هەواڵەکان
سەرۆك كۆماری عیراق داوای كۆبوونەوەی هەردوو دەسەڵاتی دادوەری دەكات بۆ باسكردن لە كێشەكانی نێوانیان و چارەسەركردنی.
د. لەتیف رەشید سەرۆك كۆماری عیراق لە راگەیەنراوێكدا ئاماژەی بۆ ئەوەكردوە، بە پشت بەستن بە ماددەی 87 دەستوری عیراق، كە سەرۆك كۆماری وەك پارێزەری دەستور لە وڵاتدا ناساندوە، سەرۆك كۆمار ، نارەزایی خۆی دەربڕیوە لە بەرامبەر دەستێوەردانەكانی ئیدارەی بەڕێوەبردنی دەوڵەت لە كاروباری دەسەڵاتی دادوەری عیراق و بە پێشێلكاری دەسەڵاتی دادوەری وەسفی كردوە.
سەرۆك كۆمار لە راگەیەنراوەكەیدا پێشنیازی كردوە دادگای باڵای فیدراڵی عیراق و دادگای پێداچونەوەی فیدراڵی بە ئامادەبوونی كەسانی شارەزا لە دەستور و یاسا كۆببنەوە بۆ باسكردن لە كێشەكانی نێوانیان تاوەكو عیراق نەكەوێتە بۆشایی یاسایی.
ئەم هوڵوێستەی سەرۆك كۆمار لە كاتێكدایە ، كە رۆژی پێنج شەممەی رابردوو، نۆ دادوەری دادگای باڵای فیدراڵی كە باڵاترین دەسەڵاتی دادوەرییە لە عیراقدا نامەی دەستلەكاركێشانەوەیان پێشكەشكرد، وەكو ناڕەزاییەك دژی فشاری حكومەت و ئیدارەی بەڕێوەبەردنی دەوڵەت بۆ سەر دادگاكە سەبارەت بە دۆسیەی خور عەبدوڵا.
هێرشەكانی ئەمریكا بۆ سەر دامەزراوە ئەتۆمییەكانی ئێران كاردانەوەی بە دوای خۆیدا هێنا و وڵاتانی ناوچەكە ئیدانەی دەكەن و بەریتانیاش پشتگیری دەكات.
باسم عەوادی وتەبێژی حكومەتی عیراق رایگەیاندووە ، بەغداد نیگەرانە و ئیدانەی هێرشكردنە سەر دامەزراوە ئەتۆمییەكانی ئێران دەكات و ئەو پێشهاتەش هەرەشەیەكی مەترسیدارە بۆ سەر ئاشتی و ئاسایشی رۆژهەڵاتی ناوەراست و سەقامگیری هەرێمیی دەخاتە مەترسییەوە .
هەروەها وەزارەتی دەرەوەی سعودیە لە راگەیەندراوێكدا داوای لە كۆمەڵی نیودەوڵەتی كردوە هەوڵەكانی زیاتر بكات بۆ دۆزینەوەی چارەسەرێكی سیاسی بۆ قەیرانی ئێران و پێشێلكردنی سەروەری ئەو وڵاتەشی ئیدانە كردوە ، هاوكات حكومەتی عومان ئیدانەی هێرشەكەی ئەمریكای كردوە و داوای كردوە بە پەلە ئالۆزییەكان كەمبكرێنەوە و هێرشەكەی ئەمریكاشی بە پێشێلكردنی سەروەری ئێران ناو بردوە .
لەبەرانبەردا كەیر ستامەر سەرۆك وەزیرانی بەریتانیا پشتگیری وڵاتەكەی بۆ هەوڵەكانی رێگریكردن لە بەرنامەی ئەتۆمی ئێران دوپاتكردوەتەوە و رایگەیاندوە ، بەرنامەی ئەتۆمی ئێران هەرەشەیەكی مەترسیدارە بۆ سەر ئاسایشی نێودەوڵەتی ، بۆیە نابێت رێگە بە تاران بدرێت پەرەی پێبدات .
مەفرەزەکانی بەشی پۆلیسی سەیدسادقی سەر بە بەڕێوەبەرایەتی پۆلیسی پارێزگای سلێمانی، توانیویانە تۆمەتبارێکی هەڵاتوو بە تۆمەتی دزیکردن دەستگیربکەن.
بەپێی زانیاری بەڕێوەبەرایەتی پۆلیسی پارێزگای سلێمانی، دوای ئەوەی بڕیاری دەستگیرکردنی تۆمەتبارێکی هەڵاتوو لەلایەن دادگای لێکۆڵینەوەی نەوجەوانانی کەرکوکەوە گەیشتە بەشی پۆلیسی سەیدسادق، هێزەکانی پۆلیس دەستبەجێ لێکۆڵینەوەکانیان دەستپێکرد.
پۆلیس رایگەیاند کە تۆمەتبارەکە بەپێی ماددەی 444 لە یاسای سزادان و بەبڕیاری بەڕێز دادوەری تایبەتمەند، بڕیاری دەستگیرکردنی بۆ دەرچووبوو.
دوای لێکۆڵینەوەی ورد، هێزەکانی پۆلیس توانیان تۆمەتبار بدۆزنەوە و لەلایەن مەفرەزەکانی بەشی پۆلیسی سەیدسادقەوە دەستگیریبکەن.
تۆمەتبارەکە کە بە پیتەکانی (ج، أ، ب) ناسراوە، لەئێستادا بەبڕیاری بەڕێز دادوەری تایبەتمەند راگیراوە. دوای گرتنەبەری رێکارە یاساییەکان، رادەستی شوێنی داواکراو دەکرێتەوە.
مەکتەبی سیاسی یەکێتیی نیشتمانیی کوردستان بۆ کۆچیی دوایی تێکۆشەری دێرین "بەهجەتی مانگر" پرسەنامەیەکی ئاڕاستەی خانەوادەکەی کرد .
دەقی پرسەنامەکە....
بەڕێزان کەسوکار و خانەوادەی بەهجەت محمد امین (بەهجەتی مانگر)
بۆ کۆچی دوایی تێکۆشەری دێرین کاک بەهجەت لەناخی دڵەوە پرسە و ماتەمی خۆمان ئاڕاستەی بەڕێزتان و گشت هاوڕێیانی دەکەین.
بۆ ڕۆحی کۆچکردوو لەیەزدانی مەزن داواکارین جێگەی بەهەشتی بەرین بێت و ئارامی بە بنەماڵە شەهید پەروەرەکەتان و گشت لایەک ببەخشێت
انا للە وانا الیە راجعون
مەکتەبی سیاسی
یەکێتیی نیشتمانیی کوردستان
دوای هێرشەكەی ئەمریكا بۆ سەر بنكە ئەتۆمییەكانی، پێنج سیناریۆ لە بەردەم ئێران هەیە بۆ وەڵامدانەوەی هێرشەكەی ئەمریكا.
پێگەی ئێن دی تی ڤی ئەمریكی بڵاویكردەوە، پێنج سیناریۆ لەبەردەم تاران بۆ وەڵامی هێرشەكەی ئەمریكا هەیە، یەكێكیان بێ دەنگ بوونە و دەتوانێت رێگەی دیپلۆماسی هەڵبژێرێت و سەرلەنوێ دانوستاندن لەگەڵ ئەمریكا دەستپێبكاتەوە.
سیناریۆی دووەم هێرشكردنە سەر بنكە ئەمریكییەكانە كە نزیكەی 20 بنكەی ئەمریكی لە خۆدەگرێت لە رۆژهەڵاتی ناوەڕاست كە بەشێكیان لە عیراقن، لەگەڵ ئەنجادانی هێرشی بە كۆمەڵ بۆ سەر كەشتییە جەنگییەكانی هێزی دەریایی ئەمریكا.
سیناریۆی سێهەمیش بریتیە لە بێدەنگ بوون لە ئێستادا و چاوەڕێ بكات تا گرژییەكانی ئێستا كەمدەبنەوە و دواتر هێرشێكی لەناكاو ئەنجام بدات كاتێك بنكەكانی ئەمریكا لەوپەڕی ئامادەباشیدا نەبن.
ئاماژەی بەوەشكردووە، چوارەم سیناریۆ پڕچەككردنەوەی حزبوڵا و گروپە چەكدارەكانی عیراق و حوسییەكانە بۆ ئەوەی شەڕی بە وەكالەتی ئێران بكەن و پێنجەمین سیناریۆ دروستكردنی هاوپەیمانێتییە لەگەڵ روسیا و چین دژی ئەمریكا.
وەزیری دەرەوەی تورکیا هۆشداری لە مەترسیی پەرەسەندنی شەڕی ئێران و ئیسرائیل دەدات و رایگەیاند ئەگەر ئەم شەڕە نەوەستێت، وڵاتانی دیکەی ناوچەکەش دەگرێتەوە.
“هاکان فیدان” وەزیری دەرەوەی تورکیا ئەمڕۆ لە 51ەمین خولی کۆبوونەوەی وەزیرانی دەرەوەی وڵاتانی رێکخراوی هاوکاریی ئیسلامی لە ئیستانبوڵدا، باسی لە شەڕی ئێستای نێوان ئیسرائیل و ئێران کرد.
فیدان لە وتارەکەیدا جەختی لەسەر پشتیوانیی وڵاتانی ئیسلام بۆ ئێران کردەوە و دووپاتی کردەوە کە “ئیسرائیل بووەتە کێشەی سەرەکیی ناوچەکە و پێویستە کۆمەڵگەی نێودەوڵەتی رۆڵی خۆی بگێڕێت.”
وەزیری دەرەوەی تورکیا رایگەیاند: “هێرشی ئیسرائیل بۆسەر ئێران لە کاتێکدا رویدا کە دانوستانە ئەتۆمییەکان بەردەوامییان هەبوو، ئێمە ئەمە بە تەواوی رەتی دەکەینەوە.”
فیدان هۆشدارییەکی جددیی دا و وتی: “ئەم ئاڵۆزییە پەرەدەسێنێت بۆ وڵاتانی دیکەی ناوچەکە، بۆیە پێویستە بە زووترین کات کۆتایی پێبێت.”
لە بەشێکی دیکەی قسەکانیدا، وەزیری دەرەوە وتی؛ “رەجەب تەیب ئەردۆغان” سەرۆک کۆماری تورکیا هەموو هەوڵێک بۆ هێورکردنەوەی دۆخی ناوچەکە و کەمکردنەوەی گرژی و ئاڵۆزییەکان دەدات.
وەزیری دەرەوەی تورکیا دووپاتی کردەوە کە تورکیا هەوڵەکانی دابەشکردنی ناوچەکە بە تەواوی ڕەت دەکاتەوە.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە د. محەمەد حەسان، نوێنەری تایبەتیی سکرتێری گشتیی نەتەوەیەکگرتووەکان لە عیراق کرد.
لە دیدارێکدا پەرەسەندنە سیاسی و ئەمنییەکان لەسەر ئاستی هەرێمی کوردستان، عیراق و ناوچەکە تاوتوێکرا و جەخت لەسەر پاراستنی بەرژەوەندییە باڵاکان کرایەوە.
لەبارەی شەڕ و ئاڵۆزییەکانی ناوچەکە، بافڵ تاڵەبانی رایگەیاند، دژی شەڕ و وێرانکارین و پشتگیریی هەموو ئەو هەوڵانە دەکەین کە بۆ چارەسەرکردنی کێشەکان لە رێگەی گفتوگۆ و دانوستانەوە دەدرێن.
هەردوولا جەختیان لە چڕکردنەوەی هەوڵەکان بۆ دوورخستنەوەی کاریگەریی شەڕەکە لەسەر هەرێمی کوردستان و عیراق کردەوە.
وەزیری دەرەوەی ئێران بۆ بەشداریكردن لە كۆبوونەوەی وەزیرانی دەرەوەی وڵاتانی ئەندامی رێكخراوی هاریكاری ئیسلامی گەیشتە ئیستەنبوڵ.
عەباس عراقچی وەزیری دەرەوەی ئێران بەمەبەستی بەشداریكردن لە كۆبوونەوەی وەزیرانی دەرەوەی وڵاتانی ئەندامی رێكخراوی هاریكاری ئیسلامی گەیشتە بەیانی ئەمڕۆ ئیستەنبوڵ و رایگەیاند، كۆبوونەوەكە لەسەر پێشنیازی ئێران ئەنجام دەدرێت و هێرشەكانی ئیسرائیلیش بۆ سەر وڵاتەكەی تاوتوێ دەكرێت.
وتیشی، هیوادارە راگەیەنراوێكی یەكلاكەرەوە لەسەر هێرشەكانی ئیسرائیل بڵاوبكەنەوە.
وتەبێژی حكومەتی ئێران وەڵامی ترەمپ دەداتەوە و دەڵێت، گەلی ئێران پشت لە رابەری وڵاتەكەی ناكات و بەرامبەر هەر زیان گەیاندنێك كاردانەوەیان دەبێت.
فاتمە مهاجەرانی وتەبێژی حكومەتی ئێران لەبارەی هەڕەشەكانی دۆناڵد ترەمپ سەرۆكی ئەمریكا لە عەلی خامنەیی رابەری باڵای شۆڕشی ئیسلامی ئێران رایگەیاند، گەلی ئێران پشت لە رابەرەكەی ناكات و لە پشتی دەوەستن، كاردانەوەی بەرفراوانیشیان دەبێت، بەرامبەر هەر زیانێك كە بە رابەرەكەیان بگات.
ئەوەش لە كاتێكدایە پێشتر، سەرۆكی ئەمریكا هێرشی كردەسەر خامنەیی و راگەیاندبوو، دەزانن لە كوێ خۆی شاردووەتەوە و ئامانجێكی ئاسانە، بەڵام لە ناوی نابەن.
سەرۆك وەزیرانی ئیسرائیل دەڵێت، توانیویانە نیوەی موشەك و سەكۆی موشەكیی ئێران لەناوبەرن و توانا موشەكییەكانی تارانیش لاوازبووە.
بنیامین ناتانیاهۆ سەرۆك وەزیرانی ئیسرائیل رایگەیاند، ئیسرائیل توانیویەتی نیوەی موشەك و سەكۆی هەڵدانی موشەكی ئێران لەناوبەرێت كە هەڕەشەبوون بۆ سەر وڵاتەكەی.
دەشڵێت، سەكۆی موشەكیی ئێران سنوردارە و تواناكانی ئەو وڵاتەش لە بواری موشەكدا لاوازبووە و تەنها دوو بۆ چوار هەزار موشەكی لەبەردەستدایە، جەختیشیكردەوە، ئامانجیانە بە تەواوی هەڕەشەكان لەناوبەرن و هێرشی ئیسرائیلیش بۆ سەر ئێران بڕیاریكی مێژوویی بوو.
لێپرسراوێكی باڵای پێشووی هەواڵگری ئیسرائیلش رایگەیاند، سیستمی بەرگری ئیسرائیل لە 24 سەعاتی رابردوودا تەنها توانیویەتی 65%ی ئەو موشەك و فڕۆكانە تێكبشكێنێت كە لە ئێرانەوە ئاراستەی ئیسرائیل دەكرێن، ئەوەش نیشانەی لاوازبوونی سیستمی بەرگری ئیسرائیلە، چونكە رۆژی پێشووتر توانای بەرپەرچدانەوەی 90%ی موشەكەكانی ئێرانی هەبووە.
وەزیری دەرەوەی ئێران رایگەیاندووە، دوای ئەوەی بەو جۆرە رووبەڕووی ئیسرائیل بوونەوە، پێیان وایە وڵاتەکانی دیکە خۆیان لە شەڕەکە بەدوور دەگرن.
عەباس عراقچی وەزیری دەرەوەی ئێران رایگەیاندووە، دوای ئەو رووبەڕووبوونەوەی بەرانبەر ئیسرائیل ئەنجامیان دا پێیان وایە وڵاتانی دیکە خۆیان لە شەڕەکە بەدوور دەگرن.
ئاماژەی بەوەشکردووە، "تاوەکو هێرشەکانی ئیسرائیل بەردەوام بێت، ئامادە نین دانوستان لەگەڵ هیچ لایەنێکدا بکەین".
ئەمڕۆ هەینی، شەڕی نێوان ئیسرائیل و ئێران پێی نایە هەشتەم رۆژ و ئەگەرچی هەوڵە نێودەوڵەتییەکان بۆ کۆتاییهێنان بە شەڕ لە یەکەم رۆژەوە لە ئارادایە، بەڵام تاوەکو ئێستاش هەردوولا بە چڕی هێرشەکانیان بۆسەر یەکتر بەردەوامە.
ئەمریكا فڕۆكەیەكی جەنگیی لە جۆری ئی چوار بی بەرەو رۆژهەڵاتی ناوەڕاست جوڵەپێكرد كە بە فڕۆكەی قیامەت ناسراوە.
پێگەی فلایت رادار بڵاویكردەوە، ئەمریكا فڕۆكەی جەنگیی ئی چوار بی كە بە فڕۆكەی قیامەت ناسراوە بەرەو رۆژهەڵاتی ناوەڕاست جوڵەپێكردووە.
ئاماژەی بەوەشكردووە، فڕۆكەكە بۆ جەنگی ئەتۆمیی بەكاردەهێنرێت و سەرۆك و وەزیری بەرگری ئەمریكاش دەپارێزێت، هەرچەندە تائێستا ترەمپ بڕیاری هێرشكردنەسەر ئێرانی نەداوە.
راشیگەیاندووە، فڕۆكەكە گەشتێكی درێژخایەنی ئەنجامداوە لە چەند شوێنێكەوە بۆ پایتەختی ئەمریكا و دواتر چووەتە چەند ویلایەتێكی تر و پێدەچێت جوڵەی فڕۆكەكە پەیوەندی بە چەند رێكارێكی ئەمنی و خۆپارێزییەوە هەبێت بەهۆی شەڕی ئێران و ئیسرائیلەوە.
دامەزراوەی ئەتۆمیی بوشەهر کێڵگەیەکی وزەی ئەتۆمی ئێرانە، بیرۆکەی دروستکردنی دامەزراوەکە دەگەڕێتەوە بۆ شا محەمەد رەزا پەهلەوی، کیڵگەکە دەکەوێتە باشووری تاران و 11 کیلۆمەتر لە ناوەندی شاری بوشەهرەوە دوورە و دەکەوێتە کەناراوەکانی کەنداوی خلیج، کە ئێران بە کەنداوی فارس ناوی دەبات.
ئێران لە ساڵی 1975دا بە هاوکاریی کۆمپانیا ئەڵمانییەکان دەستی بە بونیادنانی کێڵگەکە کرد، بەڵام لە ساڵی 1979 و لەدوای شۆڕشی ئیسلامی ئێرانەوە کارکردن لە کێڵگەکە راگیرا.
لە شەڕی 10 ساڵەی نێوان ئێران و عیراقدا کێڵگەکە چەندین جار بەر بۆردومان کەوتووە، کە دواتر لە ساڵی 1995دا ئێران لەگەڵ روسیا گرێبەستێکی 4 بۆ 6 ملیار دۆلاری ئەنجامدا بەمەبەستی تەواوکردنی دامەزراوەکە. لە ساڵی 2007 جارێکی دیکە بەهۆی مەترسییەوە کارکردن لە کێڵگەکەدا راگیرا و لە هەمان ساڵدا دەست بە کارکرایەوە تێیدا، لە کۆتاییدا لە ساڵی 2011 کردنەوەی دامەزراوەکە راگەیەنرا.
دامەزراوەی ئەتۆمیی بوشەهر بە پێچەوانەی بنکەکانی فۆردۆ و ئەسفەهان لەژێر زەویدا بونیاد نەنراوە، بەڵکو لە بۆ کەڵک وەرگرتن وەک باڵەخانە نزیکەی 19 مەتری لەژێر زەوییەوەیە.
دامەزراوەی بوشەهر پێچەوانەی بنکەکانی فۆردۆ و ئەسفەهانە و یۆرانیۆمی تێدا ناپیتێنرێت، بەڵکو بە سودوەرگرتن لە وزەی ئەتۆم کارەبا و وزەی تێدا بەرهەمدەهێنرێت.
پێکانی دامەزراوەکە بەمەبەستی لەناوبردنی ئەگەرێکی دوورە، چونکە تەقاندنەوەی دامەزراوەکە وەک تەقینەوەی چەکێکی ئەتۆمیی وایە کە وێرانکارییەکی گەورە بەدوای خۆیدا دەهێنێت.
ئەگەر شتێکی لەو جۆرە رووبدات و دامەزراوەکە بتەقێنرێتەوە، ئەوا بەهۆی ئەو تیشکانەی لێی دەردەچێت، بەنزیکەیی 50 کیلۆمەتری دەوری خۆی پیس دەکات و چیتر بە کەڵکی ژیان نامێنێت، ئەوە جگە لەوەی دووهێندەی ئەو رووبەرە بە پاشماوەکانی پیس دەبێت و لەرێگای ئاو و هەواشەوە کاریگەرییەکەی دەگاتە زۆرینەی وڵاتانی جیهان. هەر بۆیە بەئامانجگرتن و پێکانی ئەو دامەزراوەیە ئەگەرێکی لاوازە.
دۆناڵد ترەمپ رایگەیاندووە، وادەی کارابوونی تیکتۆکی لە ئەمریکا بۆماوەی 90 رۆژی دیکە درێژ کردووەتەوە.
دۆناڵد ترەمپ سەرۆکی ئەمریکا لە هەژماری تایبەتی خۆی لە تۆڕی کۆمەڵایەتی ئێکس رایگەیاند، 90 رۆژی دیکە وادەی کارابوونی تیکتۆکی لە ئەمریکا درێژ کردووەتەوە.
بەوپێیەش تاوەکو 17ی ئەیلوولی ئەمساڵ لەبەردەم ئەو تۆڕە کۆمەڵایەتییەدایە کە بەڕێوەبەرەکەی بگۆڕێت بە کەسێک کە چینی نەبێت، بەپێچەوانەوە تیکتۆک لە ئەمریکا 'بان' دەکرێت و چیتر کارا نابێت.
ترەمپ لە سەرەتای ئەمساڵەوە کە بۆ جاری دووەم بووەوە بە سەرۆکی ئەمریکا، هەڕەشەی زیادکردنی باجی لە چین کرد ئەگەر گرێبەستێک لەبارەی تیکتۆکەوە ئیمزا نەکات لەگەڵیدا.
لەو ناوەندەدا، ترەمپ خواستی خۆی بۆ کڕینەوەی تیکتۆک راگەیاند و پێشنیازی ئەوەی بۆ چین کرد، کە ئەگەر تیک تۆکی پێ بفرۆشێتەوە ئەوا باجی سەر ئەو وڵاتە کەم دەکاتەوە، بەڵام چین پێشنیازەکەی رەتکردەوە.
نۆ ئەندامی دادگای فیدرالی نامەی دەستلەكاركێشانەوەیان پێشكەشی دادگا كرد و بەپێی زانیارییەكە ئەو بابەتە پەیوەندی بە موچەی هەرێمی كوردستانەوە نییە.
پەیامنێری كوردسات نیوز رایگەیاند، نۆ دادوەری دادگای فیدرالی كە پێكهاتوون لە شەش ئەندامی هەمیشەیی و سێ ئەندامی یەدەگ نامەی دەستلەكاركێشانەوەیان پێشكەشی سەرۆكی دادگای فیدرالی كردووە.
دەشڵێت، دوای ئەوەی سەرۆكی دادگا و ئەنجومەنی دادوەری و سەرۆكایەتی كۆمار نامەكەی پەسەندكرد بە دەستلەكاركێشاوە دادەنرێن و ئەستەمە لە ئێستادا دەستلەكاركێشانەوەی بەكۆمەڵی دادوەرەكان پەسەند بكرێت.
وتیشی، دەستلەكاركێشانەوەی دادوەرەكان پەیوەندی بە پرسی موچەی هەرێمەوە نییە و ئەگەر دەستلەكاركێشانەوەكە پەسەند بكرێت كێشە بۆ دانیشتنی دادگا لەبارەی موچەی هەرێم دروست دەبێت.
پۆلیسی سلێمانی رایگەیاند، تۆمەتبارێکیان بەتۆمەتی دزینی پارە لە خاوەنکارەکەی دەستگیر کردووە، کە بەپێی وتەی سکاڵاکارەکە 360 هەزار دۆلاری لێدزیوە.
پۆلیسی سلێمانی لە راگەیەنراوێکدا دەستگیرکردنی تۆمەتبارێکی راگەیاندووە، کە لە ناوبازاڕ بە تۆمەتی دزینی 360 هەزار دۆلار لە خاوەنی کارەکە دەستگیرکراوە. بەپێی راگەیەنراوەکە، لەکاتی دەستگیرکردنیدا، دەستگیراوە بەسەر ئۆتۆمبێلێک و بڕێک لەو پارەیەی کە تۆمەتبار دزیبووی.
پۆلیسی سلێمانی ئەوەشی ئاشکرا کردووە، بەپێی لێکۆڵینەوە سەرەتاییەکان، تۆمەتبار لای سكاڵاكار وەك كارمەند كاری كردووە، لە ئێستادا دانی بەوەدا ناوە كە لەماوەی دوو ساڵدا بڕی ٩٠ هەزار دۆلاری لەخاوەنکارەکەی دزیوە.
تۆمەتبارەکە لەدایکبووی ساڵی 1997ـە و لە ئێستادا بە بڕیاری دادوەری تایبەتمەند و بەپێی ماددەی ٤٤٤ لە یاسای سزادانی عیراقی راگیراوە.