پێشنیوەڕۆی ئەمڕۆ د. ڕێواز فایەق، سەرۆکی پەرلەمانی کوردستان، پێشوازیی لە ماریانا سێرێنی، جێگری وەزیری دەرەوەی ئیتاڵیا کرد.

لە دیدارێکدا کە برونۆ ئەنتۆنیۆ، باڵیۆزی ئیتاڵیا لە عێراق و میکێلێ کامیرۆتا، کونسوڵی گشتیی ئیتاڵیا لە ھەرێمی کوردستان ئامادەیبوون، باسی دۆخی سیاسیی عێراق، ھەڵبژاردنەکانی داھاتووی پەرلەمانی کوردستان و ئاڵنگارییەکانی بەردەم پڕۆسەکە کرا.

سەرەتا د. ڕێواز فایەق، سەرۆکی پەرلەمان، سوپاس و پێزانینی خۆیانی بە جێگری وەزیری دەرەوەی ئیتاڵیا ڕاگەیاند لە بەرامبەر ئەو ھاوکارییە سەربازی و پشتیوانییانەی کە وڵاتی ئیتاڵیا لە شەڕی ڕووبەڕووبوونەوەی تیرۆریستانی داعشدا لەگەڵ ھاوپەیمانان پێشکەشی ھەرێمی کوردستانیان کرد.

لە بەشێکی دیکەی قسەکانیشیدا سەرۆکی پەرلەمان تیشکی خستە سەر چەندین لایەنی پەیوەست بە ئازادییەکان لە ھەرێمی کوردستان و پرسی ژنان و مافی پێکھاتە ئاینی و نەتەوەییەکان و ڕایگەیاند: "ئەو یاسایانەی کە لە پەرلەمانی کوردستان دەرچوون تایبەت بە پاراستنی مافی ژنان بە ‌گشتی، پێکەوە ژیانی ئاین و نەتەوە جیاوازەکان، بە بەراورد لەگەڵ ناوچەکە، لە باشترین یاساکانن".

وتیشی، "پێکھاتە جیاوازەکانی عێراق کاتێک ھەڕەشە دەکەوێتە سەر ژیان و گیانیان، پەنا دەھێننە بەر کوردستان، لەم ڕووەوە ئێمە شانازی بەو فرەیی و پێکەوەژیانە دەکەین کە لە ھەرێمی کوردستاندا ھەیە". 

ھەروەھا سوپاسی ماریانا سێرێنی، جێگری وەزیری دەرەوەی ئیتاڵیای کرد کە لە ماوەی ڕۆژانی مانەوەیدا لە کوردستان بە پەرۆشییەوە چاودێریی ڕەوشی ژیانی کۆمەڵایەتیی ژنانی کردووە و سەردانی شەڵتەرەکانی پاراستنی ژنانی کردووە لە ھەولێر، بۆ لە نزیکەوە ئاگاداربوون لە دۆخی ژیان و گوزەرانیان و بەدواداچوون بۆ گرفتەکانیان.

لای خۆیانەوە ماریانا سێرێنی، جێگری وەزیری دەرەوەی ئیتاڵیا، خۆشحاڵیی خۆی دەربڕی بەوەی کە ژنێک لە ھەڕەمی دەسەڵاتەکانی ھەرێمی کوردستان دەبینێت و سەرۆکایەتیی دامەزراوەیەکی گرنگ و کاریگەر دەکات لە ھەرێم، ھاوکات سوپاس و پێزانینی خۆیانی دەربڕی بۆ پێشوازیلێکردنیان و خستنەڕووی ئەو زانیارییە گرنگ و بە بایەخانەی کە لەلایەن بەڕێزیانەوە خرانە ڕوو.

ھەر لە دیدارەکەدا ھەردوولا جەختیان لە گرنگیی پەرەپێدانی زیاتری پەیوەندییەکان کردەوە، لەسەر ئاستە جیاوازە دیپلۆماسی و سیاسییەکاندا بە گشتی.

دوێنی، ٣ی حوزەیران، لە ھەوڵی ڕزگارکردنی منداڵیک لە ڕوباری خاپور لە پارێزگای دھۆک، گەنجێک گیانی خۆی سپارد بۆ ڕزگارکردنی منداڵێک. 

پاش ڕۆژێک لە گەڕان بۆ تەرمی خنکاوەکە، ئەمڕۆ تەرمی سەبری ئەحمەدی ٢١ ساڵ لە ڕووباری خاپورلە  پارێزگای دھۆک دۆزرایەوە. 

ئەو منداڵەی سەبری ژیانی ڕزگار کرد ئاوارەی ڕۆژاوای کوردستانە . 

سەرەڕای گرانی نرخی بەنزین بەھۆی بەرزبوونەوەی نرخی نەوت لە بۆرسەی جیھان، ماوەی چەند ڕۆژێکە نرخی ھەر سێ جۆرەکەی بەنزین لە ھەرێم ٢٥ دیناری دیکە زیادکراوە و زیاتر لە مانگێکە بەنزینی ٦٩٠ دیناری لە عێراقەوە بۆ ھەرێم ھاوردە نەکراوە.

بەو ھۆیەشەوە ئەمڕۆ شۆفێرانی تەکسی لە ھەولێر گردبوونەوە و رێگەی سەرەکی ھەولێر-کەرکوکیان داخست و دھۆکیش شۆفێرانی تەکسی ڕێگەی دھۆک-ھەولێریان داخست، لە ڕۆژانی ڕابردووشدا چەند جارێک شۆفێرانی تەکسی لە سلێمانی گردبوونەوە و داوایانکرد نرخی بەنزین بکرێت بە ٥٠٠ دینار.

کوردسات نیوز لە بارەی ھۆکاری گرانی نرخی بەنزین و چۆنییەتی چارەسەرکردنی ئەو گرفتە و ھەرزانکردنەوەی نرخی بەنزین، پەیوەندی بە "بەھمەن عەبدوڵا" وتەبێژی بەنزینخانەکانی سلێمانی کرد، بەڵام ئامادەنەبوو ڕوونکردنەوەی لەسەر بدات.

لەمبارەیەوە مەسعودی مەلا ھەمزە سکرتێری رۆژنامەوانی کۆسرەت رەسول عەلی ڕایگەیاند، دوای وەرگرتنی چارەسەری پێویست ئەمڕۆ شەممە، ٤/٦/٢٠٢٢ ھەڤاڵ کۆسرەت ڕەسول عەلی سەرۆکی ئەنجومەنی باڵای سیاسی و بەرژەوەندی یەکێتیی نیشتمانیی کوردستان بە تەندروستیەکی باشەوە گەڕایەوە ھەرێمی کوردستان.

سامان نادر بەڕێوەبەری سەنتەری فریاکەوتنی سلێمانی لە لێدوانێکدا بۆ کوردسات نیوز رایگەیاند، بەھۆی لەدەستدانی کۆنترۆڵەوە روداوێکی ھاتوچۆ لەسەر رێگەی ھەواری شار بەرەو تونێلی پێشڕەو روویداوە، بەو ھۆیشەوە ٣ ھاووڵاتی گیانیان لە دەستداوە و کەسێکی تریش بریندار بووە.

بەپێی زانیارییەکانی کوردسات نیوز، ئەوانەی گیانیان لەدەستداوە کوڕێک و دوو کچن، کوڕەکە لەگەڵ دەستگیرانەکەی بووە و ئەو کچەی تریش کە گیانی لە دەستداوە خوشکی دەستگیرانی کوڕەکەیە، تەمەنی ھەرسێکیشیان لە نێوان ١٦ بۆ ٢٨ ساڵدایە.

وەزارەتی کشتوکاڵ و سەرچاوەکانی ئاو لە راگەیەندراوێکیدا دەڵێت، چاندنی یەک ملیۆن نەمام لەلایەن سەرۆکی یەکێتی خزمەتێکی راستەوخۆی ژینگەی کوردستان و دانیشتوانەکەی دەکات.

دەقی راگەیەندراوەکەی وەزارەتی کشتوکاڵ و سەرچاوەکانی ئاو:

بەناوی وەزارەتی کشتوکاڵ و سەرچاوەکانی ئاو پێشوازی دەکەین لەو بڕیارەی جەنابی کاک(بافل تاڵەبانی ) سەرۆکی یەکێتی نیشتیمانی کوردستان بە دەستپێشخەری و لە ئەستۆگرتنی داچاندنی (یەک ملیۆن نەمام) لە ناوچە جیاجیاکانی کوردستان ،لە پێناو سەوزکردنی ژینگەی کوردستانمان .

ھیوادارین ئەم ھەنگاوە پیرۆزە ھاوشانی پڕۆژە خزمەتگوزاریەکانی تری حکومەت ،ببێتە بنەما و نەریت و مۆدێلی سیاسەتکردنی حزبەکانی کوردستان لە پێناو پێشبرکێی زیادکردنی پانتایی سەوزایی و پاراستنی ژینگە، کە خزمەتێکی راستەوخۆی ژینگەی کوردستان و دانیشتوانەکەی دەکات. بەتایبەتی لە دۆخی ئێستادا کە ھەرێمی کوردستان و ناوچەکە ، روبەرووی گۆرانکاری خێرای کەش و ھەواو دیاردەی ووشکەساڵی و کەمبارانی و کەمئاوی و مەترسی تێکچوونی دۆخی ژینگە و ھاتنی شەپۆلێکی خۆلبارین لە ناوەراست و خواروی عێراق بۆ ھەرێمی کوردستان . 

وەک وەزارەتیش لە چوارچێوەی یاسا و ڕێنماییەکان پاڵپشت و ھاوکاری ئەم جۆرە دەستپێشخەریانە دەبین و 
دەستخۆشی لە جەنابی کاک بافل دەکەین و پشتگیری تەواوی ئەم  ھەنگاوە ژینگە دۆستانەیەی دەکەین، کە بە جێبەجێکردنی دەبێتە مایەی پاڕێزگاریکردن لە ژینگەی کوردستان و زیادکردنی ڕێژەی سەوزایی و ھاوسەنگی سروشت بۆ پاراستنی خاک و ئاو ، لە پێناو ئاسوودەی و ژیاندروستی ھاوڵاتیان ، لە ھەمان کاتدا، بەم ھەنگاوانە دەبێتە لانەی ئارامی ژیانی گیانلەبەرانی دارستانەکانمان لە ھەرێمی کوردستان.

پۆلیسی سلێمانی رایگەیاند، مەفرەزەکانی بنکەی پۆلیسی سەرا تۆمەتبارێکیان دەستگیرکرد کە ھەرەشەی تەقاندنی نارنجۆکێکی کردبوو .

پۆلیسی سلێمانی دەشڵێت، "دوای ئەوەی بنکەی پۆلیسی سەرا ئاگادار کرایەوە کە وا تۆمەتبارێک لەناوبازاڕی شاری سلێمانی نارنجۆکێکی پێیەو ھەڕەشەی تەقاندنەوەی دەکات، دەستبەجێ مەفرەزەکانی پۆلیس گەیشتنە شوێنی ڕوداوەکەو تۆمەتبارەکە دەستگیرکرا."

مەفرەزەکانی بنکەی پۆلیسی سەرا دەستیانگرت بەسەر ئەو نارنجۆکەدا کە بە تۆمەتبار بووە.

لەلایەکی ترەوە فڕۆکەی بێفڕۆکەوان بە ئاسمانی ناوچەکانی عەفرین و شەھبادا دەسوڕێنەوە، ھاوکات بە چەکی قورس گوندی قەنتەرای سەر بە ناحیەی شێراوای عەفرینیان بۆردومان کردووە.

حکومەتی ھەرێمی کورستان دەڵێت، ھێشتا پێدانی تابلۆی نوێێ ئۆتۆمبێل بە ھاوڵاتییان لەلایەن حکومەتی فیدراڵی دەستیپێنەکردووە و بە ھۆی ئامادەکاری خێرای وەزارەتی ناوخۆی حکومەتی ھەرێمی کوردستان، لە ئێستادا پرۆسەکە تەنیا لە ھەرێمی کوردستان دەستی پێکردووە.

حکومەتی ھەرێمی کورستان راشیگەیاند، " ئەو کەسانەی پەلەیانە تابلۆی نوێ وەربگرن و نایانەوێت چاوەڕێ بکەن تا ساڵیانەی ئۆتۆمبێلیان بەسەر دەچێت، دەبێت دوو بەرامبەر کە دەکاتە (١٢٠ھەزار دینار) بۆ جووتێک تابلۆ بدەن و رسوماتی دیکەی بورغو و پێشکەشکردنی پرۆسەکە کە (١٥ ھەزارە) بدەن. بۆیە لە ڕاستیدا بۆ ئەوانەی بە نۆرەی خۆیان تابلۆ وەردەگرن نرخی کۆی پرۆسەکە (٧٥ ھەزار دینارە)."

دەقی روونکردنەوەکەی فەرمانگەی میدیا و زانیاری:

ھەولێر، ھەرێمی کوردستان، عێراق (GOV.KRD)- ئەو دەنگۆیانەی لە تۆڕە کۆمەڵایەتییەکان بڵاو دەکرێنەوە لەبارەی نرخی تابلۆی نوێی ئۆتۆمبێل گوایە لە حکومەتی فیدراڵ بە ٥٠ ھەزارە و لە حکومەتی ھەرێمی کوردستانیش بە ١٢٠ ھەزار دینار دەدرێتە ھاووڵاتیان، دوای تاوتوێکردنی ئەم پرسە لە گەڵ وەزارەتی ناوخۆ، ڕاستی بابەتەکە بەم شێوەیەیە:

یەکەم: بە ڕێکەوتنی ھاوبەشی نێوان ھەولێر و بەغدا، بڕیاردراوە تابلۆی ئۆتۆمبێل بە ستانداردێکی نوێ و یەکگرتوو لەسەر ئاستی ھەموو عێراق دروست بکرێتەوە. بەشێکی ئەم پرۆسەیە لابردنی ناوی شارەکانە و لە بری شارەکان کۆد بۆ ھەر شارێک داندراوە و دەستەواژەی (KR) کە کورتکراوەی (Kurdistan Region- ھەرێمی کوردستان)ە بۆ یەکەم جار دەخرێتە سەر تابلۆی ئۆتۆمبێلی شارەکانی ھەرێمی کوردستان، کە ئەمە خۆی دەستکەوتێکی گرنگە و ھاوتەریبە لە گەڵ پێگەی دەستووری ھەرێمی کوردستان. لە پاڵ ئەمەشدا چەند جۆرێک کۆدی ئاسایشی و پارێزگاری لە ساختەکردن خراوەتە ناو ئەو تابلۆیە و لە کۆمپانیایەکی ناوداری ئەڵمانییەوە دیزاین و چاپ دەکرێت. بە ھۆی ئامادەکاری خێرای وەزارەتی ناوخۆی حکومەتی ھەرێمی کوردستان، لە ئێستادا پرۆسەکە تەنیا لە ھەرێمی کوردستان دەستی پێکردووە و دیار نیە بەغدا پێویستی بە چەند کاتی دیکە ھەیە بۆ ئەوەی ئامادەکارییەکانی جێبەجێکردنی ئەو سیستمە تەواو بکات. واتا پێویستە ھاووڵاتیان بزانن کە لە بنەڕەتدا لە بەغدا جارێ ئەو تابلۆیە و ئەو سیستمە نەخراوەتە کار تا بەراوردی نرخ بکرێت.

دووەم: لەبارەی نرخی تابلۆکان، وەزارەتی ناوخۆی حکومەتی ھەرێمی کوردستان ئەو بابەتەی ڕێکخستووە بە ڕێنمایی ژمارە ٢ی ساڵی ٢٠٢٢ کە بە (ڕێنمایی دیاریکردنی شێواز و قەبارە و رەنگ و ناوەڕۆکی تابلۆی ئۆتۆمبێل لە ھەرێمی کوردستان) ناسراوە و لە ژمارە ٨٢ی رۆژنامەی فەرمی وەقائیعی کوردستان لە ٢٨ی نیسانی ٢٠٢٢ بڵاوکراوەتەوە. بە گوێرەی ئەحکامە داراییەکانی ئەو رێنماییە کە لە ماددەی ١١ ڕوونکراوەتەوە، نرخی جوتێک تابلۆ بۆ ئۆتۆمبێل تەنھا (٦٠ ھەزار دینارە) و لە پاڵیدا رسوماتی دیکەی وەکو (٥ ھەزار دینار بۆ لێدانی برغو و سیکیوریتی تابلۆکان ) و ( ١٠ ھەزار دیناریش رسوماتی پرۆسەکەیە) وەردەگیرێت. واتا کۆی گشتی کڕین و لێدانی دوو تابلۆی نوێی ئۆتۆمبێل (تەنیا ٧٥ حەفتا و پێنج ھەزار دینارە).

لەبارەی بڕی ١٢٠ ھەزار دینار، کە بە چەواشەکاری باس کراوە و بەراوردکاری پێ کراوە، ئەمەشیان لە خاڵی پێنجەم لە ماددەی ١١ ی ڕێنمایی سەرەوە ڕوونکراوەتەوە. ئەو کەسانەی پەلەیانە تابلۆی نوێ وەربگرن و نایانەوێت چاوەڕێ بکەن تا ساڵیانەی ئۆتۆمبێلیان بەسەر دەچێت، دەبێت دوو بەرامبەر کە دەکاتە (١٢٠ھەزار دینار) بۆ جووتێک تابلۆ بدەن و رسوماتی دیکەی بورغو و پێشکەشکردنی پرۆسەکە کە (١٥ ھەزارە) بدەن. بۆیە لە ڕاستیدا بۆ ئەوانەی بە نۆرەی خۆیان تابلۆ وەردەگرن نرخی کۆی پرۆسەکە (٧٥ ھەزار دینارە).

سێیەم: ئایا لە بەغدا ٥٠ ھەزار بۆ تابلۆ وەردەگیرێت؟ بۆ زانیاری ھاووڵاتیانی خۆشەویست، حکومەتی فیدراڵ جارێ دەستی بە پرۆسەی جێبەجێکردنی تابلۆی نوێی ئۆتۆمبێل نەکردووە تا بڕی پارەکە دیار بێت. ئەوەی ئێستا ھەیە سیستەمی کۆنە و نرخی تابلۆی کۆن ٥٠ ھەزارە و جاران لێرەش ھەمان نرخ بوو. ئەوەش پێویستە بگوترێت کە لە ئێستادا حکومەتی فیدراڵ پلێتی تابلۆی کۆنیشی نەماوە و ئەو بڕە ٥٠ ھەزار دینارە لە بەرامبەر کاغەزێکی ئەی فۆڕە کە ژمارەکەی لەسەر دەنووسرێت و شوفێر ناچارە لە جامی پشتەوەی ئۆتۆمبێلەکەی بدات.

ئەو جۆرە بەراوردکارییەی لە میدیا و تۆڕە کۆمەڵایەتییەکان بڵاو دەکرێتەوە، بێ ئەوەی زانیاری پێویست و ڕاست و دروست بخەنە ڕوو، کاری ئەوان بووەتە رەخنەی ڕووخێنەر و ئەو کارەیان کردۆتە پیشەی خۆیان و ھەمیشە لە بۆسەدان بۆ ئەوەی زانیاری ناراست و چەواشەکار دەرخواردی خەڵکی ئازیزی کوردستان بدەن.

قەرەباڵغی بەڕێوەبەرایەتییەکانی ھاتوچۆی شارەکان بە دوو دەوامەوە (بەیانیان و ئێواران) نیشانەی دڵخۆشی و پێشوازی خەڵکی کوردستانە لەو پرۆسەیە.

فەرمانگەی میدیا و زانیاری
٣ی حوزەیرانی ٢٠٢٢

پۆلیسی گەرمیان لە راگەیەندراوێکدا دەڵێت، "بەوتەی کەسوکاری ناوبرا بەمەبەستی مەلەکردن  ڕووی لەڕوباری سیروان کردوەو لەکاتی مەلەکردندا خنکا."

دەشڵێت، "دوای گەشتنی مەفرەزەکانی ١٠٤ی کەلار و تیمی غەواز توانیان تەرمەکەی بدۆزنەوە."

لەئێستادا بەمەبەستی توێکاری تەرمی زیرەک خەلیل عەبدوڵا ڕەوانەی پزیشکی دادوەری کەلار کراوە.

دوای دوو مانگ لە ڕاگرتنی دانیشتنەکانی پەرلەمان، بڕیارە ئەمڕۆ کۆبوونەوەکانی پەرلەمانی کوردستان دەستپێبکاتەوە، بە پێی بەرنامەی کار دەنگدان لەسەر پێشنیازە یاسای بەڕێوەبردن و پاراستنی ئاو لە ھەرێمی کوردستان دەکرێت.

ھەروەھا خوێندنەوەی یەکەم بۆ پێشنیازە یاسای ئەرک و مافەکانی ھێزکاری تەندروستی لە ھەرێم و پڕۆژە یاسای وەزارەتی شارەوانی و گەشتوگوزار و پڕۆژەیاسای دەستەی متمانە بەخشین بە دامەزراوەکان و پڕۆگرامەکانی پەروەردە و خوێندنی باڵا.

لە تەوەرێکی تری کۆبوونەوەکەدا گفتوگۆ لەسەر ڕاپۆرتی لیژنەی کاروباری تەندروستی سەبارەت بە دەرمانی بێ کوالیەتی و ماوە بەسەرچوو و قاچاغ  و نرخی نەخۆشخانە تایبەتەکان دەکرێت.

"مھاباد کامیل" سەرۆکی زانکۆی ھەڵەبجە بە کوردسات نیوزی ڕاگەیاند، دوای ئەوەی ساڵی ڕابردوو لەلایەن عێراقەوە ھەڵسەنگاندن بۆ زانکۆی ھەڵەبجە کرا و بە مەرج بە شێوەی یەدەگ ناسێنرا، دواجار دوای جێبەجێکردنی مەرجەکانی عێراق، لەلایەن وەزارەی خوێندنی باڵای عێراقەوە زانکۆکە بە ڕەسمی ناسێنرا.

ئەوەش لە کاتێکدایە وەزارەتی خوێندنی باڵای عێراق بە نوسراوی ڕەسمی ڕایگەیاندووە، ھەموو ئەو ڕێوشوێنانە تەواو کراون، کە تایبەتن بە دانپێدانانی زانکۆی ھەڵەبجە، لە ئێستادا لە ڕێبەری خوێندکاران بۆ وەرگرتنی ناوەندی جێگیر دەکرێت.

وەفدێکی وەزارەتی تەندروستی ھەرێم لەگەڵ وەزیری تەندروستی عێراق کۆبوونەوە و بە پێی ڕاگەیەندراوێکی کۆبوونەوەکە بڕیاردرا کێشەکانی دەرمان و چارسەرە پزیشکیەکانی شێرپەنجە لە ھەرێم چارەسەربکرێت، بریاریشدراوە  لە دابینکردنی  ئامێری پزیشکی، ھەرێم بێبەش نەکرێت.

جەخت لەوەشکراوەتەوە پێویستە ھەماھەنگی زیاتر بکرێت لە نێوان سندوقی کۆمەک بۆ تووشبووانی نەخۆشی شێرپەنجە، ھاوکات بڕیاریشدرا وەفدێکی وەزارەتی تەندروستی عێراق سەردانی ھەرێم بکات بۆ ڕاھێنان و چارەسەرکردنی گرفتەکانی کەرتی تەندروستی.

وتیشی، ئەو ئۆتۆمبێلانە وەک ئاسن دەفرۆشرێن، چونکە سەرەتایان نییە و وەک ئۆتۆمبێل دەتواندرێت تۆمار بکرێن.

"د. یاد نەقشبەندی" بەڕێوەبەری نەخۆشخانەی ھیوا لە لێدوانێکدا بۆ کوردسات نیوز ڕایگەیاند، ئاستی خزمەتگوزاری شێرپەنجە لە سلێمانی بە پێی ستانداردە جیھانییەکان پلەی یەکەمی بەدەستھێناوە.

 وتیشی، کۆنفرانسێکی تایبەت بە شێرپەنجە لە سلێمانی بەڕێوەدەچێت و دەیانەوێت خاڵی دروستکردنی ھەماھەنگی لە نێوان سەنتەرەکانی شێرپەنجە دەستنیشان بکەن، تاکو ئەو ئاستە باشەی سلێمانی لە خزمەتگوزاری شێرپەنجە بگاتە ھەموو پارێزگاکانی عێراق.

بە پێی ئەو زانیارییانەی لە وەزارەتی داراییەوە دەست کوردسات نیوز کەوتووە، بۆ ئەم مانگە چەند ڕۆژێک دابەشکردنی مووچە پێش دەخرێت و بڕیارە ڕۆژی دوو شەممە دەست بە دابەشکردنی مووچەی مانگی ئایاری وەزارەت و فەرمانگەکانی ھەرێم بکرێت.

ھەر بە پێی زانیارییەکان، فەرمانگەکان لیستی مووچەی مانگی پێنجیان ڕەوانەی گەنجینەکان کردووە و بەشێکی زۆری لیستەکانیش ووردبینی تێدا کراوە.