رۆژهەڵاتی ناوەڕاست
دوای بانگەوازەكەی ئۆجەلان بۆ ئاشتی، وەفدی ئیمراڵی سەردانی لایەنەكانی توركیا دەكاتەوە و ئەمڕۆش لەگەڵ جەهەپە و حزبی زەحمەتكێشان و دەڤا كۆدەبێتەوە.
پارتی یەكسانی و دیموكراسی گەلان "دەم پارتی" رایگەیاندوە، دوای بانگەوازەكەی عەبدوڵا ئۆجەلان رێبەری زیندانیكراوی "پەكەكە" بۆ پرۆسەی ئاشتی، ئەمڕۆ وەفدی ئیمراڵی جارێكی تر سەردانی لایەنە سیاسییەكانی توركیا دەكاتەوە، تولای حاتیمئۆغلاری و تونجەر باقرخان هاوسەرۆكانی دەم پارتی لەگەڵ حزبی زەحمەتكێشان و پارتی گەلی كۆماری "جەهەپە"و پارتی دەڤا كۆدەبنەوە.
بەپێی كارنامەی كۆبوونەوەكان، رۆژی چوارشەممەش وەفدی ئیمراڵی لەگەڵ پارتی كرێكارانی توركیا و سەعادەت و پارتی ئایندە كۆدەبێتەوە، رۆژی 17ی مانگیش لەگەڵ ئاكەپە و مەهەپە كۆدەبێتەوە.
پێشتریش وەفدی ئیمراڵی لە 28ی 12ی 2024، كە پێكهاتبوون لە سری سورەیا ئۆندەر و پەروین بوڵدان، لە ئیمراڵی لەگەڵ ئۆجەلان كۆبوونەوە، دواتر وەفدەكە لە 2ی 1ی 2025، كۆبوونەوەكانیان لەگەڵ لایەنە سیاسییەكانی پەرلەمانی توركیا دەستپێكرد.
دەوڵەت باخچەلی راگەیەنراوێكی لەبارەی بانگەوازەكەی ئۆجەلان بڵاوكردەوە
سەرۆكی مەهەپە دەڵێت، دەرفەتێكی زێڕین لەبەردەستدایە و نابێت پشتگوێ بخرێت و پێویستە بانگەوازەكەی ئۆجەلان بۆ چەكدانان یەپەگەش بگرێتەوە.
دەوڵەت باخچەلی سەرۆكی پارتی نەتەوەپەرستی توركیا "مەهەپە" لە راگەیەنراوێكدا لەبارەی بانگەوازەكەی عەبدوڵا ئۆجەلان ئاماژەی بەوە كردووە، ئەو شەڕ و وێرانكارییە مەترسیدارانەی كە حكومەت نزیكەی نیو سەدەیە بەڕێوەی دەبات، تیرۆر و جیاكارییە، بە هاوكاری و بە دەرفەتەكانی عەقڵیەتی جەماوەری و بە كردەوەی ڕاستگۆیانە، ڕاستەقینە، ئارامگرتن، وەفادارنە و دڵنیاكەرەوە هەموو ئەوانە دەڕوێننەوە.
دەشڵێت، بۆ رێگرتن لە هەر روداوێك و لێكدانەوەی هەڵە و رێگری لە هەر پێشهاتێكی نەرێنی و هەستیارانە، رێبازێكی بەرپرسیارانە و وریایی پێویستە، لەبەرئەوەی دەرفەتێكی زێڕینیان لەبەردەستدایە كە نابێت پشتگوێ بخرێت و پێشێل بكرێت.
جەختیشیكردوەتەوە، پەكەكە و گروپە سەربەخۆكانی دەبێت دەستبەجێ و بێمەرج چەك دابنێن، راگەیاندنی ئاگربەستی پەكەكە هاوسەنگ و شیاو نییە، بانگەوازەكەی ئۆجەلان بۆ چەك دانان پێویستە یەكینەكانی پاراستنی گەل (یەپەگە)ش بگرێتەوە.
سەبارەت بە دەم پارتیش رایگەیاندوە، ئەگەر دەم پارتی بە پەیامەكانی، بە بەرپرسیارێتی و پەیامی درێژە بە هەنگاوە ئاشتیخوازەكانی بدات، دەتوانێت ببێتە حزبێكی سەرەكی توركیا.
ژمارەی ئەو کەسانەی بەهۆی هێرشەکانی سوپای ئیسرائیل بۆ سەر غەززە کوژراون، بۆ نزیکەی 49 هەزار کەس بەرزبووەتەوە.
وەزارەتی تەندروستی فەلەستین لە راگەیاندراوێکدا دوایین ئاماری لەباری ژمارەی گیانلەدەستدان لە کەرتی غەززە بڵاوکردەوە و ئاماژە بۆ ئەوەکردووە، ژمارەی ئەو کەسانەی لە 7ـی تشرینی یەکەمی ساڵی 2023 وە تا ئێستا لە ئەنجامی ھێرشەکانی ئیسرائیل بۆ سەر کەرتی غەززە کوژراون، بۆ 47 ھەزار و 458 کەس بەرزبووەتەوە، هاوکات ژمارەی بریندارەکانیش گەیشتووەتە، 111 ھەزار و 897 کەس.
راشیگەیاند، لە 24 سەعاتی رابردوودا تەرمی پێنج فەلەستینی دیکە لە ئەنجامی ھێرشەکانی ئیسرائیل بۆ سەر کەرتی غەززە کوژراون و تەرمەکانیان لەژێر داروپەردووی باڵەخانە رووخاوەکاندا دەرھێندراون.
ئەوەش خراوەتەڕوو، تەرمی ئەو پێنج کەسە لەگەڵ چەند بریندارێکی دیکە، گواستراونەتەوە بۆ نەخۆشخانەکانی کەرتی غەززە.
ئاژانسی هەواڵیی رەسمی سوریا رایگەیاند، ھێزێکی زۆری ئەمنی لە پارێزگای ئیدلب-ەوە بە ئامانجی کۆنترۆڵکردنی دۆخەکە و دەستگیرکردنی چەکدارەکانی رژێمی پێشووی بەشار ئەسەد رەوانەی پارێزگاکانی لازقییە و تەرتوس کراون.
ئاژانسی ھەواڵی رەسمی سوریا "سانا" بڵاویکردەوە، ھێزێکی زۆری ئەمنی لە پارێزگای ئیدلب-ەوە رەوانەی پارێزگاکانی لازقییە و تەرتوس کراون، کە ماوەی چەند رۆژێکە رووبەڕووی گرژیی و ئاڵوزیی بوونەتەوە، ئەوەش بەھۆی رووبەڕووبوونەوەی نێوان ھێزە ئەمنییەکانی دەسەڵاتی نوێی سوریا و پاشماوەكانی رژێمی رووخاوی بەشار ئەسەد.
رۆژی ھەینی رابروو، لە ئەنجامی رووبەڕووبوونەوەی ھێزە ئەمنییەکانی سەر بە دەسەڵاتی نوێی سوریا و پاشماوەكانی رژێمی بەشار ئەسەد لە پارێزگاکانی لازقییە و تەرتوس، 50 کەس لە ھەردوولا کوژراون.
ئاماری كوژراوانی شەڕ و پێكدادانەكانی چەند رۆژی رابردووی سوریا هەزار كەسی تێپەڕاند، بەهۆی ناسەقامگیری ناوچەكەشەوە هەزاران كەس ئاوارەی لوبنان بوون.
روانگەی سوری بۆ مافەكانی مرۆڤ لە دوایین ئاماریدا بڵاویكردەوە، ژمارەی كوژراوانی مەدەنی شەڕ و پێكدادانەكانی ناوچە كەنارییەكانی سوریا گەیشووەتە 745 كەس، هاوكات 148 كەس لە چەكدارانی عەلەوی و 125 كەسیش لە ئەندامانی هێزە ئەمنییەكان و گروپە چەكدارەكانی سوریا كوژراون.
هاوكات لە ئەنجامی شەڕی نێوان چەكدارە عەلەوییەكان و هێزە ئەمنییەكانی ئیدارەی نوێی سوریا و گروپە چەكدارەكان، زیاتر لە 10 هەزار هاووڵاتی ناوچە كەنارییەكانی خۆرئاوای سوریا ئاوارەی پارێزگای عەكاری لوبنان بوون كە زۆرینەی دانیشتوانەكەی عەلەوین، تاكو ئێستاش بەهۆی نەبوونی ئاسایشەوە پێنج گوندی لازقیە چۆڵكراون.
یەکێتی ئەوروپا رایگەیاند ئیدانەی هەر هەوڵێک دەکەین کە دژ بە سەقامگیری و تێکدانی گواستنەوەی ئاشتیانەی دەسەڵاتە لە سوریا.
لە نوێترین کاردانەوەیدا یەکێتی ئەوروپا بڵاوی کردەوە، داوا لە هەموو لایەنە دەرەکییەکان دەکەین ڕێز لە سەروەری و یەکگرتوویی و یەکپارچەیی خاکی سوریا بگرن.
لە راگەیەندراوەکەی یەکێتی ئەوروپادا هاتووە: پێویستە خەڵکی مەدەنی لە هەموو بارودۆخێکدا بپارێزرێن و ڕێز لە یاسا مرۆییە نێودەوڵەتییەکان بگیرێت.
ئاماژەی بەوەشداوە: ئیدانەی ئەو هێرشانە دەکەین کە دەوترێت لەلایەن لایەنگرانی ئەسەدەوە کراوەتە سەر هێزەکانی حکومەتی کاتی لە کەناراوەکانی سوریا.
لە چەند رۆژی رابردوودا، شەڕ و پێکدادان لەنێوان گرووپە چەکدارەکانی سەر بە ئەحمەد شەرع و گرووپە چەکدارە عەلەوییەکان لە پارێزگای لازقییە و ناوچەکانی جەبەلە و قەرداحە و ناوچە کەناراوییەکانی سووریادا روویاندا و لە دواین ئاماریدا روانگەی سووری بۆ مافەکانی مرۆڤ، دوێنێ شەممە، وتی، لەچەند رۆژی رابردوودا لەلایەن گرووپە چەکدارەکانی سەر بە ئەحمەد شەرعەوە 532 هاوڵاتیی عەلەوی مەدەنی، کوژراون.
یەکێتی ئەوروپا لە 27 وڵاتی ئەندام پێکدێت کە بریتین لە:
1. ئەڵمانیا
2. فەرەنسا
3. ئیتاڵیا
4. ئیسپانیا
5. پۆڵەندا
6. ڕۆمانیا
7. هۆڵەندا
8. بەلجیکا
9. یۆنان
10. چیک
11. پورتوگال
12. سوید
13. هەنگاریا
14. نەمسا
15. بولگاریا
16. دانیمارک
17. فینلەندا
18. سلۆڤاکیا
19. ئیرلەندا
20. کرواتیا
21. لیتوانیا
22. سلۆڤینیا
23. لاتڤیا
24. ئیستۆنیا
25. قوبرس
26. لوکسەمبۆرگ
27. ماڵتا
بەریتانیا پێشتر ئەندامی یەکێتی ئەوروپا بوو، بەڵام لە ساڵی 2020 بە فەرمی لە یەکێتی ئەوروپا کشایەوە (برێکسیت)
روانگەی سووری بۆ مافەکانی مرۆڤ رایگەیاند، لە میانی "ئۆپراسیۆنی پاکتاوکردن و تۆڵەکردنەوە"دا لە ناوچە عەلەویی نشینەکان، لەچەند رۆژی رابردوودا لەلایەن گرووپە چەکدارەکانی سەر بە ئەحمەد شەرعەوە 532 هاوڵاتیی عەلەوی مەدەنی، کوژراون.
لە چەند رۆژی رابردوودا، شەڕ و پێکدادان لەنێوان گرووپە چەکدارەکانی سەر بە ئەحمەد شەرع و گرووپە چەکدارە عەلەوییەکان لە پارێزگای لازقییە و ناوچەکانی جەبەلە و قەرداحە و ناوچە کەناراوییەکانی سووریادا روویاندا ووەزارەتی بەرگریی سووریاش رایگەیاند، لەپێناو رێگەگرتن لە پێشێلکارییەکان بەرامبەر بە عەلەوییەکان، سەرجەم رێگەکانی چوونیان بۆ ناوچە کەناراوەکان داخستووە و هەوڵی بەرقەراربوونی ئاسایش دەدەن.
روانگەی سوریش ئاماژەی بەوەداوە، 29 کۆمەڵکوژی دیکۆمێنت کراوە و ئەوەی رویداوە جینۆساید بووە.
ئایەتوڵڵا خامنەیی رابەری کۆماری ئیسلامی ئێران رایگەیاند: پێداگریی هەندێک لە حکوومەتە داگیرکەرەکان بۆ دانوستان، بۆ چارەسەرکردنی کێشەکان نییە، بەڵکو بۆ زاڵبوون و سەپاندنی ویستی خۆیانە. کۆماری ئیسلامی ئێران، بە دڵنیاییەوە داواکارییەکانیان قبوڵ ناکات.
لە گرتەیەکی ڤیدیۆیدا کە تیایدا خامنەیی وتار دەدات بۆ بەشێک لە بەرپرسانی سوپاو حکومەت، دەڵێ: هەرسێ وڵاتی ئەوروپایی رایدەگەیەنن کە ئێران بەڵێنە ئەتۆمییەکانی خۆی لە ڕێکخراوی JCPOA جێبەجێ نەکردووە. لەم روەوە، پێویستە یەکێکیان بپرسێت، ئایا ئێمە بەڵێنەکانمان لە JCPOA جێبەجێ کردووە؟ نەخێر بێ بەڵێن بوون.
ئەم لێدوانانە لە کاتێکدایە کە سەرۆکی ئەمریکا بە ئاماژەدان بەوەی کە ئەمریکا لەگەڵ ئێران گەیشتووەتە دوا ساتەکانی خۆی، رایگەیاندووە، کە بەم زووانە شتێک لەگەڵ ئێران رودەدات.
دۆناڵد ترەمپ باسی لەوەشکردووە کە رۆژی چوارشەممە نامەیەکی بۆ ئایەتوڵڵا خامنەیی نووسیوە و بانگهێشتی کردووە بۆ دانوستان.
ئەمڕۆ شەممە، فەرماندەیی ناوەندیی هێزەکانی ئەمریکا (سێنتکۆم)، لە ئێکس راگەیەندراوێکی بڵاوکردەوە کە تیایدا هاتووە: " بەهاوکاری و رێنمایی هێزەکانمان، هێزەکانی سوریای دیموکرات (هەسەد) توانیان لە هەڵمەتێکدا سەرکردەیەکی رێکخراوی داعش لە سوریا دەستگیربکەن.
لە راگەیەندراوەکەی سێنتکۆم دا هاتووە: لە میانی ئۆپراسیۆنەکەدا هێزەکانی سوریای دیموکرات دەستیانگرتووە بەسەر چەندین جۆری چەکدا، کە بریتین لە ژمارەیەک قەناس و 47 نارنجۆکی دەستی و چەک و تەقەمەنی جۆراوجۆر.
ئاماژەش بەوەدراوە: ئەم ئۆپراسیۆنە بە هاوکاری (هەسەدە) بەشێکە لە هەڵمەتی شکست هێنان بە داعش و تێکدانی تۆڕەکانیان و پێشگرتن لە سەرهەڵدانەوەی ئەو تاقمە تیرۆریستییە لە ناوچەکەدا.
وابڕیارە رۆژی دووشەممە 17ـی ئازار، وەفدی دەمپارتی سەردانی ئاک پارتی(حزبەکەی ئەردۆغان) بکەن و پێوەند بە پرسی ئاشتی و گفتوگۆکردن لەسەر پەیامەکەی ئۆجەلان کۆببنەوە.
توڵای هاتیمۆغوللاری و تونجەر باکرهان هاوسەرۆکانی دەمپارتی، سەرۆکایەتی وەفدەکە دەکەن و تا ئێستا هیچ زانیارییەک لەبەرچاو نییە سەبارەت بە وردەکارییەکان.
بەگوێرەی ئەو زانیارییانەی ئاژانسی هەواڵی ئانکا بڵاوی کردووەتەوە، 17ـی ئازار، هاوسەرۆکانی دەم پارتی و وەفدی هاوڕێیان، لەگەڵ ئاک پارتی و مەهەپە(حزبەکەی دەوڵەت باخچەلی) کۆدەبنەوە و تاوتوێی پەیامەکەی ئۆجەلان دەکەن، سەبارەت بە پرسی ئاشتی لە تورکیا و چەکدانانی پەکەکە.
شایەنی ئاماژە پێدانە، دەوڵەت باخچەلی، سەرۆکی مەهەپە لە كۆبوونەوەی پارتەكەی لە پەرلەمانی توركیا لە 26ی مانگی 11 ی 2024 وتی، "چاوەڕێ دەکەین کۆبوونەوەی رووبەڕوو لە نێوان ئیمراڵی و دەم پارتی بەبێ دواکەوتن بەڕێوەبچێت." دواتر وەفدی دەم پارتی لە 28ی مانگی 12 ی 2024 لەگەڵ ئۆجەلان لە ئیمڕاڵی كۆبوونەوە و پەیامێكیان بڵاوكردەوە و دوا بەدوای ئەوەش دیدار و پەیامەکان درێژەیان کێشا تا رۆژی 27ـی 2ـی 2025، وەفدی دەم پارتی بۆ ئیمرالی، لە کۆنفرانسێکی رۆژنامەوانیدا نوێترین پەیامی ئۆجەلانیان خوێندەوە کە تیایدا داوای چەکدانان لە پەکەکە دەکات و دەڵێت: سەردەمی ئاشتی و دیموکراتیە.
ئیسرائیل نیگەرانە لە دانوستانی راستەوخۆی حەماس و ئەمریكا و لەسەر ئەو بابەتەش دەمەقاڵێ لە نێوان نوێنەری ئەمریكا و كەسێكی نزیك لە ناتانیاهۆ دروستبووە.
ماڵپەری ئەكسیۆسی ئەمریكی رایگەیاند، دانوستانی راستەوخۆی نێوان بزوتنەوەی حەماس و ئەمریكا، دەسەڵاتدارانی ئیسرائیل بە تەواوی نیگەرانكردووە و پێیان وایە پێویستە بە مەرج دانوستان بكرێت.
دەشڵێت، رۆن دێرمیر كە كەسێكی نزیكی بنیامین ناتانیاهۆیە لەگەڵ ئادام بۆیلەر نوێنەری تایبەتی ئەمریكا بۆ كاروباری بارمتەكان بە تەلەفۆن گفتوگۆیان لەسەر ئەو بابەتە كردووە و دەمەقاڵێ لە نێوانیان دروستبووە.
وتیشی، ئەمریكا لە بەرانبەر گەڕاندنەوەی تەرمی یەكێك لە بارمتەكان بە حەماسی راگەیاندووە چەند بەندكراوێكی فەلەستنی ئازاد دەكات و ئیسرائیلیش بەو بەڵێنەی ئەمریكا رازی نییە و ناتانیاهۆ نیگەرانە لەوەی پشتگوێ بخرێت.
ئەوەش لەكاتێكدایە، رۆژی پێنج شەممەی رابردوو ئاژانسی رۆیتەرز رایگەیاند، ئەمریكا و حەماس دانوستانیان كردووە و گتوگۆكانیشیان ئەرێنی بوون.
وەفدێكی حەماس بۆ گفتوگۆكردن لەسەر قۆناغی دووەمی ئاگربەستی غەززە گەیشتە قاهیرە و بڕیارە سبەینێ لەوبارەیەوە، لەگەڵ لێپرسراوانی باڵای میسر زنجیرەیەك كۆبوونەوە ئەنجام بدات.
ئاژانسی فرانس پرێس بڵاویكردەوە، وەفدەكەی بزووتنەوەی حەماس بە سەرۆكایەتی محەمەد دەروێش كە یەكێكە لە سەركردە باڵاكانی حەماس گەیشتوونەتە قاهیرە، بۆ چارەسەركردنی كێشەكانی بەردەم قۆناغی دووەمی ئاگربەست لە غەززە.
رۆژی 1ـی ئەم مانگە قۆناغی یەكەمی ئاگربەستی غەززە كۆتاییهات، ئیسرائیلیش لەو كاتەوە تا ئێستا رێگری دەكات هاوكارییە مرۆییەكان بگاتە خەڵكی غەززە، هەروەها رەتی دەكاتەوە قۆناغی دووەمی ئاگربەست دەستپێبكات و زیاتر لە جارێكیش هەڕەشەی دەستپێكردنەوەی شەڕی كردووە.
لەبەرانبەردا حەماسیش هۆشداری داوە لەوەی ئەگەر ئیسرائیل لەگەڵیان رێكنەكەوێت، شەڕ دەستپێدەكەنەوە و ئەگەری كوشتنی بارمتەكانیش دەهێننە ئاراوە.
توركیا بەردەوامە لە بۆردومانكردنی بەنداوی تشرین، هاووڵاتییانیش نزیكەی دوو مانگە پشتێنی مرۆییان بۆ پاراستنی بەنداوەكە دروستكردووە.
سوپای توركیا دەوروبەری بەنداوی تشرینی بۆردومانكرد، بەیانی ئەمڕۆ بەشێكی دانیشتوانی شارەكانی قامیشلۆ و دێرك و تربەسپی و عامودا و تل حەمیس لە كانتۆنی جزیرە، رۆیشتنە بەنداوی تشرین بۆ بەشداریكردن لە پاراستنی بەنداوەكەدا.
ئەوەش لە كاتێكدایە ئەمڕۆ 59 رۆژە بەشێكی زۆری دانیشتوانی هەرێمەكانی باكوور و رۆژهەڵاتی سوریا، بۆ پشتیوانیكردن لە هێزەكانی سوریای دیموكرات "هەسەدە" و پاراستنی بەنداوەكە لە هێرشەكانی توركیا و گروپە چەكدارەكان، روویان لە بەنداوی تشرین كردوە، لەو ماوەیەشدا بەهۆی بۆردومانەكانی توركیاوە 25 هاووڵاتی شەهید بوون و 221 هاووڵاتی تریش برینداربوون.
ئیدارەی خۆبەڕێوەبەری لە باكور و رۆژهەڵاتی سوریا راگەیەنراوێكی سەبارەت بە شەڕ و پێكدادانەكانی سوریا بۆ رای گشتی بڵاوكردەوە و ئاماژەی بۆ ئەوەكردووە، گرژی و پێكدادان لەنێوان گروپە چەكدارەكانی سەر بە رژێمی پێشوی سوریا و هێزەكانی حكومەتی نوێی سوریا پەرە دەسەنێت.
راشیگەیاندووە، ئیدارەی خۆبەڕێوەبەری لە باكور و رۆژهەڵاتی سوریا نیگەرانە لە شەرو پێكدادانەكان و هۆكاری گرژییەكانیش دەگەڕێنێتەوە بۆ خوێندنەوەی هەڵەی واقیعی سوریا لەلایەن دەسەڵاتدارانی دیمەشق و رەچاونەكردنی هەستیاریی رەوشی سوریا.
ئیدارەی خۆبەڕێوەبەری داوا لە هەموو لایەنەكانی سوریا دەكات ئەو گرژی و ئاڵۆزییانە رابگرن، چونكە بە تەنیا خەڵكی سوریا باجی پێكدادانەكان دەدات.
جەخنی لەوەشكردوەتەوە، سوریا پێویستی بە دیالۆگێكی نیشتمانی راستەقینە هەیە بۆ گفتوگۆكردن لەسەر ڕێگاكانی گەیشتن بە سەلامەتی و چارەسەركردنی هەموو ئەو دژایەتی و كێشە و گرفتانەی كە لە نێوان هێزەكانی سوریادا هەڵپەسێردراون، هاوكات داوا لە گەلی سوریاش دەكات لە پشتی ئەو كەسانەوە رانەوەستن كە هەوڵی هەڵگیرسانی شەڕی ناوخۆ دەدەن.
گروپێكی چەكدار، كە بەپێی زانیارییە میدیاییەکان، سەر بە رژێمی بەشار ئەسەدن، هێرشیان بۆ سەر هێزەكانی حكومەتی نوێی سوریا دەستپێكرد و لە پەلامارێكدا لە نزیك شاری جەبلە 19 كەس كوژران.
روانگەی سوری بۆ مافەكانی مرۆڤ رایگەیاند، گروپێكی چەكدار كە دەوترێت سەر بە رژێمی بەشار ئەسەدن لە نزیك گوندەكانی (بێت عانا و دالیە) لە دەوروبەری شاری جەبلەی سەر بە پارێزگای لازقیە لە رۆژئاوای سوریا، لە بۆسەیەكدا هێرشیان كردە سەر بازگەیەكی سەر بە بەڕێوەبەریەتی ئاسایشی گشتی و ئۆتۆمبێلی چەند هاوڵاتییەكی مەدەنی، بەهۆیەوە 19كەس لە هێزەكانی ئاسایش و هاووڵاتیانی مەدەنی كوژران.
هەروەها ئاسایشی گشتی سوریا رایگەیاند، دوای بەدواداچوون و چاودێریكردنی چڕ توانیویانە (لیوا ئیبراهیم حەویجە) سەرۆكی پیشووی دەزگای هەواڵگری ئاسمانی سوریا دەستگیر بكەن كە تۆمەتبارە بە ئەنجامدانی هێرشەكە و لە رابردووشدا چەندین كەیسی تیرۆری بۆ كراوەتەوە، لەوانە تیرۆركردنی (كەمال جومبلات) لە سەردەمی رژێمی حافز ئەسەددا.
وەزارەتی بەرگری سوریا راشیگەیاند، هێزێكی گەورەی پشتیوانیان بۆ ناوچەكە ناردووە بۆ پاراستنی ئاسایش و ئاساییكردنەوەی رەوشەكە.
لای خۆشییەوە، سەرۆکی روانگەی سوری بۆ مافەکانی مرۆڤ رایگەیاندووە؛ گرژی و ئاڵۆزییەکان لە سەر دەستگیرکردنی کەسێک لەلایەن ئاسایشەوە دروستبووە.
دوانیوەڕۆی ئەمڕۆ لە بنکەیەکی سەربازی سەر بە سوپای پاسدارانی لە تاران، تەقینەوەیەک رویدا کە بووە هۆی کوژرانی کەسێک و برینداربوونی 10کەسی دیکە.
هێزی دەریایی سوپای پاسداران لە راگەیەندراوێکدا ئامەژەی بە ئاگرکەوتنەوەیەک داوە و رایگەیاندووە، "بەهۆی ئاگرکەوتنەوە لە یەکێک لە بنکەکانیان، کەسێک کوژراوە و چەند کەسی دیکەش بریندار بوون"، بەڵام ئاماژەی بە شوێن و هۆکاری تەقینەوەکە نەکردووە.
وردەکاری روداوەکە:
جەلال مەلەکی، گوتەبێژی ئاگرکوژێنەوەی تاران، لەبارەی روداوەکەوە رایگەیاند، "دوانیوەڕۆی ئەمڕۆ ژوورێکی کانێکس (پلاستیکی) لە ناوەندی سەربازی لە شاڕێی یاسینی سەرووی ناوچەی کولاهدوز ئاگری گرتووە و تیمەکانی سێ وێستگەی ئاگرکوژێنەوە بۆ کوژاندنەوەی رەوانەی شوێنەکە کران."
مەلەکی وتیشی "بەهۆی داخراوی شوێنەکە و گەرمای زۆر، ژوورەکە تەقیوەتەوە و بەهۆیەوە سەربازێک کوژراوە و 10ی دیکەش بریندار بوون."