بەڕێوەبەرایەتی پۆلیسی سلێمانی دوو تۆمەتباری لەسەر دۆسییەی كوشتنی كچێك لە گەڕەكی ئازادی دەستگیركرد، كە بە نەتەوە عەرەبن و خزمی كوژراوەكەن و هەڵساون بە، بەندكردن و ئەشكەنجەدانی كچەكە تاكو گیانی لەدەستداوە.

بەڕێوەبەرایەتی پۆلیسی سلێمانی لە راگەیەندراوێكدا بڵاویكردەوە، دوای ئەوەی ئاگاداركرانەوە لە رووداوی كوشتنی كچێك لە گەڕەكی ئازادی شاری سلێمانی، دەستبەجێ هێزەكانی پۆلیسی سلێمانی چوونەتە شوێنی رووداوەكە و پاش ئەنجامدانی لێكۆڵینەوە و هێڵكاری بۆ تاوانەكە، بەدواداچوونەكانیان بۆ دەستگیركردنی تۆمەتبارانی رووداوەكە دەستیپێكردوە.

ئەوەشی خستوەتەڕو، دوای وەرگرتنی بڕیاری دادوەر توانراوە لە دوو چالاكی جیادا  دوو تۆمەتبار لەسەر دۆسییەكە دەستگیربكەن، كە بەنەتەوە عەرەبن و لە دایكبووی ساڵەكانی 1989 و 1987ـن.

پۆلیسی سلێمانی ئاماژەی بەوەشداوە، لە لێكۆڵینەوەكاندا دەركەوتووە، كچە كوژراوە خزمی تۆمەتبارەكانە و بە سەردان چووەتە ماڵی تۆمەتبارەكان، دواتر كچەكە لەلایەن ئەو دوو تۆمەتبارەوە بەندكراوە و ئەشكەنجە دراوە تاكو گیانی لەدەستداوە، لەئێستاشدا هەردوو تۆمەتبار بەپێی ماددەی 406ـی یاسای سزادان راگیراون و لێكۆڵینەوەكان لەگەڵیاندا بەردەوامە.

 

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە ماکسیم رۆبین، کونسوڵی گشتیی رووسیا لە هەرێمی کوردستان کرد.

لەدیدارێکدا پەرەپێدانی پەیوەندییەکان و فراوانکردنی هەماهەنگییەکان لەچوارچێوەی پاراستنی بەرژەوەندییە باڵاکان و سەقامگیریی ناوچەکە جەختیلێکرایەوە.

لەدرێژەی دیدارەکەدا دوایین رووداو و پێشهاتە سیاسییەکانی رۆژهەڵاتی ناوەڕاست بەتایبەت دۆخی سووریا گفتوگۆیان لەبارەوەکرا، هەردوولا گفتوگۆ و لێکتێگەیشتنیان وەک بنەمای چارەسەری کێشەکان و پاراستنی مافی هەموو نەتەوە و پێکهاتەکانیان لەچوارچێوەی وڵاتێکی سەقامگیردا دووپاتکردەوە.

سەرۆک بافڵ جەلال تاڵەبانی ئاماژەی بە سیاسەتی نیشتمانییانەی یەکێتی بۆ کۆی پرسەکان کرد و رایگەیاند، چارەسەری ئاشتییانەی کێشەکان و گەڕانەوە بۆ مێزی گفتوگۆ سیاسەتی کارکردنی ئێمەیە، هەر هەوڵێکیش لەچوارچێوەی پاراستنی مافەکانی گەلی کورد و سەقامگیریی ناوچەکە بدرێت پشتیوانیی لێدەکەین، دۆخی ئەمڕۆی سووریاش پێویستی بە لێکتێگەیشتن و هاوبەشیی راستەقینە هەیە، هیوادارین هەموولایەک بەم رۆحییەتەوە هەوڵ بۆ داهاتووی وڵاتەکە و ژیانی خەڵکەکەی بدەن.

پێکهێنانی حکومەتی نوێی هەرێمی کوردستان تەوەرێکیتری دیدارەکە بوو و لاوبارەیەوە سەرۆک بافڵ روونیکردەوە، گۆڕانکاریی ریشەیی لە پرۆسەی حوکمڕانی پێویستییەکی گرنگی قۆناغەکەیە و پێویستە حکومەتی داهاتوو خزمەتگوزارییەکانی بەشێوەیەکی دادپەروەرانە پێشکەش بکات و ئامانجەکەی بەهێزترکردن و ئاوەدانکردنەوەی کوردستان بێت نەک جیاکاری و قۆرخکردنی دەسەڵات لەپێناو بەرژەوەندییە حزبییەکاندا.

فەرماندەی گشتی هێزەكانی هەسەدە و سەرۆكایەتی ئەنجومەنی نیشتمانی كوردی سوریا ئەنەكەسە لە رۆژئاوای كوردستان كۆبوونەوە بۆ گفتوگۆكردن لەسەر یەكڕیزی كورد لە سوریا نوێدا و گەیشتنە رێككەوتن لەسەر درێژەدان بە كۆبوونەوەكانیان و چارەسەركردنی ناكۆكییەكانی نێوانیان.

نوسینگەی راگەیاندنی هێزەكانی سوریای دیموكرات هەسەدە لە راگەیەندراوێكدا بڵاویكردەوە، مەزڵوم كۆبانێ فەرماندەی گشتی هێزەكانی هەسەدە و سەرۆكایەتی ئەنجومەنی نیشتمانی كوردی سوریا ئەنەكەسە لە رۆژئاوای كوردستان كۆبوونەوە، بۆ گفتوگۆكردن لەبارەی یەكڕیزی و یەكهەڵوێستی كورد لە سوریای نوێدا.

ئەوەشی خستەڕو، كۆبوونەوەكە بە ئامادەبوونی لێپرسراوانی هاوپەیمانان بەڕێوەچوو و تێیدا، هەسەدە و ئەنەكەسە گەیشتنە رێككەوتن لەسەر درێژەدان بە كۆبوونەوەكانیان و چارەسەركردنی ناكۆكییەكانی نێوانیان.

بەگوێرەی ئەو زانیاریانەی دەست كوردسات نیوز كەوتووە، كۆبوونەوەكە لە باكوری حەسەكە بەڕێوەچووە و سلێمان ئۆسۆ سەرۆكی ئەنەكەسە و فەیسەڵ یوسف وتەبێژی ئەنەكەسە بەشداربوون تێیدا.
 

لیژنەی ئەمنی پارێزگای سلێمانی دەنگۆی تۆماركردنی ئۆتۆمبێلە بێسەرەتاكان رەتدەكاتەوە و دەڵێت، بڕیاری قەدەغەكردنی ئۆتۆمبێلە بێسەرەتاكان وەك خۆی جێبەجێدەكرێت.

لیژنەی ئەمنی پارێزگای سلێمانی روونكردنەوەیەكی لەبارەی ئۆتۆمبێلە بێسەرەتاكانەوە بڵاوكردەوە و رایگەیاند، دەنگۆی تۆماركردنی ئۆتۆمبێلە بێسەرەتاكان لەبەرامبەر بڕێك پارەدا دوورە لە راستییەوە.

دەشڵێت، بڵاوكردنەوەی ئەو هەواڵە لە میدیایەكی حزبییەوە، مەبەستی سیاسی و چەواشەكاری لە پشتەوەیە و دووپاتیدەكاتەوە، پەنابردن بۆ هەواڵی ساختە، بۆ مایەپوچبوونی سیاسی و جەماوەری دەگەڕێتەوە.

لەكۆتایشدا لیژنەی ئەمنی پارێزگای سلێمانی دەڵێت، بڕیاری قەدەغەكردنی ئۆتۆمبێلە بێسەرەتاكان لە رۆژی دەرچوونیەوە تا ئەم ساتە وەك خۆی جێبەجێدەكرێت.
 

بەڕێوەبەری گشتی پاسپۆرتی سلێمانی بە کوردسات نیوزی رایگەیاند، لەمەودوا هاووڵاتییان لە هەر پارێزگایەك بیانەوێت دەتوانن مامەڵەی دەرهێنانی پاسپۆرتی ئەلیكترۆنی بكەن.

سالار عەبدوڵا بەڕێوبەری گشتی پاسپۆرتی سلێمانی بۆ کوردسات نیوز باسی لەوەکرد، هاووڵاتییان لە هەر پارێزگایەکی بیانەوێت دەتوانن دەست بە مامەڵە بکەن، بەبێ ئەوەی پێوەست بكرێت بە شوێنی نیشتەجێبوونیانەوە.

ئەوەشی خستە روو، لەرابردوودا ئەگەر هەر هاووڵاتیەك بیویستایە پاسپۆرت دەربكات لەو شوێنەی خۆی دەیەوێت دەبوو نزیكەی ٢٠٠ هەزار دیناری بدایە، بەڵام ئێستا بەهامان تێچووی پارێزگاکەی خۆی، كە نزیكەی ١٠٠ هەزار دینارە، لە هەرپارێزگایەك بیەوێت دەتوانێت پاسپۆرت دەربكات.

بەهۆی کۆتاییهاتنی ساڵی ژمێریاریی و پشووەکانی سەری ساڵەوە، هاتوچۆی سلێمانی داوا لە هاووڵاتیان دەکات، تاوەکو ساڵی داهاتوو، بۆ راییکردنی هیچ مامەڵەیەک سەردانیان نەکەن. بەڕێوەبەری هاتوچۆی سلێمانیش بۆ کوردسات نیوز، باس لە سزا پێبژاردنی دارایی ئەو کەسانە دەکات، کە لەماوەی بایکۆتدا مامەڵەکانیان رایی نەکراوە.

هاتوچۆی سلێمانی رایگەیاندووە، بەهۆى كۆتايىهاتنى ساڵى ژمێريارى، سبەینێ سێشەممە ٢٤ی ١٢، کۆتا رۆژی ساڵی ژمێریارییە، لەبەرئەوە رايیكردنى مامەڵەی هاووڵاتیان لە بەڕێوەبەرایەتی هاتوچۆی سلێمانی، تاوەکو دەست پێکردنەوەی دەوام لە سەرەتای ساڵی نوێ دەوەستێت.

هاتوچۆ داوا لە هاووڵاتیان دەکات، لەو ماوەیەدا سەردانی بەڕێوەبەرایەتییەکە نەکەن و دەشڵێت، هەر مامەڵەیەک لە ماوەی ئەو راگرتنەدا بەسەربچێت، وەک (ساڵانەی ئۆتۆمبێل و مۆڵەتی شۆفێری و ماوەی تۆمارکردنى ئۆتۆمبێل و گرێبەستی ئەلیکترۆنی) ئەوا بۆیان قەرەبوو دەکرێتەوە لە دوای دەستپێکردنەوەی دەوامی فەرمی لە ساڵی نوێدا، بۆیە هیچ کەسێک توشی سزای پێبژاردنی دواکەوتن نابێت.

چی بەسەر مامەڵەی ئەو هاووڵاتیانەدا دێت کە کەوتووەتە کاتی بایکۆتی هاتوچۆوە؟

ئەمڕۆ دووشەممە، ئاسۆ محەمەد ئەمین بەڕێوەبەری هاتوچۆی سلێمانی بە کوردسات نیوزی راگەیاند، ئەو هاووڵاتیانەی مامەڵەکانیان کەوتووەتە کاتی بایکۆتی بەڕێوەبەرایەتییەکەوە، پێشنیازێک هەیە کە لێخۆشبوونیان بۆ بکرێت.

بەوپێیەش، کە سبەی کۆتا رۆژی ساڵی ژمێریارییە، ئەو لێخۆشبوونە درێژ دەکرێتەوە بۆ دوای پشووەکانی سەری ساڵ.

وەفدێکی دەم پارتی لە سلێمانی سەردانی مەزاری سەرۆك مام جەلالی كرد و لە کۆنفرانسێکی رۆژنامەوانیدا داوای یەكریزی گەلی كوردیان كرد.

وەفدەكە لە كۆنفرانسێكی رۆژنامەوانیدا رایانگەیاند، سەرۆك مام جەلال بەردەوام پشتگیری لە یەكریزی گەلی كورد كردووە، هەر بۆیە داوای یەكریزی لایەنەكان دەكەن و ئاماژەیان بەوەشکرد، هاتوون تا لە سلێمانی پەیامی یەكریزی كورد دووپاتبكەنەوە.

هەروەها باسیان لە رەوشی رۆژئاوای كوردستانی كرد و جەختیانکردەوە، كە ئەمرۆ رۆژئاوا پێویستی بە پشتگیری هەموو لایەنە كوردستانییەكانە.

سەبارەت بە دیداری عەبدوڵا ئۆجالان سەرۆكی زیندانیكراوی پارتی كرێكارانی كوردستانیش رایانگەیاند، چاوەروانی بڕیاری دادگا دەكەن. 

حکومەتی هەرێمی کوردستان پشووەکانی سەری ساڵی راگەیاند و بەکۆی گشتی رۆژانی پشوو و رۆژانی هەینی و شەممە، ١١ رۆژ پشوو دەبێت.

فەرمانگەی میدیا و زانیاریی حکومەتی هەرێمی کوردستان رایگەیاند، لە رۆژی چوارشەممە، ٢٥ی ١٢ی ٢٠٢٤، تاوەکو رۆژی پێنجشەممە، ٢ی ١ی ٢٠٢٥، لە سەرجەم دامودەزگاكانی هەرێمی كوردستان پشووی رەسمی دەبێت.

ئاماژەی بەوەشکردووە، رۆژی یەکشەممە، ٥ی ١ی ٢٠٢٥، دەوامی رەسمی لە سەرجەم دامودەزگاكانی هەرێمی كوردستان دەستپێدەكاتەوە.

بەپێی راگەیەنراوەکەی حکومەتی هەرێم، تاوەکو ٢ی ١ی پشوی فەرمییە، بەڵام بەهۆی ئەوەی رۆژانی ٣ و ٤ی مانگ بەر هەینی و شەممە دەکەون، کە ئەو دوو رۆژەش خۆیان پشووی هەفتەی دامودەزگاکانن، لە رۆژی ٥ی مانگەوە دەست بە دەوام دەکرێتەوە.

ئەمڕۆ دادگای باڵای فیدراڵی عیراق كۆدەبێتەوە دوو سكاڵا لەبارەی هەڵوەشاندنەوەی دوو وەزارەتی حكومەتی هەرێمی كوردستان تاوتوێ دەكات.

بەپێی خشتەی دانیشتنەكانی دادگای باڵای فیدراڵی عیراق، ئەمڕۆ دووشەممە، چەند سكاڵایەك تاوتوێ دەكات كە دوو سكاڵایان پەیوەستن بە هەرێمی كوردستانەوە، لە سكاڵای یەكەمدا كە لەلایەن خالید مستەفا حسێن لەسەر سەرۆكی پەرلەمانی كوردستان تۆماركراوە داوادەكات، وەزارەتی شەهیدان و ئەنفالكراوانی هەرێمی كوردستان بەپێی یاسای ژمارە (٨)ی ساڵی ٢٠٠٦، بە نادەستووری لە قەڵەم بدات و دەستەیەك بە ناوی دامەزراوەی شەهیدان دروستبكرێت كە بە ئەنجومەنی وەزیرانی هەرێمەوە ببەسترێتەوە.

سكاڵای دووەمیش كە هەر هەمان كەس تۆماری كردووە، داوا لە دادگای فیدراڵی دەكات، وەزارەتی ئەوقاف و كاروباریی ئایینی هەرێم بەپێی یاسای ژمارە ١١ی ساڵی ٢٠٠٧ بە وەزارەتێكی نادەستوریی دابنێت و دەستەیەك بۆ ئایین و ئایینزا جیاوازەكان لە هەرێمی كوردستان دروستبكرێت كە بە ئەنجومەنی وەزیرانەوە ببەسترێتەوە.

وەزارەتی دارایی حكومەتی هەرێمی كوردستان رایگەیاند، سبەینێ موچەی مامۆستایانی گرێبەست دابەشدەكرێت.

وەزارەتی دارایی و ئابووری حكومەتی هەرێمی كوردستان لە راگەیەنراوێكدا ئاماژەی بەوەكردووە، رۆژی سێشەممە موچەی مانگی تشرینی یەكەمی مامۆستایانی گرێبەستی وەزارەتی پەروەردە لە سەرتاسەری هەرێمی كوردستان دابەشدەكرێت.

رۆژی یەكشەممە نوێنەری مامۆستایانی گرێبەست لە هەرێمی كوردستان لە بەرنامەی پرسی رۆژی كوردسات نیوز رایگەیاند، ئەگەر موچەی مامۆستایانی گرێبەست دابەشنەكرێت خۆپیشاندان ئەنجامدەدەن.

بەڕێوەبەری هاتوچۆی سلێمانی بە کوردسات نیوزی راگەیاند، دوو پێشنیازیان بۆ چارەسەری گرفتی ئۆتۆمبێلە بێسەرەتاکان داوەتە هاتوچۆی هەرێم. دەشڵێت، "نابێت بهێڵین هاوڵاتیان زیانمەند بن".

ئاسۆ محەمەد ئەمین بەڕێوەبەری بەڕێوەبەرایەتی گشتیی هاتوچۆی سلێمانی بە کوردسات نیوزی راگەیاند، پێویستە ئۆتۆمبێلە بێسەرەتاکان پۆلێن بکرێن، چونکە بەشێکیان هەیە بەکەڵکی ئەوە نایەت بەسەر شەقامدا بڕۆن، بەشێکیشیان دەکرێت مامەڵەیان لەگەڵدا بکرێت.

ئاماژەی بەوەشکرد، ناکرێت ئەو گرفتە بەو جۆرە بمێنێتەوە، دەبێت لیژنەیەکی پسپۆڕ پۆلێنیان بکات.

بەڕێوەبەری هاتوچۆی سلێمانی ئەوەشی خستە روو، "نابێت بهێڵین هاوڵاتی زۆر زیانمەند ببێت، ئەگەر هۆکارەکەی هەڵەی هاوڵاتیانیش بووبێت".

دەشڵێت، دەبێت حکومەت بچێتە ژێر باری بەشێکی قەرەبووەکان و بۆ ئەو مەبەستە دوو پێشنیازیان خستووەتە روو.

ئاسۆ محەمەد روونیشیکردەوە، لە ئەگەری یەکەمدا حکومەت دەتوانێت وەک مراندن ئۆتۆمبێلەکانیان لێوەبگرێتەوە و ئۆتۆمبێلی نوێ بهێنن، لە رابردوودا ئەوە دەکرا.

راشیگەیاند، پێشنیازی دووەم ئەوەیە، ئەو هاوڵاتیانە خۆیان ئۆتۆمبێلەکانیان رادەستی حکومەت بکەن، لە بەرامبەرا حکومەت لە رسومات و کۆمەڵێک رێکاری هاوردەکردنی ئۆتۆمبێلێکی دیکە خۆش ببێت کە ئەوان دەیهێنن.

کەشناسیی هەرێم پێشبینییەکانی کەشوهەوای ئەمڕۆ و سبەی راگەیاند، سبەینێ و دووسبەی پلەکانی گەرما بەرزتر دەبنەوە و ئەگەری نمەباران هەیە.

کەشناسیی هەرێم رایگەیاند، ئەمڕۆ دووشەممە، ئاسمان بەگشتى نیمچەهەور دەبێت و ئەگەرى نمەبارانى کەم هەیە لە بەشێک لە ناوچە شاخاوییەکانى سنوورى پارێزگاى دهۆک و پارێزگاى هەولێر.

ئەوەش هاتووە، سبەی سێشەممە، ئاسمان بەگشتى نیمچەهەور دەبێت و ئەگەرى نمەبارانێکی کەم هەیە لە بەشێک لە ناوچە شاخاوییەکانى سنوورى پارێزگاى دهۆک و پارێزگاى هەولێر.

کەشناسی دەشڵێت، ئەمڕۆ و سبەی پلەکانی گەرما بەرز دەبنەوە.

بەرزترین پلەکانی گەرمای پێشبینیکراو بە پلەی سیلیزی :

هەولێر: ١٧ پلەى سیلیزى

سلێمانی: ١٦ پلەى سیلیزى

دهۆک: ١٦ پلەى سیلیزى

کەرکوک: ١٨ پلەى سیلیزى

هەڵەبجە: ١٥ پلەى سیلیزى

گەرمیان: ٢٠ پلەى سیلیزى

سۆران: ٩ پلەى سیلیزى

زاخۆ: ١٦ پلەى سیلیزى

حاجی ئۆمەران: ٧ پلەى سیلیزى

دوای سەردانەکەی بۆ چەند وڵاتێکی رۆژهەڵاتی ناوەڕاست، وەزیری بەرگریی هۆڵەندا دوێنێ لە بەغدا بوو و ئەمڕۆش گەیشتە هەولێر، بڕیارە لەگەڵ بەرپرسانی هەرێم لەبارەی چەند پرسێک لەناویشیاندا 'داعش' کۆببێتەوە.

ئەمڕۆ دووشەممە، رۆبین بریکلمانیس وەزیری بەرگریی هۆڵەندا بە سەردانێکی رەسمی گەیشتە هەولێر و لەلایەن شۆڕش ئیسماعیل وەزیری پێشمەرگەوە پێشوازی لێکرا.

بڕیارە رۆبین بریکلمانیس لەگەڵ بەرپرسانی باڵای هەرێم کۆببێتەوە و لە کۆبوونەوەکاندا باس لە دوایین رووداو و پێشهاتەکانی ناوچەکە بکەن، بەتایبەت دوای رووخانی رژێمی بەشار ئەسەد و گۆڕانکارییەکانی دۆخی سیاسیی سوریا.

هەر لە کۆبوونەوەی لەگەڵ بەرپرسانی هەرێمدا، وەزیری بەرگریی هۆڵەندا باس لە پەیوەندیە دوو قۆڵیەكانی هەرێم و وڵاتەکەی دەکات.

ماوەی چەند رۆژێکە، رۆبین بریکلمانیس وەزیری بەرگریی هۆڵەندا لە رۆژهەڵاتی ناوەڕاستە و سەردانی سوریا و بەغدادی کرد.

هاوکات، لە نزیکەوە چاوی بە هێزەکانی هۆڵەندا لەم ناوچانە کەوتووە، جەختیشی کردووەتەوە لە مانەوەی هۆڵەندا لە هاوپەیمانی نێودەوڵەتی دژ بە داعش لە عیراق و سوریا.

هۆڵندا، لە ساڵی ٢٠١٢ـەوە کونسوڵخانەی لە هەرێمی كوردستان كردووەتەوە و یەكێكە لە وڵاتانی ئەندام لە هاوپەیمانی نێودەوڵەتی دژ بە داعش. ساڵی ٢٠٢١ بەمەبەستی مەشقكردن بە هێزەكانی پێشمەرگە، زیاتر لە ١٥٠ سەرباز و راوێژكاری رەوانەی هەرێمی كوردستان كردووە.

سەرۆكی یەكێتی دەڵێت، پشتیوانیی هەموو ئەو هەوڵانە دەكەن كە ئامانجەكەی پاراستنی مافەكانی گەلی كوردە لە سوریا.

بافڵ جەلال تاڵەبانی سەرۆكی یەكێتیی نیشتمانیی كوردستان لە مەكتەبی سیاسی لە هەولێر لەگەڵ وەفدێكی باڵای پارتی یەكسانی و دیموكراتی گەلان (دەم پارتی) كۆبووەوە و هەردوولا جەختیان لە پاراستنی مافەكان و رێزگرتن لە ئیرادەی سەرجەم نەتەوە و پێكهاتەكانی سوریا بە تایبەتی گەلی كورد كردەوە، داواشكرا هەمووان پێكەوە بە یەكسانی بڕیار لە چارەنووسی سوریا بدەن و قۆناغێكی نوێی حوكمڕانی بهێننە كایەوە.

لە كۆبونەوەكەدا سەرۆك بافڵ رایگەیاند، پشتیوانیی هەموو ئەو هەوڵانە دەكەن كە ئامانجەكەی پاراستنی مافەكانی گەلی كوردە لە سوریا، پاڵپشتیی گەلی كوردیش دەكەن لە رۆژئاوا بۆ سەرخستنی ئامانجەكانیان و هەوڵەكانی مەزڵوم كۆبانێ‌ لەو قۆناغە هەستیارەدا بۆ پاراستنی ئارامیی ناوچەكە بەرزدەنرخێنن.

لەبەرامبەریشدا وەفدی باڵای دەم پارتی رایگەیاند، بە سیاسەتێكی نیشتمانییەوە كار بۆ بەدیهێنانی ئاشتی و سەقامگیری دەكەن، هەوڵەكانیشیان لەپێناو پاراستنی مافەكانی گەلی كورد لە سوریا بەردەوام دەبێت.

فەرماندەی گشتی هەسەدە دەڵێت لە چوارچێوەی سوریادا نوێنەرایەتی پارێزگا و ناوچەكانیان دەكەن و داوای سیستمی فیدراڵییان نەكردوە.

مەزڵوم كۆبانێ‌، فەرماندەی گشتی هێزەكانی سوریای دیموكرات (هەسەدە) رایگەیاند، دەیانەوێت لە چوارچێوەی سوریای نوێدا، لە ناوچە كوردییەكان ئیدارەیەكی خۆسەر هەبێت و بەشێكبن لە سوریا و بەهێزەوە بەشداربن لە پرۆسەی سیاسی و بنیاتنانەوەی سوریای نوێدا، جەختیش دەكاتەوە هیچ داواكارییەكییان بۆ سیستمی فیدراڵی نییە.

وتیشی، تائێستا هەڵوێستەكانی ئیدارەی نوێی دیمەشق ئەرێنین و بە ئەرێنییەوە لە هەڵوێستەكانیشیان دەڕوانن، پێویستە لە پێناو داهاتوودا دانوستان بكەن، ئامادەكاریشیان كردوە بۆئەوەی بەمزووانە دانوستانەكان دەستپێبكەن.

مەزڵوم كۆبانێ‌ راشیگەیاندووە، مەترسی لەسەر كۆبانێ هەیە و هەڕەشە و هێرشەكانی توركیا بەردەوامن، لەگەڵ ئەمریكا و هاوپەیمانیی نێودەوڵەتی و حكومەتی نوێی دیمەشقیش گفتوگۆ دەكەن، بۆئەوەی رێگری لە هێرشەكانی توركیا بكەن، پێویستە حكوومەتی نوێی سوریاش بە ئەرك و ڕۆڵی خۆی هەڵبستێت، چونكە ئەو ناوچانە بەشێكن لە سوریا.

دوو ناوچەی سەركردایەتی لە چوارچێوەی وەزارەتی پێشمەرگە دەستبەكاردەبن، وەزیری پێشمەرگەش دەڵێت، ئەو ناوچانە بۆ رێكخستنەوە و یەكخستنەوەی هێزی پێشمەرگەی كوردستانە لە ژێر سەركردایەتی وەزارەتی پێشمەرگەدا.

شۆڕش ئیسماعیل وەزیری پێشمەرگە سەرپەرشتی كۆبوونەوەیەكی باڵای كرد لە وەزارەتی پێشمەرگە، كە لێپرسراوی تیمی راوێژكارانی سەربازیی هاوپەیمانان لە هەرێمی كوردستان ئامادەبوو، لە كۆبونەوەكەدا بڕیاردراوە دوو ناوچەی سەركردایەتیی لە چوارچێوەی وەزارەتی پێشمەرگە لە سەرەتای ساڵی 2025 دەستبەكاربن، كە هەموو هێزەكانی پێشمەرگەی كوردستانی تێدا رێكدەخرێتەوە و لە چوارچیوەی وەزارەتی پێشمەرگەدا جێگیردەبن، بە كۆی دەنگیش بڕیاردرا لەسەر بنیاتنانی بنەماكانی یەكەیەكی یەكگرتووی ژمێریاری سەربازیی بۆ هێزی پێشمەرگەی كوردستان.

وەزیری پێشمەرگە راشیگەیاند، هەمووان هاوڕابوون ئەو ژێرخانە پاڵپشت و پشتیوانی وەزارەتی پێشمەرگە دەبێت لە بنیاتنانی هێزێكی نیشتمانی یەكگرتووی كوردستانی، كە پارێزگاری لە خەڵك و خاكی كوردستان دەكات لە هەر مەترسییەك كە لە ئێستا و ئایندەدا روبەڕوویان دەبێتەوە.