کوردستان
ئەنجومەنی وەزیرانی هەرێم، لە نووسراوێکدا کە ئاڕاستەی وەزارەتی پەروەردەی کردووە، دەڵێت: لەجیاتیدانانی مامۆستایان و فەرمانبەرانی گرێبەست لە وەزارەتی پەروەردە راگیرا.
بڕیارەکەی ئەنجومەنی وەزیرانی هەرێم لە کاتێکدایە، 24 سەعات بەسەر ئەو بڕیارەیدا تێنەپەڕیوە کە تێیدا هاتبوو، "لەجیاتیدانان بە هەموو شێوەیەک لە وەزارەتی خوێندنی باڵا راگیراوە".
بڕیارەکەی دوێنیی ئەنجومەنی وەزیران، هەزار کەسی بێ هیوا کرد، لەبەرئەوەی پێشتر رایگەیاندبوو کە، "پرۆسەی لەجیاتی دانان بۆ گرێبەستەکانی وەزارەتی خوێندنی باڵا کە دەست بەکارنەبون ئەنجام دەدرێت".
ئەو قەڵەمەی ئیمزای بڕیاری لەسێدارەدانی عەجاجی پێكرا رادەستی خاتوو شاناز ئیبراهیم ئەحمەد كرا.
خاتوو شاناز ئیبراهیم ئەحمەد قەڵەمەكەی رادەستی مۆزەخانەی نیشتیمانی ئەمنەسورەكەی سلێمانی كرد و لە لێدوانێکیدا بۆ کوردسات نیوز رایگەیاند، قەڵەمەکە وەک هێمایەک لە داهاتوودا دەمێنێتەوە.
وتیشی، ئەو قەڵەمە دەمێنێتەوە کە چۆن کەسێک بەو شێوەیە گەیشت بە سزای خۆی، دەشڵێت؛ "من هیواداربووم لە ساڵانی پێشووتردا، لە سەرەتاوە ئەو تۆمەتبارانە سزا بدرانایە، راستە من خۆم وەک مرۆڤێک دژی لەسێدارەدانم، بەڵام هەندێک جار هەندێک کەس لەم کۆمەڵگەیەی ئێمەدا کارێکی وەها دەکات کە دەبێت رووبەڕووی قورسترین و گەورەترین سزا ببێتەوە، کە ئەو سزایەش لە عیراقدا لەسێدارەدانە".
خاتوو شاناز ئیبراهیم ئەحمەد راشیگەیاند، "سوپاسی هەموو ئەو لایەنانە دەکەم، کە توانیان پێکەوە کارێکی وەها بکەن کە عەجاج بە سزای خۆی بگات، هەروەها سوپاسی دادگای بەغداد دەکەم و سوپاسی هەموو ئەو دادوەرانە دەکەم کە لەم دۆسییە دەستیان هەبووە و پاڵپشت و پشتیوان بوون".
وەزیری دارایی عیراق دەڵێت؛ هیچ کێشەیەک لە ناردنی موچەی موچەخۆرانی هەرێم نییە و هەر کاتێک کێشەی نەختینە چارەسەر بوو موچە رەوانە دەکەن.
بێستون سەلام، پەیامنێری کوردسات نیوز لە بەغداد رایگەیاند، هێشتا چەند فەرمانگەیەکی حکومەتی فیدراڵ ماوە موچە وەربگرن، بەڵام بەپێی وتەی وەزیری دارایی عیراق، هیچ گرفتێک لە ناردنی موچەی موچەخۆرانی هەرێم نییە.
ئاماژەی بەوەشکرد، فەرمانی تەمویلکردنی موچەی هەرێم دراوە و هەرکاتێک کێشەی 'نەختینە' چارەسەرکرا، ئەوا موچە دەنێرن.
ئەمەش لە کاتێکدایە، بەپێی زانیارییەکانی کوردسات نیوز هێشتا چەند فەرمانگەیەک لە عیراق بەهۆی کێشەی نەختینەوە موچەکانیان وەرنەگرتووە.
کەشناسیی هەرێم ئاشکرایدەکات ئەمڕۆ و سبەینێ ئاسمان ساماڵ دەبێت و پلەکانی گەرما بە جێگیری دەمێننەوە، بەڵام بۆ سبەینێ ئەگەری خۆڵبارینێکی کەم هەیە.
بەڕێوەبەرایەتیی گشتیی کەشناسی و بوومەلەرزەزانیی هەرێم، پێشبینییەکانی کەشوهەوای بۆ 48 سەعاتی داهاتوو بڵاوکردەوە و رایگەیاند؛ کەشی ئەمڕۆ دووشەممە ساماڵ دەبێت و پلەکانی گەرما نزیک دەبنەوە لە تۆمارکراوەکانی دوێنێ.
ئاماژەی بەوەشکرد، سبەینێ سێشەممە ئاسمان بە ساماڵی دەمێنێتەوە، بەڵام ئەگەری بەرزبوونەوەی تۆز وخۆڵێکی کەم هەیە، خێرایی با لەسەرخۆ بۆ مامناوەند دەبێت.
بەرزترین پلەکانی گەرمای پێشبینیکراو بە پلەی سیلیزی
هەولێر: 42 پلەی سیلیزی
سلێمانی: 40 پلەی سیلیزی
دهۆک: 41 پلەی سیلیزی
هەڵەبجە:43 پلەی سیلیزی
چەمچەماڵ: 42 پلەی سیلیزی
زاخۆ: 41 پلەی سیلیزی
پیرمام: 38 پلەی سیلیزی
گەرمیان : 47 پلەی سیلیزی
ئاکرێ : 41 پلەی سیلیزی
حاجی ئۆمەران :32 پلەی سیلیزی
لە چوارچێوەی رێککەوتنی نێوان هەسەدە و حکوومەتی سوریا، پرۆسەی گەڕانەوەی ئاوارەکانی سەرێکانی دەستیپێکرد و لە یەکەم قۆناغدا نزیکەی 600 خێزان دەگەڕێنەوە زێدی خۆیان.
پرۆسەی گەڕانەوەی ئاوارەکانی سەرێکانی دەستیپێکرد و لە یەکەم قۆناغدا کاروانێکی پێکهاتوو لە نزیکەی 600 خێزان لە حەسەکەوە بەرەو زێدی خۆیان بەڕێکەوتن.
پەیامنێری کوردسات نیوز لە رۆژئاوای کوردستان رایگەیاند، لە ئێستادا زیاتر لە 13 هەزار خێزانی تری ئاوارە لە کەمپەکانی (واشوکانی، نەورۆز و سەرێکانی) چاوەڕێی دەستپێکردنی قۆناغەکانی گەڕانەوەن بۆ ناوچەکانیان.
وتیشی، تێپەڕبوونی ئەم کاروانە لە نێوەندێکی پر لە دڵەڕاوکێدا بەڕێوەدەچێت، بەهۆی ئامادەیی و بوونی گروپە چەکدارەکانی سەر بە تورکیا لە ناوچەکەدا؛ لەو چوارچێوەیەشدا هێزەکانی ئاسایشی ناوخۆ ئەرکی پاراستنی ئاوارەکانیان گرتووەتە ئەستۆ.
پەیامنێری کوردسات نیوز ئەوەشی خستەڕوو، وەکو هاوکاری و بەمەبەستی کار ئاسانی بۆ سەرلەنوێ نیشتەجێبوونەوەیان، بڕی دوو هەزار دۆلار دەبەخشرێتە هەر خێزانێک کە دەگەڕێتەوە.
پەمپەکانی پڕۆژەی ئاویی دوکان-سلێمانی بەستراون و دوای تێستکردنیان دەکەونە کارو بە زوترین کات ئاو رەوشی دابەشکردنی ئاو لە سلێمانی ئاسایی دەبێتەوە.
بەختیار تاهیر بەڕێوەبەری ئاویی سلێمانی بە کوردسات نیوزی راگەیاند، سەرجەم پەمپەکانی پڕۆژەی ئاویی دوکان-سلێمانی بەستراون و لە ئێستادا تیمە تەکنیکییەکان سەرقاڵی تێست کردنی پەمپەکانن.
ئاماژەی بەوەشکردوە، لەنزیکترین کاتدا دەکەونەکارو ئاو دەگوازنەوە بۆ خەزانەکان و دابەشکردنی ئاو لە سلێمانی بەتەواوەتی دەگەڕێتەوە رەوشی ئاسایی.
ئەمە لە کاتێکدایە، رۆژی 8ـی8ـی2026 بەڕێوەبەرایەتی ئاوی سلێمانی رایگەیاند، هێڵی دووی بۆریی ئاویی دوکان - سلێمانی لە ناوچەی قولەرەیسی بەهۆی کارکردنی ئامێرێکی شۆفڵ لەو ناوچەیە شکاوە و بەهۆیەوە ژمارەیک گەڕەکی سلێمانی و قەزا و ناحییە بێ ئاو دەبن.
پەرلەمانی توركیا بۆ دەنگدان لەسەر پرۆژەیاسای چوارچێوە كۆدەبێتەوە و تەڤگەری ئازادیش دەڵێت، دەبێت پرۆژەیاساكە ببێتە دەستپێك بۆ دەركردنی یاسای نوێی دیموكراتی.
بڕیارە سبەینێ پەرلەمانی توركیا بۆ دەنگدان و پەسەندكردنی پرۆژەیاسای پتەوكردنی یەكگرتنی نەتەوەیی و یەكپارچەیی كۆمەڵایەتی كۆببێتەوە، كە بە پرۆژەیاسای چوارچێوە ناسراوە بۆ دەستەبەركردنی ئاشتی لە توركیا و باكوری كوردستان، ئەوەش دەبێتە یەكەم هەنگاوی یاسایی بۆ پرۆسەی ئاشتی.
سەركردایەتی تەڤگەری ئازادیش لە راگەیەنراوێكدا ئاماژەی بەوەكردووە، پرۆژەیاسای چوارچێوە كەموكوڕی جددی تێدایە و دەبێت ئاشتی لەلایەن عەبدوڵا ئۆجەلانەوە بەڕێوەببرێت و زەمینەسازیی بەدیموكراسیكردن بكرێتە بنەمای سەرەكی پرۆژەیاساكە.
راشیگەیاندووە، ئەگەر خواستێكی جددی بۆ ئاشتی لەئارادابێت، دەبێت پرۆژەیاساكە ببێتە دەستپێكێك بۆ دەركردنی یاسای نوێی دیموكراتی، ئازادیی بیروڕا و رێكخستنی سیاسیش بۆ ئەندامان و سیاستمەدارانی پەكەكە لە ناوخۆی توركیادا مسۆگەر بكات.
سەرهات ئەرەن پەرلەمانتاری دەم پارتیش لە ئامەد رایگەیاند، لە ئێستادا چوار هەزار و 800 كەس بە تاوانی ئەندامبوون لە "پەكەكە" و بەشداریی لە چالاكیی چەكداریدا لە زیندانەكانی توركیادان، لەو ژمارەیەش سێ هەزار و 900 كەس ماددەكانی پرۆژەیاسای چوارچێوە دەیانگرێتەوە، 900 زیندانیش بەهۆی سزادانیان بە زیندانیی هەتاهەتایی و تاوانباربوونیان بە كوشتنی هێزەكانی ئاسایشی توركیا سودمەند نابن.
دەستەی راگەیاندن و پەیوەندییەکانی عیراق (CMC) راگەیەندراوێکی سەبارەت بە کۆتاییهاتنی گرێبەستەکەی و راگرتنی سەرجەم چالاکییەکانی کۆمپانیای كۆڕەك تیلیكۆم بڵاوکردەوە.
دەستەکە ئاماژەی بەوە کردووە بەهۆی پابەندنەبوونی کۆمپانیاکە بە جێبەجێکردنە دارایی و یاساییەکانی و هەڵوەشاندنەوەی گرێبەستی پێکهاتنەوە، تەواوی رێکارە یاسایی و کارگێڕییەکانی گرتووەتە بەر، لەوانەش دەستبەسەرداگرتنی سەرمایە گوازراوە و نەگوازراوەکانی کۆڕەک.
وەک لە راگەیەندراوەکەدا هاتووە؛ راگرتنی تەواوەتی تۆڕەکە و تەواوی ئامێر و سیستەمەکانی کۆڕەک بەردەوام دەبێت.
دەستەی راگەیاندن و پەیوەندییەکانی عیراق داوا لە بەشداربوانی کۆرەک دەکات، کە راستەوخۆ بەکارهێنانی خزمەتگوزارییەکان، پڕکردنەوەی باڵانس و نوێکردنەوەی هاوبەشییەکانیان رابگرن تاوەکو توشی زیانی دارایی نەبنەوە.
دەشڵێت؛ بەشداربوان با سیمکارتەکانیان لای خۆیان بپارێزن و فڕێی نەدەن، تا ئەو کاتەی رێنمایی نوێ لە رێگەی کەناڵە رەسمییەکانی دەستەکەوە بڵاودەکرێتەوە.
هەروەها داوای لە خاوەن ئەو زەوی و خانوانە کردووە، کە تاوەرەکانی کۆڕەکیان لەسەرە، رێگە بە کارمەندانی کۆڕەک نەدەن دەستکاری ئامێرەکان بڕەخسێنن یان بیگوازنەوە، بە پێچەوانەوە خاوەن موڵکەکە بەرپرسیارێتی یاسایی دەگرێتە ئەستۆ، ئەمەش بە ئامانجی پاراستنی ماڵی گشتی و جێبەجێکردنی بڕیارەکانی دادگا.
لە مانگی رابردودا لە مانگی رابردودا، نەخۆشخانەی شار زیاتر لە 31 هەزار هاووڵاتی و نەخۆش سەردانیان کردوە، جگە لە خزمەتگوزاریی تەندروستی و چارەسەرییە پێویستییەکانیان زیاتر لە هەزار و 100 نەشتەرگەری جۆراوجۆریش ئەنجامدراوە.
بەڕێوەبەرایەتی تەندروستیی سلێمانی بڵاویکردوەتەوە، لە مانگی رابردودا و لە رۆژی (1 بۆ31ـی7ـی 2026)دا 31 هەزار و 311 هاووڵاتی و نەخۆش سەردانی نەخۆشخانەی شاریان کردوە و زیاتر لە هەزار و100 نەشتەرگەریشیان ئەنجامداوە.
تەندروستیی سلێمانی دەڵێت؛ لە کۆی ئەو سەردانیکەرانە، 24,438 نەخۆش رویان لە بەشی فریاکەوتن کردووە، لە کاتێکدا 5,884 کەس سەردانی بەشی راوێژکاری (ئۆپی دی)یان کردووە، و 943 نەخۆشیش لە بەشی گورچیلەی دەستکرد چارەسەری پێویستیان بۆ کراوە.
هەر لە هەمان مانگدا، 6,100 نەخۆش لە بەشە جیاوازەکانی نەخۆشخانەکە داخڵ کراون؛ لەوانە 1,925 نەخۆش لە بەشی فریاکەوتن، 918 لە بەشی گورچیلەی دەستکرد، 809 لە بەشی هەناوی، 745 لە بەشی نەشتەرگەری، 577 لە بەشی شکاوی، و 363 نەخۆشیش لە بەشی هەناوی مێشک و دەمار وەرگیراون.
سەبارەت بە نەشتەرگەرییەکان، تەندروستی سلێمانی ئاشکرای کردوە، تیمە پزیشکییەکانی نەخۆشخانەی شار لەو ماوەیەدا 1,171 نەشتەرگەری جۆراوجۆریان ئەنجام داوە، کە 408یان نەشتەرگەری فریاکەوتن بوون.
نەشتەرگەرییەکانی تریش، بریتی بوون لە 140 نەشتەرگەری قەستەرە، 88 پرۆسەی شەبەکە و باڵۆن، و 58 نەشتەرگەریی تایبەت بە منداڵان.
هاوکات لە بەشی دەستنیشانکردن و پشکنینەکاندا، 68,601 شیکاری تاقیگەیی، 11,397 تیشک، 3,952 سۆنەر، 3,032 هێڵکاری دڵ، 327 ئیکۆ، و 660 ڕاهێنانی چارەسەری سروشتی بۆ سەردانیکەران و نەخۆشە داخڵبووەکان ئەنجام دراون.
ئەنجومەنی وەزیرانی هەرێم دامەزراندنی بە شێوازی لە جێگە دانان راگرت.
پێشتر وەزارەتی خوێندنی باڵای حکومەتی هەرێم رایگەیاندبوو: پرۆسەی لەجیاتی دانان بۆ گرێبەستەکانی وەزارەتی خوێندنی باڵا کە دەست بەکارنەبون ئەنجام دەدرێت، کە نزیکەی هەزار کەس سودمەند دەبن.
بەڵام ئەمڕۆ، بەپێی نووسراوێکی رەسمی سەرۆکایەتیی دیوانی ئەنجوومەنی وەزیران کە ئاڕاستەی وەزارەتی خوێندنی باڵا و توێژینەوەی زانستی کراوە، کارکردن بە بڕگەی دووی نووسراوێکی پێشوویان راگیراوە، نووسراوەکە تایبەتە بە پرسی لەجێگەی دانانی ئەو فەرمانبەر و مامۆستا وانەبێژانەی کە بە گرێبەست لەسەر داهاتی ناوخۆ دامەزراون.
وتەبێژی سەرۆکایەتی هەرێم باس لە رەوشی هەرێمی کوردستان دەکات و دەڵێت، "رەوشی هەرێمی كوردستان خراپ نییە و رەوشی دارایی عیراق كاریگەری لەسەر موچەو بژێوی ژیانی هاووڵاتیان داناوە".
دڵشاد شەهاب، وتەبێژی سەرۆکایەتی هەرێمی کوردستان لە كۆنفرانسێكی رۆژنامەنوسیدا رایگەیاند، سەرباری ئەو رەوشەی لە ناوچەكەدا هەیە، هەرێمی كوردستان هیچ مەترسیەكی لەسەر نیەو توانراوە پارێزراو بێت.
وتیشی، عیراق بە رەوشێكی دارایی خراپدا تێپەر دەبێت كە داهات و خەرجیەكانی لەگەڵ یەك ناگونجێن، ئەمەش گرفتی بۆ موچە و بژێوی هاوڵاتیان دروستكردووە.
بەڕێوەبەرایەتیی ئاوی سلێمانی بڵاویکردەوە، دوای 19 سەعات لە کارکردنی بەردەوام، بۆڕیی هێڵی دووی ئاوی دوکان - سلێمانی لە ناوچەی قولەرەیسی چاککرا و رەوشەکە بۆ هاووڵاتیان ئاسایی دەبێتەوە.
دوای ئەوەی دوێنێ دوو شەممە 8ـی 8ـی 2026 بەڕێوەبەرایەتی ئاوی سلێمانی رایگەیاند کە بۆرییەکی ئاوی هێڵی دووی دوکان - سلێمانی لە قولەرەیسی تێکشکاوە، بەرەبەیانی ئەمڕۆ رایگەیاند کە تیمەکانیان توانیویانە بۆریەکە چاکبکەنەوە و رەوشەکە ئاسایی دەبێتەوە.
هاوکات، بەڕێوەبەرایەتییەکە ئاماژەی بەوەشداوە، لەگەڵ چاکبوونەوەی بۆریەکەی قولەرەیسی و بەرداناوەی ئاودا، کار بە سێ پەمپە نوێیەکە دەکرێت و رەوشی ئاوی گەڕەکەکانی ناوچەی قڕگە و هەموو ئەو گەڕەکانەی کە ئاو لە هێڵی دووی ئاوی دوکان - سلێمانی وەردەگرن، باشدەبێتەوە.
ئەوەش لە کاتێکدایە، پێشتر بەڕێوەبەرایەتی ئاوی سلێمانی بڵاویکردبووەوە کە بەهۆی کارکردنی شۆفڵێک لە قولەرەیسی، یەکێک لە بۆڕییەکانی هێڵی دووی ئاوی دوکان - سلێمانی شکاوە و کۆمەڵێک گەڕەک لە شاری سلێمانی بۆ ماوەیەکی کاتی بێ ئاو دەبن.
بافڵ جەلال تاڵەبانی، سەرۆکی یەکێتیی نیشتمانیی کوردستان، بەبۆنەی 50یەمین ساڵیادی دامەزراندنی پارتی سۆسیال دیموکراتی کوردستان، پەیامێکی پیرۆزبایی ئاڕاستەی محەمەدی حاجی مەحمود، سکرتێری گشتیی حزبی سۆسیال دیموکرات کرد.
دەقی پەیامەکە:
بەڕێز کاک محەمەد حاجی مەحمود، سەرۆکی پارتی سۆسیال دیموکراتی کوردستان
بەبۆنەی یادی 50 ساڵەی دامەزراندنی پارتی سۆسیال دیموکراتی کوردستان، لە دڵەوە گەرمترین پیرۆزبایی ئاڕاستەی بەڕێزتان و سەرکردایەتی و ئەندام و لایەنگرانتان دەکەین و هیوای سەرکەوتنی زیاترتان بۆ دەخوازین.
یەکێتی بە چاوی رێزەوە لە خەبات و رۆڵی مێژووی ئێوە و پارتە تێکۆشەرەکەتان دەڕوانێت کە بەشێکن لە مێژووی شۆڕشی نوێ و بزووتنەوەی رزگاریخوازیی گەلی کورد.
لەم رۆژەدا جەخت لە بەردەوامی و بەهێزترکردنی پەیوەندی نێوانمان دەکەینەوە بۆ کارکردنی پێکەوەیی و هەنگاونان بۆ باشترکردنی دۆخی هەرێمی کوردستان و چارەسەرکردنی کێشەکان، لەپێناو وڵاتەکەمان.
بافڵ جەلال تاڵەبانی
سەرۆکی یەکێتیی نیشتمانیی کوردستان
مەكتەبی سیاسی یەكێتیی نیشتمانیی كوردستان، بەبۆنەی یادی 50 ساڵەی دامەزراندنیەوە پەیامێکی پیرۆزبایی ئاڕاستەی پارتی سۆسیال دیموكراتی كوردستان دەکات و دەڵێت، "هیوادارین وەك درێژەپێدەری مێژووی خەباتی پێكەوەییمان، ئەو گیانە هەمیشە زیندوو بێت".
دەقی پەیامەکە...
بەرێزان مەكتەبی سیاسی پارتی سۆسیال دیموكراتی كوردستان
بە بۆنەی یادی 50 ساڵەی دامەزراندنی پارتە تێكۆشەرەكەتانەوە گەرمترین سڵاوتان ئاڕاستە دەكەین و هیوای سەركەوتنی بەردەوامتان بۆ دەخوازین.
لەم یادەدا هیوادارین وەك درێژەپێدەری مێژووی خەباتی پێكەوەییمان، ئەو گیانە هەمیشە زیندوو بێت. تاوەكو پێكەوە گشت حزب و هێز ولایەنە سیاسیەكانی كوردستان تواناكانمان یەكبخەین لەپێناو تێپەراندنی ئەو بارودۆخە ناهەموارەی ناوچەكەی گرتووەتەوە کە بەهۆی چەقبەستویی سیاسی هەرێمیشەوە لەسەر گەلەكەمان قورستر بووە.
جارێكی ترساڵیادی دامەزراندنی پارتی سۆشیال دیموكراتی كوردستان لە بەڕێزتان و گشت ئەندامان و لایەنگرانتان پیرۆزبێت.
مەكتەبی سیاسی
یەكێتیی نیشتمانیی كوردستان
لە کۆنفرانسێکی رۆژنامەوانیدا و لە وەڵامی پرسیاری پەیامنێری کوردسات نیوز، لەبارەی گرانیی سوتەمەنی بەتایبەت بەنزین لە هەرێم، وەزیری نەوتی عیراق رایگەیاند، ئامادەن لە بەرانبەر ئەو 50 هەزار بەرمیلەنەوتەی رۆژانە دەیدەنە هەرێم، سوتەمەنی بۆ هەرێم دابین بکەن.
باسم محەمەد، وەزیری نەوتی عیراق بە کوردسات نیوزی راگەیاند، لە چوارچێوەی رێککەوتنی سێقۆڵیی نێوان وەزارەتی سامانە سروشتییەکانی هەرێم، وەزارەتی نەوتی عیراق و کۆمپانیا نەوتییەکان، حکومەتی بەغداد لە سەرەتاوە ئامادەیی تەواوی دەربڕیوە بۆ دابینکردنی تەواوی پێداویستییەکانی سوتەمەنی بۆ هەرێمی کوردستان.
بەپێی وتەکانی ناوبراو، بڕیاری پێدانی 50 هەزار بەرمیل نەوتی رۆژانە بە هەرێم لەسەر داواکاریی خودی لێپرسراوانی هەرێم بووە.
باسم محەمەد ئاماژەی بەوەکرد، لێپرسراوانی هەرێم وتیان بەو بڕە نەوتە کە 50 هەزار بەرمیلە لە رۆژێکدا، دەتوانن سوتەمەنی پێویست بۆ پارێزگاکانی هەرێم دابین بکەن، کە نرخەکە هاوشێوەی پارێزگاکانی تری عیراقی بێت.
وەزیری نەوتی عیراق وتیشی، ئامادەن لە ئێستادا دەستکاری رێککەوتنەکە بکەن و پێداچونەوەی بۆبکەن تاوەکو لە بەرانبەر ئەو بڕە نەوتەدا، حکومەتی فیدراڵ راستەوخۆ سوتەمەنی پێویست بۆ هەرێم دابین بکات.