لە کۆنفرانسێکی رۆژنامەوانیدا و لە وەڵامی پرسیاری پەیامنێری کوردسات نیوز، لەبارەی گرانیی سوتەمەنی بەتایبەت بەنزین لە هەرێم، وەزیری نەوتی عیراق رایگەیاند، ئامادەن لە بەرانبەر ئەو 50 هەزار بەرمیلەنەوتەی رۆژانە دەیدەنە هەرێم، سوتەمەنی بۆ هەرێم دابین بکەن.

باسم محەمەد، وەزیری نەوتی عیراق بە کوردسات نیوزی راگەیاند، لە چوارچێوەی رێککەوتنی سێقۆڵیی نێوان وەزارەتی سامانە سروشتییەکانی هەرێم، وەزارەتی نەوتی عیراق و کۆمپانیا نەوتییەکان، حکومەتی بەغداد لە سەرەتاوە ئامادەیی تەواوی دەربڕیوە بۆ دابینکردنی تەواوی پێداویستییەکانی سوتەمەنی بۆ هەرێمی کوردستان.

بەپێی وتەکانی ناوبراو، بڕیاری پێدانی 50 هەزار بەرمیل نەوتی رۆژانە بە هەرێم لەسەر داواکاریی خودی لێپرسراوانی هەرێم بووە.

باسم محەمەد ئاماژەی بەوەکرد، لێپرسراوانی هەرێم وتیان   بەو بڕە نەوتە کە 50 هەزار بەرمیلە لە رۆژێکدا، دەتوانن  سوتەمەنی پێویست بۆ پارێزگاکانی هەرێم دابین بکەن، کە نرخەکە هاوشێوەی  پارێزگاکانی تری عیراقی بێت.

وەزیری نەوتی عیراق وتیشی، ئامادەن لە ئێستادا دەستکاری  رێککەوتنەکە بکەن و پێداچونەوەی بۆبکەن تاوەکو لە بەرانبەر ئەو بڕە نەوتەدا، حکومەتی فیدراڵ راستەوخۆ سوتەمەنی پێویست بۆ هەرێم دابین بکات.

هێڵی دووی بۆریی ئاوی دوکان – سلێمانی شکاوە و چەند شوێنێک لە ناوەوە و دەرەوە سلێمانی کێشەی ئاویان بۆ دروست دەبێت.

بەڕێوەبەرایەتی ئاوی سلێمانی رایگەیاندووە: هێڵی دووی بۆریی ئاوی دوکان - سلێمانی لە ناوچەی قولەرەیسی بەهۆی کارکردنی ئامێرێکی شۆفڵ لەو ناوچەیە شکاوە و لە ئێستادا هەموو تیمەکانی بەڕێوەبەرایەتیمان لەو شوێنەن بۆ ئەوەی بەزووترین کات چاک بکرێتەوەو دابەشکردنی ئاو دەستپێبکاتەوە.

بەڕێوەبەرایەتی ئاوی سلێمانی ئاماژەی بەوەشداوە: بەهۆی شکانی ئەم بۆریەوە، گەڕەکەکانی (قڕگە، سێتوان، ئیبراهیم ئەحمەد، کازیوە، دەرەوەی شەقامی 60ـی، راپەڕین، تاسڵوجە، چەمچەمال، شۆڕش، تەکێ، بازیان، گۆپاڵە، باینجان، ئەڵلایی) بێ ئاو دەبن.

لە باڵەکایەتی دوو کەس بەهۆی روداوی هاتوچۆوە گیانیان لەدەستدا و شەشی تریش برینداربوون.

ئیسماعیل عوسمان پەیامنێری کوردسات نیوز رایگەیاند، لە ئەنجامی روداوێکی سەختی هاتوچۆ کە هەڵدێرانی ئوتومبیلێک بووە بە هەشت سەرنشینەوە، دوو کەسیان گیانیان لە دەستداوە.

وتیشی، هەر بەهۆی روداوەکەوە شەش کەسی تریش برینداربوون و برینی یەکێکیان سەختە.

پەیامنێری کوردسات نیوز ئەوەشی خستەڕوو، روداوەکە لە گوندی گرتکی سنوری ناحیەی سمیلان بووە لە باڵەکایەتی.

وەزارەتی ناوخۆ رێنمایی نوێ سەبارەت پێدانی مۆڵەتی جامڕەشکردنی ئۆتۆمبێل دەردەکات و رایدەگەیەنێت؛ لەمەودوا تاکسی و بارهەڵگریش دەتوانن داواکاری مۆڵەتی جامڕەشکردن پێشکەش بکەن.

بەپێی ناوەڕۆکی ئەم رێنماییە تازەیە جگە لە رێژەکانی پێشوو لەمەودوا مۆڵەت دەدرێت بە ئوتومبێڵی جامڕەش بە رێژەی بە رێژەی سەروو 80.

هەر پێی رێنماییەکە هەموو هاووڵاتیان مافیان هەیە داوای مۆڵەتی جامڕەش بکەن وەکو ئوتومبێڵی تاکسی و بارهەڵگر و تەنانەت ئەو ئوتومبێلانەشی هەڵگری تابلۆی پارێزگاکانی دیکەی عێراقن بەو مەرجەی ئوتومبێلەکە بەناوی خۆیانەوە تۆمارکرابێت و دانیشتووی هەرێمی کوردستان بێت.

کلیک لێرە بکەو هەموو رێنماییەکان بخوێنەرەوە....

 

هاوپەیمانیی  (پێرل پێترۆلیەم) سەرسوڕمانی خۆی لە راگەیەندراوەكەی حكومەتی هەرێم دەردەبڕێت و تۆمەتی پێشێلكاریش رەتدەكاتەوە.

هەردوو كۆمپانیای (دانە گاز) و (نەفتی هیلال) كە بە هاوپەیمانیی  (پێرل پێترۆلیەم) ناسراون، لە راگەیەنراوێكدا سەرسوڕمانی خۆیان بەرانبەر راگەیەنراوەكەی حكومەتی هەرێمی كوردستان دەربڕییوە لە بارەی رێككەوتنی ناردنی غاز بۆ وەزارەتی كارەبای عیراق لە كەركوك، جەختیشیانكردووەتەوە، رێككەوتنەكە بەپێی مافە تایبەتەكانی گرێبەستكردنی كۆمپانیاكە بۆ بەبازاڕكردن كراوە.

هاوپەیمانییەكە ئاماژەی بەوەكردووە، حكومەتی هەرێم و وەزارەتی سامانە سروشتییەكان لە مانگی كانوونی دووەمی ئەمساڵەوە ئاگاداری تەواوی رێككەوتنەكە و ئامادەكارییەكانی بوون و مافی تایبەتی بەبازاڕكردنیش لە رێگەی رێكارە یاساییە نێودەوڵەتییەكانەوە سەلمێنراوە و پێویستی بە رەزامەندیی حكومەتی هەرێم نییە.

هاوپەیمانیی  (پێرل پێترۆلیەم) دەنگۆی پێشێلكردنی پابەندبوونەكانی رەتكردووەتەوە و دەڵێت، بەردەوامە لە دابینكردنی 655 ملیۆن پێ سێجا غازی رۆژانە بۆ هەرێم كە پێداویستییەكانی پڕدەكاتەوە و رێگەی پێدەدات كارەبا بە حكومەتی بەغداد بفرۆشێت، وێڕای ئەوەی حكومەتی هەرێم زیاتر لە سێ ساڵە پێدانی شایستە داراییەكانی هاوپەیمانییەكەی دواخستووە.

لە كۆتایی راگەیەنراوەكەشدا هاتووە، بڕی 100 ملیۆن پێی سێجا غازی رۆژانە كە بۆ كەركوك دەنێردرێت، لە غازی زیادەی بەرهەمهێنراوی كێڵگەی "كۆرمۆر"ەوەیە لە رێگەی پرۆژەی "كۆرمۆر 250" بۆ بەهێزكردنی ئاسایشی وزە لە عیراق، جەختیشیكردووەتەوە لەسەر پابەندبوونی بە وەبەرهێنانی غاز لە هەرێمی كوردستان كە لە ساڵی 2007ەوە چوار ملیار دۆلاری تێپەڕاندووە بە مەبەستی خزمەتكردنی بەرژەوەندییەكانی هەرێمی كوردستان و سەرجەم عیراق.

پۆلیسی سلێمانی دەستگیرکردنی سێ تۆمەتباری لەسەر دۆسیەی خنکانی گەنجێک لە چەمی چەمەکی سەر بە ناحیەی زەلان راگەیاند، و لە ئێستادا بەپێی مادەی 406 لە یاسای سزادانی عیراقی راگیراون.

بەپێی راگەیەندراوێکی بەڕێوەبەرایەتیی پۆلیسی پارێزگای سلێمانی، دوای ئاگادارکردنەوەیان لە روداوی خنکانی هاووڵاتییەک لە کاتی مەلەکردندا لە چەمی چەمەکی سەر بە شارباژێر، دەستبەجێ مەفرەزەکانی بنکەی پۆلیسی زەلان، بەشی پۆلیسی شارباژێر و تیمەکانی بەڵگەی تاوان گەیشتنە شوێنی روداوەکە.

ئاماژەی بەوەشکردووە، دوای ئەنجامدانی رێکارە یاساییەکان و پشکنین بۆ تەرمی هاووڵاتییە خنکاوەکە، بە بڕیاری دادوەر سێ تۆمەتبار دەستگیرکران.

پۆلیسی سلێمانی راشیگەیاند، لە ئێستادا ھەر سێ تۆمەتبارەکە بە بڕیاری دادوەر و بەپێی مادەی 406 لە یاسای سزادانی عیراقی راگیراون و لێکۆڵینەوەکان لەگەڵیاندا بەردەوامە.

کەشناسیی هەرێم ئاشکرایدەکات، ئەمڕۆ و سبەینێ ئاسمان ساماڵ دەبێت و پلەکانی گەرما وەک خۆیان دەمێننەوە، کە بەرزترینیان لە گەرمیان 46 پلە و نزمترینیان لە حاجی ئۆمەران 32 پلەی سیلیزی دەبێت.

بەڕێوەبەرایەتیی گشتیی کەشناسی و بوومەلەرزەزانیی هەرێم، کەشوهەوای 48 سەعاتی داهاتووی بڵاوکردەوە و رایگەیاند، ئەمڕۆ ئاسمان ساماڵ دەبێت لەگەڵ پەیدابوونی هەندێک پەڵە هەور، خێرایی با لەسەرخۆ بۆ مامناوەند دەبێت.

ئاماژەی بەوەشکرد، سبەینێ ئاسمان بە گشتی ساماڵ دەبێت، پلەکانی گەرماش نزیک دەبنەوە لە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی:

هەولێر: 43 پلەی سیلیزی

پیرمام: 38 پلەی سیلیزی

سلێمانی: 40 پلەی سیلیزی

هەڵەبجە:43 پلەی سیلیزی

چەمچەماڵ: 42 پلەی سیلیزی

دهۆک: 41 پلەی سیلیزی

زاخۆ: 42 پلەی سیلیزی

ئاکرێ:42 پلەی سیلیزی

گەرمیان:46 پلەی سیلیزی

حاجی ئۆمەران:32 پلەی سیلیزی

ماڵپەری شەفافیەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان داهاتی ئەم هەفتەیەی بڵاوکردەوە کە زیاتر لە حەوت ملیار دینارە.

ئەمڕۆ هەینی، ماڵپەری شەفافیەت بڵاویکردەوە، داهاتی یەک هەفتەی سلێمانی لە رۆژی(1ـی 8ـی 2026 بۆ 7ـی 8ـی 2026) داهاتی نانەوتی، لە سلێمانی و هەڵەبجە و هەردوو ئیدارەی راپەڕین و گەرمیان، حەوت ملیار و 567 ملیۆن و 216 هەزار دینار بووە.

ئاشکراشیکرد،  لەو داهاتە لە  69%ی بەشێوەی نەختینەیە و 31%ی داهاتەكە بەشێوەی چەكە و بەراورد بە هەفتەی رابردوو داهات کەمی کردوە.

هەر بەپێی داتاکانی شەفافیەت، داهاتی مانگی رابردوو، 63 ملیار و 270 ملیۆن دینار بووە.

جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.

سەرەرای بڕیاری حكومەتی هەرێم بۆ دابەزینی نرخی سوتەمەنی، بەڵام لە هەولێر تا دێت نرخی بەنزین بەرزدەبێتەوە.

پەیامنێری كوردسات نیوز رایگەیاند، ئەمڕۆ جارێكی تر لە پارێزگای هەولێر نرخی هەر سێ جۆرەكەی بەنزین لە ماوەی سەعاتێكیدا 300 دینار زیادیكرد، بەجۆرێك، نرخی بەنزینی سوپەر بۆ هەر لیترێك گەیشتووەتە 2400 دینار و بەنزینی جۆری موحەسەنیش گەیشتوەتە 2000 دینار و بەنزینی نۆرماڵیش بە 1500 دینارە. 

ئەمە لە كاتێكدایە، بڕیاری كۆنترۆڵكردنی نرخی سوتەمەنی و جێگیركردنی نرخەكانی بەنزین تەنها چەند رۆژێكی خایاند و جارێكی تر هەولێر روبەڕووی شەپۆلێكی نوێی گرانبوونی بەنزین بووەتەوە.

نرخەكان لە بەنزینخانەكاندا ئاستێكی نوێیان تۆماركردووە كە راستەوخۆ كاریگەریی كردووەتە سەر شۆفێران و ژیانی رۆژانەی هاووڵاتیان و بژێوییان، شۆفێران نیگەرانی ئەوەن بۆ وەرگرتنی بەنزینی حكومی چەندین سەعات لە نۆرەدا دەوەستن.

شاناز ئیبراهیم ئەحمەد، ئەندامی مەکتەبی سیاسیی یەکێتیی نیشتمانیی کوردستان، سەردانی ئەنجومەنی پاراستنی بەرژەوەندییە باڵاکانی یەکێتی کرد و لەلایەن شێخ جەعفەر شێخ مستەفا، لێپرسراوی ئەنجومەنەکەوە پێشوازیی لێکرا.

لە دیدارەکەدا، هەردوولا دوایین گۆڕانکاری و پەرەسەندنە سیاسی و ئەمنییەکانی عیراق و ناوچەکەیان تاوتوێ کرد، هاوکات بیروڕایان سەبارەت بە شێوازی پەرەپێدانی کاری حزبی و رێکخراوەیی ئاڵوگۆڕ کرد.

لە کۆتایی دیدارەکەدا، شێخ جەعفەر شێخ مستەفا کتێبی بیرەوەریی شیکاریی خۆی بە ناونیشانی "کڵپەی ژێر خۆڵەمێش" پێشکەش بە شاناز ئیبراهیم ئەحمەد کرد.

دەستەی گشتیی ناوچە کوردستانییەکانی دەرەوەی ئیدارەی هەرێم لە راگەیەنراوێکدا جەختی لەوە کردەوە کە دەستوور بنچینەی سەرەکیی سیستمی حوکمڕانییە لە عیراقی نوێدا و پابەندبوون پێوەی، رێزگرتنە لە ئیرادەی تەواوی پێکهاتەکان.

لە راگەیەنراوەکەدا هاتووە: خەڵکی کوردستان ماددەی 140ی دەستوور وەک دیارترین نەخشەرێگا بۆ چارەسەرکردنی پرسی ناسنامەی رووبەرێکی بەرفراوانی خاکەکەی لە چوارچێوەی عیراقی فیدراڵدا دەبینن.

دەستەکە جەختیشی کردەوە کە هەر جۆرە لێدوانێکی نادەستووری لەلایەن پارێزگاری کەرکووکەوە بە تەواوی رەت دەکەنەوە و داوایان لێکرد لەم قۆناغە هەستیارەدا گیانی پێکەوەژیانی راستەقینە بپارێزێت؛ چونکە لێدوانی نادەستووری رووبەری بێمتمانەیی فراوانتری دەکات و سەرنج لەسەر دابینکردنی خزمەتگوزارییەکان بۆ شارەکە دوور دەخاتەوە.

بەپێی پێشبینییەکانی کەشناسی ئەمڕۆ و سبەینێ ئاسمان ساماڵ دەبێت، کەشناسی هەرێمیش ئاشکرایدەکات، پلەکانی گەرما بەجێگیری دەمێننەوە.

بەڕێوەبەرایەتیی گشتیی کەشناسی و بوومەلەرزەزانیی هەرێم رەوشی کەشوهەوای 48 سەعاتی داهاتووی بڵاوکردەوە و بەپێی پێشبینییەکان، ئەمڕۆ پێنجشەممە ئاسمان بە گشتی ساماڵ دەبێت و خێرایی با لەسەرخۆ بۆ مامناوەند دەبێت.

کەشناسی ئاماژەی بەوەشکردووە، سبەی هەینی ئاسمان ساماڵ دەبێت لەگەڵ دەركەوتنی هەندێک پەڵە هەور، پلەکانی گەرماش نزیک دەبنەوە لە تۆمارکراوەکانی ئەمڕۆ.

لەلای خۆشیەوە دەستەی کەشناسیی عیراق ئاشکرایکرد، هەفتەی داهاتوو لە ناوچەکانی ناوەڕاست و باشور،  پلەکانی گەرما بە بەراورد بە رۆژانی پێشتر لە سەرانسەری وڵاتدا کەمێک بەرزدەبنەوە.

بەهۆی دواكەوتنی دابەشكردنی موچە لە عیراق، شەپۆلێكی ناڕەزایەتی و خۆپیشاندان چەندین پارێزگای گرتووەتەوە، لە كاتێكدا چوار وەزارەت، چەند دەستەیەك و سێ سەرۆكایەتییەكەی عیراق هێشتا موچەیان وەرنەگرتووە.

پەیامنێری كوردسات نیوز رایگەیاند: تا ئێستا وەزارەتەكانی (كارەبا، خوێندنی باڵا، سەرچاوە ئاوییەكان، كشتوكاڵ، لەگەڵ بەڕێوەبەرایەتییە گشتییەكانی سەر بە وەزارەتی داد) و سێ سەرۆكایەتییەكەی عیراق  موچەی مانگانەیان پێنەدراوە، ئەم دواكەوتنەش بووەتە هۆی ئەوەی لە زیاتر لە شەش پارێزگای عیراقدا خۆپیشاندانی ناڕەزایەتی بەڕێوەچێت.

سەبارەت بە كاتی دابەشكردنی موچەی ئەو شوێنانە، پەیامنێری كوردسات نیوز ئاماژەی بەوەدا، ئەگەر هەیە تا رۆژی یەكشەممەی داهاتوو مووچەی سەرجەم ئەو وەزارەت و شوێنە مانەوانەش دابەش بكرێت.

لە لایەكی ترەوە، سەبارەت بە موچەخۆرانی هەرێمی كوردستان، پەیامنێری كوردسات نیوز روونیكردەوە، ئەگەر بێت و تا سەرەتای هەفتەی داهاتوو پرۆسەی دابەشكردنی موچە لە وەزارەتەكانی عیراق بە تەواوی كۆتایی پێبێت، ئەوا پێشبینی دەكرێت لە ناوەڕاست تا كۆتایی هەفتەی داهاتوو دەست بە دابەشكردنی موچەی موچەخۆرانی هەرێمی كوردستانیش بكرێت.

ئەمەش لەکاتێدایە، بڕیارە ئەمڕۆ سەعات یەک، ئەنجومەنی وەزیرانی عیراق کۆببێتەوە و یەکێک لە تەوەرە سەرەکییەکانی کۆبوونەوەکە پرسی دابینکردنی موچەی موچەخۆران دەبێت.

لەدوایین وێستگەی سەردانە مەیدانییەکەیدا لە شاری سلێمانی، خاتوو شاناز ئیبراهیم ئەحمەد ئەندامی مەکتەبی سیاسی یەکێتیی نیشتمانیی کوردستان، هێزی پێشمەرگەی ژنانی بەسەرکردەوە و لەلایەن عەمید رێزان رەشید فەرەج فەرماندەی یەکەی 735ـەەوە بە گەرمی پێشوازی لێکرا. 

لەو سەردانەدا عەمید رێزان و ئەفسەران راپۆرتێکی زارەکیان خستەڕوو دەربارەی کەموکورتییەکانی بینا و پێداویستیە سەربازییەکان، سەرباری داواکاری بەهێزترکردنی هێزەکە لەڕووی هونەری و مەعنەوییەوە، لەم بارەیەوە خاتوو شاناز ئیبراهیم ئەحمەدیان بە فریادڕەسی هێزی پێشمەرگەی ژنان وەسفکرد تا بتوانێ بەتەنگ داواکارییەکانیانەوە بچێت.

دوای ئەوەی لە نزیکەوە چەند بەش و هۆبەیەکی ناو فەرماندەییەکەی بەسەر کردەوە، خاتوو شاناز بەڵێنی دا بەدواداچونی جددی بکات تا بارەگایەکی شایستە لەئاست گەورەیی رۆڵی ئەو هێزانە دابین بکرێت وەک هەموو هێزەکانی تری سەر بە وەزارەتی پێشمەرگەی هەرێمی کوردستان.

لە هەنگاوێکی نیشتمانی و بەرپرسیارانەدا، ئەمڕۆ گۆڕەپانی فەرماندەیی گشتی لە شاری سلێمانی، جموجۆڵێکی پڕ لە وەفاداری و پەرۆشی بەخۆوە بینی بۆ بەهێزترکردنی ورەی ئەو هێزە ئەمنییانەی گیانی خۆیان لە پێناو ئارامی و سەقامگیرییدا خستووەتە مەترسییەوە.

لەو میانەیەشدا خاتوو شاناز ئیبراهیم ئەحمەد، ئەندامی مەکتەبی سیاسی یەکێتیی نیشتمانیی کوردستان، بارەگای سەرەکی دەزگای دژەتیرۆری بەسەرکردەوە و چاویکەوت بە وەهاب هەڵەبجەیی، بەڕێوەبەری گشتی و ژمارەیەک لە فەرماندەکانی دەزگاکە.

لەدیدارەکەدا خاتوو شاناز ئیبراهیم ئەحمەد خۆشحاڵی نیشاندا کەئەفسەر و کارمەندانی دژەتیرۆر سەلامەت بوون لەو هێرشانەی لەماوەی رابردوودا بەهۆی پەرەسەندنی جەنگە ئیقلیمیەکانەوە هەندێ لە بارەگاکانیانی کردە ئامانج. 

لەبەرانبەردا فەرماندە وەهاب هەڵەبجەیی سەردانەکەی خاتوو شانازی بەپشتیوانییەکی مەعنەوی گەورە وەسفکرد بۆ هێزەکانیان.

 جێی ئاماژەیە سەردانەکە پەیامێکی روون و متمانەبەخشە بۆ خەڵکی کوردستان و هێزە ئەمنییەکان، کە سەرکردایەتیی سیاسی لە هەموو بارودۆخێکدا پشتیوانی پارێزەرانی ئارامی و سەقامگیرییە.

ئەمڕۆ جێگری سەرۆکی یەکێتی، سەردانی فەرماندەیی هێزەکانی 70، فه‌رمانده‌یی پێشمه‌رگه‌ی به‌رگری و فریاكه‌وتن، بەڕێوبەرایەتی دژەتیرۆر و فەرماندەیی هێزەکانی کۆماندۆی کوردستانی کرد، لە دیدارەکاندا رۆڵی قارەمانانەی ئەو هێزانەی بەرز نرخاند.

رەفعەت عەبدوڵا، جێگری سەرۆکی یەکێتیی نیشتمانیی کوردستان، سەردانی فەرماندەیی هێزەکانی 70ـی کردوو لەلایەن فەریق ڕوکن عومەر ساڵح فەرماندەی فەرماندەیی هێزەکانی 70ـەوە، پێشوازیکرا .

جێگری سەرۆک رایگەیاند، پشتیوانی هێزێکی یەکگرتووی نیشتمانی و بەدیسپلین و پەروەردەکراو بەزانستی سەربازیین لەسەر بنەمای هاوسەنگی و پاراستنی بەها باڵاکانی پێشمەرگەی کوردستان.

هەر ئەمڕۆ رەفعەت عەبدوڵا، جێگری سەرۆکی یەکێتیی نیشتمانیی کوردستان، سەردانی فه‌رمانده‌یی پێشمه‌رگه‌ی به‌رگری و فریاكه‌وتنی کردو لەلایەن لیوا روكن رزگار جه‌بار محه‌مه‌د فه‌رمانده‌ی فه‌رمانده‌یی پێشمه‌رگه‌ی به‌رگری و فریاكه‌وتنەوە پێشوازیکرا .

جێگری سەرۆکی یەکێتی باسی لەتۆکمەکردن و پێشخستنی هێزەکان کرد بۆ ئەوەی هەمیشە وەک قەڵغانی بەرگری لەگەلی کوردو کوردستان رۆڵی قارەمانانەی خۆیان بگێڕن.

لەلایەکی ترەوە رەفعەت عەبدوڵا، جێگری سەرۆکی یەکێتیی نیشتمانیی کوردستان، سەردانی بەڕێوبەرایەتی دژەتیرۆری کردوو، لەلایەن وەهاب هەڵەبجەیی، فەرماندەی گشتی دژەتیرۆرەوە پێشوازی کرا، جێگری سەرۆک ڕۆڵی بەرچاوی هێزەکانی دژە تیرۆری لەڕووبەڕووبونەوەی تیرۆردا بەپێزانینەوە هەڵسەنگاندو هیوای خواست لەگەڵ هاوبەش و هاوپەیمانەکان بەردەوامبن لەڕیشەکێشکردنی تیرۆرو تیرۆریستاندا.

لە کۆتایی سەردانەکەیدا جێگری سەرۆکی یەکێتیی نیشتمانیی کوردستان، سەردانی فەرماندەیی هێزەکانی کۆماندۆی کوردستانی کردوو لەلایەن دیار عومەر فەرماندەی فەرماندەیی هێزەکانی کۆماندۆوە پێشوازیکرا، لەدیدارەکەدا کەخاتوو شاناز ئیبراهیم ئەحمەد، ئەندامی مەکتەبی سیاسی ئامادەیبوو،جێگری سەرۆک رایگەیاند هێزەکانی کۆماندۆ لەبەرگری و موقاوەمەتی خاكی پیرۆزی كوردستاندا جێگە دەستیان دیارەو لەکاتی ئاشتیشدا دەستی هاوکاری و یارمەتیدانتان شایانی پێزانینە.