خاتوو شاناز ئیبراهیم ئەحمەد، پەیامێکی بڵاوکردووەتەوە و تێیداهاتووە، "لەم ساتەدا دڵنەوایی کەسوکاری شەهیدان و قوربانیانی زوڵم و ستەمی رژێمی لەناوچوو ئەکەم و پێیان ڕائەگەیەنم کەچیتر رووفاتی پیرۆزی ئازیزانیان گۆڕ غەریبی نێو بیابانە دوورە دەستەکانی سەماوە و تەل شێخییە نابن و دێنەوە ئامێزی نیشتمان".

دەقی پەیامەکە

پڕ بەدڵ خۆشحاڵ بووم کە قۆناغی دووەمی گێڕاندنەوەی رووفاتی ئەنفالکراوانی ڕۆڵەکانی گەلەکەمان لەبیابانەکانی تەل شێخیەوە بەرەو خاکی نیشتمان دەستی پێکرد.

لەم ساتەدا دڵنەوایی کەسوکاری شەهیدان و قوربانیانی زوڵم و ستەمی رژێمی لەناوچوو ئەکەم و پێیان ڕائەگەیەنم کەچیتر رووفاتی پیرۆزی ئازیزانیان گۆڕ غەریبی نێو بیابانە دوورە دەستەکانی سەماوە و تەل شێخییە نابن و دێنەوە ئامێزی نیشتمان.

وەک چۆن پێشتر دەستمان دایە ئەم ئەرکە نیشتمانیی و مرۆییە و بەڵێنمان دا بەکەسوکاریان کە فریادڕەسی سارێژکردنی برین و خەمەکانیان بین لەو ساتەدا کەدۆسیەکە چەندین ساڵ بوو بەبەهانەی جیاواز پشتگوێخرابوو، ئاوەهاش ئەرکی خۆمان بەجێگەیاند لە دەستپێکردنەوەی هەڵمەتی هەڵدانەوەی گۆڕە بەکۆمەڵەکانی ئەنفال و هێنانەوەی قۆناغی یەکەمی ڕووفاتەکانی نێو گۆڕە بەکۆمەڵەکان بەڕێز و پێزانین و بەرێورەسمی شایستەو ئەنجامدانی پشکنین و وەرگرتنی سامپڵی خوێن و جوڵاندنی دۆسیەی تاوانبارانی ئەنفال لە دادگا و بەسزاگەیاندنی تاوانبار عەجاجی نوگرەسەلمان.

ئەم کاروانە بەردەوام دەبێ تا ساڕێژبوونی برینی قوڵی جینۆسایدی گەلی کورد و قوربانیانی شاڵاوە بێ رەحمانەکانی ئەنفال.

رۆحتان شاد و نیشتمان ئامێزی گەرمی بۆتان کراوەیە.

شاناز ئیبراهیم ئەحمەد

 

سەرۆک کۆمار سەرپەرشتی رێوڕەسمێکی رەسمی بۆ گەڕاندنەوەی روفاتی 156 شەهیدی ئەنفالکراوی کورد بۆ هەرێمی کوردستان دەکات.

بەسەرپەرشتی نزار ئامێدی، سەرۆک کۆماری عیراق بە ئامادەبوونی نوێنەری سەرۆک کۆمار، د.عەلی شوکری سەرۆکی دەستەی ڕاوێژکاران و پسپۆڕان لە سەرۆکایەتی کۆمار، ڕێوڕەسمی گەڕاندنەوەی روفاتی 156 شەهیدی ئەنفالکراوی کورد و قوربانییانی گۆڕە بەکۆمەڵەکان بۆ هەرێمی کوردستان، کە ئەمڕۆ شەممە، ، لەباڵەخانەی وەزارەتی تەندروستی، وەک ئامادەکارییەک بۆ گەڕاندنەوە و ناشتنیان بەڕێوەچوو.

لەڕێوڕەسمەکەدا ژمارەیەک لێپرسراو و راوێژکاری سەرۆکایەتی کۆمار و نوێنەرانی وەزارەتی تەندروستی و دەزگای شەهیدان و دەزگای شەهیدان و ئەنفال لەهەرێمی کوردستان ئامادەی بوون، سەرەتای رێوڕەسمەکە بە خوێندنەوەی سورەتی فاتیحە بۆ گیانی پاکیان و نمایشێکی پاسەوانی شەرەف دەستی پێکرد، دواتر تاجە گوڵینە لەسەر تەرمی شەهیدان  دانرا.

ئەم تەرمانەی کە ئەمڕۆ رادەست کرانەوە، روفاتی سێیەمین کۆمەڵەی قوربانیانی ئەنفالکراوانی کوردن، کە لەماوەی ساڵانی 2024 و 2025 لەگۆڕە بەکۆمەڵەکانی تل شێخیەیی قەزای سەلمان لەپارێزگای موسەننان گۆڕەکانیان هەڵدنرابوونەوە، ئەمەش لەچوارچێوەی گەڕان بەدوای روفاتی قوربانیانی گۆڕە بەکۆمەڵەکان و ناسینەوەیان وەک ئامادەکارییەک بۆ گەڕاندنەوەیان بۆ هەرێمی کوردستان و ئەنجامدانی  رێوڕەسمی ناشتن لە گۆڕستانە تایبەتەکاندا کە لەگەڵ شکۆی شەهیداندا بگونجێت، وەک بەرجەستەکردنی وەفایەک بۆ قوربانیدانیان لە بەرانبەر ئەو تاوانانەی کەڕژێمی پێشوو ئەنجامیداوون.

وەزارەتی خوێندنی باڵا و توێژینەوەی زانستی رایگەیاند، سەعات 12ی ئەمشەو، ماوەی پێشکەشکردن بۆ زانکۆلاین بۆ دەرچووانی دوانزەی ئامادەیی (زانستی، وێژەیی، پیشەیی و خوێندنگە نێودەوڵەتییەکان) لە رێگەی وێبسایتی (regayzanko.com) کۆتایی دێت و راشیگەیاند کە چیتر ماوەکە درێژ ناکرێتەوە.

وەزارەتی خوێندنی باڵا ئاماژەی بەوەش کردووە: ئەو خوێندکارانەی تا ئێستا زانکۆلاینیان پڕنەکردووەتەوە، دەتوانن لەم چەند سەعاتەی ماوەدا فۆرمەکەیان تەواو بکەن

 وجەختیشی کردەوە: لە رێگەی سیستەمەکەوە فۆرمەکان بنێرن، چونکە بڕیارەکە هەموو بەش و خوێندنگە نێودەوڵەتی و پیشەیییەکانیش دەگرێتەوە.

لە رێوڕەسمێكی شایستەدا لە پزیشكی دادی بەغدادەوە رووفاتی 156 ئەنفالكراو رەوانەی هەرێمی كوردستان كرانەوە.

پەیامنێری كوردسات نیوز رایگەیاند، لە كۆتاییەكانی ساڵی  2024 بە هەوڵی شاناز ئیبراهیم ئەحمەد، ئەو روفاتانە لە گۆڕێكی بە كۆمەڵدا لە ناوچەی تەل شێخە دۆزرانەوە و دواتر رەوانەی پزیشكی دادی بەغداد كران بۆ جێبەجێكردنی رێوشوێنە تەندروستی و یاساییەكان.

كەسوكاری شەهیدان و ئەنفالكراوانیش پێشوازی لە گەڕاندنەوەی روفاتی ئەنفالكراوان بۆ هەرێمی كوردستان دەكەن و دەڵێن، ژمارەیەك روفاتی تر لە ناوچەكانی عەرعەر و نوگرە سەلمان و تەل شێخە ماون و داوا دەكەن هەڵبگریرێنەوە و رادەستیان بكرێنەوە بۆئەوەی بیانگەڕێننەوە بۆ زێدی خۆیان لە هەرێمی كوردستان.

 کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد، ئاسمانی بەشێک لە ناوچەکان بە ساماڵ و پەڵەهەور دەمێنێتەوە.

بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند ئەمڕۆ، ئاسمان ساماڵ و پەڵە هەور دەبێت، هاوكات پلەکانی گەرما بە بەراورد بە تۆمارکراوەکانی دوێنێ، یەک بۆ دوو پلەی سیلیزی بەرزتر دەبنەوە.

سەبارەت بە کەشوهەوای سبەینێ یەکشەممە، کەشناسی ئاماژەی بەوەکردووە، ئاسمان بە هەمان شێوە ساماڵ و پەڵە هەور دەبێت، و پلەکانی گەرما جێگیر دەبن و نزیک دەبنەوە لە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی

هەولێر: 37 پلەی سیلیزی

پیرمام: 34 پلەی سیلیزی

سلێمانی: 35 پلەی سیلیزی

هەڵەبجە: 37 پلەی سیلیزی

چەمچەماڵ: 36 پلەی سیلیزی

دهۆک: 36 پلەی سیلیزی

زاخۆ: 37 پلەی سیلیزی

ئاکرێ: 37 پلەی سیلیزی

گەرمیان: 41 پلەی سیلیزی

حاجی ئۆمەران: 28 پلەی سیلیزی

سۆران : 36 پلەی سیلیزی

بەڕێوەبەرایەتی پەروەردەی سلێمانی، ئاگادارییەک ئاڕاستەی سەرجەم ناوەندەکانی خوێندنی حکومی و ناحکومی دەکات گروپی واتسئەپ دروست بکەن و بەڕێوەبەرەکان ئەدمینی سەرەکی بن.

نەژاد عەبدوڵا، بەڕێوەبەری گشتیی پەروەردەی سلێمانی بە وەکالەت، ئاگاداریەکی ئاڕاستەی  سەرجەم ناوەندەکانی خوێندنی حکومی و ناحکومی کردووە لە قۆناغی (بنەڕەتی - ئامادەیی - ئامادەیی پیشەیی) و تێیداهاتووە، لەپێناو رێکخستن و هەماهەنگی و پێدانی رێنمایی بە قوتابیان و خوێندکاران پێویستە بەڕێوەبەر گروپێک لە بەرنامەی واتس ئاپ (WhatsApp) دروست بکات و خۆی ئەدمینی سەرەکی بێت و یاریدەدەر و رێنماییکاری پەروەردەیی بەشدار بن بۆ ئاگادارکردنەوەی قوتابیان و خوێندکاران لە کاتی پێویستدا.

نەژاد عەبدوڵا دەڵێت: فره گروپی لە تۆڕە کۆمەڵایەتییە جیاوازەکان تایبەت بە ناوەندی خوێندن رێگەپێدراو نیە.

كۆمەڵەی كێڵگە پەلەوەرییەكانی هەرێمی كوردستان، زەنگی ئاگاداركردنەوەی بەپەلە بۆ رزگاركردنی كەرتی پەلەوەر لە هەرێمی كوردستان لێدەدات و رایدەگەیەنێت، ئەم كەرتەكە بەرەو مایەپووچبوون و لەناوچوونی تەواوەتی دەچێت.

بەپێی راگەیەندراوێكی كۆمەڵەی كێڵگە پەلەوەرییەكان، ئەم كەرتە كە یەكێكە لە پایە سەرەكییەكانی ئاسایشی خۆراك و سەرچاوەی بژێوی زیاتر لە 400 هەزار خێزان و هەزاران هەلیكارە، پاشەكشەیەكی مەترسیدار بەخۆیەوە دەبینێت و بەرەو مایەپووچبوون دەچێت.

هۆكاری ئەوەش بۆ كەڵەكەبوونی كێشە نەپچڕاوەكان و بێدەنگی لایەنە پەیوەندیدارەكان لە هاوردەكردنی مریشكی بەستوو و زیادكردنی باج لەسەر كێڵگەكان و زۆربوونی بەرهەم دەگەڕێنێتەوە.

ئاماژەی بەوەش كردووە، ساڵانە هەرێمی كوردستان پێویستی بە 150 هەزار تۆن گۆشتی مریشك هەیە، لە كاتێكدا توانای بەرهەمهێنانی كێڵگە ناوخۆییەكان 400 هەزار تۆن زیاترە، سەرەڕای ئەوەش كێڵگەكان كەوتوونەتە ژێر بارگرانی و زیانی دارایی زۆر قورسەوە.

 

دوای گیرخواردنیان بۆ ماوەی سێ رۆژ، 25 هاووڵاتی كوردی رۆژئاوای كوردستان لە دەروازەی سنوری حاجی ئۆمەران رزگاركران.

ئەو هاووڵاتیانە كە خەڵكی كۆبانێ بوون، ویستبویان لەرێگە ئێرانەوە بێنە ناو خاكی هەرێمی كوردستانەوە، بەڵام بەهۆی سەختی ناوچەكە و مین رێژكردنی شاخەكەوە، سەرجەمیان گیریان خواردبوو.

لەو چوارچێوەیەشدا تیمی كوردسات لایەنە پەیوەندیدارەكانی ئاگاداركردەوە و دواتر لەلایەن ئیدارەی سەربەخۆی سۆرانەوە تیمێك بۆ رزگاركردنیان پێكهێنرا و توانرا ئاو و خۆراكیان پێ بگەیەندرێت و بگەڕێندرێنەوە دەوازەی حاجی ئۆمەران.

بڕیارە دوای تەواوكردنی رێكارەكان لەگەڵیاندا، سەرجەمیان لە دەروازەی سێماڵكاوە بگەڕێندرێنەوە بۆ رۆژئاوای كوردستان

لەسەر رێگای باشماخ پێنجوێن ئاگرکەوتەوە و بەهۆیەوە زیانی گیانی و مادی لێکەوتەوە.

پەیامنێری کوردسات نیوز رایگەیاند، تانکەرێکی سوتەمەنی لەسەر رێگای پێنجوێن – باشماخ بە هۆکارێکی نادیار، ئاگری گرت و زیانی گیانی و مادی لێکەوتەوە.

وتیشی، تیمەکانی بەرگریی شارستانی و ئاگرکوژێنەوە، لە هەوڵدان بۆ رێگریکردن لە تەشەنەسەندەنی زیاتری ئاگرەکە.

هاوکات، رەنج ئازاد حەمە، بەڕێوەبەری نەخۆشخانەی گشتیی شەهیدانی پێنجوێن لەبارە زیانە گیانییەکانەوە بە کوردسات نیوزی راگەیاند، بەهۆی ئاگرەکەوە دوو بە سەختی برینداربوون و دوای گەیشتنیان بە نەخۆشخانەکەیان، گیانیان لەدەستداوە.

داهاتی نانەوتی ئەم هەفتەیەی سلێمانی و هەڵەبجە و هەردوو ئیدارەی سەربەخۆی راپەڕین و گەرمیان نزیكەی  12 ملیار  دینار بووە و بەراورد بە هەفتەی رابردوو دوو ملیار دینار كەمیكردووە.

ماڵپەڕی شەفافیەت بۆ خستنەڕووی داهاتی نانەوتی پارێزگاكانی سلێمانی و هەڵەبجە و هەردوو ئیدارەی سەربەخۆی راپەڕین و گەرمیان ئاشكرایكردووە، داهاتی ئەم هەفتەیە، بڕی 11 ملیار و 773ملیۆن و 224 هەزار ، 228 دینار بووە.

ئەوەشی خستووەتەڕوو، داهاتی ئەم هەفتەیە بەراورد بە هەفتەی رابردوو دوو ملیار دینار كەمیكردووە، لەكاتێكدا هەفتەی رابردوو بڕی داهات زیاتر لە 14ملیار  دینار بووە.

بەپێی ماڵپەڕی شەفافیەت، 84%ی ئەم داهاتە بەشێوەی نەختینەو 16% بەشێوەی چەك بووە.

جەعفەر شێخ مستەفا جێگری سەرۆكی هەرێم رایگەیاند، سەرۆك مام جەلال بناغەی یەكخستنی پێشمەرگەی داناوە و پێگەی پێشمەرگە بە پێی دەستور جێگیر كراوە.

جەعفەر شێخ مستەفا جێگری سەرۆكی هەرێمی كوردستان لە میانەی بەشداریكردنی لە بەرنامەی پانۆرامای كوردسات نیوز رایگەیاند، سەرۆك مام جەلال لە كاتی وەرگرتنی پۆستی سەرۆككۆماری عیراق راسپاردەی كردبوو كە هێزی پێشمەرگە یەكبخرێتەوە.

جێگری سەرۆكی هەرێم باسی لە رۆڵی بافڵ جەلال تاڵەبانی سەرۆكی یەكێتیی نیشتمانیی كوردستان كرد و ئاماژەی بەوە دا، سەرۆكی یەكێتیی نیشتیمانیی كوردستان لە روانگەی خەمخۆری و هەستكردن بە بەرپرسیارێتییەوە سەرجەم دەسەڵاتەكانی داوەتە یەكەكانی 70 بۆ ئەوەی هێزەكانی پێشمەرگە بە تەواوی یەكبخرێنەوە .

لە بەشێكی دیكەی قسەكانیدا، جەعفەر شێخ مستەفا روونیكردەوە كە پێگەی هێزی پێشمەرگە لە دەستووردا چەسپێنراوە و هیچ كەسێك ناتوانێت ئەو راستییە بشێوێنێت.

 سەبارەت بە پرسی كشانەوەی هێزەكانی هاوپەیمانانیش لە 30ی ئەیلول، جەختی لەوە كردەوە كە هێزەكانیان بۆ مەشق و یارمەتی پێویستیان بە هاوپەیمانان هەیە، بەڵام ناكرێت بۆ هەتا هەتایە تەنها پشت بە ئەمریكا و هاوپەیمانان ببەسترێت.

جێگری سەرۆكی هەرێم :  سەرۆك مام جەلال  بناغە ی یەكخستنەوەی پێشمەرگەی دانا.

جەعفەر شێخ مستەفا: بافڵ جەلال تاڵەبانی سەرجەم دەسەڵاتەكانی داوەتە یەكەكانی 70 بۆ یەكخستنەوەی هێزەكانی پێشمەرگە.

حەج وعومرەی هەرێم رایگەیاند، هـــه‌فته‌ی داهــــاتوو تیروپشكی حاجیان ئه‌نجام ده‌درێت و تا ئێستا زیاتر لە 1600 هاووڵاتی ناویان بۆ حەج  پڕکردوەتەوە، ئاگاداریان بۆچووە تا کەموکڕییەکان و هەڵەکان چاک بکەن، بەڵام وەڵامیان نەداوەتەوە  و هۆشداریشیان پێدەدرێت ناویان ناچێتە ناو تیروپشکەوە.

بەرێوه‌به‌ری گشتی حه‌ج و عومرەی هەرێم رایگەیاند، له‌ هه‌فته‌ی داهاتودا تیروپشكی ناوی حاجیان ئه‌نجام ده‌درێت و تیروپشكه‌یش بۆ دوو ساڵ ده‌بێت، وتەبێژی بەرێوەبەرایەتییەکەش دەڵێت؛ زیاتر لە 1600 هاووڵاتی نامەی ئاگادارکردنەوەیان بۆ نێردراوە تاوەکو کەمپوڕی و هەڵەکانی فۆڕمەکانیان چاک بکەن، بەڵام تاوەکو ئێستا نامەکانیان نەکردووەتەوە و هیچ دەستکارییەکیان ئەنجام نەداوە.

وتەبێژی حەج و عومرە داوای لە سەرجەم پێشکەشکاران دەکات لە رێگەی ئەکاونتەکانیانەوە لە هەژماری "کورد پاس" (KRDPass) سەردانی فۆرمەکانیان بکەنەوە، تاوەکو دڵنیا ببنەوە لەوەی ئایا نامەی ئاگادارکردنەوەیان بۆ رەوانە کراوە یان نا.

کاروان ستونی جەختیکردوەتەوە، هەر کەسێک نامەی دەستکاریی بۆ گەڕابێتەوە و لە چەند رۆژی داهاتوودا هەڵە و کەمکوڕییەکانی فۆرمەکەی چاک نەکات، ناوی ناچێتە پرۆسەی تیروپشکەوە.

لەپێناو پێدانى دەرفەتى زیاتر بە دەرچوانى دوانزەى ئامادەیى، پڕکردنەوەی فۆڕمی زانکۆلاین 48 سەعات درێژکرایەوە، خوێندنی باڵاش دەڵێت؛  تا ئێستا 70٪ـی دەرچوان فۆرمی زانکۆلاینیان پرکردوەتەوە.

لە راگەیەندراوێکدا، وەزارەتی خوێندنی باڵای هەرێم، رایگەیاند لەپێناو پێدانى دەرفەتى زیاتر بە دەرچوانى دوانزەى ئامادەیى بۆ ئەوانەى تا ئێستا فۆڕمى (زانکۆلاین) یان پڕنەکردوەتەوە یان تەواویان نەکردوە، بڕیاردرا ماوەى زانکۆلاین (48) سەعات درێژبکرێتەوە.

وەزارەتى خوێندنى باڵا راشیدەگەیەنێت، تا ئێستادا 70٪ـی دەرچوان فۆرمی زانکۆلاینیان پرکردوەتەوە و ئەم بڕیارەیان  لەپێناو بەرژەوەندى گشتى و پێدانى دەرفەتى زیاتر بە دەرچوانى ئەمساڵ.

ئاماژەی بەوەشکردوە،  دەرچوانى خوێندنگە نێودەوڵەتییەکان و پیشەییەکانیش بەهەمان شێوە دەتوانن سود لەم دەرفەتە وەربگرن و لەو 48 سەعاتەدا فۆرمى زانکۆلاین پڕبکەنەوە.

خوێندنی باڵا هۆشداریشدەدات، ئەمە دواین دەرفەتە و چیتر ماوەی زانکۆلاین درێژناکرێتەوە و پێویستە خوێندکاران لەماوەى ئەو 48 سەعاتەدا پەلەبکەن و تەواوى هەوڵەکانیان بخەنە گەڕ بۆ پڕکردنەوەو تەواوکردنى فۆرمى زانکۆلاین.

قوباد تاڵەبانی، لێپرسراوی مەکتەبی سکرتارییەتی سەرۆک مام جەلال، بە ئامادەبوونی کاروان گەزنەیی، لێپرسراوی مەڵبەندی 6ـی سۆرانی یەکێتیی نیشتمانیی کوردستان لەگەڵ ئەندامانی ئەنجوومەنی مەڵبەندەکە کۆبووەوە.

لە کۆبوونەوەکەدا کە رۆژی پێنجشەممە 24ـی 9ـی 2026 بەڕێوەچوو، قوباد تاڵەبانی باسی گرنگیی دەڤەری سۆرانی کرد و ئاماژەی بەوەدا، کە ئەم دەڤەرە لە دەستپێکی شۆڕشی نوێوە و تا ئێستا مەڵبەندێکی گرنگ و جێی بایەخی یەکێتیی نیشتمانیی کوردستان بووە و بۆ داهاتووش یەکێتی پلانی هەیە لەم سنوورەدا پێگەی زۆر بەهێزتر ببێت.

هەر لەم چوارچێوەیەدا لێپرسراوی مەکتەبی سکرتارییەتی سەرۆک مام جەلال بەپێویستی زانی ئەندامانی ئەنجوومەنی مەڵبەندی راسپارد ئاستی پەیوەندییەکانیان لەگەڵ چین و توێژە جیاوازەکان و ناوچە جیاوازەکانی دەڤەری سۆران بەهێزتر بکەن و ببنە داکۆکیکاری سەرسەختی ماف و داواکارییە رەواکانی خەڵکی سنوورەکە، جەختیشی کردەوە کە دەبێت بە شێوەیەک هەڵسووکەوت بکەن کە هەموو خەڵکی ناوچەکە، مەڵبەندی یەکێتی بە ماڵی دووەمی خۆیان بزانن.

لە بەشێکی دیکەی کۆبوونەوەکەدا قوباد تاڵەبانی روونیکردەوە، یەکێتی بە تەواوی پابەندە بە هەموو ئەو بەڵێنانەی بە خەڵکی کوردستانی داوە و هەر بۆیە تا ئێستاش بە هەموو تواناوە پێداگری دەکات لەسەر پێکهێنانی حکومەتێکی خزمەتگوزار و دادپەروەر لەسەر بنەمای هاوبەشیی راستەقینە.

سەبارەت بە دۆخی ئێستای یەکێتیش، لێپرسراوی مەکتەبی سکرتارییەتی سەرۆک مام جەلال ئاماژەی بە پێگەی گرنگی یەکێتی کرد لەسەر ئاستی عیراق و ناوچەکەدا و روونیکردەوە کە لە دوای سەرۆک مام جەلالەوە هەرگیز یەکێتی وەک ئێستا پێگەی بەهێز نەبووە و بۆ هەموو پرسە گرنگەکانی کوردستان و عیراق و ناوچەکە پرس و راوێژ بە یەکێتی دەکرێت، بە جۆرێک سەرۆک بافڵ جەلال تاڵەبانی بە بەردەوامی لەگەڵ سەرکردەکانی ناوچەکە و ناوەندەکانی بڕیار لە پەیوەندیدایە.

 

لە پێنجوێن، بە بەهای 12 ملیار دینار پڕۆژەی رێگاوبان لە جێبەجێکردندایە و بەڕێوەبەری بەڕێوەبەرایەتی چاککردنەوە و پاراستنی رێگاوبانی پێنجوێنیش دەڵێت، "50 گوند رێگای قیرتاویان بۆدەچێت".

ئەمیر سۆفی جەمال، بەڕێوەبەری بەڕێوەبەرایەتی چاککردنەوە و پاراستنی رێگاوبانی پێنجوێن رایگەیاندووە: لە سنووری پێنجوێن، بە بەهای 12 ملیار دینار پڕۆژەی رێگاوبان لە جێبەجێکردندایە.

ئاماژەی بەوەشداوە، لە ئێستادا زیاتر لە 50 گوند رێگای قیریان بۆ دەچێت، کە ئەمەش دەستکەوتێکە لە ماوەی ساڵی قەیرانی دارایی لە ناوچەکەدا وێنەی نەبووە.

 

ئەوپڕۆژانەی جێبەجێ دەکرێن بریتین لە؛

 

١- رێگای خونیانە - دەڵاڕۆ

٢-  رێگای وێنە

٣-  رێگای سیامێوە

٤- رێگای گوڵانەکان

٥-  نۆژەنکردنەوەی رێگای پێنجوێن - گەرمک - سەیرانبەن

٦-  نۆژەنکردنەوەی رێگای پێنجوێن - کەوڵۆس

٧-  دروستکردنی پردی پەڕینەوەی سەیرانگای گۆڵێ