هەواڵەکان
دەستەی گشتیی كەشناسی عیراق بڵاویكردەوە، شەپۆلێكی گەرمای بەتین عیراق دەگرێتەوە و بۆ ماوەی پێنج رۆژ بەردەوام دەبێت.
دەستەی گشتیی كەشناسی و چاودێریی بوومەلەرزەیی عیراق، لە راگەیەنراوێكدا ئاشكرایكرد، لە رۆژی شەممەی داهاتووە شەپۆلێكی گەرمای بەتین سەرجەم شارەكانی عیراق دەگرێتەوە بۆ ماوەی پێنج رۆژ بەردەوام دەبێت.
کەشناسی عیراق ئاماژەی بەوەشکردوە، لە هەندێك شاری ناوەراست و باشوری عیراق پلەكانی گەرما 50 پلەی سیلیزی تێدەپەڕێنن.
راشیگەیاند، هاتنی ئەو شەپۆلی گەرمایە ئاساییەوە چونكە لە لوتكەی وەرزی هاویندایەو بەرزترین تێكڕای ساڵانەی گەرما لەو چەند رۆژەدا تۆماردەكرێت و بۆ ماوەی پێنج رۆژ بەردەوام دەبێت.
فەرماندەیی ناوەندیی هێزەکانی ئەمریکا (CENTCOM) رایگەیاند، شەپۆلێکی نوێی هێرشی چڕیان بەسەركەوتوویی كردووەتە سەر چەندین ئامانج لە ناوخۆی ئێراندا، ئەمەش وەک وەڵامێک بۆ ئەو هێرشە موشەکییانەی کە کرابوونە سەر هێزەکانی ئەمریکا.
دوای ئەوەی ئێران بە موشەک چەند پێگەیەکی ئەمریکای لە ناويکە کردە ئامانج، ئەمەریکا وەڵامی دایەوە و فەرماندەیی ئەمریکا جەختی لەوە کردووەتەوە، کە دەیان ئامانجی سەر بە سوپای پاسدارانی ئێرانیان پێکاوە، کە چەندین سەنتەری فەرماندەیی سەربازی و بنکەکانی موشەک و فرۆکەی بێفرۆکەوان (درۆن)یان تێدا بووە.
سێنتکۆم ئاماژەی بەوە کردووە، ئامانج لەم هێرشانە کەمکردنەوەی هەڕەشەکانی ئێران و میلیشیا هاوپەیمانەکانییەتی بۆ سەر هێزەکانی ئەمریکا، کەشتیوانی بازرگانی و وڵاتانی کەنداو.
سێنتکۆم راشیگەیاندوە، لە ئێستادا زیاتر لە 50 هەزار سەربازی ئەمریکی لە رۆژهەڵاتی ناوەڕاستدا بڵاوکراونەتەوە و لە بەرزترین ئاستی ئامادەباشیدان.
لای خۆشیەوە، رۆژنامەی وۆڵ ستریت ژۆرناڵ لە زاری لێپرسراوێکی ئەمریکییەوە گواستوویەتییەوە، کە قەبارەی ئەم هێرشانەی ئەمجارەی سەر ئێران زۆر بەرفراوانتر دەبێت بەراورد بەو ئۆپراسیۆنانەی لە هەفتەکانی رابردوودا ئەرنجام درابوون.
سەرۆکی ئەمریکا رایگەیاند، ئەوان بە توندی لە ئێران دەدەن وخۆشیان باش ئەوە دەزانن، ئاماژەی بەوەشکرد پێشهاتەکان دەریدەخات لەگەڵیان دەگەنە رێککەوتن یان نا.
دوناڵد ترەمپی سەرۆکی ئەمریکا، رایگەیاند، ئێرانییەکان شەوی رابردوو پێنج موشەکیان ئاڕاستە کردووە و سەرجەمیان خسراونەتە خوارەوە.
لەبارەی بە ئامانج گرتنی کەشتییەکی ئەمریکا لە بەندەرەکانی میسر، سەرۆکی ئەمریکا ئاشکرای کرد، زانیاریی پێدراوە دەربارەی ئەو روداوانەی لە میسر رویان داوە، بەڵام جارێکا باسیان ناکات.
سەرۆکی ئەمریکا جەختی کردەوە، لە ئێستادا مامەڵە لەگەڵ گروپێکی جیاواز لە ناوخۆی ئێران دەکەن و ئەو گروپەش داوای لێبوردنیان لێ کردوون، بەڵام بە هەموو شێوەیەک بە توندی لێیان دەدەن و ئێرانییەکانیش بە باشی ئەوە دەزانن.
لەبارەی گەیشتن بەرێکەوتن لەگەڵ تاراندا، دۆناڵد ترەمپ رایگەیاند، بەپێی پێشهاتەکان دەردەکەوێت، ئاخۆ دەگەنە رێککەوتن یان نا.
ئەحمەد داودئۆغڵو، سەرۆک وەزیرانی پێشوتری تورکیا و سەرۆکی پارتی ئایندە، لە پەیامێکدا لە ژێر ناونیشانی "لە پێناو تورکیای سبەینێ" لە تۆڕی کۆمەڵایەتیی ئێکس، بە رەسمی کشانەوەی خۆی لە کاری حزبی و کۆتاییهێنانی بە چالاکییەکانی پارتەکەی راگەیاند.
داودئۆغڵو لە پەیامەکەیدا ئاماژەی بەوە داوە، دوای راوێژکردن لەگەڵ لایەنە پەیوەندیدارەکانی حزبەکەیدا، گەیشتوونەتە ئەو بڕیارەی، کە پارتەکەیان دابخەن.
ئەم هەنگاوەی داودئۆغڵو دوای ئەوە دێت کە پارتەکەی لە دوا هەڵبژاردنەکاندا تووشی شکستی سیاسی بووەوە و نەیتوانی ئەنجامێکی بەرچاو بەدەستبهێنێت.
تا ئێستاش چارەنووسی سیاسیی ئەندامانی سەرکردایەتی پارتەکە بە نادیاری ماوەتەوە و ئەحمەد داودئۆغڵو، یەکێک لە دیارترین کەسایەتییە سیاسییەکانی دەیەکانی دوایی تورکیا و سەرۆکی پارتی ئایندە.
میدیاکانی ئیسرائیل لە زاری لێپرسراوێکی باڵاوە کۆمەڵێک زانیاریی گرنگیان سەبارەت بە گرژییەکانی ناوچەکە و ئامادەکارییە ئەمنییەکانی ئیسرائیل بڵاوکردەوە و دەڵێن؛ ئێران تا ئێستاش زیاتر لە 1500 موشەکی بالیستیکی ماوە.
میدیاکانی ئێراسئیل ئاماژەیان بەوەکردوە، ڕێگەچارەکانی بەردەم ئیسرائیل بەرانبەر ئێران خۆی لە رێککەوتن، گوشاری ئابوری، یان هێرشی سەربازیی بەربڵاودا دەبینێتەوە؛ سەرەڕای زۆری گوشارە ئابورییەکان ، بەڵام بژارەی سەربازی هێشتا وەک بژارەیەکی سەرەکی لەسەر مێز ماوەتەوە.
هەروەها ئاماژەیان بەوە داوە، تاران لە دامەزراوەی جەبەل ئەلفەس سەرقاڵی پیتاندنی یۆرانیۆمە و هێشتا خاوەنی پێگه و توانایەکی بەرچاوە بە هەبونی 1500 بۆ 1600 موشەکی باڵیستیکی.
لە لایەکی دیکەوە و لەسەر ئاستی پەیوەندییە هەرێمییەکان و ناوخۆییەکان، لێپرسراوە ئیسرائیلییەکە ئاشکرای کردوە، بنیامین نەتانیاهۆ بە دۆناڵد ترەمپی راگەیاندوە، ئامادەیی ئیسرائیل لە سوریا سنوردارە و تەنها بەپێی پێداویستییە ئەمنییەکان دەبێت.
وەزارەتی خەزێنەی ئەمریکا خولێکی نوێی سزاکانی پەیوەندیدار بە ئێران راگەیاند، کە تێیدا 10 کۆمپانیا و دامەزراوە هەروەها هەشت کەشتیی نەوتهەڵگر خرایە ناو لیستی سزاکانی نوسینگەی کۆنترۆڵی سەرمایە دەرەکییەکان (OFAC).
بە گوێرەی ئەو راگەیەندراوەی وەزارەتی خەزێنەی ئەمریکا، شەش کۆمپانیا لە کۆی ئەو 10 کۆمپانیایەی خراونەتە ناو لیستی سزاکانەوە، بنکەکانیان لە چین و هۆنگ کۆنگە؛ لەوانە کۆمپانیای بەڕێوەبردنی کەشتیوانیی کی‌هانگ، هەروەها چەندین کۆمپانیای بازرگانی و گواستنەوەی دەریایی لە هۆنگ کۆنگ و دورگەکانی مارشاڵ.
هاوکات دوو دامەزراوەی ئێرانی بە ناوەکانی (مەرجەعی خزمەتگوزارییە دەریاییەکانی هورمز سەیف) و کۆمپانیای (بیمەی دەریایی کەنداو) سزایان بەسەردا سەپێنراوە.
جگە لەمەش، ئامانجگرتنی هەشت کەشتیی نەوتهەڵگر و هەڵگری بەرهەمە کیمیاییەکان بە ئاڵای وڵاتانی جیاوازەوە وەک باربادۆس و ڤانواتو بەشێکی دیکەی ئەم بڕیارە بووە.
ئەم سزایانەی واشنتۆن لە کاتێکدا دێن، کە پێشتر سوپای ئەمریکا رایگەیاندبوو چەندین موشەکی باڵیستیکی لە ئاسامانی رۆژهەڵاتی ناوەڕاستدا لەناو بردووە کە ئاڕاستەی بنکە و هێزەکانی کراون و دۆناڵد ترەمپیش رایگەیاند بوو، وەڵآمی تاران دەداتەوە.
ئەنجومەنی ئاسایشی نیشتمانیی عیراق، کۆبوونەوەیەکی بەپەلەی بە سەرۆکایەتیی عەلی زەیدی، سەرۆک وەزیران و فەرماندەیی گشتیی هێزە چەکدارەکان ئەنجامدا، بە مەبەستی تاوتوێکردنی پێشهاتە ئاسایشییەکان و ئەو هێرشە ئاسمانییەی لەلایەن هێزە ئاسمانییەکانی ئەمریکا و سعودیەوە کرایە سەر عیراق.
ئەنجومەنەکە لە راگەیەندراوێکدا، بە توندی ئیدانەی هێرشەکەی کرد و ئاماژەی بەوە دا، کە هێرشەکە لە کاتێکدا رویداوە کە حکومەتی عیراق لە پەیوەندی بەردەوامدا بووە لەگەڵ لایەنە پەیوەندیدارەکان بۆ بەدواداچوون و چارەسەرکردنی ئەو بابەتانەی لەلایەن ئەمریکا و سعودییەوە سەبارەت بە بەئامانجگرتنی خاکی سعودیە روبەڕوو کرابوونەوە.
ئەوەشیان خستوەتەڕوو، لە هێرشەکەی بەرەبەیانی ئەمڕۆی ئەمریکا و سعودیە بۆ سەر عیراق، ژمارەیەک هاووڵاتی مەدەنی کوژراون و بریندار بوون.
لە وەڵامی ئەم پێشهاتانەدا، ئەنجومەنی ئاسایشی نیشتمانی بڕیاریدا بە داڕشتنی پلانێکی ئاسایشیی گشتگیر بۆ کۆنترۆڵکردنی زەمینی و روبەڕوبوونەوەی هەر پێشێلکارییەکی سەروەریی عیراق.
هاوکات رێگریکردن لە هەر سەرچاوەیەک، کە هەڕەشە لە وڵاتانی دراوسێ بکات و جگه لەوەش، وەزارەتی دەرەوەی راسپارد تاوەکو بەپێی یاسا نێودەوڵەتییەکان و پەیماننامەی ئۆپۆ، رێکارە یاساییەکان بۆ بەبەڵگەکردنی ئەم روداوە و پاراستنی مافە رەواکانی عیراق بگرێتە بەر.
دۆناڵد ترەمپ سەرۆكی ئەمریكا هەرەشەی توند لە ئێران دەكات و دەڵێت ، بە توندی هێرشیان دەكەنە سەر .
ترەمپ لە دوایین لێدوانیدا سەبارەت بە ئێران رایگەیاندووە، بە هەماهەنگی لەگەڵ عیراق هێرشیان كردووەتە سەر گروپە چەكدارەكانی هاوپەیمانی ئێران و دوپاتیشیكردوەتەوە كە باجێكی قورس بە ئێران دەدەن و بە توندی هێرش دەكەنە سەریان ئەوەش وەك وەلامێك بۆ هێرشكردنە سەر هێزەكانی ئەمریكا لە ئوردن ، ترەمپ دەشڵێت تاوتوێی هێرشكردنە سەر هاوپەیمانەكانی ئێران دەكەن.
ئەوە لەكاتێكدایە چەند رۆژێك لەمەوبەر ترەمپ هێرشەكانی بۆ سەر ئێران راگرت، بەڵام بەپێی میدیكانی ئێران، ئەمرۆ هێرشەكان دەستیانپێكردوەتەوە و سوپای ئەمریكا بۆردومانی ناوچەیەكی ئێرانی كردوە لە باكوری رۆژئاوای وڵاتەكە كە هاوسنوری عیراقە .
ئاژانسی رۆیتەرز بڵاویکردەوە، فەرماندەیی باڵای هێزەکانی ئەمریکا لە رۆژهەڵاتی ناوەڕاست هۆشداری داوەتە سەربازەکان بەوەی ئەو گرتە ڤیدیۆییانەی کە لە ئینتەرنێتدا بڵاودەکرێنەوە بە مۆبایل، دەتوانن یارمەتی ئێران بدەن بنکەکانی ئەمریکا بکاتە ئامانج.
ئەمڕۆ چوارشەممە لە راپۆرتێکیدا، ئاژانسی رۆیتەرز بڵاویکردوەتەوە، بەهۆی بەکارهێنانی مۆبایل لەلایەن سەربازەکانی ئەمریکاوە، ئێران توانیویەی بەشێوەی راستەوخۆ و سات بە سات هەڵسەنگێنێت و سودی لێ وەربگرێت و توانیویەتی سەرکەوتن یاخود شکستی هێرشەکانی بزانێت.
سەرچاوەکان بە رۆیتەرزیان راگەیاندووە، رەنگە بەم نزیکانە بە فەرمانێک مۆبایل لە ژمارەیەک لە سەربازەکان بسەندرێتەوە.
فەرماندەی سێنتکۆم لە نامەکەیدا بە ئاماژەیەکی ناڕاستەوخۆ بۆ ڤیدیۆیەک، کە بەم دواییانە بە چاویلکەی زیرەکی مێتا لە راکردنی سەربازان بەرەو پەناگە لە کاتی هێرشی 17ی تەممووز بۆ سەر بنکەی ئاسمانیی لە ئوردن تۆمار و بڵاوکرابوەوە، داوای لە هەموو هێزەکان کرد، کە سەرنجی خۆیان لەسەر پاراستنی ئاسایشی ئۆپراسیۆنی بکەنە دوو هێندە و هێزەکانیان نەخەنە مەترسییەوە، بە بڵاوکردنەوەی گرتە ڤیدیۆییەکان لە تۆڕەکۆمەڵایەتییەکان.
پۆلیسی گەرمیان لەبارەی ونبوونی گەنجێک لە گەرمیان راگەیەنراوێکی بڵاوکردەوە و تێیدا هاتووە: لە ئەنجامی گەڕان و پشکنینەکان، تەرمی گەنجە ونبووەکە لە گوندی کۆکز دۆزرایەوە.
گەنجەکە ناوی (توانا وەلی)ـیە و تەمەنی 21 ساڵە، خێزاندارە و خاوەنی منداڵێکە.
عەقید سۆران محەمەد غەریب، وتەبێژی پۆلیسی گەرمیان رایگەیاند: ئەو گەنجەی چەند رۆژێک بوو دیار نەما بوو، تەرمەکەی لە گوندی 'کۆکز' دۆزرایەوە.
وتەبێژی پۆلیسی گەرمیان ئاماژەی بەوەداوە: دوای ئەوەی هەواڵی دیارنەمانی ئەو گەنجە گەیشتە پۆلیسی گەرمیان، هێزەکانی پۆلیسی ناحیەی کۆکز دەستبەجێ چوونە سەر شوێنی روداوەکە و دەستیان بە لێکۆڵینەوە کرد.
بەپێی زانیارییەکانی وتەبێژی پۆلیسی گەرمیان، لە ئەنجامی گەڕان و پشکنینەکان، تەرمەکەی لە گوندی کۆکز دۆزرایەوە، ئێستا لێکۆڵینەوە لەسەر هۆکار و وردەکارییەکانی روداوەکە بەردەوامە.
سەرۆكی دەستەی دەستپاكیی عێراق لە ئەنكەرەوە رایگەیاند، هیچ شوێنێكی پارێزراو بۆ گەندەڵكاران لە دەرەوەی عیراق نییە و دەبێت گەندەڵكاران بدرێنە دەست یاسا .
محەممەد عەلی لامی سەرۆكی دەستەی دەستپاكی عیراق كە بە یاوەری سەرۆك وەزیران سەردانی توركیای كرد لە ئەنكەرەوە رایگەیاند ، عیراق بە هەنگاوی جێگیرەوە بەرەو چەسپاندنی ژینگەیەكی ئارام بۆ گەشەپێدان و وەبەرهێنان هەنگاو دەنێت، ئەمەش بەهۆی هەوڵە نیشتمانییە كانەوەیە بۆ بەرەنگاربوونەوەی گەندەڵی
وتیشی تەواوكردنی ئەم هەوڵانە پێویستی بە هاوكارییەكی نێودەوڵەتیی هەیە بۆ گەڕاندنەوەی پارە بە تاڵانبراوەكانی عیراق كە براونەتە دەرەوەی وڵاتەكە .
جەختی لەوەش كردەوە ، جەنگی عیراق دژی گەندەڵی بەردەوامە و هیچ سنوورێكی نیە و لایەنە پەیوەندیدارەكانی عیراق سوورن لەسەر گرتنەبەری سەرجەم ڕێوشوێنە یاسایی و دیپلۆماسییە نێودەوڵەتییەكان بۆ بەدواداچوونی تۆمەتباران و سزادراوان و گەڕاندنەوەی سامانی گشتی، گەندەڵكارانیش هیچ شوێنێكی پارێزراویان نیە و بە دوایانەوە دەبن تا ئەو كاتەی لە رێی یاساوە سزا دەدرێن .
ئاژانسی رۆیتەرز ئاشكرای كرد ، ئێران لە چەند هەفتەی داهاتوودا سیستمی بەگریی ئاسمانیی چینی وەردەگرێت.
ئاژانسی رۆیتەرز بە پشتبەستن بە سێ سەرچاوەی ئاگادار، بڵاویكردەوە چاوەڕوان دەكرێت ئێران لە ماوەی چەند هەفتەی داهاتوودا یەكەمین سیستمی بەرگریی ئاسمانیی چینی وەربگرێت، ئەوەش لە چوارچێوەی هەوڵەكانیدا بۆ بەهێزكردنی بەرگرییەكانی لە میانەی جەنگ لەگەڵ ئەمریكادا.
ئاژانسەكە ئاشكراشیكردووە، گرێبەستەكە كڕینی 300 بۆ 400 سیستمی بەرگریی لەخۆ دەگرێت و بەهاكەی لە نێوان 60 تا 70 ملیۆن دۆلاردایە.
ڕۆیتەرز ئاشكراشیكردووە، ڕێككەوتنەكە لە ڕێگەی كۆمپانیایەكی ئێرانیەوە لە هۆنگ كۆنگ ئەنجام دراوە
لە بەرامبەردا، وەزارەتی دەرەوەی چین ئەو راپۆرتانەی بە بێ بنەما وەسف كردووە.
پێگەی پۆلەتیكۆ بڵاویكردەوە، ئەمریكا داوای لە بەریتانیا و فەڕەنسا كردووە سەركردایەتی هاوپەیمانی رێڕەوی دەریاوانی بكەن و یارمەتیدەربن لە كردنەوەی گەروی هورمز.
پێگەی پۆلەتیكۆ لە زاری چوار لێپرسراوی ئەمریكی و بەریتانیەوە بڵاویكردەوە، پیت هێگسیس وەزیری جەنگی ئەمریكا داوا لە بەریتانیا و فەڕەنسا دەكات بۆ سەركردایەتیكردنی هاوپەیمانێتی دەریاییە هاوكاربن و یارمەتیدەربن بۆ كردنەوەی گەروی هورمز.
ئاماژەی بەوەشكردووە، ئەم هەوڵەی ئەمریكا چڕترینە كە داوای هاوكاری لەو دوو وڵاتە دەكات و دەیەوێت ئەوانیش رۆڵیان هەبێت لە دابەزاندنی نرخی سوتەمەنی.
باسی لەوەشكردووە، لێپرسراوانی ئەمەریكی و بەریتانی ئامانجیانە كۆنفرانسێكی نێودەوڵەتی لە لەندەن رێكخەن كە تێیدا رۆڵی وڵاتان دیاری بكرێت و مینەكان لە گەروی هورمز لابەرن.
ئەمریكا و سعودیە هێرشێكی هاوبەشیان بۆ سەر پێگەی گروپە چەكدارەكانی عیراق لە چەند پارێزگایەك ئەنجامدا.
سوپای ئەمریكا و وەزارەتی بەرگری سعودیە رایانگەیاند، بەرەبەیانی ئەمرۆِ، هێرشی ورد و ئامانجداریان دژی چەند پێگەیەكی پێگەی گروپە چەكدار لە خاكی عیراقدا ئەنجامداوە، ئەمەش وەك وەڵامێك بۆ ئەو هێرشانەی كە ئاراستەی هێزەكانی ئەمریكا و ژێرخانی نەوتی سعودیا كراون.
فەرماندەیی ناوەندیی ئەمریكا 'سێنتكۆم' بڵاویكردەوە، هێرشەكان ناوچەكانی رۆژهەڵاتی عیراقیان كردە ئامانج، دوای ئەوەی لە ماوەی 72 سەعاتی رابردوودا زیاتر لە 30 هێرشی درۆنی لەلایەن سوپای پاسدارانی ئێرانەوە ئاڕاستە كراون.
وەزارەتی بەرگری سعودیەش جەختیكردەوە، ئەو هێرشانە لە چوارچێوەی مافی ڕەوای وڵاتەكەدایە بۆ بەرگریكردن لە خۆی و پاراستنی ئاسایش و سەروەرییەكەی، هاوكات رایگەیاند كە دەسەڵاتی ریاز بەردەوام دەبێت لە ڕێگریكردن لە هەڕەشەكان.
لای خۆشیەوە، حەشدی شەعبی رایگەیاند، سەرەكیترین بارەگایان لە شاری بەسرە كەوتووەتە بەر هێرشێكی ئاسمانی بەهۆیەوە چەندین چەكداریان كوژران و برینداربوون، و هۆشداریدا لەوەی، ئەو رەوشە پێشێلكارییەكی مەترسیدارە بۆ سەر سەروەری عیراق.
وەزارەتی سامانە سروشتییەكان پێنج بڕیاری بۆ چارەسەركردنی كێشەی كەمی بەنزین لە سەرتاسەری هەرێمی كوردستان دەركرد، دیارترینیان زیادكردنی بڕی بەنزینی نۆرماڵی 750 دیناری.
بە سەرپەرشتی كەمال محەمەد، وەزیری سامانە سروشتییەكانی هەرێم بە وەكالەت، كۆبوونەوەیەكی نەوت و كانزاكانی وەزارەت بەڕێوەچوو و تێیدا بۆ چارەسەركردنی كێشەی كەمی و هاوسەنگكردنی نرخی بەنزین چەند بڕیارێكی دەركران.
لە بڕیاری یەكەمدا هاتووە، هەموو هەوڵێك دەدەن بۆ زیادكردنی پشكی هەرێم لە نەوتی خاو لەلایەن حكومەتی عیراقەوە و پێویستە هەرێم رۆژانە بەغداد 126 هەزار و 700 بەرمیل بنێرێت بۆ هەرێم.
وەزارەتی سامانەسروشتییەكان بڕیاریداوە، بڕی بەنزینی نۆرماڵی حكومی 750 دیناری زیادبكرێت و رۆژانەش چاودێری نرخ و كوالێتی جۆرەكانی بەنزینی بازرگانی بكرێت و كاری لیژنەكانی چاودێری و بەدواداچوونی بەڕێوەبەرایەتی نەوت و كانزاكانیش زیاد بكرێت، بۆ پاراستنی كوالێتی جۆرەكانی بەنزین.
دواین بریاری وەزارەتی سامانە سروشتییەكانیش بریتیە لە پێشكەشكردنی هەموو ئاسانكارییەك بۆ هاوردەكردنی بەنزین و ماددەی كیمیاوی لەسەر بنەمای مەرج و رێنماییەكانی وەزارتی سامانە سروشتییەكان.
دەزگای ئاسایشی هەرێم راگەیەنراوێکی لەبارەی دەستگیرکردنی دوو تیرۆرستی داعش بڵاوکردەوە و تێیدا هاتووە: تیرۆرستەکان لە سنوری پارێزگای سلێمانی خۆیان حەشاردابوو.
دەزگای ئاسایشی هەرێم رایگەیاند، بەڕێوەبەرایەتی گشتیی ئۆپراسیۆنەكانی ئاسایش بەهەماهەنگی لەگەڵ دەزگای ئاسایشی نیشتمانیی عیراق، توانییان لەسەر بنەمای زانیاری هەواڵگری دوو تیرۆریستی داعش، دەستگیربکەن.
ئەوەشی روونکردووەتەوە، تیرۆرستەکان کە بەپێی ماددەی (چوار)ـی تیرۆر داواکراو بوون، لەسنوری پارێزگای سلێمانی خۆیان حەشاردابوو.
ئاماژەی بەوەشداوە، بەپێی تایبەتمەندی شوێنی تاوان و بەمەبەستی تەواوکردنی رێکارەکانی لێکۆڵینەوە هەردوو تیرۆریست لەڕۆژی 28ـی 7ـی 2026 رادەستی دەزگای ئاسایشی نیشتمانیی عیراق کران.