ئەمڕۆ هەینی، لە شەقامی سالمی شاری سلێمانی و لە بەردەم پەروەردەی رۆژئاوا، روداوێکی سەختی هاتوچۆ لە نێوان دوو ئۆتۆمبێلدا رویدا و بەهۆیەوە گیانلەدەستدانی کەسێک و برینداربوونی چەند کەسێکی لێکەوتەوە.

بەپێی زانیارییەکانی رێباز هیوا پەیامنێری کوردسات نیوز، لە ئەنجامی ئەم روداوەدا یەکێک لە سەرنشینەکان گیانی لەدەستداوە و 3 سەرنشینی دیکەش بە سەختی بریندار بوون و بۆ وەرگرتنی چارەسەر رەوانەی نەخۆشخانە کراون.

شایەتحاڵانی روداوەکە بە پەیامنێری کوردسات نیوزیان راگەیاندووە؛ یەکێک لە ئۆتۆمبێلەکان خێراییەکی لەرادەبەدەری هەبووە؛ دوای پێکدادانەکەش دەرکەوتووە کە گێچی خێرایی ئۆتۆمبێلەکە لەسەر 180 کم وەستاوە.

تیمەکانی هاتوچۆ گەیشتوونەتە شوێنی روداوەکە و لێکۆڵینەوەیان بۆ دیاریکردنی هۆکارەکان و چۆنیەتیی روداوەکە دەستپێکردووە.

وەزیری دەرەوەی فەڕەنسا گەیشتە هەرێمی كوردستان و پشتگیری فەڕەنسای بۆ هەرێمی كوردستان دوپاتكردەوە.

لەیەكەم وێستگەی سەردانەكەیدا بۆ هەرێمی كوردستان  ژان نوێل بارۆ وەزیری دەرەوەی فەرەنسا لەگەڵ نێچیرڤان بارزانی كۆبوەوە، پاش كۆتایی هاتنی كۆبونەوەكەش نێوانیان نێچیرڤان بارزانی سەرۆكی هەرێمی كوردستان لە كۆنفڕانسێكی رۆژنامەوانیدا رایگەیاند، لەبارەی رەوشی سوریاوە تێڕوانینی هاوبەشیان لەگەڵ فەرەنسا هەیە و جەخت لە جێبەجێكردنی رێككەوتنەكەی هەسەدە و دیمەشق دەكەنەوە.

لای خۆشییەوە هەروەها ژان نۆیل بارۆ وەزیری دەرەوەی فەڕەنسا رایگەیاند، هەرێمی كوردستان رۆڵی لە رێككەوتنی هەسەدە و دیمەشق هەبووە و فەڕەنسا پشتیوانی خۆی بۆ هەرێمی كوردستان دووپات دەكاتەوە.

 بریاریشە سبەینێ وەزیری دەرەوەی فەرەنسا لە هەولێر لەگەڵ مەزڵوم عەبدی فەرماندی گشتی هێزەكانی سوریای دیموكرات كۆببێتەوە

قوباد تاڵەبانی، جێگری سەرۆک وەزیران پێشوازیکرد لە وەفدێکی باڵای ئابووری ئەڵمانیا بە سەرۆکایەتیی دۆرسییا شوتز، بەڕێوەبەری دیسکی رۆژهەڵاتی ناوەڕاست و باشوری ئەفریقیا لە وەزارەتی ئابووری و وزەی ئەو وڵاتە و پێکەوە گفتوگۆیان کرد لەبارەی پرسی گەشەپێدانی ئابووری لە کوردستان و چۆنییەتی کارئاسانیکردن بۆ وەبەرهێنەرانی ئەڵمانی لە هەرێمی کوردستان.

لە کۆبوونەوەکەدا کە ئەمڕۆ پێنج شەممە بە ئامادەبوونی ئەلبرێخت ڤۆن ڤیتکا، کونسوڵی گشتیی ئەڵمانیا بەڕێوەچوو، باس لە ژێرخانی ئابوری کوردستان و چاکسازییە ئابوورییەکان و دەرفەتەکانی وەبەرهێنان لە هەرێم کرا.

لە کۆبونەوەکەدا هەردوولا هاوڕابوون دەرفەتی زۆر گەورە هەیە بۆ بەشداریکردنی وەبەرهێنەرانی ئەڵمانی لە پرۆسەی گەشەپێدانی ئابووری کوردستان و بە پێویست زانرا کاری هاوبەش بکرێت بۆ ئەوەی ئاستی بەشداریی کۆمپانیا و وەبەرهێنەرانی ئەڵمانی لە گەشەپێدانی کوردستان زیاتر بکرێت.

لەم چوارچێوەیەدا قوباد تاڵەبانی ئاماژەیدا بە گرنگیی بەهێزترکردنی پەیوەندیی ئابووری و بازرگانی لەنێوان هەرێمی کوردستان و ئەڵمانیا و رایگەیاند؛ حکومەتی هەرێم ئامادەیە هەموو جۆرە کارئاسانی و هاوکارییەک پێشکەشی کۆمپانیا و وەبەرهێنەرانی ئەڵمانی بکات.

بەڕێوەبەرایەتیی هاتوچۆی گەرمیان ئاگادارییەکی بەپەلە ئاڕاستەی شۆفێران دەکات و رایدەگەیەنێت، بەشێکی رێگەی تەنگی سەرتەک رۆچووە و هاتوچۆکردن تێیدا مەترسیدارە.

لە راگەیەندراوێکی هاتوچۆی گەرمیاندا هاتووە، رێگەی سەیرانگای سەرتەک (تەنگی سەرتەک) بەهۆی رۆچوونی بەشێکی زەوییەکەوە زیانی پێگەیشتووە؛ ئەمەش مەترسیی بۆ شۆفێران دروست کردووە، بەتایبەتی بۆ ئۆتۆمبێلە بارهەڵگرەکان.

راگەیاندنی هاتوچۆی گەرمیان ئاماژەی بەوەش کردووە، کارمەندانی هاتوچۆی مەیدان گەیشتوونەتە شوێنەکە و بەربەستیان بۆ ئەو بەشە زیانلێکەوتووەی رێگەکە داناوە.

هاتوچۆ داوا لە شۆفێران دەکات تا ئەو کاتەی لایەنە پەیوەندیدارەکان رێگەکە چاک دەکەنەوە، بەوپەڕی وریاییەوە هاتوچۆ بکەن و پابەندی رێنماییەکان بن، تاوەکو گیان و سامانیان لە هەر روداوێکی هاتوچۆ پارێزراو بێت.

وەزارەتی دارایی و ئابوریی هەرێمی کوردستان رایگەیاند، داهاتی نانەوتیی مانگی یەکی هەرێم رادەستی حکومەتی فیدراڵ کراوە.

بەپێی راگەیەندراوێکی وەزارەتی دارایی، ئەمڕۆ پێنجشەممە، 5-2-2026، بڕی 120 ملیار دینار وەک داهاتی نانەوتیی هەرێم بۆ مانگی کانوونی دووەم، بە شێوەی کاش خرایە سەر هەژماری بانکی وەزارەتی دارایی حکومەتی فیدراڵ لە لقی هەولێری بانکی ناوەندیی عیراق.

ئەم هەنگاوە لە چوارچێوەی جێبەجێکردنی رێککەوتنەکانی نێوان هەولێر و بەغدادە بۆ رێکخستنەوەی داهاتە نانەوتییەکان و دابینکردنی شایستە داراییەکانی هەرێمی کوردستان و موچەی فەرمانبەران.

بەڕێوەبەرایەتیی گشتیی کەشناسی و بومەلەرزەزانیی هەرێم، پێشبینییەکانی کەشوهەوای 48 سەعاتی داهاتووی بڵاوکردەوە و ئاماژەی بەوە کردووە کە لە درەنگانی شەوی هەینییەوە شەپۆلێکی بارانبارین و بەفر ناوچەکە دەگرێتەوە.

کەشناسیی هەرێم رایگەیاند، ئەمڕۆ پێنجشەممە، 5-2-2026، ئاسمان بە گشتی نیمچە هەور دەبێت. پلەکانی گەرما بەراورد بە تۆمارکراوەکانی دوێنێ، 1 بۆ 2 پلەی سیلیزی نزم دەبنەوە. خێرایی با لە نێوان 5 بۆ 15 کم/س دەبێت و مەودای بینینیش 7 بۆ 9 کم دەبێت.

بۆ سبەینێ هەینی، 6-2-2026، ئاسمان لە نیمچە هەورەوە دەگۆڕێت بۆ هەوری تەواو. بەپێی راگەیەندراوەکە، بەهۆی کاریگەریی نزمە پاڵەپەستۆیەکی باکووری دەریای ناوەڕاست، لە سەعاتەکانی درەنگانی شەودا نمە باران و بەفرێکی کەم لە ناوچە شاخاوییە سنورییەکانی رۆژهەڵات و پارێزگای سلێمانی دەست پێ دەکات، پاشان لە رۆژی شەممەدا کاریگەرییەکەی زۆربەی ناوچەکانی هەرێمی کوردستان دەگرێتەوە.

کەشناسی ئاماژەی بەوەش کردووە، لە کاتی داباریندا مەودای بینین بۆ 4 تا 6 کم کەم دەبێتەوە.

بەرزترین پلەکانی گەرمای پێشبینیکراو بۆ سبەینێ بە پلەی سیلیزی:

هەولێر: 15
سلێمانی: 11
دهۆک: 13
کەرکوک: 17
هەڵەبجە: 14
زاخۆ: 14
گەرمیان: 16
سۆران: 8
پیرمام: 11
چەمچەماڵ: 13
حاجی ئۆمەران: 1

پۆلیسی ئاکرێ دەستگیرکردنی تۆمەتبارێکی راگەیاند کە بڕی 51 ملیۆن دینار و بڕێک زێڕ و دۆلاری لە سنوری ناحیەی دینارتە دزیبوو.

عیماد حوسێن، بەڕێوەبەری راگەیاندنی پۆلیسی ئاکرێ بە  کوردسات نیوزی راگەیاند: دوای ئەوەی رۆژی رابردوو هاووڵاتییەک لە سنوری ناحیەی دینارتە سەردانی بنکەی پۆلیسی کرد و سکاڵای تۆمارکرد، کە بڕێکی زۆر پارە و زێڕ لە ماڵەکەیدا دزراوە، دەستبەجێ تیمەکانیان دەستیان بە لێکۆڵینەوە کرد.

ئاماژەی بەوەشدا، پاش بەدواداچوونی ورد، ئەمڕۆ توانرا تۆمەتبارەکە لەناو شاری ئاکرێ دەستگیربکرێت و دەستبگیرێت بەسەر ئەو کەلوپەلانەی دزیبوونی، کە پێکهاتبوون لە 51 ملیۆن دیناری عیراقی و 600  دۆلاری ئەمریکی و سێ پارچە زێڕ.

بەڕێوەبەری راگەیاندنی پۆلیسی ئاکرێ وتیشی: تۆمەتبارەکە دانی بە تاوانەکەیدا ناوە و لە ئێستادا بەپێی مادەی 443 لە یاسای سزادانی عیراقی راگیراوە و لێکۆڵینەوە لەگەڵیدا بەردەوامە.

نورەدین ئەحمەد وەك پارێزگاری حەسەكە لە رۆژئاوای كوردستان دیاریكرا و لە رێوڕەسمێكیشدا بە رەسمی لە پۆستەكەی دەستبەكاربوو.

لە چوارچێوەی رێككەوتنی نێوان هێزەكانی سوریای دیموكرات "هەسەدە" و حكومەتی كاتی سوریا، ئێوارەی ئەمڕۆ نورەدین ئەحمەد، ناسراو بە (ئەبو عومەر خانیكا) وەك پارێزگاری حەسەكە لە رۆژئاوای كوردستان دیاریكرا و بەڕەسمی لە پۆستەكەی دەستبەكاربوو.

نورەدین ئەحمەد پارێزگاری حەسەكە لە ساڵی 1969 لە شاری قامیشلۆ لەدایكبووە، هەڵگری بڕوانامەی دبلۆمە لە ئەندازیاریی میكانیك و كارەبا لە زانكۆی دیمەشق. لە ساڵی 1993 تا 2012 وەك ئەندازیار لە بەڕێوەبەرایەتی گواستنەوە و گەیاندن لە حەسەكە و قامیشلۆ كاریكردووە، دواتر بەهۆی بەشداریكردنی لە ناڕەزاییەكان دژی رژێمی بەعس لە كارەكەی دەركراوە.

دواتر ناوبراو لە چوارچێوەی ئەنجومەنە خۆبەڕێوەبردنەکاندا کاری کردووە و چالاک بووە لە بەرەوپێشبردنی ئاشتی مەدەنی و لە سەرەتای ساڵی 2014وە وەک ئەفسەری پەیوەندییە گشتیەکانی هێزەکانی سوریای دیموکرات (هەسەدە) کاری کردووە و ئەندامی فەرماندەیی گشتی هێزەکانی سوریای دیموکراتە.

رۆژی 30 مانگی رابردوو، هەسەدە و دیمەشق، رێکەوتنێکی ئاگربەستیان ئەنجامدا بۆ یەکخستنی دامودەزگاکانی دەوڵەت و بەگوێرەی ئەو رێککەوتنە، هەسەدە کاندیدی بۆ پۆستەکانی پارێزگاری حەسەکە و یاریدەدەری وەزیری بەرگری و چەند پۆستێکی تر کە  کە تا ئێستا ئاشکرا نەکراون دەبێت.

دەزگای ئاسایش هەرێم دەستگیرکردنی حەوت تیرۆرستی راگەیاند، کە بەمەستی خۆحەشاردان هاتبوونە سنوری پارێزگای سلێمانی.

بەڕێوەبەرایەتی گشتی ئۆپراسیۆنەکانی ئاسایش بڵاویکرەوە، دوای بەدواداچووونەکانی لەسەر بنەمای ئاڵوگۆڕی زانیاری لەگەڵ دەزگا ئەمنییەکانی حکومەتی عیراقی فیدراڵ، لەچەند ئۆپراسیۆنێکدا لەمانگی 1ـی 2026 لەسنوری پارێزگای سلێمانی توانرا حەوت تیـرۆریستی داواکراوی دادگاکانی عیراق دەستگیربکەن، کە تیرۆریستان بەمەبەستی خۆحەشاردان هاتبوونە سنورەکە.

ئاماژەی بەوەشکرد، لەئێستادا سەرجەم تۆمەتباران بەمادەی (4)لەیاسای تیـرۆر راگیراون و لێکۆڵینەوە لەدۆسییەکانیان بەردەوامە.

بۆردی داكۆكی لەئازادی و مافی رۆژنامەنووسان راگەیەنراوێکی لەبارەی داخستنی نوسینگەکانی NRT بڵاوکردەوە و دەڵێت: لەگەڵ داخستنی هیچ كەناڵێكی میدیایی  نین.

دەقی راگەیەنراوەکەی بۆردی داكۆكی لەئازادی و مافی رۆژنامەنووسان

‎بەپێی زانیارییەكانی بۆردی داكۆكی لە ئازادی و مافی ڕۆژنامەنووسان، ئەمڕۆ لە سەر بڕیاری دادگا، نووسینگەكانی كەناڵی ئێن. ئاڕ تی لە هەولێرو دهۆك داخران.

بۆردی داكۆكی وێڕای پاڵپشتی بۆ جێبەجێكردنی یاسای ڕۆژنامەگەری ژمارە 35ـی ساڵی 2007 دوا دەكات تەواوی ئازادی كاری میدیایی لەهەرێمی كوردستان پارێزراو بێت، ناڕازی خۆی بۆ داخستنی كەناڵی میدیایی بەبێ ئاگاداری سەندیكای رۆژنامەنووسانی كوردستان دەردەبڕێت و داوا دەكات تەنها پاڵپشت بەبڕیاری كۆتایی دادگاكان و لەچوارچێوەی یاسای رۆژنامەگەری بڕیار لەسەر دۆسییەكان بدرێت..

بۆردی داكۆكی لەئازادی و مافی رۆژنامەنووسان

بەوردی چاودێری رەوشەکە دەكات بۆ دەستەبەركردنی ژینگەیەكی دیموكراسی بۆ كاری رۆژنامەنووسی و میدیایی لە هەرێمی كوردستان

بۆردی داكۆكی لەئازادی و مافی ڕۆژنامەنووسان

سەندیکای رۆژنامەنووسانی کوردستان

بۆردی راگەیاندنی یەكێتیی نیشتمانیی كوردستان نیگەرانی خۆیی بەرانبەر داخستنی نوسینگەكانی كەناڵی NRT لەهەولێر و دهۆك دەردەبڕێت و ئاماژە بەوەدەکات: ئەم هەنگاوە جێگەی نیگەرانییە و كاریگەریی نەرێنێ‌ لەسەر ناوبانگی هەرێم جێدەهێڵێت و دەبێتە هۆی زیاتر بەرتەسككردنی ئازادی رادەربڕین و میدیایی.

 

دەقی پەیامەكە:

بۆردی راگەیاندنی یەكێتیی نیشتمانیی كوردستان نیگەرانی خۆی بەرامبەر داخستنی نووسینگەكانی كەناڵی NRT لەهەولێرو دهۆك دەردەبڕێت .

بەداخەوە بەبێ گەڕ‌انەوە بۆ وەزارەتی رۆشنبیریی و  بەبڕ‌یارێكی ئەمنی و حزبی لەهەولێر و دهۆك نووسینگەكانی كەناڵی NRT دادەخرێن، ئەم هەنگاوە جێگەی نیگەرانییە و كاریگەریی نەرێنێ‌ لەسەر ناو و ناوبانگی هەرێمی كوردستان جێدەهێڵێت و روبەڕ‌ووی رەخنەی زۆر دەبێتەوە، بەتایبەت كە تەنها چەند رۆژێكە وەزارەتی رۆشنبیریی سوپاسنامەی پێشكەش بەسەرجەم میدیاكانی كوردستان لەپای سەنگینیان لە روماڵی هەواڵ و رووداوەكانی رۆژئاڤای كوردستان كردووە، هەروەك دەبێتە هۆی زیاتر بەرتەسككردنی ئازادی رادەربڕین و ئازادی میدیایی لە وڵاتەكەمان، بۆیە وەكو بۆردی راگەیاندنی یەكێتی داوا لە لایەنە پەیوەندیدارەكانی هەولێرو دهۆك دەكەین دەرفەت بە هەردوو نوسینگەی NRT بدەن كە جارێكی دیكە بتوانن ئازادانە كارە میدیاییەكانی خۆیان لەو دوو پارێزگایە جێبەجێ بكەن .

دامەزراوەی میدیایی نالیا، راگەیەندراوێکی سەبارەت بە داخستنی نووسینگەی کەناڵی ئێن ئاڕ تی لە هەولێر و دهۆک بڵاوکردەوە.

دەقی راگەیەندراوەکە

پاش نیوەڕۆی ئەمڕۆ پارتی دیموکراتی کوردستان لەڕێگای بەکارهێنانی هێزی ئەمنی و بە ناوی حکومەتەوە چوونەتە سەر نووسینگەی کەناڵەکانی ئێن ئارتی لە هەولێر و دهۆک و هەردوو نووسینگەکەیان داخستووە.

جگە لەوەی ڕێگا بە تیمە ڕۆژنامەنووسییەکانی ئێن ئاڕ تی نەدراوە کەلوپەلە ڕۆژنامەوانییەکان ببەنە دەرەوەی نوسینگەکە، هەروەها لە ناوچەکانی ژێر دەسەڵاتی پارتی بڕیاری قەدەغەکردنی کاری ڕۆژنامەوانی لە ئێن ئاڕ تی دراوە، بە بێ هیچ بنەما و پاساوێکی یاسایی و لۆژیکی. لە کاتێکدا وەزارەتی ڕۆشنبیری بێ ئاگایی خۆی لە بڕیارەکە دەربڕیوە.

ئێمە لە دامەزراوەی میدیایی نالیاوە سەرباری ئەوەی کاری ڕۆژنامەوانی پیشەییانەی خۆمان لە چوارچێوەی یاسای کاری ڕۆژنامەنوسیدا دەکەین، ئەم ڕەفتارەی پارتی بە دەستدرێژی ئاشكرا بۆ سەر کاری ڕۆژنامەنووسی و ڕۆژنامەنووسانی هەرێم دادەنێین و بە تووندی سەرکۆنەی دەکەین و داوا لە کونسوڵخانەی وڵاتان و ڕێکخراوە ناوخۆیی و نێودەوڵەتیەکانی داکۆکیکردن لە ڕۆژنامەنووسان دەکەین فشاری زیاتر لە دەسەڵات بکەن، چونکە ئەم جۆرە رەفتارانە جگە لە بەرتەسککردنەوەی ئازادیی ڕا دەربڕین و ڕۆژنامەوانی ناوبانگی هەرێمیش لەکەدار دەکات، بیری هەموو لایەکی دەخەینەوە کە یاسای ژمارەی 35ـی ساڵی 2007ـی کاری ڕۆژنامەوانی لە هەرێم لە هیچ بەند و بڕگەیەکی تێدا نییە کە ڕێگا بە داخستنی کەناڵی ڕاگەیاندن و میدیایی بدات.

ئێن ئاڕ تی وا پێدەنێتە 16ـیەمین ساڵی تەمەنییەوە، ئەم مێژووەش دەریخستووە، ئەم ڕەفتارانە نەک کار لە کەناڵەکە ناکات بەڵکو پێداگیرترمان دەکات لە کاری پیشەیی ڕۆژنامەنووسییانەی خۆمان بۆ بەرگریکردن لە خەڵک.

 

دامەزراوەی میدیایی نالیا

بەڕێوەبەرایەتی تەندروستی چەمچەماڵ رایگەیاند، لەلایەن لێژنە هاوبەشەکانی قائیمقامییەتی قەزای چەمچەماڵەوە توانیویانە 10 تۆن شمەک و خۆراکی بەسەرچوو لەناوبەرن، کە لە ناو بازاڕ و  مارکێت و شوێنە گشتییەکانی چەمچەماڵ دەستیان بەسەدا گیرا بوو.

ئەمڕۆ چوار شەممە، لە راگەیەندراوێکدا، تەندروستی چەمچەماڵ لەناوبردنی 10 تۆن تۆن شمەک و خۆراکی لەلایەن لیژنەکانی قائیمقامیەتی قەزاکەوە راگەیاند.

ئاماژەیان بەوەکردوە، ئەو خۆراک و شمەکەیی لەناویانبردوە، لەناو بازاڕ و مارکێت و شوێنە گشتییەکانی چەمچەماڵ دەستی بەسەرداگیراوە و رێکاری یاسایی بەرانبەر خاوەن ئەو شوێنانە گیراوەتەبەر.

تەندروستی چەمچەماڵ داوا لە هاووڵاتییان دەکات لە بینینی هەر شمەکێکی خراپ  یان بەسەرچوو ئاگاداریان بکەنەوە و دەستخۆشیش لە لێژنە هاوبەشەکانی قائیمقامیەتی چەمچەماڵ و چاودێری تەندروستی دەکات، کەبەردەوام لەهەوڵی پاراستنی تەندروستی و سەلامەتی هاووڵاتییاندان.

بەڕێوەبەرایەتی پۆلیسی پارێزگای هەڵەبجە رایگەیاند، کەسێکیان دەستگیر کردوە، خەڵکی دەرەوەی هەڵەبجەیە و گیرفانی خەڵکی بڕیوە.

پۆلیسی هەڵەبجە بڵاویکردوەتەوە، لەلایەن مەفرەزەکانی چاودێری بازاڕی بەشی پۆلیسی نەهێشتنی تاوانەوە توانرا تۆمەتبارێک دەستگیربکرێت بەتۆمەتی دزیکردن لەهاووڵاتیاین و بڕینی گیرفانیان 

ئاماژەیان بەوەشکردوە، تەمەنی 52 ساڵە و پێشتریش چەند دۆسیەی دزیکردنی هەبوە لەناوبازاڕی هەڵەبجەدا و لە ئێستادا بەپێی مادەی446 راگیراوە.

ئەمڕۆ چوارشەممە لە هەولێر و دهۆک هێزێكی ئەمنی چونەتە سەر نوسینگەی کەناڵی ئێن ئاڕ تی، دایانخستوە و کارمەندەکانیشیان ئاگادار کردوەتەوە، رێگەی بە کارکردنیان نادرێت.

مەریوان حەسەن، لێپرسراوی ژوری هەواڵی ئێن ئاڕ تی، بە کوردسات نیوزی راگەیاند، هێزێکی ئەمنی چووەنەتە سەر نووسینگەی کەناڵەکەیان لە هەولێر و دهۆک،  کارمەندەکانیان کردوەتە دەرەوە و دەستیاب بسەر ئامێرەکاندا گرتوە.

مەریوان حەسەن، ئاماژەی بەوەشکرد، ئەو هێزە بە بێ بونی  هیچ پاساوێکی یاسایی، نووسینگەکەیان داخستووە و پێشتریش ئاگادار نەکراونەتەوە.

ناوبرا بە کوردسات نویزی راگەیاند، سەرەڕای داخستنی نوسینگەیەکان، تیمی پەیامنێرانیشیان لە سنووری دەسەڵاتی پارتی ئاگادارکراونەتەوە، کە لە ئەمڕۆوە رێگە بە کارکردنیان نادرێت.

بەبۆنەی کۆچی دوایی کچی محەمەدی کاک هەمزە، سەرۆکی عەشیرەتی شاورێ بافڵ جەلال تاڵەبانی پەیامێکی بڵاوکردەوە و پرسە و سەرەخۆشی ئاراستەی محەمەدی کاک هەمزە  و کەسوکار و بنەماڵەکەیان دەکات.

 

دەقی پەیامەکەی بافل جەلال تاڵەبانی

 

 بەڕێز کاک محەمەدی کاک هەمزە، تێکۆشەری دێرین و کەسایەتی دیاری دەڤەری راپەڕین و سەرۆکی عەشیرەتی شاورێ.

بەداخ و خەمێکی زۆرەوە، هەواڵی کۆچی دوایی خاتوو ( خەزان ) کچی بەڕێزتانم پێگەیشت.

بۆ ئەم خەمە پرسەو سەرەخۆشی ئاڕاستەی ئێوەو کەسوکار و بنەماڵە سەربەرزو تێکۆشەرەکەتان دەکەم کە نموونەیەکی باڵان لە خەبات و تێکۆشانی کوردایەتی.

لەخوای گەورە داواکارین گیانی کۆچکردوو بە بەهەشتی بەرین شادبکات، سەبووری و ئارامی بە هەموولایەک ببەخشێت.

 

بافڵ جەلال تاڵەبانی

سەرۆکی یەکێتیی نیشتمانیی کوردستان