کوردستان
د. یاد نەقشبەندی، بەڕێوەبەری نەخۆشخانەی هیوا بە کوردسات نیوزی راگەیاند، لە ساڵی نوێدا لە نەخۆشخانەی هیوا 478 کۆدی نوێی نەخۆش تۆمارکراوە، لەو ژمارەیە 285 حاڵەتیان توشبوی شێرپەنجەن و لە 20٪ی توشبوەکان دانیشتووی پارێزگاکانی تری هەرێم و عیراقن.
د. یاد نەقشبەندی، راشیگەیاند، تا ئێستا حکومەت وەک پێویست بەدەم داواکارییەکانیانەوە نەهاتووە و پێویستییەکانیان بۆ دابین نەکراوە.
داواشی لە حکومەتی هەرێم کرد بە زوترین کات بەردی بناغەی نەخۆشخانەی هیوای گەورە دابنرێت و دەست بکرێت بە پرۆسەی دروستکرنی ئەم نەخۆشخانە، کە زەوییەکەی ئامادەیە و لەسەر راسپاردەی قوباد تاڵەبانی بۆیان دابینکراوە، تاوەکو باشتر بتوانن خزمەتی توشبوانی شێرپەنجە بکەن.
ناوبراو ئاماژی بەوەشکرد، جگە لە نەخۆشخانەی هیوای گەورە، رەزامەندیان بۆ هاتوەتەوە بە دروستکردنی سەنتەرێکی دەستنیشانکردنی پێشوەختەی شێرپەنجە و ئەگەر ئەوە دروست بکرێت بە دڵنیاییەوە ژمارەی چاکبوانی توشبوی شێرپەنجە لە نەخۆشخانەکەیان زۆر زیاتر دەبێت.
لە کۆنگرەیەکی رۆژنامەوانیشدا، د.سەباح هەورامی، بەڕێوەبەری گشتی تەندروستی سلێمانی رایگەیاند، داتاکانی نەخۆشانی شێرپەنجە لە پارێزگای سلێمانی ترسناک نین و هیوادارن حکومەتی هەرێی چارەسەری پێویست بۆ توشبوانی شێرپەنجە دابین بکات.
ئاماژەی بەوەشکرد، لە ساڵی 2025 دا سێ هەزار و 145 حاڵەتی نوێ بە شێرپەنجە لە نەخۆشخانەی هیوا تۆمار كراوە.
دکتۆر یوسف گۆران ئەندامی مەکتەبی سیاسی یەکێتیی نیشتمانی کوردستان لە میانەی لێکۆڵینەوەیەکدا دەربارەی گەشەسەندنی ئابوریی هەرێمی کوردستان و عیراق لە 10 ساڵی کۆتاییدا، چەند داتایەکی دڵخۆشکەری لەسەر ئاستی وەبەرهێنان لە سنوری پارێزگای سلێمانی بڵاوکردەوە.
بەپێی ئەو داتایانەی دکتۆر یوسف گۆران ئاماژەی پێکردوون، لە ساڵی 2025دا بڕی 2.028.960.487 دۆلار سەرمایە وەک وەبەرهێنان هاتوەتە سنوری پارێزگای سلێمانی؛ ئەم سەرمایەیە لە 55 پڕۆژەی هەمەجۆردا بونیات نراوە. ئاماژە بەوەش کراوە کە بەراوردکردنی ئەم ژمارانە لەگەڵ 10 ساڵی پێشوی وەبەرهێنان، جیاوازییەکی زۆر و بەرچاو نیشان دەدات.
لە ناو پڕۆژە نوێیەکاندا، کەرتی پیشەسازی بایەخێکی زۆری پێدراوە و بڕی 752 ملیۆن دۆلاری بۆ تەرخان کراوە. ئەم گەشەسەندنە گەورەیە لە بڕی وەبەرهێنان و راکێشانی سەرمایە، بوەتە هۆی رەخساندنی هەزاران هەلی کار بۆ هاووڵاتییان.
دکتۆر یوسف گۆران جەخت دەکاتەوە کە راکێشانی سەرمایە و دروستکردنی ژینگەیەکی ئارام بۆ وەبەرهێنان، "سیاسەتێکی نیشتمانییە" و رۆڵی سەرەکی لە گەشەسەندنی ئابوری و کۆمەڵایەتیدا دەبینێت. راشیگەیاندووە کە پێویستە ئەم هەنگاوانە پاڵپشتی لێ بکرێت و بکرێتە ئاراستەیەکی بەردەوام بۆ خزمەتکردنی زیاتری کوردستان و خەڵکەکەی.
دەزگای ئاسایشی هەرێم رایگەیاند، لە ماوەی کەمتر لە 20 سەعاتدا، بەڕێوەبەرایەتیی ئاسایشی پارێزگای سلێمانی توانی بکەری سەرەکیی تاوانی هەڵکوتانە سەر نووسینگەیەکی ئاڵوگۆڕی دراو لە گەڕەکی راپەڕینی شاری سلێمانی دەستگیر بکات.
لە راگەیەندراوێکدا، عەقید کارزان شێرکۆ، وتەبێژی دەزگای ئاسایشی هەرێم ئاماژەی بەوە کرد، دوای هەوڵە بەردەوامەکانی هێزەکانی ئاسایش بۆ پاراستنی سەقامگیری، توانرا هەر دوو تۆمەتبارە سەرەکییەکە دەستگیر بکرێن. هاوکات لە کاتی دەستگیرکردنیاندا، دەست بەسەر تەواوی ئەو بڕە پارە دزراوە و ئەو چەکەشدا گیرا کە تۆمەتبارەکان لە کاتی ئەنجامدانی تاوانەکەدا بەکاریان هێنابوو.
لە ئێستادا هەر دوو تۆمەتبارەکە بەپێی مادەی 443 لە یاسای سزادانی عیراقی راگیراون و لێکۆڵینەوە لە دۆسیەکە بەردەوامە، تاوەکو رێکارە رەسمییەکان بەرامبەریان تەواو بکرێت و رەوانەی دادگا بکرێن.
بەڕێوەبەرایەتیی پۆلیسی پارێزگای سلێمانی رایگەیاند، تۆمەتبارێکیان بە تۆمەتی کوشتنی خوشکەکەی لە گوندێکی سەر بە قەزای سەیدسادق دەستگیر کردووە.
ئەمڕۆ سێشەممە، 3-2-2026، دوای ئەوەی هەواڵی برینداربوونی کچێک بە ناوی (ئـ. س. ع) لە گوندی تاسڵوجەی سەر بە قەزای سەیدسادق گەیشتە بنکەی پۆلیسی ناوچەکە، مەفرەزەکانی پۆلیس گەیشتنە شوێنی روداوەکە و لێکۆڵینەوەیان دەستپێکرد. بریندارەکە کە لەدایکبووی ساڵی 2008ـە، بەهۆی سەختیی برینەکەیەوە لە نەخۆشخانە گیانی لەدەستدا.
پۆلیسی سلێمانی ئاماژەی بەوە کردووە، لە ماوەی کەمتر لە سەعاتێکدا توانرا تۆمەتباری روداوەکە کە برای کوژراوەکەیە دەستگیر بکرێت. تۆمەتبارەکە ناوی (ئـ. س. ع)ـە و لەدایکبووی ساڵی 2013ـەیە؛ هاوکات دەستیش بەسەر ئەو چەکەدا گیراوە کە لە تاوانەکەدا بەکاریهێناوە.
لە ئێستادا تۆمەتبارەکە بەپێی مادەی 405 لە یاسای سزادانی عیراقی و بە بڕیاری دادوەر راگیراوە. دۆسیەی لێکۆڵینەوە بۆ روداوەکە کراوەتەوە و لێکۆڵینەوەکان لەگەڵ تۆمەتبارەکەدا بەردەوامن بۆ رونکردنەوەی هۆکاری روداوەکە.
پەرلەمانتارێکی دیاری بەریتانیا لە هەڵوێستێکی نوێدا پشتیوانی خۆی بۆ گەلی کورد لە رۆژئاوای کوردستان دووپات دەکاتەوە و داوا لە حکومەتی وڵاتەکەی دەکات دەستبەجێ بێتە دەنگ.
جێرمی كۆربن، پەرلەمانتاری دیاری بەریتانی، نامەیەكی رەسمی ئاڕاستەی وەزیری دەرەوەی وڵاتەكەی كرد و تێیدا نیگەرانی قووڵی خۆی بەرانبەر مەینەتییەكانی گەلی كورد لە رۆژئاوای كوردستان دەربڕی.
جێرمی كۆربن ئاماژەی بەوەکردووە، هێرشەکان کە بە "هەماهەنگی لەگەڵ تورکیا" ئەنجام دەدرێن، مەترسیی هەڵگیرسانەوەی جەنگی ناوخۆیی و چەوساندنەوەی کوردەکانی لە سوریا لێدەکرێت.
جێرمی کۆربن لە بەشێکی تری نامەکەیدا، جەختی لە مافە مێژووییەکانی گەلی کورد کردووەتەوە و رایگەیاندووە: "کورد یەکێکە لە گەورەترین نەتەوەکانی جیهان کە خاوەنی دەوڵەتی سەربەخۆ نین و بۆ ماوەیەکی درێژ لە مافی بڕیاردانی چارەنووسی خۆیان بێبەش کراون".
داواکارییەکانی کۆربن لە لەندەن:
چوار داواکاری سەرەکی ئاراستەی حکومەتی بەریتانیا کردووە
یەکەم، پشتیوانیکردنی دانوستانی گشتگیر لە نێوان حکومەتی سوریا و نوێنەرانی گەلی کورد بۆ راگەیاندنی ئاگربەست
دووەم، پاراستنی نەتەوەی کورد و رێگریکردن لە کۆچی زۆرەملێ.
سێیەم، دانپێدانی دەستوری بە ناسنامە و زمانی کوردی و مافی خۆبەڕێوەبەری. چوارەم، ناردنی چاودێری نێودەوڵەتی بۆ دۆکیومێنتکردنی پێشێلکارییەکانی مافی مرۆڤ.
محەمەد عەبدولرەحمان پەیامنێری کوردسات نیوز لە بەغداد رایگەیاند: وردبینی لە لیستی موچەی مانگی یەکی موچەخۆرانی هەرێم تەواوبووە و عیراق چاوەڕوانی هەرێمە بۆئەوەی 120 ملیار دینارەکەی بۆبنێرێت و دواتر موچە لە عیراقەوە بۆ هەرێم بنێردرێت.
نورەدین ئەحمەد، کاندیدی هێزەکانی سوریای دیموکرات بۆ پارێزگاری حەسەکە، بە میدیاکانی رۆژئاوای راگەیاندوە، حکومەتی کاتی سوریا رەزامەندی لەسەر کاندیدکردنی بۆ بون بە پارێزگاری حەسەکە دەربڕیوە و بۆ ئەو مەبەستەش بڕیارە لە ماوەی دوو رۆژدا لەگەڵ وەفدێکی سیاسی سەردانی دیمەشق بکەن.
دوای ئەوەی دوێنێ شەو میدیاکانی رۆژئاوا رایانگەیاند، هەسەدە نورەدین ئەحمەدیان بۆ پۆستی پارێزگاری حەسەکە کاندید کردوە، ئەمڕۆ یەکشەممە، ناوبرا بە " North Press Agency " ـی راگەیاندوە، دیمەشق رەزامەندیان دەربڕیوە بۆ بوون بە پارێزگاری حەسەکە.
نورەدین ئەحمەد ناسراو بە ئەبو عومە خانیکە، لە ساڵی 1969 لە شاری قامیشلۆ لە دایکبووە و خاوەنی بڕوانامەی دبلۆمە ئەندازیاری میکانیک و کارەبا لە زانکۆی دیمەشق.
لە ساڵی 1993 تا ساڵی 2012 وەک ئەندازیار لە بەرێوەبەرایەتی پەیوەندییەکانی حەسەکە و قامیشلۆ کاری کردووە، کاتێک رژێمی لابراو لە کارەکەی دوورخستەوەتەوە و بەهۆی بەشداریکردنی لەو خۆپیشاندانانەی کە داوای روخاندنی دەسەڵاتەکەی ئەسەدیان دەکرد.
دواتر ناوبراو لە چوارچێوەی ئەنجومەنە خۆبەڕێوەبردنەکاندا کاری کردووە و چالاک بووە لە بەرەوپێشبردنی ئاشتی مەدەنی و لە سەرەتای ساڵی 2014وە وەک ئەفسەری پەیوەندییە گشتیەکانی هێزەکانی سوریای دیموکرات (هەسەدە) کاری کردووە و ئەندامی فەرماندەیی گشتی هێزەکانی سوریای دیموکراتە.
رۆژی 30 مانگی رابردوو، هەسەدە و دیمەشق، رێکەوتنێکی ئاگربەستیان ئەنجامدا بۆ یەکخستنی دامودەزگاکانی دەوڵەت و بەگوێرەی ئەو رێککەوتنە، هەسەدە کاندیدی بۆ پۆستەکانی پارێزگاری حەسەکە و یاریدەدەری وەزیری بەرگری و چەند پۆستێکی تر کە کە تا ئێستا ئاشکرا نەکراون دەبێت.
شێخ جەعفەر شێخ مستەفا لە ساڵیادی کارەساتەکەی یەکی شوباتدا پەیامێکی بڵاوکردەوە
شێخ جەعفەر شێخ مستەفا، جێگری سەرۆکی هەرێمی کوردستان لە ساڵیادی کارەساتەکەی یەکی سوباتی هەولێردا پەیامێکی بڵاوکردەوە و رایگەیاند، لە ساڵیادی ئەم رۆژە شومە و لەم یادە پڕ ئازارەدا، کە تیایدا کۆمەڵێک لە سەرکردە و پێشمەرگە و خەڵکی بوێر و دڵسۆزی کوردستان بوون بەقوربانی دەستی تیرۆریستانی تاریک پەرست، سەری ڕێز و وەفا بۆ یەکە یەکەی شەهیدانی ئەم کارەساتە دادەنەوێنم.
شێخ جەعفەر ئاماژەی بەوەشکردوە، ئەوەی لە پشت ئەو کردەوە قێزەونانەوە دەکرێتە ئامانج تەنها شەهید بوونی رۆڵەکانمان نیە، بەڵکو لە دیدگای دوژمنانەوە ئامانج تیایدا سڕینەوەی شوناسی نەتەوەی کورد و كوردستانە و گرنگە لێرەدا سەرکردایەتیی کورد درک بەو راستییە بکات،
پەیامی جێگری سەرۆکی هەرێم لە ساڵیادی شەهیدانی یەکی شوباتدا
لە ساڵیادی ئەم ڕۆژە شوومە و لەم یادە پڕ ئازارەدا، کە تیایدا کۆمەڵێک لە سەرکردە و پێشمەرگە و خەڵکی بوێر و دڵسۆزی کوردستان بوون بەقوربانی دەستی تیرۆریستانی تاریک پەرست، سەری ڕێز و وەفا بۆ یەکە یەکەی شەهیدانی ئەم کارەساتە لە بیرنەکراوە و گشت شەهیدانی ڕێگای ڕزگاریخوازی کوردستان دادەنەوێنم.
بە داخەوە ئەوەی لە پشت ئەو کردەوە قێزەونانەوە دەکرێتە ئامانج تەنها شەهید بوونی ڕۆڵەکانمان نیە، بەڵکو لە دیدگای دوژمنانەوە ئامانج تیایدا سڕینەوەی شوناسی نەتەوەی کورد و كوردستانە، گرنگە لێرەدا سەرکردایەتیی کورد درک بەو ڕاستییە بکات کە دوژمنان هەم لە ڕابردوو و هەم لە ئێستاشدا ئامانجیان لەناوبردنمان بووە و دەبێت، بۆ هەمیشەش ههڕهشه و مهترسی دەبن بۆ سەر خاک و نیشتیمانمان.
لە کۆتاییدا سەری ڕێز و وەفا بۆ شەهیدانی ئەم کارەساتە لە بیرنەکراوە و گشت شەهیدانی کوردستان و خۆڕاگریی و ئیرادەی لەبن نەهاتووی خانهواده سهربهرزهكانیان دادەنەوێنم.
شێخ جەعفەر شێخ مستەفا
جێگری سەرۆکی هەرێمی کوردستان
٢٠٢٦/٢/١
لە ساڵیادی 22 ساڵەی کارەساتەکە یەکی شوباتی هەولێردا، وەزیری پێشمەرگەی حکومەتی هەرێم پەیامێکی بڵاوکردەوە و رایگەیاند ئەم تاوانە تیرۆریستییە، دەرخەری ئەو راستیەیە کە تیرۆریستان و دووژمنانی گەل و خاکەکەمان هەمیشە لە بۆسەدان بۆمان، هەر جارەو بە ناو و ناونیشانێکی جیاوازەوە تاوانە قێزەونەکانیان ئەنجام دەدەن.
شۆڕش ئیسماعیل، وەزیری پێشمەرگەی حکومەتی هەرێم دەڵێت؛ کارەساتی یەکی سوباتی هەولێر یەکێکە لەو زنجیرە کارەسات و روداوانەی، کە تا ئێستاش و بە بەردەوامی لە بیر و هزری خەڵکی کوردستاندا هەر زیندووە؛ بەهۆیەوە 103 هاووڵاتیی بێتاوان شەهید بوون و 246 هاووڵاتی تریش بریندار بوون.
دەقی پەیامەکەی وەزیری پێشمەرگە:
«کارەساتی دڵتەزێنی ١ـی شوبات، یەکێکە لەو زنجیرە کارەسات و رووداوانەی کە تا ئێستاش و بە بەردەوامی لە بیر و هزری خەڵکی کوردستاندا هەر زیندووە؛ کە لە ئەنجامی دوو تەقینەوەی تیرۆریستیدا، لە ڕۆژی جەژن و شادیدا، لە هەولێری پایتەخت، بەداخەوە (١٠٣) هاوڵاتیی بێتاوان شەهیدبوون و (٢٤٦) هاوڵاتیی دیکەش برینداربوون.
ئەم تاوانە تیرۆریستییە، دەرخەری ئەو راستیەیە کە تیرۆریستان و دووژمنانی گەل و خاکەکەمان هەمیشە لە بۆسەدان بۆمان، هەر جارەو بە ناو و ناونیشانێکی جیاوازەوە تاوانە قێزەونەکانیان ئەنجام دەدەن؛ بەڵام بەرامبەر یەکڕیزی و ئیرادەی بەرز و بەهێزی گەلەکەمان و هێزی پێشمەرگەی کوردستان، هەمیشە تێکشکاون».
درود بۆ ڕۆحی پاکی شەهیدانی یەکی شوبات و تێکڕای شەهیدانی ڕێگەی ڕزگاریخوازی کوردستان.
شۆڕش ئیسماعیل
وەزیری پێشمەرگەی حکومەتی هەرێمی کوردستان
قوباد تاڵەبانی، لە یادی 22 ساڵەی کارەساتی یەکی شوباتی هەولێردا، پەیامێکی بڵاوکردەوە و رایگەیاند، سڵاو دەنێرین بۆ گیانی هەموو شەهیدانی ئەو روداوە تیرۆریستییە و هەموو شەهیدانی کوردستان، جەختیکردوەتەوە سەرەرای ناکۆکی ناوخۆی دوژمنان و تیرۆرساتن وەک کورد هەمووان دەکەن ئامانج.
قوباد تاڵەبانی ئاماژەی بەوەکردوە، پەیامی یەکی شوبات رونە؛ کورد لە ناوخۆدا ئەگەر سەد رەنگ بن و هەزار جۆر ململانێیان هەبێت، بەڵام تیرۆرستان ئەوە نازانن و وەک کورد هەمووان دەکەن ئامانج و هەوڵی لەنابوردنیان دەدەن.
جەختیشیکردوەتەوە، ئەرکی ئێمەی کوردە، بە هەموو جیاوازی و ناکۆکییەکانمانەوە وەک کورد، بە یەک گیان و بە یەک هەڵوێستەوە بەرەنگاریان ببینەوە.
دەقی پەیامەکەی قوباد تاڵەبانی
پەیامی یەکی شوبات زۆر روونە:
ئێمە لەناو خۆماندا سەد رەنگ بین، هەزار جۆر ململانێ و ناکۆکی و بەرژەوەندیی جیاوازیشمان هەبێت، بەڵام تیرۆریستان و نەیاران و دوژمنانمان وەک کورد دەمانکەنە ئامانج و هەوڵی لاوازکردن و لەناوبردنمان دەدەن.
هەربۆیە ئەرکی ئێمەی کوردیشە، بە هەموو جیاوازی و ناکۆکییەکانمانەوە وەک کورد و بە یەک گیان و بە یەک هەڵوێستەوە بەرەنگاریان ببینەوە.
لە یادی ٢٢ ساڵەی کارەساتی یەکی شوباتی هەولێردا، سڵاو دەنێرین بۆ گیانی هەموو شەهیدانی ئەو رووداوە تیرۆریستییە و هەموو شەهیدانی کوردستان.
سەرۆکی کۆمەڵگەی کورد لە ئیسرائیل رایگەیاند، لەم رۆژانەدا دەستپێشخەرییەک لە ئارادایە و داوایەک ئاراستەی حکومەتی ئیسرائیل کراوە، کە تێیدا داوای پشتیوانی و هاوپەیمانی بۆ برا کوردەکانیان لە رۆژئاوای کوردستان دەکرێت.
یەهودا بن یوسف، سەرۆکی کۆمەڵگەی کورد لە ئیسرائیل، پەیامێکی لە تۆڕی کۆمەڵایەتی ئێکس بڵاوکردوەتەوە و رایگەیاند، پرۆژەیەکیان داوەتە حکومەتی ئیسرائیل بۆ پشگیریکردنی کوردەکانی رۆژئاوای کوردستان و داواش دەکات کوردەکان لە هەرشوێنێکن هاوکاریان بن و ئیمزای بکەن.
ناوبراو ئاماژەی بەوەکردوە، ئیمزای هەر یەکێک لە ئێوە، کە مەبەستی کوردەکانە لەسەر ئەم داواکرییە کارێکی گرنگ و پڕ واتایە و داوا لە هەموو تاکێکی کورد دەکات ئیمزای بکەن، لە تۆڕەکۆمەڵایەتییەکان بڵاوی بکەنەوە و هاوکار بن لە گەیاندنی بە هەمووان، تا بتوانین هەزاران ئیمزا کۆبکەینەوە.
لە کۆتایشدا یەهودا بن یوسف دەڵێت؛ تەنها پێکەوە دەتوانین دەنگێکی رون، یەکگرتوو و بەهێز بەرز بکەینەوە.
ئەو لینکەی کە دەتوانن دەنگی پێبدەن
مەكتەبی سیاسی یەكێتیی نیشتمانیی كوردستان لەیادی 22 ساڵەی كارەساتی تەقینەوەكانی یەكی شوباتدا پەیامێکی بڵاوکردەوە تێیدا هاتووە؛ لەو روداوە کارەساتبارەدا، کە ژمارەیەک سەركردە و كادر وهاووڵاتیی شەهید و بریندار بوون، تیرۆرستان سەلماندیان نەك هەر دوژمنی مرۆڤایەتی و دیموكراسی و ئازادین، بەڵكو دژی گشت بەهایەكی كۆمەڵایەتی و ئاینییشن.
دەقی پەیامەكە..
لەیادی بیست و دووەمین ساڵڕۆژی كارەساتی تەقینەوەكانی یەكی شوبات لە مەڵبەندی سێی ڕێكخستنی یەكێتیی نیشتمانیی كوردستان و لقی دووی پارتی دیموكراتی كوردستاندا كە تێدا پۆلێك سەركردە و كادرو لایەنگری هەردوو حزب و ژمارەیەك هاووڵاتی شەهید و بریندار بوون، تیرۆریستان بەم كردەوانەیان دەریانخست ئەوان نەك هەر دوژمنی مرۆڤایەتی و دیموكراسی و ئازادین، بەڵكو دژی گشت بەهایەكی كۆمەڵایەتی و ئاینییشن، چونكە ئەو رۆژەی تیرۆرستان تاوانەكانیان تێیدا ئەنجامدا یەكەم رۆژی جەژنی قوربان بوو، بەڵام لەچەند ساتێكدا گشت خۆشی و شادییەكیان خەڵتانی خوێن كرد و شاری هەولێریان تازێ بار كرد.
لەم رۆژانەدا كە ئەم یادە پڕ سوێیە دەكەینەوە جارێكی تر گەلەمان ڕووبەڕوی مەترسی تیرۆر و هەڕەشەی سڕینەوە بۆتەوە كە ڕۆژئاوای كوردستان بۆتە ناوەندی ئەم بەرەنگارییە رەوایە و گەلەكەمان لە سەرتاسەری كورستان و تاراوگە پشتیوانی خۆڕاگری رەوای براكانی دەكات و جۆرێك لەیەك ڕیزیی میللی و نیشتمانییان دروست كردووە ، واپێویست دەكات هێزە سیاسیەكانی كوردستان بەدەنگ پەرۆشی و داخوازی یەكڕیزی گەلەكەمانەوە بێن بۆ بەرپەرچدانەوەی مەترسییەكان و پتەوكردنی گیانی دەربەستی و یەكێتیی نەتەوەیی.
درود بۆ ڕۆحی شەهیدانی یەكی شوبات و گشت شەهیدانی كوردستان
مەكتەبی سیاسی
یەكێتیی نیشتمانیی كوردستان
بەڕێوەبەرایەتی نەوت و کانزاکانی سلێمانی بڵاویکردوەتەوە، سبەینێ لە مەڵبەندەکانی یەک و دوو، دەست بە دابەشکردنی ئەو نەوتە دەکرێت، کە لەلایەن حکومەتی عیراقەوە دابین کراوە.
ئاماژەیان بەوەشکردوە، هەر خێزانێک بڕی 100 لیت وەردەگرێت، بە نرخی 31 هەزار دینار.
بەڕێوەبەرایەتی نەوت و کانزاکانی سلێمانی، جەختیشیکردوەتەوە، وەرگرتنی نەوتەکە لەلایەن هاووڵاتییانەوە بە کارتی زیرەک دەبێت.
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ رەیان کلدانی، ئەمینداری گشتیی بزوتنەوەی بابلیون کۆبووەوە.
لە دیدارێکدا کە قوباد تاڵەبانی و دەرباز کۆسرەت رەسوڵ، ئەندامانی مەکتەبی سیاسی ئامادەیبوون، گفتوگۆ لەبارەی هەنگاوەکانی پێکهێنانی حکومەتی نوێی عیراق کرا.
هەردوولا جەختیان لە پابەندبوون بە وادەی دەستوری بۆ پێکهێنانی حکومەتی نوێی عیراق و هەڵبژاردنی سەرۆک کۆمار کردەوە.