کوردستان
خاتوو شاناز ئیبراهیم ئەحمەد، ئەندامی مەکتەبی سیاسی یەکێتیی نیشتمانیی کورستان بەڕێوەبەرایەتی گشتیی ئۆپراسیۆنەکانی ئاسایشی لە سلێمانی بەسەرکردەوە و لە دیدارێکدا لەگەڵ سەرخێڵ کەمال، گفتوگۆیان لەبارەی هەوڵەکانی پاراستنی سەقامگیری و ئارامی کرا.
دواتر و لە کۆبوونەوەیەکدا لەگەڵ ژمارەیەک لە ئەفسەر و پلەداران، خاتوو شاناز ئیبراهیم ئەحمەد سوپاسی کردن کە هەردەم هوشیار و چاوکراوەن و بە گیانبازییەکی بێوێنە، پاسەوانیی سەروماڵی هاووڵاتیانن و رۆڵی ستراتیژیی دەبینن لە بنبڕکردنی تیرۆردا.
هەر لەو کۆبوونەوەیەدا خاتوو شاناز ئیبراهیم ئەحمەد رایگەیاند، "دەستخۆشی و رێزم هەیە بۆ هەوڵی بێ وچانتان و هەردەم پشتیوانتان دەبم".
بەڕێوەبەری گشتی ئۆپراسیۆنەکانی ئاسایش خۆشحاڵی بەم بەسەرکردنەوەیە دەربڕی و سوپاسی پشتیوانییە بەردەوامەکانی خاتوو شاناز ئیبراهیم ئەحمەدی کرد، کە هەموو کات هەواڵی ئەم هێزانەی پرسیوە و لە خەمی سەلامەتییاندا بووە.
ئەنجوومەنی وەزیرانی هەرێمی کوردستان، لەسەر پێشنیازی لیژنەیەکی تایبەت بە چۆنیەتی رێکخستنی ماوەی خزمەت، رەزامەندی لەسەر پەسەندکردنی کۆنووسی هەژمارکردنی ماوەی خزمەتی سەربازی و ئەمنی بە شێوازی (ساڵێک بە دوو ساڵ) "دوو چەندانە" دەربڕی.
وەزارەتی پێشمەرگەی هەرێمی کوردستان لە راگەیەنراوێکدا بڵاویکردەوە، بەپێی ناوەرۆکی نووسراوەکە کە ئاراستەی وەزارەتی پێشمەرگە و وەزارەتی ناوخۆ و ئەنجوومەن و دەزگای ئاسایشی هەرێم کراوە، ماوەی هەژمارکردنی ئەم خزمەتە لە رۆژی 4ـی تەمموزی 1992، لە راگەیاندنی یەکەم کابینەی حکومەتەوە دەستپێدەکات تا کۆتایهێنان بە ڕاژەکانیان، هەروەها پاڵپشت بە بڕیارەکانی ئەنجوومەنی وەزیران، دوا وادە بۆ هەژمارکردنی ئەم خزمەتە بە شێوازی ساڵێک بە دوو ساڵ تا رۆژی 31ـی کانوونی یەکەمی 2024 دیاریکراوە.
ئاماژەی بەوەشکردووە، پرۆسەی هەژمارکردنی ئەم خزمەتە بە مەرجێک دەبێت کە کارمەند یان ئەفسەرەکە خانەنشینی ئەو ساڵانە لە موچەی بنەڕەتی بداتەوە. بەپێی زانیارییەکان، هەر پێشمەرگەیەک پێویستە %10ـی موچەی بنەڕەتیی 10 ساڵ بداتەوە کە دەکاتە نزیکەی سێ ملیۆن و 936 هەزار دینار، بۆ ئەفسەرانیش بڕەکە دەگاتە شەش ملیۆن و 336 هەزار دینار. سەرەڕای ئەوەش، جێبەجێکردنی ئەم بڕیارە زۆرەملێ نییە و بابەتێکی ئارەزوومەندانەیە، بەجۆرێک کە پێویستە فەرمانبەر یان ئەفسەرەکە خۆی داواکاری رەسمی بۆ هەژمارکردنی ئاراستەی فەرمانگەکەی بکات.
وەزارەتی پێشمەرگە سەبارەت بە گواستنەوەی راژە ئەوەشی خستووەتەڕوو، بڕیارەکە جیاوازی لەنێوان سێکتەرەکاندا دەکات؛ بەجۆرێک ئەو کەسانەی لە هێزە سەربازی و ئەمنیەکانەوە راژەکەیان بۆ بەشی شارستانی گوێزراوەتەوە یان دەگوێزرێتەوە، هەژمارکردنی ساڵێک بە دوو ساڵ نەیانگرێتەوە، بەڵام ئەو کارمەند و ئەفسەرانەی میلاکیان لەنێوان دامەزراوە سەربازی و ئەمنیەکانی وەک پێشمەرگە، ناوخۆ و ئاسایشدا دەگوێزرێتەوە، مافی هەژمارکردنی خزمەتەکەیان بە ساڵێک بە دوو ساڵ بۆ دەپارێزرێت.
سەردانە مەیدانییەکانی خاتوو شاناز ئیبراهیم ئەحمەد بۆ لای لێپرسراو و فەرماندە ئەمنییەکان بەردەوامە و هەر ئەمڕۆ فەرماندەیی هێزەکانی کۆماندۆی کوردستانی بەسەرکردەوە و لەلایەن فەرماندە دیار عومەرەوە پێشوازیکرا.
لەدیدارەکەدا بەئامادەبوونی هەڤاڵ رفعەت عەبدوڵا جێگری سەرۆکی یەکێتی، دوایین پێشهاتە ئەمنییەکانی هەرێمی کوردستان، عیراق و ناوچەکە تاوتوێ کران و جەخت لەسەر گرنگیی رۆڵی ئەم هێزانە کرایەوە وەکو هێزێکی کاریگەر بۆ چەسپاندنی ئارامی و ئاسایش.
لە چوارچێوەی گرنگیدان بە دۆخی ئەمنی و سەقامگیری ناوچەکە، خاتوو شاناز ئیبراهیم ئەحمەد ئەندامی مەکتەبی سیاسی یەکێتیی نیشتمانیی کوردستان، سەردانی ژمارەیەک فەرماندەیی و دەزگای سەربازی و ئەمنیی لەسلێمانی کرد.
لەیەکەم وێستگەشدا، فەرماندەیی گشتیی هێزەکانی ٧٠ی بەسەرکردەوە و لەلایەن فەریق روکن عومەر ساڵح حەسەن، فەرماندەی هێزەکانی حەفتا، و ژمارەیەک ئەفسەرانەوە پێشوازیکرا.
لەودیدارەدا تاوتوێی دوایین پێشهاتە ئەمنییەکان کرا بەتایبەت لەسایەی شەڕ و ململانێ هەرێمی و نێودەوڵەتیەکان کەپریشکی گەیشتۆتە هەرێمی کوردستان.
شاناز ئیبراهیم ئەحمەد، ئەندامی مەکتەبی سیاسیی یەکێتیی نیشتمانیی کوردستان، رۆژی سێشەممە، سەردانی مەڵبەندی یەکی رێکخستنی سلێمانی (مەڵبەندی دایک)ی کرد و لەلایەن سەرکەوت زەکی، ئەندامی مەکتەبی سیاسی، ئاوات محەمەد، ئەندامی ئەنجومەنی نوێنەرانی عیراق و ئەندامانی ئەنجومەنی بەڕێوەبردنی مەڵبەندەوە پێشوازییەکی گەرمی لێکرا.
لە دیدارەکەدا، شاناز ئیبراهیم ئەحمەد پیرۆزبایی لە ئەندامانی نوێی ئەنجومەنی بەڕێوەبردنی مەڵبەند کرد و رایگەیاند: بە هەموو توانامەوە پاڵپشتی لە بەرنامەی کاری مەڵبەند دەکەم و لە نزیکەوە هاوکارتان دەبم بۆ سەرخستنی ئەرکەکانتان.
لە بەرانبەردا، سەرکەوت زەکی ئاماژەی بە گرنگیی سەردانەکە کرد و جەختی کردەوە: هاتنی خاتوو شاناز بۆ مەڵبەندی دایک نیشانەی پەرۆشی و دەرخەری گرنگیی پێگەی سلێمانییە بۆ یەکێتیی نیشتمانیی کوردستان.
لایەنە كوردستانییەكانی كەركوك لە كۆبوونەوەدان و لە كۆبوونەوەكەشدا سەرجەم لایەنەكان جەخت لەسەر پێویستی یەكڕیزی حزبە كوردستانییەكان دەكەنەوە.
لەدوای گەڕانەوەی هەردوو ئەندامەكەی پارتی بۆ ئەنجومەنی پارێزگای كەركوك، بۆ یەكەمجار ئەمڕۆ 15 لایەنی كوردستانیی لە كەركوك كۆبوونەوە.
بەپێی زانیارییەكانی كوردسات نیوز، تەوەری سەرەكی كۆبوونەوەكە باسكردن دەبێت لە گرنگیی یەكڕیزی لایەنە سیاسییە كوردییەكان و نزیكردنەوەی دیدگا و بۆچوونەكانیان لە یەكتر.
هاوكات، سەرجەم لایەنەكان جەخت لەسەر ئەوە دەكەنەوە، دەبێت لە كەركوك جیاواز بن و كوردایەتی بكرێت، هەروەها پۆستە گرنگەكان لەلای كورد بێت.
كەشناسی پێشبینی دەكات پلەكانی گەرما لە هەرێم دوو پلە روو لە دابەزین بكات و شەپۆلی گەرمای ناوەڕاست و باشوری عیراقیش بەردەوام بێت.
بەڕێوەبەرایەتی گشتی كەشناسی و بوومەلەرزەزانی هەرێمی كوردستان رایگەیاند: بەپێی پێشبینییەكانیان ئەمڕۆ و سبەی لە شارەكانی هەرێم بەراورد بە رۆژانی رابردوو پلەكانی گەرما دوو پلە دادەبەزن، بەشێوەیەك سبەی پێنج شەممە پلەی گەرما لە سلێمانی و دهۆك بۆ 40 پلە و لە هەولێر بۆ 42 پلە و لە گەرمیانیش بۆ 45 پلەی سیلیزی دادەبەزێت.
هاوكات، دەستەی گشتی كەشناسی عیراقیش بڵاویكردەوە، پێچەوانەی پارێزگاكانی هەرێم، لە ناوچەكانی ناوەڕاست و باشووری عیراق شەپۆلی گەرمای بەهێز بەردەوام دەبێت و پلەكانی گەرما لە بەغداد دەگەنە 48 پلە و لە بەسڕەش لە 50 پلەی سیلیزیدا دەمێنێتەوە.
وتیشی، چالاكبوونی خێرایی با كە لە هەندێك ناوچە دەگاتە 40 كیلۆمەتر لە سەعاتێكدا، دەبێتە هۆی زۆڵبارینێكی كەم و كەمبوونەوەی مەودای بینین.
بەڕێوەبەرایەتی پۆلیسی پارێزگای سلێمانی ئاگادارییەک بۆ ناسینەوەی تەرمی پیاوێک بڵاودەکاتەوە کە لە نەخۆشخانەی شار گیانی لەدەستداوە و تا ئێستا هیچ بەڵگەیەک لەبارەی ناسنامەی کەسەکەوە نەدۆزراوەتەوە.
راگەیاندنی پۆلیسی سلێمانی رایگەیاند، ئەو هاوڵاتییە لە بەرواری 4/8/2026 بەمەبەستی چارەسەر سەردانی نەخۆشخانەی شاری کردووە و هەر لەوێ گیانی لەدەستداوە.
بەهۆی ئەوەی هیچ ناسنامەیەکی پێنەبووە، ناو و ناونیشانی نادیارە و ئیستا تەرمەکەی لە پەیمانگای پزیشکی دادوەری سلێمانییە.
بەڕێوەبەرایەتییەکە چەند تایبەتمەندییەکیش لەبارەی شێوەی هاووڵاتییەکەی خستووەتەڕوو و دەڵێت: هاووڵاتییەکە رەگەزی نێرە وتەمەنی لەنێوان 55 بۆ 65 ساڵدایە و چاوی قاوەییە و باڵای مامناوەندە و گەنم رەنگە.
پۆلیسی سلێمانی داواش لە کەسوکاری هاووڵاتییەکە یان هەر کەسێک دەکات، ئەگەر زانیارییان لەوبارەیەوە هەیە، سەردانی پزیشکی دادوەری سلێمانی یان بنکەی پۆلیسی کوردسات بکەن.
وەزارەتی خوێندنی باڵا و توێژینەوەی زانستیی هەرێمی کوردستان رایگەیاند کە بابەت و شایستەی دامەزراندنی سەرجەم خاوەن بڕوانامە باڵاکان و سێیەکەمەکانی سەر ئاستی زانکۆکان ئەوانەی تاوەکو ئێستا دانەمەزراون لە پرۆژەبودجەی پێشنیازکراوی هەرێم و لەسەر میلاکی وەزارەت چەسپێنراون.
ئەم بڕیارە لە کۆبوونەوەیەکی تایبەتدا هات کە بە سەرپەرشتی د. توانا نەجەف محەمەدخان، بەڕێوەبەری گشتیی کارگێڕی و دارایی لە دیوانی وەزارەت، و بە ئامادەبوونی بەڕێوەبەرانی ژمێریاری و میلاکاتی سەرجەم زانکۆکانی کوردستان بەڕێوەچوو.
لە وتەیەکدا، بەڕێوەبەری گشتیی کارگێڕی و دارایی جەختی لە گرنگیی بوونی بودجەیەکی گونجاو کردەوە بۆ داڕشتنی نەخشەڕێی کارکردنی وەزارەت و بووژاندنەوەی ژێرخانی زانکۆکان.
هەروەها ئاماژەی بەوە دا کە تەرخانکردنی بودجەی پێویست بۆ دامەزراندنی سێیەکەمەکان و هەڵگرانی بڕوانامەی باڵا لە ئەولەویەتی کارەکانیاندایە.
لە بەشێکی تری کۆبوونەوەکەدا، بە داتا و ژمارە تیشک خرایە سەر چۆنیەتیی داڕشتنی پێشنیازی بودجە، شایستە داراییەکانی مامۆستایان و فەرمانبەران، میلاکات و ئاستی داهات و خەرجییەکانی زانکۆ و دامەزراوە زانستییەکان.
لە کۆتاییشدا ئامادەبووان سەرنج و پێشنیازەکانی خۆیان بۆ رێکخستنەوەی میلاکات و باشترکردنی رەوشی دارایی زانکۆکان خستەڕوو.
دوای ناڕەزایی هاووڵاتیانی قەزای پێنجوێن، پڕۆژەی روناکی بەشێوەیەکی کاتی کارەکانی لە قەزاکە راگرت.
سەڵاح جەمیل، پەیامنێری کوردسات نیوز رایگەیاند: دوای ناڕەزایی هاووڵاتیان، پڕۆژەی روناکی کارەکانی لە قەزای پێنجوێن راگرتووە.
ئەمە لەکاتێکدایە کە هاووڵاتیانی قەزاکە بە کوردسات نیوزیان راگەیاندبوو، "ناوچەکەیان شاخاوییە و گەر پڕۆژەی روناکی کاری پێ بکرێت پارەی زۆری کارەبایان بۆدێتەوە".
کۆمپانیاکانی "دانەغاز" و "نەوتی هیلال" دەستپێکردنی دابینکردنی غازی سروشتییان لە کێڵگەی کۆرمۆرەوە لە هەرێمی کوردستان بۆ وەزارەتی کارەبای عیراق لە شاری کەرکوک راگەیاند.
کۆمپانیاکانی دانەغاز لە راگەیەنراوێکدا بڵاویکردەوە، بەپێی رێککەوتنەکە، رۆژانە بڕی 100 ملیۆن پێ سێجا غاز لە کێڵگەی کۆرمۆرەوە رەوانەی وێستگەی کارەبای تازە لە کەرکوک دەکرێت بۆ ماوەی یەک ساڵ، ئەوەش بە ئامانجی پشتگیریکردنی بەرهەمهێنانی کارەبای نیشتمانی لە عیراق.
ئەوەشی خستەڕوو، ئەم هەنگاوە دوای تەواوبوونی پڕۆژەی فراوانکردنی (KM250) دێت لە تشرینی یەکەمی 2025، کە توانای بەرهەمهێنانی کۆرمۆری بە رێژەی ٪50 بەرزکردەوە بۆ 750 ملیۆن پێ سێجا لە رۆژێکدا.
مەجید جەعفەر، بەڕێوەبەری جێبەجێکاری کۆمپانیای نەوتی هیلال رایگەیاند، ئەمە یەکەم دابینکردنی غازە بۆ وەزارەتی کارەبای عیراق و قۆناغێکی گرنگە بۆ پەرەپێدانی کەرتی غاز و دابینکردنی خواستی گەشەسەندووی کارەبا لە سەرانسەری عیراقدا.
لای خۆشییەوە ریچارد هال، بەڕێوەبەری جێبەجێکاری دانەغاز ئاماژەی بەوە کرد، رێککەوتنەکە بنەمایەکە بۆ هاوکاریی ستراتیژیی زیاتر لە بازاڕی عیراقدا بەرەو بەهێزکردنی ئاسایشی ئۆتۆنۆمیی وزە.
پڕۆژەی غازی کۆرمۆر سووتەمەنی بۆ زیاتر لە ٪80ـی بەرهەمهێنانی کارەبای هەرێمی کوردستان دابین دەکات و قەبارەی سەرمایەگوزاری تێیدا چوار ملیار دۆلاری تێپەڕاندووە.
قائیمقامیەتی سلێمانی جەختدەكاتەوە، قەیرانی غازی ماڵان لە سلێمانی نییە و بە كۆبۆن غاز دەدرێت بە هاووڵاتیان.
بابان ئەحمەد سەرۆكی لیژنە هاوبەشەكانی قائیمقامیەتی سلێمانی لە لێدوانێكدا بۆ كوردسات نیوز رایگەیاند، گرژییەكانی ئەم دواییەی ناوچەكە كاریگەری لەسەر غازی ماڵان دروست نەكردووە.
ئاماژەی بەوەشدا: ئێستا هاووڵاتیان دەتوانن لە رێگەی كۆبۆنەوە غازی ماڵان بە دەستبهێنن.
بە بڕیاری قوباد تاڵەبانی بەشێكی زۆری رێگاكانی دەرەوەی سلێمانی دەكرێنە دووساید
بە بڕیاری قوباد تاڵەبانی بەشێكی زۆری رێگاكانی دەرەوەی سلێمانی دەكرێنە دووساید و نەخشەسازیی بەشێكیشیان تەواوكراوە.
بەڕێوەبەرایەتی رێگاوبانی سلێمانی رایگەیاند، دوای وەرگرتنی رەزامەندی قوباد تاڵەبانی، جێگری سەرۆک وەزیرانی هەرێم بڕیارە تەواوی رێگاکانی دەرەوەی سلیمانی بکرێن بە دوو ساید.
محەمەد جەلیل بەڕێوبەری رێگاوبانی سلێمانی لە لێدوانێكدا بۆ كوردسات نیوز رایگەیاند، لە چوارچێوەی بڕیارەكەی قوباد تاڵەبانی، هەریەکە لە رێگای سەرەكی ئیدارە سەربەخۆكان، قۆناغی دووەم و سێیەمی رێگای دوكان-چوارقوڕنە و رێگای وارماوا-دەربەندیخان بە مەبەستی کردنیان بە دوو ساید کارکردن تێیاندا بەردەوامە.
ناوبراو ئاماژەی بەوەشکرد، ژمارەیەک رێگای تریش هەن، کە زۆر پێویستە بکرێن بە دوو ساید ئەوانیش رێگای كەوڵۆس-پێنجوێن.
لەبارەی ئەو رێگانەشەوە، بەڕێوبەری رێگاوبانی سلێمانی دەڵێت؛ قوباد تاڵەبانی رەزامەندی لەسەریانداوە تا بکرێنە دوو ساید و نەخشەسازیی بەشێكیشیان تەواوكراوە.
بەڕێوەبەرایەتی پۆلیسی دارستان و ژینگەی پارێزگای سلێمانی، بڵاویکردوەتەوە، داربەڕویەکی 400 ساڵە بەشێکی شکاوە و لێکۆڵینەوە لە هۆکارەکەی دەکەن.
ئەمڕۆ سێشەممە، بەڕێوەبەرایەتی پۆلیسی دارستان و ژینگەی پارێزگای سلێمانی رایگەیاند، دوای ئاگادارکردنەوەی بنکەی پۆلیسی دارستان و ژینگەی عەربەتی سەر بە بەڕێوەبەرایەتییان لەسەر روداوێکی شکان و زیانگەیاندن بە دار بەڕویەکی بەتەمەن، دەستیان بە لێکۆڵینەوە کردوە.
ئاماژەی بەوەشکردوە، دار بەڕوەکە تەمەنی 400 ساڵە ودەکەوێتە سنوری گوندی داربەڕو، دوای چونە شوێن روداوەکە دەستبەجێ رێکاری یاسایی گیراوەتەبەر بۆ پاراستنی ئەم سەروەتە سروشتییە.
پۆلیسی دارستانی سلێمانی دەشڵێت؛ پەراوی لێکۆڵینەوەیان کردوەتەوە و تیمەکانیان بەردەوامن لە بەدواداچونی مەیدانی و لێکۆڵینەوەی ورد بۆ دیاریکردنی ئەوەی، کە ئایا شکانەکە هۆکاری سروشتی (وەک با یان کۆنیی بونیاد) بووە، یان دەستکاری و هۆکاری مرۆیی لەپشتەوە بووە.
بەرێوەبەرایەتی نەوت و کانزاکانی هەولێر، هاووڵاتیان ئاگادار دەکاتەوە، بە بەبێ کۆپی کارتی ئەلیکترۆنی خۆراک مامەڵەی کارتی سوتەمەنی ناکرێت، بەڕێوەبەرایەتی ناحیەی عەربەتیش داوادەکات بۆ دروستکردنی کارتی نەوت سەردانی بەشی خۆراک بکەن.
لە راگەیەندراوێکدا، بەرێوەبەرایەتی نەوت و کانزاکانی هەولێر داوا دەکات، هەر کەسێک دەیەوێت کارتی سوتەمەنی دروست بکات، پێویستە کۆپییەکی فۆرمی خۆراکی نوێی لەگەڵ خۆیدا بهێنیت، بە پێجەوانەوە مامەڵەی بۆ ناکرێت.
هاوکات، بەڕێوەبەرایەتی ناحیەی عەربەتیش ئاگاداری ئەو کەسانە دەکاتەوە، تازە پرۆسەی هاوسەرگیریان ئەنجامداوە و کارتی سوتەمەنیان نییە، سەردانی بەشی خۆراکی ناحییەکە بکەن بۆ دروتسکتردنی کارتەکە.
بەڕێوەبەرایەتی ناحیەی عەربەت داواش دەکات بۆ دروستکردنی کارتی سوتەمەنی پێویستە ئەم پێداویستیانە لەگەڵ خۆیاندا بهێنن؛
- کۆپییەک لە فۆڕمی خۆراکی نوێ
- کۆپی فۆڕمی خۆراکی ماڵی باوکی پیاوەکە
- کۆپی کارتی نیشتمانی پیاوەکە
- ئەگەر کارتنی کۆنی سوتەمەنی هەبوو دەبێت تەسلیمی بکاتەوە
ئەمڕۆ 13 ساڵ بەسەر ماڵئاوایکردنی یەکجاری شاعیری گەورەی کورد، شێرکۆ بێکەسدا تێدەپەڕێت، کە یەکێک لە قەڵەمە دیار و ناوازەکانی نێو ئەدەبیاتی کوردستان و ناوچەکە.
مردن
ئێجگار بەو شێوەیە
ترسناک و خەتەر نیە
وەکو خەڵکی باسی ئەکەن
من بە باوکما ئەزانم
شەست ساڵە لەلای مردنە و
دوێنێ کە ھاتەوە ماڵێ
گۆڕانی وا نەگۆڕابوو کە ئێمە نەیناسینەوە
ڕاستە مردن، دەموچاوی ھەندێ شیعری تاڕادەیەک پیرکرد بوو
ڕاستە مردن،ھەندێ چرچ و لۆچی تازەی خستبووە نێو قسەیەوە
کەمێک ڕەنگی ھیواکانی زەرد کردبوو
بەڵام ھەرگیز نەوەریبوون
لەبیرساڵ نەچوبوونەوە
باوکم دوێنێ،وەختێ گەڕایەوە ماڵێ
قەڵەم و کاغەز و گوڵ و دڵی مناڵ و باڵندە
ھەموویان چوون بە پیریەوە
ئاخر ئەگەر وەکو ئەڵێن
مردن ئەوەندە دڕندە و خەتەر باوایە
ئەوی ئەخوارد و نەئەماو لە بیری شیعریش ئەچۆوە!
بەڵام ئایا ئەم مردنە بۆ ھەموو کەسێ ھەر وایە؟
یان بەتەنھا بۆ ئەوانەی کە ھەرگیز لێی نەترساون و
وەکو باوکم سەریان داوە بە ئازادی و
دڵیان کردووە بە چرا و
چراشیان داوەتە دەستی
خۆشەویستی ئەم دنیایە!
شێرکۆ بێکهس
شێرکۆ بێکەس، کوڕی شاعیری ناوداری کورد فایەق بێکەسە و لە 2ـی ئایاری 1940 لە گەڕەکی گۆیژەی شاری سلێمانی لەدایک بوە.
شاعیرە گەورەکی کورد، یەکەمین شیعری خۆی لە تەمەنی 17 ساڵیدا لە رۆژنامەی ژین بڵاو کردوەتەوە وتوانیویەتی لە ساڵی دا1968 بۆ یەکەمجار پەرتوکێکی شیعری بە ناوی "تریفەی ھەڵبەست" لە بەغداد چاپ بکات.
شێرکۆ بێکەس، خاوەنی مارەیکی زۆر لە خەڵات و رێزلێنانی گەورەیە، توانیویەی خەڵاتی "تۆخۆڵسکی" لەساڵی 1987 لە سوید وەردەگرێت ، لە یەکەم کابینەی حکومەتدا، لە بوەتە وەزیری رۆشبینیری و ساڵی 1998 دەزگای چاپ و پەخشی سەردەمی لە سلێمانی دامەزراند، کە تا ئێستا لە کارکردن بەردەوامە.
شێرکۆ بێکەس، ساڵی 2009 سەرجەمی بەرهەمەکانی لە هەشت هەزار لاپەڕەدا چاپ کرد.
رۆژی چوار ئابی 2013 شێرکۆ بێکەس لە وڵاتی سوید، بەهۆی نەخۆشییەوە کۆچی دوای کرد و لەسەر وەسێتی خۆشی لە پارکی ئازادی شاری سلێمانی بە خاکیان سپارد.