هەواڵەکان
ئەنجومەنی وەزیرانی هەرێمی کوردستان، دوای کۆبوونەوەی ئەمڕۆی، راگەیەندراوێکی بڵاوکردووەتەوە و تێیداهاتووە، باس لە یەکخستنەوەی هێزەکانی پێشمەرگە و داشکاندن بۆ قەرزی کۆنی کارەبا کراوە.
بڕگەی یەکەم؛ یەکخستنەوەی هێزەکانی پێشمەرگە
ئەنجومەنی وەزیرانی هەرێم رایگەیاندووە: لە بڕگەی یەکەمی کۆبوونەوەدا، وەزیری کاروباری پێشمەرگە، راپۆرتێکی وردی سەبارەت بە پرۆسەی رێکخستن و یەکخستنەوەی هێزەکانی پێشمەرگە لە ژێر چەتری وەزارەتی کاروباری پێشمەرگە خستەڕوو و هەنگاوە ئەنجامدراوەکان و پلان و پێداویستییەکانی قۆناغی داهاتووی پرۆسەکەی ڕوون کردەوە، هەروەها باس لە هەوڵەکانی حکومەتی هەرێمی کوردستان کرا بۆ یەکسانکردنی مووچە، پلە، دەرماڵە و شایستە دارایییەکانی پێشمەرگە لەگەڵ هاوتاکانیان لە دامەزراوەکانی بەرگریی حکومەتی فیدراڵ و جێگیرکردنی پێداویستییە دارایییەکانی وەزارەتی پێشمەرگە لە چوارچێوەی خەرجییە سیادییەکانی بودجەی فیدراڵی؛ بەو پێیەی هێزی پێشمەرگە بەشێکە لە سیستەمی بەرگریی عێراق.
بەپێی راگەیەندراوەکەی ئەنجومەنی وەزیرانی هەرێم، جێگری سەرۆکی ئەنجومەنی وەزیران، پیرۆزبایی لە سەرکەوتنی پرۆسەی یەکخستنەوەی هێزەکانی پێشمەرگە کرد و بە دەسکەوتێکی نیشتمانی و دامەزراوەیی ناوی برد و جەختی لە بەردەوامیی پرۆسەی چاکسازی و پیشەییکردنی وەزارەتی پێشمەرگە و پاراستنی دەسکەوتەکانی کردەوە، هەروەها پێداگریی لەسەر یەکسانکردنی موچە و شایستە دارایییەکانی پێشمەرگە لەگەڵ هاوتاکانیان لە دامەزراوەکانی بەرگریی حکومەتی فیدراڵ کرد.
لە راگەیەندراوەکەشدا هاتووە، ئەنجومەنی وەزیران، وەفدی باڵای دانوستانکاریی حکومەتی هەرێمی کوردستانی راسپارد کە لە دانوستانەکانی بودجەی ساڵی 2027دا بەردەوام بێت لە هەوڵەکان بۆ جێگیرکردنی موچە، دەرماڵە، شایستە دارایییەکان و پێداویستییەکانی وەزارەتی پێشمەرگە لە چوارچێوەی خەرجییە سیادییەکان، هاوشێوەی وەزارەتی بەرگریی فیدراڵ، هەروەها گرنگیی رۆڵی نوێنەر و فراکسیۆنە کوردستانییەکان لە بەغداد بۆ داکۆکیکردن لەم داواکارییە لە پرۆسەی ئامادەکردن و پەسەندکردنی بودجەی 2027 دووپات کرایەوە.
بڕگەی دووەم؛ داشکاندن بۆ قەرزی کۆنی کارەبا
ئەنجومەنی وەزیران دەلێت، لە بڕگەی دووەمی کۆبوونەوەدا، ئەنجومەنی وەزیران بە کۆی دەنگ بڕیاری دا ماوەی سوودمەندبوون لە داشکاندنی قەرزە کۆنە کەڵەکەبووەکانی کارەبا لە 2026/9/24 تا 2026/10/18 بە هەمان مەرج و بڕگەکانی بڕیاری پێشوو درێژ بکرێتەوە؛ بۆ ئەوەی دەرفەتی زیاتر بۆ هاووڵاتیان بڕەخسێت لە داشکاندنەکە سوودمەند بن و قەرزەکانیان یەکلایی بکەنەوە و داهاتی بەدەستهاتووش جارێکی دیکە بۆ دابینکردن و باشترکردنی خزمەتگوزاریی کارەبا خەرج بکرێتەوە.
بڕگەی سێهەم
بەپێی زانیارییەکان، لە بڕگەی سێیەم و کۆتایی کۆبوونەوەدا، ئەنجومەنی وەزیران، بە ڕەچاوکردنی تایبەتمەندی و دەسەڵاتە دەستوورییەکانی هەرێمی کوردستان، بڕیاری جێبەجێکردنی یاسای کۆمپانیا گشتییەکان ژمارە (22)ی ساڵی 1997ی هەموارکراو لە هەرێمی کوردستان دا ، هاوشانی یاسای کۆمپانیاکان ژمارە (21)ی ساڵی 1997ی هەموارکراو، وەک دوو یاسای تەواوکاری یەکتر؛ بە مەبەستی کاراکردنی دامەزراوە گشتییەکان، پەرەپێدانی ژینگەی بازرگانی و ئابووریی هەرێمی کوردستان و هەماهەنگکردنی چوارچێوە یاساییەکان لەگەڵ یاسا فیدراڵییە پەیوەندیدارەکان.
سەرۆکی سوریا لە وتارێکدا، چوونە ناو قۆناغێکی نوێی بوژانەوەی ئابوری و رێکخستنەوەی سوپای وڵاتەکەی رادەگەیەنێت و جەخت لەسەر ئاسایشی ناوچەکە و سەروەریی خاکی سوریا دەکاتەوە.
لە وتارەکەیدا لە کۆبوونەوەی نەتەوە یەکگرتووەکان، ئەحمەد شەرع، سەرۆکی سوریا ئاماژەی بە دەستپێکردنی قۆناغێکی نوێ لە مێژووی وڵاتەکەی کرد و رایگەیاند، سوریا چووەتە ناو بوژانەوەی ئابوری، هاوکات پرۆسەی قۆرخکردنی چەک لە دەستی دەوڵەتدا دەستی پێکردووە، سوپاش لەسەر بنەمایەکی نوێ رێکخراوەتەوە.
سەرۆکی سوریا جەختی لەوەکردەوە، وڵاتەکەی لە باکوورەوە تا باشوور یەکخراوەتەوە و رێڕەوی دادپەروەریی راگوازتن لە سەرانسەری سوریا دەستی پێکردووە، ئاماژەی بەوەشکرد، سوریا لەسەر بنەمایەکی سەروەریی بەهێزەوە دەستیکردووە بە دروستکردنی پردی هاوبەشی و پەیوەندییە نێودەوڵەتییەکانی.
لە بەشێکی دیکەی وتارەکەیدا، ئەحمەد شەرع ئاماژەی بە هەڵگرتنی سزاکانی سەر وڵاتەکەی کرد و رایگەیاند، "بۆ جیهان سەلمێنرا کە ئاسایشی رۆژهەڵاتی ناوەڕاست لە سوریاوە دەنەخشێنرێت."
سەبارەت بە پرسی سنورەکان و ئیسرائیل، جەختی کردەوە، بەرزاییەکانی جۆلان وەک زەوییەکی سوریا دەمێنێتەوە و سەرجەم بڕیارەکانی لکاندنی بە ئیسرائیلەوە بەپێی بڕیارە نێودەوڵەتییەکان بێبایەخن.
هاوکات پابەندبوونی سوریاشی بە رێککەوتنی ساڵی 1974 دووپاتکردەوە و داوای کشانەوەی تەواوەتی ئیسرائیلی کرد لە زەوییەکانیان، هاوکات هێرشەکانی ئیسرائیلی بۆ سەر خاکی سوریاش ئیدانە کرد.
عالیە نوسیف و ئەشواق سالم حەسەن، کە ئەندامی ئەنجومەنی نوێنەرانی عیراقن بە تۆمەتی گەندەڵی دارایی و بە هەدەردانی سامانی گشتی سزایی حەوت ساڵ زیندانیان بەسەردا سەپێندرا.
دەستەی دەستپاکی عیراق بڵاویکردوەتەوە،بەهۆی ئەنجامدانی تاوانی کەسی و ناڕەوا و بەهەدەردانی سامانی گشتی سزایی حەوت ساڵ زیندانی بەسەر هەریەکە لە عالیە نوسیف و ئەشواق سالم حەسەن سەپێندرا لەگەڵ گەڕاندنەوەی پارەش بۆ خەزێنەی گشتی دەوڵەت.
دەستەی دەستپاکی عیراق ئاماژەی بەوەشکردوە،عالیە نوسیف دەبێت 61 ملیار دینار و ئەشواق سالم حەسەنیش پێویستە 12 ملیار دینار بگەرێننەوە بۆ خەزێنەی گشتی.
بەپێی راگەیەندراوی دەستەکە، دادگای تایبەمەند بە تاوانەکانی دژە گەندەڵی ناوەندی، سزاکەی بە شێوەی ئامادەیی و بەپێی ماددەی (١٩/دووەم) لە یاسای دەستەی دەستپاکی دەرکردووە.
هەروەها بڕیاری دەستبەسەرداگرتنی سەرمایە و موڵکە گوازراوە و نەگوازراوەکانیان پشتڕاستکراوەتەوە و مافی داواکردنی قەرەبووکردنەوەی زیانەکانیش بە دەستەی دەستپاکی دراوە دوای ئەوەی بڕیارەکە پلەی کۆتایی وەردەگرێت.
ئەنجومەنی وەزیرانی هەرێمی کوردستان دوا دەرفەت دەداتە هاوبەشانی کارەبا بۆ دانەوەی قەرزەکانیان بە داشکاندنەوە و بڕیاریدا بە درێژکردنەوەی داشکاندن بە رێژەی 50٪ قەرزەکانیان.
ئەنجومەنی وەزیرانی هەرێمی کوردستان بڕیاریدا بە پێدانی دوا دەرفەت بە هاوبەشانی کارەبا لە سەرانسەری هەرێم، تاوەکو لە رێگەی پڕۆژەی روناکییەوە بە داشکاندنی رێژەی 25٪ و 50٪ قەرزە کەڵەکەبووەکانی کارەبایان بدەنەوە.
بە گوێرەی زانیارییەکان، لە سبەینێوە تا رۆژی 18ـی10ـی 2026 سەرجەم هاوبەشانی ماڵان، کشتوکاڵی، بازرگانی، و پێشەسازی دەتوانن قەرزەکانیان بدەنەوە.
ئەنجومەنی وەزیران ئاماژەی بەوەشکردوە، ئەگەر هاوبەشان لەم ماوە دیاریکراوەدا سوود لەم دەرفەتە وەرنەگرن، دوای رێکەوتی 18ـی10ـی 2026 تەواوی قەرزەکانیان بەبێ هیچ داشکاندنێک دەکرێتە قستی مانگانە و راستەوخۆ دەخرێتە سەر پسولەی مانگانەی کارەباکەیان.
لە راگەیەندراوەکەدا هاتووە؛ ئەم هەنگاوەی حکومەت لەپێناو دادپەروەری و ئاسانکارییە بۆ نزیکەی 800 هەزار هاوبەشی کارەبا لەکۆی دوو ملیۆن کە هێشتا قەرزی کۆنیان لەسەر ماوە.
هێڵی ئاسمانیی تورکش ئێرلاین لە ئاگادارییەکی ئەلیکترۆنیدا فڕۆکەخانەی نێودەوڵەتیی جەلال تاڵەبانی لە گۆڕانکاریی وادەی دەستپێکردنەوەی گەشتەکان و پێشخستنیان ئاگادارکردوەتەوە.
بە گوێرەی راگەیەندراوی بەشی پەیوەندییەکانی فڕۆکەخانەی نێودەوڵەتیی جەلال تاڵەبانی لە رێکەوتی 2ـی10ـی 2026ـوە هێڵی تورکیش ئێرلاین گەشتەکانی بۆ فڕۆکەخانەکە دەستپێدەکاتەوە.
بە گوێرەی راگەیەندراوەکە، لە قۆناغی یەکەمدا هەفتانە بە ئەنجامدانی چوار گەشت لە نێوان ئەستەنبوڵ و سلێمانی دەستپێدەکەنەوە و بڕیاریشە، لە 14ـی12ـی2026وە ئاستی گەشتەکان زیاد بکرێن بۆ رۆژانە و تەواوی هەفتە دەگرێتەوە.
بەڕێوەبەرایەتی پۆلیسی پارێزگای سلێمانی ئاگادارییەکی بڵاوکردەوە تێیدا هاتووە سێ رۆژە تەرمێک دۆزراوەتەوە و داوا لە کەسوکاری دەکات سەردانی پزیشکی دادوەریی سلێمانی بکەن.
لە راگەیەندراوەکەی پۆلیسی سلێمانیدا هاتووە ئەو تەرمی ئەو هاووڵاتیەی دۆزراوەتەوە، ناوی وریا محەمەد مەهدی و لەدایکبووی ساڵی 1988ـە.
ئاماژەی بەوەشکراوە، ناوی دایکی نازەنین ڕۆستەم و لە رێکەوتی 21ـی9ـی2026 تەرمەکەیان لە گەڕەکی سەرچناری شاری سلێمانی دۆزراوەتەوە.
بەپێی راگەیەندراوەکەی پۆلیس، لە ئێستادا تەرمەکەی لە پزیشکی دادوەریی شاری سلێمانییە و داوا لە کەسوکاری یان هەر کەسێک دەکات کە زانیاری لەبارەیەوە هەیە، سەردانی پزیشکی دادوەری بكات یان پەیوەندی بە بنکەی پۆلیسی سەرچنارەوە بکات بە ژمارە مۆبایلی (07731468640).
سەرۆکی یەکێتی پەیامێکی لەبارەی کۆبونەوەی وەفدی ئەمریکا و ئێران لە ئەمریکا بڵاوکردەوە و دەڵێت؛ جیهان بە هیواوە دەڕوانێتەوە ئەو کۆبونەوەیە.
سەرۆکی یەکێتی ئاماژەی بەوەکردوە، بە ناوی گەلی کوردەوە، گەرمترین پیرۆزبایی و ستایشم ئاڕاستەی سەرکردایەتی و دانوستانکارانی ئەو دوو گەلە مەزنە دەکەم.
دەقی پەیامەکەی سەرۆکی یەکێتی
ئەمڕۆ، جیهان بە هیوایەکی زۆرە دەڕوانێتە کۆبوونەوەی نێوان نوێنەرانی ویلایەتە یەکگرتووەکانی ئەمریکا و کۆماری ئیسلامیی ئێران لە نیویۆرک بۆ گفتوگۆکردنێکی تایبەت و مێژوویی.
بە ناوی گەلی کوردەوە، گەرمترین پیرۆزبایی و ستایشم ئاڕاستەی سەرکردایەتی و دانوستانکارانی ئەو دوو گەلە مەزنە دەکەم.
بوێرییەکی مەزنی دەوێت بۆ تێپەڕاندنی دەیان ساڵ لە دووبەرەکی، بەڵام سەرکردایەتی راستەقینە بەو جەنگانە ناپێورێن کە دەیانکەین، بەڵکو بوێری هەنگاونان و بەرقەرارکردنی ئاشتییە.
دانوستانکارانی ئێرانی و ئەمریکی ئەوەیان بۆ جیهان سەلماند کە پاڵەوانبوون چۆنە و چۆن بە ژیری، کرداری و ئازایەتییەکی نکۆڵی لێنەکراو رووبەڕووی ئاڵۆزییەکان دەبنەوە.
رێککەوتنێکی هەمیشەیی لە نێوان ویلایەتە یەکگرتووەکانی ئەمریکا و ئێراندا تەسلیمبوون یان لاوازی دەسەڵات نییە، بەڵکو سەرکەوتنێکی هاوبەشە. لەم ساتەدا، کلیلی سەرکەوتنی هەر نەتەوەیەکیان بە دەستی ئەوی دیکەیانە. بە کارکردنی پێكەوەیی، هێز و توانای ئەوەیان هەیە کە بەرگری لە بەرژەوەندییە نیشتمانییە گرنگەکانیان بکەن، کەرامەتی خۆیان بپارێزن و بە جیهانی نیشان بدەن کە شکۆمەندی لە دیپلۆماسیدایە. لەم بارودۆخەدا، پێویست ناکات هیچ لایەنێک بەسەر لایەکەی تردا زاڵ بێت؛ بەڵکو دەکرێت هەردوولا ببنە هاوبەش لە سەرکەوتنێکی مێژویی بۆ ئاسایشی جیهانی.
خەڵکی ویلایەتە یەکگرتووەکانی ئەمریکا، بە گیانی داهێنان، ئازادی و سەرکردایەتی ناسراون و خەڵکی شکۆمەندی ئێرانیش، میراتگری شارستانییەتێکی مەزنن بە کولتوورێکی دەوڵەمەند، خۆڕاگر و ژیری ناسراون، شایستەی داهاتوویەکن دوور لە ئاڵۆزی و توندوتیژی.
ئەم کۆبوونەوەیە دەرگا بە رووی سەردەمێکی نوێدا دەکاتەوە، کە تێیدا دەتوانرێت خواستەکانی هەردوو کۆمەڵگا لە کەشوهەوایەکی شکۆمەندانەدا بهێنرێنە دی.
بۆ ناوچەکەمان، کاریگەرییە گەورە و بەردەوامەکانی ئەم بارودۆخە بە هیچ شێوەیەک نابێت کەم سەیربکرێن. لێکتێگەیشتنی سەرکەوتووانەی نێوان واشنتن و تاران، دەبێتە بناغەیەکی راستەقینە بۆ رۆژهەڵاتی ناوەڕاست بەرەو ئاشتییەکی بەردەوام، سەقامگیری و گەشەپێدانی ئابووریی هاوبەش بۆ هەموو لایەک.
بۆ ئەو سەرکردە و دیپلۆماتکارانەی کە بەردەوامن لە ئەم کارە گرنگە: جیهان چاوی لە ئێوەیە و دڵمان لەگەڵتاندایە. بە هەمان ئەو رۆحییەت و بوێرییەوە بەرەو پێشەوە بڕۆن کە لەسەر ئەم مێزە کۆیکردنەوە، بەرەو پێشەوە هەنگاو بنێن. ئێوە پێشتر ئەوەتان سەلماندووە کە گۆڕانکاریی مێژوویی شتێکە بەدەستدەهێندرێت، ئێستاش، با بەڵێنی سبەینێیەکی پڕ لە ئاشتی بدەین.
خودا ویلایەتە یەکگرتووەکانی ئەمریکا و کۆماری ئیسلامیی ئێران بپارێزێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
ئەحمەد شەرع رایگەیاند، بە رەسمی ناسینی مافە کانی کورد و زمانی کوردی ئەرکێکی رەوایە و لە مەرسومە 13 خاڵیەکەدا چەسپاوە و دوای 100 ساڵ پێشوازییەکی زۆر گەرمی لێکرا.
لە میانی کۆبونەوەکانی لە ئەمریکا، ئەحمەد شەرع، سەرۆکی کاتی سوریا رایگەیاند، رێککەوتون لە ناوچە کوردنشینەکاندا خوێندن بە زمانی کوردی بخوێندرێت و ئێستا تیمە تەکنیکییەکانی وەزارەتی پەروەردە سەرقاڵی دارشتنی میکانیزمی جێبەجێکردنی ئەو پرۆسەیەن.
بە گوێرەی مەرسومە 13خاڵیەکەی کە ئەحمەد شەرع ئیمزای کردوە، رەگەزنامە دەبەخشێتە ئەو کوردانەی بێ رەگەزنامەن و سەرژمێریی ساڵی 1962 هەڵدەوەشێنێتەوە.
مەرسومەکە، بە رەسمی داندەنێت بە کوردا وەک بەشێکی سوریا و زمانی کوردیش وەکو زمانێکی نیشتمانی لە خوێندنگەکاندا جێگیر دەکات و نەورۆزیش وەکو پشویەکی رەسمی وڵاتەکە دیاری کراوە.
شەرع ئاماژەی بەوەشکردوە، قۆناغی راگوزەر سنوردارە بۆ پێنج ساڵ و نابێت وەک پێوەرێک بۆ بەردەوامیی دەوڵەتی سوریا بەکاربهێنرێت و کار بۆ باشترکردنی یاساکان لە رێگەی مەجلیسی گەلەوە بەردەوامە.
ئەم قسانەی ئەحمەد شەرع لە کاتێکدایە تا ئێستا خوێندن بە زمانی کوردی بە تەواوەتی نەچوەتە بواری جێبەجێکردنەوە و لە ناوچە کوردییەکان رۆژانە دژی نەخوێندن بە زمانی کوردی و مامڵەنەکردن لەگەڵ زمانەکەدا وەک زمانێکی رەسمی خۆپیشاندانە.
ڤۆلۆدیمیر زیلینسکی، سەرۆکی ئۆکراین رایگەیاند، کە کیێڤ و واشنتۆن هاوڕان لەسەر پێویستیی کۆتاییهێنان بە جەنگی روسیا پێش هاتنی وەرزی زستان.
سەرۆکی ئۆکراین رایگەیاند، وڵاتەکەی ئامادەیە هێرشەکانی بۆ سەر دامەزراوەکانی وزەی رووسیا رابگرێت، بە مەرجی ئەوەی مۆسکۆش پابەندی هەنگاوێکی هاوشێوە بێت و هێرش نەکاتە سەر سیستەمی وزەی وڵاتەکەی.
ئەم لێدوانەی زیلینسکی دوای ئەنجامدانی کۆبونەوەیەکی ئەرێنی و بەرهەمدار هات وەک خۆی دەڵێت؛ لەگەڵ دۆناڵد ترەمپ، سەرۆکی ویلایەتە یەکگرتووەکانی ئەمریکا، لە پەراوێزی کۆبونەوەی کۆمەڵەی گشتیی نەتەوە یەکگرتوەکان.
سەرۆکی ئۆکراین لە پەیامێکیدا لە سۆشیال میدا بڵاویکردوەتەوە، ئاماژەی بەوەکردوە، لەگەڵ دۆناڵد ترەمپ تاوتوێی کۆمەڵێک هەنگاوی شیاویان کردووە بۆ کەمکردنەوەی ئاڵۆزییەکان، بە ئامانجی رەخساندنی زەمینەیەکی گونجاو بۆ دەستپێکردنی گفتوگۆ و پرۆسەی دیپلۆماسی.
ئەم وتانەی زیلینسکی لە کاتێکدایە، جەنگی نێوان مۆسکۆ و کیێڤ گەشتوەتە لوتکە و رۆژانە بە بەردەوامی هێرشی درۆنی و موشەکی دەکەنە سەریەکتری و بەتایبەت کەرتی وزەی یەکتری دەکەنە ئامانج.
دانی دانۆن، باڵیۆزی ئیسرائیل رایگەیاند، لە کاتی رودانی هەر هێرشێکی ئێران بۆ سەر وڵاتەکەی، وەڵامێکی ئازار بەخشیان دەبێت و ئاشکراشی کرد شوێن خۆشاردنەوەی موجتەبا خامنەیی دەزانن و ئاگاداری ئەوەشن چی دەکات.
باڵیۆزی ئیسرائیل لە کۆبونەوەی نەتەوەیەگرتوەکان، لە چاوپێکەوتنێکیدا لەگەڵ فۆکس نیوز رایگەیاند، زانیاری هەواڵگری زۆر وردیان لەبەردەستدایە و بە تەواوی ئاگاداری شوێنی خۆحەشاردان، چالاکی و وتەکانی رێبەرانی ئێرانن.
دانۆن جەختی لەوە کردەوە کە سەرکردەکانی کۆماری ئیسلامیی ئێران لە بەرانبەر هێزی وڵاتەکەی نیشانەی نیگەرانی و ترسیان لە گیانی خۆیان پێوە دیارە.
ئاماژەی بەوەشکرد، سەرکردەکانی ئێران باش تێگەیشتوون لەوەی ئەگەر هێرشبکەنە سەر ئیرسائیل تەنها چەند رۆژێکی کەم دەخایەنێت و لە ناویان دەبەین.
ئیمانوێل ماکرۆن لە کۆبوونەوەی گشتیی نەتەوەیەکگرتووەکان وتارێکی پێشکەشکرد و تێیدا رەخنەی توندی لە ئیسرائیل گرت و پشتیوانیی خۆشی بۆ فەڵەستین دەربڕی.
ئیمانوێل ماکرۆن، سەرۆکی فەرەنسا لە کۆبوونەوەی گشتیی نەتەوەیەکگرتووەکان و لە وتارێکدا رایگەیاند، ئیسرائیل پێشێلی سەروەریی هەموو ئەو وڵاتانە دەکات کە هاوسنوورین.
وتیشی، دەیان دەوڵەت پێش ساڵێک دانیان بە دەوڵەتی فەڵەستیندا ناوە، بەڵام بەهای ئەو دانپێدانانە چی دەبێت ئەگەر بەردەوام بن لە بێدەنگیی بەرانبەر ئەوەی لە غەززە روودەدات.
ئاماژەی بەوەشکرد، هەر کەسێک بانگەشەی ئەوە بکات کە ئاسایشی ئیسرائیل لەڕێگەی پێشێلکردنی سەروەریی هەموو وڵاتانی دراوسێیەوە دێتە دی، هەڵەیەکی زۆر گەورە دەکات و ئەوەی پێی دەوترێت ئاشتی لە غەززە، هیچ ڕێڕەوێکی مرۆیی نەکردووەتەوە و ئەوەی لە غەززە روودەدات بۆ هەموومان مایەی شەرمەزارییە.
ئەوەشی روونکردەوە: ئێمە هەموو رۆژێک لە کەناری رۆژئاوا گەواهیدەری پێشێلکارین، بۆیە لە کاتێکدا سەرەتاییترین مافە بنەڕەتییەکانیان پێشێلدەکرێت، ئێمە باوەڕمان بە سەروەری بۆ فەڵەستینییەکان هەیە.
شارەوانیی هەولێر بڵاویکردەوە، لە پێناو پاراستنی سیمای شار و رێگریکردن لە زێدەڕۆیی، هەڵمەتێکی فراوانی لابردنی بەنزین فرۆشەکانی سەر شەقامەکانیان دەستپێکردووە.
سەرۆکایەتیی شارەوانیی هەولێر رایگەیاند، ئەمشەو تیمەکانمان لە بەڕێوەبەرایەتی شارەوانیی دوو، بە هەماهەنگی لەگەڵ پۆلیسی شارەوانی، هەڵمەتێکی فراوانی لابردنی بەنزین فرۆشەکانی سەر شەقامەکانیان دەستپێکرد.
ئاماژەی بەوەشداوە، ئەم دیاردەیە لە ئێستادا بە شێوەیەکی بەرچاو زیادیکردووە، بەبێ هیچ مۆڵەتێک و مەرجی سەلامەتی و رەچاوکردنی کوالێتی و رێنماییەکان، بەنزینی خراپ بەسەر هاوڵاتیان و شوفێراندا ساغدەکەنەوە.
ئەوەشی روونکردووەتەوە، جگە لە ناشرینکردنی سیمای شار، ئەم کارە مەترسییەکی گەورەیە بۆ گیانی خودی فرۆشیارەکانیش، لەبەر ئەوەی هیچ مەرجێکی سەلامەتییان تێدا نییە و ئەگەری رووداوی نەخوازراو و کەوتنەوەی ئاگریشی زۆرە.
سکرتێری گشتیی نەتەوەیەکگرتووەکان رایدەگەیەنێت، مافەكانی مرۆڤ پێشێلكراون و برسیكردن كراوەتە چەكی جەنگ.
لە نیویۆرک، كۆبوونەوەی گشتیی نەتەوەیەكگرتووەكان دەستیپێكرد و لە پەراوێزی کۆبوونەوەکەشدا ئەنتۆنیۆ گۆتێرێز، سکرتێری گشتیی نەتەوەیەکگرتووەکان هۆشدارییەکی توندی دا لەسەر رەوشی جیهان و رایگەیاند، هێزی سەربازی بەتەنها ناتوانێت ئاسایش مسۆگەر بكات.
ئاماژەی بەوەشکرد، لە 10 ساڵی رابردوودا جەنگەكان دەرئەنجامی وێرانكەریان لێكەوتووەتەوە و تێیاندا مافەكانی مرۆڤ بەشێوەیەکی مەترسیدار پێشێلكراون.
سکرتێری گشتیی نەتەوەیەکگرتووەکان جەختیشی کردەوە، خەڵكی مەدەنی راستەوخۆ كراونەتە ئامانج و لە زۆرێک لە ململانێکاندا برسییكردن وەک چەكی جەنگ بەكارهێنراوە.
ئەنجومەنی وەزیرانی هەرێم، تەمەنی خانەنشینی کەسوکاری شەهیدانی فراوانکرد و بۆ سودمەندبوون دەبێت بەڵگەی سەلمێندراو هەبێت.
فەرمانگەی میدیا و زانیاری حکومەتی هەرێم رایگەیاندووە: بەپێی فەرمانە نوێیەکەی ئەنجومەنی وەزیران، بە ژمارە (11760) لە ڕۆژی 2026/9/17، بڕگەی (سێیەم/2) لە فەرمانەکانی پێشووتر هەموار کراوەتەوە، لە دەقە هەموارکراوەکەدا بڕیار دراوە، کە مافی درێژکردنەوەی تەمەنی خانەنشینی بۆ 65 ساڵ، جگە لە کەسوکاری شەهیدانی هەرێمی کوردستان، ئەم توێژانەی خوارەوەش بگرێتەوە:
- ئەو فەرمانبەرانەی کەسوکاری پلە یەک و پلە دووی شەهیدانی کوردی فەیلین.
- ئەو فەرمانبەرانەی کەسوکاری پلە یەک و پلە دووی ئەو شەهیدانەن، کە بەپێی یاسای دەزگای شەهیدانی (ئیتیحادی) ژمارە (2)ی ساڵی 2016ی هەموارکراو تۆمارکراون.
بەپێی زانیارییەکانی فەرمانگەی میدیا و زانیاری، لە فەرمانەکەدا جەخت لەوە کراوەتەوە، کە مەرجی سەرەکی بۆ سوودمەندبوونی ئەو فەرمانبەرانە لەم بڕیارە، پێشکەشکردنی بەڵگەی فەرمییە لەلایەن دەزگای ناوبراوەوە بە مەبەستی پشتڕاستکردنەوەی دۆسییەکانیان.
پرۆژەی روناکی هاوبەشانی کارەبا ئاگادار دەکاتەوە، پێویستە هەموو قەرزە کۆنەکانی پێش پڕۆژەی روناکی کە ماونەتەوە لە رێگەی قیستی مانگانە بەبێ هیچ داشکاندنێک لە ماوەی 24 مانگدا بدرێنەوە.
ئاماژەی بەوەشکردوە، ئەم رێکارە لە مانگی 10ـوە چاپدەکرێت و دەبێت لەگەڵ پسوڵەی مانگانەی کارەبای روناکی بدرێت.
پرۆژەی روناکی ئاماژەی بەوەشکردوە، بۆ ئەو هاوبەشانەی قەرزی کۆنیان لەسەرە ماوەی ئاسایی 50 رۆژی پارەدانی پسولەی کارەبایان لەسەر جێبەجێ دەکرێت.
ماوەی دانەوەی قەرزەکەش، بۆ هاوبەشانی کارەبای بازرگانی گەورە و پیشەسازی شەش مانگە و بۆ بازرگانی بچوک 12 مانگ و بۆ کشتوکاڵ و ماڵان 24 مانگە.
بە گوێرەی راگەیەندراوەکەی پرۆژەی روناکی هەر هاوبەشێکی کارەبا، قەرزی پێش روناکی نەداتەوە، دوای 50 رۆژ کارەباکەی دەبڕدرێت.