هەواڵەکان
ئارام فەتاح خەراجیانی، یاریزانی لەشجوانی ئەمڕۆ لەگەڵ وریا حەمەکەریمی ڕۆژنامەنوسدا لەڕوداوی هاتوچۆکەی ڕێگەی عەربەت-سلێمانی گیانی لەدەستدا.
ئارام خەراجیانی پاڵەوانێکی لەشجوانی ئاست بەرزبوو، کە خاوەنی چەندین دەستکەوت و نازناوبوو لە ئاستی ناوخۆ و نێودەوڵەتیی.
ئارام، سەر لەبەیانی ئەمڕۆ، لە رووداوێكی هاتوچۆدا لە هەمان شوێنی رۆژنامەنووس و پێشكەشكار وریا حەمە كەریم، گیانی لەدەستدا.
پۆلیسی هاتوچۆی عەربەت رایگەیاند، وریا حەمە كەریم ئۆتۆمبێلەكەی وەستاندوە و ویستویەتی هاوكاریی مامۆستا ئارام بكات، لەو كاتە بارهەڵگرێك خۆی بە ئۆتۆمبێلی هەردووكیاندا كێشاوە و گیانیان لەدەستداوە، شۆفێری بارهەڵگرەكەش كە ئێرانییە، بریندار بووە و لە نەخۆشخانەیەكی سلێمانییە.
زانایان هۆشداریی دەدەن لە نائامادەیی تورکیا بۆ بومەلەرزەکانی داهاتوو، ئەمەش ژیانی سەدان هەزار کەسی خستووەتە مەترسییەوە، ئەم هۆشدارییەی زانایان، دوای دوو ساڵ لە بومەلەرزە وێرانکەرەکان دێت لەو وڵاتە.
دکتۆر ناجی گۆرور، بوومەلەرزەناسی تورکیا، بە ئاژانسی ڕۆژنامەوانی ئەڵمانی راگەیاندووە، تەنها لە ئیستەنبووڵ نزیکەی 100 هەزار بینا مەترسی ڕووخانیان لەسەرە و "سەدان هەزار" باڵەخانە ئەگەری داڕوخانیان هەیە.
ئەو شارەزایە دەڵێت، کاریگەریی دارایی کارەساتێکی لەو شێوەیە، رەنگە بگاتە ملیارەها دۆلار.
گۆرور روونیشیکردەوە، دەسەڵاتداران و دانیشتووانی تورکیا درک بەو مەترسییە ناکەن، ئاماژەی بەوەشکرد، ئەو رێوشوێنانەی گیراونەتەبەر بۆ ئەوەی شارەکانی تورکیا بەرگەی بوومەلەرزە بگرن، لە ئاستی پێویستدا نین.
موراد کوروم، وەزیری گەشەپێدانی شارەکانی تورکیا رایگەیاند، ئیستەنبووڵ بەرگەی بوومەلەرزە ناگرێت.
ئەم هۆشدارییە لە کاتێکدایە کە وڵاتەکە هێشتا ئاسەواری ئەو دوو بوومەلەرزەیەی مانگی شوباتی ساڵی 2023ـی پێوەدیارە، کە بووە هۆی گیان لەدەست دانی زیاتر لە 53 هەزار کەس و برینداربوونی زیاتر لە 100 هەزار کەس لە تورکیا.
لە ساڵی 1999 بوومەلەرزەیەکیتر بە گوڕی 4.7 پلە، لە ڕۆژهەڵاتی ئیستەنبووڵ ڕوویدا و زیاتر لە17 هەزار کەس گیانیان لەدەست دا.
تورکیا دەکەوێتە سەر هێڵی لاری ئەنادۆڵ کە لە ئیستەنبووڵ پایتەختی تورکیاوە نزیکەو بڕبڕەی پشتی دارایی ئیستەمبووڵە.
دەزگای ئافاد دەڵێت، لەدوای هەردوو بوومەلەرزە بەهێزەکەی رۆژی 6ی شوباتی ساڵی رابردووەوە 56 هەزار و 94 بوومەلەرزە و پاشلەرزە روویانداوە کە 14 یان 6 پلە و 91یان 5 پلە بوون.
دۆناڵد ترەمپ لە تۆڕی کۆمەڵایەتی (Truth Social) نووسیویەتی: ئیسرائیل غەززە ڕادەستی ئەمریکا دەکات، کاتێک شەڕەکە کۆتایی دێت.
ئاماژەی بەوەشکردووە، “ئەوان لەڕاستیدا چانسی دڵخۆشبوون و سەلامەتی و ئازادبوونیان دەبێت” “ئەمریکا کە لەگەڵ تیمە گەورەکانی گەشەپێدان لە سەرانسەری جیهاندا کاردەکات، هێواش هێواش و بە وریاییەوە، دەست دەکات بە بنیاتنانی ئەوەی کە دەبێتە یەکێک لە گەورەترین و سەرسوڕهێنەرترین شوێنەکان لەسەر زەوی، بۆ دابینکردنی ئارامی لەوێ، پێویست بە سەربازانی ئەمریکا ناکات و سەقامگیری لە ناوچەکەدا زاڵ دەبێت”.
ئەو بەیاننامەیە دوای ئەوە دێت کە ئێوارەی سێشەممە، ترەمپ لە کۆنگرەیەکی ڕۆژنامەوانیدا لەگەڵ ناتانیاهۆ، لە کۆشکی سپی، نیازی خۆی بۆ دەستبەسەرداگرتنی کەرتی غەززە و ئاوارەکردنی فەلەستینییەکان لەوێ ئاشکرا کرد، ئەمەش بووە هۆی وەڵامدانەوەی بەربڵاوی ناوچەیی و نێودەوڵەتیی لەلایەن هاوپەیمانان و نەیارانی ئەمریکاوە، کە بە کۆی دەنگ پشتگیریان لە "چارەسەری دوو دەوڵەتی" دەکرد.
د.لەتیف جەمال ڕەشید، سەرۆک کۆماری عیراق پێشوازی لە شاندێکی زانکۆی کۆیە کرد بە سەرۆکایەتیی د.محەمەد حەسیب صدیق سەرۆکی زانکۆ و جەختیکردەوە لە پاڵپشتی بۆ هەموو هەوڵێک کە پێداویستی پرۆفیسۆر و وانەبێژ و خوێندکاران دابین بکات.
لە سەرەتای کۆبوونەوەکەدا کە ئەمڕۆ لە کۆشکی بەغداد بەڕێوەچو، سەرۆک کۆمار پیرۆزبایی لە شاندی میوان کرد بە بۆنەی بەدەستهێنانی دەستکەوتێکی زانستی بەرز لە بواری ئەکادیمیا بۆ ساڵی 2024 و ستایشی ڕۆڵی کارگێڕی و ستافی وانەوتنەوەیکرد لە پەرەپێدانی توانا و ئاستی زانکۆکە.
لای خۆیەوە سەرۆک کۆمار ئاماژەی بە گرنگی کاراکردنی هەماهەنگی نێوان زانکۆکانی عیراق و هاوتاکانیان و پەرەپێدانی میکانیزمی پەیوەندیکردن و ئاڵوگۆڕی شارەزایی و هاوبەشی نێوان خۆیان و وڵاتانی پێشکەوتوو، جەختیکردەوە لە پاڵپشتی بۆ هەموو هەوڵێک کە پێداویستی پرۆفیسۆر و وانەبێژ و خوێندکاران دابین بکات و نەهێشتنی ئاستەنگ و کێشەی بەردەمیان.
لە بەرامبەردا ئەندامانی وەفدەکە باسێکی گشتگیریان سەبارەت بە پلان و بەرنامە و پڕۆژەکانی پەرەپێدانی زانکۆکە پێشکەش کرد و سوپاس و پێزانینی خۆیان بۆ ڕێنماییەکانی سەرۆک کۆمار و گرنگیدانی بە بواری پەروەردە دەربڕی.
بافڵ جەلال تاڵەبانی سەرۆکی یەکێتیی نیشتیمانیی کوردستان، بەبۆنەی 31 ساڵەی راگەیاندنی یەکگرتووی ئیسلامی کوردستانەوە، پەیامێکی پیرۆزبایی ئاراستەی ئەو حیزبە کردو تیایدا ستایشی ئەو رۆڵە میانڕەوانەی یەکگرتووی ئیسلامی کرد و هیوای بەردەوامبوونی بۆ خواستن لەسەر ئەو رێچکەیە.
دەقی پەیامەکەی سەرۆکی یەکێتیی نیشتمانیی کوردستان:
بەڕێز مامۆستا سهڵاحهدین محەمەد بههادین، ئەمیندارى گشتیی یهكگرتووى ئیسلامى كوردستان
بەڕێزانمان لە سەرکردایەتی و برایان و خوشکانمان لە یەکگرتووی ئیسلامی کوردستان.
سڵاوی خودای گەورەتان لێبێت.
بەبۆنەی سی و یەکەمین ساڵەی راگەیاندنی یەکگرتووی ئیسلامی کوردستانەوە، لەدڵەوە پیرۆزبایی گەرمتان ئاڕاستەدەکەین و هیوادارم رۆڵی میانڕەوانەی یەکگرتووی ئیسلامی کوردستان بەردەوام بێت لە پێناو بەهێزترکردنی قەوارەی هەرێم و بەدیهێنانی ئامانجە باڵاکانی گەلەکەمان.
لەم دەرفەتەدا بەڕێزو پێزانینەوە لە رۆڵی جەنابتان و یەکگرتووی ئیسلامیی کوردستان دەڕوانین، وەک هێزێکی کاریگەریی گۆڕەپانی سیاسی لەهەرێم، کە هەمیشە بەشێک بوون لە یەکڕیزی و یەکخستنی ماڵی کورد و تەبایی و برایەتی نێوان پێکهاتەکانی کوردایەتی.
پەرۆشی یەکێتیی نیشتمانیی کوردستان دووپاتدەکەمەوە لە گەشەپێدانی پەیوەندییەکانمان و کارکردنی پێکەوەیی لەپێناو سەرخستنی هەنگاوەکان بۆ هێنانە کایەی حکومڕانییەکی تەندروست و خزمەتگوزار و چارەسەرکردنی کێشەکان و دابینکردنی ژیانێکی شایستەتر بۆ خەڵکە خۆشەویستەکەمان.
هەر شاد و سەربەرزو سەرکەوتووبن
بافڵ جەلال تاڵەبانی سەرۆکی یەکێتیی نیشتمانیی کوردستان
قوباد تاڵەبانی لەگەڵ پارێزگاری کەرکوک و ئەندامانی ئەنجومەنی پارێزگا کۆبووەوە و رایگەیاند؛ ئەم ئیدارە نوێیەی کەرکوک هەڵەی ئیدارەکانی پێشوو دووپات ناکاتەوە و هەوڵی بەهێزکردنی پێکەوەژیانی نێوان پێکهاتەکان دەدات.
لە کۆبوونەوەکەدا جێگری سەرۆکوەزیران پشتیوانی خۆی بۆ ئیدارەی نوێی کەرکوک و ئەنجومەنی پارێزگای کەرکوک دووپاتکردەوە و دەستخۆشی لە پارێزگار و ئیدارەی نوێی کەرکوک کرد کە لە ماوەیەکی کورتدا توانیویانە هەنگاوی زۆر گرنگ بنێن لە خزمەتکردنی هاوڵاتییانی کەرکوک وەک پاککردنەوەی کۆڵان و شەقامەکان و دانانی بەردی بناغەی چەندین پڕۆژەی گرنگ.
قوباد تاڵەبانی ئاماژەیدا بە دۆخی تایبەتی کەرکوک و وتەی سەرۆک مام جەلالی بیرهێنایەوە کە هەمیشە کەرکوکی وەک شاری برایەتی پێناسە دەکرد و رایگەیاند ئەم ئیدارە نوێیەی کەرکوک خۆشبەختانە هەڵەی ئیدارەکانی پێشوو دووپات ناکاتەوە و هەوڵی بەهێزکردنی پێکەوەژیانی نێوان پێکهاتەکان دەدات و بەبێ جیاوازی خزمەتی هەموو کەرکوکییەکان دەکات. هەر لەم چوارچێوەیەدا داوایکرد ئیدارە نوێی کەرکوک رۆژ لە دوای رۆژ بە هەنگاوەکانی لە خزمەتکردنی بێ جیاوازیی هاوڵاتییان زیاتر بیسەلمێنێت کە بە کردار حکومەتی هاوڵاتییانە.
جێگری سەرۆک وەزیران باسی لەوەشکرد کە بەداخەوە لە چەند ساڵی رابردوودا بە هۆکاری جۆراوجۆر وەک پێویست خزمەتی کەرکوک نەکراوە و پڕۆژەی خزمەتگوزاری و وەبەرهێنان لە شارەکە جێبەجێ نەکراوە. جەختیشی کردەوە کە ئەم ئیدارە نوێیەی کەرکوک پێویستە هانی وەبەرهێنەران بدات و ئاسانکارییان بۆ بکات بۆ وەبەرهێنان لە شارەکەدا و هەروەها هەوڵ بدات گرنگی بە سەوزکردن و باشترکردنی دۆخی ژینگەی کەرکوک بدات و پڕۆژەی خزمەتگوزاری زیاتریش لە شارەکەدا جێبەجێ بکات.
هەر لەم چوارچێوەیەدا داوایکرد حکومەتی فیدرال لەرووی دابینکردنی بودجەی پێویستەوە هاوکاری ئیدارەی نوێی کەرکوک بکات.
لە هەردوو کۆبوونەوەکەدا گفتوگۆکرا لەبارەی بڕیارەکەی دادگای فیدراڵی کە بە فەرمی دانی نا بە ئەنجومەنی پارێزگا و ئیدارەی نوێی کەرکوکدا. لەم بارەیەوە قوباد تاڵەبانی داوایکرد ئەو لایەنانەی کە تا ئێستا بایکۆتی پڕۆسەکەیان کردوە، بگەڕێنەوە بۆ ناو ئەنجومەنی پارێزگا و دەنگی ئەو هاوڵاتییانە بگەیەنن کە لە هەڵبژاردنەکاندا دەنگیان پێداون.
توركیا بۆردومانی چەند ناوچەیەكی شاربازێر دەكات و پاسەوانی سنوریش دەڵێت زیانەكانی بۆردومانەكە بەهۆی كەشوهەواوە نەزانراوە.
سەرچاوەیەك لە پۆلیسی پاسەوانی سنور بە كوردسات نیوزی راگەیاند، پێشنیوەڕۆی ئەمڕۆ توركیا بە چڕی بۆردوومانی سنوری ماوەت و گوندی گەڵاڵەی كردووە تا ئێستا زیانەكانی بۆردومانەكە دیار نییە.
كامەران عوسمان؛ لێپرسراوی بەشی مافی مرۆڤی رێكخراوی CPT ئەمریكی رایگەیاندوە؛ لە سەعات 10:47 خولەكی پێشنیوەڕۆ ، فڕۆكە جەنگییەكانی سوپای توركیا بە چڕی بۆردوومانی (دۆڵی ژاژۆلان، كوێرەكانی و كێوی كوڕیس)یان لە دەووروبەری گوندی گەڵاڵەی سەر بە قەزای ماوەت كردوە.
پەیامنێری كورسات لە زاری پاسەوانی سنور ئاماژەی بەوە كردوە هەرچەندە بۆردومانەكانی توركیا لە دەوروبەری گەڵاڵە چڕبوون بەڵام بەهۆی رەوشی كەش و هەواوە ئاستی زیانەكان نەزانراون.
بەرەبەیانی ئەمڕۆ لە رووداوێكی هاتوچۆدا رۆژنامەنووس و پێشكەشكار وریا حەمە كەریم و مامۆستایەكی هۆڵی لەشجوانی گیانیان لەدەستدا.
پەیامنێری كوردسات نیوز رایگەیاند، بەیانی ئەمڕۆ بارهەڵگرێك لەسەر رێگای عەربەت-سلێمانی كۆنتڕۆڵی لەدەستدا و خۆی كێشاوە بە دوو ئۆتۆمبێلدا و بەهۆیەوە رۆژنامەنووس و پێشكەشكار وریا حەمەكەریم و ئارام فەتاح مامۆستای هۆڵی لەشجوانی گیانیان لەدەستدا.
پۆلیسی هاتوچۆی عەربەت رایگەیاند، وریا حەمە كەریم ئۆتۆمبێلەكەی وەستاندوە و ویستویەتی هاوكاریی مامۆستا ئارام بكات، لەو كاتە بارهەڵگرێك خۆی بە ئۆتۆمبێلی هەردووكیاندا كێشاوە و گیانیان لەدەستداوە، شۆفێری بارهەڵگرەكەش كە ئێرانییە، بریندار بووە و لە نەخۆشخانەیەكی سلێمانییە.
سەرۆكی فەڕەنسا لە پەیوەندییەكەی تەلەفۆنیدا لەگەڵ ئەحمەد شەرع، پشتیوانیی وڵاتەكەی بۆ دیمەشق و هەسەدە راگەیاند.
ئاژانسی هەواڵی فڕانس پرێس بڵاویكردەوە؛ ئیمانۆێل ماكرۆن سەرۆكی فەڕەنسا لە پەیوەندییەكی تەلەفۆنیدا لەگەڵ ئەحمەد شەرع سەرۆكی كاتی دەسەڵاتی راگوزەری سوریا، پشتیوانیی پاریسی بۆ حكومەتی راگوزەری دیمەشق و ئاسایشی وڵاتەكە دەڕبڕیوە.
ماكرۆن لەو پەیوەندییە تەلەفۆنییەكەدا هاوكات لەگەڵ پیرۆزبایی لە گەلی سوریا لەبارەی رزگاربونیان لە دەسەڵاتی رژێمی پێشوو، جەختی كردوەتەوە لەسەر بەرەنگاربونەوەی تیرۆر و جەنگ لەی دژی داعش.
سەرۆكی فەڕەنسا پشتیوانیی وڵاتەكەی بۆ هێزەكانی سوریای دیموكرات هەسەدە دەڕبڕیوە و رایگەیاندوە، پێویستە ئەو هێزە ببێتە پەشێك لە پێكهاتەی سوپای وڵاتەكە.
سەرۆكایەتی فەڕەنسا لە راگەیەنراوێكدا ئاشكرایكردووە، پەیوەندییە تەلەفۆنییەكەی ماكرۆن و شەرع ئامادەكارییە بۆ كۆنفڕانسی ئاشتی بۆ سوریا كە بڕیارە لە 13 مانگ لە پاریسی پایتەخت بەڕێوەبچێت.
سەرۆککۆماری عیراق د.لەتیف جەمال ڕەشید، ئەمڕۆ چوارشەممە لەگەڵ سەید عەمار حەکیم سەرۆکی ڕەوتی حیکمەی نیشتمانی کۆبووەوە و بارودۆخی گشتی وڵات و پێشهاتە ناوچەیی و نێودەوڵەتییەکانیان تاوتووێکرد.
لە میانی دیدارەکەدا جەخت لە پاراستنی سەروەری خاکی عیراق کرایەوە لە ناو گۆڕانکارییە ناوچەیی و ئەو ئاڵەنگارییە نێودەوڵەتییانەی کە ڕووبەڕووی وڵات دەبنەوە.
تیشک خرایە سەر، پێویستی یەکخستنی هەوڵ و دیدگا و کاری هاوبەشی نێوان هێزە سیاسییەکان بۆ بەهێزکردنی پرۆسەی دیموکراسی و رووبەڕووبوونەوەی ئەو ئاڵەنگارییانەی کە رووبەڕووی وڵات دەبنەوە.
هەر لەو دیدارەدا جەخت لەسەر پێویستی پابەندبوون بە دەستوور و یاسا لە پێناو پاراستنی سەقامگیری ئەمنی و سیاسی و خزمەتکردنی خەڵک و بەدیهێنانی دادپەروەری کرایەوە.
ئەنجومەنی وەزیرانی هەرێم وەزارەتی سامانە سروشتییەكانیشی راسپارد، لە زووترین كاتدا، هەناردەكردنەوەی نەوتی هەرێم لەلایەن سۆمۆ دەستپێبكاتەوە.
ئەنجومەنی وەزیرانی هەرێمی كوردستان كۆبووەوە، بەپێی راگەیەنراوی كۆبونەوەكەش، لە پێناو گرەنتیكردنی مووچەی سەرجەم مانگەكانی ساڵی 2025 و نەهێشتنەوەی هیچ پاساو و بیانوویەك بۆ رێگری لە جێبەجێكردنی رێككەوتنەكە، بڕیاری پەسەندكردنی سەرجەم ئەو پێشنیازانە دراوە كە لە كۆبوونەوەكەدا خراونەتەڕوو.
هەر لە كۆبوونەوەكەدا بڕیاریدا بە پەسەندكردن و پابەندبوونی بە میلاكی سەرجەم مووچەخۆرانی هەرێم بۆ ساڵی 2025 بەپێی ئەو ژمارە و خەرجییانەی لە كۆبوونەوەكە خرانەڕوو، بڕیاریشدرا بە پەسەندكردنی رێكاری گواستنەوەی خانەنشینانی پێشمەرگە و سەربازیی و هێزەكانی ئاسایشی ناوخۆ و شایستەكانی كەسوكاری شەهیدان و ئەنفالكراوان بۆ سەر بەڕێوەبەرایەتی گشتیی خانەنشینی لە وەزارەتی دارایی هەرێم.
ئەنجومەنی وەزیران وەزارەتی سامانە سروشتییەكانیشی راسپارد، لە پەیوەندی بەردەوامدا بێت لەگەڵ وەزارەتی نەوتی عیراق و كۆمپانیای سۆمۆ و كۆمپانیا نەوتییە بەرهەمهێنەرەكان لە هەرێم، تا لە زووترین كاتدا، هەناردەكردنەوەی نەوت لە لایەن سۆمۆوە دەستپێبكاتەوە و داهاتەكەشی بخرێتەوە خزمەتی خەزێنەی گشتیی عیراق.
وەزارەتی دارایش راسپێردرا، بە ناردنی بەشی گەنجینەی عیراق لە داهاتی ناوخۆ بۆ مانگی یەكی ئەمساڵ بۆسەر ئەژماری وەزارەتی دارایی عیراق لە چەند ڕۆژی داهاتوودا.
دۆناڵد ترەمپ سەرۆکی ئەمریکا رایگەیاند؛ ئێرانێکی سەرکەوتوو بێ چەکی ئەتۆمی بۆ جیهان پێویستە
شەوی سێشەممە دوای ئیمزاکردنی یاداشتێک بۆ گەڕاندنەوەی سیاسەتی "زۆرترین فشار" بەرامبەر ئێران، هەروەها راگەیاندنی نیازی خۆی بۆ رێگریکردن لە پەرەپێدانی چەکی ئەتۆمی لە لایەن ئەو وڵاتەوە، ترەمپ لە پۆستێکدا لە تۆڕی کۆمەڵایەتی "ترو سۆشیال" وتی: "پێمخۆشە ئێران وڵاتێکی گەورە و سەرکەوتوو بێت، بەڵام ناتوانین ڕێگەی پێ بدەین چەکی ئەتۆمی بەدەستبهێنێت".
ترەمپ جەختی لەوە کردەوە، "پێی باشترە ڕێککەوتنی ئاشتی ئەتۆمی بکەن، ڕێگە بە ئێران بدات بەشێوەیەکی ئاشتیانە پەرەپسەنێت و گەشە بکات، دەشڵێت: "پێویستە دەستبەجێ دەست بە کارکردن بکەین لەسەر ئەو رێککەوتنە و بەو بۆنەیەشەوە لە رۆژهەڵاتی ناوەڕاست ئاهەنگێکی گەورە بگێڕین".
لەبەرامبەردا مەسعوود پزیشکیان سەرۆک کۆماری ئێران ڕایگەیاند کە "ئەمریکییەکان پێیان وایە هەموو کارێکی ئێران بەندە بە نەوتەوە و دەیانەوێت هەناردەکردنی نەوتی وڵاتەکەی ڕابگرن، بەڵام ئێران زۆر ڕێگەی هەیە بۆ تێکشکاندنی پلانەکانیان.
سەبارەت بە لێدوانەکانی ترەمپ دەربارەی غەززە، دیمیتری پێسکۆڤ، وتەبێژی کرێملین رایگەیاند، کرێملین پێی وایە چارەسەری یەکلاییکەرەوە لە رۆژهەڵاتی ناوەڕاست، پرسی دوو دەوڵەتییە.
دیمیتری پێسکۆڤ وتەبێژی کرێملین، سەبارەت بەو لێدوانەی ترەمپ کە باس لەوە دەکات پێویستە خەڵکی غەززە لە میسر و ئوردن جێگیر بکرێن، لەوەڵامدا وتی: "سەبارەت بە پرسی نیشتەجێکردنی فەلەستینییەکان، بەڵێ، گوێمان لە لێدوانەکەی بەڕێز ترەمپ بوو لەسەر ئەم پرسە، و لێدوانەکانی عەممان و قاهیرەمان بیست و بینی، کە باسیان لە ڕەتکردنەوەی بیرۆکەیەکی لەو شێوەیە کرد. بۆیە لە ئێستادا، پێمان وایە ئاشتی لە ڕۆژهەڵاتی ناوەڕاستدا، تەنیا لەسەر بنەمای چارەسەری دوو دەوڵەتی بەدەست دەهێنرێت.
سەبارەت بە هەڵوێستی روسیا لەسەر پرسی فەلەستین و رۆژهەڵاتی ناوەڕاست وتی: هەڵوێستی ئێمە سەبارەت بە یەکلاکردنەوەی ڕۆژهەڵاتی ناوەڕاست رونە، پشتگیری لە پرسی دوو دەوڵەتیی دەکەین و پشتگیری دەکەین و پێمان وایە تاکە بژاردەیە.
قوباد تاڵەبانی، جێگری سەرۆکوەزیران پێشوازیکرد لە ئەرمان تۆپجو، کونسوڵی گشتیی تورکیا و لە کۆبوونەوەی نێوانیاندا چەند پرسێکی جێی بایەخی هەردوولا تاوتوێ کران.
لە بەشێکی کۆبوونەوەکەدا کە ئەمڕۆ چوارشەمە لە هەولێر بەڕێوەچوو، لەبارەی دواگۆڕانکارییە سیاسی و ئەمنییەکانی ناوچەکەوە ئاڵوگۆڕی بیروڕا کرا، تیایدا قوباد تاڵەبانی جەختی کردەوە؛ پێویستە هەموو لایەنەکانی ناوچەکە بەرپرسیارانە هەنگاو بنێن.
لە تەوەرێکی دیکەدا باسی دۆخی هەرێمی کوردستان و گفتوگۆکانی پێکهێنانی حکومەتی نوێی هەرێم کرا. جێگری سەرۆکوەزیران ئاماژەی بە گفتوگۆکانی یەکێتی و پارتی-دا و روونی کردەوە؛ تیمە تەکنیکییەکان گفتوگۆکانیان تەواو کردەوە و بەهیواین لە ماوەیەکی نزیکدا بگەنە رێککەوتن بۆ پێکهێنانی حکومەتێک کە لە ئاستی چاوەڕوانی هاوڵاتییانی هەرێمدابێت.
سەبارەت بە پەیوەندییەکانی نێوان هەرێم و بەغداش، قوباد تاڵەبانی ئاماژەی بەوەدا بۆ چارەسەرکردنی ریشەیی کێشە داراییەکان، هەنگاوی زۆر باش نراوە و لە دوای پەسەندکردنی هەمواری یاسای بودجەش، زەمینەی لەبار دروست بووە بۆ چارەسەرکردنی کێشە و ناکۆکییەکانی دیکەی نێوان هەرێم و بەغدا.
لای خۆیانەوە، کونسوڵخانەی تورکیا لە تۆڕی کۆمەڵایەتیی ئێکس، سەبارەت بە دیدارەکە بڵاوی کردەوە، لەگەڵ بەڕێز قوباد تاڵەبانی، جێگری سەرۆکی ئەنجوومەنی وەزیرانی حکومەتی هەرێمی کوردستانی عێراق کۆبووینەوە و گفتوگۆمان لەسەر پێشهاتە گرنگەکان کرد".
كەناڵێكی ئەمریكی رایگەیاند، ئەمریكا پلانی هەیە بۆ كشانەوەی سەرجەم سەربازەكانی لە سوریا و رۆژئاوای كوردستان، وتەبێژی هەسەدەش دەڵێت هیچ پەیامێكمان لەوبارەوە پێنەگەیشتووە.
كەناڵی ئێن بی سی نیوزی ئەمریكی لە زاری دوو سەربازی ئەمریكا لە سوریا، بڵاویكردوە، دۆناڵد ترەمپ سەرۆكی ئەمریكا و چەند لێپرسراوێكی نزیك لێوەی پلانیان هەیە لە ماوەی 30 بۆ 90 رۆژدا سەرجەم سەربازانی ئەمریكا لە سوریا بكشێننەوە، كە لە دوای روخانی رژێمی ئەسەد ژمارەی سەربازەكانیان لە 900 سەربازەوە بەرزكردەوە بۆ 2 هەزار سەرباز.
هاوكات، فەرهاد شامی وتەبێژی هێزەكانی سوریای دیموكرات - هەسەدە رایگەیاند، هیچ پەیامێكیان لە ئەمریكاوە بە دەستنەگەیشتوە كە نیازیان هەبێت هێزەكەنیان لە سوریا بكشێنەوە.
وتیشی؛ ئەگەر ئەمریکا هێزەکانی بکشێنێتەوە، پارێزگاری لەو دەستکەوتانە دەکەین کە بە دەستمان هێناون.
پێشتر، ترەمپ لە وەڵامی پرسیارێكی سەبارەت بە كشانەوەیان لە سوریا رایگەیاند، بەهیچ شێوەیەك دەست لە كاروباری سوریا وەرنادەن و ئەو سەرلێشێواویەی لەوێ هەیە پەیوەندی بە ئەوانەوە نییە و پێویستیان بەوە نییە ئەمریكا ببێتە بەشێك لە سوریا.
بەڕێوەبەرایەتی گشتی كەشناسی و بومەلەرزەزانی هەرێم رایگەیاند، لە سبەینێوە شەپۆلێكی باران و بەفر ناوچەكانی هەرێمی كوردستان دەگرێتەوە.
بەڕێوەبەرایەتی گشتی كەشناسی و بومەلەرزەزانی لەڕاگەیەندراوێكدا بڵاویكردەوە، لە ئەمشەوەوە كاریگەری شەپۆڵێكی بارانبارین لەسەر هەرێمی كوردستان دەستپێدەكات و سەرەتا لە سنوری پارێزگای دهۆك و بەشێك لەناوچە شاخاوییەكان دەبێت.
پاشان كاریگەری ئەو شەپۆڵە بەلاوازی درێژ دەبێتەوە بۆ سەرجەم ناوچە جیاجیاكان بە نمە بارانی پچڕپچڕ و بارینی بەفرێكی كەم لەناوچە سنورییەكان.
كەشناسی راشیگەیاندووە، لە درەنگانی ئەمشەوەوە شەپۆلی بارانبارین زیاد دەكات و سبەینێ بە درێژایی كاتەكان باران دەبارێت، هەروەها شەپۆڵێكی بەفربارین سەرجەم ناوچە شاخاوییەكان دەگرێتەوە.
هەر بەپێی راگەیەندراوەكەی كەشناسی، كاریگەری ئەو شەپۆلە لە رۆژی هەینییەوە لاواز دەبێت بەڵام پلەكانی گەرما هەر بەنزمی دەمێنێتەوە .