وەزارەتی کارەبای ھەرێم رایگەیاند، دوو گرێبەست  بۆ جێبەجێکردنی دوو پرۆژەی کارەبا لە پارێزگای سلێمانی ئیمزا کراوە، پرۆژەی یەکەم بۆ بەستنی ھێڵی ١٣٢ کەی ڤی لە نێوان بازیان و رانیە بە درێژایی ١٠٥ کیلۆمەتر و بە بڕی ٣١ ملیار و ٦٠٠ ملیۆن دینار لەماوەی ٣٦٥ رۆژدا جێبەجێ دەکرێت. 

پرۆژەی دووەمیش بۆ بەستنی ھێڵی ١٣٢ کەی ڤی لە نێوان تانجەرۆ و سەیدسادق بە دووری ٥٥ کیلۆمەتر و بەبڕی ١٧ ملیار و ٢١٠ ملیۆن دینار لەماوەی ٢٢٠ رۆژدا جێبەجێ دەکرێت.

وەزارەتی کارەبا لە راگەیەنراوێکدا ئاماژەی بەوە کردوە، تیمی تایبەت بە سەرپێچییەکانی سەر پێوەری زیرەک دەستبەکاربووە و جۆر و شوێنی سەرپێچییەکانیش بە شێوەی ئۆنلاین لە رێگەی سیستمی داتا سەنتەرەوە دەستنیشان دەکرێت، لە ھەر شوێنێک دەستکاری سندووقی پێوەری زیرەک بکرێت، جۆر و شوێنی سەرپێچییەکە بۆ داتا سەنتەر دەگوازرێتەوە.

راشیگەیاندووە، لەبەرئەوە داوا لە ھاوبەشانی کارەبا دەکات بۆئەوەی روبەڕوی سزای یاسایی و دارایی نەبنەوە، دەستکاری پێوەری زیرەک نەکەن.

ئومێد خۆشناو پارێزگاری ھەولێر بۆ دەربازبوون لە قەیرانی کەمبوونەوەی ئاوی خواردنەوە لە پارێزگاکە داوای ھەڵمەتی نیشتیمانی دەکات و راشیدەگەیەنێت، گرفتەکە ئەگەر ناچاریان بکات تەنانەت شوێنەکانی شتنی ئۆتۆمبێلیش رادەگرن. 

داواشی لە مامۆستایانی ئاینی کرد بەشدار بن لە ھۆشیارکردنەوەی ھاوڵاتیان بۆ دەربازبوون لەو قەیرانە سەختەی بەرۆکی گرتوون.

موخلیس سەلیم بەڕێوەبەری کارگێڕی و یاسایی دەستەی وەبەرھێنەرانی کوردستان بە کوردسات نیوزی راگەیاند، ئەمساڵ پڕۆژەی بەبازاڕکردنی گەنمی جوتیاران کەوتووەتەکار و لە سەرەتای مانگی داھاتووەوە ئاردی سفر بەرھەم دەھێنێت و بە نرخێکی گونجاو دەخرێتە بازاڕەوە. 

راشیگەیاند، بۆ یەکەمجارە لە ھەرێمی کوردستان کارگەی ئاردی سفر دەکەوێتەکار و ھەرچەندە مانگانە ھەرێم پێویستی بە ٢٤ ھەزار تۆن ئاردی سفر ھەیە، بەڵام ئەو کارگانە ٣٥ ھەزار تۆن بەرھەم دەھێنن و ھەناردەی دەرەوەی ھەرێمیش دەکرێت. 

موخلیس سەلیم وتیشی، بۆ گرنگیدان بە بەرھەمی جوتیارانی ھەرێم و پاراستنی ئاسایشی خۆراک، لە داھاتوودا ئاردی جۆ و گەنمەکوتراو و ساوەر و بڕوێش و ژمارەیەک بەرھەمی تری ناوخۆ بۆ ھاوڵاتیان بەردەست دەبێت.

سازگار دڵشاد ئەندامی ئەنجومەنی پارێزگای ھەولێر بە کوردسات نیوزی راگەیاند، بەھۆکاری کەمی ئەندامانی ئەنجومەنی پارێزگا، لیژنەکان لە ١٥ لیژنەوە کەمکراوەتەوە بۆ ١٠ لیژنە و بڕیارە لە رۆژانی داھاتوودا ئەنجومەنی پارێزگای ھەولێر لەبارەی دیاریکردنی سەرۆکی نوێ بۆ لیژنەکان کۆببێتەوە. 

ئاماژەی بۆ ئەوەشکرد، گۆڕانکاری لە پەیڕەوی ناوخۆی ئەنجومەنەکە دەکرێت و بڕیارە جێگر و بڕیاردەری لیژنە نەمێنێت، لە ١٠ لیژنەکەش فراکیسۆنی یەکێتی پۆستی سەرۆکی دوو لیژنەی ئەنجومەنی پارێزگای ھەولێر وەردەگرێت و کاری لیژنەکان چڕتر و چالاکتر دەکرێن.

قوباد تاڵەبانی جێگری سەرۆکی ئەنجومەنی وەزیران راگەیاند، لە کۆبوونەوەی ئەنجومەنی ئابووری، چەند بڕیارێکی گرنگماندا لە پێناو پەرەپێدانی دۆخی ئابووری و ڕێکخستنەوەی داھاتی گشتی و باشترکردنی بژێوی ھاوڵاتیان.

راشیگەیاند، بڕیارماندا کاری باج و رسومات رێکبخەینەوە و پێداچوونەوە بە میکانیزمی کۆکردنەوەی باجەکان بکەین. 

ئاماژەی بەوەشکردووە، ھەروەھا بڕیار درا سیاسەتێک پەیڕەو بکرێت، کە بەرھەمی خۆماڵی بپارێزێت و رێگری لە قۆرخکاری و بەرزبوونەوەی نرخ بگیرێت لەپێناو بەرژەوەندی گشتی و بەکاربەرانی ھەرێمی کوردستان.

قوباد تاڵەبانی وتیشی، لە پێناو کارئاسانیکردنیش بۆ وەبەرھێنەران و نەھێشتنی ڕووتین، بڕیاری ئەوەماندا، دەسەڵاتەکانی تایبەت بە کەرتی وەبەرھێنان ومۆڵەتدان بە پڕۆژەکانی وەبەرھێنان دابەزێنین بۆ پارێزگاکان و ئیدارە سەربەخۆکان.

"سەفین دزەیی" بەرپرسی فەرمانگەی پەیوەندییەکانی دەرەوەی حکومەتی ھەرێم رایگەیاند، بەھۆی فراوانکردنی پەیوەندییە نێودەوڵەتییەکان و فراوانبوونی کارەکانی فەرمانگەی پەیوەندییەکان و زیادبوونی نێردە دیپلۆماسییەکان، پێشنیازێک ئاراستەی ئەنجومەنی وەزیرانی ھەرێم کراوە بۆئەوەی فەرمانگەی پەیوەندییەکان بکرێتە وەزارەت.
ئاماژەی بۆ ئەوەشکردوە، پەیوەندییە دیپلۆماسییەکانی ھەرێم لەگەڵ وڵاتانی جیھان لە فراوانبووندایە، خوازیارن لە چەند وڵاتێکی تری جیھانیش حکومەتی ھەرێم نوێنەرایەتی بکاتەوە.

قایمقامی قەزای قەسری شیرین سەر بە پارێزگای کرماشان رایگەیاند، قەدەغەی ھاتووچۆی گەشتیاری لە دەروازەی نێودەوڵەتی پەروێزخان ھەڵگیراوە و گەشتیاران دەتوانن بە جێبەجێکردنی رێکارەکانی کۆرۆنا گەشت بۆ عێراق و ھەرێمی کوردستان ئەنجام بدەن.
"عەباس ئیسماعیل" وتەبێژی دەروازەی نێودەوڵەتی پەروێزخانیش بە کوردسات نیوزی راگەیاند، دەستپێکردنەوەی ھاتوچۆی گەشتیاری بە رەچاوکردنی رێکارەکانی تەندروستی تەنھا بۆ گەشتکردنی ھاووڵاتیانی ئێرانە بۆ عێراق، بەڵام تا ئێستاش رێگە بە ھاووڵاتیانی عێراق و ھەرێمی کوردستان نادرێت گەشت بۆ ئەو وڵاتە بکەن، جگە لە خوێندکار و نەخۆش و بازرگانان.

بە پێی میدیاکانی باکوری کوردستان، دادگای تورکیا بە تومەتی (ئەندامێتی رێکخستن) لە شاری رەحا بڕیاری زیندانیکردنی بە سەر ٩ کەسدا سەپاندووە.
دادگای ئەنقەرەش بە تۆمەتی (ئەندامێتی رێکخستنی قەدەغەکراو) سزای ٦ ساڵ و ٣ مانگ  زیندانی بە سەر (گولیستان ئەنساری ئۆغڵو) ھاوسەرۆکی شارەوانی ناوچەی (گێلێ)ی ئامەد سەپاندووە. لە شاری مێرسینیش (حەسەن جیدە) بەڕێوەبەری نوسینگەی ھەدەپەی شارەکە دەستگیرکراوە. 
دادگای سزا قورسەکانی ماڵاتیا بڕیاریدا دۆسیەی (گوڵتەن کشاناک) ھاوسەرۆکی شاروانی گەورەی ئامەد و دۆسیەی (سەباحەت تونجەل) ھاوسەرۆکی پاتی ھەرێمە دیموکراتەکان (دەبەپە) لەگەڵ دۆسیەی دۆزی کۆبانی بکات بە یەک دۆسیە.

وتیشی، لە کاتێکدا تورکیا ئاوی فورات دەگرێتەوە، حکومەتی دیمەشقیش دەروازە سنورییەکانی لەگەڵ ھەرێمەکانی خۆبەڕێوەبەریی دادەخات.

بە پێی ڕاگەیەندراوێکی وەزارەتی تەندروستی، لە ماوەی ٢٤ سەعاتی ڕابردوو لە ھەرێمی کوردستان ٤٦٦ کەسی تر تووشی ڤایرۆسی کۆرۆنا بوون و شەش توشبووی تری کۆرۆنا گیانیان لە دەستدا و ٦٣١ تووشبووی تری ڤایرۆسەکەش چاکبوونەتەوە.

ڕاگەیاندراوی ( ٢٤ ) کاتژمێری تایبەت بە نەخۆشی ڤایرۆسی کۆڕۆنای نوێ   COVID١٩               ژمارە ( ٤٩٣ )  

١. پشکنین: ( ٦١٦٠ پشکنینی نوێ)
• ( ١٢٩٠) ھەولێر
• ( ١٦٧٠) سلێمانی
• ( ٢٩٩٨) دھۆک
• ( ٠) ھەڵەبجە
• ( ٢٠٢) گەرمیان
• ( ٠) ڕاپەڕین

٢. تووشبوو: ( ٤٦٦ تووشبووی نوێ)
• ( ٣٥) ھەولێر
• ( ١١٤) سلێمانی
• ( ٣١٤) دھۆک
• ( ٠) ھەڵەبجە
• ( ٣) گەرمیان
• ( ٠) ڕاپەڕین

٣. چاکبوون: ( ٦٣١ چاکبوون)
• ( ٧٢) ھەولێر
• ( ٢٠٥) سلێمانی
• ( ٢٩٩) دھۆک
• ( ٠) ھەڵەبجە
• ( ٥٢) گەرمیان
• ( ٣) ڕاپەڕین
 
٤. مردن: ( ٦مردن)
• ( ٠) ھەولێر
• ( ٢) سلێمانی
• ( ١) دھۆک
• ( ٠) ھەڵەبجە
• ( ٣) گەرمیان
• ( ٠) ڕاپەڕین 

ئاماری گشتی:
کەرەنتین ھاوڵاتی ٢١٨٧١ (٢١٨٧١ دەرچوو)
پشکنین ٢١٤٠٧٢٠ (٧٤٠٨٤٢ ھەولێر، ٥٢٣٠١٦ سلێمانی، ٨٦٠٧٨١ دھۆک، ١٦٠٨١ ھەڵەبجە)
تووشبوون ١٨٧٥٨٤ (٥٦٢٥٤ ھەولێر، ٦١٧٠٤ سلێمانی، ٦٥٨٤٩ دھۆک، ٣٧٧٧ ھەڵەبجە)
چاکبوون ١٧٥٤٥٦  ( ٥٣٦٢٠ ھەولێر، ٥٥٧٦٤ سلێمانی، ٦٢٤٦١ دھۆک، ٣٦١١ ھەڵەبجە)
لەژێر چارەسەر ٧٦٢٨ (١٤٢٠ ھەولێر، ٣٨٦٩ سلێمانی، ٢٣٢٤ دھۆک، ١٥ ھەڵەبجە)
مردن ٤٥٠٠ (١٢١٤ ھەولێر، ٢٠٧١ سلێمانی، ١٠٦٤ دھۆک، ١٥١ ھەڵەبجە)

بۆ زانیاری زیاتر سەردانی داشبۆردی حکومەتی ھەرێمی کوردستان بکەن لەم لینکە (https://gov.krd/coronavirus/dashboard/).

وێڕای دەستخۆشی بۆ پزیشکان و کارمەندانی تەندروستی و ھەموو تیمەکانی پزیشکی کە لە ئەرکدان، جەخت دەکەینەوە ھاووڵاتیان پابەندبن بە ڕێنماییەکانی تەندروستی و دورکەوتنەوە لە شوێنی قەڵەبالغ و دانانی ماسک و وەرگرتنی ڤاکسین، وە لەکاتی پێویستدا پەیوەندی بکەن بە ھێڵی گەرمی ژمارە ( ١٢٢ ). 

 وەزارەتی تەندروستی       
حکومەتی ھەرێمی کوردستان    
٣ی تەمووز ٢٠٢١

فاخر شێخ تەیب قەیوانی بەڕێوەبەری جێبەجێکاری گرووپی کۆمپانیاکانی قەیوان لەلێدوانێکدا رایگەیاند، ئامانجیان لە دوو سایدکردنی ئەو شەقامە بۆ کەمکردنەوەی قەرەباڵغی سەر ڕێگەکەیە، کە رۆژانە ھاوڵاتیان توشی گرفت دەبن. 

وتیشی، لە ئێستاوە دەست بەو کارە دەکەن و لەماوەیەکی نزیکدا تەواوی دەکەن، پارێزگاری سلێمانیش، بەگرنگییەوە باسی لە پرۆژە خزمەتگوزارییەکانی قەیوان گروپ کرد، کە لە بوارە جیاوازەکاندا پێشکەشی سلێمانی کردووە.

وتیشی، دانپێدانان بە زانکۆیانەی ھەرێمی کوردستان بەپێی پێوەرەکانی وەرگرتنی زانکۆکان لە عێراق و ھەرێم ئەنجامدراوە و ھەوڵیش ھەیە دانپێدانان بۆ چەند زانکۆیەکی تر بکرێت.

ئیرەج قادریی ئەندامی ئەنجومەنی سەوزی چیا بە کوردسات نیوزی راگەیاند، لە رۆژی پێنج شەممەوە بە ھۆکاری نادیار لە شەش ناوچە ئاگر لە دارستانەکانی گوندی دەرەوەران و ھەنجیران لە مەریوان کەوتنەوە و دوای سێ رۆژ بەبێ ھاوکاری تیمی حکومی ، ژینگەپارێزان و خەڵکی ناوچەکە ئاگرەکانیان کۆنترۆڵکرد. 

ئاماژەی بۆ ئەوەشکرد، لە ماوەی ئەو سێ رۆژەدا  ٦٠٠ ھێکتار دارستان و پوش و پاوان سوتان و ژمارەیەک ئاژەڵی کێویش لەناوچوون.