ ئەنجام دەدرێت، لەبەر بارودۆخی رۆژووەوان، پێویستە رەچاوی كاتی گونجاو بكرێت لەرووی درێژی و كورتی تەراویح، هەروەها لەسەر بنەمای شەرعی ئەنجام بدرێت.
8.هەر مەراسیمێكی تایبەت بەم مانگە ئەنجام بدرێت لەسەرجەم پارێزگا و ئیدارە سەربەخۆكان و قەزا و ناحیەكان پێویستە لەژێر چاودێری وەزارەتی ئەوقاف و كاروباری ئایینی/ یان بەڕێوەبەرایەتیە گشتیەكان/ بەڕێوەبەرایەتییەكانی ئەوقاف بێت.
9.داواكارین لایەنەكانی پەیوەندیدار لە پارێزگا و یەكە ئیداریە سەربەخۆكان سەرپەرشتی و بەدواداچوونی جێبەجێكردنی ئەم رێنماییانە بكەن.
وەزارەتی ئەوقاف راشیگەیاندووە، "پێویستە وتارەكانی دوای عەسر بە لەبەرچاوگرتنی دۆخی گشتی رۆژووەوان لە 20 بیست خولەك زیاتر نەبێت و تەنها لەلایەن مامۆستای مزگەوتەوە پێشكەش بكرێت، بەبەكارهێنانی میكرۆفۆنی ناوخۆیی مزگەوت، کە تیایدا تیشك دەخاتە سەر بابەتەكانی ئەحكام و عیبادات و معاملات و بابەتی پەروەردەیی هۆشیاری هەڵمەتی (بەرەنگاربوونەوەی ماددە هۆشبەرەكان، كاریگەری کارتێکەرە عەقڵییەكان و پێكەوەژیان)".
ئەوەشی خستووەتە روو، تەنها لە 10 شەوی كۆتایی مانگی رەمەزان دەرگای مزگەوتەكان كراوە دەبن تاوەکو نوێژی بەیانی، بەمەرجێك رەزامەندی پێش نوێژ و وتارخوێنی مزگەوتی لەسەر بێت.
وەزارەتی ئەوقاف دەشڵێت، "پابەندی تەواو بە فەتوای دیاریكردنی نیسابی زەكات و بڕی سەرفترە و فیدیە گرنگە، كە لەلایەن ئەنجومەنی باڵای فەتوای یەكێتی زانایانی ئایینی ئیسلامیی كوردستانەوە دیاری دەكرێت".
هەفتەی داهاتوو و بە ئەگەری زۆرەوە رۆژی 1ی ئازار، یەکەم رۆژی مانگی رەمەزان دەبێت بۆ ساڵی 2025.
مانگی رەمەزان یەکێکە لە مانگەکانی ساڵنامەی کۆچی، کە مانگێکە تیایدا موسوڵمانان بەرۆژوو دەبن و ئەرکە ئایینییەکانیان جێبەجێ دەکەن.
بەپێی دوایین ئاماری سەرژمێری عیراق، رێژەی هەژاری لە هەرێم کەمترین رێژەیە بەراورد بە پارزێگاکانی دیکەی عیراق و لە هەرێمیشدا هەولێر کەمترین رێژەی هەژاری تێدایە.
بەپێی ئامایر سەرژمێری، رێژەی هەژاری لە پارێزگای هەولێر بە 6٪ کەمترین رێژەیە، بەدوای ئەویشدا پارێزگای سلێمانی بە 8٪ لە پلەی دووەمدایە.
بەپێی ئامارەکە، دهۆک زۆرترین ریژەی هەژاری تێدایە لەناو پارێزگاکانی هەرێمدا و رێژەکەی گەیشتووەتە 15٪.
لەلایەکی دیکەوە پارێزگاکانی دیکەی عیراق رێژەکانیان بەراورد بە هەرێم بەرزترە و هەندێکیان دووهێندە یان زۆر زیاترن.
ئامارەکە بەم جۆرەیە:
موسەنا 44٪
بابل 34٪
قادسیە 29٪
نەجەف 25٪
بەسڕە 28٪
ئەنبار 21٪
کەربەلا 20٪
سەڵاحەدین و واست 19٪
دیالە 17٪
نەینەوا و میسان 16٪
بەغداد و زیقار 14٪
کەرکووک 10٪
ئەمڕۆ لە پیرمام، بۆ گفتوگۆكردن لەبارەی پێكهێنانی كابینەی نوێی حكومەتی هەرێم، وەفدی دانوستانكاری یەكێتی و پارتی كۆدەبنەوە.
ئەمڕۆ چوارشەممە، بۆ جاری سێیەم بۆ تاوتوێكردنی رەشنووسی ستراتیژی نێوانیان لەسەر پێكهێنانی كابینەی نوێی حكومەتی هەرێم، وەفدی دانوستانكاری یەكێتی و پارتی لە پیرمام كۆدەبنەوە.
وەفدی دانوستانكاری یەكێتی بە سەرۆكایەتی قوباد تاڵەبانی دەبێت و لە كۆبوونەوەكەدا گفتوگۆ لەبارەی دوایین خاڵەكانی رەشنووسی ستراتیژی نێوان هەردوولا دەكرێت، كە پێشتر لەلایەن تیمی تەكنیكی هاوبەشی هەردوولاوە ئامادەكراوە.
كۆبوونەوەی یەكەم و دووەمی وەفدی دانووستانكاری یەكێتی و پارتی لەسەر پێكهێنانی كابینەی نوێی حكومەتی هەرێم لە سلێمانی بەڕێوەچووە و لەدوای بەڕێوەچوونی كۆبوونەوەی دووەمیش، یەكێتی و پارتی لە راگەیەنراوێكی هاوبەشدا بڵاویانكردەوە، كۆبوونەوەكانیان بەردەوام دەبێت، بۆ زیاتر لێكتێگەیشتن و داڕشتنی بەرنامەیەكی هاوبەش، كە لە بەرژەوەندی هاووڵاتیانی هەرێمی كوردستاندا بێت.
پێشتریش قوباد تاڵەبانی رایگەیاندبوو، لەسەر هەندێک خاڵ رێککەوتوون، لەسەر هەندێک خاڵی دیکە خەریکن دەگەنە رێککەوتن و لێکتێگەیشتنیشیان هەیە بۆ چەند خاڵێکی دیکە.
دوای بەدواداچوونێکی کوردسات نیوز لەسەر ئەو ئەفسەرە کوردەی سوپای عیراق کە بە تۆمەتی پاڵپشتیکردنی جوتیارانی کورد لە کەرکوک دەستگیرکرابوو، شەوی رابردوو ئازاد کرا.
پەیامنێری کوردسات نیوز ئەوەی خستە روو، عەقید رێبەر مزوری بە تۆمەتی پاڵپشتیکردنی جوتیارانی کورد لە رووداوی گرژییەکەی نێوان جوتیاران و سوپای عیراق لە گوندی شەناغەی سنووری سەرگەڕان دەستگیر کرابوو.
ئاماژەی بەوەشکرد، دوای بەدواداچوونی کوردسات نیوز، بەرپرسانی سنوورەکە هەوڵی جدییان دا و شەوی رابردوو ئازاد کرا.
لەلایەکی دیکەوە جێگری سەرۆکی ئەنجومەنی نوێنەرانی عیراق باسی لەوەکرد، دوای ئازادکردنی پلەکەشی بەرزکراوەتەوە بۆ موقەدەمی لیوا.
بەپێی زانیاریەکانی کوردسات نیوز ئەفسەرە کوردەکە دوای ئەوەی چەند رۆژێک لە سەربازگەی k1 دەستبەسەر بوو، گوازرابووەوە بۆ بارەگای فرقەی 8ی سوپا.
بۆ گفتوگۆكردن لەبارەی پێكهێنانی كابینەی نوێی حكومەتی هەرێم، سبەینێ وەفدی دانوستانكاری یەكێتی و پارتی لە پیرمام كۆدەبنەوە.
پەیامنێری كوردسات نیوز راگەیاند، سبەینێ بۆ جاری سێیەم وەفدی دانوستانكاری یەكێتی و پارتی لە پیرمام كۆدەبنەوە، بۆ تاوتوێكردنی رەشنووسی ستراتیژی نێوانیان لەسەر پێكهێنانی كابینەی نوێی حكومەتی هەرێم.
ئەوەشی خستەڕوو، وەفدی دانووستانكاری یەكێتی بە سەرۆكایەتی قوباد تاڵەبانی دەبێت و لە كۆبوونەوەكەدا گفتوگۆ لەبارەی دوایین خاڵەكانی رەشنووسی ستراتیژی نێوان هەردوولا دەكرێت، كە پێشتر لەلایەن تیمی تەكنیكی هاوبەشی هەردوولاوە ئامادەكراوە.
كۆبوونەوەی یەكەم و دووەمی وەفدی دانووستانكاری یەكێتی و پارتی لەسەر پێكهێنانی كابینەی نوێی حكومەتی هەرێم لە سلێمانی بەڕێوەچووە و لەدوای بەڕێوەچوونی كۆبوونەوەی دووەمیش، یەكێتی و پارتی لە راگەیەنراوێكی هاوبەشدا بڵاویانكردەوە، كۆبوونەوەكانیان بەردەوامی دەبێت، بۆ زیاتر لێكتێگەیشتن و داڕشتنی بەرنامەیەكی هاوبەش، كە لە بەرژەوەندی هاووڵاتیانی هەرێمی كوردستان بێت.
ئەو ئەفسەرە کوردەی بە تۆمەتی پاڵپشتیکردنی جوتیارانی کورد لە ناحیەی سەرگەڕان دەستگیرکرا تا ئێستا ئازاد نەکراوە.
عەقید رێبەر مزوری تاکە ئەفسەرە کوردەکەی فرقەی 8ی سوپای عیراق کە لەگەڵ دروست بوونی گرژیەکانی گوندی شەناغە لە ناحیەی سەرگەڕان، بەتۆمەتی پاڵپشتی کردنی جوتیارانی کورد، زیندانی کرا تا ئێستا ئازاد نەکراوە.
بەپێی زانیاریەکانی کوردسات نیوز ئەفسەرە کوردەکە دوای ئەوەی چەند رۆژێک لە سەربازگەی k1 دەستبەسەر بوو، ئێستا گوازراوەتەوا بۆ بارەگای فرقەی 8 ی سوپا و تا ئێستاش دەستبەسەرە.
کەیسەکەی عەقید رێبەر رەوانەی دادگا کراوە بە پێی مادەی 67 دادگایی دەکرێت، سزای یاسای مادەی 67 ئەگەر هەیە لە رۆژێکەوە تا 3 ساڵ زیندانی بکرێت.
ئیدارەی خۆبەڕێوەبەری لە باکور و رۆژهەڵاتی سوریا دووپاتی کردەوە، "کۆنفرانسی دیالۆگی نیشتمانیی سوریا" کە لە دیمەشق بەڕێوەچوو نوێنەرایەتی گەلی سوریا ناکات و ئێمە نابینە بەشێک لە جێبەجێکردنی دەرەنجامەکانی.
ئیدارەی خۆبەڕێوەبەری لە باکور و رۆژهەڵاتی سوریا لە راگەیەنراوەکەدا ئاماژەی بەوە کردووە، ئەو لیژنەیەی کە بۆ ئامادەکاری بۆ کۆنفرانسەکە پێکهێنرابوو، نوێنەرایەتی پێکهاتەکانی گەلی سوریا نەکردووە.
ئاماژەی بەوەشکردووە، “لە دوای رووخانی رژێمی بەعس لە سوریا، گەلەکەمان بە گشتی و بە هەموو پێکهاتەکانیەوە، داوای بنیاتنانی سوریایەکی یەکگرتوومان کردووە بۆ سەرجەم لایەن و پێکهاتەکان بەبێ دوورخستنەوە یان پەراوێزخستن.
ئیدارەی خۆبەڕێوەبەری ئەوەشی خستۆتەڕوو، ئامانجی ئێمە لە سەرەتای شۆڕشی سوریاوە، رزگارکردنی کۆمەڵگەی سوری بووە لە نادادپەروەری و دەستدرێژی و سیاسەتی دوورخستنەوە و پەراوێزخستن، لەم چوارچێوەیەدا دەستپێشخەری گرنگمان هەبووە و ئەمڕۆش داواکارییەکانمان نوێ دەکەینەوە، بۆ ئەوەی کۆنفرانسی دیالۆگی نیشتمانی راستەقینە بەڕێوەبچێت، کە نوێنەرایەتی هەموو سورییەکان بکات، و هیچ لایەنێک پەراوێز نەخرێت.
قوباد تاڵەبانی، جێگری سەرۆک وەزیران پێشوازیکرد لە وەفدێکی رەوەندی عیراقی لە ئەمریکا بە سەرۆکایەتیی مارتن مەننا، سەرۆکی ژووری بازرگانیی کلدانی – ئەمریکی و لە کۆبوونەوەی نێوانیاندا چۆنییەتی بە‌هێزکردنی پەیوەندیی و هەماهەنگی نێوان هەردوولا و دۆخی کریستیانەکان لە هەرێمی کوردستان و عیراق و چەند پرسێکی دیکە تاوتوێکران.
لە تەوەرێکی کۆبوونەوەکەدا کە رۆژی سێشەممە (25/2/2025) بەڕێوەچوو، باس لە دۆخی کریستیانەکان لە هەرێمی کوردستان و عیراق کرا و وەفدی رەوەندی عیراقی لە ئەمریکا ستایشی حکومەت و دانیشتووانی هەرێمی کوردستانیان کرد کە بەردەوام پشتگیرییان لە پێکهاتەی کریستیان و بە تایبەتیش کلدانییەکان کردوە. لەم چوارچێوەیەدا قوباد تاڵەبانی ئاماژەی بە گرنگیی قوڵکردنەوەی گیانی پێکەوەژیان کرد لە کوردستان و رایگەیاند کوردستان وەک هەمیشە وڵاتی پێکەوەژیانی ئاشتییانەی نێوان هەموو پێكهاتەکان دەمێنێت و رۆڵ و پێگەی مێژوویی کریستیانەکانی لە هەرێمی کوردستان بەرز نرخاند.
لە بەشێکی دیکەی کۆبوونەوەکەدا لەبارەی چۆنییەتی بەهێزترکردنی پەیوەندی و هەماهەنگیی بازرگانی نێوان هەرێمی کوردستان و رەوەندی عیراقی لە ئەمریکا گفتوگۆکرا، لەمبارەیەشەوە جێگری سەرۆک وەزیران ئامادەیی خۆی دەربڕی بۆ پێشکەشکردنی هەموو جۆرە کارئاسانییەک بۆ کاری وەبەرهێنان لە هەرێمی کوردستان.
هەر لە کۆبوونەوەکەدا باس لە ئاڵنگارییەکانی بەردەم ئاوەدانکردنەوەی موسڵ کرا و لەمبارەیەشەوە قوباد تاڵەبانی جەختی کردەوە کە هەرێمی کوردستان و وەبەرهێنەرانی کوردستان ئامادەن بۆ هەموو جۆرە هاوکارییەک لەگەڵ حکومەتی فیدراڵ و ئەو وەبەرهێنەرانەی دەیانەوێت لە پرۆسەی ئاوەدانکردنەوەی موسڵدا بەشداری بکەن.
جێگری سەرۆکی ئەنجومەنی وەزیران دەڵێت، " بە هەموو توانامانەوە پشتیوانی براکانمان لە رۆژئاوای کوردستان دەبین و لە هیچ هەوڵێکیش بۆ یەکڕیزی و یەکهەڵوێستی کورد درێخی ناکەین".
قوباد تاڵەبانی جێگری سەرۆکی ئەنجومەنی وەزیران لە هەژماری خۆی پەیامێکی بڵاوکردووەتەوە و دەڵێت، "ئەمڕۆ زۆر خۆشحاڵ بووم بە دیداری شێخ مورشید، هەوڵەکانی بۆ یەکگرتوویی و یەکڕیزی کورد جێی پێزانینە و پێویستە هەموو لایەک گوێی لێ بگرن و پشتیوانی لێ بکەن. جەختمان کردەوە بە هەموو توانامانەوە پشتیوانی براکانمان لە رۆژئاوای کوردستان دەبین و لە هیچ هەوڵێکیش بۆ یەکڕیزی و یەکهەڵوێستی کورد درێخی ناکەین".
ئاماژەی بەوەشداوە، "شێخ مورشید خەزنەوی و باوکی شەهید شێخ مەعشوق خەزنەوی دوو سیما و کەسایەتیی ئایینی و نیشتمانیی دڵسۆز و خۆشەویستی رۆژئاوای کوردستانن. شێخ مەعشوق لەپێناو نەتەوەکەیدا شەهید بوو و ئێستاش شێخ مورشیدی کوڕی درێژە بە رێبازەکەی دەدا".
لە گوندێکی لەسنوری قەزای کفری بۆمبێک بەمنداڵێکدا تەقییەوە و گیانی لەدەستداوە.
پەیامنێری کوردسات نیوز رایگەیاند: لە گوندی حاجی عەواد لەناحیەی سەرقەڵا لەسنوری قەزای کفری منداڵێک لەکاتی لەوەڕاندنی ئاژەڵدا، بۆمبێک پیایدا تەقیوەتەوە و گیانی لەدەستداوە.
ئاماژەی بەوەشکرد، بۆمبەکە گولە هاوەنی کۆن بووە، منداڵەکە لەکاتی یاریکردندا بۆمبەکەی دۆزیوەتەوە و پیایدا تەقیوەتەوە، لەئەنجامدا منداڵەکە گیانی لەدەستداوە.
جێگەی ئاماژەیە وتەبێژی پۆلیسی گەرمیان رایگەیاندووە، ئەو شوێنەی مینەکە تیایدا تەقیەوەتەوە نزیک ماڵی منداڵە خۆیانە و لەکاتی کێڵانی زەوییەکە گولە هاوەنەکە هاتوەتە سەر زەوی و بە منداڵەکەدا تەقیوەتەوە.
وەزارەتی دارایی و ئابووری حکومەتی هەرێمی کوردستان رایگەیاند کە سبەینێ چوارشەممە مووچەی مامۆستایانی گرێبەستی وەزارەتی خوێندنی باڵا دابەش دەکرێت.
بەپێی راگەیاندراوێک کە وێنەیەکی گەیشتووەتە کوردسات نیوز، لەسەر بڕیاری وەزیری دارایی و ئابووری و دوای تەواو کردنی سەرجەم رێکارەکانی وردبینی و ژمێریاری لە وەزارەتی خوێندنی باڵا و گەیشتنی لیستەکان بۆ گەنجینەکانی وەزارەتی دارایی، بڕیار دراوە مووچەی مامۆستایان دابەش بکرێت.
لە راگەیاندراوەکەدا هاتووە کە مووچەی مانگەکانی تشرینی یەکەم و تشرینی دووەمی ساڵی ٢٠٢٤ـی مامۆستایانی گرێبەستی وەزارەتی خوێندنی باڵا بەپێی بەرواری دەست بەکاربوونیان دابەش دەکرێت و ئاماژە بەوەش کراوە کە تەمویلی ئەم مووچانە لەسەر داهاتی ناوخۆ خەرج دەکرێت.
شایەنی باسە، مامۆستایانی گرێبەست چەندین مانگە چاوەڕێی وەرگرتنی مووچەکانیانن و دواکەوتنی مووچە یەکێک بووە لە کێشە سەرەکییەکانی مامۆستایانی گرێبەست لە زانکۆ و پەیمانگاکانی هەرێمی کوردستان.
دوای تێکچوونێکی تەکنیکی لە کێڵگەی کۆرمۆر، تیمە پسپۆڕەکانی هەرێمی کوردستان بە هەماهەنگی لەگەڵ کۆمپانیای دانا غاز توانیان بڕی 2500 مێگاوات کارەبا بگەڕێننەوە بۆ تۆڕی کارەبای گشتی.
لە راگەیەندراوەکەی وەزارەتی کارەبادا هاتووە، پاش ئەوەی بۆ دووەم جار تۆڕی کارەبای هەرێم دووچاری کەمبوونەوەی بەرهەمهێنان بووەوە، کەمال محمد ساڵح، وەزیری کارەبای حکومەتی هەرێمی کوردستان لە نزیکەوە چاودێری و بەدواداچوونی بۆ دۆخی کارەبا کرد.
ئاماژە بەوەش دراوە، ئەم کەمبوونەوەیە بەهۆی کۆمەڵێک گرفتی تەکنیکییەوە بوو کە لە کێڵگەی کۆرمۆر و لە بەشی بەرهەمهێنانی کۆمپانیای دانا غاز رووی دابوو، کە کاریگەری لەسەر ئاستی بەرهەمهێنانی وزە دروست کردبوو.
لە ماوەیەکی کورتدا و بە هەماهەنگی نێوان تیمەکانی وەزارەتی سامانە سروشتییەکان و وەزارەتی کارەبا لەگەڵ کۆمپانیای دانا غاز، گرفتەکان چارەسەر کران و بڕی 2500 مێگاوات کارەبا گەڕێندرایەوە بۆ ناو تۆڕی کارەبای هەرێم.
شایەنی باسە، کێڵگەی گازی کۆرمۆر یەکێکە لە سەرچاوە سەرەکییەکانی دابینکردنی سووتەمەنی بۆ وێستگە کارەباییەکانی هەرێمی کوردستان و هەر گرفتێکی تەکنیکی لەم کێڵگەیەدا راستەوخۆ کاریگەری لەسەر بەرهەمهێنانی کارەبا دروست دەکات.