هەواڵەکان
بەڕێوەبەرایەتی کەشناسی و بوومەلەرزەزانی سلێمانی ئاماری 24 سەعاتی رابردووی بارانبارینی لە ناوچە جیاوازەکانی هەرێمی کوردستان بڵاوکردەوە و زۆرترین رێژە لە یاخسەمەر تۆمارکراوە.
بەپێی ئامارەکان، لە سەعات 9ی بەیانیی دوێنێ تا 9ی بەیانیی ئەمڕۆ یەکشەممە (28ی کانونی یەکەمی 2025)، شەپۆلێکی بەهێزی بارانبارین ناوچە جیاوازەکانی گرتووەتەوە.
لە سنوری پارێزگای سلێمانی، زۆرترین بڕی باران لە یاخسەمەر باریوە کە 132 ملم بووە، دوای ئەو لە سەرکەپکان 115 ملم و لە پێنجوێن 113.5 ملم باریوە. لە سەنتەری شاری سلێمانیش 38.6 ملم تۆمارکراوە.
لە پارێزگای هەولێر، لە مێرگەسور 124 ملم باران باریوە کە زۆرترینە لەسەر ئاستی پارێزگاکە، لە شەقڵاوە 100 ملم و لە سەنتەری هەولێر 70.8 ملم باریوە.
لە پارێزگای دهۆک، دینارتە بە 120.5 ملم پێشەنگە، لە بجیل 83.8 ملم و لە سەنتەری دهۆک 28.8 ملم باریوە.
هەرچی پارێزگای هەڵەبجەیە، زۆرترین بڕ لە تەوێڵە بووە کە 15.5 ملمە و لە سەنتەری هەڵەبجە 6 ملم باریوە. لە کەرکوکیش زۆرترین بڕ لە تەکیەی جەباری بووە بە 50 ملم.
پەیامنێری کوردسات نیوز رایگەیاند، تەواوی رێکارەکانی خەرجکردنی موچەی مانگی 10ی فەرمانبەرانی هەرێمی کوردستان لە بەغداد کۆتاییهاتووە و تەیف سامی رەزامەندیی لەسەر داوە.
پەیامنێری کوردسات نیوز لە بەغداد ئاشکرای کرد، تەیف سامی، وەزیری دارایی عیراق رەزامەندیی لەسەر نوسراوی خەرجکردنی پارەی موچەی مانگی 10ی موچەخۆرانی هەرێم دەربڕیوە.
ئاماژەی بەوەشکرد، نوسراوەکە رەوانەی بەشی خەرجی کراوە و لە ئێستادا تەنیا ئیمزای بەڕێوەبەری گشتیی ئەو بەشە ماوە بۆ ئەوەی پارەکە رەوانەی هەرێم بکرێت.
ئاشکرابوونی هەواڵی لێدانی تونێلێکی نهێنی بە درێژایی 5 کیلۆمەتر لەژێر بازاڕی گەورەی تاران، پرسیاری زۆری بەدوای خۆیدا هێناوە کە چۆن لە شوێنێکی قەرەباڵغی وادا کەس بەو هەموو خۆڵەی نەزانیوە؟
ماڵپەڕی فەرارۆ بڵاویکردەوە، لەژێر سێ سەرای بازاڕی گەورەی تاران کە رۆژانە 10 هەزار کەس تێیدا هاتوچۆ دەکەن و هەزار دوکانی تێدایە، تونێلێکی 5 هەزار مەتری بەشێوەیەکی نایاسایی لێدراوە.
راپۆرتەکە بەسەرهاتەکە دەچوێنێت بە فیلمی (Shawshank Redemption) و دەپرسێت: "ئایا ئامێری ئەم کەسانە تەنیا چەکوش بووە؟ ئایا کارێکی لەم شێوەیە لە دڵی شارێکی قەرەباڵغدا بە بێدەنگی دەکرێت؟".
بەپێی راپۆرتەکە، لێدانی ئەم تونێلە مەترسییەکی گەورەی بۆ سەر ئابووری، پێکهاتەی کۆمەڵایەتی و گرنگتر لە هەموویان گیانی خەڵک دروستکردووە، بە تایبەت کە رەنگە کاریگەریی لەسەر درزبردنی دیوارەکان و پایەکانی دەوروبەری هەبووبێت.
هاوکات وەفدی هاوبەشی شارەوانی و داواکاری گشتیی تاران دوای سەردانکردنی بازاڕەکە رایانگەیاند، لەژێر سێ بازاری سەرەکی (ئازادی، نادری و زیبا) تونێل لێدراوە و پایەکانی باڵەخانەکان بۆش کراون بۆ دروستکردنی دوکان و کۆگای نایاسایی.
سەرۆکی رێکخراوی بەڕێوەبردنی قەیرانەکانی تارانیش ئاشکرای کرد، تونێل و هەڵکۆڵینەکان بەبێ رەچاوکردنی مەرجەکانی سەلامەتی کراون و سەقفی تونێلەکان خوار بوونەتەوە و ستوونەکان درزیان بردووە، لەکاتێکدا رۆژانە 5 بۆ 6 هەزار کەس لەو شوێنە هاتوچۆ دەکەن.
سەرۆک کۆماری ئێران رایدەگەیەنێت، ئەو بە تەنیا ناتوانێت کێشەکانی وڵات چارەسەر بکات، بەڵام بە یەکڕیزی دەتوانن بەسەر سزا و فشارەکاندا زاڵ بن.
مەسعود پزیشکیان، سەرۆک کۆماری ئێران لە چاوپێکەوتنێکدا لەگەڵ ماڵپەڕی خامنەیی رایگەیاند: "چەندین جار وتوومە "من" ناتوانم، بەڵکو "ئێمە" دەتوانین، کێشەکانی وڵات بەو شێوەیە نین کە من بە تەنیا بتوانم چارەسەریان بکەم".
وتیشی: "بە یەکگرتوویی دەتوانین بەسەر کێشەکان و سزا و فشارەکاندا زاڵ بین، ئەگەر لەگەڵ یەکتر بین مەحاڵە دوژمنان بتوانن داگیرمان بکەن".
سەرۆک کۆماری ئێران ئاماژەی بەوە کرد، ئەمریکا پلان دادەڕێژێت بۆ ئەوەی لە ماوەی 36 مانگی داهاتوودا ئێران بڕوخێنێت، لەکاتێکدا پێشتر دەیانوت لە 12 رۆژدا دەڕوخێت، بەڵام ئەگەر یەکگرتوو بن، تەنانەت دوای 36 هەزار ساڵیش ناتوانن ئەو کارە بکەن.
پزیشکیان جەختیکردەوە، ئەگەر ئێران و وڵاتانی دراوسێ یەکگرتوو بن، ئەمریکا ناتوانێت وڵاتانی ناوچەکە بەو شێوەیە ئیستیغلال بکات.
سەرۆکی ئۆکراین و سەرۆکی ئەمریکا لە فلۆریدا کۆدەبنەوە بۆ گفتوگۆکردن لەسەر پلانێکی ئاشتی بۆ کۆتاییهێنان بە جەنگ، بەڵام جیاوازییەکان هێشتا قوڵن و کیێڤ داوای ئەنجامدانی راپرسی دەکات.
بڕیارە ئەمڕۆ یەکشەممە، ڤۆلۆدیمێر زێلێنسکی، سەرۆکی ئۆکراین و دۆناڵد ترەمپ، سەرۆکی ئەمریکا لە فلۆریدا کۆببنەوە. زێلێنسکی رایگەیاندووە، پلانی هەیە لەگەڵ ترەمپ چارەنووسی هەرێمی دۆنباس و وێستگەی ئەتۆمیی زاپۆریژیا تاوتوێ بکات.
ئەم دیدارە لە کاتێکدایە کە روسیا بە سەدان موشەک و درۆن هێرشی کردووەتە سەر کیێڤ و چەند ناوچەیەکی دیکە و کارەبای بەشێک لە پایتەختی بڕیوە، زێلێنسکی ئەمەی بە وەڵامی روسیا بۆ هەوڵەکانی ئاشتی وەسفکرد.
سەبارەت بە پلانی ئاشتی، سەرچاوەکان دەڵێن ئۆکراین و ئەمریکا لەسەر زۆربەی خاڵەکان رێککەوتوون و 90%ی پلانە 20 خاڵییەکە تەواو بووە، بەڵام پرسی دەستبەرداربوون لە خاک هێشتا یەکلایی نەبووەتەوە.
زێلێنسکی بە ماڵپەڕی ئەکسیۆسی راگەیاندووە، هێشتا هیوای هەیە پێشنیازەکەی ئەمریکا بۆ کشانەوەی تەواوەتیی هێزەکانی ئۆکراین لە دۆنباس نەرم بکات، بەڵام ئەگەر ئەوە سەری نەگرت، دەبێت تەواوی پلانەکە بخرێتە راپرسییەوە.
ئاماژەی بەوەشکردووە، بۆ ئەوەی راپرسی ئەنجام بدرێت، دەبێت روسیا رازی بێت بە ئاگربەستێکی 60 رۆژە، بۆ ئەوەی ئۆکراین بتوانێت خۆی بۆ دەنگدانەکە ئامادە بکات، هەرچەندە راپرسییەکان دەریدەخەن دەنگدەرانی ئۆکراین رەنگە پلانەکە رەتبکەنەوە.
مۆسکۆ سوورە لەسەر ئەوەی تەواوی دۆنباس بخرێتە سەر روسیا، تەنانەت ئەو ناوچانەش کە لەژێر کۆنترۆڵی کیێڤدان، لە بەرامبەردا ئۆکراین دەیەوێت نەخشەکە لەسەر هێڵەکانی ئێستای شەڕ رابگیرێت.
هەروەها مارک کارنی، سەرۆک وەزیرانی کەنەدا لە دیداری زێلێنسکیدا بەڵێنی نزیکەی 1.83 ملیار دۆلار هاوکاریی زیاتری بە ئۆکراین دا و رایگەیاند، هێرشەکانی روسیا دەریدەخەن کە پوتن ئاشتی ناوێت.
شارەزایەکی کەشناسی: شەپۆلێکی بەفر و باران و سەرما رووی لە ناوچەکانی هەرێم کردووە و ئەمشەو هەورێکی زەبەلاحی کەڵەکەبووی باراناوی کە بە هەوری سوپەرسێل ناسراوە دەگاتە ئاسمانی هەرێم و ئەگەری بارانی بەخوڕ هەیە.
ئەمڕۆ شەممە، هەڤاڵ سدیق، شارەزای بواری کەشناسی لە بڵاوکراوەیەکدا رایگەیاند، ئێستا بارستە هەورێکی زەبەلاحی کەڵەکەبووی باراناوی کە بە هەوری سوپەرسێل ناسراوە، لەجووڵەکردندایە بەئاراستەی ناوچەکانی باشووری سلێمانی و درەنگانی ئەمشەو دەگاته ناوچەکە لە بەشێکی زۆری ناوچەکانی پارێزگای سلێمانی، هەڵەبجە و راپەڕین ئەگەری تاوەبارانی بەخوڕ بۆ بارانی بەلێزمە هەیە.
باسی لەوەشکردووە، درەنگانی ئەمشەو بۆ کاتی بەرەبەیان لە سنووری پارێزگای هەولێر، کەرکوک، ئیدارەی سۆران و گەرمیان ئەگەری بارانبارینی بەخوڕ بۆ بارانی بەلێزمە هەیە و لە هەندێ شوێن و ناوچە ئەگەری دروستبوونی لافاو هەیە"
هاوکات، کەشناسیی هەرێم پێشبینییەکانی کەشوهەوای بڵاوکردەوە و دەڵێت: "ئەمڕۆ و سبەی ئاسمان هەور و باراناویی دەبێت، لە زۆربەی ناوچەکان نمەباران و بارانی مامناوەند دەبارێت، لە بەشێک لە ناوچەکان و بەتایبەت ناوچە بەرزەکان کڕێوە دەبێت واتا بەفروباران پێکەوە، لەگەڵیشیدا خێرایی با زیاد دەکات".
سەرچاوەیەکی ئەمنی سلێمانی بە کوردسات نیوزی راگەیاند، تۆمەتباری کوشتنی ئەو هاووڵاتیەی لە هۆتێلێکدا تەرمەکەی دۆزرایەوە دەستگیرکرا.
ئەمڕۆ شەممە 27ـی 12ـی 2025، تەرمی هاووڵاتییەکی باکوری کوردستان لەناو هۆتێلێکی شاری سلێمانیدا دۆزرایەوە، سەرچاوە ئەمنییەکەی سلێمانی دەشڵێت: دوای لێکۆڵینەوە دەرکەوتووە کە کوژراوەکە لەلایەن برایەکی خۆیەوە کوژراوە.
سەرچاوە ئەمنییەکە ئاماژەی بەوەشداوە، "ئەو کەسەی هاووڵاتییەکەی باکوری کوردستانی لە هۆتێلێکی شاری سلێمانی کوشتووە، لەلایەن هێزە ئەمنییەکانی سلێمانیەوە دەستگیرکراوە و دوای لێکۆڵینەوە دەرکەوتووە کەسی کوژراو لەلایەن برایەکی خۆیەوە کوژراوە".
ئەنجومەنی نوێنەرانی عیراق کارنامەی یەکەم دانیشتنی خولی شەشەمی ئەنجومەنەکەی بڵاوکردەوە و لە دوو بڕگە پێکهاتووە.
ئەنجومەنی نوێنەرانی عیراق كارنامەكەی یەكەمین دانیشتنی خولی شەشەمی بڵاوکردەوە و لە دوو بڕگە پێكهاتووە؛ یەکەم بڕگە تایبەتە بە سوێندخواردنی ئەندامانی ئەنجومەنەکە و بڕگەی دووەمیش تایبەتە بە هەڵبژاردنی دەستی سەرۆکایەتی ئەنجومەنی نوێنەرانی عیراق.
ئەنجومەنی نوێنەرانی عیراق لە 329 ئەندام پێکهاتووە، رۆژی 11ـی 11ـی 2025 هەڵبژاردنی خولی شەشەمی ئەنجومەنی نوێنەران ئەنجامدرا.
چوارچێوەی هەماهەنگی بە ئامادەبوونی سەرۆكی یەكێتی كۆدەبێتەوە و كاندیدی جێگری یەكەمی سەرۆكی ئەنجومەنی نوێنەران یەكلایی دەكرێتەوە.
سەرچاوەیەك لە چوارچێوەی هەماهەنگی شیعەكان بە كوردسات نیوزی راگەیاند، ئێوارەی ئەمڕۆ بە ئامادەبوونی بافڵ جەلال تاڵەبانی سەرۆكی یەكێتیی نیشتمانیی كوردستان كۆدەبنەوە و ناوی ئەو كەسایەتیانە یەكلایی دەكرێنەوە كە بۆ پۆستی جێگری یەكەمی سەرۆكی ئەنجومەنی نوێنەرانی عیراق دیاریكراون.
سەرچاوەكە وتیشی، ئەحمەد ئەسەدی وەزیری ئێستای كار و كاروباری كۆمەڵایەتی بەهێزترین كاندیدە بۆ وەرگرتنی ئەو پۆستە، كە سەر بە هاوپەیمانییەكەی محەمەد شیاع سودانی سەرۆك وەزیرانی عیراقە.
راشیگەیاند، بەشێك لە سەركردەكانی چوارچێوەی هەماهەنگی داوایانكردووە موحسین مەندەلاوی سەرۆكی هاوپەیمانی ئەساس، دووبارە پۆستی جێگری یەكەمی سەرۆكی ئەنجومەنی نوێنەرانی عیراقی پێبدرێتەوە.
موهەنەد ئیبراهیم پەیامنێری کوردسات نیوز لە رۆژئاوای کوردستان رایگەیاند، کەمێك پێش ئێستا مەزڵوم کۆبانی گەیشتووەتە دیمەشق و بڕیارە لەگەڵ ئەحمەد شەرع کۆببنەوە.
نوێدەکرێتەوە...
وەزارەتی کشتوکاڵی عیراق رایگەیاندوە، بەمەبەستی ساغ بونەوەی بەرهەمی ناوخۆ و رێگریکردن لە بەرزبونەوەی نرخەکان، هاوردەی 11 بەرهەمی کشتوکاڵی قەدەغە دەکات و ناوی بەرهەمەکانیشی بڵاوکردوەتەوە.
مەهدی زەمەد قەیسی، راوێژکاری وەزارەتی کشتوکاڵی عێراق بە میدیا عەرەبییەکانی راگەیاند، سیاسەتی هاوردەكردن لەسەر بنەمای ساڵنامەی كشتوكاڵییە، كە بەردەوام بەپێی خواست و كەمی بەرهەمی ناوخۆیی گۆڕانکاری بەسەردا دێت.
ئاماژەی بەوەشکردوە، پلانی وەزارەتەکەیان بە مەبەستی دڵنیابوون لە رێژەی بەروبووم و رێگریكردن لە بەرزبوونەوەی نرخەكان، ناوی بەرهەمەکانیشی بڵاوکردوەتەوە، کە چەوەندەر، شەڵغەم، كاهوو، كەلەرم، قەیسی، كولەكە، باینجان، پەتاتە، مریشك، هەنگوین و خورما لەخۆدەگرێت.
لەبارەی تەماتەشەوە وتویەتی؛ لە ئێستادا هاوردەکردنی رێگەپێدراوە، بەڵام رەنگە لە داهاتوودا هاوردەی قەدەگە بکرێت.
سەبارەت بە پلانی كشتوكاڵی زستانەش راوێژکارەکەی وەزارەتی کشتوکاڵ رایگەیاندوە، كە روبەڕی دیاریكراو بۆ بەرهەمی کشتوکاڵی 4.5 ملیۆن دۆنمە، لەو ژمارەیەش 3.5 ملیۆن دۆنمیان پشت بە ئاوی ژێر زەوی دەبەستن و یەك ملیۆن دۆنمیش پشت بە ئاوی سەرزەوی دەبەستێت.
کەشناسی هەرێم رایگەیاند، لە 48 سەعاتی داهاتوودا بارانبارین بەردەوام دەبێت لە ناوچە شاخاوییەکانیش بەفر دەبارێت ئاماژەی بەوەش کردوە، پلەکانی گەرما دوو بۆ پێنج پلە نزمدەبنەوە و لە ناوچە شاخاوییەکان دەبێت بە کڕێوە.
ئەمڕۆ شەممە، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی بۆ 48 سەعاتی داهاتووی کەشوهەوا بڵاوکردوەتەوە و بە گوێرەی پێشبینیەکان ئاسمان هەور دەبێت و بارانبارینیش بەردەوام دەبێت، لە ناوچە شاخاوییەکانیش بەفر دەبارێت و کڕیوە دروست دەبێت.
لەبارەی کەشی سبەینێشەوە کەشناسی هەرێم دەڵێت؛ هاوشیوەی ئەمڕۆ بارانبارین بەردەوام دەبێت و دابارین زیاتر دەبێت، لە ناوچە شاخاوییەکانیش بەفربارین بەردەوامی دەبێت و پلەکانی گەرماش نزیک دەبنەوە لە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزییش بەم شێوەی دەبێت
هەولێر : 10 پلەی سیلیزی
سلێمانی : 7 پلەی سیلیزی
دهۆک : 9 پلەی سیلیزی
زاخۆ :10 پلەی سیلیزی
کەرکوک : 11 پلەی سیلیزی
هەڵەبجە : 8 پلەی سیلیزی
سۆران: 7 پلەی سیلیزی
گەرمیان : 12 پلەی سیلیزی
درەنگانێکی شەوی رابردوو، گروپەکانی سەر بە حکومەتی دیمەشق، بە چەکی قورس و تانک هێرشیان کردە سەر گەڕەکەکانی شێخ مەقسود و ئەشرەفییە لە شاری حەلەب، ئاسیشی ناۆخۆی شارەکەش ە پێشێلکاری داناوە و دەلێت، دەیانەویط خەڵکی مەدەنی بکەنە ئامانج.
هێزەکانی ئاسایشی ناوخۆ لە شاری حەلەب بڵاویانكردەوە، گروپە چەكدارەكانی سەر بە دیمەشق بە تانک و چەكی قورس هێرشیان کردوەتە سەر هەردوو گەڕەکی کورد نشینی شاری حەلەب، ئەمەش لە دوای ئەوەی بە ئار پی جی، یەکێک لە خاڵەکانی پشکنینیان لەو دوو گەڕەکە کردە ئامانج.
پێش ئەوەی هێرشەکان بۆ سەر ئەو دوو گەڕەکە دەستپێبکاتو تانکو چەکی قورس لە دەوروبەریان کۆبکرێتەوە لەلایەن هێزەکانی سەر بە دیمەشقەوە، وەزارەتی بەرگری سوریا رایگەیاندبو، هەسەدە بە درۆن هێرشیان بۆسەر هێزەکانیان دەستپێکردەوە.
ئەمەش لە کاتێکدایە، بڕیار وایە پێش سەری ساڵ مەزڵم کۆبانی سەردانی دیمەشق بکات و لەگەڵ حکومەتی دیمەشق پرسی یەکگرتنی هێزەکانی هەسەدە تواوتوێ بکەن
ئاژانسی رۆیتەرز بڵاویکردوەتەوە، رەنگە روسیا موشەکی هایپەرسۆنیک، کە توانای هەڵگرتنی کڵاوەی ئەتۆمیی هەیە لە بنکەی ئاسمانی وڵاتی بیلاروس جێگیرکرد بێت، توێژەرانی ئەمریکی لە رێگەی مانگی دەستکردەوە چاودێریان کردوە و بەمەش توانای موشەکەکانی بە تەواوەتی دەگەنە ئەوروپا.
ئاژانسەکە لە زاری چەند توێژەرێکی ئەمریکییەوە بڵاویکردوەتەوە توێژەرانی ئەمریکی چاودێری گواستنەوەی مووشەکەکانیان کردوە، لە رێگای مانگی دەستکردەوە بۆ بنکەی ئاسمانی چۆڵکراوی کریچیڤ لە رۆژهەڵاتی بیلاڕووس.
توێژەرانی ئەمریکی هۆشدارییان داوە، کە ئەم هەنگاوانەی پوتن بۆ بەهێزکردنی توانای ناردنی موشەکەکانی روسیایە بۆ سەرتاسەری ئەوروپا.
جۆن فۆرمان، پسپۆڕی ئەمریکییە بە ئاژانسی رۆیتەرز راگەیاندوە؛ پوتن بەنیازە ئەم چەکە لە بیلاڕوس جێگیر بکات بۆ ئەوەی مەودای خۆی لە قووڵایی ئەوروپادا درێژ بکاتەوە.
ئەمە لە کاتێکدایە، ڤلادیمێر پوتن، پێشتر نیازی خۆی بۆ جێگیرکردنی موشەکی مەودا درێژی لە وڵاتی بیلاروس راگەیاند بوو، بەڵام وردەکاری باس نەکردبوو.
هاوشێوەی ئەڵمانیا و فەرەنسا، بەریتانیاش پلانی نوێ بەکاردەهێنێت، بۆ ئەوەی گەنجانی وڵاتەکە بچنە خزمەتی سەربازییەوە و بە گوێرەی پلانەکە گەنجانی خوار تەمەن 25 ساڵ بەم زووانە دەتوانن داواکاری پێشکەش بکەن بۆ ئەوەی ساڵێک ئەزموونی مووچە و مەشقکردن لە سەرانسەری سوپا و هێزی دەریایی شاهانە و هێزی ئاسمانی شاهانە هەبێت.
وەزارەتی بەرگری بەریتانیا بڕیارە پلانێکی "مۆڵەتی خوێندن" دەستپێبکات بۆ ئەوەی دەرچووانی قوتابخانە و زانکۆ، کە لە خوار تەمەنی 25 ساڵەوەن بچنە ناو سوپا و هێزی دەریایی و هێزی ئاسمانییەوە بەبێ پابەندبوونێکی درێژخایەن و لە بەرانبەردا موچەشیان پێدەدرێت.
مۆڵەتی 12 مانگە بە موچەوە بەشێکە لە هەوڵەکان بۆ چارەسەرکردنی کێشە درێژخایەنەکانی دامەزراندنی کارمەند لە هێزە سەربازییەکانی بەریتانیا و بە گوێرەی پلانەکە ئەو گەنجانە راهێنانیان پێدەکرێت بۆ شەڕکردن لە ناوچە جەنگییەکان وەک ئامادەکارییەک بۆ هەر حاڵەتێکی لەناکاو.
ئەم پلانە نوێیە لە پلانێکی هاوشێوەی ئوسترالیاوە سەرجاوەی گرتوە، کە زیاتر لە دە ساڵە جێبەجێ دەکات.
هێزە سەربازییەکانی بەریتانیا لە مێژە کێشەیان هەیە بۆ دامەزراندنی کارمەندان و مانەوەی کارمەندان و حکومەت دەیەوێت بواری سەربازی تا ئەو جێگایەی، کە دەتوانرێت بکاتە جێی سەرنجی گەنجانی وڵاتەکەی و ئەو پلانە هەوڵێکە بۆ زیادکردنی دامەزراندنی سەربازی.
ئەمە لە کاتێکدایە لە چەند مانگی رابردوودا فەرەنسا و ئەڵمانیا پلانی نوێیان بۆ دامەزراندنی گەنجان و خۆبەخشیکردن بۆ خزمەتکردنی سەربازی راگەیاندووە، ئەمەش لە هەوڵێکدا بۆ بەرزکردنەوەی قەبارەی هێزە چەکدارەکانیانە بۆ خۆئامادەکردن بۆ ئەگەری هێرشی روسیا بۆسەر ئەوروپا وەک ئەوەی خۆیان بانگەشەی بۆدەکەن.