بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە لی جوون ئیڵ، باڵیۆزی کۆریای باشوور لە عیراق و ئونگیۆهه شیم، کونسوڵی ئەو وڵاتە لە هەرێمی کوردستان کرد.

لە دیدارەکەدا، سەرۆک بافڵ بەبۆنەی دەستبەکاربوونیانەوە پیرۆزبایی لێکردن و هیوای سەرکەوتنی لە ئەرکە نوێکانیاندا بۆ خواستن، هاوکات پشتیوانیی یەکێتیی نیشتمانیی کوردستانی بۆ سەرخستنی کارەکانیان دووپاتکردەوە. 

هەروەها جەخت لە برەودان بە هەماهەنگی و فراوانکردنی پەیوەندییەکان کرایەوە، بەتایبەت لە بوارەکانی دیپلۆماسی، ئابووری و کولتووریدا.

لە داهێنانێکی نوێدا، وڵاتی چین وێستگەیەکی تاقیکاریی وزەی خۆری لە قوڵایی 10 مەتر لە ژێر دەریادا بەسەرکەوتویی تاقیکردەوە؛ بەمەش ئاسۆیەکی نوێی بۆ دابینکردنی کارەبای بەردەوام بۆ رۆبۆت، کامێرا و ئامێرە دەریاییەکان لە قوڵایی دەریادا دەرەخسێنێت.

میدیاکانی چین بڵاویانکردوەتەوە، چین توانی لە هەنگاوێکی پێشەنگدا یەکەم وێستگەی وزەی خۆریی ژێر ئاو لە قووڵایی 10 مەتردا تاقی بکاتەوە و سەرکەوتوو بێت.

ئەم سیستمە کە لەلایەن زانکۆی یونیانی وڵاتەکەوە پەرەی پێدراوە، پشت بە خانەی پێرۆڤسکایت دەبەستێت و توانی لە تاریکییەکی کەمی ژێر دەریاشدا پاترییەکان پڕ بکاتەوە و تیشک بداتەوە.

ئەم داهێنانە نوێیە دەرگا بۆ وزەیەکی بەردوام لە ژێر ئاو دەكاتەوە و دەتوانرێت بۆ کارپێکردنی کامێرا، رۆبۆتە و ئامێرە دەریاییەکان بەکاربهێنرێت، کە ئەمەش چارەسەرێکی گرنگ بۆ کێشەی دابینکردنی کارەبا لە قوڵایی دەریاکاندا دابین دەکات.

قوباد تاڵەبانی، جێگری سەرۆک وەزیران سەردانی وەزارەتی پلاندانانی حکومەتی هەرێمی کوردستانی کرد و لەگەڵ د.دارا رەشید، وەزیری پلاندانان و بریکاری وەزیر و راوێژکار و بەڕێوەبەرە گشتییەکانی وەزارەتەکە کۆبووەوە.

لە کۆبوونەوەکەدا کە رۆژی سێشەممە 22ـی 9ـی 2026 بەڕێوەچوو، د. دارا رەشید، وەزیری پلاندانان راپۆرتێکی لەبارەی کار و چالاکییەکانی وەزارەتەکە پێشکەش کرد و سوپاسی قوباد تاڵەبانی کرد کە هەمیشە پشتیوان و هاوکاریان بووە.

جێگری سەرۆک وەزیران لە کۆبوونەوەکەدا دەستخۆشی لە وەزیر و هەموو بەڕێوەبەرەکان و ستافی وەزارەتی پلاندانان کرد، کە لە ماوەکانی رابردوودا بە باشی ئەرکەکانی خۆیان جێبەجێ کردووە و بە تایبەتیش ئاماژەی بە رۆڵی گرنگی وەزارەتی پلاندانان کرد لە سەرخستنی پرۆسەی سەرژمێریی گشتیی دانیشتووانی عیراق و چەسپاندنی رێژەی راستەقینەی کورد لە پرۆسەکەدا.

قوباد تاڵەبانی داوایکرد وەزارەتی پلاندانان گرنگیی زیاتر بە بابەتی کوالێتیی کۆنتڕۆڵ بدەن و رێوشوێنی باشتر بگرنەبەر، چوونکە ئەم پرسە پەیوەندیی راستەوخۆی بە تەندروستیی هاووڵاتییانەوە هەیە. هەروەها پاش ئاماژەدان بە گرنگیی داتا لە پرۆسەی حکومڕانیدا، داواشیکرد لە کۆکردنەوەی داتادا سوود لە ژیریی دەستکرد و تەکنەلۆژیای نوێ وەربگرن.

 

وەزارەتی بازرگانی عیراق رایگەیاند، بڕی گەنمی بەرهەمهێنراو و وەرگیراو لە جوتیاران دابەزینی بەخۆیەوە بینیوە لە ئەمساڵدا و گەیشتوەتە چوار ملیۆن و 800 هەزار تۆن.

وەزارەتی بازرگانی عیراق لە راگەیەنراوێكدا ئاماژەی بەوەكردووە، بڕی ئەو گەنمەی ئەمساڵ بەرهەمهاتووە بەراورد بە ساڵانی رابردوو كەمترە و بڕەكەی چوار ملیۆن و 800 هەزار تۆنە.

دەشڵێت، لە ساڵی رابردوو زیاتر لە پێنج ملیۆن تۆن و لە ساڵی 2024 شەش ملیۆن تۆن بەرهەمهاتووە

 وتیشی:بەهۆی ئەم بەرهەمە زۆرەی ناوخۆوە، پێویست ناكات گەنم لە دەرەوە هاوردە بكرێت، كە ئەمەش هەنگاوێكی گرنگە بۆ پاشەكەوتكردنی بودجەی دەوڵەت.

راشیگەیاند، وەزارەت پلانێكی روونی هەیە  بۆ ئەوەی بەرهەمی گەنمی ئەمساڵ وساڵانی رابردوو وەك یەدەگێكی ستراتیژی بەكاربهێنێت بۆ مسۆگەركردنی پێداویستییەكان تاوەكو كۆتایی ساڵی 2028.

ئاماژەی بەوەشكردووە، حكومەت لە هەماهەنگیدایە بۆ خەرجكردنی 500 ملیار دینار وەك قۆناغێكی نوێ بۆ  شایستە داراییەكانی جوتیاران.

سەرۆکی پەرلەمانی ئێران رایگەیاند، هیچ سنورێک بۆ توانای موشەکی باڵیستی وڵاتەکەی نییە و ئەمریکا ناتوانێت دەسەڵاتی خۆی بەسەر گەلی ئێراندا بەسەپێنێت.

محەمەد باقر قالیباف، سەرۆکی پەرلەمانی ئێران رایگەیاند، وڵاتەکەی لە روی توانا موشەکییەکانەوە لە لوتکەی هێزیدایە  و هیچ سنورێک بۆ تواناکانیان نییە و هەر شوێنێکیان بوێت دەتوانن بیکەنە ئامانج.

قالیباف ئاماژەی بەوەکردوە متمانە بەخۆبوون، پشتبەستن بەخۆبوون لە چەک و یەکگرتوویی نیشتمانی بەرهەمی بەرگریی پیرۆزن  هۆکاری سەرکەوتنەکانیانن.

قاڵیباف جەختیکردەوە، دۆناڵد ترەمپ دەبێت بزانێت ناتوانێت دەسەڵاتی خۆی بەسەر نەتەوەی ئێران و هیزە چەکدارەکانیاندا هەبێت.

لەبارەی دەستپێکردنەوەی گفتوگۆکان، سەرۆکی پەرلەمانی ئێران وتویەتی؛ دوژمن دەبێ بزانێ کە دانوستاندن مەیدانی خەباتە؛ دیپلۆماسی تەسلیمبون نییە، بەڵکو گۆڕینی دەسەڵاتی مەیدانەکە بۆ دەستکەوتێکی سیاسی.

سەرۆك كۆماری ئێران رایگەیاند، ئێران لە ناوەندە نێودەوڵەتییەكاندا بەرگری لە هەڵوێستەكانی خۆی دەكات و دەشڵێت: چەندین جار رێككەوتنمان ئیمزا كردووە بەڵام ئەمریكا پابەندی نییە.

مەسعود پزیشكیان، سەرۆك كۆماری ئێران بەر لە بەڕێككەوتنی بەرەو نیویۆرك بۆ بەشداریكردن لە كۆبوونەوەكانی كۆمەڵەی گشتیی نەتەوە یەكگرتووەكان رایگەیاند، وڵاتەكەی لە ناوەندە نێودەوڵەتییەكاندا بە توندی بەرگری لە هەڵوێست و مافەكانی دەكات و پەیامی گەلی ئێران دەگەیەنێتە جیهان.

ئاماژەی بەوەشكرد، لەو كۆبوونەوەیەدا تاوانەكانی دژ بە گەلی ئێران دەخەنە روو و جەختی كردەوە، ناكرێت هیچ گەلێك بە زەبری هێز ملكەچبكرێت.

پزیشكیان رەخنەی لە رێككەوتنە نێودەوڵەتییەكان گرت و ئەوەی خستە روو، ئێران چەندین جار چووەتە سەر مێزی گفتوگۆ و رێككەوتنی ئیمزا كردووە، بەڵام لایەنی بەرامبەر پابەند نەبوو بە بەڵێنەكانیەوە، لە ئێستاشدا روداوەكانی غەززە، فەڵەستین، سوریا و یەمەن راستییەكان دەردەخەن.

 

بەمەبەستی روبەڕوبونەوەی کەمئاوی، لە سنوری قەزای چەمچەماڵ بە گوژمەی 48 ملیۆن دینار، 18 بیری ئاو لە سنوری بەڕێوەبەرایەییەکە خرانەکار

بەڕێوەبەرایەتی ئاوی چەمچەماڵ بڵاویکردەوە، لەسەر بودجەی کۆمسیۆنی فریاگوزاری و بوژاندنەوەی قەزای چەمچەماڵ 18 بیر لە سنوری بەڕێوەبەرایەتیەکەیاندا خراونەتە کار.

بەڕێوەبەرایەتیەکە ئاماژەی بەوەکردوە، پرۆسەی کارا کردنی بیرەکان لەلایەن تیمەکانی بەڕێوەبەرایەتی و فەرمانگەکانی ئاوەوە جێبەجێ کراوە.

شێوازی دابەشبونی بیرەکانیش بەمشێوەیەیە؛ سێ بیر لە یەکەی ئاوی کانی شەیتان، شەش بیر لە ناحیەی شۆڕش، هەشت بیر لە ناحیەی تەکیەی کاکەمەند، لەگەڵ بیرێک لە ناحیەی شوان.

بەرێوەبەرایەتییەکە جەختیکردوەتەوە دوای کەوتکەکاری ئەو بیرانە،  لە سنوری هەرسێ ناحیەکەی قەزای چەمچەماڵ، تاڕادەیەکی بەش گرفتی کەمئاوی چارەسەر دەکرێت.

سی ئێن ئێن بڵاویکردوەتەوە، سەرۆک کۆماری ئێران و وەفدەکەی لەژێر رێکارێکی توندی ئەمنیدان و دەبێت چالاکیەکانیان تەنها لە بارەگای نەتەوە یەکگرتووەکاندا بێت، رێگەی چونە فرۆشگاگەورەکان وکرێنی کەلوپەلیشیان پێنادرێت.

سی ئێن ئێن لە زاری لێپرسراوێکی ئەمریکاوە بڵاویکردوەتەوە، پاراستنی ئاسایشی مەسعود پزیشکیان، سەرۆک کۆماری ئێران لە کاتی بەشداریکردنی لە کۆبوونەوەی کۆمەڵەی گشتیی رێکخراوی نەتەوە یەکگرتووەکان، بە شێوەی ڕاستەوخۆ دەسپێردرێتە هێزی نهێنی ئەمریکا.

لە هەمان کاتدا، ئاسایشی ئەندامانی دیکەی وەفدەکەی تاران لەلایەن هێزی ئاسایشی دیپلۆماسیی وەزارەتی دەرەوەی ئەمریکاوە دەپارێزرێت.

هاوکات، لێپرسراوێکی وەزارەتی دەرەوەی ئەمریکا ڕایگەیاند کە بەرپرسانی تاران تەنها بە مەبەستی نوێنەرایەتیکردنی وڵاتەکەیان لە نەتەوە یەکگرتووەکان مۆڵەتی هاتنەژوورەوەیان پێدراوە و دەبێت چالاکییەکانیان تەنها لە چوارچێوەی کاروباری ئەو ڕێکخراوەدا بنوێنن.

سی ئێن ئێن ئاماژەی بەوەکردوە، بەپێی رێکارەکان، ئەگەر بڕیار بێت وەفدەکە بچنە دەرەوەی ناوچەی دەوروبەری بارەگای نەتەوە یەکگرتووەکان، فڕۆکەخانەی نێودەوڵەتیی کێنیدی، یان نوێنەرایەتیی ئێران، دەبێت پێشوەختە داوای مۆڵەتی رەسمی بکەن.

جگە لەوەش، وتەبێژی وەزارەتی دەرەوەی ئەمریکا جەختی کردەوە کە بڕیارەکەی ساڵی ڕابردووی ئیدارەی ترەمپ هێشتا کاریپێدەکرێت و بەپێی ئەوە  لێپرسراوانی ئێران مافی کڕینی کەلوپەلی گرانبەها و سەردانیکردنی فرۆشگە گەورەکانی ئەمریکایان لێ قەدەغە کراوە.

کۆریای باکور بەردەوامە لە تاقیکردنەویە موشەکە نوێیەکانی و لە نوێترین تاقیکردنەوەشدا، میدیای وڵاتەکە ديڵێت؛ موشەکێکیان تاقیکردوەتەوە دەبێتە سەرئێشەیەکی بێ دەرمان بۆ نەیارەکانیان.

میدیا رەسمییەکانی کۆریای باکور ڕایانگەیاند، كیم جونغ ئون، رێبەری وڵاتەکە، سەرپەرشتی تاقیکردنەوەی سیستمێکی چەکی نوێی  کردووە و رایگەیاندووە کە ئەم تاقیکردنەوەیە دەستکەوتێکی گەورەیە و پێشکەوتنی بەردەوامی توانا سەربازییەکانی پیۆنگیانگ نیشان دەدات.

ئاژانسی دەنگوباسی ناوەندیی کۆریای باکور ئاماژەی بەوە کردووە، سوپای وڵاتەکەی بە سەرکەوتوویی و بە ئامادەبوونی رێبەری وڵات چەکەکەی تاقیکردووەتەوە و  كیم ستایشی تاقیکردنەوەکەی کردووە و بە بەڵگەیەکی دیاری "تەکنەلۆجیای بەرگریی زۆر هاوچەرخ" وەسفی کردووە.

جەختیشی لەوە کردووەتەوە کە ئەم توانایانە سەرئێشەیەکی بێدەرمان بۆ نەیارانی وڵاتەکەی دروست دەکات و رۆڵێکی بەرچاو دەگێڕێت لە ئامادەیی بۆ جەنگ و گەشەپێدانی ئایندەی هێزە چەکدارەکاندا.

ئەم راگەیاندنە دوای ئەوە هات کە کۆریای باشوور و ژاپۆن تەئکیدیان کردەوە پیۆنگیانگ دوو موشەکی باڵستیی کورتمەودای بەرەو ئاوەکانی ڕۆژهەڵاتی وڵاتەکە هەڵداوە.

دوای ئەوەی ئێران دەستیگرت بەسەر ژێردەریایەکی ئەمریکا لە گەروی هورمز، سوپای پاسداران دەڵێت؛ دەستیان کردوە بە دروستکردنەوەی ئەو ژێر دەریاییە .

سەردار محێبی، وتەبێژی سوپای پاسداران بە میدیای وڵاتەکەی راگەیاندوە، ژێردەریایەکە تەکنەلۆژیای زۆر بەرزی تێدا بەکارهاتووە.

ئاماژەی بەوەشکردوە، لە ئێستادا دەستیانکردوە بە هەڵوەشاندنەوەی و دوبارە دروستکردنەوەی تاوەکو بیخەنە خزمەتی سوپاوە.

ئەمە لە کاتێکدایە، رۆژی سێشەممە، 8ـی ئەیلول، هێزی دەریایی سوپای پاسداران رایگەیاند، ئۆپەراسیۆنێکی هەواڵگری و مەیدانیی ئاڵۆزدا، دەستیان بەسەر یەکێک لە مۆدێرنترین ژێردەریا  سوپای ئەمریکادا گرت لە دەروازەی تەنگەی هورمز و ئەمریکاش رایگەیاند؛ ئەو ژێردەریایە کۆنە و بەهۆی کێشەی تەکنیکیەوە لە کارکەوتوە.

 

 

 

سەرۆك وەزیرانی عیراق رایدەگەیەنێت، ئێران رێگرە لە هەناردەكردنی نەوتی عیراق و داهاتی نەوتی وڵاتەكەش 60%ی كەمیكردووە.

عەلی زەیدی لە چاوپێكەوتنێكیدا لەگەڵ رۆژنامەی نیویۆرك تایمز رایگەیاندووە، ئێران رێگەی نەداوە كەشتییە نەوتهەڵگرەكانی عیراق بە گەرووی هورمزدا تێپەڕن.

ئاماژەی بەوەش كردووە، ئامانجی ئێران لەو هەنگاوە بەرزكردنەوەی نرخی نەوتە لە بازاڕەكانی جیهان، وەك خۆی دەڵێت، بەهۆی جەنگەوە عیراق %60ی داهاتی مانگانەی نەوتەكەی لەدەستداوە.

زەیدی ئاشكراشیكردووە، گروپە چەكدارەكان دەست بە رادەستكردنی چەكەكانیان دەكەن و پرۆسەكە تا 30ی حوزەیرانی 2027 كۆتایی دێت.

روونیشیكردووەتەوە، قۆناغی یەكەمی كۆنترۆڵكردنی چەك لە مەودایەك كە 90 رۆژ دەخایەنێت دەستپێدەكات و تێیدا ئەو گروپانە هیچ هێرشێك ناكەن و روبەڕوی هێرشی ئەمریكاش نابنەوە.

زەیدی هۆشداریی توندیشیداوە بەو گرووپانە كە ئەگەر دوای وادەی دیاریكراو بەردەوام بن لە چالاكییەكانیان، ئەوا وەك هێزی لەیاسادەرچوو مامەڵەیان لەگەڵدا دەكرێت.

بۆ سێیەم ساڵ لەسەر یەک، کۆلێژی پزیشکیی زانکۆی سلێمانی متمانەی هەڵسەنگاندنی جیهانیی لە لایەن دەستەی متمانەپێکردنی دامەزراوەکانی خوێندنی باڵا و دڵنیایی جۆری وڵاتی ئوردنی پێدرا و بەمەش بڕوانامەی دەرچوەکانی لە جیهاندا باوەڕپێکراو دەبێت.

کۆلێژی پزیشکیی زانکۆی سلێمانی متمانەی نێودەوڵەتیی ئوردنی بەدەستهێنایەوە و زانکۆی سلێمانیش دەڵێت؛ ئەمە بەرزڕاگرتنی ئاستی ئەکادیمی و زانستیی کۆلێژی پزیشکی لەسەر ئاستی هەرێم و ناوچەکە.

زانکۆی سلێمانی بڵاویکردوەتەوە، دەستەی متمانەبەخشین و دڵنیایی جۆریی دامەزراوەکانی خوێندنی باڵا لە شانشینی ئوردن، بڕیاری بەردەوامیدان بە بەخشینی بڕوانامەی متمانە و دڵنیایی جۆری بۆ کۆلێژی پزیشکیی زانکۆی سلێمانی دەرکرد.

بەپێی نوسراوی رەسمی دەستەکە، ئەنجومەنی دەستەکە بڕیاریداوە بە نوێکردنەوە و بەردەوامیدان بەبڕوانامەی متمانەبەخشین بۆ پڕۆگرامی کۆلێژی پزیشکیی زانکۆی سلێمانی.

ئەم بڕیارەش وەک بەڵگەی پابەندبوونی بەردەوامی زانکۆی سلێمانی دەستنیشان کراوە بۆ پاراستنی ستانداردە جیهانییەکانی خوێندنی پزیشکی و بەرزڕاگرتنی ئاستی ئەکادیمی و زانستیی لەسەر ئاستی هەرێمی کوردستان و ناوچەکەدا.

قوباد تاڵەبانی، جێگری سەرۆک وەزیران پێشوازیکرد لە ئیمانوێل مینیۆ، کونسوڵی گشتیی نوێی فەڕەنسا لە هەرێمی کوردستان و پێکەوە لەبارەی رەوشی سیاسیی هەرێم و پەیوەندییەکانی نێوان هەردوولا ئاڵوگۆڕی بیروڕایان کرد.

ئەمڕۆ دووشەممە،  جێگری سەرۆک وەزیران لە هەولێر بەخێرهاتنی کونسوڵی نوێی فەڕەنسای کرد بۆ کوردستان و هیوای سەرکەوتنی بۆ خواست لە ئەرکەکەیدا.

لە کۆبوونەوەکەدا باس لە پەیوەندیی مێژویی کوردستان و فەڕەنسا کرا و  قوباد تاڵەبانی سوپاسی حکومەت و گەلی فەڕەنسای کرد کە بە تایبەت لە ساڵی 1991بەدواوە بەردەوام پشتیوان و هاوسۆزی گەلی کورد و هەرێمی کوردستان بوون.

هەردوولاش هاوڕابوون کە پێویستە لەم قۆناغەدا ئاستی پەیوەندییەکان لە بوارە جیاوازەکاندا بەهێزتر بکرێت و بۆ ئەم مەبەستەش جەختیان کردەوە لەسەر کاری هاوبەش بۆ بەرەوپێشبردنی زیاتری پەیوەندییەکان.

لە بەشێکی دیکەی کۆبوونەوەکەدا باس لە یەکخستنەوە و رێکخستنەوەی هێزەکانی پێشمەرگە کرا و کونسوڵی گشتیی فەڕەنسا پیرۆزبایی یەکخستنەوەی هێزی پێشمەرگەی لە خەڵکی کوردستان کرد و هەردوولاش هاوڕابوون ئەم روداوە دەتوانێت کاریگەری هەبێت لەسەر لێکنزیکبوونەوەی زیاتری لایەنەکان بۆ پێکهێنانی کابینەی نوێی حکومەتی هەرێم.

لەم چوارچێوەیەدا قوباد تاڵەبانی سوپاسی فەڕەنسای کرد کە بە درێژایی ساڵانی رابردوو هاوکار و هاندەر بووە بۆ یەکخستنەوەی هێزەکانی پێشمەرگە.

لە تەوەرێکی دیکەی کۆبوونەوەکەدا باس لە سەردانەکەی جێگری سەرۆک وەزیران بۆ وڵاتی فەڕەنسا و بەشداری لە فێستیڤاڵی فیلمی کان کرا.

لەمبارەیەشەوە قوباد تاڵەبانی ئاماژەی بەوەدا لە کان لە رێگەی کۆمیسیۆنی فیلمی کوردستانەوە گەورەترین فەندی فیلمی کوردی بۆ پێشخستنی زیاتری سینەمای کوردستان و پەرەپێدانی زیاتری توانای سینەماکارانی کورد راگەیاندووە.

بەهۆی نیگەرانییەکان لە بەرزبونەوەی نرخی سوتەمەنی دۆناڵد ترەمپ، بۆ دوەمجار لەم مانگەدا  داوای لە زیلینسکی کردوە هێرشيکانی بۆ سەر پاڵاوگەکانی نەوتی روسیا راگرێت.

رۆژنامەی فاینانشیاڵ تایمز، بڵاویکردوەتەوە، دۆناڵد ترەمپ، سەرۆکی ئەمریکا لە پەیوەندییەکی تەلەفونیدا، داوای لە  بە ڤۆلۆدیمیر زیلینسکی کردووە هێرشەکانیان بۆ سەر پاڵاوگەکانی نەوتی روسیا راگرن، چونکە  نیگەرانە لەوەی  دەبێتە هۆلی کەمبونەوەی سوتەمەنی و بەرزبونەوەی نرخەکەی.

لێپرسراوێکی باڵای ئۆکراین، بە رۆژنامەکەی راگەیاندوە،پاڵنەری سەرەکی پەیامەکەی ترەمپ کەمبونەوەی سوتەمەنی بووە و بووە و داوای لە زیلینسکی کردووە فەرمان بە سوپای وڵاتەکەی بکات،  هێرشە درۆنیی و رابگرن.

لێپرسراوێکی ئەمریکاش بە فاینانشیاڵ تایمزی راگەیاندوە، دۆناڵد ترەمپ دەیەوێت؛ دڵنیا بێت دڵنیابێت لەوەی کە بەرهەمهێنانی سوتەمەنی روسیا دەگاتە بازاڕی جیهانی.

جێی باسە لەم منگەدا ئەمە دوەم جارە دۆناڵد ترەمپ ئەو داوایە لە ئۆکراین دەکات، بە تایبەت کە دوێنی، ئۆکراین گەورەترین هێرشی  درۆنی خۆی بۆ سەر مۆسکۆ ئەنجامدا، کە ئاگری لە پاڵاوگەیەکی گەورە بەردا و لایکەم دوو کەس گیانیان لەدەستدا و 20 کەسیش برینداربوون.

لای خۆشیەوە، زیلینسکی لە بارەی پەیوەندییەکی دۆناڵد ترەمپی بە گرنگ وەسفکردوە ورایگەیاندوە، بەم نزیکانە  کۆبوونەوەی لەگەڵ سەرۆکی ئەمریکا  لە پەراوێزی کۆبونەوەی گشتی نەتەوە یەکگرتووەکان دەبێت.

جەی دی ڤانس، جێگری سەرۆکی ئەمریکا، ئێرانی بە تێکدانی ئاسایشی کەشتیوانیی نێودەوڵەتی تۆمەتبار کرد و رایگەیاند، بەهۆی ئەم کردەوانەی تارانەوە نرخی وزە لە بازاڕەکانی جیهاندا روی لە بەرزبوونەوە کردوە. 

جێگرەکەی دۆناڵد ترەمپ رایگەیاند،بەهۆی بە ئامانج گرتنی کەشتییەکان لەلایەن ئێرانەوە لە گەروی هورمزدا، نرخی وزە لە جیهاندا بەزربوەتەوە و بۆ ئەو مەبەستەش رێکاری پێویستیان گرتوەتەبەر.

جێگری سەرۆکی ئەمریکا رونیشی کردەوە، تێکدانی کەشتیوانیی نێودەوڵەتی و دروستکردنی ئاستەنگ لەلایەن ئێرانەوە، پەرچەکردارێک بووە بەرانبەر ئەو هەنگاوانەی واشنتۆن بۆ رێگریکردن لە دەستگەیشتنی تاران بە چەکی  ئەتۆمی گرتویەتیەبەر.

ڤانس دەشڵیت؛  سەرەڕای رێگرییەکانی ئێران، بەڵام تا ئێستاش بڕێکی زۆر لە نەوت و گاز بەپێی پێویست لە گەروی هورمزەوە دەگوازرێتەوە.

ئەم قسانەی جێگری دۆناڵد ترەمپ لە کاتێکدایە، پێشتر دۆناڵد ترەمپی سەرۆکی ئەمریکا رایگەیاندبوو، جەنگی ئێران نەبوەتە هۆی بەرزبونەوەی وزە لە جیهاندا، بەڵکو جەنگی روسیا و ئۆکراین هۆکاری  بەرزبونەوەکەن.

ئەنجومەنی نوێنەران چەند راسپاردەیەكی گرنگی بۆ چارەسەركردنی قەیرانی سوتەمەنی لە عیراق و هەرێم پەسەند كرد، داواش دەکات پەلە بکرێت لە ناردنی نەوتی سپی بۆ هەرێم.

لە دانیشتنی ئەمڕۆیدا ئەنجومەنی نوێنەران دەنگی لەسەر كۆمەڵێك راسپاردە دا بۆ چارەسەركردنی قەیرانی سوتەمەنی لە عیراقدا و داوادەکات چاو بە بڕیاری بەرزكردنەوەی نرخی سوتەمەنی بخشێنرێتەوە و پلانێكی خێرا بۆ رێگری لە قەیرانەكە دابنرێت.

 هەروەها جەخت لەسەر زیادكردنی چاودێری و رێگریكردن لە قاچاغچییەتی، دابینكردنی سووتەمەنی پاڵپشتیكراو بۆ جووتیاران دەكاتەوە.

لەبارەی هەرێمی کوردستانیشەوە، ئەنجومەنی نوێنەران داوایکردوە پێش دەستپێکردنی وەرزی زستان نەوتی سپی بە هەرێم بنێردرێت و پەلە بکرێت لە چارەسەرکردنی کێشەی سوتەمەنی.